Te ani mai nei ’oia ia tātou ’ia riro ’ei mau rima Nōna
Na Cheryl A. Esplin
Tauturu hō’ē i roto i te Peresidenira’a Rahi o te Paraimere
Te tāvinira’a mai tā te Mesia te huru e tāvinira’a pipiri ore ïa ’e tei fa’atumuhia i ni’a ia vetahi ’ē.
« E aroha ’outou ia ’outou iho, mai iā’u e aroha atu ia ’outou na ».1 Teie mau parau, tei hīmenehia e teie pupu hīmene nehenehe, na Iesu ïa i fa’ahiti tau hora noa na mua a’e i Tōna tusia Tara’ehara rahi―te hō’ē tusia tā Jeffrey R. Holland i parau e, « te fa’a’itera’a hau roa a’e i te hānahāna o te here mau i fa’a’itehia i roto i te ’ā’amu o teie nei ao ».2
Aita Iesu i ha’api’i noa mai ia tātou ’ia here, ’ua ora ato’a rā ’Oia i Tāna i ha’api’i. I te roara’a o Tāna tau ’ohipara’a, « ’ua hāmani maita’i haere »3 ’e « ’ua tāparu i te mau ta’ata ato’a ’ia pe’e i Tōna hi’ora’a ».4 ’Ua ha’api’i ’oia ē, « o tei hina’aro i te tāpe’a i tōna ora, ’ua ’ere ïa i te ora : e o tei ti’a iāna i te tu’u i tōna ora iā’u nei, e ora ïa tōna ».5
’Ua māramarama te peresideni Thomas S. Monson i te reira ’e te ora nei i te a’ora’a ’ia here, ’ua parau ’oia : « Tē ti’aturi nei au ē, tē parau mai nei te Fa’aora ia tātou e, ’ia ore tātou e tu’u ’ia tātou iho nō tē tāvinira’a ia vetahi ’ē ra, e mea iti ïa te faufa’a o tō tātou iho orara’a. O tei ha’apa’o noa i tō rātou iho maita’i, e morohi ïa i te pae vārua… ’e e ’ere ïa i tō rātou ora, ’āre’a tei tu’u ia rātou iho i roto i tē tāvinira’a ia vetahi ’ē ra, e tupu ïa i te rahi ’e e hotu ho’i―’e e ora ïa tō rātou ».6
Te tāvinira’a mai tā te Mesia te huru e tāvinira’a pipiri ore ïa ’e tei fa’atumuhia i ni’a ia vetahi ’ē. ’Ua fa’a’ite mai te hō’ē vahine tei aupuru i tāna tāne tino paruparu, « ’eiaha e fa’ariro i tā ’outou ’ohipa ’ei hopoi’a ; a fa’ariro rā i te reira ’ei rave’a nō te ha’api’i mai e aha mau te here ».7
I tōna paraparaura’a i roto i te purera’a pae auahi i BYU, ’ua ani te tuahine Sondra D. Heaston : « E aha te huru ’āhiri ē, e nehenehe mau tā tātou e hi’o i roto i te ’ā’au o te tahi e te tahi ? E rahi atu ānei tō tātou māramarama i te tahi ’e te tahi ? Na roto i te ’itera’a i te mau māna’o o vetahi ’ē, te ’itera’a i tā vetahi ’ē e ’ite ra, ’e te fa’aro’ora’a i tā vetahi ’ē e fa’aro’o ra, e fa’ata’a ānei ’e e rave ānei tātou i te taime nō te tāvini ia vetahi ’ē, ’e e taui ānei tā tātou huru peu i ni’a ia rātou ? E rahi atu ānei tō tātou fa’aoroma’i, tō tātou maita’i, e tō tātou fāri’i ia rātou ? »
’Ua fa’a’ite mai te tuahine Heaston i te hō’ē ’ohipa tei tupu a tāvini ai ’oia i roto i te hō’ē puhapara’a na te Feiā ’Āpî Tamahine. ’Ua parau ’oia ē :
« ’Ua ha’api’i mai te hō’ē o tō mātou mau ta’ata a’o i roto i te purera’a pae auahi… ia mātou nō ni’a i te ’rirora’a’. Teie hō’ē o tāna mau fa’ahitira’a parau… ’Ia riro ’outou ’ei ta’ata o te fa’atoro i te rima nō te ’ite ’e nō te tāvini ia vetahi ’ē―a fa’aru’e i te mau hi’o ’e a hi’o na roto i te ha’amāramarama’.
