Cov Txiv Tsev
Kuv hais txog tej yam zoo uas cov txiv neej ua tau thaum lawv ua txiv neej lub luag hauj lwm siab tshaj plaws—kev ua ib tug txiv thiab kev ua txiv tsev.
Kuv hais txog cov txiv tsev. Cov txiv tsev yeej tseem ceeb kawg nyob hauv Vajtswv txoj hau kev zoo siab, thiab kuv xav tsa suab txhawb nqa cov uas siv zog ua txoj hauj lwm no kom zoo. Qhov uas kuv qhuas thiab txhawb nqa cov txiv tsev tsis txhais hais tias kuv saib tsis taus lwm tus. Kuv hais txog tej yam zoo uas cov txiv neej ua tau thaum lawv ua txiv neej lub luag hauj lwm siab tshaj plaws—kev ua ib tug txiv thiab kev ua txiv tsev.
David Blankenhorn, tus kws sau phau ntawv Fatherless America, tau hais tias: “Niaj hnub no, lub sawm fem Amelikas yeej sib faib thiab saib tsis taus kev ua txiv tsev. Ib txhia tsis nco qab txog kev ua txiv tsev. Kev ua txiv tsev yeej ua rau lwm tus tu siab. Muaj lwm tus, tsis hais ib feem ntawm cov kws kawm txog tsev neeg, uas tsis quav ntsej txog los yog ntxub kev ua txiv tsev. Muaj ntau tus ntxiv uas tsis tawm tsam kev ua txiv tsev, tiam sis lawv kuj tsis txhawb nqa thiab. Ntau tus neeg xav tias peb yuav tsum txhawb nqa cov txiv tsev, tiam sis ntseeg tias peb lub sawm fem yeej tsis kam los sis ua tsis taus.”1
Nyob hauv lub Koom Txoos no, peb ntseeg kev ua txiv tsev. Peb ntseeg tias tsim nyog uas “ib tug txiv neej xav txog nws tsev neeg ua ntej txhua yam.”2 Peb ntseeg tias “los ntawm lub tswv yim los saum ntuj los, cov txiv tsev yuav tsum kav lawv tej tsev neeg los ntawm kev hlub thiab kev ncaj ncees thiab lav ris npaj ua kom muaj tej yam uas lawv tsev neeg yuav tsum muaj kom thiaj ua neej tau thiab txais tau kev pov hwm rau lawv tsev neeg.”3 Peb ntseeg tias nyob rau hauv lawv tej luag hauj lwm rau lawv tsev neeg, “tej niam tsev txiv tsev yuav tsum sib pab xws li nkawd nyob sib txig.”4 Peb ntseeg tias peb tsis hais tshaj qhov tseeb, yeej pauv tsis tau cov txiv tsev.
Ib txhia pom tias kev ua txiv tsev yeej zoo rau peb lub sawm fem, yog ib qho uas ua rau cov txiv neej saib xyuas lawv cov me nyuam, thiab ua kom lawv ua pej xeem zoo thiab xav txog lwm tus tej kev xav tau, ntxiv “cov txiv tsev txoj kev tu me nyuam rau cov niam tsev txoj kev tu me nyuam. … Qhov tseem ceeb rau cov txiv neej yog kev ua cov txiv tsev. Qhov tseem ceeb rau cov me nyuam yog kom lawv muaj txiv. Qhov tseem ceeb rau lub sawm fem yog kom txhawb nqa cov txiv tsev.”5 Txawm tej yam no yeej muaj tseeb thiab tseem ceeb, peb paub tias kev ua txiv tsev tsis yog ib qho los ntawm peb lub sawm fem los sis kev hloov zuj zus. Lub luag hauj lwm ntawm ib tus txiv tsev yeej yog Vajtswv tsa uas pib nrog ib Leej Txiv Saum Ntuj Ceeb Tsheej, thiab nyob hauv lub ntiaj teb no, nrog Leej Txiv Adas.
