2010–2019
O Tamā
Aperila 2016


O Tamā

Ou te taulai atu i le asō i mea lelei e mafai ona faia e alii i matafaioi faatamatane aupito silisili—tane ma le tamā.

Ou te talanoa atu i le asō e uiga i tamā. O tamā e taua tele i le fuafuaga paia o le fiafia, ma ou te faamalosiau atu ia i latou o e o taumafai ina ia faataunuuina lelei lena valaauga. O le faamalo ma le faamalosiau atu i tulaga faatamā ma tamā e le faapea e faamaasiasia ai pe faaitiitia ai le taua o soo se tasi. O loo ou taulai atu lava i le asō i mea lelei e mafai ona faia e alii i matafaioi faatamatane aupito silisili—tane ma le tamā.

Na matauina e David Blankenhorn, o le tusitala o le Fatherless America, faapea: “Ua vaeluaina ma ua eseese lagona o tagata Amerika e uiga i le manatu o le tulaga faatamā. O nisi o tagata e le o manatuaina. O nisi ua tiga i ai. O nisi, e aofia ai le toatele nai lo ni nai sikola e tusitusi e uiga i aiga, e le ano i ai pe le fiafia i ai. O le toatele o isi e le o matua tetee i ai, pe tautino atu foi i ai. O le toatele o tagata e moomoo maimau pe ana mafai ona tatou galulue i ai, ae e talitonu ua le o toe mafai e o tatou tagata ona faia i ai se mea.”1

Ata
Matou te talitonu i tamā.
Ata
O tamā e pulefaamalumalu i le alofa ma le amiotonu.

I le avea ai ma se Ekalesia, tatou te talitonu i tamā. Tatou te talitonu i le “faamoemoega lelei o se alii o lē faamuamua lona aiga.”2 Tatou te talitonu “i le fuafuaga paia, e tatau ona pulefaamalumalu le tamā i o latou aiga i le alofa ma le amiotonu ma o i latou e saunia mea e manaomia o le olaga ma le puipuiga mo o latou aiga.”3 Tatou te talitonu “i le fuafuaga paia, e tatau ona pulefaamalumalu le tamā i o latou aiga i le alofa ma le amiotonu ma o i latou e saunia mea e manaomia o le olaga ma le puipuiga mo o latou aiga.”4 Tatou te talitonu e matua manaomia lava ia tamā, aua e tulagaese ma e le mafai ona suia.

Ata
Ua i ai i matua ni tiute e faaatoatoa ai e le tasi le isi.
Ata
O tamā e le mafai ona suia.

O nisi e vaai i le lelei o le tulaga faatamā i tulaga faaagafesootai, aua o nisi taimi o le mea lea e tau atu ai ia i latou e i ai so latou tiutetauave ia latou fanau, uunaia i latou e avea ma tagatanuu lelei ma ia mafaufau e uiga i manaoga o isi, ma suia ai le manatu faapea “na o tina e nafa ma le fanau i le manatu o matua uma e nafa ma le fanau. … I se faapuupuuga, o le mea taua mo alii o le avea ma tamā. O le mea taua mo le fanau o le i ai o ni tamā. O le mea taua mo le tulaga lautele o le foafoaina o ni tamā.”5 E ui o nei mafaufauga e matua moni lava ma taua, ua tatou iloa o le tulaga faatamā e sili atu nai lo se manatu po o se vaega na tupuga mai manu. O le matafaioi a le tamā e paia lona faavae, na amata mai i se Tama i le Lagi ma oo mai, i lenei lalolagi faaletino, faatasi ai ma le Tama o Atamu.

O le faataitaiga sili ma paia o le tulaga faatamā o lo tatou Tama Faalelagi lea. O Ona uiga taua e aofia ai le agalelei ma le alofa atoatoa. O Lana galuega ma le mamalu o le atinaeina, fiafia, ma le ola e faavavau o Ana fanau.6 E leai se mea i lenei lalolagi pau e mafai e tamā ona mauaina e faatusatusa i le Mamalu o i Luga, ae o le mea sili o loo latou taumafai e faataitai ia te Ia, ma galulue i Lana galuega. Ua faamamaluina i latou i se talitonuga ofoofogia ma le faamaoni.