« Nō te tātara i te reira, ’ua pi’i ’oia i te hō’ē o te feiā ’āpī tamahine ’ia haere mai i piha’i iho iāna ’e ’ua ani i taua tamahine ra ’ia ti’a i mua iāna. ’Ua rave mai ra ’oia i te hō’ē hi’o ’e ’ua tu’u i rōpū i te reira tamahine e ōna iho, ’ia ti’a iāna [te ta’ata paraparau], ia hi’o i roto i te hi’o a tāmata ai ’oia i te paraparau i te reira tamahine. ’Eiaha e maere, ’aita roa atu i riro hō’ē vāhi iti noa a’e ’ei ’āparaura’a maita’i ’e ’aore rā e ’āparaura’a ma te ’ā’au tae mau. ’Ua riro teie fa’ahōho’ara’a ’ei fa’a’itera’a i te fifi rahi ’ia paraparau ’e ’ia tāvini ia vetahi ’ē mai te mea ē, e rahi a’e tō tātou ha’ape’ape’a nō tātou iho ’e te hi’ora’a ia tātou iho ’e tō tātou iho mau hina’aro. I muri iho, ’ua tu’u atu ra oia i te hi’o i te hiti, e ’ua huti mai ra i te hō’ē ’āfata ha’amāramarama, ’e ’ua tu’u i te reira i rōpū i tōna mata ’e i tō te tamahine… ’Ua ti’a ia mātou ’ia hi’o ē, ’ua riro mai te tamahine ’ei hi’ora’a tūtonu [nāna] ’e e tītau te tāvinira’a mau ’ia rōtahi tātou i ni’a i te mau hina’aro ’e i te mau māna’o o vetahi ’ē. Pinepine tātou i te ha’apa’o noa ia tātou iho ’e i tō tātou iho orara’a ’ohipa hope ’ore―’Ia hi’o āna’e tātou na roto i te mau hi’o a tāmata ai i te ’imi i te mau rave’a nō te tāvini―’aita atu ra tātou e ’ite māramarama maita’i na roto i te mau ha’amāramarama o te tāvinira’a ».8
Pinepine te peresideni Monson i te fa’aha’amāna’o mai ia tātou ē, « ’ua ha’atihia tātou e te feiā e hina’aro ra ’ia ha’apa’o atu tātou ia rātou, ’ia fa’aitoito ia rātou, ’ia pāturu, ’ia tāmāhanahana, ’ia fa’a’ite i te maita’i ia rātou―e mau melo ānei nō te ’utuāfare, e mau hoa ānei, e ta’ata mātau ānei ’e ’aore rā, e ta’ata ’ē roa ». ’Ua parau ’oia ē, « tātou te rima o te Fatu i ni’a i te fenua nei, ma te fa’auera’a ’ia tāvini ’e ’ia fa’ateitei i Tāna mau tamari’i. Te ti’aturi nei ’Oia i ni’a ia tātou tāta’itahi ». 9
I te matahiti i ma’iri a’e nei i te ava’e tenuare, ’ua ani manihini te mau ve’a Friend ’e Liahona i te mau tamari’i na te ao ato’a nei ’ia ha’apa’o i te parau a’o a te peresideni Monson―’ia riro ’ei mau rima nō te Fatu. ’Ua anihia i te mau tamari’i ’ia rave i te mau ’ohipa tāvinira’a―te ’ohipa rarahi ’e te ohipa na’ina’i. I muri iho ’ua fa’aitoitohia rātou ’ia pāpa’i i tō rātou rima i ni’a i te ’api parau, ’ia tāpū i te reira, ’ia pāpa’i i ni’a iho i te tāvinira’a tā rātou i rave, ’e ’ia hāpono atu i teie na ve’a ra. E riro ē, e rave rahi o ’outou e fa’aro’o mai nei i teie pō, o ’outou ïa te tahi pae o te mau tamari’i e rave rahi tauatini tei rave i te hō’ē ’ohipa tāvinira’a ’e tei hāpono atu.10
’Ia ha’api’i āna’e te tamari’i i tō rātou ’āpīra’a nahea ’ia here ’e ’ia tāvini ia vetahi ’ē, e ha’amau rātou i te hō’ē hōho’a nō te tāvinira’a nō te toe’a o tō rātou orara’a. Pinepine te mau tamari’i i te ha’api’i mai ia tātou ē, te fa’a’itera’a i te here ’e te tāvinira’a, ’aita ïa e tītauhia te rahi ’e te fa’ahiahia nō te rirora’a ’ei mea faufa’a ’e nō te fa’atupu i te ta’a-’ē-ra’a.
