Kuv Puas Ntseeg?
Yog hais tias tej yam no muaj tseeb, ces peb tau zaj xov txog kev cia siab thiab kev pab zoo tshaj plaws hauv lub ntiaj teb no.
Thaum lub Peb Hlis Ntuj hnub tim 30, ib xyoo tas los lawm, Ethan Carnesecca, ib tug me tub hauv American Fork, Utah, tau mus pw hauv tsev kho mob vim nws mob ntsws dej. Ob hnub tom qab ntawd, nws haj yam nkees heev thiab tau ya nyob hoom mus rau lub hoob maum loj rau me nyuam yaus Primary Children’s Hospital hauv Salt Lake City. Nws niam, Michele, txhawj nws heev thiaj zaum pem taub hau nyob hoom nrog nws mus. Lawv muaj ib lub mloog thiab tham tau rau nws khwb taub hau. Nws yeej hnov cov nais maum kho nws tub uas nkees heev heev, thiab Michele paub tias tus tub Ethan mob hnyav heev vim nws yog ib tug nais maum rau me nyuam yaus thiab.
Thaum lub sij hawm no, Michele pom tias lawv tab tom ya saum toj lub Tuam Tsev Draper. Nyob rau saum, nws tig ntsia nram hav thiab kuj pom tau lub Tuam Tsev Jordan River, lub Tuam Tsev Oquirrh Mountain, thiab deb me ntsis tom ntej ho pom lub Tuam Tsev Salt Lake thiab. Hauv nws lub siab nws cia li xav hais tias: “Koj puav ntseeg los tsis ntseeg?”
Ntawm qhov kev kawm no nws piav hais tias:
“Kuv tau kawm txog tej koob hmoov hauv lub tuam tsev thiab [tias] ‘tsev neeg nyob mus ib txhis’ hauv Koom Haum Me Nyuam Yaus thiab hauv Koom Haum Ntxhais Hluas. Kuv tau qhia tsab xov txog tsev neeg nyob mus ib txhis rau cov neeg zoo nyob rau hauv Mev teb thaum kuv mus ua ntxhais txib. Kuv tau ua kev cai sib khi nrog kuv tub khub nyob mus ib txhis hauv lub tuam tsev. Kuv tau qhia txog tsev neeg nyob mus ib txhis thaum kuv ua ib tug thawj coj hauv lub Koom Haum Ntxhais Hluas, thiab piav dab neeg txog tsev neeg nyob mus ib txhis rau kuv cov me nyuam thaum peb ua tsev neeg hmo ua ke. KUV YEEJ PAUB NTAG, tiam sis KUV PUAS NTSEEG mas? Kuv qhov lus teb tshwm saib npaum li thaum lo lus nug tshwm hauv kuv lus paj hlwb: Tus ntsuj plig hais qhia meej rau kuv lus siab thiab paj hlwb tias kuv twb paub lawm—KUV YEEJ NTSEEG!
“Lub sij hawm ntawd kuv pib thov Vajtswv tag siab tag ntsws rau kuv Leej Txiv Saum Ntuj Ceeb Tsheej, ua nws tsaug, vim kuv paub thiab ntseeg tias ib tse neeg yeej nyob mus ib txhis tiag tiag. Kuv ua nws tsaug rau Nws tus Tub, Yexus Khetos, tus uas ua kom muaj txhua yam tsav. Kuv uas Nws tsaug rau kuv tus tub, thiab kuv qhia kuv Leej Txiv Saum Ntuj Ceeb Tsheej tias yog nws yuav tsum coj kuv tus me tub rov qab mus saum Ntuj Ceeb Tsheej, ua li ntawd los tau. Kuv ntseeg kuv Leej Txiv Saum Ntuj Ceeb Tsheej tag nrho, thiab kuv paub tias kuv yeej yuav pom Ethan dua. Kuv zoo siab heev tias thaum muaj xwm txheej li no los, kuv paub THIAB ntseeg tias txoj moo zoo yeej muaj tseeb. Kuv tau kev kaj siab lug.”1
Ethan pw tsev kho mob tau ntau lub lim piam, tau txais kev saib xyuas zoo ntawm cov kws kho mob. Tej kev thov Vajtswv, yoo mov, thiab kev ntseeg los ntawm tsev neeg, ntxiv rau tej kev tu saib xyuas ntawm cov kws kho mob, ua rau nws zoo thiab rov qab mus tsev mus nrog nws tsev neeg nyob ua ke. Niaj hnub nim no, nws yeej noj qab nyob zoo.