Tus yam ntxwv zoo tag nrho txog kev ua txiv tsev yog peb Leej Txiv Saum Ntuj Ceeb Tsheej. Nws tus xeeb ceem thiab tej cwj pwm muaj xws li kev ua zoo ntau nplua mias thiab kev hlub zoo tag nrho. Nws txoj hauj lwm thiab lub yeeb koom yeej yog kev ua kom Nws cov me nyuam loj hlob, muaj kev zoo siab, thiab txoj sia nyob mus ib txhis.6 Cov txiv tsev nyob hauv lub ntiaj teb no mas lawv yeej piv tsis tau rau tus uas Muaj Yeeb Koob Nyob Saum Ntuj, tiam sis thaum lawv ua zoo npaum li lawv ua tau, lawv siv zog coj yam ntxwv zoo li Nws, thiab lawv ua Nws tej hauj lwm. Vajtswv tso siab rau lawv uas yog ib qho sam xeeb zoo kawg.
Rau cov txiv neej, kev ua txiv tsev ua rau peb paub tau peb tej kev qaug zog thiab paub qhov uas peb yuav tsum ua zoo dua. Yuav tsum ua kev txi kom ua ib tug txiv tsev, tiam sis yeej yog ib qho uas ua rau yus txaus siab heev, muaj kev xyiv fab heev. Thiab, tus yam ntxwv zoo tshaj plaws yeej yog peb Leej Txiv Saum Ntuj Ceeb Tsheej, tus uas hlub peb heev, Nws cov me nyuam ntsuj plig, Nws thiaj li txib Nws Tib Leeg Tub los kom cawm peb thiab muab kev tsa nto rau peb.7 Yexus hais tias, “Tus uas muaj kev hlub loj tshaj plaws yog tus uas zoo siab tuag theej nws cov phooj ywg.”8 Cov txiv tsev qhia tias lawv hlub npaum li ntawd thaum lawv ua neej niaj hnub, ua hauj lwm kom pab thiab txhawb nqa lawv tsev neeg.
Tej zaum txoj hauj lwm tseem ceeb ntawm ib tug txiv tsev yog kev ua kom nws cov me nyuam lub siab tig mus rau lawv Leej Txiv Saum Ntuj Ceeb Tsheej. Tus txiv tsev uas coj yam ntxwv thiab hais lus zoo kom qhia tias kev hwm Vajtswv zoo li cas niaj hnub, tus txiv tsev ntawd tau ua rau nws cov me nyuam paub tias kev kaj siab lug nyob hauv lub neej no thiab txoj sia nyob mus ib txhis hauv lub neej tom ntej yuav zoo li cas.9 Ib leej txiv uas nyeem vaj lug kub rau nws cov me nyuam ua rau lawv paub tias tus Tswv lub suab zoo li cas.10
Peb nrhiav tau ib co lus qhia nyob hauv vaj lug kub uas pheej qhia txog cov niam tsev txiv tsev txoj kev lav ris qhia lawv cov me nyuam.