’Ua fa’a’ite mai te hō’ē ’orometua nō te paraimere i teie hi’ora’a. ’Ua parau ’oia ē, « i teie mahana, ’ua hāmani tā mātou piha pae ’e te ono matahiti i te mau hei nō te here. ’Ua pāpa’i te tamari’i tāta’itahi i te hōho’a i ni’a i te tahi mau ’api parau roroa : tō rātou iho te tahi, tō Iesu te tahi, ’e tō te mau melo o tō rātou ’utuāfare ’e tei herehia te tahi. ’Ua tāpiripiri-menemene-hia te reira mau ’api parau ma te fa’a’ohu i ni’a i te tahi ’e te tahi mai te hō’ē fifi te huru, ’ei reira e fa’ariro ai ’ei mau hei nō te here. I te taime pāpa’ira’a i te hōho’a, ’ua paraparau te mau tamari’i nō ni’a i tō rātou mau ’utuāfare.
« Te parau ra o Heather ē, ’aita vau e māna’o nei ē, te here nei tō’u tuahine iā’u. E tātama’i noa maua i te mau taime ato’a… E mea au ’ore roa ato’a nā’u o vau iho. E mea ’ino roa tō’u orara’a.’ E ’ua tu’u ’oia i tōna upo’o i roto i tōna na rima.
« ’Ua feruri au i te huru orara’a o tōna ’utuāfare ’e ’ua māna’o vau e, penei a’e e orara’a fifi tōna. Tera rā, i muri a’e i tō Heather paraura’a i teie mau parau, ’ua pāhono ma’ira o Anna, tei parahi i te tahi pae o te ’āmura’a mā’a, ’Heather, te tu’u nei au ia ’oe i ni’a i tā’u hei i rōpū iā’u ’e ia Iesu, nō te mea, te here nei ’Oia ia ’oe ’e ’ua here au ia ’oe.’
« I te paraura’a o Anna i te reira parau, ’ua tomo atu ra o Heather i raro a’e i te ’āmura’a mā’a nō te haere ia Anna ra ’e ’ua tauahi atu’ra iāna.
« I te fa’aotira’a te ha’api’ira’a, i te haerera’a mai tōna māmā rū’au e ti’i iāna, na ’ō atu ra o Heather ē, ’Meme, ’ua ’ite ’oe ē e aha ? Te here nei Iesu iā’u’ ».
’Ia fa’atoro āna’e tātou i te rima ma te here ’e te tāvinira’a noa atu te ha’iha’i o te reira, e taui ’e e marū te mau māfatu ’ia ’ite āna’e vetahi ’ē i te here o te Fatu.
Tera rā, i te tahi taime, nō te rahi o te ta’ata ’ati a’e ia tātou o te hina’aro nei i te tauturu ’e i te ha’amāmāhia te hopoi’a, e nehenehe e riro ’ei ’ohipa fifi i te pāhonora’a i te mau hina’aro rū e rave rahi.
E te mau tuahine, e riro te tahi pae o ’outou e fa’aro’o mai nei, i te feruri ē, te ’imi nei ’outou i te mau rave’a ato’a nō te utuutu i te mau melo o tō ’outou ’utuāfare. A ha’amana’o ē, i roto i te reira mau ’ohipa tāmau ’e te pinepine te au ’ore, « te tāvini ra ïa ’outou i tō ’outou Atua ».11
E riro paha te tahi pae o ’outou i te fa’atupu i te mana’o ano, o te nehenehe e fa’a’īhia, mai te mea ē, e ’imi ’outou i roto i tō ’outou aroā nohora’a ’e ’aore rā, i tō ’outou ’oire, i te mau rave’a nō te tauturu ’ia ha’amāmā i te hopoi’a a te tahi.
