I kamehlele?
Ma mepwukat mehlel, eri kitail ahnekier koapwoaroapwoar oh sawas me wia rongamwau kaselel ehu me sampah wewehkier.
Ni Mahs 30, en pahr nekiero, kisin pwutak sounpar-riau Ethan Carnesecca, sang American Fork, Utah, kapidolongehr nan imwen wini pwehki soumwahu en pneumonia oh ngolingol me e ahniki. Mwurin rahn riau, ah soumwahuo doaralahr oh anahne en iang elkapter pwehn lella ni imwen wini en Primary Children’s Hospital nan Salt Lake City. En kisin pwutako nohno, Michele, apw salodahr oh irail apw mweidehng en mwohd mwowehu pwe en iangi nah kisin pwutako. Mie mehn rongorong kohieng pwe en kak wewehiong tohn nan elikaptero. E kak rong toahkte kan arail apwapwalih nah kisin pwutako, oh pwehki ah pil wia emen nurse en seri, Michele ese me Ethan udahn doar douluhl.
Nan soangen ansou apwal duehte met, Michele kak kilang me irail pipihr pohn Tehnpas Sarawi en Draper Utah. Sang p nan wehwe, e kilengiei oh pil kilangada Tehnpas Sarawi en Jordan River, Tehnpas Sarawi en Oquirrh Mountain, oh pil iangahki Tehnpas Sarawi en Salt Lake. Madamadau ehu ahpw kodohng: “Ke kamehlele de soh?”
E nda met pwehki dahme e lelongehro:
“I kaskuhlkier nan Primary oh nan Pwihn en Serepein Pwulopwul kan duwen kapai kan en nan tehnpas sarawi oh [me] ‘peneinei kan kak mihmi pene kokolahte’. I pil ehukiongehr irail aramas mwahu akan en Mexico duwen rongamwau me pid duwen peneinei ni ansou me I wia ahi misino. I katengtengehngehr ahi pwoud nan tehnpas sarawi. I pil padahngkier duwen peneinei ni ai wia soun kaweid en Serepein Pwulopwul kan, oh I kin ehukiong nait serih kan nan aht sarawi en peneinei me peneinei kak mihmi pene kokolahte. I ESEHIER met, ahpw mehlel I KAMEHLELE? Ahi pasapeng mwadangete kohdo ansou me peideko kohdo nan moangeiet: Ngehno kamehlelehiong ie nan ahi mohngiong oh ahi madmadau pasapeng me I esehiero—I kamehlelehier!
“Ni ansouohte I kapakap oh kasalehiong Semei Nanleng soahng koaros me mihmi nan ahi mohngiong, kapingkiong Ih marain oh pwoson me I ahniki me mehlel peneinei kan kak mihmipene kokolahte. I kapingkiong Ih Sapwelime Iehros Sises Krais, me kamangaila soahng koaros. I kapingkiong Ih nei kisin pwutako, oh I kasalehieng Semei Nanleng en ese me ma E kupwurki Ethan en pwuralahr oh mihmi Reh nanleng, soahng koaros MWAHU. I koapwoaroapwoarki mehlel Semei Nanleng, oh I ese me I kak pwurehng kilang Ethan ehu rahn. I inenen kaping kalahnganki soangen ansou duwehte met, ahi kak ahniki marain OH kamehlel me rongamwahu wet mehlel. Kiongie meleilei.”1
Ethan mihmiki nan imwen wini wihk kei, aliale epwel sang semen kan. Kapakap, kaisihsol, oh pwoson en irail aramas limpoak kan, patehng sawaswo, me karehiong ah kapidohisang nan imwen wini oh pwurala ni ihmwehu rehn ah peneinei. E mwahulahr oh kehlail rahnwet.
Ansou kesemwpwal wet ong Michele kasalehiong me soahng koaros me e kaskuhlki nan ah mour laudsang dahme e kak nda; soahng koaros mehlel.
Mie pak me kitail sohte kin tehk kapai me kohieng kitail ni atail wia tohn Mwomwohdiso en Sises Krais en Souleng en Imwin Rahn-akan me kitail sohte wehwehki manaman oh mweimwei en wia tohnpadahk nan Sapwelimen Kauno Mwomwohdiso? Mie pak ehu me kitail kin pahtoukihla atail sohte kin kapingki kisakis laud me kohieng kitail nan mour wet? Pein Sounkomouro masanih, “Ma kumwail pahn kolokol ahi kosoned kan oh dadaurete lel imwi kumwail pahn ale mour soutuk, kisakis me keieu laud nan kisakis koaros me sang rehn Koht.”2
Kitail kamehlele me Mwomwohdiso wet kaidehnte e wia wasa ehu me mwahuong kitail en kohla ie nan Rahn Sarawih kan oh esehla mwomwen atail pahn wiahla aramas mwahu men. E sohte pil wiahte wasahn irail pwihn en Souleng kan arail wasahn patehng aramas akan me ahniki tiahk mwahu . E pil sohte wiahte mehn kaweid kan me nohno oh pahpa kin padahkiong neirail serih kan ni imwarail kan pwe irail en kak wia arail pwukoah, oh wia aramas mwahu kei. Mwomwohdiso en Sises Krais en Souleng en Imwin Rahn-akan laudsang douluhl soang pwukat koaros.
