2010–2019
El Siyuck Sesr Kuht in Oacna Pahol
April 2016


El Siyuck Sesr Kuht in Oacna Pahol

Kuhlwacnsap pwacye luhn Kraist tiac srohwohsr ac lohacng nuh sin mwet sahyac.

“Lungse sie sin sie. Oana ke nga lungse kowos.”1 Kahs inge, ma onkihnyuck sin choir wowo se inge uh, tuh fwack sin Jisus ao ekahsr na met liki iwaclah wolacna Lal—kihsac se ma Elder Jeffrey R. Holland el ahkuhtweyac muh pa “mwe fahkwack yohk srihpac emet ke luhngse nwacsnwacs ma tuh ahkkahlwemyeyuck ke ma mahtuh luhn facluh se inge.”2

Jisus El tiac luti muhkwena kuht in luhngse, tuhsruhk El moulkihn ma El luti uh. Ke lusacn orekma Lal, Jisus El “forfor oru ma wo”3 ac “kwacfe nohfohn in fahsr tukun srihkasrak Lal.”4El luti, “Tuh el suc lungse molela moul lal ac fah tuhlac luhkel, a el su moul lal tuhlac luhkel keik, fah molela moul lal.”5

Prestuhn Thomas S. Monson, suc nuh kahlwem ac moulkihn kai sac in luhngse, el fahk: “Nga luhlahlfongi muh Mwet Lahngo El fahk nuh sesr lah kuht fin tiac sang kuhiyacsr in kuhlwacnsapuh mwet sahyac, ac srihk na srihpen moul lasr uh. Elos suc moul na kwaclos sifacna fah sie lwen srihkweni na ke ma luhn nguhn ac … fah tuhlac moul lalos luhkwelos, ke elos suc sang kuhiyaclos in kuhlwacnsapuh mwet sahyac fah kapwack ac isus fahko—ac ohinge molwelah moul lalos.”6

Kuhlwacnsap ma pwacye oacna ma Kraist El oruh uh fah tiac srohwohsr tuh lohacng nuh sin mwet sahyac. Sie muhtwacn suc karihngihn mukul suhkahpahs tuhmwacl ah el ahkuhtweyac, “Nimet nuhnkuh lah orekma lom an mwe na ahktoasr se; nuhnkuh oacna sie pacl wo in etwaclah ke luhngse.”7

Ke el sramsram ke sie BYU devotional, Sister Sondra D. Heaston el siyuck: “Ac fuhkah kuht fin kuh in liye insiyacn sie sin sie? Kuh kuht ac kahlwem sie sin sie wo liki met ah? Ke kuht puhla ma mwet sahyac elos puhla, liye ma elos liye, ac lohng ma elos lohng, kuh kuht ac oruh in oasr pacl, na orekmakihn pacl uh, in kuhlwacnsapuh mwet sahyac, ac kuht ac ekuhllah oruh lasr nuh selos? Kuh kuht ac mong fihsrwacsr yohrohlos, kuhlwacng nuh selos, ac srihke kahlwem ke ma elos oruh?

Sister Heaston el sruhmuhn ke sie ma sikyak ke el kuhlwacnsap ke sie camp luhn Muhtwacn Fuhsr. El fahk:

“Sie sin … mwet in sramsram ke devotional lasr ah … luti kuht ke ‘eklac.’ Sie sin ma el fahk ah … pa, ‘Eklac in mwet se suc srihke in etuh ac kuhlwacnsapuh mwet sahyac—nimet nuhnkuh keim sifacna ac nuhnkuh ke mwet sahyac.’

