Pahpa kan

Rahn wet I pahn koasoia duwen pahpa kan. Pahpa kan me wia poahsoanpen nan pilahn en peren soutuk, oh I men kangoange irail kan me nanantiong en kapwaiahda pwukoa wet. Pwehn kepinga oh koangoange pwukoahn pahpa oh irail pahpa kan e sohte pahn wia mehn kanameneki de kasohwe emenemen. Rahn wet I men kosoiahte kamwahu kan me ohlakan kak wia nan arail pwukoa keieu laud—ohl pwopwoud oh pahpa.

David Blankenhorn, me ntingihda Fatherless America, kasawiadahr me: “Rahnwet, mehn America kan kohpesengher oh sohte nohn wehwehki dahkot pwukoahn pahpa. Ekei aramas pil solahr kak taman. A ekei kin insensuedkihla. A ekei, me iangahki irail me malaulau nan peneinei me semenialahr kan kin pohnsehsehla oh sohla katapaniki. Tohto me sohte nohn uhweng, oh de pil men ngoahngki en wia pwukoah wet . Me tohto me men kitail en kamwakid pwukoah wet, ahpw kamehlelehier me atail wasahn kousoan akan mweihn solahr pahn kak de men wia pwukoah wet.”¹

Nan Mwomwohdiso wet, kitail kamehlele pahpa kan. Kitail kamehlele me “ohl unsek men kin kesempwaliki ah peneinei.”² Kitail kamehlele me “sang ni kosondi sarawi, pahpa kan kin kaunda arail peneinei kan ki limpoak oh pwung oh kin pwukoahki patohwanda anahn en mour oh perepen arail peneinei kan.”³ Kitail kamehlele me nan arail pwukoahn peneinei kan, “pahpa oh nohno kan anahne sawaspene ni arail wia pwopwoud pahrek ehu.”⁴ Kitail kamehlele me pahpa kan inenen katapan, sohte mehkot pahrekieng irail oh irail sohte kak welialihda.

Ekei kin kilang kamwauh kan en pwukoahn pahpa ni oaralap, me iei mehkot ehu me kin kahrehda ohl akan kin ehuieng neirail serih kan, koangoangoahkin irail en wia tohn wehi mwahu kei oh kin ese medewe en mehteikan anahn, oh iei me pil patehng “kekeirdahn serih kan sang rehn arail nohno iangahki arail pahpa kan. … Ni mwotomwot, ohl poahsoanda pwe irail en wia pahpa kei. Serihkan en mie arail pahpa kan. Wasahn kouson kan en audauwudkihda pahpa kan.”⁵ Detehn madmadau pwukat me mehlel oh kesempwal, kitail esehier me pwukoahn pahpa inenen kesempwal sang dahme kitail peihn wiahda de sang ni dipisou teikan en sampah. Pwukoahn pahpa men iei me wia tepin ansou, tepsang rehn Sahm Nanleng oh, nan mour wet, iei Pahpa Adam.

Kawehwe sarawi me keieu pahrekieng pwukoahn pahpa iei Sahm Nanleng. Sapwellime tiahk oh wiewia kan me iangahki wiewia mwahu tohto oh limpoak unsek. Sapwellime doadoahk oh kilohri iei me iangahki kekeihrda, popohl, oh mour soutuk en Sapwellime serihkan.⁶ Pahpa kan nan sampa ohla wet sohte kak kadeihkada mehkot me pahn pahrekiong Mwonsapwo me ketket wasa Ile, ahpw ni arail kak koaros, irail wie nanantiong en alasang Ih, oh wie doadoahk nan Sapwellime doadoahk. Irail wia aramas wahu kei sang ni mehlel me irail ahniki.

