2010–2019
Tsev Neeg Kev Sab Laj
2016 April General Conference


Tsev Neeg Kev Sab Laj

Thaum niam tsev txiv tsev npaj zoo thiab cov me nyuam mloog lus thiab koom nrog kev sib tham, tsev neeg kev sab laj yeej pab tau!

Kuv cov kwv tij thiab cov muam, yog ib qho txawv heev uas peb pib txawj ua niam tsev txiv tsev tom qab peb cov me nyuam loj hlob tuaj lawm. Tav su no, kuv xav qhia nej ib yam uas kheev lam kuv to taub zoo dua thaum Barbara thiab kuv pib tu wb cov me nyuam uas muaj nqi heev.

Thaum kuv los ua ib tug thwj tim thiab kuv ua hauj lwm qhuab qhia, kuv pheej qhia txog qhov uas lub Koom Txoos tej kev sab laj muaj hwj chim thiab tseem ceeb npaum li cas, xws li kev sab laj hauv qhov chaw tshaj tawm txoj moo zoo, ceg txheem ntseeg, pawg ntseeg, thiab koom haum pab pawg sab laj.

Kuv ntseeg tias kev sab laj yog txoj kev zoo tshaj plaws kom ua tau hauj lwm tiag tiag. Tsis tas li ntawd xwb, kuv paub tias kev sab laj yog tus Tswv txoj kev thiab Nws tau tsim txhua yam nyob qab ntuj dhau los ntawm kev sab laj saum ntuj, raws li hais nyob hauv vaj lug kub.1

Tiam sis, kuv yeej tsis tau hais lus nyob hauv lub tuam rooj sab laj txog kev sab laj tseem ceeb tshaj plaws: tsev neeg kev sab laj.

Peb yeej ib txwm yuav tsum muaj tsev neeg kev sab laj. Tsev neeg kev sab laj yeej nyob mus ib txhis. Peb tau koom nrog ib tsev neeg kev sab laj ua ntej lub neej no, thaum peb yog cov me nyuam ntsuj plig ntawm peb niam peb txiv nyob saum ntuj ceeb tsheej.

Tsev neeg kev sab laj, thaum ua nrog kev hlub thiab tej cwj pwm zoo li Yexus Khetos, yuav pab tiv thaiv kom txhob raug teeb meem uas muaj thaum txuj ci technology ua rau peb ib leeg tsis siv sij hawm rau ib leeg thiab coj kev phem los rau hauv peb tsev.

Thov nco ntsoov tias tsev neeg kev sab laj yeej txawv ntawm tsev neeg hmo ua ke thaum hnub Monday. Tsev neeg hmo ua ke tsom ntsoov rau kev qhia txog txoj moo zoo thiab tsev neeg kev ua si. Tiam sis, tsev neeg kev sab laj los ua tau thaum hnub twg los tau, thiab yog ib txoj kev sib ntsib uas ib nkawm niam tsev txiv tsev mloog—ib leeg mloog ib leeg lus thiab mloog nkawd cov me nyuam.

Kuv ntseeg tias tsev neeg kev sab laj los muaj plaub hom:

Thib ib, tsev neeg kev sab laj uas tag nrho yus tsev neeg koom ua ke.

Thib ob, tsev neeg kev sab laj ntawm tus niam tsev thiab txiv tsev xwb.

Thib peb, tsev neeg kev sab laj uas yog tus niam tsev, tus txiv tsev, thiab ib tug me nyuam koom ua ke xwb.

Thib plaub, tsev neeg kev sab laj ntawm ib tug me nyuam thiab tus niam tsev los sis tus txiv tsev.

Nyob hauv tsev neeg tej kev sab laj, txhua zaus yuav tsum muab cov tshuab uas siv hluav taws xob tua txhua tus thiaj li ib leeg yuav saib ib leeg thiab ib leeg mloog ib leeg hais. Nyob hauv tsev neeg kev sab laj thiab lwm lub sij hawm tsim nyog, tej zaum nej yuav xav muab ib lub pob tawb tso cov tshuab uas siv hluav taws xob kom thaum twg tsev neeg koom ua ke, txhua tus—tsis hais Niam thiab Txiv los yog—yuav muab lawv xov tooj, cov tablet, thiab cov tshuab tso nkauj tso rau hauv lub pob tawb. Tom qab ntawd, lawv yuav sib tham ua ke thiab tsis xav teb lwm tus nyob hauv Facebook, ntaus ntawv text, Instagram, Snapchat los sis email.

