2010–2019
Tē ti’aturi ra ānei au ?
Eperera 2016


Tē ti’aturi ra ānei au ?

Mai te mea ē, e parau mau teie mau mea, tei ia tātou nei ïa te parau poro’i rahi a’e ’o te ti’aturira’a ’e te tauturura’a tā te ao nei i ’ore ā i ’ite.

I te 30 nō mati, hō’ē noa matahiti i teienei, ’ua tāpe’ahia ’o Ethan Carnesecca iti e piti matahiti te pa’ari, nō American Fork Utaha mai, i te fare ma’i, e ma’i māhāhā tōna ’e ’ua ’ī te māhāhā i te pape. E piti mahana i muri iho, ’ua rahi roa tōna ma’i ’e ’ua tītauhia ’ia fa’areva iāna nā ni’a i te manu tautau nā te reva, i te fare ma’i nō te mau tamari’i paraimere i Roto Miti. ’Ua fa’ati’ahia i tōna metua vāhine pe’ape’a ’o Michele ’ia pārahi i ni’a i te pārahira’a i mua ’e ia ’āpe’e i tāna tamaiti. ’Ua hōro’ahia iāna te hō’ē fa’aro’o tari’a ’ia ti’a iāna ’ia paraparau i te tahi mau ta’ata i roto i te manu tautau nā te reva. ’Ua ti’a iāna ’ia fa’aro’o i te mau taote e ha’a ra i ni’a i tāna tamaiti iti ma’i, ’e nō te mea e taote ato’a ’oia, ’ua nava’i te mau mea tā Michele i fa’aro’o nō te ’ite ē, e fifi rahi tō Ethan.

Hōho’a
Ethan Carnesecca i te ro’ora’ahia ’oia i te ma’i

I roto i taua taime fifi ra, ’ua ’ite a’era ’o Michele ē, tē rere ’āfaro noa ra rātou nā ni’a a’e i te hiero nō Draper Utaha. Nā ni’a mai i te reva, ’ua hi’o ’oia i rāpae i te ’āfa’a ’e ’ua ti’a iāna ’ia ’ite atu i te hiero nō Jordan River, te hiero nō Oquirrh Mountain, ē tae roa atu i te hiero nō Roto Miti i te ātea. Puta mai nei te mana’o i roto i tōna upo’o ē : « Tē ti’aturi ra ānei ’oe ’e ’aore rā, ’aita ? »

Tē parau nei ’oia nō ni’a i teie ’ohipa i tupu :

« ’Ua ha’api’i mai au i roto i te paraimere ’e i roto i te feiā ’āpī tamahine i te parau nō te mau ha’amaita’ira’a o te hiero ’e nō te ‘huru mure ’ore o te mau ’utuāfare’. ’Ua fa’a’ite au i te parau poro’i nō ni’a i te mau ’utuāfare i te mau ta’ata maita’i nō Mexico i roto i ta’u misiōni. ’Ua tā’atihia vau i tō’u hoa mure ’ore nō teie tau ’e nō te tau a muri atu i roto i te hiero. ’Ua ha’api’i au i te mau ha’api’ira’a nō ni’a i te mau ’utuāfare ’a riro ai au ’ei fa’atere nō te feiā ’āpī tamahine, ’e ’ua fa’a’ite au i te mau ’ā’amu nō ni’a i te mau ’utuāfare mure ’ore i tā’u mau tamari’i i roto i te pō ’utuāfare. ’UA ’ITE AU, terā rā, ’ua TI’ATURI ānei AU ? ’Ua ha’apāpū mai te Vārua i roto i tō’u ’ā’au ’e i roto i tō’u vārua i te pāhonora’a tā’u i ’ite a’ena—’UA TI’ATURI AU !