Mo alii, o le tulaga faatamā ua faailoa mai ai o tatou vaivaiga ma e tatau ona tatou faaleleia. O le tulaga faatamā e manaomia ai le ositaulaga, ae o se puna o le faamaliega le mafaatusalia, o le olioli. O le faailoga aupito silisili a lo tatou Tama Faalelagi, o le e alofa ia i tatou, o Lana fanau agaga, lea na Ia aumai ai Lona Alo e Toatasi na Fanaua mo lo tatou faaolataga ma faaeaga.7 Na fetalai Iesu, “E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo.”8 E faaalia e tamā lena alofa ao faaaluina o latou olaga i aso taitasi e galulue ai e auauna atu ma lagolagoina o latou aiga.

Atonu o le galuega sili ona taua a se tamā o le faaliliuina lea o loto a lana fanau i lo latou Tama Faalelagi. Afai e mafai e lana faataitaiga ma ana upu ona faataitaia ai foliga o se tagata ua tuuto atu i le Atua i le ola ai i aso taitasi, o le a tuuina atu e lena tamā i lana fanau le ki o le filemu i lenei olaga ma le ola e faavavau i le lalolagi a sau.9 O se tamā e faitauina tusitusiga paia i lana fanau ua ia faamasaniina i latou i le siufofoga a le Alii.10

Ata
O tamā o loo faitauina tusitusiga paia

Tatou te maua i tusitusiga paia se faamamafa fai soo i tiute a matua e aoao le fanau:

“O lenei foi, o le tulaga e oo i ai le i ai o matua e fai fanau i Siona, po o i soo se tasi o ona siteki ua faatulagaina, ae latou te le aoaoina i latou ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia e ala i le faaee o lima, pe a valu tausaga le matutua, ia i ai le agasala i luga o ulu o matua. …

“Ma ia latou aoao foi a latou fanau ia tatalo, ma savavali tonu i luma o le Alii.”11

I le 1833, na aoaiina ai e le Alii sui o le Au Peresitene Sili, mo le le lava o le gauai atu i le tiute o le aoaoina o a latou fanau. I le toatasi na Ia fetalai faapitoa atu lava i ai, “E te lei aoaoina lau fanau i le malamalama ma le upumoni, e tusa ma poloaiga; ma ua i ai pea i lena amioleaga e toatasi le mana, i luga o oe, ma o le pogai lea o lou puapuagatia.”12

E ao i tamā ona aoao atu tulafono a le Atua ma galue pea lava pea i augatupulaga taitasi. E pei ona folafola mai e le fai Salamo:

“Ua ia faatuina le tulafono ia Iakopo, ua ia tuuina foi le poloaiga ia Isaraelu, o mea ua ia poloai atu ai i o tatou tama, ina ia latou faailoa ai i a latou fanau:

“Ina ia iloa ai e le tupulaga amuli, o fanau lava e fanau mai; e tutupu mai i latou, ma tau atu ai i a latou fanau:

“Ina ia fai le Atua mo latou faatuatuaga; ma ia le galo galuega a le Atua, ia latou tausi i ana poloaiga.”13

Ata
O tamā ma le afafine o loo sisiva

E moni o le aoaoina o le talalelei o se tiute fefaasoaai i le va o tamā ma tina, ae ua faamanino mai e le Alii ua Ia faamoemoe i tamā ia taulamua i le avea ai ma se tulaga faamuamua maualuga. (Ma ia tatou manatua o talanoaga faasamasamanoa, galulue ma taaalo faatasi, ma le faalogo o ni elemene taua ia o le aoao atu.) Ua faamoemoe mai le Alii i tamā ina ia fesoasoani e aoao a latou fanau, ma e mananao ma manaomia e fanau se faatusa.