Lub sij hawm no qhia rau Michele tias nws paub txhua yam uas nws tau kawm hauv nws lub neej tsis yog lus xwb; yeej muaj tseeb tiag.
Puas zoo li peb swm tej koob hmoov peb tau vim peb yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg es peb thiaj li tsis to taub tej txuj ci tseem ceeb thiab koob hmoov hauv tus Tswv lub Koom Txoos uas muaj tiag? Peb puas muaj kev txhaum nyob twj ywm txog txoj hmoov zoo tshaj plaws uas peb txais tau hauv lub neej no? Tus Cawm Seej kiag qhia tias, yog hais tias peb coj kuv tej lus txib thiab nyiaj mus kom txog thaum kawg ces peb yuav tau txoj sia nyob mus ib txhis, uas yog lub txiaj ntsim zoo tshaj plaws ntawm tag nrho Vajtswv tej txiaj ntsim.2
Peb ntseeg tias lub koom txoos yog ib qho chaw uas zoo heev es tsis yog ib qho chaw uas mus txhua Hnub Caiv thiab kawm ua ib tug neeg zoo xwb. Lub koom txoos tsis yog ib qho chaw rau cov ntseeg Vajtswv uas ua siab zoo mus sib ntsib xwb. Nws tsis yog ib co tswv yim zoo uas cov niam thiab txiv qhia tau lawv cov me nyuam hauv tsev, kom lawv ua siab zoo thiab tsim txiaj. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej ib txwm yog ntau tshaj tej yam no.
Xav me ntsis txog tej yam tob tob uas peb paub txog txoj kev teev ntuj. Peb ntseeg tias tib lub Koom Txoos uas Yexus Khetos tsim thaum Nws nyob hauv ntiaj teb tau rov qab muaj tsim los dua dhau ntawm ib tug yaj saub uas Vajtswv hu los rau peb lub sij hawm no thiab peb cov thawj coj muaj tib lub hwj chim thiab kev cai ua txhua yam los ntawm Vajstwv lub npe ua cov thwj tim puag thaum ub muaj. Qhov no yog Vajtswv lub pov thawj hwj. Peb ntseeg tias vim muab lub hwj chim txum txim rov qab los lawm, peb ua tau tej kev cai li uas ua kev cai raus dej thiab txais tau tus Vaj Ntsuj Plig Dawb Huv los nrog peb txhua lub sij hawm. Peb muaj cov thwj tim thiab yaj saub coj thiab kav lub Koom Txoos no vim lawv muaj tej yuam sij ntawm lub pov thawj hwj, thiab peb ntseeg tias Vajtswv hais lus rau Nws cov me nyuam los ntawm coj yaj saub no.
Peb ntseeg tias lub pov thawj hwj tej kab ke ua rau peb ua kev khi lus thiab txais tau tej kev cai dawb huv hauv lub tuam tsev uas muaj ib hnub yuav coj peb rov qab mus txog Vajtswv thiab nrog nws nyob tas mus li. Peb ntseeg tias, los ntawm lub hwj chim no, tsev neeg sib khi nyob ua ke tau tas mus ib txhis thaum ib khub niam txiv ua kev cai cog lus sib yuav hauv tej tsev uas dawb ceev, uas peb ntseeg tias yeej yog Vajtwsv lub tsev tiag. Peb ntseeg tias tsis yog peb txais tau tej kev cai dawb ceev no xwb tiam sim rau peb tej poj koob yawm txwv uas tau nyob hauv ntiaj teb no es tsis tau ua tej kev cai dawb ceev no. Peb ntseeg tias peb sawv cev ua tau tej kev cai dawb ceev no rau peb cov poj koob yawm txwv hauv tej tuam tsev no.