Ong ohl, pwukoahn pahpa kasalehiong kitail atail luwet kan oh anahnepen kamwahula. Pwukoahn pahpa kin anahne tohmetei, ahpw e wia mwekid ehu me sohte pahrekieng peren de pil popohl. Pwehn pil kapwurehieng, inondehn mehn kairoir iei Sahm Nanleng, me ketin poakoahng kitail, Sapwellime seri ngehn akan, me E ketkihdo Sapwellime Ieroso pwe kitail en komourla oh kesepwilda.⁷Sises mahsani, “Limpoak me keieu laud sang met, iei ma ohl emen pahn tohnmeteikihla ah mour pwehki kompoakepah kan.”⁸Pahpa kan kasalehda soangen limpoako ni arail kin pwilikihdi arail mour rahn kaoros, wie doadoahk oh apwalih arail peneinei kan.

Ele ihme keieu kesempwal nan eh pahpao ah doadoahk iei en kin wekidala mohngiong en nah serihkan ong Sahm Nanleng. Ma sang ni ah karasaras oh ni koasoai me pahpa men kak kasalehda duwen pwoson Koht nan mour en ehu ehu rahn akan, pahpao pahn kiengehr nah serihkan kih en ahneki meleilei nan mour wet oh mour soutuk nan mour kohkohdo.⁹ Pahpa men me kin wadekehng pwuhk sarawi nah serihkan pahn kiheng irail mahsen en Kauno.¹⁰

Kitail kin kalapw diar nan pwuhk sarawi kan duwen kesemwpwalpen en pahpa/nohno pwukoahn kasukuhli neirail serihkan:

“Oh pil ehu, ni pahpa/nohno kan arail nainiki serihkan nan Zion, de nan stake kan me kokoudahr, me sohte padahkieng irail en wehwehkihla padahk en koluhla, pwoson Krais Sapwellimen Koht ieias, oh pil pepdais oh kisakis en Ngehn Sarawi sang ni pwildien pehkan, ni arail sounpar waluh, ih irail pahpa oh nohno kan me pahn pwukoahki dihp wet. …

“Oh irail pahn pil padahkieng neirail serihkan en kin kapakap, oh wiewia pwung mwohn Kauno.”¹¹

Nan1833, Kauno panawih Joseph Smith, Sidney Rigdon, oh Frederick G. Williams, tohn Presidensi Keieu, pwehki e sohte itar arail pwukoahn kaskuhli neirail serihkan. E ahpw mahsaniong emen irail: “Komwi saikinte padahkiong noumw serihkan duwen marain oh mehlel, nin duwen kosonned akan; oh me mwalauno tungoalenikier manamano, oh met, pahn kodahng pohmwi, oh ih met me kahrepen ahmw kahpwal akan.”¹²

Pahpa kan en kin padahngki kosonned en Koht oh kin doadoahngki nan ereihn dih kapw kan me pahn kohdo mwuhr kan. Duwehte me Psalmist kalohkihda:

“E ahpw wiahda kadehdehn Seikop, oh idiada kosonned ehu nan Israel,, iei me e kaweidki atail pahpa kahlapoko, me irail en kaweidki neirail seri kan duwen irail:

“Pwe dih en mwuhr en kak wehwehki, mehlel serihkan me pahn ipwidi mwuhr kan; [me] pahn uhd laudla oh padahkieng neirail serihkan:

“Pwe irail en kak koapwoaroapwoarki Koht, oh sohte manokehla dahme Koht ketin wiadahr, ahpw irail pahn kin kapwaiahda sapwellime kosonned akan ansou koaros.”¹³

Mehlel me pwukoa en padahngki rongamwahuo iei pwukoah ehu me pahpa oh nohno pahn kin ehukipene, ahpw kupwuren Kauno me inenen sansal me E ketin kasik me pahpa kan me pahn kahluwa doadoahk kesempwal wet. (Oh kitail en tamataman me koasoakoasoi peneh kan, doadoahk oh mwadong pene, oh kin rongorong wia kaskuhl kesemwpwal kei.) Kauno ketin kasik pahpa kan en sewese kakairada neirail serihkan, oh mehn kahlmengi en anahne mie.

