2010–2019
Tsev Neeg uas Nyob Ua Ke Mus Ib Txhis
2016 April General Conference


Tsev Neeg uas Nyob Ua Ke Mus Ib Txhis

Peb txoj kev lav ris hauv lub pov thawj hwj yog kom tso peb tsev neeg thiab tej yim neeg uas nyob ntawm peb ib ncig ua qhov tseem ceeb tshaj plaws hauv peb lub neej.

Kuv zoo siab nrog nej nyob hauv tuas rau lub rooj sab laj rau lub pov thawj hwj hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nov yog ib lub sij hawm tseem ceeb hauv lub Koom Txoos zaj liv xwm. Ib puas yim caum ob xyoos tas los lawm thaum xyoo 1834, hauv lub zos Kirtland, Ohio, tag nrho lub pov thawj hwj raug hu los sib sau ua ke hauv ib lub me nyuam tsev ntoo uas dav li 14 fiv thiab ntev li 14 fiv (4.2 m). Nyob hauv txoj kev sib ntsib ntawd tus Yaj Saub Yauxej Xamiv uas tau hais tias: “Nej tsis paub txog lub Koom Txoos thiab lub nceeg vaj tias nws yuav nyob li cas ntau npaum li ib tug me nyuam mos liab uas tseem zaum ntawm nws niam ncej puab. Nej tsis to taub hlo li. … Hmo no nej tsuas pom qhov me ntsis ntawm lub Pov Thawj Hwj, tiam sis lub Koom Txoos no twb yuav puv tag nrho Amelikas Sab Qaum Teb thiab Sab Qab Teb—thiab yuav puv tag nrho lub ntiaj teb.”1

Ntau plhom tus neeg uas tuav lub pov thawj hwj, hauv ntau tshaj 110 lub teb chaws, sib sau ua ke hauv tuas no. Tej zaum tus Yaj Saub Yauxej tau pom lub sij hawm no thiab qhov yeeb koob uas tseem nyob tom peb hau ntej.

Hmo no kuv zaj xov yog vim kuv xav sim piav seb yav tom ntej yuav zoo li cas thiab peb yuav tsum ua dab tsi yog peb yuav koom txoj kev cawm seej uas peb Leej Txiv Saum Ntuj Ceeb Tsheej tau npaj tseg rau peb. Ua ntej peb yug los, peb nyob hauv ib tse neeg uas raug kev tsa nto thiab nyob mus ib txhis nrog Leej Txiv Saum Ntuj Ceeb Tsheej. Nws tau tsa ib txoj hau kev uas cia peb loj hlob thiab peem los mus ua neeg zoo li Nws. Nws ua li ntawd vim Nws hlub peb. Lub ntsiab rau txoj hau kev no yog cia peb muaj cib fim nyob tas mus li ib yam li peb Leej Txiv Saum Ntuj Ceeb Tsheej nyob. Txoj hau kev no yog cia peb nyob hauv lub neej uas muaj kev ploj kev tuag no uas yuav sim peb siab. Tau lus cog tseg hais tias dhau ntawm Yexus Khetos txoj Kev Theej Txhoj, yog peb ua raws li tej kev cai thiab lub pov thawj hwj tej kab ke hauv txoj moo zoo, peb yuav muaj txoj sia nyob mus ib txhis, uas yog Nws qhov khoom plig zoo tshaj plaws.

Txoj sia nyob mus ib txhis yog lub neej uas Vajtswv peb Leej Txiv uas Nyob Mus Ib Txhis muaj. Vajtswv tau hais tias Nws lub hom phiaj yog “yog kom tib neeg txais tau txoj kev tsis txawj tuag thiab txoj sia nyob mus ib txhis” (Mauxes 1:39). Lub hom phiaj rau txhua tus uas tuav lub pov thawj hwj yog kom pab tib neeg nce mus rau txoj sia nyob mus ib txhis no.

