2010–2019
Mi Ta Kere?
April 2016


Mi Ta Kere?

Si e kosnan aki ta bèrdat, e ora ei nos tin e mensahe di mas grandi di speransa i yudansa ku e mundu nunka a konosé.

Riba 30 di mart, solamente un aña pasá, Ethan Carnesecca di dos aña, di e siudat di Amercan Fork Utah, a wòrdu atmití den hospital ku pulmonia i líkido rònt di su pulmonnan. Dos dia despues, su kondishon a bira asina malu, ku e tabatin ku warda trasladá ku helikòpter pa bai e hospital di mucha chikitu na Salt Lake City. Su mama Michele, ku tabata preokupá, a wòrdu permití pa biaha den e stul dilanti i kompaña su yu hòmber. Nan a dun’é un headset asina ku e por a komuniká ku e otro hendenan den e helikòpter. E por a tende e médikonan atendiendo e mucha hòmber chikitu aki, i kome e mes tabata un verpleegster di mucha, Michele tabata sa sufisiente pa a komprondé ku Ethan tabata den problema serio.

Imagen
Ethan Carnesecca durante malesa

Na e momentu kritiko aki, Michele a nota ku nan tabata bulando direktamente over di e tèmpel di Draper na Utah. For di den laria e por a mira over di e vaye i tambe por a mira e tèmpel di Jordan River, esun di Oqiurrh Mountain i asta e tèmpel di Salt Lake riba un distansia. E pensamentu a bini den su mente: “bo ta ker’é òf no?”

E ta konta di e eksperensha aki:

“Mi a siña tokante di e bendishon nan di tèmpel i [ku] ‘famianan ta pa semper’ den Primaria i Mujeres Jovenes. Mi a kompartí e mensahe di famianan ku e bon hendenan di México riba mi mishon. Mi a wòrdu seyá na mi kompañero eterno pa tempu i pa tur eternidat den tèmpel. Mi a siña lèsnan over di famianan ora mi tabata lider den Mujeres Jovenes, i mi a kompartí historianan tokante di famianan eterno ku mi yunan den nochi di hogar. Mi TABATA SA esaki, pero mi tabata KERE easki? Mi kontesta a bini mes un lihé ku e pregunta a bini den mi mente. E Spiritu a konfirmá den mi kurason i mente e kontesta ku mi tabata sa kaba, MI TA kere esaki!

“Na e momento ei mi a basha mi kurason den orashon na mi Tata Selestial, dunando E danki pa e sabiduria i fe ku mi tabata tin ku famianan enbèrdat ta pa semper. Mi a dun’é danki pa su Yu, JesuCristu, ku a hasi tur kos posibel. Mi a dun’É danki pa mi yu, i mi a laga mi Tata Selestial sa ku si E tin ku hiba mi kerido Ethan bèk na Su kas selestial, e tabata BON. Mi ta konfia kompletamente den mi Tata Selestial, i mi tabata sa ku lo mi mira Ethan atrobe. Mi tabata asina gradisí ku den un momentu di krísis, mi tabatin e sabiduria I e fe ku e evangelio ta bèrdat. Mi tabatin pas.”1

Ethan a pasa hopi simannan den hospital. Hañando kuido eksperto médiko. E orashonnan, ayuno i fe di esnan kerí, kombiná ku e kuido ei a hasi posibel pa e sali hospital i bini kas bèk pa ta huntu ku su famia. Ethan ta salu i bon awe.

Imagen
Famia Carnesecca
Imagen
Ethan Carnesecca a rekuperá

E momentu definí aki pa Michele a konfirmá pe ku loke el a wòrdu siñá henter su bida, tabata mas ku solamente palabranan; e ta bèrdat.