I paiamwahuki ahi pahpa ah karasaras mwahu ong ie. I tamanda ni ansou me Isounpar 12, ahi pahpau pahn iang usuhsehng kaunsel en aht kisin kahnihmwo . E sohte wia lapalahn kampein—ihte me I taman Pahpa kiong riei pwutang kan oh ngehi doaropwe kei me se kihseli ong ihmw koaros, pekpeki rehn aramas akan en usada Paul Christofferson. Mie aramas mah kei me I kiong irail doaropwehko oh irail koasoia me Paul wia ohl mwahu oh mehlel men oh irail sohte ahneki kahpwal en usada ih. Ahi mohngiong pwulopwulet apw uhkihda ahi kalahkihda ahi pahpau. E kieng ie likilik oh ehu anahn ien idawehn oh keid wasa me e kekeid ie. E sohte unsek—sohte mehmen unsek—ahpw e wia aramas inen oh mwahu oh wia ehu mehn karasaras mwahu ong nah pwutak.

Peneu oh kapwungala wia kisehn kaskuhl. Duwehte dahme Paul koasoia, “Pwe Kauno kin ketin kapwungala me e kin ketin loalloale.”¹⁴ Pwehki ni ansou en peneu pahpa men anahne wia ni kenenei, pwe e dehr lelehng nan kahpwal en wiakau me pahn sohte kak en kadehdehda. Ni ansou me pahpa men pahn kin kihda kaweid en kapwungala, en kin poahsoankihda limpoak, oh kaweid en Ngehn Sarawi:

“Mwadangete koasoia ni ngilekeng, oh pehmada Ngehn Sarawi oh mwuhr ahpw kasalehda pepehm en limpoak laud ong ih, ihte e pahn kak en kepingahkin komwi en wia ah imwintihti;

“Pwe en kak wehwehki me amwail pwoson kehlail sang sahl en mehla.”¹⁵

Wiepenpeneu iei e sohte wiawi pwehn wia me kalokolok ahpw e wia mehn sawas ong kempoakepahtail kan en kak koahiekla.

Kauno mahsaniher me “seri koaros kin anahne epwel sang arail pahpa/nohno lao irail kak pein apwali peihn irail.”¹⁶ Apwalih aramas wia doadoahk sarawi ehu. Pwehn kak apwalih en emen peneinei, itarete ah mie anahneperail en dohsang peneinei nan ereihn ansou kei, e sohte uhwongada pwukoahn pahpa men—iei me poahsoanehda pahpa men ah mwahu. “Doadoahk oh peneinei kin posokehda wasahte kis.”¹⁷ Met, ni mehlel, e sohte wehwehki me ohl emen kak pohnsehsehla ah peneinei pwehki ah doadoahk de, ma mehmen me sohte pahn doadoahngki peihn ih oh pereniki kamwakid ah pwukoah kan ong emen tohrohr. . Iren mahsenakan en Nanmwarki Benjamin: :

“ Oh kumwail sohte pahn kin mweidohng noumwail serihkan en men mwengehda, de kilisouda; de pil mweidohng irail en kauwehla kosonned en Koht akan, oh pei oh akamai ong emenemen, …

“Ahpw kumwail pahn padahkihong irail en kin weid nan ahl akan me pwung oh mehlel; kumwail en kin padahkihong irail en poakehng emenemen, oh en kin papah emenemen irail.”¹⁸

Se pohnese kahpwal en ohl akan me sohte kak diar ahl oh wiepen arail en kak apwaliada arail peneinei kan. E sohte kin kanamenek ong irail kan me wiewia uwen arail kak koaros ahpw ekei ansou kin sohte kak wiahda arail pwukoahn pahpa kan. “Soumwahu, mehla, de kemwekid teikan kak kahrehda en emen emen kahpwal. Peneinei laud teikan anahne patohwanda sawas ansou me kahpwal kin pwarada.”¹⁹

Poakehng en nah serihkan nohno—oh kasalehda limpoako—wia ire keieu mwahu riau me emen pahpa kak wiahiong nah serihkan. Met me kamehlelehla oh kakehlailiala me pwopwoud iei me wia poahsoan en mour oh sonamwahu en peneinei.

