ສະພາຄອບຄົວ
ໂດຍ ແອວເດີ ເອັມ ຣະໂຊ ບາເລີດ
ແຫ່ງກຸ່ມອັກຄະສາວົກສິບສອງ
ເມື່ອພໍ່ແມ່ຕຽມພ້ອມ ແລະ ລູກຟັງຢ່າງຕັ້ງໃຈ ແລະ ມີສ່ວນຮ່ວມ, ແລ້ວສະພາຄອບຄົວ ກໍຈະປະສົບຄວາມສຳເລັດ!
ອ້າຍເອື້ອຍນ້ອງທີ່ຮັກແພງ, ການເປັນພໍ່ແມ່ເປັນສິ່ງແປກຫລາຍນໍ ເບິ່ງຄືວ່າ ເຮົາຈະເກັ່ງເລື່ອງການເປັນພໍ່ແມ່ ຫລັງຈາກລູກໃຫຍ່ໝົດແລ້ວ. ຂ້າພະເຈົ້າຂໍແບ່ງປັນກັບທ່ານໃນບ່າຍມື້ນີ້ ເຖິງສິ່ງທີ່ຂ້າພະເຈົ້າໄດ້ເຂົ້າໃຈຫລາຍຂຶ້ນ ເມື່ອ ບາບາຣາ ກັບຂ້າພະເຈົ້າເລີ່ມຕົ້ນລ້ຽງດູລູກໆທີ່ລ້ຳຄ່າຂອງພວກເຮົາ.
ໃນໄລຍະການເປັນອັກຄະສາວົກ, ຂ້າພະເຈົ້າມັກເນັ້ນໜັກເລື້ອຍໆເຖິງອຳນາດ ແລະ ຄວາມສຳຄັນຂອງສະພາຂອງສາດສະໜາຈັກ, ຮ່ວມທັງ ເຂດເຜີຍແຜ່, ສະເຕກ, ຫວອດ, ແລະ ສະພາຂອງອົງການຊ່ວຍເຫລືອຕ່າງໆ.
ຂ້າພະເຈົ້າເຊື່ອວ່າ ສະພາເປັນວິທີທີ່ມີປະສິດທິພາບທີ່ສຸດ ໃນການຊອກຫາຄຳຕອບທີ່ແທ້ຈິງ. ນອກເໜືອຈາກນັ້ນ, ຂ້າພະເຈົ້າຮູ້ວ່າ ສະພາເປັນວິທີຂອງພຣະຜູ້ເປັນເຈົ້າ ແລະ ວ່າພຣະອົງໄດ້ສ້າງທຸກສິ່ງທັງປວງ ຢູ່ໃນຈັກກະວານນີ້ ຜ່ານທາງສະພາໃນສະຫວັນ, ດັ່ງທີ່ໄດ້ກ່າວເຖິງຢູ່ໃນພຣະຄຳພີທີ່ສັກສິດ.1
ເຖິງຢ່າງໃດກໍຕາມ, ຈົນເຖິງເວລານີ້, ຂ້າພະເຈົ້າບໍ່ເຄີຍກ່າວຢູ່ໃນກອງປະຊຸມໃຫຍ່ສາມັນ ກ່ຽວກັບສະພາຂັ້ນພື້ນຖານ ແລະ ເບື້ອງຕົ້ນ—ແລະ ບາງທີ ສຳຄັນທີ່ສຸດ—ໃນທຸກສະພາທັງໝົດ ນັ້ນຄື: ສະພາຄອບຄົວ.
ສະພາຄອບຄົວເປັນສິ່ງທີ່ຈຳເປັນຫລາຍຕະຫລອດມາ. ຕາມຈິງແລ້ວ, ມັນເປັນສະພານິລັນດອນ. ເຮົາເປັນພາກສ່ວນໃນສະພາຄອບຄົວ ຢູ່ໃນໂລກກ່ອນຊ່ວງມະຕະ, ຕອນເຮົາໄດ້ອາໄສຢູ່ນຳພຣະບິດາມານດາຢູ່ໃນສະຫວັນ ເປັນລູກທາງວິນຍານຂອງພວກພຣະອົງ.
