2010–2019
O O’u Talitonu Ea?
Aperila 2016


O O’u Talitonu Ea?

Afai e moni nei mea, o lona uiga ua ia i tatou se savali silisili o le faamoemoe ma le fesoasoani e leiloaina lava e le lalolagi.

I le aso 30 o Mati, i le na o le tasi le tausaga ua tea, na taofia ai Ethan Carnesecca e lua tausaga, mai American Fork, Iuta, i le falemai i le nimonia ma ua sao le vai i ona mama. Lua aso mulimuli ane, ua tigaina tele ma ua manaomia ai le ave i le helikopa i le Falemai o Tamaiti Peraimeri i le Aai o Sate Leki. Sa faataga lona tina popole, o Michele, e nofo i le nofoa pito i luma e o ma lana tama. Sa tuuina atu ia te ia se mea faalogo e fesootai ai ma isi i totonu o le helikopa. Sa ia lagonaina le galulue o fomai i lana tama ma’i, ma i le avea ai foi o ia o se tausimai pasi mo tamaiti, sa iloa lelei e Michele le tigaina tele o Ethan.

Ata
O Ethan Carnesecca ao ma’i

I lenei taimi faigata, sa iloaina e Michele o loo latou felelei i luga ae tonu lava o le Malumalu o Draper Iuta. Mai le ea, sa ia tilotilo ifo ai i le vanu ma iloa atu le Malumalu o Jordan River, le Malumalu o Oquirrh Mountain, ma e oo lava i le Malumalu o Sate Leki sa mamao lava. Sa oo mai se manatu i lona mafaufau: “O e talitonu ea pe leai?”

Fai mai o ia e uiga i lenei aafiaga:

“Na ou aoao e uiga i faamanuiaga o le malumalu i le Peraimeri ma i Tamaitai Talavou ma [e] ‘faavavau aiga’. Sa ou faasoaina atu le savali i aiga i tagata agalelei o Mekisiko i la’u misiona. Sa faamauina a’u i la’u soa e faavavau mo le olaga nei ma le faavavau atoa i le malumalu. Sa ou aoao atua ni lesona e uiga i aiga ao avea ma taitai o Tamaitai Talavou, ma sa ou faasoa atu ni tala e uiga i aiga e faavavau i la’u fanau i afiafi faaleaiga. SA OU ILOAINA, ae na OU TALITONU I AI? Na vave ona oo mai la’u tali e pei o le oso ae o le fesili i lo’u mafaufau: na faamaonia mai e le Agaga i lo’u loto ma mafaufau i le tali ua uma ona ou iloa—OU TE talitonu!

“Sa sasaa atu lo’u loto i le tatalo i lo’u Tama Faalelagi i lena taimi, faafetai ia te Ia mo le malamalama ma le talitonuga sa i ai e faavavau moni lava aiga. Sa ou faafetai ia te Ia mo Lona Alo, o Iesu Keriso, o le ua mafai ai. Sa ou faafetai ia te Ia mo la’u tama, ma faailoa atu i lo’u Tama Faalelagi afai e finagalo o Ia e avatu la’u pele o Ethan i Lona aiga faalelagi, e le afaina. Sa ou faatuatuaina lo’u Tama Faalelagi ma le atoatoa, ma sa ou iloaina o le a ou toe vaai ia Ethan. Sa ou matua faafetai i se taimi faigata, na ou maua ai le malamalama MA le talitonuga e moni le talalelei. Sa ou maua le filemu.”1

E tele vaiaso na i ai Ethan i le falemai, i le faiga o ni togafitiga faafomai faapitoa. O tatalo, anapogi, ma le faatuatua o e pele, faatasi ai ma lena tausiga, na mafai ai ona ia tuua le falemai ma toe foi mai i lona aiga. Ua malosi o ia i lenei vaitaimi.

Ata
Aiga o Carnesecca
Ata
Ua toe malosi Ethan Carnesecca

Na faamaonia atu e lenei taimi taua ia Michele o mea sa aoao ai o ia i lona olaga sa sili atu nai lo na o upu; na moni lava.