Ata
O tamā ma le atalii o loo galulue faatasi

Sa faamanuiaina foi a’u i se tamā lelei. Ou te manatua ao ou laitiiti pe a ma le 12, sa avea lo’u tama ma se sui tauva o taitai o le aai i le malo i si o matou tamai alalafaga. Na te lei faia se faatosinaga lautele mo le palota—pau le mea ou te manatuaina o le fai mai o Tama ia a’u ma o’u uso e tufa atu kopi o se faailo i fale taitasi, uunaia tagata e palota mo Paul Christofferson. Na i ai se fuainumera o tagata matutua sa ou tuuina atu i ai se pepa faailo o e na fai mai o Paul o se tagata lelei ma faamaoni e leai se faaletonu o le palota mo ia. Sa ou lagona le mimita tele mo lo’u tamā. Sa aumaia ia te a’u le talitonuga ma se manao ia mulimuli i ona tulagavae. Sa lei atoatoa o ia—e leai se tasi—ae na sa’o ma lelei ma o se faataitaiga e mafai ona faanaunau i ai se atalii ia avea ai.

O le aoai ma le faasa’oina o se vaega o le aoao atu. E pei ona fai mai Paulo, “O le ua alofagia e le Alii, ua aoai atu o ia ia te ia.”14 Peitai o le aoai atu e tatau ai i se tamā ona faaeteete lelei nei tei ua oo atu i se tulaga o le saua, lea e lei mafai lava ona faamaonia. Pe a tuuina atu e se tamā se faasa’oga, e tatau ona avea le alofa ma ana uunaiga ao le Agaga Paia ma ona taiala:

“E aoai atu i taimi e tatau ai ma le maatiati, pe a uunaia e le Agaga Paia; ma ona faaali atu ai lea pe a mavae, o se alofa faateleina ia te ia o lē na e aoaiina, nei manatu o ia ia te oe o sona fili;

“Ina ia iloa ai e ia e sili atu le malosi o lou faamaoni i lo fusi o le oti.”15

O le aoai i le mamanu paia e le faatatau tele i le faasalaina ao le fesoasoani atu i se e pele i le ala o le pulea o ia lava.

Ata
O le tamā o loo galue
Ata
Galue e tausi lona aiga

Na fetalai mai le Alii faapea “ua i ai i fanau uma le aia i luga o o latou matua mo lo latou tausiga seia oo ina latou matutua.”16 O le sailiga o le tupe mo le aiga o se gaoioiga paia. O le tausiga o se aiga a se tasi, e ui e masani ona manaomia ai le alu ese mai le aiga, e le o feteenai ma le tulaga faatamā—o le ute lea o le avea ai ma se tamā lelei. “O le galuega ma le aiga o ni tiutetauave fesilitai.”17 E le o faamaonia e lenei mea le faapea ua tuulafoaia e se alii lona aiga mo lana galuega po o le, i se isi tulaga matautia, o le tuuina atu lea e se tasi e lē faigaluega o lona tiutetauave i isi. I upu a le Tupu a Peniamina:

“O le a outou le tuu a outou fanau ia latou o fia aai, pe le lavalava; pe tou te tuu foi ia latou soli tulafono a le Atua, ma misa ma fefinauai ma le tasi. …

“Ae tou te aoao i latou ia savavali i ala o le upumoni ma le faamamalu; tou te aoao i latou ia alofa le tasi i le isi, ma auauna le tasi i le isi.”18

Ua tatou iloa le mafatia o alii o e e le mafai ona maua ni auala ma tupe e tausi ai o latou aiga. E leai se tulaga o le maasiasi mo i latou o e, i se taimi, e ui i a latou taumafaiga sili, ae ua le mafai ona faataunuuina ia tiute ma faatinoga uma a tamā. “O mea e faaletonu, oti, po o nisi mea e tulai mai, e alagatatau ai ona fetuutuunai tagata taitoatasi. E tatau i aiga lautele ona tuuina atu le lagolago pe a manaomia.”19

Ata
O matua alolofa
Ata
O matua o loo sisiva

O le alofa i le tina o lana fanau—ma le faaalia o lena alofa—o le lua ia o ni mea sili ona lelei e mafai e se tamā ona faia mo lana fanau. E faamausali ma faamalosia ai le faaipoipoga lea o avea ma faavae o lo latou olaga ma le saogalemu faaleaiga.