Txhua txoj hauj lwm hauv lub pov thawj hwj thiab txhua kab ke hauv lub pov thawj hwj yog ua los pab Leej Txiv Saum Ntuj Ceeb Tsheej cov me nyuam kom tau kev hloov siab dhau ntawm Yexus Khetos txoj Kev Theej Txhoj kom ua neeg zoo dua hauv tej yim neeg zoo. Yog li ntawd “txhua tus txiv neej txoj ntiag tug hauj lwm yog kom ntseeg txoj moo zoo, ceev cov lus txib, thiab tsim thiab kho ib tse neeg zoo tag nrho uas yuav nyob mus ib txhis,”2 thiab pab lwm tus neeg ua tib yam li ntawd.

Vim hais tias qhov no muaj tseeb, peb yuav tsum muaj ib txoj kev ua khub niam txiv xilethi-aus uas ua peb lub hom phiaj thiab txoj ntsiab cai. Qhov ntawd txhais tau hais tias peb yuav tsum sim raug muab khi ua ke rau ib tug khub hauv Vajtswv lub tuam tsev. Peb kuj yuav tsum yaum lwm leej lwm tus kom ua thiab coj raws li tej kev khi lus uas khi ib tug txiv thiab nws tus poj niam ua ke, nrog nkawd tsev neeg, hauv lub neej no thiab hauv lub uas tseem yuav los.

Vim li cas qhov no thiaj tseem ceeb rau peb txhua tus—tsis hais cov laus cov hluas, los yog tus dikas los yog tus pov thawj hlob, los yog tus tub los yog leej txiv? Twb yog vim peb txoj kev lav ris hauv lub pov thawj hwj yog kom tso peb tsev neeg thiab tej yim neeg uas nyob ntawm peb ib ncig ua qhov tseem ceeb tshaj plaws rau peb. Txhua txoj kev txiav txim loj yuav tsum ua tom qab peb xav seb qhov ntawd yuav ua li cas rau peb tsev neeg seb puas yuav tsim nyog nrog Leej Txiv Saum Ntuj Ceeb Tsheej thiab Yexus Khetos nyob. Tsis muaj ib yam dab tsi hauv peb tej hauj lwm hauv lub pov thawj hwj uas tseem ceeb npaum li qhov no.

Cia kuv qhia nej tias qhov no txhais tau li cas rau ib tug dikas uas mloog hmos no vim nws yog ib tug hauv ib tse neeg thiab ib tug hauv ib pawg pov thawj hwj.

Nyob hauv nws tsev neeg, tej zaum muaj los sis tsis muaj tsev neeg kev thov Vajtswv ua ke txhua hnub los sis tsev neeg hmo ua ke txhua lim piam. Yog tias nws txiv, paub txog tej kev lav ris no, hu nws tsev neeg los ua ke yuav thov Vajtswv los sis nyeem vaj lug kub, tus dikas mam li luag nyav khiav nrawm nroos tuaj koom lawv. Nws muaj cai txhawb pab nws cov kwv tij thiab muam sib koom tej no thiab qhuas lawv thaum lawv ua li ntawd. Nws muaj cai thov nws txiv foom koob hmoov rau nws thaum nws pib kawm ntawv los sis lwm lub sij hawm uas nws xav tau.

Tej zaum nws tsis muaj leej txiv uas rau siab ntseeg npaum li no. Tiam sis qhov uas nws xav tau tej no yeej yuav coj lub ntuj tej hwj chim los rau nws vim yog nws txoj kev ntseeg. Lawv mam li nrhiav ib tse neeg uas tus dikas xav tau tag siab tag ntsws.

Tus xib hwb hauv lub Pov Thawj Hwj Aloos yuav pom hais tias nws txoj kev mus qhia tom tsev yog ib lub cib fim pab tus Tswv hloov ib tse neeg lub neej. Tus Tswv qhia hauv Phau Lus Qhuab Qhia thiab Kev Khi Lus tias:

Tus xib hwb lub luag hauj lwm yog kom saib xyuas cov ntseeg txhua lub sij hawm, thiab nyob nrog lawv thiab txhawb lawv lub zog;

Thiab xyuas kom tsis txhob muaj kev ua phem nyob hauv lub koom txoos, thiab kom txhob muaj kev ib leeg ua nyuaj nyuaj rau ib leeg, kom txhob dag, txhob taug xaiv, thiab txhob hais lus phem txog lwm tus (saib Q&K 20:53–54).