Cia kuv qhia nej tias txhua hom tsev neeg kev sab laj zoo li cas.

Qhov thib ib, yog tsev neeg kev sab laj rau txhua tus.

Lub Koom Txoos me nyuam phau ntawv hu ua Our Family hais tias, “Kev sab laj no yuav koom ua ke kom sib tham txog tsev neeg tej teeb meem, nyiaj txiag, tawm tswv yim, kom ib leeg txhawb nqa ib leeg, thiab thov Vajtswv ua ke rau txhua tus thiab yus tsev neeg.”2

Kev sab laj no yuav tsum sib ntsib thaum ib lub sij hawm uas tau teem tseg txhua lub lim tiam thiab yeej ua raws li ib tug txheej txheem tshaj lwm txoj kev sab laj.

Tsim nyog thov Vajtswv qhib, los sis tej zaum yuav sib txuas rau tej kev sib tham uas twb pib ua ntej nyob hauv lwm qhov chaw. Cia li nco ntsoov tias tsev neeg kev sab laj tsis tas pib los sis xaus raws li ib tug txheej txheem.

Thaum niam tsev txiv tsev npaj zoo thiab cov me nyuam mloog lus thiab koom nrog kev sib tham, tsev neeg kev sab laj yeej pab tau!

Txawm peb tsev neeg zoo li cas los, yeej tseem ceeb uas peb to taub txhua tus hauv peb tsev neeg nyias muaj nyias tej zwj ceeb. Txawm peb muaj caj ceg roj ntshav zoo ib yam los, tej zaum muaj tej yam xwm txheej uas ua rau peb ib leeg txawv ib leeg heev, thiab tsev neeg kev sab laj yuav tsum muaj siab hlub tshua sib tham txog.

Piv txwv hais tias, txawm yus sib tham thiab sib hlub npaum li cas los tej zaum tej ntawd yuav tsis kho mob los sis kho teeb meem ntawm lub siab ntsws uas ib tug los yog ob peb tug hauv yus tsev neeg muaj. Thaum tej lub sij hawm zoo li no, tsev neeg kev sab laj yog ib lub sij hawm kom koom siab, tso siab, thiab txhawb nqa nrog kev hlub kom nrhiav kev pab nyob sab nraud thiaj nrhiav tau kev kho tej teeb meem ntawd.

Cov kwv tij nus muag, qhov tseem ceeb yog cov me nyuam hlob txawj pab qhia cov me nyuam yau yog cov niam tsev txiv tsev siv tsev neeg kev sab laj kom txib lawv pab thiab txhawb nqa thaum muaj kev nyuaj siab thiab tej teeb meem.

Yog li ntawd, ib tsev neeg yeej zoo li ib pawg ntseeg. Thaum tus npisov sib tham nrog pawg ntseeg pawg sab laj, nws kho tau tej teeb meem thiab ua tau tej yam zoo dua li nws ua tau yog nws tsis muaj lawv txoj kev pab. Zoo ib yam li ntawd, cov niam tsev txiv tsev yuav tsum ua kom txhua tus ua ib ke thaum muaj teeb meem thiab tej kev nyuaj. Yog li ntawd, yuav siv lub hwj chim ntawm tsev neeg pawg sab laj. Thaum cov hauv pawg sab laj xav tias lawv twb pab ua kev txiav txim siab, lawv yeej txhawb nqa tej hauj lwm ntawd thiab ua rau lawv ua tau tej yam zoo heev.

Tsis yog txhua tsev neeg kev sab laj muaj ob niam txiv thiab cov me nyuam. Tej zaum nej tsev neeg kev sab laj yuav txawv ntawm peb tsev neeg kev sab laj thaum peb tseem muaj xya tus me nyuam. Niaj hnub no wb tsev neeg kev sab laj yog kuv thiab Barbara xwb, tshwj tias wb muaj tsev neeg kev sab laj loj ntxiv uas koom nrog peb cov me nyuam uas twb loj hlob lawm, lawv cov khub, thiab tej lub sij hawm koom nrog peb cov xeeb leej xeeb ntxwv thiab.

