Baam̧le ko Indeeo

Ij kam̧m̧oolol kōn aō pād ippām joten in ilo kweilo̧k eo eļap an priesthood an Kabun̄ eo an Jisōs Kraist im Armej ro Rekwojarjar ilo Raan-ko Āliktata. En̄in ej iien eo eļap ilo bwebwenato an Kabun̄ in Jibuki-ralitōkn̄oul-ruo iiō remoot ļo̧k ilo 1834 eo, ilo Kirtland, Ohio, aolep priesthood ro kar kūr er n̄an kweilo̧k ippān doon ilo juon m̧ōn jikuuļ aļaļ 14 kōn 14 nee (4.2 kōn 4.2-m). Ilo kweilo̧k eo Rikanaan Josep Smith kar je bwe eaar ba: “Ami jeļā kōn Kabun̄ in im jem̧ļo̧k ko an ilju im jekļaj ej āinwōt jeļā an juon nin̄nin̄ ej pād ioon neen jinen Kom̧ij jab keidi n̄an e … Ej juon oran eo edik an rikawijer Preisthood eo kom̧ij loi joten in, bōtaab ilo Kabun̄ in enaaj kobrak Tuiōn̄ imTurōk in America—enaaj kobrak laļ in.”¹

Milien rikabwijer priesthood ro, ilo elōn̄ ļo̧k jān 110 laļ ko, rej kuk ilo m̧wen̄an in. Bōlen Rikanaan Josep eaar lo jān etto iien in im ilju im jekļaj eo eaiboojoj ej pād wōt im̧aad.

Ennaan eo aō joten in ej juon kajjieon̄ n̄an kōmeļeļeik ilju im jekļaj jab in im ta eo jej aikuj kōm̧m̧ane n̄an erom m̧ōttan karōk in m̧ōņōņō eo Jemedwōj Ilan̄ eaar kōpooj n̄an kōj. M̧okta jān ad kar ļotak, jaar mour ilo juon baam̧le ippān Jemedwōj Ilan̄ eo eutiejbōtata im indeeo. Eaar kapit juon karōk me ekōmaron̄ kōj n̄an wōnm̧aan ļo̧k im eddōk ļo̧k n̄an erom āinwōt E. Eaar kōm̧m̧ane kōn iakwe n̄an kōj Jibadbad eo an karōk eo eaar n̄an letok n̄an kōj jim̧we eo an mour indeeo āinwōt an Jemedwōj Ilan̄ mour. Karōk an gospel in eaar letok n̄an kōj juon mour an wabanban me jenaaj kar idajon̄jon̄. Juon kallim̧ur kar letok bwe kōn Pinmuur eo an Jisōs Kraist, eļan̄n̄e jej pokake kien ko im kain̄i ko an priesthood eo an gospel eo, jenaaj bōk mour indeeo, eo eļap tata iaan menin letok ko An.

Mour indeeo ej kain mour eo me Anij Jemedwōj Ilan̄ ej mour ie. Anij eaar bar bwe jibadbad eo An ej “n̄an kakūrm̧ool jab wabanban im mour indeeo an armej” (Moses 1:39). Jibadbad eo eļap an aolep rikabwijer priesthood ro ej n̄an jipan̄ ilo jerbal in jipan̄ armej n̄an bōk mour indeeo.

Aolep priesthood kijejeto im aolep kain̄i an priesthood ej jibadbad n̄an jipan̄ ajri ro nejin Jemed Ilan̄ oktak kōn Pinmuur eo an Jisōs Kraist n̄an erom ro uwaan doulul ko an baam̧le edipio. Ippān tok ej “jerbal eo em̧m̧an an aolep ej n̄an tōmak gospel eo, n̄an kōjparok kein ko, im ejaake im kadipioik juon doulul an baam̧le indeeo,”² im n̄an jipan̄ ro jet kōm̧m̧an ejja āinwōt.

Bwe kōn an m̧ool, aolep men jej kōm̧m̧ane aikuj wōr m̧are in jiļitieļ ie āinwōt kōttōpar im jibadbad eo an. Meļeļe in jej aikuj kajjieon̄ liāp n̄an juon m̧ōttad indeeo ilo tampeļ eo an Anij. Jej aikuj barāinwōt kōketak ro jet n̄an kōm̧m̧an im kōjparok bujen ko me rej lukōj ļeo im lio pālele ippān doon, ippān baam̧le eo aer, ilo mour in im ilo laļ eo ej itok.