Ata
O tamā ma ona atalii talavou

O nisi o alii o ni tamā nofo toatasi, tamā o loo tausia lē tumau ni tamaiti [foster father] po o ni taitoalua a ni tina ua toe faaipoipo [stepfathers]. O le toatele o i latou o loo tauivi ma le malosi ma faia le mea sili latou te mafaia i se matafaioi e tele ina faigata. Tatou te faamalo atu ia i latou o e faia mea uma lea e mafai ona faia i le alofa, onosai, ma le ositaulaga a le tagata lava ia ia ausia manaoga faaletagata ma faaleaiga. Ia manatuaina foi na auina mai e le Atua Lava Ia Lona Atalii na Fanaua i se tamā na tausia. Ioe, e tatau ona tuu atu se faafetai ia Iosefa aua ao tuputupu ae Iesu, sa Ia “tupu [i le] poto ma le…tino, ua alofagia o ia e le Atua atoa ma tagata.”20

O le mea e faanoanoa, ona o le oti, tuulafoaia, po o le tetea, o nisi o tamaiti e le o i ai ni tamā o latou nonofo faatasi. O nisi atonu o i ai ni tamā o loo i ai faaletino ae e le o i ai faalelagona pe i nisi auala e le o auai pe le o lagolagosua foi. Matou te valaau atu i tamā uma ina ia faia le mea sili ma ia lelei atili. Matou te valaau atu i ala faasalalau ma alaleo faafiafia, ina ia faaalia mai ni tamā tuuto ma talenia o e alolofa moni i a latou ava ma taitaia ma le poto a latou fanau, nai lo i latou o e valea ma faimeamalie po o le “alii e faatupuina ni faafitauli,” e pei ona faailoa soo mai ai tamā.

I fanau o loo faaletonu o latou tulaga faaleaiga, matou te faapea atu ai, e le o faaitiitia lo outou tulaga taua. O luitau i nisi taimi o se faaaliga lea o le faatuatuaina o oe e le Alii. E mafai ona Ia fesoasoani ia te oe, tuusao atu ma e ala atu i isi, e taulima mea o e feagai ai. E mafai ona tou avea ma augatupulaga, atonu o se [augatupulaga] muamua i lou aiga, lea e mafai ona faatulaga ia mamanu paia na faauuina e le Atua mo aiga ma faamanuia ai augatupulaga uma e mulimuli mai ia te oe.

I alii talavou, o le iloaina o le matafaioi o le a e mauaina o se tagata e tausia ma puipuia, matou te faapea atu ai, ia saunia nei e ala i le maelega i le aoga ma fuafua mo aoaoga maualuluga atu pe a uma le aoga tulagalua. O le aotauina, pe i le iunivesite, aoga faapitoa, aperenitisi, po o se polokalama talitutusa, o le ki lea i le atinaeina o tomai ma gafatia o le a tou manaomia. Faaaoga tatau avanoa e faamasani ai ma tagata o soo se vaitausaga, e aofia ai tamaiti, ma aoao i le ala e faatulaga ai ni fegalegaleaiga maloloina ma tauia. O le uiga o lena mea o le talanoa fevaaiai lea ma tagata ma o nisi taimi o le faia faatasi o ni mea, ae le na o le faaleleia o ou tomai e tesi ai. Ola i se olaga a avea o se tamaloa o le a e aumaia le ola mama i lau faaipoipoga ma i lau fanau.

I augatupulaga tuputupu ae uma, matou te faapea atu, po o fea lava o tou faatulaga ai o outou tamā i se fuafaatatau o le lelei-lelei tele-lelei silisili (ma ou te valoia atu o le a maualuga atu le faatulagaina ao e avea ma tagata matua ma atamai atili), filifili nei e faamamaluina o ia ma lou tina i lou lava olaga. Manatua le faamoemoega faananau a se tamā e pei ona faaalia mai e Ioane: “E leai so’u fiafia e sili i lenei, pe a ou faalogo ua savavali la’u fanau i le upu moni.”21 O lou amiotonu o se faaaloaloga sili lea e mafai ona tuuina atu i soo se tamā.

