Te mau ’āpo’ora’a ’utuāfare

Tō’u mau taea’e ’e mau tuahine, te vāhi ta’a ’ē roa i roto i te rirora’a ’ei metua, mai te mea ra ē, e maita’i tā tātou e fāri’i, i muri a’e i te pa’arira’a tā tātou mau tamari’i. E fa’a’ite atu vau ia ’outou i teie avatea i te hō’ē mea o tā’u i hina’aro ’ia haro’aro’a maita’i a’e i te taime a ha’amata ai maua o Barbara i te fa’a’amu i ta maua mau tamari’i faufa’a rahi.

I roto i tā’u tau ’āpōsetolora’a, ’ua ha’apāpū pinepine au i te mana ’e i te faufa’a o te mau ’āpo’ora’a a te ’Ēkālesia, ’oia ho’i, te mau ’āpo’ora’a misiōni, ’āpo’ora’a titi, paroisa ’e te ’āpo’ora’a pupu.

Te ti’aturi nei au ē, ’ua riro te mau ’āpo’ora’a ’ei rāve’a maita’i roa a’e e roa’a ai te mau hōpe’ara’a mau. Ta’a ’ē atu i te reira, ’ua ’ite au ē, ’ua riro te mau ’āpo’ora’a ’ei fa’anahora’a na te Fatu, ’e ’ua hāmani ’Oia i te mau mea ato’a i roto i te ao nui na roto i te hō’ē ’āpo’ora’a i te ao ra, mai tei fa’a’itehia i roto i te pāpa’ira’a mo’a.¹

Terā rā, tae mai i teie taime, ’aita vau i paraparau a’e nei i roto i te ’āmuira’a rahi i te parau nō te hō’ē ’āpo’ora’a tumu—’e penei a’e te mea faufa’a roa a’e—i te mau ’āpo’ora’a ato’a : te ’āpo’ora’a ’utuāfare.

’Ua vai hina’arohia te mau ’āpo’ora’a ’utuāfare i te mau taime ato’a. E nehenehe e parau ē, e mea mure ’ore te reira. I vai na tātou i roto i te hō’ē ’āpo’ora’a ’utuāfare i roto i te orara’a hou te tāhuti nei, a ora ai tātou i piha’i iho i tō tātou na metua i te ao ra ’ei mau tamari’i vārua na rāua.

Mai te mea e, e arata’ihia te hō’ē ’āpo’ora’a ’utuāfare na roto i te here ’e na roto i te huru o te Mesia, e tinai te reira i te pūai o te ’ihimata’i o teie tau o te fa’anevaneva pinepine nei ia tātou ’ia hōro’a i te taime maita’i i te tahi e te tahi, ’e o te hopoi roa mai nei i te ’ino i roto i tō tātou mau ’utuāfare.

A ha’amana’o ē, e mea ta’a ’ē te mau ’āpo’ora’a ’utuāfare i te pō ’utuāfare e fa’atupuhia nei i te monire. Te fa’atumu nei te mau pō ’utuāfare na mua roa i ni’a i te ha’api’ira’a ’evanelia ’e te fa’a’oa’oara’a ’utuāfare. Are’a te mau ’āpo’ora’a ’utuāfare ra, e nehenehe te reira e fa’atupuhia i te mau huru mahana ato’a o te hepetoma, ’e na mua roa, e putuputura’a te reira i reira te mau metua e fa’aro’o ai—te tahi e te tahi ’e i tā rāua mau tamari’i.

Te ti’aturi nei au te vai ra e maha a’e huru ’āpo’ora’a ’utuāfare :

A tahi, hō’ē ’āpo’ora’a ’utuāfare rahi nō te ’utuāfare tā’āto’a.

A piti, hō’ē ’āpo’ora’a ’utuāfare fa’atere nō te metua vahine ’e te metua tāne.

A toru, hō’ē ’āpo’ora’a ’utuāfare na’ina’i nō na metua ’e hō’ē tamari’i.

A maha, hō’ē ’āpo’ora’a ’utuāfare hō’ē hō’ē nō te hō’ē metua ’e hō’ē tamari’i.