Medewehki mahs minit ehu duwen soahng kopwuriamwei kan me kitail kin wia nan mwomwohdiso wet. Kitail kamehlele me ihte Mwomwohdisohu met me Sises Krais kawada ni ansou me E ketket pohn sampah iei me pil kopwurpwurdohr sang rehn soukohp me Kauno ketin malipehier ong atail ansou oh me atail sounkaweid kan pil kolokol manaman oh mweimwei ohte pwe irail en doadoahngki ni mwaren Koht me duwehte me Soukohp en mahsoko kolokol. E kadaniki prihsduhd en Koht. Kitail kamehlele me sang ni kopwurpwurdohn manamano kitail kak ale tiahk sarawi kan me duwehte Bepdais, oh perepereniki kisakis en Ngehn Sarawi me kin ieiang kitail ansou koaros. Mie atail wahnpoaron oh soukohp kan me kin kaukauweid Mwomwohdiso wet ki prihsduhd kihs kan, oh kitail kamehlele me Koht kin mahsenieng Sapwelime serihkan sang ni soukohp pwukat.
Kitail pil kamehlele me manaman en prihsduhdo kamangaila atail kak en wiahda inou kan oh alehdi tiahk sarawih kan nan tehnpas sarawi pwe ehu rahn kitail en kak pwurala oh uh mwohn sihlangin Koht oh kousoanla Reh kokolahte. Kitail pil kamehlele me sang ni manaman wet peneinei kan kak katengtengpene ong mour soutuk ansou me pwopwoud kan pahn kin wiahda arail inou kapw oh inou sarawi en pwopwoud kokolahte nan ihmw sarawi me kitail kamehlele me wia tehnpas en Koht. Kitail kamehlele me kitail kak alehdi tiahk sarawi pwukat kaidehn ongete pein kitail ahpw pil atail keinek kan me kohdo pohn sampa ahpw sohte ahniki ansou mwahu en iang patehng tiahk sarawi pwukat. Kitail kamehlele me kitail kak welian iraildi oh wia tiahk sarawi pwukat nan tehnpas sarawi kan.
Kitail kamehlele me, sang ni soukohp oh manaman en Koht, kitail aledier ekei iren pwuhk sarawi, me kapapatehngehr kadehde teikan me mie ier nan Pwuhk Sarawi me kasaledahr me Sises Krais iei Sounkomourpen sampa.
Kitail kasalehda me Mwomwohdiso en Sises Krais en Souleng en Imwin Rahn-akan iei ih wein Koht oh ihte Mwomwohdiso me mehlel pohn sampa. E kadaniki Mwomwohdiso en Sises Krais pwehki Ih me kin kaweid; Sapwelime Mwomwohdiso met, oh soahng pwukat koaros mengeila sang ni Sapwelime tomwo.
Kitail kamehlele me soahng pwukat sohte kak dierek ekis wasa de nan pwihn en kapokon ehu pohn sampa. Wen mwahu oh mehlel en ekei pelien lamalam oh mwomwohdiso kan, sohte ehu rehrail kolokol manaman me kak wiahda tiahk sarawi kan en komouro me mie nan Mwomwohdiso en Sises Krais en Souleng en Imwin Rahn-akan.
Kitail ahniki marain en soahng pwukat, ahpw mehlel kitail kamehlele irail? Ma soang pwukat mehlel, eri kitail kolokol padahk kaselel en koapworopwor oh sawas me sampa pahn anahne esehier. Kamehlele mepwukat pahn wia ire kesemwpwal ehu me pahn poatoapoat ong kitail oh irail kan me kitail poakong.