ສະພາຄອບຄົວ, ເມື່ອເຮົາປະຕິບັດດ້ວຍຄວາມຮັກ ແລະ ດ້ວຍຄຸນສົມບັດຂອງການເປັນເໝືອນດັ່ງພຣະຄຣິດ, ແລ້ວມັນຕ້ານທານກັບຄວາມສຳຄັນຂອງ ເທັກໂນໂລຈີ ຂອງສະໄໝໃໝ່ ຊຶ່ງກີດກັນເຮົາຈາກການໃຊ້ເວລາທີ່ດີນຳກັນ ແລະ ມັນມັກຈະນຳຄວາມຊົ່ວຮ້າຍເຂົ້າມາສູ່ບ້ານເຮືອນຂອງເຮົານຳອີກ.
ຈົ່ງຈື່ຈຳໄວ້ວ່າ ສະພາຄອບຄົວແມ່ນແຕກຕ່າງຈາກ ການສັງສັນໃນຄອບຄົວ ຊຶ່ງຈັດຂຶ້ນໃນແລງວັນຈັນ. ການສັງສັນໃນຄອບຄົວເຈາະຈົງໃສ່ການສິດສອນພຣະກິດຕິຄຸນໂດຍສະເພາະ ແລະ ການເຮັດກິດຈະກຳເປັນຄອບຄົວ. ກົງກັນຂ້າມ ສະພາຄອບຄົວ ສາມາດຖືກຈັດຂຶ້ນໄດ້ ໃນມື້ໃດກໍໄດ້ ພາຍໃນອາທິດ, ແລະ ມັນເປັນການປະຊຸມສະເພາະໃຫ້ພໍ່ແມ່ຮັບຟັງ—ກັນແລະກັນ ແລະ ຮັບຟັງລູກໆຂອງຕົນ.
ຂ້າພະເຈົ້າເຊື່ອວ່າ ຢ່າງໜ້ອຍມີສະພາຄອບຄົວຢູ່ດ້ວຍກັນສີ່ແບບ.
ໜຶ່ງ, ສະພາຄອບຄົວໂດຍທົ່ວໄປ ຮ່ວມດ້ວຍທຸກຄົນໃນຄອບຄົວ.
ສອງ, ສະພາຄອບຄົວສູງສຸດ ຮ່ວມດ້ວຍພໍ່ແມ່ສອງຄົນເທົ່ານັ້ນ.
ສາມ, ສະພາຄອບຄົວຈຳກັດ ຮ່ວມດ້ວຍພໍ່ແມ່ ແລະ ລູກໜຶ່ງຄົນ.
ສີ່, ສະພາຄອບຄົວສອງຕໍ່ສອງ ຮ່ວມດ້ວຍພໍ່ແມ່ໜຶ່ງຄົນ ແລະ ລູກໜຶ່ງຄົນ.
ໃນສະພາບການຈັດສະພາຄອບຄົວທັງໝົດເຫລົ່ານີ້, ເຄື່ອງມືເອເລັກໂທລນິກ ຕ້ອງຖືກປິດໄວ້ ເພື່ອວ່າທຸກຄົນຈະສາມາດ ຟັງກັນແລະກັນ. ໃນລະຫວ່າງສະພາຄອບຄົວ ແລະ ໃນເວລາອື່ນໆທີ່ເໝາະສົມ, ທ່ານຕ້ອງຈັດກະຕ່ານ້ອຍສຳລັບເກັບເຄື່ອງເອເລັກໂທລນິກໄວ້ ເພື່ອວ່າ ເມື່ອທຸກຄົນໃນຄອບຄົວມາເຕົ້າໂຮມກັນ—ຮ່ວມທັງ ແມ່ ແລະ ພໍ່—ຈະໄດ້ເອົາມືຖື, ແຜ່ນຄອມພິວເຕີນ້ອຍ, ເຄື່ອງຟັງເພງ ໃສ່ໄວ້ໃນກະຕ່າ. ດັ່ງນັ້ນ, ເຂົາເຈົ້າຈະສາມາດປຶກສາຫາລືນຳກັນ ໂດຍບໍ່ຈຳເປັນຕ້ອງຕອບຮັບ Facebook, text, Instagram, Snapchat, ແລະ ອີເມວ ທີ່ຜູ້ຄົນສົ່ງມາຫາ ໃນເວລານັ້ນ.