I roto i teie mau fa’anahora’a ’āpo’ora’a ’utuāfare pā’āto’a, tītauhia ’ia tupohe i te mau mauiha’a rorouira ’ia ti’a ho’i i te ta’ata tāta’itahi ’ia hi’o ’e ’ia fa’aro’o i te tahi e te tahi. I te roara’a o te mau ’āpo’ora’a ’utuāfare ’e i te tahi atu mau taime au, e nehenehe ’outou e fa’aineine i te hō’ē fa’ari’i vaira’a i te mau mauiha’a rorouira, ’e ’ia putuputu ana’e te ’utuāfare, e nehenehe i te ta’ata tāta’itahi—te māmā ’e te pāpā ato’a—e tu’u i tā raua niuniu, ’e te tahi atu mau mauiha’a rorouira i roto i te fa’ari’i. I muri iho, e nehenehe tā rātou e fa’atere i te ’āpo’ora’a ma te ’ore e fa’ahemahia ’ia pāhono i te hō’ē parau poro’i fāri’ihia na roto mai i te Facebook ’e te tahi atu mau reni rorouira ’e ’aore rā na roto mai i te rata uira.

Te hina’aro nei au e fa’a’ite poto noa atu ia ’outou e nāhea teie mau huru ’āpo’ora’a ’utuāfare tāta’itahi e nehenehe ai e fa’aterehia.

A tahi, te ’āpo’ora’a ’utuāfare rahi nō te mau melo pā’āto’a o te ’utuāfare

I roto i te buka iti ra Our Family,(Tō tātou ’utuāfare) te fa’ahitihia ra ē, « e nehenehe teie ’āpo’ora’a e putuputu nō te ’āparau i te mau fifi o te ’utuāfare, nō te fa’anaho i te faufa’a moni, nō te ha’amau i te mau ’ōpuara’a, nō te pāturu ’e nō te fa’aitoito [i te tahi e te tahi], ’e nō te pure nō te tahi e te tahi ’e nō te ’utuāfare tā’āto’a ».²

E ti’a i teie ’āpo’ora’a ’ia putuputu i te hō’ē taime i fa’ata’ahia, ’e e ’āpo’ora’a huru tura ri’i a’e teie i te tahi atu huru ’āpo’ora’a ’utuāfare.

E ti’a ’ia ha’amata na roto i te hō’ē pure, ’e ’aore rā, e nehenehe e riro ’ei puoira’a nō te tahi mau tau’ara’a parau tei ha’amata i roto i te tahi atu fa’anahora’a. ’Ia ’ite mai ’outou ē, ’aita e tītauhia ’ia ha’amata ’e ’ia fa’aoti i te ’āpo’ora’a ’utuāfare ma te tura i te mau taime ato’a.

’Ia ineine ana’e na metua ’e ’ia fa’aro’o’ e ’ia fa’aō ana’e te mau tamari’i i roto i te ’āparaura’a, tāpa’o ïa ē, te tere maita’i ra te ’āpo’ora’a ’utuāfare !

’Aita e hi’ora’a, e aha te fāito ta’a ’ē o tō tātou ’utuāfare, e mea faufa’a roa ’ia māramarama tātou i te mau huru ta’a ’ē o te melo tāta’itahi o te ’utuāfare. Noa atu ē, hō’ē ā huru tō tātou ADN, (fāito toto), te vai ra te tahi mau fāito ’e te tahi mau huru i rotopū ia tātou o te fa’ariro ia tātou e feiā ta’a ’ē roa te tahi e te tahi ’e o te tītau i te tāhō’ēra’a aroha o te ’āpo’ora’a ’utuāfare.

’Ei hi’ora’a, e’ita te paraparaura’a ’e te fa’a’itera’a ’e te herera’a i roto i te ao nei e tātara i te hō’ē fifi o te ea, ’e ’aore rā, i te hō’ē fifi i te pae o te mana’o tā te hō’ē ’e ’aore rā, tā te tahi atu mau melo o te ’utuāfare e farerei. I roto i taua huru taime ra, e riro mai te ’āpo’ora’a ’utuāfare, ’ei vāhi tei reira te autahira’a, te ha’avare ’ore, te pāturura’a here, a ’imi ai tō te ’utuāfare i te mau rāve’a na roto i te tauturura’a a te tahi atu mau ta’ata ’e te tahi atu mau pupu.

E nehenehe te mau taea’e ’e te mau tuahine, te mau tua’ana hoa ra, e riro mai ’ei mau arata’i pūai nō te mau tamari’i ’āpī mai te mea ē, e fa’a’ohipa na metua i te ’āpo’ora’a ’utuāfare nō te fāri’i i tā rātou tauturu ’e te pāturura’a i roto i te mau taime fifi ’e te ha’avīra’a.