« I taua taime ra, ’ua pure au i tō’u Metua i te Ao ra, ma te ha’amāuruuru Iāna nō te ’ite ’e te ti’aturira’a i roa’a iā’u ē, e mea mure ’ore mau te mau ’utuāfare. ’Ua ha’amāuruuru vau Iāna nō Tāna Tamaiti, ’o Iesu Mesia, tei fa’atia i te reira. ’Ua ha’amāuruuru vau Iāna nō tā’u tamaiti, ’e ’ua fa’a’ite au i tō’u Metua i te Ao ra mai te mea ē, e hina’aro ’Oia e hopoi i tā’u Ethan iti i tōna ra nohora’a i te ra’i ra, ’ua ti’a ïa te reira. ’Ua ti’aturi hope roa vau i tō’u Metua i te Ao ra, ’e ’ua ’ite au ē, e ’ite fa’ahou vau ia Ethan. ’Ua ’oa’oa roa vau i te mea ē, i roto i te hō’ē taime fifi, ’ua roa’a iā’u te ’itera’a ’E te ti’aturira’a ē, e parau mau te ’evanelia. ’Ua roa’a iā’u te hau ».1

’Ua fa’aea Ethan e rave rahi hepetoma i roto i te fare ma’i, ma te fāri’i i te rapa’aura’a maita’i roa. Nā roto i te mau pure, te ha’apaera’a mā’a, ’e te fa’aro’o o tei herehia, ’āpitihia i taua rapa’aura’a ra, ’ua ti’a iāna ’ia fa’aru’e i te fare ma’i ’e ’ia ho’i i te fare i pīha’i iho i tōna ’utuāfare. E tino maita’i tōna ’e e mea maita’i ’oia i teie mahana.

Hōho’a
Te ’utuāfare Carnesecca
Hōho’a
Ethan Carnesecca tei maita’i mai

Nā teie taime faufa’a rahi nō Michele i ha’apāpū mai iāna ē, te mau mea tāna i ha’api’i na i roto i tōna orara’a tā’āto’a, ’ua hau atu ïa i te parau noa ; e parau mau ïa.

Tē mo’ehia ra ānei ia tātou i te tahi taime, ’ia hāro’aro’a hope roa i te semeio ’e te hanahana o te ti’ara’a pipi i roto i te ’Ēkālesia mau a te Fatu, i te mea ē, ’ua mātaro roa tātou i te mau ha’amaita’ira’a tei hōro’ahia ia tātou, te mau melo o te ’Ēkālesia a Iesu Mesia i te mau Mahana Hōpe’a nei ? ’Ua hapa ānei tātou i te hō’ē taime i te huru māuruuru ’ore i te hōro’a rahi a’e e nehenehe e hōro’ahia mai ia tātou i roto i teie nei orara’a ? Te Fa’aora iho tei ha’api’i mai ē, « E mai te mea e ha’apa’o ’oe i tā’u mau fa’auera’a ’e e itoito noa ē tae noa atu i te hope’a e noa’a ïa ia ’oe te ora mure ’ore, ’o te hōro’a hau a’e te reira i te mau hōro’a ato’a a te Atua ».2

Tē ti’aturi nei tātou ē, e ’ere teie ’Ēkālesia i te hō’ē noa vāhi maita’i e haere i te Sābati ’e ’ia ha’api’i mai e nāhea ’ia riro ’ei ta’ata maita’i. ’Ua hau atu ïa i te riro-noa-ra’a ’ei pū sotiare keresetiano maita’i i reira e ti’a ai ia tātou ’ia ’āmui atu i te mau ta’ata ferurira’a maita’i i te pae mōrare. E ’ere i te hō’ē noa ha’aputura’a mana’o rahi tā te mau metua e nehenehe e ha’api’i i tā rātou mau tamari’i i te fare ’ia riro ho’i rātou ’ei ta’ata ti’a’au maita’i, ’ei mau ta’ata maita’i. ’Ua hau roa atu te ’Ēkālesia a Iesu Mesia i te mau Mahana Hōpe’a nei i teie mau mea tā’āto’a.