Ib yam li ntawd, tus pov thawj hauv lub Pov Thawj Hwj Aloos tau lo lus txib no:

Tus pov thawj lub luag hauj lwm yog kom qhuab qhia, qhia, piav, ntuas, thiab muab neeg ua kev cai raus dej, thiab saib xyuas lub cim nco txog,

Mus xyuas txhua tus mej zeej tom tsev, thiab ntuas kom lawv thov Vajtswv nrov nrov thiab ntsiag to thiab kom ua tag nrho tsev neeg tej dej num (saib Q&K 20:46–47).

Tej zaum yuav xav paub, ib yam li thaum kuv yog ib tug xib hwb thiab pov thawj hluas, seb yuav ua li cas thiaj ua tau tej hauj lwm no. Kuv tsis tau paub tias kuv yuav ntuas ib tse neeg li cas lawv thiaj paub mus txais txoj sia nyob mus ib txhis es txhob tub qaug lawv los sis cem lawv. Kuv tau kawm paub tias tib txoj kev ntuas uas pab lawv pauv siab yog qhov uas los ntawm tus Vaj Ntsuj Plig Dawb Huv los. Feem ntau yuav muaj li no thaum peb hais peb zaj lus tim khawv txog tus Cawm Seej, tus uas yog tus neeg zoo tshaj plaws hauv ib tse neeg. Thaum peb tsom ntsoov rau peb txoj kev hlub Nws, kev sib haum xeeb thiab kev thaj yeeb yuav loj hlob tuaj hauv tej tsev uas peb mus xyuas. Tus Vaj Ntsuj Plig Dawb Huv yuav nrog peb mus ua tej hauj lwm rau tej yim neeg.

Tej zaum tus neeg hluas uas tuav lub pov thawj hwj yuav coj tau thiab ua yam ntxwv txog tus Cawm Seej hauv lawv nruab siab thaum lawv pom seb nws thov Vajtswv li cas, seb nws hais lus zoo li cas, thiab txhawb pab lawv tsev neeg li cas.

Ib tug thawj coj hauv lub pov thawj hwj uas txawj ntse qhia kuv tias nws to taub qhov no. Nws tau hais kom kuv tus tub yuav tsum ua tus coj qhia thaum nkawd mus qhia tom tsev. Nws hais tias tej zaum yim neeg ntawd yuav tsis xav ua raws li nws cov lus ntuas, tiam sis nws xav tias tus tub hluas tej zaj lus qhia me me thiab nws zaj lus tim khawv yuav tog mus hauv lawv tej siab uas twb tawv qhawv tas.

Ib tug txwj laug hluas yuav ua li cas thiaj pab tsim tej yim neeg uas nyob mus ib txhis? Tej zaum yuav yog ib tug uas tab tom yuav tawm mus ua tub txib. Tus ntawd yuav tsum thov Vajtswv tag siab tag ntsws kom nws yuav nrhiav tau, qhia thiab muab tej yim neeg ua kev cai raus dej. Kuv tseem nco qab ib tug txiv neej hluas nrog nws tus poj niam thiab nkawd ob tug me nyuam ntxhais muaj ib hnub uas lawv nrog kuv thiab kuv tus khub uas ua tub txib zaum ua ke. Tus Vaj Ntsuj Plig Dawb Huv los rau ntawd thiab ua tim khawv rau lawv tias Yexus Khetos txoj moo zoo twb raug muab txum tim rov qab los lawm. Nkawd ntseeg txaus nkawd thiaj thov wb seb wb puas kam foom koob hmoov rau nkawd ob tug ntxhais ib yam li nkawd twb pom luag ua hauv tej kev sib ntsib noj lub cim nco txog. Nkawd twb xav kom nkawd ob tug me nyuam yuav tau koob hmoov, tiam sis nkawd tsis to taub tias tej koob hmoov zoo tshaj plaws tsuas yuav los yog tias lawv mus hauv Vajtswv cov tuam tsev tom qab lawv tau ua tej kev sib khi lus.