Na roto i te reira, e au ïa te hō’ē ’utuāfare mai te hō’ē paroisa. ’Ia fa’a’ohipa ana’e te ’episekōpo i te mau melo o te ’āpo’ora’a paroisa, e nehenehe tāna e tātara i te mau fifi, ’e e fa’atupu i te mau maita’i e rave rahi i te hō’ē fāito e ’ore roa e ti’a iāna ’ia rave ’ia ’ore tā rātou tauturu. Ia au i te reira hōho’a, e ti’a i na metua ’ia fa’a’ohipa i te mau melo pā’āto’a o te ’utuāfare i roto i te tātarara’a i te mau tītaura’a ’e te ’ati. Na roto i te reira, te fa’a’ohipahia ra ïa te pūai o te ’āpo’ora’a ’utuāfare. ’Ia ’ite ana’e te mau melo o te ’āpo’ora’a ’utuāfare ē, e tuha’a ato’a tā rātou i roto i te hō’ē fa’aotira’a, e riro mai rātou ’ei feiā pāturu, ’ei reira e ti’a ai ’ia fa’aotihia te mau hōpe’ara’a maita’i.

’Aita e vai ra i roto i te mau ’āpo’ora’a ’utuāfare ato’a e piti na metua e te mau tamari’i. E riro tā ’outou ’āpo’ora’a ’utuāfare i te mea ta’a ’ē roa i tō maua ’āpo’ora’a ’utuāfare i te taime a fa’a’amu ai maua i tā maua na tamari’i e hitu. I teie mahana, i roto i tā maua ’āpo’ora’a ’utuāfare, o Barbara ana’e ïa ’e o vau, terā rā, e nehenehe tā maua e fa’atupu i te hō’ē ’āpo’ora’a ’utuāfare ’ā’ano, ma te ’āmui mai i te mau tamari’i pa’ari, tō rātou mau hoa fa’aipoipo, ’e i te tahi taime tā maua mau mo’otua ’e te mau hina.

O rātou e feiā ’ōtahi, e tae noa atu i te mau piahi e ora ra i te ateā i te ’utuāfare, e nehenehe tā rātou e ha’apa’o i te hōho’a hanahana na roto i te ha’aputuputura’a ’e te mau hoa ’e te mau ’āpiti piha nō te paraparau ’āmui.

A feruri na i te huru te tauira’a te orara’a i roto i te hō’ē piha mai te mea ē, e ha’aputuputu tāmau te mau ’āpiti piha nō te pure, nō te fa’aro’o, nō te ’āparau, ’e nō te fa’aineine ’āmui i te mau ’ohipa.

E nehenehe te mau ta’ata ato’a e fa’aau i te hō’ē ’āpo’ora’a ’utuāfare nō te fa’a’ohipa i teie hōho’a hanahana tei ha’amauhia e tō tātou Metua here i te ao ra.

Mai tei fa’a’itehia atu i mua ra, i te tahi taime, e mea faufa’a te hō’ē ’āpo’ora’a ’utuāfare ’ā’ano. I roto i te hō’ē ’āpo’ora’a ’utuāfare ’ā’ano, e nehenehe e fa’aō mai i te mau metua ruau ’e i te mau tamari’i pa’ari ’aita e ora nei i te fare. Noa atu ē, te ora nei te mau metua ruau ’e te mau tamari’i pa’ari i te ateā ’ē roa, e nehenehe tā rātou e ’āmui mai i roto i te mau ’āpo’ora’a ’utuāfare na roto i te niuniu, te Skype, ’e ’aore rā, te FaceTime.

E nehenehe tā ’outou e fa’atupu i te ’āpo’ora’a ’utuāfare rahi i te Sābati, te mahana mātāmua o te hepetoma ; e nehenehe te mau ’utuāfare e hi’opo’a i te hepetoma i mahemo ’e ’ia fa’anaho nō te hepetoma e haere mai ra. E nehenehe teie ’ohipa e riro mau ’ei ’ohipa e hina’arohia e tō ’outou ’utuāfare nō te fa’ariro i te Sābati ’ei ’ohipa auhia.

Te piti o te huru ’āpo’ora’a ’utuāfare e ’āpo’ora’a ’utuāfare fa’atere ïa nō na metua ana’e. I roto i taua taime ra, e nehenehe na metua e hi’o ’āmui i te mau hina’aro pae tino, pae ferurira’a ’e pae vārua o te tamari’i tāta’itahi ’e tō tōna haerera’a i mua.