ຂ້າພະເຈົ້າຂໍແບ່ງປັນກັບທ່ານໜ້ອຍໜຶ່ງ ເຖິງວິທີທີ່ສະພາຄອບຄົວແຕ່ລະແບບ ຖືກກະທຳກັນຢ່າງໃດ.
ໜຶ່ງ, ສະພາຄອບຄົວໂດຍທົ່ວໄປ ຮ່ວມດ້ວຍສະມາຊິກທຸກຄົນໃນຄອບຄົວ.
ປຶ້ມນ້ອຍຂອງສາດສະໜາຈັກ ຊື່ Our Family ບອກວ່າ, “ສະພານີ້ ສາມາດມາຮ່ວມກັນ ເພື່ອປຶກສາຫາລື ກ່ຽວກັບບັນຫາໃນຄອບຄົວ, ແກ້ໄຂເລື່ອງການເງິນ, ວາງແຜນ, ສະໜັບສະໜູນ ແລະ ເພີ່ມຄວາມເຂັ້ມແຂງ, ແລະ ອະທິຖານເພື່ອກັນແລະກັນ ແລະ ເພື່ອໜ່ວຍຂອງຄອບຄົວ.”2
ສະພານີ້ ຄວນມາຮ່ວມກັນ ໃນເວລາທີ່ຖືກຈັດໄວ້ ແລະ ຕາມປົກກະຕິແລ້ວ ສະພານີ້ຈະເປັນແບບທາງການ ຫລາຍກວ່າສະພາອື່ນໆຂອງຄອບຄົວ.
ມັນຄວນເລີ່ມຕົ້ນດ້ວຍການອະທິຖານ, ຫລື ບາງທີອາດເປັນການສືບຕໍ່ຈາກການເວົ້າລົມກັນແບບທຳມະດາ ທີ່ໄດ້ເລີ່ມຕົ້ນແລ້ວໃນໂອກາດອື່ນ ໃຫ້ຈື່ຈຳໄວ້ວ່າ ສະພາຄອບຄົວ ອາດຈະບໍ່ຖືກຈັດຂຶ້ນແບບເປັນທາງການເລື້ອຍໄປ ໃນຕອນເລີ່ມຕົ້ນ ແລະ ໃນຕອນປິດ.
ເມື່ອພໍ່ແມ່ຕຽມພ້ອມ ແລະ ລູກຟັງຢ່າງຕັ້ງໃຈ ແລະ ມີສ່ວນຮ່ວມ, ແລ້ວສະພາຄອບຄົວ ກໍຈະປະສົບຄວາມສຳເລັດ!
ບໍ່ວ່າສະພາບການໃນຄອບຄົວຂອງເຮົາຈະເປັນແນວໃດກໍຕາມ, ມັນຈຳເປັນຫລາຍທີ່ເຮົາຈະເຂົ້າໃຈເຖິງຄວາມແຕກຕ່າງຂອງສະພາບການ ຂອງແຕ່ລະຄົນໃນຄອບຄົວຂອງເຮົາ. ເຖິງແມ່ນວ່າເຮົາມີສາຍເລືອດດຽວກັນ, ອາດຈະມີສະພາບການ ແລະ ສະຖານະການ ໃນທ່າມກາງພວກເຮົາ ທີ່ເຮັດໃຫ້ພວກເຮົາແຕກຕ່າງຈາກກັນແລະກັນ ຊຶ່ງຮຽກຮ້ອງຄວາມຮ່ວມໄມ້ຮ່ວມມື ທີ່ເຫັນອົກເຫັນໃຈກັນ ຢູ່ໃນສະພາຄອບຄົວ.
ຍົກຕົວຢ່າງ, ການເວົ້າລົມ ແລະ ການແບ່ງປັນ ແລະ ຄວາມຮັກທັງໝົດຢູ່ໃນໂລກນີ້ ອາດບໍ່ສາມາດແກ້ໄຂບັນຫາເລື່ອງ ສຸຂະພາບ ຫລື ແກ້ໄຂບັນຫາທາງຈິດໃຈຂອງບາງຄົນໃນຄອບຄົວຂອງເຮົາໄດ້. ໃນເວລາເຊັ່ນນັ້ນ, ສະພາຄອບຄົວອາດກາຍເປັນແຫລ່ງຊ່ວຍໃຫ້ຄວາມເປັນໜຶ່ງ, ຈົງຮັກພັກດີ, ແລະ ໃຫ້ຄວາມຮັກ ໃນຂະນະທີ່ກຳລັງຊອກຫາການແກ້ໄຂຈາກຜູ້ຄົນພາຍນອກຢູ່.