’A feruri na hō’ē a’e minuti i te mau fa’a’itera’a hōhonu tā tātou e fa’a’ite nei i roto i teie ’Ēkālesia. Tē ti’aturi nei tātou ē, te ’Ēkālesia tā Iesu Mesia i fa’atia ’a ora ai ’Oia i ni’a i te fenua nei, ’ua fa’aho’i-fa’ahou-hia mai ïa nā te hō’ē peropheta tei pi’ihia e te Atua i tō tātou nei anotau, ’e tē mau nei tō tātou mau ti’a fa’atere i te reira ato’a pūai ’e te mana nō te ’ohipa i roto i te i’oa o te Atua tei mauhia ’e te mau ’āpōsetolo i tahito ra. Tē parauhia nei te reira te autahu’ara’a o te Atua. Tē fa’a’ite nei tātou ē, nā roto i teie mana i fa’aho’ihia mai, e nehenehe tā tātou e fāri’i i te mau ’ōro’a fa’aora mai te bāpetizora’a, ’e e fāna’o ho’i i te hōro’a tāmā o te Vārua Maita’i ’ia pārahi i pīha’i iho ia tātou i te mau taime ato’a. E ’āpōsetolo ’e e peropheta tā tātou e fa’atere nei ’e e arata’i nei i teie ’Ēkālesia nā roto i te mau tāviri o te autahu’ara’a, ’e tē ti’aturi nei tātou ē, tē paraparau mai nei te Atua i Tāna mau tamari’i nā roto i teie mau peropheta.

Tē ti’aturi ato’a nei tātou ē, nā roto i teie mana autahu’ara’a e ti’a ai ia tātou ’ia rave i te mau fafaura’a ’e ’ia fāri’i i te mau ’ōro’a i roto i te mau hiero mo’a, te mau ’ōro’a e ti’a ai ia tātou ’ia ho’i fa’ahou i mua i te aro o te Atua ’e ’ia ora i pīha’i iho Iāna ’e a muri noa atu. Tē fa’a’ite ato’a nei tātou ē, nā roto i teie mana, e ti’a ai i te mau ’utuāfare ’ia tā’amuhia nō te tau a muri atu, ’ia tomo ana’e te tāne ’e te vāhine fa’aipoipo i roto i te fafaura’a ’āpī ’e te mure ’ore o te fa’aipoipora’a i roto i te mau fare mo’a tā tātou e ti’aturi nei ē, e mau fare ïa nō te Atua. Tē ti’aturi nei tātou ē, e nehenehe tā tātou e fāri’i i teie mau ’ōro’a fa’aora ’eiaha nō tātou ana’e iho, nō tō tātou ato’a rā mau tupuna tei ora na i ni’a i te fenua nei ma te ’ore e fāna’o ’ia tomo ato’a i roto i teie mau ’ōro’a fa’aora faufa’a. Tē ti’aturi nei tātou ē, e nehenehe tā tātou e rave i te mau ’ōro’a nō tō tātou mau tupuna nā roto i te monora’a i roto i teie mau hiero mo’a.

Tē ti’aturi nei tātou ē, nā roto i te hō’ē peropheta e te mana o te Atua, ’ua fāri’i tātou i te tahi atu mau pāpa’ira’a mo’a, ma te ’āpiti i te ’itera’a pāpū i roto i te Bibilia i te fa’a’itera’a ē, ’o Iesu Mesia te Fa’aora o tō te ao nei.

Tē fa’a’ite nei tātou ē, te ’Ēkālesia a Iesu Mesia i te Feiā Mo’a i te mau Mahana Hōpe’a nei ’o te basileiā ïa o te Atua ’e te ’Ēkālesia mau hō’ē roa i ni’a i te fenua nei. ’Ua parauhia te ’Ēkālesia a Iesu Mesia nō te mea, tē ti’a nei ’Oia i te upo’o ; Nāna teie ’Ēkālesia, ’e e tupu teie mau mea ato’a nei nō Tōna tusia Tāra’ehara.

Tē ti’aturi nei tātou ē, e’ita teie mau fa’anahora’a pāpū e ’itehia i roto i te tahi atu vāhi ’e ’aore rā, i roto i te tahi atu pupu i ni’a i te fenua nei. Noa atu te maita’i ’e te parau ti’a te tahi atu mau fa’aro’o ’e ’Ēkālesia, ’aore hō’ē o rātou i fāri’i i te mana nō te hōro’a i te mau ’ōro’a o te fa’aorara’a ’o tē vai nei i roto i te ’Ēkālesia a Iesu Mesia i te feiā Mo’a i te mau Mahana Hōpe’a nei.