I o’u uso e, o ni tamā i lenei Ekalesia, ou te faapea atu, ou te iloa o tou moomoo maimau pe ana o oe o se tama sili ona atoatoa. Ou te iloa aua ou te moomoo foi faapena. Ae ui i lea, e ui i o tatou tapulaa, ia tatou fetaomi atu i luma. Sei o tatou tuuese ia manatu faasausili o le faamalieina faaletagata ma le mana e faia ai soo se mea e manao i ai i tu ma aga o lenei vaitaimi ma mafaufau muamua i le fiafia ma le soifua laulelei o isi. E moni, e ui i o tatou le atoatoa, o le a faalautele e le Tama Faalelagi i tatou ma faatupuina a tatou taumafaiga faatauvaa ia i ai ni taunuuga lelei. Ua faamalosia a’u i se tala na faaalia mai i le New Era i nai tausaga ua mavae. Sa toe faamatalaina e le tusitala le mea nei:

“Ao o’u talavou, sa nonofo lo matou aiga toaitiiti i se fale mautotogi e tasi le potumoe. Sa ou moe i luga o le sofa i le potu malolo. …

“O lo’u tamā, o se tagata e faigaluega i se fale fai uamea, e vave tuua lava e ia lo matou fale e alu i le galuega i le taeao po o aso taitasi. O taeao uma lava na te … faaafu lelei a’u i le ieafu ma tutu ai iina i se minute. O le tele lava o taimi, e afa ai ona ou miti, ou te lagonaina lava le tutu o lo’u tamā i tafatafa o le sofa, ma tilotilo mai ia te a’u. Ao o’u faafoliga atu o loo o’u moe. … Sa ou iloaina ao ia tu i autafa o lo’u moega sa ia tatalo ma lona mafaufau atoa, malosi ma uai atu lena tatalo—mo a’u.

“O taeao uma lava e tatalo ai lo’u tamā mo a’u. E tatalo o ia ia lelei so’u aso, ma ia ou saogalemu ma ia ou aoao ma saunia mo le lumanai. Ma e talu ai e le mafai ona faatasi o ia ma a’u seia oo i le afiafi, e tatalo o ia mo faiaoga ma a’u uo o le a matou faatasi i lena aso. …

“O le taimi muamua, sa ou le malamalama moni ai i mea sa fai e lo’u tamā i na taeao pe a tatalo o ia mo a’u. Ae ina ua faasolo ina ou matua ae, ua oo ina ou malamalama i lona alofa ma lona naunau mai ia te a’u ma mea uma sa ou faia. O se tasi lea o mea sili ona ou fiafia ai ou te manatua. Seia oo mai i le tele o tausaga mulimuli ane, ina ua uma ona ou faaipoipo, ma maua sa’u lava fanau, ma ou alu atu i totonu o o latou potumoe a o momoe i latou ma ou tatalo ai mo i latou, faatoa ou malamalama atoatoa ai iina i se lagona sa i ai i lo’u tamā e uiga ia te a’u.”22

Na molimau atu Alema i lona atalii:

“Faatua, ou te fai atu ia te oe, o [Keriso] lava lea ua mautinoa o le a afio mai … ; ioe, e afio mai o ia e tau mai tala fiafia o le olataga i ona tagata.

“Ma o lenei, lo’u atalii e, o le galuega lenei na valaauina i ai oe, e tau atu nei tala fiafia i lenei nuu, e saunia ai o latou mafaufau; pe ina ia … latou saunia mafaufau o a latou fanau ia faalogo i le afioga i le taimi o lona afio mai.”23

O le galuega lena a tamā i le asō. Ia faamanuia i latou e le Atua ma faia ina ia mafai ona latou faia, i le suafa o Iesu Keriso, amene.