2010–2019
Marooro n te Utu
Eberi 2016


Marooro n te Utu

Ngkana a katauraoi kaaro ao ataei a kakauongo ao a ira te marooro, te utu e na marooro raoi ni koaua!

Tariu ao Mwaneu, e kamimi ma e koaua bwa ngaira kaaro ti na riki bwa kaaro aika raraoi ni karokoa ikawaia ara ataei. N na tibwauaia ma ngkami n te bwakantaai aio te bwai teuana ae I kantaninga bwa N a ataa moa riki aio nakon Babara ae kainabau ngke I moanna ni karikirakeia ara ataei aika a rangin ni kakawaki.

Ngke te Abotoro ngai, I aki toki ni kabwarabwara aron bonganan ana marooro te Ekaretia, n ikotaki ma te mition, te titeiki, te uoote, ao kauntira n ibuobuoki

I kakoauai marooro bwa bon kawai aika kakai ni karekea te reke. N raonaki ma anne, I ataia bwa te marooro bon ana kawai te Uea ae E kariki bwaai ni kabane n te aonaaba rinanon te marooro i karawa, n aron are e a Kaman taekinaki ni booki aika tabu.1

Ni karokoa ngkai, e ngae n anne, I tuai n taekinna inanon te maungatabu ni kabuta aron te moan iango ao ni bonganana—ao bon te kabanea ni manena—ibukira ni kabane: marooro n te utu.

Marooro n te Utu e kainnanoaki n taainako. Bon bwaai aika koaua, aika akea tokiia. Ti kaaina te marooro ni utu n te maiu are imwain te maiu aio, ngke ti maeka ma ara karo n arora aei n te maiu n tamnei bwa ngaira natiia.

Marooro n te utu, ngkana e karaoaki ma te tangira ao n anuan Kristo, e na kakerikaka korakoran rabakau aika boou are aki toki n anai nanora man kamanenaan ara tai n tatabemanira ao ni kairi iango aika a aki raraoi nakon mweengara.

Taiaoka n uringnga bwa marooro n te utu a kaokoro ma bootaki n utu n te tairiki ao teingabong te Moanibong koraki. Bootaki n Utu e boboto iaon te moan reirei n te euangkerio ao ana mwakuri te utu. Marooro n te utu, n iterana teuana, e kona ni karaoaki ni bongin nako te wiiki ao bon ibukin te marooro are a kakauongo iai kaaro—i marenaia ao nakoia natiia.

I kakoaua bwa iai aua aekakin marooro n te utu:

Te Moan, marooro n te utu ni kabuta are a irekereke iai kaain te utu ni kabane.

Kauoua, te marooro n te utu ni kakoroi mooti are e kaainaki iroun te tina ao te karo.

Kateniua, te marooro n te utu ae onoti ma kaaro ao temanna te ataei.

Kaaua, te marooro n te utu ni kaka temanna ae kainaki iroun temanna te karo ao temanna te ataei.

Inanon ni kabane katauraoi ni marooro ma utu, bwaai ni katangitang man te iti a na bane ni katokaki n te aro bwa ni kabane a kona n taraa ao ni kakauongo i marenaia. Inanon marooro n utu ao n taai aika a riai. E na riai ni iai ami bwaene ibukin bwaai ni katangitang bwa ngkana a bootaki ni kabane, utu—are iai te Tina ma te Karo—a kona ni katikui aia tareboon, taburete, ao te bwai ni katangitang MP3 inanon te bwaene. Ngkanne, imwiina a kona ni marooro n aki kona ni katikaki nanoia n te Beitiboki, tekitite, man te tareboon, ke te i-meeri.

N na tibwauai ma ngkami bwa a na kanga aekan marooro n te utu ni kona ni mwakuri.

Te moan, te marooro n te utu ae bwanin ma kaain te utu ni kabane.

Bokin te Ekaretia ae arana Ara Utu e kangai, “Te marooro aei e kona ni karaoaki ni kakarabakauakina kangaangan te utu, mwakuria taekan te mwane, ni karaoi katautau, ni boutoka ao ni kakorakoraia n [n tatabemaniia], ao n tataro bon ibukiia n tatabemaniia ao ibukin te utu ae bwanin.”2

E na karaoaki te marooro n taina ae a kaman baireaki ao ni bon arona e rine riki arona nakon marooro n te utu ake tabeua.

E na moanaki n te tataro, ke e na karaoaki n te aro ae bebete ae kanga te kakarabakau ae e a tia ni karaoaki n angana tabeua. Taiaoka n ataia bwa marooro n te utu e na nako raoi n taainako ngkana iai moana ao tokina.

Ngkana a katauraoi kaaro ao ataei a kakauongo ao ni ira naba te marooro, te marooro anne e bon nako raoi!

