Nws Thov Kom Peb Sawv Nws Cev
Kev pab zoo li Yexus Khetos yeej tsis xav txog yus tus kheej, thiab xav txog lwm tus xwb.
“Nej ib leeg yuav tsum hlub ib leeg, ib yam li kuv hlub nej.”1 Cov lus uas pawg hu nkauj nyuam qhuav hu no, es Yexus kuj tau hais ob peb teev ua ntej Nws txoj kev theej txhoj—yog ib qho kev txi uas Txwj Laug Jeffrey R. Holland hais tias yog “qhov uas qhia tias Vajtswv hlub peb zoo tshaj txhua yam uas Nws muab rau peb nyob hauv lub ntiaj teb no.”2
Tsis yog Yexus qhia kom peb hlub lwm tus xwb, tiam sis Nws kuj ua neej raws li Nws qhia. Thaum Nws ua hauj lwm qhuab qhia, Yexus “mus thoob plaws qhov txhia chaw ua tej hauj lwm zoo”3 thiab “Nws thov kom txhua tus ua raws li Nws tus yam ntxwv.”4 Nws qhia hais tias, “Rau qhov tus uas khuv xim nws txoj sia, tus ntawd yuav tsis tau txoj sia, tiam sis tus uas tsis khuv xim nws txoj sia vim nws ntseeg kuv, tus ntawd yuav tau txoj sia.”5
Thawj Tswj Hwm Thomas S. Monson, uas to taub thiab ua neej raws li kev hlub, hais tias, “Kuv ntseeg tias tus Cawm Seej qhia peb tias yog peb tsis ua hauj lwm pab lwm tus kawg siab kawg ntsws, ces peb lub neej tsis muaj nqi heev. Cov uas ua neej nyob pab lawv tus kheej nkaus xwb yuav poob qab thiab … xiam lawv txoj sia tiam sis cov uas hauj lwm pab lwm tus ces yuav loj hlob thiab huaj vam—ces yuav cawm lawv txoj sia.”6
Kev pab zoo li Yexus Khetos yeej tsis xav txog yus tus kheej, thiab xav txog lwm tus xwb. Ib tug poj niam uas tu nws tus txiv uas xiam hoob khab piav hais tias, “Tsis txhob xav tias nej tes hauj lwm yog ib lub nra hnyav; cia li xav tias yog ib lub cib fim kom kawm tias kev hlub yog dab tsi tiag tiag.”7
Nyob hauv kev hawm Vajtswv nyob hauv BYU, Viv Ncaus Sondra D. Heaston nug hais tias, “Yog peb ib leeg pom tau ib leeg lub siab ces yuav zoo li cas? Peb ib leeg puas txawj to taub ib leeg zoo dua? Yog peb xav li lwm tus xav, pom li lwm tus pom, thiab hnov li lwm tus hnov, peb puas txaus siab siv sij hawm pab lwm tus, thiab peb puas ua siab zoo rau lawv? Peb puas txaus siab ua siab ntev thiab ua siab zoo, thiab ua siab loj ntxiv rau lawv?”
Viv Ncaus Heaston qhia txog ib zaj thaum nws ua hauj lwm nyob hauv Koom Haum Ntxhais Hluas lub camp. Nws hais tias:
“Ib tug uas … hais lus hauv kev hawm Vajtswv … qhia peb txog ‘kev ua neeg.’ Nws hais tias ‘Cia li ua ib tug neeg uas ncav tes pab lwm tus—cia li muab daim iav tso tseg thiab ntsia ntawm lub qhov rais.’