ເອື້ອຍອ້າຍນ້ອງ, ໂດຍສະເພາະຜູ້ໃຫຍ່, ສາມາດເປັນຜູ້ໃຫ້ຄຳແນະນຳທີ່ມີພະລັງ ແກ່ນ້ອງຜູ້ນ້ອຍໄດ້ ຖ້າຫາກພໍ່ແມ່ ຈະໃຊ້ສະພາຄອບຄົວ ເປັນວິທີທີ່ຈະຫາຄວາມຊ່ວຍເຫລືອ ແລະ ການສະໜັບສະໜູນ ໃນໄລຍະທີ່ມີຄວາມຫຍຸ້ງຍາກ ແລະ ໜັກໃຈນັ້ນ.
ໃນວິທີນີ້, ຄອບຄົວຈະເປັນຄືກັນກັບຫວອດ. ເມື່ອອະທິການໃຫ້ສະພາຫວອດມີສ່ວນຮ່ວມ, ເພິ່ນຈະສາມາດແກ້ໄຂບັນຫາ ແລະ ສຳເລັດຫລາຍຢ່າງທີ່ດີ ໃນວິທີທີ່ເພິ່ນບໍ່ເຄີຍເຮັດມາກ່ອນ ຖ້າປາດສະຈາກຄວາມຊ່ວຍເຫລືອຂອງສະພາ. ໃນວິທີທີ່ຄ້າຍຄືກັນນີ້, ພໍ່ແມ່ຕ້ອງໃຫ້ສະມາຊິກໃນຄອບຄົວມີສ່ວນຮ່ວມ ໃນການຈັດການກັບການທ້າທາຍ ແລະ ບັນຫາຕ່າງໆ. ໃນວິທີນີ້, ພະລັງຂອງສະພາຄອບຄົວຈຶ່ງຈະຖືກເອົາໄປນຳໃຊ້. ເມື່ອສະມາຊິກໃນສະພາຮູ້ສຶກວ່າ ເຂົາເຈົ້າເປັນພາກສ່ວນໃນການຕັດສິນໃຈ, ແລ້ວເຂົາເຈົ້າຈະກາຍເປັນຄົນສະໜັບສະໜູນ ແລະ ຈະໄດ້ຮັບຜົນສຳເລັດໃນທາງດີ.
ບໍ່ແມ່ນທຸກສະພາຄອບຄົວ ຈະມີພໍ່ແມ່ນຳກັນສອງຄົນ ແລະ ລູກໆ. ສະພາຄອບຄົວຂອງທ່ານ ອາດເບິ່ງແຕກຕ່າງຈາກສະພາຄອບຄົວຂອງຂ້າພະເຈົ້າ ໂດຍທີ່ພວກຂ້າພະເຈົ້າມີລູກຢູ່ເຈັດຄົນ. ປະຈຸບັນນີ້, ສະພາຄອບຄົວຂອງຂ້າພະເຈົ້າ ມີຢູ່ດ້ວຍກັນສອງຄົນ, ບາບາຣາ ກັບຂ້າພະເຈົ້າ, ຍົກເວັ້ນແຕ່ພວກຂ້າພະເຈົ້າຈັດສະພາວົງຕະກຸນ ຊຶ່ງຮ່ວມດ້ວຍລູກຜູ້ໃຫຍ່, ສາມີພັນລະຍາຂອງເຂົາເຈົ້າ, ບາງເທື່ອ ຫລານເຫລັນນຳອີກ.
ຄົນທີ່ຍັງໂສດ ແລະ ແມ່ນແຕ່ນັກສຶກສາທີ່ອາໄສຢູ່ຫ່າງໄກຈາກບ້ານເຮືອນ ສາມາດເຮັດຕາມແບບແຜນສະພາແຫ່ງສະຫວັນນີ້ ໂດຍການເຕົ້າໂຮມກັບໝູ່ເພື່ອນ ແລະ ເພື່ອນໃນຫໍພັກ ເພື່ອປຶກສາຫາລືນຳກັນ.
