E Ketin Kupwuriki Kitail en Wia Limehkan
Mour mehlel en papah en Krais sohte kin medewe ih tohr ahpw kin katapaniki mehteikan.
“Poakoahng emen emen nin duwen ahi poahkoahng kumwailehr.”1 Lepin padahk wet, me pwihn en koul pwukat koulkier, mahsen sang rehn Sises mwohn te Sapwellime tomw lapalapo—tohnmetei wet, Elder Jeffrey R. Holland kawehwehda nin duwe met “kemwekid kopwuriamwei en limpoak mehlel me sansalehr nan poadoapoad en sampah wet.”2
Sises sohte ketin padahkiong kitail te duwen limpoak, ahpw e doadoahngki dahme e padahngki. Nan erein Sapwellime kalohk, Sises “ketseli wiewia doadoahk mwahu kan”3 oh “peki rehn koaros en idawehn Sapwellime karasaras kan.”4 E ketin mahsanih, “Mehmen me men kolokol eh mour, nahn e pahn pwupwsang; a mehmen me pahn kesehla eh mour pwehki ngehi, nahn e pahn diar.”5
President Thomas S. Monson, me inenen wehwehki oh kin momouriki kosonned en limpoak wet, koasoaia: “I kamehlele me Sounkomouro koaskoasoaia me ihte ma kitail pahn sohte kiohng atail mour en papah mehteikan, kisin katep pahn tikitik ohng atail mour. Irail kan me kin katapanikihte pein irail pahn sohla ahr mour, ah irail kan me kin kesehla arail mour pwehn sewese ekei kin kekeirda oh pweida—oh kin diar arail mour. ”6
Mour mehlel en papah en Krais sohte kin medewe ih tohr ahpw kin katapaniki mehteikan. Emen lih me kin apwalih ah pwoud soumwahuo koasoaia, “Kedehr medewe me ahmw kapwukoahn wia mehn katoutou ehu; medewehiong me e wia ansou en kasukuhlki ia udahn wehwehn limpoak.”7
Ni eh wia ehu kapahrek nan BYU, Sister Sondra D. Heaston idek: “Ia duwen ma kitail pahn kak kilang nan mohngiong en emen emen? Kitail pahn kak wehwehkihla mwahu emen emen? Sang ni atail pahn kak pehm en ekei pepehm, kilang dahme re kilang, oh rong dahme re rong, kitail pahn kak wiahda, oh wiahda ansou en papah mehtei kan, oh kitail pahn sou papah irail mwahu? Kitail pahn sou sewese irail ni kanengamah, ni kadek oh ni aktikitik?”
Sister Heaston koasoaiahda ehu ansou ni ah mih nan en Peinakapwkan camp. E koasoaia:
Emen me pahn kihda kapahrek ni kapokono…padahkiong kiht duwen ihs me se pahn anahne ‘duwehla.’ Ehu me e koasoaia iei ‘Wia aramas me kin kohla pwehn esehla oh papah mehteikan—kesehla klahs en irongin kan oh kilang ieila nan wenihmw tok kan.’
Pwehn kawehwehda ire wet, e lukwerihdahla emen peinakapwko en kesihnen mwowe sohpeilahng ih. E ahpw kihdiong klahs en irongin o nan pwungara pwe en kak kilang pein ih nan klahso ni eh pahn koasoaieng peinakapwo. Ni ansou oh te, re sohte kak koasoai pene mwahu. Padahk wet kasaledahr karasaras mwahu ohng ia mwomwen atail pahn koasoakoasoaiong ekei oh papah ekei ma kitail pahn katapanikihte pein kitail oh medmedewehte pein kitail oh atail anahn akan. E ahpw uhd kihsang klahs en irongin o oh kihda wenihmw tok ehu oh kihong nan pwungara… kitail kak kilang me e uhd nsenohki peinakapwo oh me papah mehlel kin kohsang ni atail kin tehk mwahu arail anahn oh pepehm kan. Pak tohto kitail kin pwunodikihla pein kitail oh pwunodiki kediropw en atail mour kan—ni atail pahn kin kilang nan klahs en irongin kan oh nananti en papah—met kin elehiong atail sohte kin kak tehk mwahu mwomwen atail kin men sewesehda mehteikan.”8
President Monson kin kalap kataman kihong kitail me kitail “mih nan pwungen irail akan me anahne atail sawas, atail kakehlail, atail utuht, atail kaweid, atail kadek—oh met me iangahki tohn peneinei kan, kempoakepahtail kan, aramas sohte lipilipil kan me kitail kin tuwong, oh mehn likih kan.” E koasoaia, “Kitail me wia Limen Kauno” pohn sampah wet, oh E ketin poahngoak kiong kitail ehr en papah oh sewese Sapwellime serihkan. E ketin sapwellimaniki koapwoaroapwoar ohng kitail.”9
Nan Senweri en pahr nekier o, magazine me kahdanikiFriend oh Liahonaluke seri en sampah pwon en idawehn sapwellimen President Monson kaweido— me iei en wia Limen Kauno. Luhk wiawihiong serih kan en wiahda kemwekid en papah—ni tikitik de laud. Irail uhd mahlenihda pehrail kan pohn doaropwe, sisetehda, ntingihdi eden sawas me re wia, oh kadarla nan magazine kan. Tohto kumwail me rongorong pwohnget mwein iang ekei irail akan me wia kemwekid en papah wet.10
Ni ansou me serih kan kin esehla poakoahng oh sewese mehteikan ni ahr tikitik, re wiadahr mwomwen wiepen ahr pahn kin papah nan arail mour pwon. Pak tohto serihkan kin padahkiong kitail me kasalehda limpoak oh papah sohte anahne en laud ahpw en katapan oh kak kawekala mehkot.