O i ai ni taimi ua tatou matua masani ai i ni faamanuiaga ua tatou maua o ni tagata o Le Ekalesia a Iesu Keriso o Aso e Gata Ai ma ua le mafai ai ona tatou malamalama atoatoa i le vavega ma le mamalu o le avea ai o ni soo i le Ekalesia moni a le Alii? O tausalaina ea i tatou i le le lotofaafetai i meaalofa silisili ua ofaina mai ia i tatou i lenei olaga? Na aoao mai e le Faaola Lava Ia, “Afai e te tausia a’u poloaiga ma tumau e oo i le iuga, o le a e maua le ola e faavavau, le meaalofa silisili o meaalofa uma a le Atua.”2

Tatou te talitonu ae o lenei Ekalesia ua sili atu nai lo le avea o se nofoaga lelei e o i ai i Aso Sa ma aoao ai ia avea ma se tagata lelei. Ua sili atu nai lo le avea ai ma se kalapu faaagafesootai faaKerisiano matagofie lea e mafai ai ona tatou faamasani ma tagata o e ola mama. E le o se seti o manatu lea e aoao atu ai e matua a latou fanau i le fale ina ia avea ma tagata faatuatuaina ma lelei. O Le Ekalesia a Iesu Keriso o Aso e Gata Ai ua sili atu nai lo nei mea uma.

Mafaufau mo sina minute e uiga i faamatalaga loloto o tatou faia i lenei Ekalesia. Tatou te talitonu o le Ekalesia lava lea e tasi na faavaeina e Iesu Keriso i le lalolagi ua toefuataiina mai e ala i se perofeta ua valaauina e le Atua i o tatou taimi ma ua i ai i o tatou taitai lena lava mana ma le pule e galulue ai i le suafa o le Atua lea na umia e Aposetolo anamua. Ua ta’ua o le perisitua a le Atua. Tatou te faapea atu, e ala atu i lenei pule ua toefuataiina, ua mafai ai ona tatou maua sauniga faaola e pei o le papatisoga ma olioli i le meaalofa faamama a le Agaga Paia ia faatasi ma i tatou i taimi uma. Ua tatou maua ni aposetolo ma perofeta o taitaia ma taialaina lenei Ekalesia e ala i ki o le perisitua, ma ua tatou talitonu o loo fetalai mai le Atua i Ana fanau e ala mai i nei perofeta.

Tatou te talitonu foi o lenei mana o le perisitua ua mafai ai ona tatou osia feagaiga ma maua sauniga i malumalu paia lea o le a mafai ai i se aso ona tatou toe foi atu i le afioaga a le Atua ma nonofo faatasi ma Ia e faavavau. Tatou te faapea atu foi, e ala i lenei mana, ua mafai ona noatia faatasi aiga e faavavau pe a ulu atu ulugalii i le feagaiga fou ma faavavau o le faaipoipoga i maota paia lea tatou te talitonu o maota moni lava a le Atua. Tatou te talitonu e mafai ona tatou maua nei sauniga e le gata mo i tatou lava ae faapea foi mo o tatou tuaa o e na soifua i le lalolagi e aunoa ma le mauaina o le avanoa e auai ai i nei sauniga faaola taua. Tatou te talitonu e mafai ona tatou faia sauniga mo o tatou tuaa e ala i le fai ma sui i nei lava malumalu paia.

Tatou te talitonu faapea, e ala atu i se perofeta ma le mana o le Atua, ua tatou maua ai ni tusitusiga paia faaopoopo, e faaopoopo atu ai i le molimau o i le Tusi Paia o loo folafola mai o Iesu Keriso o le Faaola o le lalolagi.

Tatou te faapea atu o Le Ekalesia a Iesu Keriso o le Au Paia o Aso e Gata Ai o le malo lea o le Atua ma na o le pau lea o le Ekalesia moni i le lalolagi. Ua ta’ua o le Ekalesia a Iesu Keriso aua o loo tu o Ia i le ulu; o Lana Ekalesia, ma ua mafai mea uma ona o Lana taulaga togiola.

Tatou te talitonu o nei vaega tulagaese e leai se isi nofoaga po o faalapotopotoga i lenei lalolagi e mafai ona maua ai. E ui e lelei ma faamaoni isi tapuaiga, ae e leai ma se tasi ua maua le pule e faia ai sauniga o le faaolataga o loo maua i Le Ekalesia a Iesu Keriso o le Au Paia o Aso e Gata Ai.

Ua tatou malamalama i nei mea, ae o tatou talitonu i ai? Afai e moni nei mea, o lona uiga ua ia i tatou se savali silisili o le faamoemoe ma le fesoasoani e leiloaina lava e le lalolagi. O le talitonu i ai o se tulaga o le taua e faavavau mo i tatou ma mo i latou tatou te alolofa i ai.