ໃຫ້ຄິດເບິ່ງວ່າ ສະພາບແວດລ້ອມຢູ່ໃນຫໍພັກ ຈະເປັນແນວໃດ ຖ້າຫາກເພື່ອນໃນຫໍພັກ ມາເຕົ້າໂຮມກັນເປັນປະຈຳ ເພື່ອອະທິຖານ, ຮັບຟັງ, ສົນທະນາ, ແລະ ວາງແຜນນຳກັນ.
ທຸກຄົນສາມາດປັບສະພາຄອບຄົວໄດ້ ເພື່ອນຳໃຊ້ຜົນປະໂຫຍດຂອງແບບແຜນແຫ່ງສະຫວັນນີ້ ທີ່ພຣະບິດາເທິງສະຫວັນທີ່ຮັກຂອງເຮົາ ໄດ້ສ້າງຕັ້ງໄວ້.
ດັ່ງທີ່ໄດ້ກ່າວຜ່ານມານັ້ນ, ບາງຄັ້ງສະພາວົງຕະກຸນກໍສາມາດຊ່ວຍເຫລືອໄດ້. ສະພາວົງຕະກຸນ ສາມາດຮ່ວມດ້ວຍ ປູ່ຍ່າຕາຍາຍ ແລະ ລູກຜູ້ໃຫຍ່ ຜູ້ທີ່ບໍ່ໄດ້ອາໄສຢູ່ໃນບ້ານ. ເຖິງແມ່ນປູ່ຍ່າຕາຍາຍ ແລະ ລູກຜູ້ໃຫຍ່ອາໄສຢູ່ຫ່າງໄກຈາກທ່ານ, ແຕ່ເຂົາເຈົ້າກໍສາມາດມີສ່ວນຮ່ວມໃນສະພາຄອບຄົວໄດ້ ຜ່ານທາງໂທລະສັບ, Skype, ຫລື FaceTime.
ທ່ານອາດໃຊ້ວັນອາທິດ ເພື່ອຈັດສະພາຄອບຄົວໂດຍທົ່ວໄປ, ເພາະມັນເປັນມື້ທຳອິດຂອງອາທິດ; ຄອບຄົວສາມາດທົບທວນອາທິດທີ່ຜ່ານມາ ແລະ ວາງແຜນອາທິດທີ່ຈະມາເຖິງ. ສິ່ງນີ້ອາດເປັນສິ່ງທີ່ຄອບຄົວຕ້ອງການ ເພື່ອເຮັດໃຫ້ວັນຊະບາໂຕ ເປັນປະສົບການທີ່ປິຕິຍິນດີ.
ສະພາຄອບຄົວແບບທີສອງ ແມ່ນສະພາຄອບຄົວສູງສຸດ ຊຶ່ງຮ່ວມດ້ວຍພໍ່ແມ່ສອງຄົນເທົ່ານັ້ນ. ໃນລະຫວ່າງເວລານີ້, ພໍ່ແມ່ສາມາດທົບທວນສຸຂະພາບ, ຄວາມຮູ້ສຶກ, ຄວາມຕ້ອງການທາງວິນຍານ ແລະ ຄວາມກ້າວໜ້າຂອງລູກແຕ່ລະຄົນໄດ້.
ສະພາຄອບຄົວສູງສຸດ ກໍຍັງເປັນເວລາທີ່ດີສຳລັບສາມີພັນລະຍາ ທີ່ຈະໄດ້ເວົ້າລົມກັນກ່ຽວກັບຄວາມສຳພັນສ່ວນຕົວຂອງເຂົາເຈົ້ານຳອີກ. ເມື່ອ ແອວເດີ ແຮໂຣນ ບີ ລີ ໄດ້ຜະນຶກພວກຂ້າພະເຈົ້າ, ເພິ່ນໄດ້ສອນພວກຂ້າພະເຈົ້າເຖິງຫລັກທຳຂໍ້ໜຶ່ງ ທີ່ຂ້າພະເຈົ້າເຊື່ອວ່າ ຄູ່ສາມີພັນລະຍາທຸກຄູ່ ຈະເຫັນວ່າ ມັນຊ່ວຍໄດ້ຫລາຍ. ເພິ່ນໄດ້ກ່າວວ່າ, “ຢ່າເຂົ້ານອນກ່ອນຄຸເຂົ່າອະທິຖານນຳກັນ, ໃຫ້ຈັບມືກັນ, ແລະ ກ່າວຄຳອະທິຖານຂອງພວກທ່ານ. ການອະທິຖານເຊັ່ນນັ້ນ ຈະເຊື້ອເຊີນພຣະບິດາເທິງສະຫວັນ ໃຫ້ມາແນະນຳເຮົາ ໂດຍອຳນາດຂອງພຣະວິນຍານ.”