Etke menin aikuj in lukkuun in aorōk n̄an kōj kajjojo—dik im rūtto, tikōn ak pris eo eutiej, ļeo nejin ak jemen? Ej kōnke en eddo eo an priethood eo ad ej n̄an door baam̧le ko ad im baam̧le ko an ro ipeļaakid ilo ioļapļap in n̄ūrbōktak eo ad. Aolep jokālet eļļap aikuj pedped ioon im̧we eo an naaj pād ioon baam̧le eo n̄an karbōb n̄an mour ippān Jemed Ilan̄ im Jisōs Kraist. Ejjeļo̧k men ilo jerbal in priesthood eo ad an aorōk in wōt menin.

In jiron̄ eok ta meļeļe menin n̄an juon tikōn ej ron̄jake joten in āinwōt juon membōr in juon doulul an baam̧ļe im āinwōt juon membōr in doulul.

Ilo baam̧le eo an, emaron̄ wōr ak ejjeļo̧k iien jar an baam̧le iien otemjej ak emakijkij nokon in jotan an baam̧ļe. Eļan̄n̄e jemen, ej meļeļe eddo kein, ej kūr n̄an an baam̧le eo ippān doon n̄an jar ak riiti jeje ko rekwojarjar, tikōn eo emaron̄ m̧ōkaj ilo bōk kuņaan kōn ettōn̄ dikdik Emaron̄ kōketak ro jein im jatin n̄an bōk kuņaan im kautiej er n̄e rej kōm̧m̧an. Emaron̄ kajjitōk ippān jemen kōn juon kōjeram̧m̧an n̄e jikuuļ ej ijjino ak ilo bar juon iien aikuji.

Emaron̄ jab ewōr juon jemen eo etiljek. Bōtaab lukkuun in ikdeelel eo an būruwōn n̄an en̄jak ko renaaj bōktok kajoor ko an lan̄ n̄an ro ipeļakin kōnke kōn an tōmak. Renaaj kappukōt n̄an mour an baam̧ļe me tikōn eo ekōņaan kōn aolepān būruwōn.

Rūkaki eo ilo Aaronic Priesthood emaron̄ lo ilo jerbal in rūkaki ilo m̧ōko eo an juon iien em̧m̧an n̄an jipan̄ Irooj ukōt mour ko an juon baam̧ļe. Irooj eaar elmakote ilo Katak im Bujen ko:

“Jerbal eo an rikaki eo ej n̄an emmejraake kabun̄ in iien otemjej, im pād ippāer im kōkajoor er;

“Im lale bwe en ejjeļo̧k nana ilo kabun̄ in, ak ļōkatip ippen doon, ak riab, ruruwe, ak kōnono nana” (K&B 20:53–54).

Ejja āinwōt, pris eo ilo Aaronic Priesthood ej leļo̧k eddo in:

Jerbal an pris ej n̄an kwaļo̧k naan, katakin, kōmmeļeļeik, kōketak, im peptaij, im kōjeraam̧m̧an kwōjkwōj eo,

“Im loļo̧k m̧weo im̧ōn kajjojo uwaan, im kōketak er n̄an jar ilo ainikier im ilo ittino im kōm̧m̧ani aolep jerbal ko an baam̧le” (K&B 20:46–47).

Komaron̄ ļōmņak, āinwōt ikar ke iaar juon rūkaki im pris edik, ekōjkan ļōn̄jak n̄an idajon̄jon̄ kein. Ijjan̄in kar jeļā ekōjkan aō maron̄ kar kōketak ilo juon wāween me emaron̄ kar im̧we juon baam̧ļe m̧aan ļo̧k n̄an mour indeeo ilo jab kometak ak āinwōt kōrrat. Iaar katak bwe elmakot eo de eo me ej ukōt bōro ko ej itok jān Jetōb Kwojarjar. Emakijkij an waļo̧k n̄e jej kwaļo̧k naan in kam̧ool kōn Rilo̧mo̧o̧r, eo eaar im ej membōr in baam̧le eo edipio. lo ad pedped ioon iakwe eo ad n̄an E, jokkun wōt juon im aenōm̧m̧an enaaj eddōk ļo̧k ilo m̧ōko jej loļo̧k Jetōb Kwojarjar enaaj pād ippād ilo jerbal eo ad n̄an baam̧le ko.