Tē vai nei tō tātou ’itera’a nō teie mau mea, terā rā, tē ti’aturi ra ānei tātou ? Mai te mea ē, e parau mau teie mau mea, tei ia tātou nei ïa te parau poro’i rahi a’e ’o te ti’aturira’a ’e te tauturura’a tā te ao nei i ’ore ā i ’ite. ’Ua riro te ti’aturira’a i te reira ’ei ’ohipa faufa’a rahi roa nō tātou ’e nō rātou tā tātou e here nei.

Nō te ti’aturi, tītauhia ia tātou ’ia rave i te ’evanelia i roto i tō tātou upo’o ’e ’ia tu’u i roto i tō tātou ’ā’au ! E nehenehe tā tātou e ora noa i te ’evanelia nō te mea, ’ua tītauhia te reira ’e ’aore rā, nō te mea, ’ua pa’ari tātou i roto i te reira hīro’a tumu, ’e ’aore rā, nō te mea e peu mātarohia. Penei a’e ’aita te tahi mau ta’ata i ’ite i te mea tā te nūna’a o te ari’i Beniamina i fāri’i i muri a’e i tāna a’ora’a pūai : « ’Ua pi’i mai ra rātou ato’a ma te reo hō’ē, i te nā ’ōra’a mai, ’Ē, ’ua fa’aro’o mātou i te parau ato’a tā ’oe i parau mai ia mātou ; ’e ’ua ’ite ho’i mātou ē, e parau mau te reira, nā roto i te Vārua o te Fatu pūai hope tei fa’ahuru ’ē ia mātou, ’oia ho’i tō mātou ’ā’au, i ’ore ai mātou i hina’aro ai i te rave i te ’ino, ’ia rave rā i te maita’i ma te fa’aea ’ore ».3

Tītauhia tātou pā’āto’a ’ia ’imi i te fahuru-’ē-ra’a o tō tātou ’ā’au ’e tō tātou nātura, e’ita ïa tātou e hina’aro fa’ahou e pe’e i te mau haere’a o te ao nei, e hina’aro rā ’ia auhia mai e te Atua. Te fa’afāriura’a mau, e ’ohipa ïa ’o te tupu i roto i te hō’ē pu’e tau ’e ’o te tītau i te hina’aro ’ia fa’a’ohipa i te fa’aro’o. E tupu mai te reira ’ia ’imi ana’e tātou i te mau pāpa’ira’a mo’a ’eiaha rā te ’itenati. E tupu mai te reira ’ia ha’apa’o ana’e tātou i te mau fa’auera’a a te Atua. E tupu mai te fa’afāriura’a ’ia tāvini ana’e tātou i te feiā e ha’ati nei ia tātou. E tupu mai te reira nā roto i te pure tu’utu’u ’ore, te haere-tāmau-ra’a i te hiero, ’e te rave-fa’aoti-ra’a ma te ha’apa’o maita’i i tā tātou mau hōpoi’a tā te Atua i hōro’a mai. E tītauhia te ha’ara’a tāmau ’e i te mau mahana ato’a.

Pinepine au i te uihia mai ē, « E aha te tāmatara’a rahi a’e tā tō tātou feiā ’āpī e fārerei nei i teie mahana ? » E pāhono vau ē, tē ti’aturi nei au ē, ’o te vai-tāmau-ra’a ïa te fa’aurura’a a te « fare rahi ’e te ’ā’ano »4 i roto i tō rātou orara’a. Mai te mea ē, ’ua pāpa’i-ta’a-’ē-hia te Buka a Moromona nō tō tātou anotau, e mea pāpū ïa ē, e’ita e mo’ehia ia tātou te tano nō tātou pā’āto’a te mau parau poro’i i roto i te ’ōrama a Lehi nō te tumu rā’au o te ora ’e te feiā e fa’atoro mai ra i te rima ’e tē tāhitohito mai ra nā roto mai i te fare rahi ’e te ’ā’ano.