N aki iangoia bwa aekakira aron ara utu, e riai bwa ti na ataa aron aia kangaanga kaain te utu n tatabemaniia nako. E ngae ngkana ti tibwauai Anua, ake ti bon irekereke ngaira kaain te utu, e na iai aanga ao kateira aika ana karika te kaokoro imarenara n tatabemaniira ao are e na kainnanoa ana marooro n ibuobuoki te utu.

Te katooto, ni kabane te kakarabakau ao te kaotinano ao te tangira n bain te aonaaba bwa e na aki katoka kangaangan te aoraki ke kangaangan te namakin are e na kaitaraa temanna ke raka riki kaain te utu. N taai akanne, ana bootaki ni marooro te utu ike iai te katiteuanaaki, te kakaonimaki, ao te nano n tangira ngkai e tabe te utu ni kakaea buokana man te buobuoki irouia tabemwaang ao bootaki tabeua.

Kaain te utu, e moa riki aika a ikawai, a kona n riki bwa taan ni kaetia ataei ngkana a kamanena marooro n te utu kaaro ni kaoti aia buoka ao aia boutoka inanon taai aika kangaanga ao ni kakamaaku.

N te kawai aei, te utu bon aekan te uoote. Ngkana te bitiobi e karekeia taan marooro n te uoote, e kona ni katoka kangaangan ao ni kabobongai kawai aika a raraoi aika e aki kona ni karaoi n akean aia ibuobuoki. N te kawai ae aekan aei, kaaro a kainnanoia kaain te utu ni kabane bwa ana ibuobuoki ma kangaanga ma kataaki. Te kawai anne, mwaakan marooro n te utu e a kamwakuraki. Ngkana a namakinna kaain te marooro bwa iai naba rekerekeia iai, a riki bwa taan boutoka ao ni kona n reke mwiina ae tamaroa.

Ti aki ni kabane te marooro n te utu aei iai inanona te karo ao te tina ao ataei. Ami marooro n utu e taraa ni kaokoro ma ara marooro n utu bwa ti karikirakeia itiman ara ataei. N te bong aei ara marooro N ara utu e kaainaki tii iroun Barbara ao ngai, bwa ti ngkana ti karaoa marooron ara utu ae bubura are kaaina ara ataei aika ikawai, buuia, ao n tabetai tibura ao tibutorura.

Te koraki ake a tuai ni iein ao ataein te reirei aika maeka n raroa man mwengaia a kona n ira te tamnei ae te marooro ae mimitong man bootakiia ma raraoia ao kaain aia ruu ni uaia ni marooro.

Iangoia bwa e kanga te ootabwanin n te tabo ni maeka ni bitaki ngkana kaain te auti a bootaki n tainako n tataro, ni kakauongo, n kakarabakauakina, ao ni uaia ni iango.

Ni kabane a kona ni katotonga te marooro n utu ni karekea ibukiia te kairi ae mimitong are kateaki iroun Tamara are i Karawa.

N aron are I a tia ni kaotia mai mwaina, man te taina nakon te taina ana marooro te utu ae bubura e nang ibuobuoki. Marooro n te utu ae bubura e kona ni kaainaki irouia tiibu mwaane ao ataei aika ikawai, bukina bwa aki maeka ni mweengaia. E boni ngae ngke tiibu ao ataei aika ikawai a maeka n raroa, a kona ni marooro n utu ni kamanenaakin te tareboon, kamanenaakin te taetae iaon te tamnei. Skype, ke te FaceTime.

Ko kona ni kataua karaoan marooro n te utu ni kabuta n te Taabati, are moanibongin te wiiki, utu a kona ni manga rinanon kanoan te wiki are mai mwaina ao ni katauraoi ibukin te wiiki ae na manga roko. Aio raoi are na kainanoia am utu n aron are taekinna Itaia are e na karika te Taabati bwa te kakukurei

Te kauoua te marooro ma te utu bon te marooro ni utu ni kakoroi bukin bwaai are kaainaki irouia ti kaaro. Inanon te tai aio ni kabane, a kona kaaro n rinanoi kainanoia ataei n tatabemaniia n rabwataia, aia namakin, ao kainanoia teuane ke neiene n rikiraken maiuia.

Kakoroan kanoan marooro n utu bon te tai ae e na tamaroa ibukiia buu aine ao buu mwane n taekin aroia n reitaki i bon i marenaia. Ngke a karaoa kabaeakiira n te tembora Unimwane Harold B. Lee ao, e reiakina nakoira te tua are I kakoaua bwa taanga a na ibuobuok i iboni.marenaia E taku, “A na aki mamatu ni karokoa a katorobubua ni uaia n taubai ao n tataro. Tataro akanne a kaoa Tamara are i Karawa ni marooro nakoia taanga aika mare mani mwakan te Tamnei are Raoiroi.”