Rikabwijer priesthood ro reddik remaron̄, kōn menin ej jar, kōn menin ej ekōnono, im kōn menin ej kōketak membōr ro an baam̧le eo, bōktok kareel im waanjon̄ak eo an Rilo̧mo̧o̧r n̄an ļōmņak im būruwier.

Juon ritōl an priesthood emeletlet eaar kwaļo̧k n̄an n̄a eaar meļeļe menin. Eaar kajjitōk ippān ļaddik eo nejū edik n̄an tōl ilo juon loļo̧k in katakin m̧weo. Eaar ba bwe baam̧le eo maron̄ jab kōņaan ron̄jake elmakot ko an, bōtaab eaar ļōmņak in katakin im naan in kam̧ool eo elem waan an juon ļaddik jidikdik emaron̄ ļap an deel bōro ko būruwier rekijin̄en̄e.

Ta eo juon elder edik emaron̄ kōm̧m̧ane n̄an jipan̄ ilo ejaake eo an baam̧le ko indeeo? Emaron̄ in pojak n̄an etal n̄an jikin mijen. Emaron̄ jar kōņ aolepān būruwōn bwe enaaj maron̄ lo, katakin, im peptaiji baam̧le ko. Ij kememej wōt juon likao eo eulio ippān jiron̄ eo ippān im eddik ro ruo nejierro reddik jijet ippa im mijenede eo m̧ōtta juon raan. Jetōb Kwojarjar eaar itok im kam̧ool n̄an er bwe gospel eo an Jisōs Kraist em̧ōj an jepļaaktok. Eaar bwe aer tōmak jon̄an raar em̧ool kajjitōk eļan̄n̄e kom̧ maron̄ kōjeram̧m̧an leddikro reddik nejier juon kōjeram̧m̧an āinwōt aer kar loe ilo juon kweilo̧k in kwojkwoj ko am. Eaar wōr juon aer ikdeelel kadede n̄an ajri ro nejier n̄an kōjeram̧m̧an, bōtaab raar jab kanooj meļeļe bwe m̧ool in kōjeram̧m̧an ko renaaj wōt pidodo ilo tampeļ ko an Anij ālkin aer kōm̧m̧ani bujen ko.

Ij en̄jake wōt būrom̧ōj eo n̄e ij ļōmņak kōn ripālele eo im ļeddik ro nejier reddik, bōlen kiiō rōrūtto, kōn ejjeļo̧k kallim̧ur eo an juon baam̧le indeeo. Ro jinier im jemeer eaar wōr jidik meļeļe kōn kōjeram̧m̧an ko me maron̄ kar pād n̄an er. Kōjatdikdik eo aō ej bwe ilo juon wāween er, juon juon jikin maron̄ ewōr iien eo em̧m̧an n̄an karbōb n̄an erom baam̧le indeeo.

Elder ro jet rej etal n̄an jikin mijen renaaj bōk en̄jajke eo em̧ōņōņō ļo̧k me ļaddik eo nejū Matthew eaar bōke. E im eo m̧ōttan raar lo juon kōrā emej ļeo pāleen ippān 11 nejin ajri mour ilo jekjek ko rettā. Kōņaan eo an n̄an er ej ta eo kwoj kōņaan—n̄an wōr baam̧le indeeo. N̄an ļaddik eo nejū, eaar āinwōt pen ak bōlen ejjab āinwōt ilo tōre eo.

Iaar loļo̧k jikin in edik iiō ko ālkin an ļaddik eo nejū kar peptaij kōrā in emej ļeo pāleen, im liin eaar kūr eō n̄an ioon baam̧le eo an ilo m̧ōn jar eo. Iaar aikuj in kōttar kōnke elōn̄ iaan ajri ro nejin, ippān elōn̄ jibūn ajri, raar itok jān jet iaan im̧ōn jar ko ilo eria eo. Juon iaan ļaddik ro nejin eaar tiljek ilo jerbal ilo juon bisoprik, elōn̄ iaan ajri ro nejin em̧ōj aer jeram̧m̧an kōn bujen ko an tampeļ, im liin eaar liāp ilo juon baam̧le indeeo. Ilo aō kar em̧m̧akūt jān sister in em̧m̧an, liin eaar likūt pein ipū (liin eaar kanooj kadu, jon̄an enan̄in jab jibwe wōt ipū) im ba, “Jouj, jiron̄ Mateo n̄an bar ro̧o̧l tok m̧okta jān aō mej.” Liin kar leļo̧k, kōnke kōn elder ro retiljek, kōtmene eo em̧ōņōņō an ļap tata eo iaan aolep menin letok an Anij.