ສະພາຄອບຄົວແບບທີສາມ ແມ່ນສະພາຄອບຄົວຈຳກັດ. ສະພານີ້ ພໍ່ແມ່ທັງສອງ ຈະໃຊ້ເວລາກັບລູກຄົນໜຶ່ງ ໃນແບບເປັນທາງການ ຫລື ໃນແບບເປັນກັນເອງ. ນີ້ຄືໂອກາດສຳລັບການສົນທະນາ ເລື່ອງການຕັດສິນໃຈລ່ວງໜ້າ ກ່ຽວກັບສິ່ງທີ່ເຂົາຈະເຮັດ ຫລື ບໍ່ເຮັດ ໃນອະນາຄົດ. ເມື່ອໄດ້ຕັດສິນໃຈແລ້ວ, ເຂົາເຈົ້າຕ້ອງບັນທຶກມັນໄວ້ ເພື່ອເປັນສິ່ງອ້າງອີງຖ້າຕ້ອງການ. ຖ້າລູກຊາຍ ຫລື ລູກສາວຂອງທ່ານ ເຫັນທ່ານສະໜັບສະໜູນເຂົາເຈົ້າແທ້ໆ, ແລ້ວສະພາກໍສາມາດສ້າງຕັ້ງເປົ້າໝາຍ ແລະ ຈຸດປະສົງສຳລັບອະນາຄົດໄດ້. ສະພານີ້ກໍເປັນເວລາທີ່ຕ້ອງຮັບຟັງຢ່າງລະມັດລະວັງ ກ່ຽວກັບບັນຫາ ແລະ ການທ້າທາຍອັນໜັກໜ່ວງ ທີ່ລູກກຳລັງປະເຊີນຢູ່ ເຊັ່ນວ່າ ເຂົາຂາດຄວາມໝັ້ນໃຈ, ຖືກທາລຸນ, ຖືກຂົ່ມເຫັງ, ຫລື ມີຄວາມຢ້ານກົວ.
ສະພາຄອບຄົວແບບທີສີ່ ເປັນສະພາຄອບຄົວສອງຕໍ່ສອງ ຊຶ່ງຮ່ວມດ້ວຍພໍ່ແມ່ໜຶ່ງຄົນ ກັບລູກໜຶ່ງຄົນ. ສະພາຄອບຄົວແບບນີ້ ສ່ວນຫລາຍແລ້ວຈະເກີດຂຶ້ນໂດຍບໍ່ໄດ້ວາງແຜນລ່ວງໜ້າ. ຍົກຕົວຢ່າງ, ພໍ່ແມ່ຄົນໜຶ່ງ ແລະ ລູກຄົນໜຶ່ງ ສາມາດໃຊ້ໂອກາດນີ້ ໃນຂະນະທີ່ເດີນທາງນຳກັນຢູ່ໃນລົດ ຫລື ໃນຂະນະທີ່ເຮັດວຽກງານຢູ່ໃນບ້ານ. ການທີ່ພໍ່ ຫລື ແມ່ພາລູກຄົນໜຶ່ງໄປຫລິ້ນ ກໍສາມາດເປັນເວລາຜູກພັນພິເສດທາງວິນຍານ ແລະ ທາງຄວາມຮູ້ສຶກກັບລູກໄດ້. ໃຫ້ຈັດເວລາໄວ້ໃນປະຕິທິນສຳລັບເວລານີ້ ເພື່ອວ່າລູກຂອງທ່ານຈະສາມາດຄາດໄວ້ໄດ້ ແລະ ລໍຖ້າເວລາພິເສດນີ້ ເພື່ອຈະໄດ້ຢູ່ນຳແມ່ ຫລື ພໍ່.