Ina ia talitonu, e le manaomia le na o lo tatou talitonu ae ia lagonaina i o tatou loto! E mafai ona tatou ola ai i le talalelei ona ua faamoemoeina ai i tatou pe ona o se tu ma aga sa tatou ola ae ai pe ona o se mausa. Atonu e lei tofo nisi i mea na lagona e le nuu o le Tupu a Peniamina ina ua mavae lana lauga musuia: “Ma sa latou alalaga uma mai i le leo e tasi, fai mai: Ioe, ua matou talitonu i upu uma na e saunoa mai ai ia te i matou; o lenei foi, ua matou iloa lo latou mautinoa ma le moni, ona o le Agaga o le Alii Mamana Aoao, lea ua ia faia se liuga tele i totonu o i matou, po o i totonu o o matou loto, ua le toe i ai so matou manao e fai mea leaga, ae ia faia mea lelei e le aunoa.”3

E manaomia lo tatou sailia uma ina ia suia o tatou loto ma natura ina ia le toe i ai se manao ia mulimuli i ala a le lalolagi ae ia faafiafia i le Atua. O le liuga moni o se faagasologa umi ma e aofia ai se naunautaiga ia faatino le faatuatua. E oo mai pe a tatou suesue i tusitusiga paia nai lo le Initoneti. E oo mai pe a tatou usiusitai i poloaiga a le Atua. E oo mai le liuga pe a tatou auauna atu ia i latou o siomia i tatou. E oo mai i le tatalo ma le naunautai, auai soo i le malumalu, ma faataunuu ma le faamaoni o tatou tiutetauave na tuuina mai e le Atua. E manaomia ai taumafaiga faifaipea ma i aso uma.

E masani ona fesiligia a’u, “O le a se luitau sili o feagai ma tatou talavou i le asō?” Sa ou tali atu ou te talitonu o le i ai pea o le faatosinaga a le “fale tele ma le ateatea” i o latou olaga.4 Afai na tusia faapitoa lava le Tusi a Mamona mo o tatou aso, o lona uiga e le mafai ona tatou misia le faatatauga o le savali a Liae i le faaaliga o le laau o le ola mo i tatou ma aafiaga o i latou o tusitusi mai o latou tamatamailima ma faatauemu mai mai le fale tele ma le ateatea.

O le mea e sili ona ou faanoanoa ai o le faamatalaga ia i latou na uma ona latou taumafai atu i le ala e ala atu i puao o le pogisa ma le ala sao ma le vaaapiapi, fepiiti i le ai uamea, ma taunuu i a latou sini, ma amata ona tofo i le fua mama ma suamalie o le laau o le ola. Ona fai mai lea o le mau o i latou o e na matua lelei ituaiga o o latou ofu i le fale tele ma le ateatea sa “peiseai o faatauemu ma tusitusi mai o latou tamatamailima i e na o mai ma aai i le fua.

“Ma ina ua uma ona latou totofo i le fua sa latou māmā ona o i latou o e sa faatauemu mai ia te i latou; ma sa latou pauu ese atu ai i ala faasaina ma ua leiloloa.”5

O nei mau ua faamatalaina ai i latou ia ua uma ona maua le talalelei a Iesu Keriso i o latou olaga. Pe na tatou faananau mai i totonu pe na tauivi atu e ala i puao o le pogisa ina ia mauaina, ua tatou tofo i lenei fua, lea “ua silisili ona pele ma silisili ona manaomia”6 ma ua faamoemoe e aumaia i tatou i le ola e faavavau, “o le aupito silisili lea o meaalofa uma a le Atua.” E manaomia lo tatou aai ai pea ma aua nei faalogo ia i latou o e ulagia o tatou talitonuga po o i latou o e fiafia e fatuina ni masalosaloga po o i latou o e sailiili masei i taitai o le Ekalesia ma aoaoga faavae. O se filifiliga tatou te faia i aso uma—ia filifili le faatuatua nai lo le masalosalo. Na uunaia i tatou e Elder M. Russell Ballard ina ia “nonofo i totonu o le vaa, faaaoga o outou ofufaaola, ma pipiimau i lima uma e lua.”7

I le avea ai ma tagata o le Ekalesia moni a le Alii, ua tatou i ai i totonu o le vaa. E le manaomia ona tatou o e sailiili e ala i talitonuga o le lalolagi mo le upumoni lea o le a aumaia ia i tatou le toafimalie, fesoasoani, ma le taitaiga e avatu saogalemu ai i tatou mai luitau o le olaga—ua uma ona tatou mauaina! E pei lava ona suesueina e le tina o Ethan ona talitonuga ua leva ona i ai ma tautino atu ma le mausali i se taimi o faafitauli, “Ou te talitonu,” faapea foi i tatou!

Ou te molimau atu o loo tatou auai i le malo o le Alii o se meaalofa taua e le mafaatauina. Ou te molimau atu o faamanuiaga ma le filemu ua saunia e le Alii mo i latou o e usiusitai ma faamaoni e silisili atu nai lo soo se mea e mafai ona malamalama i ai se tagata soifua. Ou te tuuina atu ai lenei molimau i le suafa o Iesu Keriso, amene.