Txawm yus tsis tau yuav txiv yuav poj niam los sis yog ib tug tub ntxhais kawm ntawv uas tsis nyob nrog yus tsev neeg los yus tseem ua tau raws li Vajtswv pom zoo kom ua kev sab laj nrog phooj ywg thiab cov uas nrog yus nyob sib sab laj.

Cia li xav seb yuav zoo li cas yog tias cov uas nrog nej nyob yuav koom ua ke kom thov Vajtswv, mloog, sib tham, thiab npaj tej yam.

Txhua tus yeej hloov tau ib tsev neeg kev sab laj kom ua raws li tus txheej txheem uas peb Leej Txiv Saum Ntuj Ceeb Tsheej txhim tsa.

Raws li kuv nyuam qhuav tau hais, tej lub sij hawm tsev neeg kev sab laj uas loj zog yuav pab tau peb. Ib tsev neeg kev sab laj loj zog tej zaum yuav muaj pog, yawg, niam tais, yawm txiv thiab cov me nyuam uas tsis nyob hauv tsev uas twb loj hlob lawm. Txawm lawv nyob deb los, lawv koom nrog tsev neeg kev sab laj los ntawm xov tooj, Skype, los sis FaceTime.

Tej zaum nej xav teem sij hawm rau tsev neeg kev sab laj thaum hnub Sunday, uas yog thawj hnub ntawm ib lub lim tiam; tsev neeg yuav xav txog lub lim tiam tas los thiab npaj rau lub lim tiam tom ntej. Tej zaum ua li no yuav pab nej tsev neeg ua kom Hnub Caiv ua ib hnub zoo siab.

Tsev neeg kev sab laj thib ob yog kev sab laj ntawm tus niam tsev thiab tus txiv tsev xwb. Thaum lub sij hawm no, cov niam tsev txiv tsev yuav sib tham txog txhua tus me nyuam tej kev xav tau ntawm sab cev nqaij daim tawv, sab ntsuj plig, thiab lub siab xav, thiab seb lawv vam meej li cas.

Tsev neeg kev sab laj zoo li no yeej yog ib lub sij hawm zoo rau cov niam tsev txiv tsev sib tham txog nkawd txoj kev sib raug zoo. Thaum Txwj Laug Harold B. Lee ua kev sib khi rau lwm tus, nws qhia peb txog ib lub ntsiab cai uas kuv xav tias yuav pab txhua khub niam txiv. Nws hais tias, “Tsis txhob pw tsaug zog ua ntej nej txhos caug, tuav tes, thiab thov Vajtswv ua ke. Kev thov Vajtswv li ntawd yuav caw Leej Txiv Saum Ntuj Ceeb Tsheej kom ntuas peb los ntawm tus Ntsuj Plig lub hwj chim.”

Tsev neeg kev sab laj thib peb yog kev sab laj nrog ib feem ntawm nej tsev neeg. Nyob hauv kev sab laj no, ob niam txiv yuav siv sij hawm nrog ib tug me nyuam xwb thaum ua raws li tus txheej txheem los tsis ua. Nov yog ib lub cib fim sib tham txog kev txiav txim siab ua ntej txog tej yam uas nws yuav ua thiab yuav tsis ua tej yam twg thaum yav tom ntej. Thaum nws txiav txim siab, tej zaum nws yuav xav sau cia kom nyeem tau thaum yav tom ntej. Yog tias nej tus ntxhais los sis tus tub xav tias nej txhawb nqa nws, kev sab laj no yuav pab nws cuab hom phiaj rau yav tom ntej. Nov kuj yog ib lub sij hawm ua tib zoo mloog seb puas muaj teeb meem thiab tej kev txhawj uas ib tug me nyuam raug tau xws li kev tsis ntseeg nws tus kheej, kev raug thuam, raug ntaus, los yog kev ntshai.

Tsev neeg kev sab laj thib plaub yog kev sab laj nrog ib tug niam tsev los sis txiv tsev thiab ib tug me nyuam xwb. Tsev neeg kev sab laj zoo li no los tsis tas teem sij hawm ua. Piv txwv hais tias, tus niam tsev los sis txiv tsev thiab tus me nyuam sib tham tau thaum muaj cib fim nyob hauv tsheb los sis ua hauj lwm hauv lub tsev. Kev tawm mus ua si nrog ib tug me nyuam xwb yuav ua rau tus niam tsev los sis txiv tsev sib raug zoo ntawm sab ntsuj plig nrog tus me nyuam ntawd. Teem sij hawm rau tej yam no kom cov me nyuam zoo siab tos muaj sij hawm nws ib leeg nrog nws niam los sis nws txiv.