E nehenehe tā tātou pā’āto’a e rave i te tahi mau ’ohipa tāvinira’a i te mau mahana ato’a. Te ora nei tātou i roto i te hō’ē ao pāto’ito’i. Te tāvini nei tātou ’ia ’ore ana’e tātou e tāhitohito, ’ia ’ore āna’e tātou e tihotiho parau, ’ia ’ore ana’e tātou e ha’avā, ’ia ’ata āna’e tātou, ia parau ana’e tātou ē, māuruuru, ’e ’ia fa’a’ite ana’e tātou i te fa’aoroma’i ’e te maita’i.
E tītauhia te taime nō te rave i te tahi atu mau huru ’ohipa tāvinira’a, e tītauhia te fa’aineinera’a, ’e te pūai ta’a ’ē. Tera rā, e māu’ara’a maita’i tā tātou mau tauto’ora’a ato’a. E nehenehe paha tātou e ha’amata na roto i te anira’a ia tātou iho i teie mau uira’a:
-
O vai i roto i te mau ta’ata tā’u i mātau tā’u e nehenehe e tauturu i teie mahana ?
-
E aha tō’u taime e tā’u mau rave’a e vai nei?
-
Nahea e ti’a ai iā’u ’ia fa’a’ohipa i tō’u mau tāreni ’e tō’u mau ’aravihi nō te ha’amaita’i ia vetahi ’ē ?
-
’Ei ’utuāfare, e aha te ti’a ia mātou ’ia rave ?
Ua ha’api’i mai te peresideni Dieter F. Uchtdorf ē :
« Tītauhia ia ’outou ’ia rave… i te mau mea i ravehia e te mau pipi a te Mesia i roto i te mau tau tu’ura’a ato’a : paraparau ’āmui, fa’a’ohipa i te mau rave’a ato’a e vai ra, ’imi i te fa’aurura’a a te Vārua Maita’i, ani i te Fatu i Tāna ha’apāpūra’a, ’e i reira, a firi i te rima ’ahu i ni’a e a rave i te ’ohipa.
’Ua parau ’oia ē, « te hōro’a atu nei au ia ’outou i te hō’ē fafaura’a. Mai te mea ē, e ha’apa’o ’outou i teie hōho’a, e fāri’i ïa ’outou i te arata’ira’a ta’a ’ē nō te ’itera’a ē, o vai, e aha, ahea, ’e i hea nō te ravera’a na roto i te rave’a a te Fatu ».12
I te mau taime ato’a e uiui te māna’o e, e aha te huru ia ho’i fa’ahou ana’e mai te Fa’aora, e feruri au i Tōna tere i rotopū i te Ati Nephi a ani ai ’Oia ē :
« E feiā ma’i tō ’outou, a hopoi mai i ’ō nei. E piri’o’i ānei tō ’outou, e matapō, e lēpera, e hāpepa, e vāvā, e feiā ro’ohia i te tahi huru ma’i ? a hopoi mai ia rātou i ’ō nei, e nā’u e fa’aora ia rātou, e aroha ho’i tō’u ia ’outou na ; ’ua ’ī tō’u ’ā’au i te aroha ia ’outou …
« ’Ua fa’aora [te Fa’aora] ia rātou ato’a ra ».13
Nō teie taime, te ani mai nei ’Oia ia tātou ’ia riro ’ei mau rima Nōna.
’Ua ’itehia iā’u ē, na te here i te Atua ’e i te ta’ata tupu e hōro’a i te aura’a i te orara’a. E mata na tātou i te pe’e i te hi’ora’a o tō tātou Fa’aora ’e i Tāna a’ora’a ’ia fa’atoro i te rima ia vetahi ’ē ma te here.
Te fa’a’ite pāpū nei au i te ti’ara’a mau o te fafaura’a a te peresideni Henry B. Eyring « ’oia ho’i, mai te peu ē, e fa’a’ohipa [tātou] i tā [tātou] mau hōro’a nō te tāvini i te tahi atu ta’ata, e ’ite ato’a ïa tātou i Tōna here nō [tātou] ».14 Na roto i te i’oa o Iesu Mesia ra, amene.
Nota : I te 2 nō eperera 2016,’ua ha’amāuruuruhia te tuahine Esplin ’ei tauturu hō’ē i roto i te Peresidenira’a Rahi o te Paraimere.