’Ua riro ato’a te ’āpo’ora’a ’utuāfare fa’atere ’ei taime maita’i nō te vahine ’e nō te tāne ’ia paraparau nō ni’a i tō raua iho autā’atira’a te tahi e te tahi. I te tā’atira’a o Elder Harold B. Lee ia maua, ’ua ha’api’i mai ’oia ia maua i te hō’ē parau tumu o tā’u e ti’aturi nei, e fāri’i te mau ta’ata fa’aipoipo ato’a, e parau tumu maita’i. ’Ua parau ’oia, « ’eiaha roa atu e haere e ta’oto ma te ’ore e tūturi ’āmui, ma te tāpe’a i te rima, e ma te fa’ahiti i tō ’ōrua mau pure. E tītau taua huru pure ra i te Metua i te ao ra ’ia ha’api’i mai ia tātou na roto i te mana o te Vārua ».

Te toru o te huru ’āpo’ora’a ’utuāfare e ’āpo’ora’a ’utuāfare na’ina’i ïa. I ’ō nei, e fa’ata’a na metua to’opiti i te hō’ē taime i piha’i iho i te hō’ē tamari’i i roto i te hō’ē ravera’a fa’anahohia ’e ’aore rā, hō’ē ravera’a fa’anaho-’ore-hia. E taime teie nō te hō’ē ’āparaura’a nō ni’a i te ravera’a i te mau fa’aotira’a na mua roa nō ni’a i te mau ’ohipa mai teie te huru, e aha tāna e rave ’e ’aore rā, e’ita e rave a muri a’e. ’Ia oti ana’e te reira mau fa’aotira’a i te ravehia, e nehenehe tā rātou e pāpa’i i te reira nō te fa’ahiti a muri a’e mai te mea ē, e hina’arohia. Mai te mea ē, e ’ite tā ’outou tamaiti ’e ’aore rā, tamahine ē, e na ta’ata pāturu pāpū ’ōrua, e nenehene teie ’āpo’ora’a e ha’amau i te mau ’ōpuara’a ’e te mau fa’anahora’a nō a muri a’e. E taime ato’a teie nō te fa’aro’o ma te ha’apa’o maita’i i te mau mana’o ’e i te mau tītaura’a e riro i te farereihia e te hō’ē tamari’i mai te ’erera’a i te ti’aturi, mai te hāmani-’ino-ra’a, mai te fa’ari’ari’ara’a ’e ’aore rā te mata’u.

Te maha o te huru ’āpo’ora’a ’utuāfare o te ’āpo’ora’a hō’ē hō’ē ïa a te hō’ē metua ’e hō’ē tamari’i. Te tupu nei teie huru ’āpo’ora’a ’utuāfare ma te fa’anaho-’ore-hia. ’Ei hi’ora’a, e nehenehe te metua ’e te tamari’i e fa’a’ohipa i te mau taime mana’o-’ore-hia mai te rāterera’a na ni’a i te pereo’o ’e ’aore rā, te raveravera’a i te ’ohipa na rāpae i te fare. E nehenehe te hō’ē tere orihaere o te hō’ē tamari’i e te metua tāne ’e ’aore rā, te metua vahine, e fa’atupu i te hō’ē taime natira’a pae vārua ’e te ’āehuehu ta’a ’ē. A fa’anaho ateā i te hō’ē tārena nō te reira mau mea ’ia ti’a ho’i i te mau tamari’i ’ia fa’aineine nō te hō’ē taime ta’a ’ē ’ōna ana’e e te māmā ’e ’aore rā, te pāpā.

I teie nei, e te mau taea’e ’e te mau tuahine, i te hō’ē tau ra, ’ua riro te mau papa’i o tō tātou mau fare ’ei pāruru nō tātou i te mau ha’afifira’a ato’a nō rāpae mai. E tāpiri tātou i te mau ’ōpani, e tāpiri i te mau ha’amaramarama ; E tāpiri tātou i te mau ’ōpani aua, i reira ’ua vai tātou i roto i te hau ’e te pe’ape’a ’ore, ’e ’ua pāruruhia tātou i roto i tō tātou ha’apūra’a iti i te mau mea nō te ao i rāpae.

’Ua hope taua tau ra. E’ita te mau papa’i, te mau ’ōpani, te mau aua ’e te mau ’ōpani aua o tō tātou mau fare e nehenehe fa’ahou e tāpe’a i te mani’ira’a ’ite-’ore-hia, mai roto mai i te ’itenati, te reni rorouira, te mau niuniu ’āfa’iafa’i, te natirara. E nehenehe tā rātou e tomo mai i roto i tō tātou mau fare na roto noa i te tahi mau patapatara’a pitopito.

