Aufono Faaleaiga

O’u uso e ma tuafafine, o le mea uiga ese ae moni i le avea ma matua o le lagona ua tatou lelei i tulaga faamatua pe a matutua a tatou fanau. O le a ou faasoa atua ia te outou i lenei aoauli se mea ou te momoo maimau pe a na ou malamalama lelei i ai ina ua ma amata ma Barbara ona tausi ae le ma fanau pele.

I le taimi o la’u auaunaga faaaposetolo, ou te faamamafaina soo lava le mamana ma le taua o aufono a le Ekalesia, e aofia ai aufono a le misiona, siteki, uarota, ma ausilali.

Ou te talitonu o aufono o le ala aupito sili lea ona aoga e maua ai taunuuga moni. Ma le isi, ou te iloa o aufono o le ala a le Alii ma sa Ia foafoaina mea uma i le atulaulau e ala i se aufono faalelagi, e pei ona ta’ua i tusitusiga paia.¹

Peitai, e oo mai i le taimi nei, ou te lei talanoa lava i konafesi aoao e uiga i le aufono autu ma o le faavae sili lea—ma e masalo o le aufono aupito sili ona taua—o aufono uma: o le aufono a le aiga.

E manaomia pea i taimi uma aufono a le aiga. O le mea moni e faavavau. Sa tatou auai i se aufono faaleaiga i le muai olaga, a o tatou nonofo faatasi ai ma o tatou matua faalelagi o ni fanau agaga.

O se aufono faaleaiga, pe a faatautaia i le alofa ma uiga FaaKeriso, o le a faafetaia’ia ai le aafiaga o tekinolosi faaonapo nei ia e tele lava ina faalavelave ia i tatou mai le faaaluina o taimi lelei faatasi ma le tasi ma le isi ma o loo faapea foi ona faamoemoe e aumaia mea leaga i totonu o o tatou aiga.

Faamolemole ia manatua o aufono faaleaiga e ese mai i afiafi faaleaiga o loo faia i Aso Gafua. O afiafi faaleaiga e taulai autu lava i aoaoga o le talalelei ma gaoioiga faaleaiga. O aufono faaleaiga, i le isi itu, e mafai ona faia i soo se aso o le vaiaso, ma o le autu lava o se fonotaga e faalogo ai matua—i le tasi ma le isi ma i a latou fanau.

Ou te talitonu e le itiiti ifo ma le fa ituaiga o aufono faaleaiga:

Muamua, o se aufono faaleaiga lautele e aofia ai le aiga atoa.

Lua, o se aufono faaleaiga patino e aofia ai se tina ma se tamā.

Tolu, o se aufono faaleaiga faatapulaa e aofia ai matua ma se tamaitiiti se toatasi.

Fa, o se aufono faaleaiga tasi-i-le-tasi e aofia ai na o se tasi o matua ma se tamaitiiti se toatasi.

I nei faatulagaga uma o aufono faaleaiga, e manaomia ona tape uma masini faaeletonika ina ia mafai ona tepataulai ma faalogo uma tagata i le tasi ma le isi. I le taimi o aufono faaleaiga ma isi taimi talafeagai, atonu e te manao e fai se ato mo masini faaeletonika, lea a oo i le taimi e potopoto faatasi ai tagata uma o le aiga—e aofia ai Tina ma Tama—e mafai ona tuu i ai a lana telefoni, tapeleti, ma MP3 i totonu o le ato. A uma, ona mafai lea ona latou fefautuaai faatasi e aunoa ma le faaosoosoina e tali atu i meli i luga o le facebook, i se tesi, i le Instagram, i le Snapchat, po o se imeli.

Se’i o’u faasoa vave atu ia te outou le auala e mafai ona faaaoga ai nei ituaiga taitasi o aufono faaleaiga.

Muamua, o le aufono faaleaiga atoa e aofia ai tagata uma o le aiga.