Cov kwv tij thiab cov muam, twb muaj ib lub sij hawm dhau los thaum cov phab ntsa ntawm peb lub tsev twb yog tib yam uas peb yuav tsum muaj tiv thaiv kom txhob raug tej yam tsis zoo nyob sab nraud. Peb tau liaj qhov rooj, kaw qhov rais; peb kaw qhov rooj; thiab ua rau peb xav tias peb nyob nyab xeeb, kaj siab lug, thiab pov hwm nyob hauv peb lub qhov chaw tiv thaiv kom txhob raug tej yam nyob sab nraud.

Tsis zoo li ntawd lawm. Cov phab ntsa, qhov rooj, laj kab, thiab qhov rooj ntawm peb lub tsev yeej yuav tsis tiv thaiv kom txhob raug tej yam uas tawm tsam los ntawm Internet, Wi-Fi, thiab xov tooj. Tsuas nias tau ob peb zaug xwb es tej ntawd nkag tau rau hauv peb lub tsev.

Zoo siab uas tus Tswv tau npaj ib txoj kev kom tawm tsam tej txuj ci technology phem uas ua rau peb tsis siv sij hawm zoo ua ke. Nws tau npaj tus txheej txheem sab laj kom txhawb nqa, pov hwm, tiv thaiv, thiab saib xyuas peb tej kev sib raug zoo uas muaj nqi tshaj plaws.

Cov me nyuam yeej xav tau cov niam tsev txiv tsev uas txaus siab mloog lawv, thiab tsev neeg kev sab laj yuav cia tsev neeg muaj sij hawm kom ib leeg to taub thiab hlub ib leeg.

Amas qhia hais tias, “Sab laj nrog tus Tswv nyob rau hauv txhua yam uas koj ua, thiab nws yuav coj koj mus rau qhov zoo.”3 Qhov uas peb caw tus Tswv koom nrog peb tsev neeg kev sib sab laj thaum peb thov Vajtswv yuav pab peb sib raug zoo. Yog muaj Leej Txiv Saum Ntuj Ceeb Tsheej thiab peb tus Cawm Seej txoj kev pab, peb yuav ua siab ntev, txawj xav, pab tau, zam txim thiab to taub thaum peb thov Vajtswv tau kev pab. Yog muaj Nkawd txoj kev pab, peb yuav ua kom peb lub tsev zoo li lub ntuj ceeb tsheej nyob hauv lub ntiaj teb no.

Tsev neeg kev sab laj uas ua raws li tej kev sab laj nyob saum ntuj, nrog kev hlub zoo li Yexus Khetos, thiab muaj tus Tswv tus Ntsuj Plig txoj kev coj yuav pab peb tiv thaiv peb tsev neeg kom txhob raug tej yam uas yuav nyiag peb lub sij hawm uas peb siv tau ua ke thiab pov hwm peb ntawm tej yam phem hauv lub ntiaj teb.

Nrog kev thov Vajtswv, ib tsev neeg kev sab laj yuav caw tus Cawm Seej los, vim Nws cog lus tias: “Yog muaj ob los sis peb leeg tuaj nyob ua ke uastuav kuv lub npe thov, kuv yuav nrog lawv nyob qhov ntawd.”4 Kev caw tus Tswv tus Ntsuj Plig los koom nrog nej tsev neeg kev sab laj yuav pab nej tau koob hmoov zoo kawg.

Qhov kawg, thov cia li nco ntsoov tias thaum peb ua tsev neeg kev sab laj tsis tu ncua ces yuav pab peb pom tej teeb meem thaum ntxov thiab kho tau ua ntej tej teeb meem ntawd loj tuaj; kev sab laj yuav ua rau txhua tus hauv peb tsev neeg xav tias lawv tseem ceeb; thiab qhov zoo tshaj plaws kev sab laj yuav pab peb zoo siab nyob hauv peb tsev neeg, nyob hauv peb tsev. Thov kom Leej Txiv Saum Ntuj Ceeb Tsheej foom koob hmoov rau peb tsev neeg thaum peb sab laj ua ke, kuv txo hwj chim thov los ntawm Nws Leej Tub, Yexus Khetos, lub npe, amees.