Thiab, vim cov niam tsev txiv tsev muaj me nyuam nyob hauv Xi-oos, los sis nyob hauv Xi-oos tej ceg txheem ntseeg, uas tsis qhia lawv kom lawv to taub txog kev hloov siab lees txim, kev ntseeg Yexus Khetos Vajtswv Leej Tub, thiab kev cai raus dej thiab lub txiaj ntsim Vaj Ntsuj Plig Dawb Huv los ntawm kev tso tes rau saum taub hau, thaum muaj yim xyoo, ces kev txhaum ntawd nyob ntawm niam txiv lub taub hau xwb. …
“Thiab lawv kuj yuav qhia lawv cov me nyuam thov Vajtswv, thiab taug kev ncaj rau ntawm tus Tswv.11
Thaum xyoo 1833, tus Tswv cem Yauxej Xamiv, Sidney Rigdon, thiab Frederick G. Williams, peb tug nyob hauv Thawj Pawg Thawj Tswj Hwm, vim lawv tsis ua lawv lub luag hauj lwm qhia lawv cov me nyuam. Nws hais rau ib tug hais tias, lawv tsis tau qhia lawv qhov kaj thiab qhov tseeb rau lawv cov me nyuam, raws li cov lus txib; thiab tus phem muaj hwj chim kov yeej lawv, thiab qhov no yog qhov uas tsim txom lawv.12
Cov txiv tsev yuav tsum qhia Vajtswv txoj kev cai thiab tej hauj lwm rau txhua tiam neeg. Raws li tus kws sau nkauj hais tias,
“Vajtswv muab kev cai cob rau cov Yixayees; thiab muab kaum nqe kev cai cob rau Yakhauj cov xeeb ntxwv. Nws sam hwm kom peb cov yawg koob muab nws tej kev cai qhia lawv cov me nyuam:
“Kom tej xeeb ntxwv yav tom ntej thiaj tau tej ntawd los rau lawv kawm, thiab muab qhia rau lawv cov me nyuam mus ntxiv:
“Ua li no lawv thiaj yuav cia siab rau Vajtswv thiab nco ntsoov tej hauj lwm uas nws tau ua los lawm, thiab niaj hnub coj raws li Vajtswv tej lus [txib].”13
Kev qhia txoj moo zoo yeej yog ib lub luag hauj lwm ntawm cov txiv tsev thiab cov niam tsev, tiam sis tus Tswv qhia meej hais tias Nws xav kom cov txiv tsev ua tus thawj coj kom qhia tias yog ib qho tseem ceeb heev. (Thiab cia li nco ntsoov tias kev lam sib tham, kev ua hauj lwm thiab ua si ua ke, thiab kev mloog kuj yog tej txoj kev tseem ceeb qhia tau me nyuam.) Tus Tswv cia siab tias cov txiv tsev yuav pab qhia lawv cov me nyuam, thiab cov me nyuam xav tau ib tug yam ntxwv.
Kuv tus kheej muaj ib tus txiv tsev uas coj yam ntxwv zoo. Kuv nco qab tias thaum kuv yog ib tug tub hluas uas muaj 12 xyoos, kuv txiv sib tw seb puas ua tus neeg hauv lub nroog pawg sab laj nyob hauv peb zej zog me me. Nws tsis tau ua kev sib tw ua nom loj heev—kuv tsuas nco qab tias kuv txiv hais kom kuv thiab kuv cov kwv tij mus faib cov ntawv mus ib lub tsev dhau ib lub tsev, hais kom tib neeg pov ntawv rau Paul Christofferson. Kuv muab ntawv rau ob peb tug neeg laus uas hais tias Paul yog ib tug neeg zoo thiab ncaj thiab lawv yeej yuav pov ntawv rau nws. Vim kuv yog ib tug tub hluas ua rau kuv zoo siab kawg vim nws yog kuv txiv. Ua rau kuv tso siab thiab xav coj raws li nws. Nws tsis yog ib tug neeg zoo tag nrho—tsis muaj leej twg zoo li ntawd—tiam sis nws yeej ncaj nees thiab zoo thiab ib tug uas coj yam ntxwv zoo rau nws tus tub.