Tseem mob kuv siab thaum kuv xav txog khub niam txiv thiab ob tug ntxhais ntawd, uas tej zaum twb loj hlob tas, tiam sis tsis muaj kev cog lus txog ib tse neeg uas nyob mus ib txhis. Nkawd niam txiv paub me me txog tej koob hmoov uas nkawd yuav txais tau. Kuv cia siab tias yuav muaj xwm dab tsi, yav tom ntej uas lawv yuav muaj cib fim los ua ib tse neeg uas nyob mus ib txhis.

Lwm cov txwj laug uas tab tom mus ua tub txib yuav muaj kev zoo siab li kuv tus tub Matthew muaj thiab. Nws thiab nws tus khub nrhiav tau ib tug poj ntsuam uas muaj 1 tus me nyuam lawv yeej txom nyem heev. Nws xav kom lawv tau tej yam uas nej xav tau—uas yog kom muaj ib tse neeg uas nyob mus ib txhis. Rau kuv tus tub mas, lub sij hawm ntawd zoo nkaus yuav muaj tsis tau li.

Kuv tau mus xyuas lub nroog ntawd ntau xyoo tom qab kuv tus tub tau muab tus poj ntsuam ntawd ua kev cai raus dej, ces tus poj niam ntawd caw kuv mus ntsib nws tsev neeg tom lub koom txoos. Kuv tau tos ntev vim nws cov me nyuam feem coob, thiab nws coob tug xeeb ntxwv, tau tuaj ntawm ntau lub tsev koom txoos hauv cheeb tsam ntawd. Nws ib tug tub tab tom nyob hauv pawg npisov, thiab nws coob tus me nyuam tau txais tej koob hmoov los ntawm lub tuam tsev tej kev sib khi lus, thiab nws raug khi ua ke ua ib tse neeg nyob mus ib txhis. Thaum kuv ncaim tus muam ntawd mus, nws los khawm kuv lub duav (nws yog neeg qis taub, ces nws tsuas ncav cuag kuv lub duav xwb) thiab hais tias, “Thov koj, hais kom Mateo rov qab los rau Chile teb ua ntej kuv tso lub neej no tseg.” Vim muaj ob tug txwj laug uas rau siab ntseeg ntawd, nws muaj kev cia siab tias nws yuav txais Vajtswv qhov khoom plig zoo tshaj plaws.

Muaj tej yam uas ib tug txwj laug yuav tsum ua, thaum nws ua tub txib rov los tsev, kom thiaj ua tau nws txoj kev cog lus tias nws yuav nrhiav kom tau txoj sia nyob mus ib txhis rau nws tus kheej thiab rau cov neeg uas nws hlub. Tsis muaj ib txoj kev cog lus hauv lub sij hawm no los sis hauv lub neej uas nyob mus ib txhis uas tseem ceeb tshaj txoj kev sib yuav. Nej tau hnov tej lus ntuas zoo kom muab kev sib yuav ua ib lub hom phiaj tseem ceeb tsis ntev tom qab nej ua tub txib los tsev. Tus tub qhev uas tuav lub pov thawj hwj uas rau siab ntseeg yeej yuav ua tib zoo ua li ntawd.

Thaum xav txog kev sib yuav, nws yuav pom hais tias nws tab tom xaiv cov niam txiv rau nws cov me nyuam thiab xaiv lawv zaj liv xwm. Nws yuav rau siab nrhiav thiab ua tib zoo thov Vajtswv txog txoj kev txiav txim no. Nws yuav tsum kawm paub tias tus uas nws yuav ua poj niam yeej xav tau ib tsev neeg li nws xav, muaj tib txoj kev xav li tus Tswv muaj txog lub ntsiab rau kev sib yuav thiab paub tias nws yog tus neeg uas nws kam tso siab rau nws saib xyuas nws cov me nyuam txoj kev zoo siab.

