Ij Ke Tōmak?
Eļan̄n̄e men kein rej m̧ool, innām epād ippād ennaan eo eļap kōn kōjatdikdik im jipan̄ eo me laļ in ejeļā kake.
Ilo M̧aaj 30, juon iiō em̧ootļo̧k, Ethan Carnesecca eo ruo an iiō, jān American Fork, Utah, ekar deļon̄ ilo hospital kōn nim̧ooniia im elōn̄ dān tōrerein ārin. Ruo raan rem̧ootļo̧k, jekjek eo epād ie eaar ļapļo̧k an kauwōtata im kar aikuj kōkelo̧ke kōn elikaptōr n̄an Jikin Taktō eo an Ajri ilo Salt Lake City. Jinen eo einepata, Michele, rekar kōtļo̧k an uwe ilo jea eo im̧aan im etal ippān ļaddik eo nejin. Rekar leļo̧k an liin kein an ron̄jake bwe en em̧m̧an an kōnono ippān ro jet ilo elikaptōr eo. Emaron̄ ron̄ an taktō ro kōm̧adm̧ad e ļaddik eo nejin me enan̄inmej, im kōnke e make ej juon nōōj n̄an ajri, Michele ekar bwe an jeļā n̄an an meļeļe bwe Ethan eaar pād ilo kauwōtata.
Ilo iien in eaorōk, Michele eaar kile bwe rej kelo̧k ilōn̄lo̧k Draper Utah Temple. Jān ijo imejatoto, eaar reilaļļok im kalimjōk jikin ko im ekar barāinwōt lo Jordan River Temple, Oquirrh Mountain Temple, im barāinwōt Salt Lake Temple jān ijo ettoļo̧k. Ļōmņak eo eaar jiktok ilo kōlmenļo̧kjeņ eo an: “Ij ke tōmak ilo m̧ool ko an gospel in ak jaab?”
Eaar ba kōn en̄jake in:
“Iaar ekkatak kōn kōjeram̧m̧an ko an tampeļ im [bwe] ‘baam̧le rej n̄an indeeo’ ilo Būraimere im ilo Doulul eo an Jiron̄ ro. Iaar kwaļo̧k ennaan in kōn baam̧le ko n̄an armej ro rem̧m̧an ilo Mexico ilo mijen eo aō. Iaar liāp n̄an ļeo ippa n̄an iien in im n̄an mour indeeo ilo tampeļ. Iaar katakin kōn katak ko kōn baam̧le āinwōt juon ritōl n̄an Doulul eo an Jiron̄ ro, im iaar kwaļo̧k bwebwenato ko kōn baam̧le n̄an indeeo ippān ajri ro nejū ilo iien nokon in jota ko. IAAR JEĻĀ KAKE, ak IAAR KE TŌMAKE? Uwaak eo aō eaar itok ilo juon iien em̧ōkaj ke ej jiktok kajjitōk eo ilo kōlmenļo̧kjeņ e aō: Jetōb eo eaar kapene ilo buruō im aō ļōmņāk uwaak eo iaar jeļā kadede kake—IAAR tōmake!
Ilo tōre eo iaar leļo̧k aolepān buruō ilo jar n̄an Jemedwōj Ilan̄, kam̧m̧olool E kōn jeļāļo̧kjeņ in im tōmak in me ijeļā kake bwe baam̧le em̧ool rej n̄an indeeo. Iaar kam̧m̧oolol E kōn Nejin, Jisōs Kraist, eo eaar kōm̧m̧an bwe menin en kūrm̧ool. Iaar kam̧m̧oolol E kōn ļaddik eo nejū, im Iaar kwaļo̧k bwe Jema Ilan̄ en jeļā eļan̄n̄e Ej aikuj in karool ļo̧k Ethan n̄an M̧weo Im̧ōn ilan̄, ekar Em̧m̧an. Iaar lōke Jemedwōj Ilan̄ ilo ejjeļo̧k pere, im Iaar jeļā bwe Inaaj bar lo e. Iaar lukkuun kam̧m̧oolol bwe ilo tōre eo eaar pen n̄an n̄a, eaar wōr ippa jeļāļo̧kjeņ eo IM tōmak eo bwe gospel in em̧ool. Iaar en̄jake aenōm̧m̧an.”1
Ethan eaar joļo̧k elōn̄ wiik ko ilo aujipitōl, bōk jipan̄ ko jān taktō ko retijemļo̧k. Jar ko, jitlo̧k, im tōmak kōn ro rejitenbōro, ekitbuuj jipan̄ ko, eaar kōtļo̧k bwe en em̧akūt jān aujipitōl im jepļaak n̄an m̧weo imōn ippān baam̧le eo an. Elukkuun ājmour im em̧m̧an an mour rainin.