ບັດນີ້, ອ້າຍເອື້ອຍນ້ອງຂອງຂ້າພະເຈົ້າ, ສະໄໝກ່ອນ ບ້ານເຮືອນຂອງເຮົາ ໄດ້ເປັນບ່ອນປ້ອງກັນທີ່ເຮົາຕ້ອງການ ຕ້ານການບຸກລຸກ ແລະ ຕ້ານອິດທິພົນຕ່າງໆ. ເຮົາໄດ້ປິດປະຕູ, ປິດປ່ອງຢ້ຽມ; ເຮົາໄດ້ປິດຮົ້ວ; ແລ້ວເຮົາຮູ້ສຶກປອດໄພ, ໝັ້ນຄົງ, ແລະ ຖືກປົກປ້ອງ ໃນບ້ານເຮືອນ ຈາກໂລກພາຍນອກ.
ສະໄໝນັ້ນໄດ້ຜ່ານພົ້ນໄປແລ້ວ. ບ້ານເຮືອນ, ປະຕູ, ຮົ້ວຮາວ, ແລະ ປະຕູຮົ້ວ ຂອງບ້ານເຮືອນຂອງເຮົາ ບໍ່ສາມາດກີດກັນການບຸກລຸກທີ່ຕາຫລຽວບໍ່ເຫັນໄດ້ ຈາກ ອິນເຕີເນັດ, ວາຍ-ຟາຍ, ແລະ ມືຖື. ມັນສາມາດແຊກຊຶມເຂົ້າມາໃນບ້ານເຮືອນຂອງເຮົາ ພຽງແຕ່ ເອົາມືກົດເທື່ອດຽວເທົ່ານັ້ນ.
ໂຊກດີທີ່ ພຣະຜູ້ເປັນເຈົ້າໄດ້ຈັດຫາວິທີຕ້ານທານກັບການບຸກລຸກຂອງເທັກໂນໂລຈີທີ່ບໍ່ດີໄດ້ ຊຶ່ງສາມາດກີດກັນເຮົາຈາກການໃຊ້ເວລາທີ່ດີນຳກັນ. ພຣະອົງໄດ້ເຮັດສິ່ງນີ້ໂດຍການຈັດໃຫ້ມີລະບົບສະພາ ເພື່ອເພີ່ມພະລັງ, ປົກປ້ອງ, ປ້ອງກັນ, ແລະ ບຳລຸງລ້ຽງ ຄວາມສຳພັນທີ່ມີຄ່າທີ່ສຸດຂອງເຮົາໄວ້.
ລູກໆກໍຕ້ອງການພໍ່ແມ່ຜູ້ເຕັມໃຈທີ່ຈະຮັບຟັງເຂົາ, ແລະ ສະພາຄອບຄົວກໍສາມາດຈັດຫາເວລາ ໃຫ້ສະມາຊິກໃນຄອບຄົວເພື່ອຮຽນຮູ້ ທີ່ຈະເຂົ້າໃຈ ແລະ ຮັກກັນແລະກັນ.
ແອວມາ ໄດ້ສອນວ່າ, “ຈົ່ງປຶກສານຳພຣະຜູ້ເປັນເຈົ້າໃນການກະທຳທັງໝົດຂອງລູກ, ແລະ ພຣະອົງຈະຊີ້ທາງໃຫ້ລູກເພື່ອຄວາມດີ.”3 ການເຊື້ອເຊີນພຣະຜູ້ເປັນເຈົ້າໃຫ້ມີສ່ວນຮ່ວມໃນສະພາຄອບຄົວ ຜ່ານທາງການອະທິຖານ ຈະພັດທະນາຄວາມສຳພັນຂອງເຮົານຳແຕ່ລະຄົນ. ດ້ວຍຄວາມຊ່ວຍເຫລືອຂອງພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດ, ເຮົາຈະສາມາດກາຍເປັນຄົນທີ່ມີຄວາມອົດທົນຫລາຍກວ່າເກົ່າ, ຮູ້ຈັກຄິດ, ຮູ້ຈັກຊ່ວຍເຫລືອ, ໃຫ້ອະໄພ, ແລະ ເຂົ້າໃຈຫລາຍຂຶ້ນ ເມື່ອເຮົາອະທິຖານຂໍຄວາມຊ່ວຍເຫລືອ. ດ້ວຍຄວາມຊ່ວຍເຫລືອຈາກພວກພຣະອົງ, ເຮົາຈະສາມາດເຮັດໃຫ້ບ້ານເຮືອນຂອງເຮົາ ເປັນສະຫວັນຢູ່ເທິງແຜ່ນດິນໂລກໄດ້.