Thawj Tswj Hwm N. Eldon Tanner ntuas li no hais tias: “Cov niam txiv uas nej yuav tsum hwm tshaj plaws yuav tsum yog cov niam txiv rau cov uas yuav los ua nej cov me nyuam. Cov me nyuam ntawd yuav tsum muaj cov niam txiv zoo tshaj plaws uas nej muab tau—niam txiv uas huv huv.”3 Txoj kev dawb huv yuav pov hwm nej thiab yuav pov hwm nej cov me nyuam. Koj tshuav lawv nqi yuav tau muab txoj koob hmoov no rau lawv.

Tej zaum hmo no muaj tej tus txiv thiab leej txiv uas tab tom mloog cov lus no. Nej yuav tsum ua li cas? Kuv cia siab tias nej yuav xav hloov tej yam hauv nej thiab nej tsev neeg lub neej kom yuav muaj ib hnub tom ntej nej yuav nyob tau hauv lub nceeg vaj xilethi-aus. Ua ib leej txiv hauv lub pov thawj hwj, muaj nej tus poj niam ntawm nej ib sab, nej tshoov tau txhua tus neeg hauv nej tsev neeg lub siab kom lawv yuav cia siab rau hnub ntawd thiab. Nej yuav koom tej kev sib ntsib noj lub cim nco txog nrog nej tsev neeg, nej yuav muaj tsev neeg tej kev sib ntsib es nyob ntawd yuav caw tus Vaj Ntsuj Plig Dawb Huv los, nej yuav thov Vajtswv nrog nej tus poj niam thiab tsev neeg, thiab npaj yuav coj nej tsev neeg mus rau hauv lub tuam tsev. Nej yuav pab lawv taug kev mus rau qhov chaw rau tsev neeg nyob ua ke tas mus ib txhis.

Nej yuav ua zoo rau nej tus poj niam thiab cov me nyuam ib yam li Leej Txiv Saum Ntuj Ceeb Tsheej tau ua rau nej. Nej yuav ua raws li tus Cawm Seej tus yam ntxwv thiab kev coj qhia kom coj nej tsev neeg raws li Nws txoj hau kev.

Tsis muaj hwj chim los yog hwj huam uas siv tau los ntawm lub pov thawj hwj, tsuas yog yus ua siab ntev, muaj siab mog siab muag thiab muaj kev hlub tiag tiag;

Los ntawm kev siab zoo, thiab kev txawj ntse, uas yuav txhawb tus ntsuj plig tsis muaj kev siab dag, thiab tsis muaj kev ntxias—

Nco qab ntsoov yuav tsum muab lawv cem raws caij raws nyoog, thiab piav meej meej seb lawv ua txhaum li cas raws li tus Vaj Ntsuj Plig Dawb Huv tshoov yus lub siab, thiab ces tom qab ntawd haj yam muab kev hlub rau tus neeg uas yus twb cem lawm, xwv kom lawv tsis txhob xav yuam kev hais tias yus yog lawv ib tug yeeb ncuab (saib Q&K 121:41–43).

Tus Tswv tau qhia cov leej txiv uas tuav lub pov thawj hwj seb lawv yuav tsum ua cov txiv zoo li cas. Nws hais tias peb txhua tus yuav tsum hlub peb tus poj niam nrog tag nrho peb lub siab, thiab yuav tsum npuab nws thiab txhob npuab lwm tus hlo li (saib Q&K 42:22). Thaum tus Tswv hais lus rau tus txiv thiab tus poj niam, Nws txib kom peb tsis txhob deev luag poj luag txiv, los yog ua ib yam dab tsi zoo li ntawd (saib Q&K 59:6).