Nos ta bira tin biaha asina kustumbrá na e bendishon nan ku nos a wòrdu duná komo miembronan di Iglesia di JesuCristu di Santunan di Delaster Dianan, ku nos ta faya di komprondé kompletamente e milager i grandesa di disípulado den Señor Su Iglesia berdadero? Nos sa tin biaha ku nos ta kulpabel di ta komplasiente ofer di e regalo di mas grandi ku nos por wòrdu ofresé den e bida aki? E Salbador mes a instruí, “Si bo warda mi mandamentunan i perseverá te na final lo bo tin bida eterno, ku ta e don ta e don di mas grandi di tur e donnan di Dios.”2

Nos ta kere ku e Iglesia aki ta mas ku solamente un bon lugá pa bai riba djadumingu i siña kon pa ta un bon persona. E ta mas ku simplemente un klup sosial kristian amoroso kaminda nos por asosiá ku hendenan di bon moda moral. E no ta solamente un gran set di ideanan ku mayornan por siña nan yunan na kas asina ku nan por ta hendenan nechi i responsabel. E Iglesia di JesuCristu di e Santunan di e Delaster Dianan ta infinitivamente mas ku tur e kosnan aki.

Pensa solamente un momentu tokante di e eksigensianan profundo ku nos komo religion ta hasi. Nos ta kere ku e mesun Iglesia ku JesuCristu a establesé ora ku e tabata na mundu a wòrdu restourá atrobe dor di un profeta ku a wòrdu yama di Dios den nos tempu i ku nos lidernan tin e mesun poder i outoridat pa aktua den Dios su nòmber ku apòstelnan den pasado tabatin. Nos ta reklamá ku, dor di e outoridat restourá aki, nos por risibí ordenansanan ku ta salba manera boutismo i gosa di e don purifikante i ku ta refiná di e Spiritu Santu pa ta ku nos na tur momentu. Nos tin apòstelnan i profetanan guiando i dirigiendo e Iglesia aki pa medio di yabinan di saserdosio, i nos ta kere ku Dios ta papia ku su yunan pa medio di e profetanan aki.

Tambe nos ta kere ku e poder di saserdosio aki ta hasi posibel pa hasi konvenionan i risibí ordenansanan den tèmpelnan sagrado ku algun dia lo hasi posibel pa nos por regresá den presensia di Dios i biba ku n’e pa sèmper. Tambe nos ta reklamá ku, pa medio di e poder aki, famianan por wòrdu mara huntu pa eternidat ora ku parehanan drenta e konvenio nobo i duradero di matrimonio den edifisionan sagrado, ku nos ta kere ta literalmente kasnan di Dios. Nos ta kere ku nos por risibí e ordenansanan aki, no solamente pa nos mes, pero tambe pa nos antepasadonan ku a biba riba mundu sin tabatin e oportunidat pa partisipá den ordenansanan ku ta salba esensial aki. Nos ta kere ku nos por partisipá den ordenansanan pa nos antepasadonan dor di ta remplasante den e mesun tèmpelnan sagrado aki.

Nos ta kere ku, pa medio di un profeta i e poder di Dios, nos a risibí skrituranan adishonal, agregando testimonio huntu ku esun di e Beibel deklarando ku JesuCristu ta e Salbador di mundu.

Nos ta reklamá ku e Iglesia di JesuCristu di e Santunan di Delaster dia ta e reino di Dios i e úniko Iglesia berdadero riba tera. E ta wòrdu yama e Iglesia di JesuCristu paso E ta para na kabes, e ta Su Iglesia, i tur e kosnan aki ta posibel dor di Su sakrifisio ekspiatorio.

Nos ta kere ku e markanan di distinshon aki no por wòrdu haña na niun otro lugá òf organisashon riba e tera aki. Ounke kon bon òf sinsero otro religionnan i iglesianan ta, niun di nan no tin e outoridat pa proveé e ordenansanan di salbashon ku ta disponibel den e Iglesia di JesuCristu di Santunan di Delaster Dianan.

Nos tin e sabiduria di e kosnan aki, pero nos ta kere nan? Si e kosnan aki ta bèrdat, e ora ei nos tin e mensahe di speransa i yudansa di mas grandi ku e mundu nunka a konosé. Kere den nan ta un asuntu di signifikashon eterno pa nos i pa esnan ku nos ta stima.