Peb ntseeg tias, los ntawm tus yaj saub thiab Vajtswv lub hwj chim, peb txais tau vaj lug kub ntxiv rau phau vaj lug kub Npainpaim uas qhia tias Yexus Khetos yog tus Cawm Seej rau lub ntiaj teb.
Peb ntseeg tias Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub nceeg vaj thiab yog tib lub Koom Txoos uas tseeb tiag hauv ntiaj teb no. Lub npe yog Yexus Khetos lub Koom Txoos vim Nws yog tus uas coj txoj hauv kev; yog Nws lub Koom Txoos, thiab muaj tau txhua yam vim Nws txoj kev theej txhoj.
Peb ntseeg tias txhua yam no yeej tsis muaj hauv lwm qhov chaw los sis lwm lub koom haum hauv lub ntiaj teb no. Txawm tias yeej muaj lwm txoj kev teev ntuj thiab koom txoos, lawv tsis muaj txoj kev cai uas yuav ua tau tej kab ke rau kev cawm seej uas muaj hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Peb paub txog tej no, tiam sis peb puas ntseeg mas? Yog hais tias tej yam no muaj tseeb, ces peb tau zaj xov txog kev cia siab thiab kev pab zoo tshaj plaws hauv lub ntiaj teb no. Muaj kev ntseeg txog tej no yog ib qho uas zoo rau peb nyob mus ib txhis thiab cov uas peb hlub.
Yuav kom peb muaj kev ntseeg, peb yuav tsum tso txoj moo zoo saum peb taub hau los mus rau hauv peb lub siab. Yooj yim rau peb ua raws li txoj moo zoo txhua txhua hnub vim yog peb txoj hauj lwm los sis vim yog tej kab li kev cai uas peb loj hlob nrog los sis yog ib qho uas peb niaj hnub ua xwb. Tej zaum ib txhia tsis tau hnov ib yam li Vaj Ntxwv Npeyamis cov neeg tom qab nws qhia lawv es: “Lawv sawv daws qw ua ib lub suab hais tias: “Muaj tseeb tiag, peb ntseeg tag nrho tej lus uas koj tau hais rau peb; thiab peb, kuj paub txog lawv tej kev tseeb thiab tiag, vim yog tus Tswv uas Muaj Hwj Chim Loj Tshaj Plaws tus Ntsuj Plig, uas tau ua ib qhov kev pauv loj nyob hauv peb, los sis nyob hauv peb tej siab, xwv kom peb tsis muaj siab xav ua phem ntxiv lawm, tiam sis ua zoo kom tsis tu ncua mus li.”3
Peb yuav tsum nrhiav kom peb tej siab ntsws thiab cwj pwm pauv kom peb tsis txhob xav ua raws tej yam uas lub ntiaj teb ua tiam sis ua kom Vajtswv txaus siab. Txoj kev hloov siab los ntseeg yeej yuav siv sij hawm thiab yuav tsum muaj siab los siv txoj kev ntseeg. Muaj tej no thaum peb nrhiav kawm tej vaj lug kub es tsis txhob tshawb internet. Muaj li no thaum peb mloog ua raws Vajtswv cov lus txib. Txoj kev hloov siab los ntseeg muaj thaum peb pab cov uas nyob ntawm peb ib ncig. Thaum peb rau siab thov Vajtswv, mus rau lub tuam tsev, thiab rau siab ua peb tej hauj lwm uas Vajtswv muaj rau peb ua. Yuav tsum rau siab ntso thiab ua txhua txhua hnub.