Tōre in me elukkun aorōk n̄an Michele ekar lukkun kallikar n̄an Michele bwe ta eo eto an katakin elōn̄ armej ilo aolepān mour eo an eļapļo̧k jān naan wōt; menin em̧ool.
Jej ke jet iien imenene kōn kōjeram̧m̧an ko me emōj kar litok āinwōt membōr ro ilo Kabun̄ eo an Jisōs Kraist im Armej ro Rekwojarjar ilo Raan ko Āliktata me jej likjab n̄an lukkun meļeļe kōn kabwilōn̄lōn̄ im kajoor an rikaļoor ilo Kabun̄ eo em̧ool an Irooj? Emōj ke ad buromōj kōn ad jab kam̧m̧olool kōn menin letok eo eļap me jemaron̄ leļo̧k ilo mour in? Rilo̧mo̧o̧r eo Emake eaar katakin, “Eļan̄n̄e kwōj kōjparok kien ko Aō im niknik n̄an jem̧ļo̧kin kwonaaj bōk mour indeeo, eo ej mennin letok eo eļaptata iaan mennin letok ko an Anij.”2
Jej tōmak bwe Kabun̄ in eļapļo̧k an em̧m̧an ijjeļo̧kin an juon jikin em̧m̧an n̄an etal im jar ilo Jabōt im katak wāween n̄an erom juon armej em̧m̧an. Eļapļo̧k ijjeļo̧kin an juon jikin iiaio an rikūriijin ro rem̧m̧an ijo jemaron̄ iiao ippān armej ro rej mour erreo. Ejjab baj jet meļeļe ko emōj kobaiki me m̧am̧a im baba ro remaron̄ katakin ajri ro nejier ilo moko bwe ren maron̄ jeļā koņaer, armej em̧m̧an. Kabun̄ eo an Jisōs Kraist im Armej Ro Rekwojarjar ilo Raan-ko Āliktata eļapļo̧k jān ilubwiljin men kein kar kōnono kaki.
Ļōmņak jidik kōn mwilaļ in katak ko jej tōmak ilo kabun̄ in. Jej tōmak bwe ejja Kabun̄ eo an Jisōs Kraist me eaar pād ioon laļ in emōj an bar jepļaaktok juon alen kōn juon rikanan kūr in Anij ilo tōre kein ad im bwe ritōl ro ad rej kabwijer ejja kajoor eo im mālim eo n̄an makūtkūt ilo etan Anij eo Rijilōk ro jem̧aan raar bar kabwijere. Rej ņa etan priesthood an Anij. Jej tōmak bwe kōn mālim eo emōj an jepļaaktok, jemaron̄ bōk kain̄i ko rekwojarjar, āinwōt peptaij, im lan̄lōn̄ kōn erreo an menin letok eo an Jetōb Kwojarjar n̄an an pād ippād iien otemjej. Ewōr ad rijilōk im rikanan rej kōjebwebweik im tōl Kabun̄ in kōn kii ko an priesthood, im jej tōmak bwe Anij ej kōnono n̄an ro Nejin itok jān rikanan rein.