’Aua’a a’e rā, ’ua fa’anaho te Fatu i te hō’ē rāve’a nō te tinai i te mani’ira’a mai o te ’ihimata’i ’ino o te nehenehe e fa’anevaneva ia tātou i te hōro’ara’a i te taime maita’i nō te pārahi i piha’i iho i te tahi e te tahi. ’Ua rave ’Oia i te reira na roto i te hōro’ara’a mai i te fa’anahora’a ’āpo’ora’a nō te ha’apa’ari, nō te pāruru, nō te tia’i ’e nō te aupuru i tō tātou mau aura’a faufa’a rahi.

E hina’aro rahi tō te tamari’i i te mau metua o te fa’aro’o ia rātou, ’e e nehenehe te ’āpo’ora’a ’utuāfare e hōro’a i te hō’ē taime i reira te mau melo o te ’utuāfare e nehenehe ai e ha’api’i i te haro’aro’a ’e i te here i te tahi e te tahi.

’Ua ha’api’i mai Alama ē, « E ui atu i te Fatu i te mau mea ato’a tā ’oe e rave ra, e nāna ho’i ’oe e arata’i i te maita’i ».³ ’Ia tītau ana’e tātou i te Fatu na roto i te pure ’ia pārahi mai i roto i tā tātou ’āpo’ora’a ’utuāfare, e ha’amaita’i te reira i tō tātou aura’a te tahi e te tahi. Na roto i te tauturu a te Metua i te ao ra ’e a tō tātou Fa’aora, e rahi atu tō tātou fa’aoroma’i, tō tātou aupuru, tō tātou huru tāvini, tō tātou huru fa’a’ore hapa ’e tō tātou haro’aro’a ’ia pure ana’e tātou nō te ani i te tauturu. Na roto i tā Raua tauturu, e nehenehe tātou e fa’ariro i tō tātou mau ’utuāfare ’ei ma’a tuha’a iti nō te ra’i i te fenua nei.

Hō’ē ’āpo’ora’a ’utuāfare i fa’ahōho’ahia i ni’a i te mau ’āpo’ora’a i te ra’i ra, ma te ’ī i te here o te Mesia, e ma te arata’ihia e te Vārua o te Fatu, e tauturu te reira ia tātou ’ia pāruru i tō tātou ’utuāfare i te mau mea fa’anevaneva e nehenehe e haru i tō tātou taime ’āmuira’a faufa’a rahi, ’e e pāruru ato’a ho’i ia tātou i te mau ’ati o te ao nei.

Mai te mea e, e ’āpitihia te reira i te pure, e fa’atae mai te ’āpo’ora’a ’utuāfare i te vārua o te Fa’aora, mai tei fafauhia mai : « I te vāhi e ’āmui ai e to’opiti e to’otoru ma tō’u nei i’oa, tei rotopū ato’a ïa vau ia rātou i reira ».⁴ Ia tītau ana’e ’outou i te Vārua o te Fatu ’ia pārahi mai i roto i tā ’outou mau ’āpo’ora’a ’utuāfare, e hōro’a mai te reira i te mau ha’amaita’ira’a e ’ore e nehenehe e fa’ata’ahia.

’Ei fa’ahope’ara’a, te tāparu nei au ia tātou ’ia ha’amana’o ē, mai te mea e fa’atupu-tāmau-hia te ’āpo’ora’a ’utuāfare, e tauturu te reira ia tātou ’ia ’ite ’oi’oi i te mau fifi o te ’utuāfare ’e ’ia fa’a’āfaro i te reira na mua a’e a riro mai ai ’ei fifi rahi ; e fa’atupu te mau ’āpo’ora’a i roto i te melo tāta’itahi o te ’utuāfare i te mana’o, e mea faufa’a ’oia ; e hau roa atu, e tauturu te reira ia tātou ’ia hau atu te manuia ’e te ’oa’oa i roto i tō tātou mau aura’a, i rotopū i te mau papa’i o tō tātou fare. ’Ia ha’amaita’i mai tō tātou Metua i te ao ra i tō tātou mau ’utuāfare ato’a ’ia ’āmui ana’e tātou i roto i te ’āpo’ora’a, o tā’u ïa pure haeha’a na roto i te i’oa o te Fatu o Iesu Mesia ra, ’āmene.