Petsac
Sramsram inmahsrlon sie muhtwacn fuhsr ac sie mwet kol upac ke pacl ngwetwacng nuh ke sie selnguhn uh

In ahkuhtweyac ma inge, el pahngon sie sin muhtwacn fuhsr ah ac siyuck tuhlihk muhtwacn sacn in tu ngwetwacng nuh sel. Na [el] eis selnguhn se ac sruok inmahsrlolos na oruh el, [mwet sramsram sac], ngwetwacng nuh ke selnguhn sac ke el srihke sramsram nuh sin tuhlihk muhtwacn sac. Tiac mwe lut, tiacna sramsram wowo se pa orek ah. Lesin inge arlac fokoko in ahkuhtweyac lah upac in sramsram kuh kuhlwacnsapuh mwet sahyac kuht fin elyah na kacsr sifacna ac nuhnkuh na kacsr ac enenuh lasr sifacna. Na [el] fihliyac selnguhn sac nuh sahyac, eis frem sie frem in winto, ac sruok inmahsrlon muhtahl ac muhtuhn tuhlihk muhtwacn sac. … Na kuht liye lah tuhlihk muhtwacn sac el pa el lohacng nuh se ah ac lah kuhlwacnsap pwacye enenuh kuht in lohacng nuh ke enenuh ac nuhnak luhn mwet sahyac. Kuht kwacna elyah kacsr sifacna ac ke moul kahfofo lasr uh—ke kuht ngwet nuh ke selnguhn ke kuht srihke srihke in suk ohiyac wo in kuhlwacnsap—lah kuht tiacna liye wo elos suc kuht kuhlwacnsapuh uh.”8

Petsac
Sramsram inmahsrlon sie muhtwacn fuhsr ac sie mwet kol fuhsracsr ke pacl ngwetwacng ke sie winto uh

Prestuhn Monson el kwacna ahkacsmakihnye kuht lah kuht “rauniyucklac sin mwet suc enenuh nuhnak lasr, kwacfe lasr, tahpuhk lasr, ahkmihs lasr, kuhlwacng lasr—elos pa mwet ke sucu, kawuck, mwet kuht ohsun knuh se, kuh mwet kuht nihkihn.” El fahk, “Kuht oacna poun Leum fin facluh, ke kunohkohn in kuhlwacnsap ac in kahsruh tuhlihk Nahtuhl. El enenuh kais sie sesr.”9

Petsac
Tuhlihk uh suliyuck in kuhlwacnsap ac in oacna pahol Leum

Ke Jacnweri tari ac, magazine ke Friend ac Liahona ah suli tuhlihk fin facluh nohfohn in ukwe kahs in kai lal Prestuhn Monson—in oacna poun Leum. Tuhlihk ac suleyucklac in oruh kuhtuh kuhlwacnsap—yohk kuh srihk. Na elos kwacfeyuck in ikeyac paholos ke ipin pwepuh, suhpuhklah, sihmihs kuhlwacnsap ma elos oruh ah, ac suhpwaclah nuh ke magazine ac. Puhs suwos suc muhta porongo oyekuh sahp kuhtuh sin tausin tuhlihk suc kuhlwacnsap ke luhngse na suhpwaclah sie.10

Petsac
Tuhlihk uh sruokyac kuhtuh kuhlwacnsap ke paho sihpsihplac ke pwepuh
Petsac
Tausin ke tuhlihk suhpwaclah sie ma sruhuh ke kuhtuh kuhlwacnsap lalos nuh ke magazine

Ke tuhlihk uh etwaclah ohiyac in luhngse ac in kuhlwacnsapuh mwet sahyac ke elos fuhsr, elos akiyac atacn kuhlwacnsap ke lusacn moul lalos. Tuhlihk uh kwacna luti kuht lah ahkkahlwemyeyacn luhngse ac kuhlwacnsap uh tiac enenuh in ma yohk in kuh in oasr srihpac ac in arlac kahsrweacng.