Pa kere, nos tin ku haña e evangelio di for di nos kabes den nos kurason! Si ta posibel, pa nos solamente di biba e evangelio paso esei ta wòrdu sperá di nos òf paso e ta den e kultura ku nos a krese aden, òf paso e ta un kustumber. Tin ku kisas no a eksperensiá loke rei Benjamin su pueblo a sinti despues di su predikashon urgente: “Nan tur a grita ku un stèm, bisando si, nos ta kere tur e palabranan ku bo a bisa nos, i tambe nos sa di nan sertesa i bèrdat, dor di e Spiritu Santu di e Señor omnipotente, ku a hasi un gran kambio den nos, òf den nos kurason, ku nos no tin mas disposishon pa hasi maldat, pero pa hasi bon kontinuamente.”3

Nos tur tin ku buska pa haña nos kurasonnan i nos karakter mes kambiá asina ku nos no tin deseo mas pa sigui e kamindanan di mundu pero pa komplasé Dios. Konvershon berdadero ta un proseso ku ta tuma lugá durante un periodo di tempu i ta envolví un dispuesto pa ehekutá fe. E ta bini ora ku nos ta buska den skrituranan na lugá di Internet. E ta bini ora ku nos ta obediente na e mandamentunan di Dios. Kombershon ta bini ora ku nos ta sirbi esnan rondó di nos. E ta bini di orashon, bishita tèmpel regularmente, i ehekutá fielmente nos responsabilidatnan duná dor di Dios. Ta rekerí konsistensha i enfoke diario.

Hopi biaha mi ta wòrdu puntra, kua ta e reto mas grandi ku nos hóbennan ta kontra awendia? Mi ta rospondé ku mi ta kere ku e ta e influensha konstante di e “edifisio grandi i espasioso” den nan bida nan.4Si e buki di Mormon tabata skibí speshalmente pa nos dianan, e ora ei ku siguridat nos no por pèrdè e relevansha pa nos tur di e mensahenan den e vishon di Lehi di e palu di bida i e efekto ku esnan ku ta mustra nan dede, i esnan ku ta hasi mofa for di e edifisio grandi i espasioso.

Loke mas ta kibra mi kurason ta e deskripshon di esnan ku a kaba di bringa nan kaminda dor di e neblina di skuridat riba e kaminda stret i smal, a gara e bara di heru, a yega nan meta, i a kuminsá purba di e fruta puro i delisioso di e mata di bida. Despues e skritura ta sigui bisa ku e hendenan bon bisti den e edifisio grandi i espasioso, tabatin un aktitut di hasi chèrchi i mustra dede kontra di esnan ku a bini i tabata tumando di e fruta.

“Anto despues ku nan a purba for di e fruta nan tabatin bèrgwensa, dor di esnan ku tabata hasi mofa di nan i nan a kai afó den kamindanan prohibí i tabata pèrdí.”5

E versonan aki ta deskribí esnan di nos ku kaba tin e evangelio di JesuCristu den nos bidanan. No opstante nos a nase den dje òf tabatin ku bringa pa sigui e kaminda dor di neblina a di skuridat pa hañ’é, nos a purba for di e fruta aki, ku “ta mas presioso i mas deseabel” 6 i e tin e potensha pa trese bida eterno pa nos., “ ku ta esun di mas grandi di e donnan di Dios.” 6 Nos mester di keda nutrí i no tende esnan ku lo ke hasi chèrchi di nos kreenshanan òf ku gusta krea duda òf esnan ku ta haña falta ku lider i doktrinanan di Iglesia. Ta un eskoho nos ta hasi tur dia, pa skohe fe over di duda. Elder M.  Russel Ballard a urgí nos pa “keda den e boto, usa bo vèst di reskate, i tene duru ku tur dos man.”7

Komo miembronan di Señor si Iglesia berdadero, nos ta riba e boto kaba. Nos no tin ku bai buska entre e filosofia nan di mundu pa haña bèrdat ku lo duna nos sosten, yudansa i direkshon pa pasa safe dor di difikultatnan di bida---nos tin’e kaba! Meskos ku e mama di Ethan por a eksaminá su kreenshanan di semper i deklará ku sertesa den un momentu di krísis, “mi ta kere,” asina nos tambe por!

Mi ta kompartí mi testimonio ku nos miembresia den e reino di Señor ta un regalo ku balor ku no por wòrdu midi. Mi ta duna testimonio ku e bendishon nan i pas ku Señor tin warda pa esnan ku ta obediente i fiel ta surpasá kualke kos ku hende su mente por komprondé. Mi ta laga e testimonio aki atras den nòmber di JesuCristu, amèn.