O le tamaitusi a le Ekalesia ua ta’ua O Lo Matou Aiga o loo faapea mai, “E mafai ona fono lenei aufono e talanoaina faafitauli o le aiga, galueaiina mea tautupe, faia ni fuafuaga, lagolago ma faamalosia le [tasi ma le isi], ma tatalo mo le tasi ma le isi, ma mo le aiga atoa.”²

O lenei aufono e tatau ona fono i se taimi na muai atofaina ma e masani lava ona sili atu ona aloaia nai lo se isi lava ituaiga o aufono faaleaiga.

E tatau ona amata i se tatalo, pe na o se faaauauga masani o talanoaga na amata mai se isi faatulagaga. Faamolemole ia matau o se aufono faaleaiga e le o taimi uma e tatau ona i ai se amataga po o se faaiuga aloaia.

A saunia matua ma faalogo ma auai le fanau i le talanoaga, e aoga moni lava le aufono a le aiga!

E tusa lava po o a o tatou tulaga faaleaiga, e matua taua lava lo tatou malamalama i tulaga patino o tagata taitoatasi o le aiga. E ui ina tutusa o tatou DNA [pe fananau mai i le aiga e tasi], ae atonu o loo i ai ni faafitauli ma ni tulaga ia i tatou lea e ono matua eseese ai lava le tasi mai le isi ma atonu e manaomia ai le galulue faatasi ma le agaalofa i le aufono faaleaiga [e taulima faafitauli].

Mo se faataitaiga, o talanoaga uma ma fefaasoaaiga ma le alofa uma e mafai ona maua atonu e le mafai ona foia ai se faafitauli faalesoifua maloloina po o se luitau faalelagona lea e feagai ma se tagata se toatasi pe sili atu o le aiga. I taimi faapena, e avea ai le aufono faaleaiga ma se nofoaga o le lotogatasi, tuuto, ma le lagolago alofa a o saili atu le aiga i fafo atu mo se fesoasoani mai nisi tagata.

O uso ma tuafafine, aemaise lava le vaega matutua, e mafai ona avea ma ni faufautua mamana i nai fanau laiti pe afai o le a faaaoga e matua le aufono faaleaiga e maua ai so latou fesoasoani ma le lagolago i taimi o faigata ma luitau.

I lenei auala, e matua pei ai lava le aiga o se uarota. A faaauai e le epikopo sui o le aufono a le uarota, e mafai ona ia foiaina faafitauli ma ausia le tele o mea lelei i ni auala e le mafai ona ia faia ai e aunoa ma le latou fesoasoani. I se faiga talitutusa faapena, e manaomia e matua ona faaaofia ai tagata uma o le aiga i le taulimaina o luitau ma faigata. I lena auala, e faagaoioia ai le mana o le aufono faaleaiga. E lagona e tagata o le aufono o i latou o se vaega o se faaiuga, o le a avea i latou ma ē lagolagosua ma mafai ai ona ausia ni taunuuga lelei patino.

E le o aufono uma foi faaleaiga e i ai ni matua se toalua ma le fanau. E ono ese foliga o le aufono a lou aiga nai lo foliga o le matou aufono faaleaiga i le taimi sa ma tausi ae ai le ma fanau e toafitu. O le taimi nei, o le ma aufono faaleaiga, ua na o Barbara lava ma a’u, sei vagana ua ma faia se aufono faaleaiga lautele e aofia ai le ma fanau matutua, o latou taitoalua, ma o nisi taimi o le ma fanau a fanau ma fanau a fanau a fanau.

O i latou o loo nofofua e oo lava i taimaiti aoga o loo nonofo ese mai le aiga e mafai lava ona mulimulitai i le mamanu faalelagi mo aufono e ala i le faatasitasi ma uo ma ē e nonofo faatasi i potu e fefautuaai faatasi.

Mafaufau i le auala o le a suia ai le siosiomaga i totonu o se fale pe a potopoto soo uo e tatalo, faalogo, talanoaina, ma fuafua faatasi ni mea.