“Kom qhia qhov no, nws txawm hu ib tug ntxhais hluas los thiab thov kom tus ntxhais hluas ntawd sawv saib nws.” Ces [nws] muab ib daim iav nyob nruab nrab ntawm tus ntxhais hluas thiab nws tus kheej ua rau nws saib daim iav xwb thaum nws sim sib tham nrog tus ntxhais hluas ntawd. Ces, yeej tsis tau ua rau nkawd muaj siab xav sib tham. Nov yog ib zaj lus qhia zoo heev uas qhia hais tias kev sib txuas lus thiab kev pab lwm tus yeej nyuaj heev yog tias peb txhawj txog peb tus kheej thiab saib peb tus kheej thiab peb tej kev xav tau xwb. Ces [nws] muab daim iav tso tseg, thiab muab ib lub qhov rais tso nruab nrab ntawm nws lub ntsej muag thiab tus ntxhais hluas lub ntsej muag. … Peb pom tias [nws] twb tsom ntsoov rau tus ntxhais hluas lawm thiab yog peb xav pab lwm tus tiag tiag peb yuav tsum tsom ntsoov rau lwm tus tej kev xav tau thiab tej kev xav. Tej lub sij hawm peb txhawj txog peb tus kheej thiab peb lub neej—zoo li peb saib hauv tej daim iav thaum peb nrhiav cib fim pab lwm tus—peb thiaj tsis pom meej zoo li yuav pom ntawm lub qhov rais.”8
Ntau zaus Thawj Tswj Hwm Monson ua rau peb nco ntsoov tias “yeej muaj cov neeg uas xav tau peb txoj kev pab ib ncig peb uas xav tau peb txoj kev pab, peb txoj kev txhawb nqa, peb txoj kev nplij siab thiab peb txoj kev ua siab zoo, txawm yog lawv yog peb tsev neeg, cov phooj ywg, cov neeg uas peb paub los sis cov neeg qhua los xij.” Nws hais tias “Peb yog tus Tswv txhais tes hauv ntiaj teb no, uas twb raug txib kom mus pab thiab txhawb nqa Nws cov me nyuam. Nws yeej cia siab rau peb sawv daws heev.”9
Xyoo tas los thaum lub Ib Hlis Ntuj, phau xov xwm Friend thiab Liahona caw cov me nyuam nyob thoob plaws lub ntiaj teb kom lawv ua raws li Thawj Tswj Hwm Monson tej lus—kom sawv tus Tswv cev pab lwm tus. Cov me nyuam raug caw ua tej yam kom pab lwm tus—ua tej yam loj thiab me huv tib si. Ces Thawj Tswj Hwm Monson hais kom lawv kos lawv txhais tes rau ntawm ib daim ntawv, muab txiav, sau tias lawv tau pab lwm tus li cas, thiab xa rau phau xov xwm. Tej zaum nej ib txhia uas mloog hmo no yog cov me nyuam uas tau pab lwm tus thiab xa nej txhais tes tuaj.10
Thaum cov me nyuam kawm hlub thiab pab lwm tus thaum lawv tseem hluas, lawv xyaum coj yam ntxwv pab lwm tus kom tas lawv lub neej. Feem ntau cov me nyuam qhia peb txhua tus hais tias peb tsis tas ua ib qho loj kom qhia lwm tus hais tias peb hlub lawv thiab pab lawv.
Ib tug xib hwb uas qhia lub Koom Haum Me Nyuam Yaus tau hais li no hais tias. Nws hais tias, “Hnub no, peb hoob kawm rau cov tub ntxhais uas muaj 5 thiab 6 xyoo tau ua txoj hlua coj qhia txog kev hlub. Txhua tus me nyuam kos duab rau ntawm tej daim ntawv: ib daim yog lawv tus kheej, ib daim yog Yexus, thiab ib daim rau cov neeg hauv lawv tsev neeg thiab cov uas lawv hlub. Peb muab lo ua ib lub voj voog thiab sib dhos kom ua tau ib txoj hlua coj qhia txog kev hlub. Thaum lawv tab tom kos duab, cov me nyuam tau hais lus txog lawv tsev neeg.
“Heather hais tias, ‘Kuv tsis xav tias kuv tus niam laus hlub kuv. Wb sib cav txhua lub sij hawm. … Kuv ntxub kuv tus kheej. Kuv muaj ib lub neej tsis zoo.’ Nws tso nws lub taub hau ntawm nws sab caj npab.
“Kuv xav txog nws tsev neeg thiab xav tias tej zaum nws muaj ib lub neej nyuaj tiag tiag. Tiam sis tom qab Heather hais li no, Anna, uas zaum ntawm lub rooj kawg, teb hais tias, ‘Heather, kuv tso koj lub npe nruab nrab ntawm kuv thiab Yexus vim Nws hlub koj thiab kuv hluab koj.’
“Thaum Anna hais li ntawd tas, Heather nkag hauv qab lub rooj mus rau Anna thiab khawm nws.
“Thaum hoob kawm tag lawm, nws pog tuaj tos nws es Heather hais tias, ‘Pog, koj sim twv seb? Yexus hlub kuv.’”