Jej barāinwōt tōmak bwe kajoor in an priesthood ej kōm̧m̧an bwe en kūrm̧ool n̄an kōm̧m̧ani bujen ko im bōk kain̄i ko ilo tampeļ ko rekwojarjar bwe juon raan enaaj kamaron̄ kōj n̄an jepļaak n̄an im̧aan mejān Anij im mour ippān n̄an indeeo. Jej barāinwōt tōmak bwe, kōn kajoor in, baamle ko remaron̄ liāp ippān doon n̄an indeeo n̄e ruo ripālele rej kōm̧m̧ane bujen eo ekāāl im ejjeļo̧k jem̧ļo̧kin kōn m̧are ilo im̧ōko rekwojarjar eo jej tōmak bwe rej moko imōn Anij. Jej tōmak bwe jemaron̄ bōk kain̄i ejjab n̄an kōj make ak barāinwōt ro m̧oktaļo̧k me raar mour ioon laļ in ilo an ejjeļo̧k aer kar iien n̄an bōk koņaer ilo kain̄i in lo̧mo̧o̧r kein raorōk. Jej tōmak bwe jemaron̄ kōm̧m̧an kain̄i n̄an ro nukid jem̧aan kōn peptaij n̄an ro remej ilo ejja tampeļ ko wōt rekwojarjar.
Jej tōmak bwe, kōn juon rikanan im kajoor eo an Anij, elōn̄ ippād kobain jeje ko rekwojarjar, kobaik naan in kam̧ool eo n̄an Baibōl eo n̄an kwaļo̧k bwe Jisōs Kraist ej Rilo̧mo̧o̧r eo an laļ in.
Jej tōmak bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata ej aelōn̄ in kiin̄ eo an Anij im ej Kabun̄ eo em̧ool imejān laļ in. Rej ņa etan Kabun̄ eo an Jisōs Kraist kōnke E ej bōran kabun̄ in, An Kabun̄ in, im aolep kōjeram̧m̧an kein emōj aer kūrm̧ool kōn Pinmuur eo An.
Jej tōmak bwe aolep oktak kein jejjab maron̄ loi ilo jikin ko jet ak doulul ko ipeļaakin laļ in. Āinwōt an em̧m̧an im m̧ool āinwōt kabun̄ ko jet im tōmak ko jet, ejjeļo̧k iaier ewōr aer mālim n̄an poktok kain̄i n̄an lo̧mo̧o̧ren ko me repād ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Ewōr ad jeļā kōn men kein, ak jej ke tōmaki? Eļan̄n̄e men kein rej m̧ool, innām epād ippād ennaan eo eļap kōn kōjatdikdik im jipan̄ eo me laļ in ejeļā kake. Ilo ad tōmaki ej juon jon̄ak kōn aorōkin mour indeeo n̄an kōj im n̄an ro jet rejitōnbōro ippād.
N̄an tōmak, jej aikuj bōk gospel eo jān bōrad im mour kake ilo būruwōd! Jemaron̄ mour kōn gospel in ilo an ejjeļo̧k ad en̄jake kōnke rej kōtmāne kōj ak kōnke ej juon manit eo jaar rūttoļo̧k kake ak kōnke ej juon iminene. Bōlen jet rejjan̄in en̄jake ta eo armej ro an Kiin̄ Benjamin raar en̄jake ālkin an kar kwaļo̧k naan ioon tōl eo: “Im raar aolep lam̧ōj kōn juon ainikien, im ba: Aaet, kōmij tōmak aolep naan ko kwaar kōnono n̄an kōm; im barāinwōt, kōm jeļā kōn aer jejjet im m̧ool, kōnke Jetōb eo an Irooj Ekajoor Bōtata, eo Eaar jerbali juon oktak ekajoor ilo kōm, ak ilo būruōm̧, bwe kōmin jab bar itok wōt in kōm̧m̧an nana, ak n̄an kōm̧m̧an em̧m̧an wōt.” 3
Jej aolep aikuj n̄an pukōt bwe buruōd im aolepān ad ren oktak bwe en jab wōr ad ikdelel n̄an ļoor wāween ko an laļ in ak jen kam̧ōņōņōik Anij. Oktak em̧ool ej juon jerbal eo me ebōk iien im ej aikuj ad ikdelel n̄an kōmourur tōmak ko ad. Ej itok n̄e jej kappukōt jeje ko rekwojarjar ijjeļo̧kin ad kōjerbal Intōrnet. Ej itok n̄e jej pokake kien ko an Anij. Oktak em̧ool ej itok n̄e jej jerbal n̄an ro jet ipeļaakid. Ej itok jān m̧ool in jar, pād ilo tampeļ aolep iien, im tiljek ilo kakūrm̧ool eddo ko ad ko me kar litok jān Anij. Ebōk kijetoto eļap kajjojo raan.