ສະພາຄອບຄົວທີ່ມີແບບແຜນຕາມສະພາໃນສະຫວັນ, ຈະເຕັມໄປດ້ວຍຄວາມຮັກທີ່ເປັນເໝືອນພຣະຄຣິດ, ໂດຍຖືກນຳພາໂດຍພຣະວິນຍານຂອງພຣະຜູ້ເປັນເຈົ້າ, ຈະຊ່ວຍເຮົາໃຫ້ປົກປ້ອງຄອບຄົວຂອງເຮົາ ຈາກສິ່ງລົບກວນ ທີ່ສາມາດລັກເອົາເວລາທີ່ມີຄ່າຂອງຄອບຄົວໄປ ແລະ ປົກປ້ອງເຮົາຈາກຄວາມຊົ່ວຮ້າຍຂອງໂລກໄດ້.
ສະພາຄອບຄົວທີ່ຮ່ວມດ້ວຍການອະທິຖານ ຈະເຊື້ອເຊີນພຣະຜູ້ຊ່ວຍໃຫ້ລອດ ໃຫ້ມາສະຖິດຢູ່ນຳ ດັ່ງທີ່ພຣະອົງໄດ້ສັນຍາໄວ້ວ່າ, “ດ້ວຍວ່າ ມີສອງ ຫລື ສາມຄົນມາຮ່ວມປະຊຸມກັນໃນນາມຂອງເຮົາຢູ່ບ່ອນໃດ ເຮົາກໍຢູ່ທ່າມກາງພວກເຂົາໃນບ່ອນນັ້ນແຫລະ.”4 ໃນການເຊື້ອເຊີນພຣະວິນຍານຂອງພຣະຜູ້ເປັນເຈົ້າ ໃຫ້ມາເປັນພາກສ່ວນໜຶ່ງໃນສະພາຄອບຄົວຂອງເຮົາ ຈະນຳພອນທີ່ເກີນກວ່າຈະພັນລະນາໄດ້ ມາໃຫ້ເຮົາ.
ສຸດທ້າຍນີ້, ຈົ່ງຈື່ຈຳໄວ້ວ່າ ສະພາຄອບຄົວທີ່ຖືກຈັດຂຶ້ນເປັນປະຈຳ ຈະຊ່ວຍເຮົາໃຫ້ຮູ້ຈັກບັນຫາ ແລະ ກຳຈັດມັນໄປ ກ່ອນຈະສາຍເກີນແກ້; ສະພາເຫລົ່ານີ້ຈະເຮັດໃຫ້ສະມາຊິກແຕ່ລະຄົນໃນຄອບຄົວ ຮູ້ສຶກເຖິງຄຸນຄ່າ ແລະ ຄວາມສຳຄັນຂອງຕົນ, ແລະ ຍິ່ງກວ່າທຸກສິ່ງ ມັນຈະຊ່ວຍເຮົາໃຫ້ສຳເລັດຫລາຍກວ່າເດີມ ແລະ ຊື່ນຊົມກັບຄວາມສຳພັນອັນລ້ຳຄ່າ, ຢູ່ໃນບ້ານເຮືອນຂອງເຮົາ. ຂໍໃຫ້ພຣະບິດາເທິງສະຫວັນຂອງເຮົາ ຈົ່ງປະທານພອນໃຫ້ແກ່ຄອບຄົວຂອງເຮົາ ເມື່ອເຮົາປຶກສາຫາລືນຳກັນ, ນີ້ຄືຄຳອະທິຖານທີ່ຖ່ອມຕົວຂອງຂ້າພະເຈົ້າ ໃນພຣະນາມຂອງອົງພຣະເຢຊູຄຣິດເຈົ້າ, ອາແມນ.