Ewōr men ko juon elder, ilo an jepļaak jān mijen eo an, aikuj kōm̧m̧ane n̄an m̧ool wōt n̄an kallim̧ur eo an n̄an pukōt mour indeeo n̄an e make im n̄an ro ej iakwe. Ejjeļo̧k kallim̧ur eaorōk ļo̧k ilo tōre in ak ilo indeeo jān m̧are. Kwar ron̄ kapilōk eo emeletlet n̄an kōm̧m̧an bwe m̧are en juon kōttōpar eo ilōn̄ tata ilo karōk ko am̧ ālkin mijen. Rikarejeran eo etiljek an priesthood enaaj kōm̧m̧ane ilo meletlet.

Ilo ļōmņak kōn m̧are, enaaj lo bwe ej kālet ro jinen im jemen ajri ro nejin im jolet eo renaaj bōk. Enaaj kōm̧m̧ane kālet eo kōn kappukōt eo emool im kanooj ļōmņak kake. Enaaj lale bwe armej eo ej m̧areki epād ippān ļōmņak ko n̄an baam̧le, tōmak ko an kōn jibadbad eo an Irooj n̄an m̧are, im bwe liin ej juon armej eo me enaaj m̧ōņōņō in lōke m̧ōņōņō eo an ajri ro nejin.

Būreejtōn N. Eldon Tanner eaar letok kapilōk in emeletlet: “Ro jinen im jemen me kwoj aikuj kauteij eļap ļo̧k jān ro jet rej ro renaaj jinen im jemen ajri ro nejūm̧. Ajri ro rej aikuj ro jinen im jemen rem̧m̧an tata me epidodo n̄an kwe n̄an kwaļo̧k ņan er—ro jinen im jemen rerreo.”³ Erreo enaaj am kōjparok im kōjparok an ajri ro nejūm̧. Ko̧m m̧uri n̄an er kōjeram̧m̧an in.

Kiiō, ewōr jet ļōm̧aro pālele im ro jemen rej ron̄jake joten in. Ta eo kom̧aron̄ kōm̧m̧ane? Kōjatdikdik eo aō ej bwe ikdeelel eo am̧ em̧ōj ad ļap ļo̧k n̄an kōm̧m̧ani oktak ko remenin aikuj n̄an kwe im baam̧le eo am̧ n̄an mour ilo aelōn̄ in jiļitieļ eo juon raan. Āinwōt juon jemen ej priesthood, ippān lio pāleem̧ ilo ikōjaam̧, kom̧ro maron̄ un̄ur bōro ko an kajjojo membōr in baam̧le eo ami n̄an reim̧aan ļo̧k n̄an raan eo. Kom̧ naaj etal n̄an kweilo̧k in kwojkwoj ko ami ippān baam̧le eo ami, kom̧ naaj kōm̧m̧ani kweilo̧k ko an baam̧le me Jetōb Kwojarjar ej ruwainene, Kom̧ naaj jar ippān kōrā eo pāleem̧ im baam̧l eo, im kōpooj eok make n̄an bōk baam̧le eo ami n̄an tampeļ eo. Kom̧ naaj ilo̧k ippāer ļo̧k ilo iaļ eo n̄an juon kapijuknen an baam̧le indeeo.

Kwonaaj kōm̧m̧an n̄an lio pāleem̧ im ajri ro ilo jekjek eo Jemed Ilan̄ ej kōm̧m̧an n̄an eok. Kwonaaj ļoor waanjon̄ak eo im tōl eo an Rilo̧mo̧o̧r n̄an tōl baam̧ļe eo am̧ ilo wāween eo An.

“Ejjeļo̧k kajoor ak jelōt emaron̄ ak aikuj in dāpiji jān wōt priesthood eo, en jān wōt jeļā ņae, jān meanwōd, jān meoeo im ettā bōro, im jān iakwe jab ankilaan riab;

“Jān jouj, im lukkuun jeļāļo̧kjeņ, eo enaaj kanooj kōļapļo̧k jetōb eo ilo ejjeļo̧k m̧oņ, im ilo ejjeļo̧k etao—

“Kauwe ilo iien ko rejim̧we ilo jejjet, n̄e kōm̧akūt ioon jān Jetōb Kwōjarjar; innām kwaļo̧k ālikin wōt ļapļo̧k in iakwe n̄an eo im kwaar kauweiki, n̄e eab watōke eok juon an rikōjdat” (K&B 121:41–43).