En kamehlele, kitail anahne alehda rongamwahuwo sang ni atail madamadau lel nan atail mongiong kan! E mengeiong kitail en iang mwekmwekidki momour en rongamwau wet pwehki iei me konehng de pwehki e wia atail tiahk me kitail tikida loale de ihme kitail ahnlahr wia. Mweihn ekei kitail saik iang kehn dahme sapwelimen Nahnmwarki Benjamin aramasoko kehn ni ansou me e kiong irail padahk kaselelo: “Irail koaros sengisengkihla ni ngihl ehu, koasoia: Ei, se kamehlele mahsen koaros me komw mahsaniong kiht; oh pil, se ese me mahsen pwukat mehlel oh pwung, pwehki Ngehn en Kauno me Manaman me wekid kitala, de nan aht mohngiong kan, me se solahr pahn inengieng en wiahda dihp, ahpw se pahn nanantiongehr wiahda mwahu sang met kohla.”3
Kitail koaros anahne rapahki pwe atail mongiong kan oh wiewia kan en nan mour wet en kak wekila pwe kitail en kedehier ahniki ineng en idawehn momour en sampah ahpw kitail en kepkepinga Koht. Wekila mehlel kin wia tiahk ehu me kin anahne ereihn ansou kei oh en kin mie ineng en ahniki pwoson ansou koaros. E kin wiawi ansou me kitail kin rapahki nan pwuhk sarawi kan ahpw kaidehn nan internet. E pil kin wiawi ansou me kitail kin peikiong Sapwelimen Koht kosoned akan. Wekila wet pil kin wiawi ansou me kitail kin papah mehtei kan. E pil kin sang ni atail inengieng kapakap, kalapw kohla nan tehnpas sarawi, oh ahniki pwoson oh kapwaiada atail pwukoah kan me Koht-ketkiong kitail. E kin pweida sang ni atail kin nantieng ansou koaros oh sang ni pweidahn ehu ehu rahn akan,
I kin kalapw idek, “Dahme keieu apwal me neitail me pwulopwul kan kin sohpai rahn pwukat?” I sapengki me I kamehlele me e sang ni ineng en wiwiahn “wasa kasalel oh kalaimwon” me milahr nan arail mour.4Ma pwuken Mormon ntingda ong kitail rahn pwukat, eri mehlel kitail sohte pahn pohnsehse padahk kesemwpwal me Lehi kiong kitail me pid kasansal en tukehn komouro pwe kitail de lohdiong pahn wiwiahn irail kan me kin idih kitail oh kepitkin kitail sang nan ihmw kaselel oh kalaimwono.
Dahme keieu saihr nan ai mongiong iei kawewehpen irailko me powehdier arail kahpwal akan nan lapalahn rotoroto pohn ahl inen oh tehtiko, me kolediehr metehu, alehdier dahme re koadkoadoahkehu, oh songehr wahn tuhke iou me sang tukehn komouro. Ahpw pwuhk sarawi masanihier me irailko me kin likou mwahu wie mihmi nan ihmw kaselel oh kalaimwono “kin kepit kin irail oh idih irail kan me kodohr oh iang kangkang wahn tukehu.
“Oh mwurin arail songehr wahntukehu irail namenekdahr, pwehki irail ko me kin kepkepitkin irail; oh irail kin pwupwidi nan ahl me sohte konehng oh irail salongala.”5
Ire tikitik pwukat kawewedahr kitail kan me alehdier rongamwahu en Sises Krais nan atail mour. Iei ma kitail ipwidieng loale de kitail iang nanantieng en iang powehdi rotorot lapalahu pwe kitail en kak diar, ma kitail songehr wahn tukehu wet, me “keieu kaselel oh keieu kesemwpwal” 6oh ihme pahn kak en kieng kitail mour soutuk, “kisakis me keieu laud nan Sapwelimen Koht kisakis koaros.”Kitail anahnehte en wie kangkang wahntukehu ahpw dehr tehk irail akan me kin kemehn kouruhrki dahme kitail kamehlele de irail akan me kin wiahda likamw de rapahki sapwung en kaun en Mwomwohdiso kan de padahk kan. Ih pilipil me kitail pahn wia rahn koaors— pilada pwoson sang kaulim. Elder M. Russell Ballard kangongehkin kitail en “mihmite nan pwohto, doadoahngki amwail sekid en pap kan, oh kolki peh riau koaros.”7
Ni atail wialahr tohn Sapwelimen Kauno Mwomwohdiso pwungo, kitail mihmier pohn pwohto. Kitail sohte anahne raparapahki seli dahme mehlel me sampa pahn kiong kitail pwehn kansenamwahuih kitail, sewese, oh kaweid kitail en pitsang kahpwal en mour—miehier rehtail! Duwehte en Ethan nohnohu ah kak kolokol dahme e kamehlele oh kasalehda ni ansou me e lel kahpwalo, “I kamehlele met,” eri kitail kak!
I kadedehki me atail wia tohn Sapwelimen Kauno wehi wia kisakis keieu kaselel. I kadedehki me kapai kan oh meleilei me Kauno ketin kaunopadahr ong irail kan me peikiong oh pwoson laudsang dahme aramas emen pahn kak en medewehda. I pwilikihdi ahi kadedeh ni mwaren Sises Krais, amen.