Te mea ’oto roa nō’u, ’o te tātarara’a ïa o te feiā tei rohi na i roto i te māhu pōiri i ni’a i te ’e’ā tītī’aifaro ’e te piriha’o, ’ua tape’a i ni’a i te mea auri, ’ua tāpae rātou i te vāhi i tītauhia, ’e ’ua ha’amata i te ’amu i te hotu vi’ivi’i ’ore ’e te monamona o te rā’au o te ora. ’E tē parau nei te mau pāpa’ira’a mo’a ē, teie mau ta’ata ’ahu nehenehe i roto i te fare rahi ’e te ’ā’ano « tē tāhitohito mai ra ’e tē amuamu mai ra ho’i rātou i te mau ta’ata i haere mai i reira, ’e tē ’amu ra i taua hotu ra.

« ’E [tāmata] a’era rātou i taua hotu ra, ’ua ha’amā ihora rātou nō te ta’ata i tāhitohito mai ia rātou ra ; ma’iri ihora rātou i te mau ’e’ā au ’ore ra ’e mo’e atu ra ».5

Tē parau nei teie nā ’īrava nō tātou ’o tei fāri’i a’ena i te ’evanelia a Iesu Mesia i roto i tō tātou orara’a. ’Ua fānauhia paha tātou i roto i te ’evanelia ’e ’aore rā, ’ua ’aro paha tātou nō te ’imi i tō tātou ’e’ā i roto i te māhu pōiri nō te ’imi i te ’evanelia, ’ua tāmata tātou i teie hotu, tei « hau ’ē… i te maita’i ’e te hina’arohia »6 ’e tei roto iāna te mana nō te hōro’a mai ia tātou i te ora mure ’ore, « te hōro’a hau a’e… i te mau hōro’a ato’a a te Atua ». Tītauhia ia tātou ’ia ’amu tāmau noa ma te ’oa’oa, ’e ’eiaha e ha’apa’o atu i te feiā e tāhitohito mai ra i tō tātou mau ti’aturira’a ’e ’aore rā, te feiā tei au ’ia fa’atupu i te fē’a’a ’e ’aore rā, te feiā e fa’a’ino nei i te mau ti’a fa’atere ’e te mau ha’api’ira’a tumu a te ’Ēkālesia. Tītauhia ia tātou ’ia mā’iti i te fa’aro’o ’eiaha rā te mana’o fē’a’a i te mau mahana ato’a. ’Ua fa’aitoito mai ’o Elder M. Russell Ballard ia tātou ’ia « fa’aea noa i ni’a iho i te pahi, ’ia fa’a’ohipa i tō ’outou mau ’ahu fa’aora, ’e ’ia tāpe’a e piti rima i ni’a iho ».7

’Ei melo nō te ’Ēkālesia mau a te Fatu, tei ni’a iho a’ena tātou i te pahi. ’Aita e tītauhia ia tātou ’ia ’imi nā roto i te mau ha’api’ira’a hōhonu a te ao nei, i te parau mau ’o te hōro’a mai ia tātou i te māhanahana, te tauturu ’e te arata’ira’a nō te fa’ahaere ia tātou ma te pe’ape’a ’ore nā roto i te mau tāmatara’a o te orara’a—’ua roa’a a’ena te reira ia tātou ! Mai te metua vāhine o Ethan i hi’opo’a i tōna mau ti’aturira’a roa ’e tei parau i roto i te hō’ē taime fifi, « ’Ua ti’aturi au », ’oia ato’a ïa tātou !

Tē fa’a’ite pāpū nei au ē, tō tātou ti’ara’a melo i roto i te basileiā o te Fatu, e hōro’a ïa ’o te ’ore roa e ti’a ia fa’aau i tōna faufa’a. Tē fa’a’ite pāpū nei au ē, te mau ha’amaita’ira’a ’e te hau tā te Fatu e fa’aherehere nei nō te feiā ha’apa’o maita’i, ’ua nā ’ō ’ē atu ïa i te mau mea ato’a tā te vārua ta’ata e nehenehe e māramarama. Tē vaiiho atu nei au i teie ’itera’a pāpū i roto ia ’outou nā roto i te i’oa o Iesu Mesia ra, ’āmene.