Irooj eaar jiron̄ baba priesthood ro ta kain ļōm̧aro pālele rej aikuj in erom Ej ba “Kwōn iakwe lio pāleem̧ kōn aolepān būruōm̧, im naaj eddāp n̄an lio wōt im ejjeļo̧k bar juon” (K&B 42:22). Ke Irooj ej kōnono n̄an jim̧or ļōm̧aro im lim̧aro pālele, Ej kakien, “Kwōn jab … lōn̄, … ak kōm̧m̧an jabdewōt men āinwōt e” (K&B 59:6).

N̄an jodikdik ro, Irooj eaar kōm̧m̧ane juon jon̄ok. “Ajri, kom̧win kipiliie n̄an ro jememi im ro jinemi ilo men otemjej, bwe men in ej kabun̄būruon Irooj” (Kolosse 3:20), im “kwōn koutiej jemam̧ im jinōm̧” (Exodus 20:12).

Ke Irooj ej kōnono n̄an aolep ilo baam̧le eo, An kapilōk ej n̄an iakwe im rejtake doon.

Ej kajjitōk ippād n̄an kajieon̄ koweppān ļo̧k mour ko an kajjojo membōr in baam̧le eo, n̄an kōkajoor ļo̧k eo em̧ōjņo̧, lo̧mo̧o̧ren [juon] [eo] jitōnbōro ejbwābwe, im lan̄lōn̄ ilo kajoor ilo jetōb eo aer ekāāl.”⁴

Irooj ej barāinwōt kajjitōk bwe jān kōm̧m̧ane aolep ijo jemaron̄e n̄an jipan̄ ro nukid remej n̄an aer pād ippād ilo kapijuknen indeeo eo ad.

Ritōl an doulul eo an pris eo eutiej me ej jerbal tiljek n̄an jipan̄ armej ro pukōt rūtto ro aer im bōk āt ko n̄an tampeļ eo ej lo̧mo̧o̧ren ro me raar em̧m̧akūt m̧okta. Renaaj kam̧oolol ilo laļ eo ej itok n̄an pris ro reutiej, im n̄an ro me rej kōm̧m̧ani kain̄i ko, kōnke raar jab meļo̧kļo̧k baam̧le eo aer rej kōttar ilo laļ eo an jetōb.

Rikanaan ro raar ba: “Men eo aorōk tata an jerbal eo an Irooj me kom̧ naaj kōm̧m̧ane ej jerbal eo kwoj kōm̧m̧ane ilowaan m̧weo im̧ōm̧ make. Rūkaki in Katakin M̧ōko, jerbal an bisoprik, im jerbal ko jet an Kabun̄ rej aolep aorōk, bōtaab jerbal eo eaorōk tata ej ilowaan m̧weo im̧ōm̧ make.”⁵

Ilo m̧weo im̧ōm̧, im ilo jerbal an priesthood eo am̧, aorōk tata eo enaaj ilo jerbal ko reddik me rejipan̄ kōj im ro jej iakwe in jerbal n̄an mour indeeo eo aer. Jerbal kein remaron̄ iddik ilo mour in, bōtaab renaaj bōktok kōjeram̧m̧an indeeo ko ilo mour indeeo.

Ilo ad tiljek ilo jerbal eo ad n̄an jipan̄ ajri ro nejin Jemed Ilan̄ n̄an ro̧o̧l n̄an m̧weo Ippān, jenaaj karbōb n̄an iak-iakwe eo ekanooj ļap ad kōņaan n̄an ron̄ n̄e jej kadede ļo̧k jerbal in kwaļo̧k eo ad ilo laļ in. Errein rej naan ko: “Em̧m̧an am̧ kōm̧m̧an kwō karijera em̧m̧an im tiljek: Kwaar tiljek kōn men kaņ re iiet, Inaaj karooj eok ioon men ko re lōn̄: Kwōn deļo̧n̄ ilo lan̄lōn̄ an am̧ irooj” (Matu 25:21).

Ibwilijin “men ko rellōn̄” rej kallim̧ur eo an ilju im jekļaj indeeo. Aō jar ej bwe jān aolep maron̄ karbōb im jipan̄ ro jet karbōb n̄an kōjeram̧m̧an in lan̄ eo ilo kapijuknen an Jemedwōj im Nejin, Jisōs Kraist. Ilo āt kwojarjar eo an Jisōs Kraist, amen.