Ekei ohl kin wia pahpa kei me sohte arail pwoud, wia pahpahn seri kei me re kin pwokada, de wia pahpahn seri kei me kaidehn uhdahn neirail. Me tohto irail me kin nanantiong oh wia uwen arail kak koaros nan pwukoah apwal wet. Se wauhniki irail me kin wiewia uwen arail kak koaros ni limpoak, kanengamah, oh tohnmetei pwehn apwalih anahn en emen emen oh peneinei. E konehng en sansal me peihn Koht ketin ketkihda Sapwellime Ieroso ong ohl emen me kaidehn uhdahn sapwellime pahpa. Mehlel ekei kaping anahne kohieng Joseph ni eh kakairda Sises, E ketin “kekeirda oh kupwurokongla, oh ketin masamasala mwohn Koht oh aramas akan.”²⁰

Poakehla, pwehki mehla, lekidekla, de mweipeseng, kahrehda sohte en ekei serikan pahpa me kin koukouson rehrail. Ekei seri mweihn mie arail pahpa kan me kin mihmi rehrail ahpw arail madmadau mihmi ekis wasa oh irail sohte kin tehk oh sewese serihkan. Se eker pahpa koaros en nantieng wia mwahu oh en mwahusang mahs. Se eker palien pakaihr oh wasahn kemweiht kan, en kin kasalehda pahpa kan me kin poadidi oh poakehng arail pwoud kan ni mehlel oh kaweid neirail serihkan, iei me pahn mwauhsang en wia mwomwen aramas pweipwei oh mwomwen manga, de “irail me kin kalapw wiahda kahpwal,” me pahpa kan kin kalapw kasalehda.

Ong serihkan me arail peneinei mihmi nan kahpwal, se koasoaia, me peihn kumwail sohte wia seri mwahl kei. Kahpwal kan, ekei ansou, kin kasalehda en Kauno likilik rehmwail. E kak sewese kumwail, sang ni Eh pahn peihn kaweid kumwail de ni Ah pahn doadoahngki mehteikan, pwehn sewesei kumwail ong dahme kumwail pahn sohpai ih. Kumwail kak wiahla dih, ele keieun dih nan amwail peneinei, me ale popohl oh kosonndi sarawi me Koht ketin kasarawiala ong peneinei en pweida mehlel oh kapaiada dih en mwuhr kan koaros mwurumwail.

Ong mwahnakapw kan, ni amwail wehwehkier me kumwail pahn pwukoahki epwel oh perehrehn peneinei, se nda, onopada met ni amwail pahn nantiong amwail sukuhl oh pilpilahne amwail pahn kalaude amwail sukuhl. Kaskuhl, ma nan university, sukuhl en doadoahk, kaiahn en doadoahk de ehu pirokrahm tohrohr, me wia kih en kakairda koahiek kan me kumwail anahne. Isaniki ansou mwahu en patehng aramas en dih koaros, iangahki serihkan, oh sukuhlki mwomwen kauwada ehupene ehu me kehlail oh katapan. Met wehwehki tuhong oh kin koasoaiong aramas oh ekei ansou wiapene mehkot, kaidehnte ken samaniala pekpekeder kosoi nan cel fohn. Momourki mour ehu me ni amwail wiahla ohl kumwail pahn kapidolong mour mwakelekel nan amwail pwopwoud oh ong noumwail serihkan.