Neeg coob nug kuv tias, “Dab tsis yog qhov nyuaj tshaj plaws rau peb cov tub hluas ntxhais hluas niaj hnub nim no?” Kuv ntseeg hais tias lo lus teb yog “lub tsev loj thiab dav”4 hauv lawv lub neej. Yog tias Phau Ntawv Maumoos yog sau rau peb lub sij hawm no, ces peb yeej yuav nco ntsoov Lihais zaj ua yog toog pom tsob ntoo uas cawm neeg txoj sia thiab cov neeg nyob hauv lub tsev loj uas taw tes ntshis thiab luag thuam uas ua rau tib neeg xav tsis thoob.
Qhov uas raug kuv siab tshaj plaws yog qhov uas piav txog cov uas twb mus dhau plaws tej huab tsaus ntuj lawm es taug txoj kev ti thiab nqaim, tau tuav rawv tus pas hlau, mus txog lawv lub hom phiaj, thiab tau pib noj cov txiv uas qab tshaj plaws ntawm tsob ntoo uas cawm txoj sia. Ces cov vaj lug kub hais tias cov neeg uas hnav khaub ncaws zoo heev hauv lub tsev loj thiab dav ntawd “tau luag thuam thiab taw tes ntshis rau cov uas tau los txog ntawm tsob ntoo thiab tau tab tom noj cov txiv.
“Thiab tom qab uas lawv tau noj cov txiv ntawd tas lawv tau txaj muag, vim cov neeg ntawd tau luag thuam lawv; thiab lawv tau ncaim mus rau hauv cov kev txwv tsis pub mus thiab tau ploj mus lawm.”5
Tej nqe no hais txog peb cov uas twb muaj Yexus Khetos txoj moo zoo hauv peb lub neej lawm. Txawm hais tias peb yug los rau hauv los sis tau nrhiav kev tawm ntawm huab zig niab es thiaj nrhiav tau, peb paub lub txiv uas tseem ceeb thiab xav tau tshaj plaws qab li cas,6 thiab muaj peem xwm pab peb nrhiav tau txoj sia nyob mus ib txhis, “Vajtswv txoj hmoov uas zoo tshaj plaws.” Peb yuav tsum rau siab ntso kawm thiab tsis txhob quav ntsej cov uas thuam peb tej kev ntseeg los sis cov uas ua rau peb tej kev ntseeg me los sis pheej nhriav pom tej yam uas tsis zoo nrog peb cov thawj coj thiab cov lus qhuab qhia. Yog ib qho kev txiav txim uas peb yuav tsum ua txhua hnub—thiab xaiv kev ntseeg es tsis txhob xaiv kev tsis cia siab. Txwj Laug M. Russell Ballard yaum kom peb yuav “nyob twj yam hauv lub nkoj, hnav nej lub tsho uas cawm neeg txoj sia, thiab siv ob txhais tes tuav rawv.”7
Vim peb yog mej zeej hauv tus Tswv lub Koom Txoos, peb twb nyob hauv lub nkoj lawm. Peb tsis tas nrhiav lub ntiaj teb tej kev qhuab qhia kom thiaj paub qhov tseeb uas yuav muaj tau kev pab, nplij siab, thiab qhia kev rau peb ua neej kom dhau tej kev cov nyom hauv lub neej no—peb twb tau lawm! Ib yam li Ethan niam tau xav txog tej uas nws ib txwm ntseeg thiab paub hais tias nws ntseeg thiab thaum muaj xwm txheej, “Kuv yeej ntseeg,”es xav tias peb ua tau thiab.
Kuv hais lus tim khawv hais tias peb txoj kev ua me zeej rau hauv tus Tswv lub nceeg vaj yog ib qho koob hmoov zoo tshaj plaws. Kuv ua pov thawj hais tias tej koob hmoov thiab kev kaj siab lug uas tus Tswv muaj rau peb thaum peb mloog lus thiab muaj kev ntseeg yuav zoo tshaj txhua yam uas tib neeg lub paj hlwb yuav to taub tau. Kuv hais lus tim khawv rau nej los ntawm Yexus Khetos lub npe, amees.