Sie mwet luti ke Primary ac sruhmuhn srihkasrak se inge. “Mihsenge,” el fahk, “kuhlahs ke tuhlihk suc yac limekohsr kuh ohnkohsr ah elos orwaclah mwe nahweyuck in ahkkahlwemye luhngse. Kais sie tuhlihk ac srolwaclah petsac ekahsr ke ipin pwepuh: sie kwaclos sifacna, sie Kacl Jisus, ac kuhtuh ke sucu lalos kuh mwet luhngse lalos. Kuht orekmakihn ipin pwepuh in orwaclah raun ma kuhpahsr nuh sin sie sin sie in orwaclah mwe nahweyuck. Ke elos srolwaclah, tuhlihk ac sramsram ke sucu lalos.

“Heather el fahk, ‘Nga muh tuhlihk muhtwacn se wiyuck el tiacna luhngse nga. Kuht akuhkuhin pacl nuh kwewa. … Nga sruhngwacyuc sifacna. Koluk moul luhk.’ Ac el sang muhtahl nuh in pahol.

“Nga motko ke ohiyacn sucu lal ac nga puhla lah sahp pwacye lah upac moul lal. Tuhsruhk tukun Heather el fahk ma inge, Anna, lacyacn sahyac ke tepuh ah, el topuk, ‘Heather, ngwac srolwekomlac ac sang nuh ke mwe nahweyuck luhk inmahsrlok ac Jisus mweyen El luhngse kom ac nga luhngse kom.’

“Ke Anna el fahk ohinge, Heather el orahklah ye tepuh ah in som nuh yohrohl Anna in asruhilac nuh sel.

“Ke sahflahiyacn kuhlahs ah, ke ninac mahtuh kiyacl ah tuhkuh in eisacl, Heather el fahk, ‘Kom etuh lah meac, Ninac? Jisus El luhngse nga.’”

Ke kuht sang pahosr ke luhngse ac kuhlwacnsap finne ke ohiyac srihk uh, puhla ac ohiyac uh eklac ac ahkfihsrwacsryeyuck ke mwet sahyac puhla luhngse luhn Leum uh.

Kuhtuh pacl uh, finne ohinge, ke srihpen mwet pucspucs raunikuhtlac suc enenuh kahsruh ac ahkmihs ke ma toasr uh, ac kuh in upac in kahsrweacng ke enenuh yohk nuh kwewa.

Sisters, kuhtuh suwos suc porongo an sahp puhla muh kowos fuhlwelah kuhiyowos nohfohn in kahsruh sucu lowos. Esam, ke ohiyac fihsrwacsr ac srihk ngwacn, kowos “kuhlwacnsapuh God lowos.”11

Kuhtuh suwos sahp puhla oaloal insiyowos suc ma kuh in nwacnwaclah ke kowos ngwet nuh ke mura kuh muhtuhn facl lowos an in suk ohiyac wo in kahsruh mwet sahyac ke ma toasr lal.

Kuht nuh kwewa kuh in kuhlwacnsap lwen nuh kwewa. Kuht moul ke sie facluh ma luhngse acnwuck. Kuht kuhlwacnsap ke kuht tiac ahkkoluk, ke kuht tiac lwesrihk, ke kuht tiac nuhnuhnkuh, ke kuht isrwacsr, ke kuht fahk kuloh, ac ke kuht mongfihsrwacsr ac kuhlwacng.

Kuhtuh kain in kuhlwacnsap uh is pacl yohk, enenuh plwacn loes, ac mukwikwi yohk. Tuhsruhk arlac falyang kuht in oruh. Sahp kuht kuh in muhtwacwacack ke siyuck sesr sifacna kihsen siyuck inge:

  • Suc nga etuh ma nga kuh in kahsruh mihsenge uh?

  • Pacl ac kuhfa fuhkah ma nga kuh in orekmakihn?

  • Ohiyac fuhkah ma nga kuh in orekmakihn talan ac etuh luhk in ahkinsewowoye mwet sahyac?

  • Kuh meac kuht sucu uh kuh in oruh in kuhlwacnsap uh?