E mafai ona fetuunai tagata uma i se aufono faaleaiga e faaaoga lelei ai lenei mamanu faalelagi na faavaeina e lo tatou Tama Faalelagi alofa.

E pei ona ou ta’ua muamua, mai lea taimi i lea taimi, e mafai ona aoga se aufono faaleaiga lautele. O se aufono faaleaiga lautele e mafai ona i ai ni matua matutua ma fanau matutua o e e le o nonofo i le aiga. E tusa foi pe nonofo mamao ese matua matutua po o fanau matutua, e mafai lava ona latou auai i ni aufono faaleaiga e fai i le telefoni, Skype, po o le FaceTime.

Atonu e te manao e iloilo le faia o se aufono faaleaiga lautele i le Aso Sa, le aso muamua o le vaiaso; e mafai ona iloilo e aiga le vaiaso ua tuanai ma fuafua mo le vaiaso o agafua. Atonu o le mea tonu lea o loo manaomia e lou aiga e fesoasoani ai e faia le Sapati o se aafiaga fiafia.

O le ituaiga lona lua o aufono faaleaiga o se aufono faaleaiga patino lea e aofia ai na o matua. I lea taimi e faatasia ai, e mafai e matua ona iloilo manaoga faaletino, faalelagona, ma faaleagaga o tamaiti taitasi ma lo latou alualu i luma.

O le aufono faaleaiga patino o se taimi lelei foi lea mo ava ma tane e talanoa ai i le la mafutaga patino ma le tasi ma le isi. Ina ua faatino e Elder Harold B. Lee le ma faamauga, sa ia aoao mai ia i ma’ua se mataupu faavae lea ou te talitonu o le a iloa uma e ulugalii e aoga. Sa ia fai mai, “Aua lava ne’i momoe e aunoa ma le tootutuli faatasi, uu lima, ma fai a oulua tatalo. O na tatalo e valaaulia ai le Tama Faalelagi e fautuaina i tatou e ala mai i le mana o le Agaga.”

O le ituaiga lona tolu o le aufono faaleaiga o se aufono faaleaiga e faatapulaa. O i, e faaalu uma ai e matua le taimi faatasi ma se tamaitiiti se toatasi i se faatulagaga aloaia pe le aloaia foi. O se avanoa lenei mo se talanoaga i le vave faia o faaiuga e uiga i ni mea o le a ia faia pe o le a ia lē faia foi i le lumanai. A oo ina faia na faaiuga, atonu la te mananao e faamaumau i lalo mo le lumanai pe a manaomia. Afai e iloa e lou atalii po o lou afafine o oe o se tagata e lagolago atoa ia te ia, e mafai e lenei fonotaga faaleaufono ona atiae ai ni sini ma ni faamoemoega mo le lumanai. O le taimi foi lea e faalogo ai ma le faaeteete i atugaluga ma luitau mamafa atonu o loo feagai ma se tamaitiiti i ni mea faapena ona o le leai o se talitonuga maumaututu, sauaina, faalumaina, po o le fefe.

O le ituaiga lona fa o le aufono faaleaiga o le aufono faaleaiga tasi-i-le-tasi e aofia ai se tasi o matua ma le tamaitiiti e toatasi. O lenei ituaiga o aufono faaleaiga e masani lava ona tupu faafuasei. Mo se faataitaiga, e mafai e le matua ma se tamaitiiti ona faaaoga ni avanoa lē aloaia a o malaga i le taavale pe o faia foi ni feau i le fale. O se tafaoga faatasi ma se tamaitiiti se toatasi a le o le tama po o le tina e mafai ona maua ai se taimi faapitoa faaleagaga ma le vavalalata faalelagona. Ia faakalena vave nei mea ina ia mafai ai e le fanau ona fuafua mamao i ai ma tulimatai i ai i taimi faapitoa mo na o ia ma Tina po o Tama.