Te kateniua ni marooro n utu bon marooro n utu ae iai tiana. Ikai, are kaaro ni kauoman a bootaki ma te ataei n tatabeman n te aro ae riai. Aio bon tain te kakarabakau iaon karaoakin te babaire ni moantaai ibukin iango ibukin neiene ke teuane bwa tera ae ana riai ni karaoia ao n aki karaoia n taai aika a na roko. Ngkana a tia ni motikaki babaire akanne, neiene ke teuane, a na riai ni korei taekaia ibukin taai aika a na roko ngkana akainanoaia. Ngkana e noriko natim te mwane ke te aine bwa ko boutokaia, am marooro aio e kona ni kakoroa kanoan ana kai ni baire ibukin taai aika a na roko. Aio naba te tai ni karaurau raoi n ongora baika kangaanga are e na kona te ataei ni kaitarai ao n aki onimakinaki, n karaoan ae aki riai, ke te iowawa nakoia tabeman, ke nimaaku.

Te kaaua ni marooro ma te utu bon temanna imwiin temanna ni marooro te karo ao te nati. Te aeka ni marooro aio ko na bonkatauraoi n tai nako. N aron, te kaaro ao te ataei a kona ni kamanena te tai ae aki baireaki n aron ko kona ni marooro n butim te kaa ke inanon am tai n mwakuri te mweenga. Te tai ko airi e kona te karo ke te tina ma natinaa ni karekea te tai ae raka n te tamnei ao ni bootaki. Taua tain aei ibukin taai aika a na roko bwa e na ataiabwa e rangi ni kakawaki ana tai ae onoti ngaia ma Tinana ke ana Karo.

Ngkai, tariu ao mwaneu, iai taai are e na oon mweengara ni katauraoi kaman mano ake ti kainnanoia ni kaitarai niniakira mai tinaniku ao anaakin nanora. Ti na rokana te mataroa, kaini winto, ao kaina mataroan te oo, ti na namakina te kamanoaki, te mweraoi ao ni kamanoaki man ara tabo ni katantan ma itinanikun te aonaaba.

Boong aikai a tia n nako. Oon te rabwata, taian roki, mataroan taian oo n te mweenga a bon aki kona n totokoi baika a aki nooraki n aron te intanete, te Wi-Fi, tarebon. Bwaai n itoman aikai a kona n ninia mwengara ti man kaukan te kombiuta ao kamanenakin te mwaauti.

Ti tekeraoi, bwa e a tia te Uea ni katauraoi kawai n ataa te niniaki n te rabakau ae akea nanona are kona n katikiira man kamanenaakin ara tai i marenara. E a tia ni karaoa aio man katauraoan te aro ni marooro ni kakorakorai, kamanoa, n tantanii, ao n tararua ara itoman ae kakawaki.

Ataei a rangi ni kainnanoia kaaro bwa a na kakauongo nakoia, ao te marooro n utu e kona ni katauraoa te tai ngkana kaain te utu a kona n reiakina ao n ataia ao n tangiria i bon irouia.

E reirei Aramwa, “Reitaki ma te Uea n am waaki ni kabane, ao e na kairiko nakon te raoiroi” 3 Kaooa te Uea bwa raon ara marooro ni utu rinanon te tataro bwa e na katamaroa ara itoman n tatabemaniira. Ti kona, n ana buoka Tamara are i karawa ao ara Tia Kamaiu, n riki n taotaona n nano, ni iango korakora, ni buobuoki, ni kabwara bure, ao n oota ngkana ti tataro ni bubuti te buoka. N aia buoka, ti kona ni karaoa mwengara bwa mwaakoron karawa ae uarereke ikai n te aonaaba.

Marooro n te utu bon katotongan are i karawa, ni kaonaki n aekan maiun Kristo n tatangirira, ao ni kairaki n Tamnein te Uea e na buokira ni kamanoia ara utu man anakin nanoia are a ana kona ni bakataea ara tai ae kakawaki ni kabanea ao ni kamanoira man buakakan te aonaaba.

Marooro n te utu ma te tataro, te marooro n utu e riai ni iai inanona namakinan te Tia Kamaiu, n aron are E beritanna, “Ba ike a botaki iai uoman ke teniman n arau, ao Ngai I mena naba iai i buakoia.”4 Kaoa Tamanein te Uea bwa mwakoron te utu e na uota te kakabwaia are aki kona ni kabwarabwaraki arona.

Te Kabanea, taiaoka ni uringnga bwa marooro n te utu ae e karaoaki n tainako e na buokiira ni kaoti kangaanga n te utu ao e na kamaunai imwain korakoraia; a na anganiia kaain te utu n tatabemaniia te namakinan tauiia ao bonganaia, ai moara riki a na buokira n tokanikai riki ao ni kukurei n ara utu aika kakawaki, inanon oon mwengara. E bia kakabwaiaia ara utu ni kabane te Tama are i Karawa ngkana ti bane ni marooro au tataro ma te nanorinano n aran te Uea ae Iesu, Kristo amen.