Kev qhuab ntuas thiab qhuab qhia yeej yog ib fem ntawm kev qhia. Povlauj hais tias, “Rau qhov tus Tswv qhuab ntuas txhua tus uas nws hlub.”14 Tiam sis thaum ib tug txiv tsev yuav tsum ceev faj thaum nws qhuab ntuas vim nws yuav tsum tsis txhob ua ib yam dab tsi uas zoo li kev tsim txom, vim qhov ntawd txhaum cai. Thaum ib tug txiv tsev qhuab ntuas, nws yuav tsum muaj kev hlub thiab coj raws li tus Vaj Ntsuj Plig Dawb Huv qhia:
Nco qab ntsoov yuav tsum muab lawv cem raws caij raws nyoog, thiab piav meej meej seb lawv ua txhaum li cas raws li tus Vaj Ntsuj Plig Dawb Huv tshoov yus lub siab, thiab ces tom qab ntawd haj yam muab kev hlub rau tus neeg uas yus twb cem lawm, xwv kom lawv tsis txhob xav yuam kev hais tias yus yog lawv ib tug yeeb ncuab;
Kom nws yuav paub hais tias koj txoj kev rau siab ntseeg muaj zog dua tej saw ntawm txoj kev tuag.15
Kev qhuab ntuas raws li Vajtswv ua tsis yog kev rau txim tiam sis yog kev pab ib tug uas yus hlub kom tswj hwm tau nws tus kheej.
Tus Tswv hais tias, txhua tus me nyuam muaj cai kom lawv niam thiab txiv txhawb yug lawv kom txog thaum lawv muaj hnub nyoog tso.16 Kev ua hauj lwm tau nyiaj txiag yeej yog ib qho zoo. Kev ua hauj lwm rau yus tsev neeg, txawm yog yuav tsum siv sij hawm tsis nrog tsev neeg, yeej yog ib qho uas cov txiv tsev zoo yuav ua. “Kev ua hauj lwm thiab tsev neeg yeej sib tshooj.”17 Qhov no tsis txhais hais tias yuav tso cai rau ib tug txiv neej uas tsis saib xyuas nws tsev neeg kom ua tau hauj lwm los sis nws tsis kam siv zog ua hauj lwm thiab muab kev lav ris no rau lwm tus. Raws li tus Vaj Ntxwv Npeyamis hais tias:
“Nej yuav tsis cia kom nej tej me nyuam raug tshaib plab, los sis liab qab; thiab nej yuav tsis cia kom lawv ua txhaum Vajtswv tej kev cai, thiab tsis sib ntau thiab tsis sib ceg nrog lwm tus. …
“Tiam sis nej yuav qhia lawv taug hauv tej kev tseeb thiab kev tiag tiag; nej yuav qhia kom lawv ib leeg hlub ib leeg, thiab ib leeg pab ib leeg.”18
Peb paub tias cov txiv neej nyuaj siab npaum li cas thaum lawv nrhiav tsis tau tej hauj lwm ua kom pub lawv tsev neeg muaj noj muaj haus. Yeej tsis tas txaj muag yog yus ua tsis tau tus txiv tsev tej luag hauj lwm thaum ib lub sij hawm zoo li ntawd yog yus twb ua txhua yam yus ua tau. “Tej zaum kev mob nkeeg, kev tuag, los yog lwm yam yuav ntxim ua txawv tej lus no. Thaum twg ib tse neeg xav tau kev pab nws tsim nyog tej kwv tij neej tsa cev tes mus pab thiab.”19
Kev hlub nws tus poj niam—thiab kev qhia txog txoj kev hlub ntawd—yeej yog ob qho zoo tshaj plaws uas ib tug txiv tsev ua tau rau nws cov me nyuam. Qhov no txhawb nqa kev sib yuav ntawd thiab rov qab qhia tias kev sib yuav yog lub hauv paus ntawm nkawd tsev neeg thiab kev nyab xeeb.
Cov txiv neej ib txhia yog cov txiv tshiab los yog cov txiv qhuav. Lawv feem ntau siv zog thiab ua zoo npaum li lawv ua tau txawm yog ib lub luag hauj lwm nyuaj heev. Peb qhuas cov uas ua txhua yam lawv ua tau kom hlub, ua siab ntev, thiab siv lawv lub sij hawm kom pab lawv tsev neeg. Yeej yuav tsum nco ntsoov tias Vajtswv Nws tus Kheej twb tso siab rau ib tug txiv qhuav kom saib xyuas Nws Tib Leeg Tub. Nyaj qhov uas Yexus “loj hlob zoo, muaj tswv yim, nws ua haum Vajtswv siab thiab haum neeg siab”20 ib feem yog vim muaj Yauxej.