Emen sounpadahk en primary o ehukihda karasaras ehu. “Rahnet,” e koasoaia, “neitail seri sounpar 5 oh 6 ko wiadahr mwaramwar. Emen emen serih kan mahlenidahr: pein irail, Sises, oh ekei tohn arail peneinei kan oh me re kin poakpoakehkan. Se kapasapene mahlen ko oh uhd wiahda mwaramwar. Ni ahr mahmahlen, serihko kin koasoaiahda duwen arail peneinei kan.
Heather koasoaia,’ I sehse ma riei serepeino poakpoakeie. Se kin kalap pei. … I pil wasiki pein ngehi. Ahi mour sohte mwahu.’ Oh e ahpw kolkipene mesehu pehko.
I medmedewe ah kahpwalo oh ahniki pepehm me mwehin ah mour apwal. Ahpw mwurin Heather ah koasoaia met, Anna, emen me iang mihmi ni tehpelo ahpw koasoaia, Heather, I pahn kihdi kowe nan ahi mwaramware nan pwungen ngehi oh Sises pwe E poakpoakeiuk oh ngehi pil poakpoakeiuk.’
Ni ansou me Anna koasoaia met, Heather duwaldi pahn tehpelo oh kereplahng Anna oh pwoalehdi teng.
“Mwurin klahs o, ni eh nohno kahlapo eh kohdohn pwokada, Heather nda,’na Ihn ke ese dah? Sises poakpoakeie. ’”
Ni atail kin song en kasalehda limpoak de papah ni soahng tikitik, mohngiong kan kin wekidekla oh mwuterekda sang ni mehteikan ahr kin pehm limpoaken Koht.
Ekei pak, pwehki ah kin nohn diren aramas limwahtail me anahne sawas oh saledek sang ahr katoutou kan, e kin kak apwal en sewesehda irail akan me udahn anahne sawas.
Rieiko, ekei kumwail me rongorong kan mwein iangehr kehn soangen pepehm wet nan amwail peneinei kan sang ni amwail wiahier uhwenamwail kak en sewese irail. Tamataman, me nan irair kan me ke mih loale, ke mih nan ahmw pwukoah en papah ahmw Koht.”11
Ekei kumwail pahn mwein ahneki pepehm en soh itar me pahn kakete kamwahula sang ni amwail pahn rapahki nan amwail wasahn kousoan de rehn mehn mpemwail akan ansou mwahu en sewesehda mehteikan.
Kitail koaros kak wia kemwekid en papah nan atail momour en ehu ehu rahn akan. Kitail mih nan mwehi en uhpene. Kitail kin wia papah sang ni atail kin sohte kawe mehteikan, sang ni atail kin soikala lipahned, sang ni atail kin uhdihsang kadeik emen emen, sang ni atail kin sirei, sang ni atail kin nda kalahngan, oh sang ni atail kin kanengamah oh kadek.
Ekei mwomwen papah kin wiawihki ansou werei, ni ahr kin wie koaskoasoane oh wiahda lapalahn doadoahk. Ahpw re inenen katapan. Mwein kitail kak tepkihda kalelapak pwukat:
-
Ihs me I ese me I kak sewese rahnwet?
-
Ia uhwen ansou oh dipwisou me I ahneki?
-
Ni soahng da me I kak doadoahngki ahi koahiek kan pwe ien kak sewesehki mehteikan?
-
Dahme aht peneinei kan kak wia pene pwehn papah emen emen?
President Dieter F. Uchtdorf padahngki:
Kumwail anahne wia… dahme sohn papah en Krais kin wiahda nan dih koaros: kaweid emen emen ansou koaros, doadoahngki dupwusou koaros me mie, rapahki marain sang rehn Ngehn Sarawio, peki rehn Sahm Nanleng Sapwellime kaweid, kumwail ahpw onopada oh kohla doadoahk.
“I inoukiong kumwail:” e koasoaia, “ma kumwail pahn idawehn ire wet, kumwail pahn alehdi mengihtik pen ihsimwo, dahkot mwo, ansou dah mwo, oh iawasa mwo ni wiepe me Kauno kin ketin kaunopadahr.”12
Ni ansou koaros me I kin medewehda iamwomwen Sounkomouro ah pahn ketdo, I kin tamanda ah ketin pwarek mehn Nephi ko ni Eh keinemwe:
“Mie me soumwahu nan pwungamwail? Wahdo irail met. Mie rehmwail me mwator, de me maskun, de me sikel, de me alu suwed, de me tokutok, de me luwetalahr, de me salengopon, de irail akan me ahneki soangen weirek kan? Wahdo irail rehi pwe I pahn kamwahuih iraila, pwe I poakeirailahr; loaloiet me kin diren kalahngan. …
“… [Sounkomouro] ketin kamwahuihla emen emen irail.”13
Oh met, E ketin poahngoak kiong kitail en wia Sapwellime doadoahk.
I esehla me limpoak en Kauno oh mehteikan me kihieng wehweh de kahrepen mour. I kasik me kitail pahn idawehn karasaras en Sounkomouro oh Sapwellime kosonned en pohnese mehteikan ki limpoak.
I kadedehki mehlel pen en President Henry B. Eyring inou o “ma [kitail pahn] doadoahngki [atail] kisakis kan oh papahki mehtei kan, [kitail pahn] pehm sapwellimen Koht limpoak ohng aramas o.” [Kitail pahn] pil pehm ah limpoak ohng [kitail].”14 Ni mwaren Sises Krais, amen.
: Irehieu: Nan Epreil 2, 2016, Sister Esplin kakomoaldihsang wia sounsawas keieu nan presidensi lap en Praimeri.