O lenei, uso e ma tuafafine, sa i ai se taimi sa maua ai i puipui o o tatou fale le puipuiga atoa na tatou manaomia e tetee atu ai i osofaiga ma faatosinaga mai fafo. Sa tatou lokaina faitotoa, tapunipuni faamalama; sa tatou tapuni ia pa; ma sa tatou lagonaina le saogalemu, malutaga ma le malupuipuia i o tatou lava tamai maluapapa mai le lalolagi i fafo atu.

Ua uma atu na aso. O puipui faaletino, faitotoa, aupa, ma pa o o tatou fale ua le mafai ona puipuia ai osofaiga le mavaaia mai le Initoneti, le Wi-Fi, o telefoni feaveai, ma upegatafailagi. Ua mafai ona latou ulufiaina o tatou fale i ni nai kiliki lava ma le oomiina o ki.

O le mea e lelei ai, ua saunia e le Alii se ala e faafetaia’ia ai le osofaiga a tekinolosi le lelei ia e mafai ona faalavelave ia i tatou mai le faaaluina o taimi lelei ma le tasi ma le isi. Ua Ia faia lenei mea e ala i le sauniaina o faatulagaga o aufono e faamalosia, puipuia, faasaogalemu, ma faafailele ai a tatou mafutaga sili ona taua.

Ua matua manaomia tele e le fanau ni matua e naunau e faalogo atu ia i latou, ma e mafai ona maua i le aufono faaleaiga se taimi e mafai ai e tagata o le aiga ona aoao ia malamalama ma fealofani.

Sa aoao mai Alema, “Filifili faatasi ma le Alii i au mea uma e fai, ma o le a ia taitai oe mo le lelei.”³ O le valaauliaina o le Alii e avea ma se vaega o le aufono a o tatou aiga e ala i le tatalo o le a faaleleia ai a tatou sootaga ma le tasi ma le isi. E mafai ona tatou faia, faatasi ma le fesoasoani a le Tama Faalelagi ma lo tatou Faaola, o le a tatou onosai atili, agalelei, lotofesoasoani, lotofaamagalo, ma lotomalamalama a o tatou tatalo atu mo se fesoasoani. Faatasi ma le La fesoasoani, e mafai ona tatou faia ai o tatou aiga e avea ma se tamai lagi iinei i le lalolagi.

O se aufono faaleaiga e mamanu e tusa ma aufono i le lagi, e faatumulia i le alofa FaaKeriso, ma taialaina e le Agaga o le Alii, o le a fesoasoani ia i tatou e puipuia o tatou aiga mai mea faalavefau ia e mafai ona faoaina lo tatou taimi taua e faatasitasi ai ma puipuia i tatou mai mea leaga o le lalolagi.

A tuufaatasi ma le tatalo, o le a valaaulia e se aufono faaleaiga le faatasi mai o le Faaola e pei ona Ia folafola mai, “Aua o le mea ua faapotopoto ai se toalua, po o se toatolu i lo’u igoa, ou te i ai faatasi ma i latou.”⁴ O le valaauliaina o le Agaga o le Alii e avea ma se vaega o aufono a lou aiga e aumaia ai faamanuiaga le mafaamatalaina.

Ma le mea mulimuli, faamolemole ia manatua o se aufono faaleaiga e faia soo o le a fesoasoani ia i tatou e iloaina vave faafitauli o le aiga ma foiaina a o lei faatupulaia; i aufono o le a maua ai e sui taitasi o le aiga se lagona o le ta’uaogāina ma le taua; ma le mea sili i mea uma o le a latou fesoasoani ia i tatou ia faamanuiaina atili ma fiafia i a tatou mafutaga faapelepele, i totonu o puipui o o tatou fale. Ia faamanuia mai lo tatou Tama Faalelagi i o tatou aiga uma a o tatou fefautuaai faatasi ai, o la’u tatalo faamaualalo lea i le suafa o le Alii o Iesu Keriso, amene.