Tu siab uas tej tug me nyuam tsis muaj txiv nrog lawv nyob vim lawv txiv twb tso lub ntiaj teb tseg, tau tso lawv tseg, los sis sib nrauj. Ib txhia tej zaum muaj txiv uas nyob tiam sis nws tsis muaj siab xav pab los sis tsis nco txog lawv. Peb hais kom txhua tus txiv tsev ua zoo dua thiab ua txiv tsev zoo dua. Peb hais kom tej koom haum uas tshaj tawm yeeb yam, ob peb zaug xwb ua yeeb yam txog cov txiv tsev uas rau siab thiab txawj hlub lawv tus poj niam thiab muaj kev txawj ntse coj lawv cov me nyuam kev, thiab tsis tshaj tawm txog cov txiv tsev uas ruam thiab txawv txawv, los yog “cov neeg uas tsim teeb meem,” xws li pheej ua.
Peb hais rau cov me nyuam uas muaj kev kub ntxhov hauv lawv tsev neeg, hais tias, nej yeej tsis qis dua li lwm tus vim muaj ib tsev neeg zoo li ntawd. Tej lub sij hawm qhov uas nej muaj teeb meem qhia tias tus Tswv tso siab rau nej. Nws yuav pab tau nej, ncaj qha thiab dhau los ntawm lwm tus, kom nej kov yeej nej tej teeb meem. Nej yeej rais los ua tau ib tiam neeg, tej zaum nej yog thawj tus hauv nej tsev neeg, uas yuav pib kom coj raws li Vajtswv tau pom zoo rau tsev neeg ua kom tej tiam neeg tom ntej tau koob hmoov.
Kuv hais rau cov tub hluas, vim peb paub tias nej yuav muaj ib lub luag hauj lwm kom pub nej tsev neeg muaj noj muaj haus thiab pov hwm lawv, hais tias cia li npaj tam sim no rau siab kawm ntawv thiab npaj kawm ua hauj lwm. Kev kawm ntawv, txawm nyob hauv tsev university, tsev kawm ntawv technical, kev kawm ua hauj lwm, los yog kev kawm zoo li ntawd, yeej yog qhov tseem ceeb kom kawm tej txuj ci thiab tej cwj pwm uas nej yuav tsum muaj. Cia li siv sij hawm koom nrog lwm tus neeg txawm muaj hnub nyoog li cas los xij, tsis hais cov me nyuam, thiab kawm yuav ua li cas kom sib raug zoo nrog lwm tus. Qhov no txhais hais tias yuav tsum sib tham tim ntsej tim muag thiab tej lub sij hawm ua tej yam ua ke, tsis yog xyaum ntaus ntawv text xwb. Ua nej lub neej xwv kom nej cov txiv neej yuav coj kev dawb huv rau nej txoj kev sib yuav thiab rau nej cov me nyuam.
Rau tiam neeg uas tab tom loj hlob tuaj, txawm nej xav tias nej txiv yog ib tug zoo, los sis zoo dua los sis zoo tshaj los (thiab kuv paub tias nej yuav xav zoo dua txog nej txiv thaum nej laus zog thiab muaj tswv yim zog), cia li ua lub neej zoo kom hwm nws thiab nej niam. Cia li nco ntsoov txog ib leej txiv txoj kev cia siab uas Yauhas hais txog hais tias: “Tsis muaj ib yam dab tsi ua rau kuv zoo siab tshaj qhov uas kuv hnov hais tias kuv cov me nyuam ua lawv lub neej raws li qhov tseeb.”21 Nej txoj kev ncaj ncees yog lub sam xeeb zoo tshaj plaws uas ib leej txiv txais tau.