Thaum peb hlub thiab pab lwm tus tsis hais ua ib qho me tshaj plaws los, peb ua rau lwm tus hloov siab thiab muaj siab mos siab muag thaum lawv paub tus Tswv txoj kev hlub lawv.
Tiam sis, tej lub sij hawm, vim muaj neeg suav tsis txheeb nyob ib puag ncig peb uas xav tau kev pab ris lawv tej nra hnyav, nyuaj rau peb pab txhua tus.
Cov viv ncaus, tej zaum nej ib txhia sab heev vim nej txhawb pab nej tsev neeg. Cia li nco ntsoov tias, thaum nej ua tej hauj lwm li ntawd niaj hnub, nej “ua hauj lwm rau nej tus Vajtswv xwb.”11
Tej zaum nej ib txhia yuav muaj kev zoo siab yog nej saib hauv nej zej zog kom nrhiav cib fim pab lwm tus ris lawv tej nra hnyav.
Peb txhua tus yeej pab tau lwm tus niaj hnub. Peb nyob hauv ib lub ntiaj teb uas muaj teeb meem ntau. Peb pab lwm tus thaum peb tsis cem lawv, thaum peb tsis taug xaiv, thaum peb tsis txiav txim, thaum peb luag nyav, thaum peb hais ua tsaug, thiab thaum peb ua siab ntev thiab ua siab zoo.
Tej lwm yam ua pab tau lwm tus yuav tsum siv sij hawm, npaj zoo, thiab siv dag zog ntxiv. Qhov ntawd twb ntxim siv zog ua kom tau. Tej zaum peb yuav tsum pib nug peb tus kheej tej no hais tias:
-
Kuv pab tau leej twg hnub no?
-
Kuv muaj sij hawm thiab tej yam kev pab npaum li cas?
-
Kuv yuav siv kuv tej txuj ci li cas kom foom koob hmoov rau lwm tus?
-
Peb tsev neeg ua tau dab tsi?
Thawj Tswj Hwm Dieter F. Uchtdorf qhia hais tias:
“Nej yuav tsum ua raws li Yexus Khetos cov thwj tim tau ua hauv txhua lub caij nyoog: sib tham, siv tag nrho tej kev pab uas muaj, nrhiav tus Vaj Ntsuj Plig Dawb Huv tej kev tshoov siab, thov tus Tswv pom zoo, ces sia siv thiab mus ua hauj lwm.
Nws hais tias, “Kuv cog lus rau nej. Yog nej yuav ua raws li tus txheej txheem no, nej yuav txais kev coj kom ua raws li tus Tswv txoj kev paub pab leej twg, ua dab tsi, pab thaum twg, thiab qhov twg.”12
Thaum kuv xav txog qhov uas yuav zoo li cas thaum tus Cawm Seej yuav rov qab los, kuv yeej xav txog thaum Nws los rau cov Neeg Nifais thiab nug hais tias:
“Nej puas muaj tej neeg mob nyob hauv nej? Coj lawv los ntawm no. Nej puas muaj tej neeg ceg tawv, los sis dig muag, los sis tej neeg khoov duav, los sis tej neeg tu ceg tu npab, los sis tej neeg mob ruas, los sis tej uas qhuav tes qhuav taw, los sis tej uas lag ntseg, los sis tej uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev hmov tshua rau nej; kuv lub siab muaj kev hlub tshua puv npo. …
“… [Tus Cawm Seej] tau kho lawv zoo txhua tus.”13
Tam sim no, Nws thov kom peb sawv Nws cev.
Kuv tau kawm hais tias txoj kev hlub Vajtswv thiab hlub cov neeg zej zog yeej yog qhov uas ua rau peb lub neej muaj nqi. Kuv thov kom peb yuav coj raws li tus Cawm Seej tus yam ntxwv thiab ua raws li Nws tej lus qhia kom muaj kev hlub pab lwm tus.
Kuv ua tim khawv txog Thawj Tswj Hwm Henry B. Eyring cov lus cog tseg hais tias “yog [peb] siv [peb] tej txiaj ntsim kom pab ib tug neeg, [peb] yuav hnov tus Tswv txoj kev hlub tus neeg ntawd.” [Peb] kuj yuav hnov Nws txoj kev hlub [peb].”14 Los ntawm Yexus Khetos lub npe, amees.