Ong dih koaros me kohkohda met, se nda, ni amwail pahn teneki amwail pahpa ma e mwahu-mwahusang-inenen mwahu (oh I kasik me amwail teneko pahn kin kohda ni amwail wie mahmahla oh marainla), kumwail anahne wauneki ih oh amwail nohno ki mwomwen amwail mour. Tamataman en emen pahpao ah ouraman me Sohn kosoia, “Sohte me I perenki sang ei rong me nei serihkan kin momourki mour mehlel.”²¹ Amwail wiewia mehlel kan me wia kawahu keieu laud me emen pahpa kak ahniki.

Ong riei ohloko, pahpa kan nan Mwomwohdiso wet, I patohwan, I ese me kumwail kin mentehno wia pahpa unsek men. I ese pwe I pil men duwehte mwo. Itarete, atail souitar akan, kitail en wenla mwowe. Kitail pwilikihdi lamalam likamw kan en mwehi kiewek wet oh medewe mahs en mehteikan arail popohl oh nsenamwahu. Mehlel mendahte atail souitar akan, Samatail Nanleng pahn kalaudehla oh kiheng wahn atail doadoahk kan. Ahi lamalam kehlailkihda kosoi pwoat me pwarada nanNew Era nan pahr me I wiahla emen tohn Kaun Lapalap en Mwomwohdiso. Soun ntingo apw koasoaiada mepwukat:

“Ansou me I pwulepwulo, aht peneinei kin koukouson nan ehu kisin pere pohn posoke riau. I kin meir pohn sehr ehu nan perehn kommolo. …

“Ahi pahpau, wia soun sukmete men, kin sankasang ni ihmwo rahn koaros. Ni menseng koaros e kin … pwain iehdi mwahu oh kin uhkihdi minit ehu. I kin mwur kekehn wasa ansou me ahi pahpau kin keskesihnen limwahn sehro, kilekilang ie. Ni ei wie wawaida, I kin namenengkihda ahi kilang ih wasao. I kin song mwomwehda me I memeihr. … I diarada me ni eh wie keskesihnen limwahn ahi pehto e kin wie kapakap ki uwen ah kak koaros oh lamalam—ong ie.

“Menseng koaros ahi papaho kin kapakap kin ie. E kin kapakapki ien ahneki rahn kaselel, pwe ien kak nsenamwahu, oh pwe ien pil kak esehla oh kaunopehng mour me kohkohdo kan. Oh pwehki e sohte kak mihmi rehi lel ni soutik, e kin kapakapki ahi sounpadahk kan oh kempoakepahi kan me I pahn ieiang irail rahno. …

“Ni tapio, I sohte uhdahn wehwehki dahme ahi papah kin wiewia ni menseng kan ni eh kin wie kapakap kin ie. Ahpw ni ahi wie mahmahla, I diarada uwen ah limpoak oh nseno kin ie oh mehkoaros me I kin wiewia. Met wia ahi mehn kataman me I kin pereniki. Mwurin sounpar kei, mwurin ahi pwopwoudehr, nainkihda pein nei seri, oh kin pidelong nan arail perehkan ansou me irail meirehr oh kapakap kin irail iapw wehwehkihla mehlel duwen en ahi pahpa ah pepehm ong ie.”²²

Alma kadehde ong nah pwutak:

“Kilang I ndahiong uhk me [Krais] uhdahn pahn ketido…. ; ehi e ketidohng kasalehda rong kaperen en komour ohng sapwellime aramas akan.

“Oh met, nei pwutak, iei met doadoahk me ke lukodohngehr, pwe en kasalehiong aramas pwukat rohng kaperen pwukat, pwe en kin kaunopada arail lamalam; de ehu … pwe irail en kak kaunopada medemedewehn neirail serihkan en rong mahseno ni ansou me e pahn ketido,”²³

Iei en pahpa kan arail doadoahk rahn wet. Koht en kapaiahda oh kapahrekirail ehng, ni mwaren Sises Krais, amen.