Rau kuv cov kwv tij, cov txiv tsev ntawm lub Koom Txoos no, kuv hais tias, kuv paub nej kheev lam nej yog cov txiv tsev zoo tag nrho. Kuv yeej kheev lam kuv yog thiab. Txawm li ntawd los, txawm peb tsis zoo tag nrho, thov kom peb cia li mus tom ntej. Niaj hnub no nyob hauv peb kab lig kev cai, cia peb muab tej kev xav txog peb tus kheej xwb tso tseg thiab cia li xav txog lwm tus txoj kev zoo siab thiab kev nyob zoo. Txawm muaj tej yam peb ua tsis taus los, peb Leej Txiv Saum Ntuj Ceeb Tsheej yuav txhawb nqa peb thiab ua kom peb tej hauj lwm pab tau lwm tus. Ib zaj dab neeg nyob hauv phau New Era txhawb kuv lub siab ob peb xyoo tas los. Tus uas sau zaj ntawd hais tias:
“Thaum kuv tseem hluas, peb tsev neeg nyob hauv ib lub tsev kem uas muaj ib hoob pw xwb nyob saum txheej ob. Kuv pw saum lub sofa nyob hauv chav nyob. …
“Kuv txiv, uas yog ib tug kws nchuav hlau, txhua hnub nws tawm lub tsev thaum ntxov mus ua hauj lwm. Txhua tag kis nws yuav … ntsaws cov pam puag ncig kuv thiab nres ib me pliag. Kuv tsaug zog tsis tsaus zog thaum kuv paub tias kuv txiv sawv ntawm lub sofa ntsia kuv. Thaum kuv maj mam tsim los, kuv txaj muag vim nws nyob ntawd. Kuv ua txuj tsaug zog. … Ces kuv saib tias thaum nws sawv ntawm kuv lub txaj nws thov Vajtswv kawg siab kawg ntsws—kom pab kuv.
“Txhua tag kis kuv txiv thov Vajtswv pab kuv. Nws thov Vajtwv kom kuv yuav muaj ib hnub zoo, kuv yuav nyab xeeb, thiab kuv yuav kawm thiab npaj rau yav tom ntej. Thiab vim nws yuav tsis nrog kuv nyob mus txog thaum tsaus ntuj, nws tau thov Vajtswv rau kuv cov xib hwb thiab cov phooj ywg uas yuav nrog kuv nyob hnub ntawd. …
“Thaum xub thawj, kuv tsis tshua to taub hais tias kuv txiv ua dab tsi txhua tag kis thaum nws thov Vajtswv pab kuv. Tiam sis thaum kuv laus zuj zus, kuv tau paub tias nws hlub kuv thiab xav paub txog kuv thiab txhua yam kuv ua. Nov yog kev nco qab uas kuv nyiam tshaj. Ntau xyoo tom qab ntawd, tom qab kuv yuav poj niam, muaj kuv cov me nyuam, thiab yuav mus rau hauv lawv chav thaum lawv tsaug zog thiab thov Vajtswv pab lawv kuv thiaj to taub zoo hais tias kuv txiv xav li cas txog kuv.”22
Amas ua tim khawv rau nws tus tub hais tias:
“Saib seb, kuv hais rau koj, tias [Khetos] twb yog tus uas yuav los tiag tiag … ; muaj tseeb tiag, nws yuav los tshaj tawm txoj moo zoo txog txoj kev cawm seej rau nws cov neeg.
“Thiab nim no, kuv tus me tub, qhov no yog txoj kev qhuab qhia txoj moo zoo uas koj tau raug hu, mus tshaj tawm tej moo zoo no mus rau cov neeg no kom kho npaj lawv tej siab; los sis kom txoj kev cawm seej yuav los rau lawv, xwv kom lawv yuav npaj lawv tej me nyuam tej siab los hnov txoj lus nyob rau lub sij hawm thaum nws los.”23
Li ntawd yog cov txiv tsev txoj hauj lwm qhuab qhia niaj hnub no. Thov Vajtswv foom koob hmoov thiab pab lawv ua tau li ntawd, los ntawm Yexus Khetos lub npe, amees.