Rau cov tub thiab ntxhais hluas, tus Tswv tau tsa ib txoj kev cai. “Nej cov uas yog me nyuam, nej yuav tsum mloog nej niam nej txiv lus, nej ua li ntawd thiaj li haum Vajtswv siab” (Kaulauxais 3:20), thiab “hwm nej niam nej txiv (Khiav Dim 20:12).

Thaum tus Tswv hais lus rau tag nrho peb tsev neeg, Nws txoj lus ntuas yog kom ib leeg hlub thiab txhawb pab ib leeg.

Nws thov kom peb yuav “sim pab kho txhua tus lub neej kom zoo” hauv [yus tsev neeg]; kom “ntxiv zog rau cov neeg qaug zog; kho [tus] uas ploj mus lawm, muaj kev zoo siab vim lawv sab ntsuj plig muaj zog.”4

Tus Tswv kuj thov kom peb yuav ua txhua yam peb ua tau pab cawm cov uas tuag lawm kom lawv yuav nrog peb nyob hauv peb lub neej uas nyob mus ib txhis.

Tus thawj coj rau pawg pov thawj hlob tau rau siab ua hauj lwm pab nrhiav lawv cov poj koob yawm txwv thiab coj lawv tej npe rau lub tuam tsev yog pab cawm cov uas tau ua lawv ntej. Hauv lub neej tom ntej coob leej yuav los ua cov pov thawj hlob tsaug, thiab rau cov uas tau ua tej kab ke sawv lawv cev, vim lawv tau nco qab txog lawv tsev neeg uas tab tom tos hauv lub ntuj ntsuj plig.

Cov yaj saub tau hais tias: “Tus Tswv tej hauj lwm tseem ceeb tshaj uas nej yuav ua yog tej uas nej ua nyob hauv nej lub tsev. Kev qhia tom tsev, ua hauj lwm rau pawg npisov, thiab lwm yam hauj lwm hauv lub Koom Txoos yeej tseem ceeb heev, tiam sis txoj hauj lwm tseem ceeb tshaj plaws yog tej hauj lwm uas nej ua tom nej tsev.”5

Nyob hauv peb tsev thiab hauv peb tej hauj lwm hauv lub pov thawj hwj, tej yam uas muaj nuj nqi tshaj plaws yog tej yam me me uas pab peb thiab cov uas peb hlub ua tej uas coj peb mus rau txoj sia nyob mus ib txhis. Zoo nkaus li tej ntawd yog tej yam me me hauv lub neej no xwb, tiam sis yeej yuav coj tej koob hmoov uas nyob mus ib txhis.

Thaum peb rau siab ntso ua peb tej hauj lwm los pab Leej Txiv Saum Ntuj Ceeb Tsheej cov me nyuam rov qab mus tsev nrog Nws nyob, peb thiaj yuav tsim nyog muaj kev zoo siab thaum ntsib lawv tom qab peb xaus peb lub neej hauv ntiaj teb no. Nov yog tej lus uas xav hnov: “Zoo heev, koj yog tus tub txib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug” (Mathais 25:21).

Nrog rau “tej yam uas loj” ntawd yog kev cog lus kom muaj tub ki uas suav tsis txheeb. Kuv thov kom peb sawv daws yuav tsim nyog thiab pab tau lwm tus neeg kom tsim nyog tau txoj koob hmoov zoo kawg nkaus hauv Leej Txiv thiab Nws tus Tub, Yexus Khetos lub tsev. Los ntawm Yexus Khetos lub npe dawb ceev, amees.

Lus Cim

  1. Teachings of Presidents of the Church: Joseph Smith (2007), 137.

  2. Bruce R. McConkie, nyob hauv Conference Report, Plaub Hlis Ntuj 1970, 26.

  3. N. Eldon Tanner, Church News, Plaub Hlis Ntuj 19, 1969, 2.

  4. Bruce R. McConkie, nyob hauv Conference Report, Plaub Hlis Ntuj 1970, 27.

  5. Harold B. Lee, Decisions for Successful Living (1973), 248–49.