Ekkā aō kajjitōkin eō make, “Ta eo epen tata juon jodikdik ej ioone ilo mour eo an rainin?” Ij uwaak bwe ij tōmak ej waļo̧k kiiō kapo ko an “em̧ eo ekiļep im ļap” ilo mour ko aer.4 Eļan̄n̄e Bok in Mormon eaar jeje n̄an raan kein ad, innem em̧ool jejjab maron̄ kōjekdoon aorōkin n̄an kōj aolep kōn ennaan ko ilo visōn in wōjke in mour eo an Liai im kareel ko an ro rej jitōn̄ļo̧k im kajirere jān em̧ eo ekiļep im ļap.
Ta eo ekaburom̧ōjm̧ōj n̄an eō ej kōn kōm̧eļeļe eo kōn ro rekar kate er ilo tap in marok eo ilo ial eo eadik im eaitok, raar depdāp ilo aen in dāpdep eo, tōpar kōtōpar ko aer, im jino aer edjo̧n̄i le ko reikaijōļjōļ leen wōjke in mour eo. Innem eoon in ej kwaļo̧k bwe ro me balle ko ballier raar lukkuun em̧m̧an ilo em̧ eo ekiļep im ļap “im raar pād ilo paotok in kajjirere im jitōn̄ļo̧k ro jet im raar itok im m̧ōn̄ā leen eo.
“Im ālikin aer kar edjon̄e leen wōjke eo raar jook, kōn ro raar kajjirere kake er; im raar wōtlo̧k ļo̧k ilo iaļ ko remo̧ im raar jebwābwe.”5
Eoon kein rej kōmeļeļeik kōj ro me emōj ad jeļā kadede kōn gospel eo an Jisōs Kraist ilo mour ko ad. Men̄e jaar ļotak im pād ie ak jaar aikuj pukōt iaļad ilo tap in marok eo bwe jen loe, emōj ad edjo̧n̄ leen in, eo “elukkuun aorōk im kaijoļjoļ tata”6 im emaron̄ letok n̄an kōj mour indeeo, “ej mennin letok eo eļaptata an Anij.” Jej aikuj kwojkwoj wōt im jab eoro̧n̄ ro rej kōm̧m̧an kōjak kōn tōmak ko ad ak ro rej lan̄lōn̄ n̄an kōm̧m̧an kabwereer ak ro rej pukōt ruwōn ritōl ro an Kabun̄ in im katak ko ie. Ej juon kālet jej aikuj kōm̧m̧ane aolep raan—n̄an kālet tōmak jān pere. Elder M. Russell Ballard eaar rōjan̄ kōj bwe jen “dim im pen wōt ilo Kabun̄ in, kōjparok kōj ilo jetōb, im dāpdep n̄an kein jipan̄ ko an jetōb.”7
Āinwōt membōr ro ilo Kabun̄ eo em̧ool an Irooj, jepād kadede ilo Kabun̄ in. Jejjab aikuj bar ro̧o̧l likļo̧k kōn wōt tōmak ko an laļ in n̄an pukōt m̧ool eo me enaaj letok ainem̧m̧an, jipan̄, im iaļ n̄an bōk kōjparok jān melejon̄ ko an mour in—epād ippād kadede! Āinwōt jinen Ethan ekar etaļe ta eo me eto an tōmake im kwaļo̧k an lōke ilo tōre ko reppen ilo mour eo an, “Ij tōmaki,” innem jemaron̄ barāinwōt tōmaki!
Ij kwaļo̧k aō kam̧ool bwe ad erom membōr in aelōn̄ in kiin̄ eo an Irooj ej juon menin letok eo eaorōk ejjeļo̧k jon̄an. Ij kam̧ool bwe kōjeram̧m̧an ko im ainem̧m̧an eo Irooj ej pojak kake n̄an ro rej pokake im tiljek etar jān jon̄an armej rejjab maron̄ meļeļe kake. Ij likūt aō naan in kam̧ool ippāmi ilo etan Jisōs Kraist, amen.