Prestuhn Dieter F. Uchtdorf el luti:

“Kom enenuh in oruh … ma mwet tuhma lutlut luhn Kraist elos oruh ke fihl in pacl nuh kwewa: tuhkweni pwacpa, orekmakihn kuhfa nuh kwewa ma oasr uh, suk mokleyuck sin Nguhn Muhtahl, siyuck sin Leum fin wo ma kowos oruh uh, na ahkolah ac som orekma.

“Nga olwelah nuh suwos,” el fahk, “kowos fin ac ukwe atac se inge, kowos ac eis kolyuck suwohs lah suc, meac, ngac, ac lah acn yac kowos ac kuh in kuhlwacnsap ke ohiyacn Leum uh.”12

Kuhtwena pacl nga motko lah ac fuhkah ke Mwet Lahngo El sifilpac tuhkuh, nga nuhnkuh ke muhtwacta Lal nuh yurin mwet Nephi ke el siyuck:

“Yac oasr kuhtwena mwet mas inmahslowos? Usaclos me nuh inse. Yac oasr kuhtwena mwet ma ul, kuh kun, kuh maskihn niyac, kuh suhkahpahs, kuh lepa, kuh ma lacpo na kuh lacne na, kuh ma sohlohng kahs, kuh ma kweok ke kuhtwena ohiyac? Usaclos me nuh inse ac Nga fah unweloslac, tuh Nga pahkomotowos; insiuck sesseslah ke pahkotwen. …

“… [Mwet Lahngo] El tuh unweloslac kais sie.”13

Ke pacl ingena uh, El siyuck sesr kuht in oacna Pahol.

Nga etwaclah muh luhngse nuh sin God ac mwet talan uh pa use kalmac nuh ke moul uh. Lwelah kuht in fahsr ke srihkasrak luhn Mwet Lahngo ac kai Lal in kahsruh mwet sahyac ke luhngse.

Nga fahkwack luhlahlfongi luhk ke pwacyeiyacn olwelah lal Prestuhn Henry B. Eyring “lah [kuht fin] orekmakihn mwe sang [lasr] in kuhlwacnsapuh mwet se sahyac, [kuht fah] puhla luhngse luhn Leum nuh sin mwet sacn. [Kuht fah] oacyacpac puhla luhngse lal nuh [sesr].”14 Ke inen Jisus Kraist, amen.

Mwe kahsruh: Ke Epril 2, 2016, Sister Esplin el fihliyucklac ekihn mwet in kahsruh se met ke prestuhnsi luhlahp luhn U luhn Tuhlihk Srihsrihk.

Mwe Kahsruh

  1. John 13:34.

  2. Jeffrey R. Holland, “Acn Ma Ma Sap, Luhngse, ac Pahkotwen Ohsun,”Liahona, Mei 2015, 106.

  3. Orekma 10:38.

  4. “Kraist Moul: Luhlahlfongi Kuh luhn Mwet Sap,” Liahona, Eprel 2000, 2.

  5. Luke 9:24.

  6. Thomas S. Monson, “What Have I Done for Someone Today?”Liahona, Nohf. 2009, 85.

  7. Lola B. Walters, “Sunshine in My Soul,” Ensign, Ohkohs 1991, 19.

  8. Sondra D. Heaston, “Keeping Your Fingers on the PULSE of Service” (Brigham Young University devotional, June 23, 2015), 1, 5, speeches.byu.edu. The Young Women camp speaker who shared these insights is Sister Virginia H. Pearce.

  9. Thomas S. Monson, “What Have I Done for Someone Today?”

  10. Liye “Give Us a Hand!” Liahona, Jan. 2015, 64–65.

  11. Mosiah 2:17.

  12. Dieter F. Uchtdorf, “Providing in the Lord’s Way,” Liahona, Nohf. 2011, 55.

  13. 3Nephi 17:7, 9.

  14. Henry B. Eyring, To Draw Closer to God (1997), 88.