Enaaj Likūt Eok Ioon Aeran im Kotak Eok N̄an Kapijuknen
Āinwōt juon Rilale Sip eo em̧m̧an ej pukōt sip eo ejōbwābwe, eļan̄n̄e kwonaaj kōpelļo̧k buruōm n̄an Rilo̧mo̧o̧r eo an laļ in, Enaaj bōk eok.
Juon iaan ememļo̧kjen ko me relukkun kamijak ke iaar juon ajri ekar jino kōn juon ainikien eo ekoļap jān juon iaan kein kakkōl ko an ritarinae n̄e elōn̄ kakkure im̧aan eo ekar karūj iō jen aō kiki. Eto, bar juon ainikien, ainikien bokoļo̧k im ainikien bikbik, eaar ļapļo̧k m̧ae iien eaar em̧akūtkūt mejatoto. Āinwōt an kar jinōm kar kamineneik kōm, kōm ajri ro kar bōk pāāk ko amim kajjojo me repojak im ettōr lōn̄ļok ilo toļ eo n̄an juon jikin kōjparok jen jorrāān in baam. Ke kōm eaar kōkairiir wōt ilo juon jikin elukkuun marok, meram in light ko me remaroro im mouj rej wōtōlo̧klo̧k n̄an kōkaļļeik jikin eo n̄an rikaboļo̧k baam ro. Aolep raar lukkuun ruamājet kaki, aolep raar likūt etaier light n̄an wōjke in Kūriijmōj ko.
Ekar emen aō iiō, im iaar juon rikam̧ool n̄an juon tariņae an laļ in.
Dresden
Ejjab ettoļo̧k jikin eo baam̧le eo aō rej jokwe ie n̄an bukwōn in Dresden. Ro me rej jokwe ijen rej kam̧ool bōlen taujin kōttan kōn ta in iaar loe. Juon urur kileplep, eaar waļo̧k jen taujin ebbokbok, ilo aolepen Dresden, kar kakkure elōn̄ļo̧k jān 90 bōkjāān in bukwōn eo im ļak pād wōt tibdikdik in dekā im kab menkwarar.
Ilo juon iien ekadu, ekar jako aer kōjerbal et eo juon etan bukwōn eo “Jewel Box.” Erich Kästner, juon rijeje bok in Germany, kar jeje kōn bwebwenatoon jorreen eo, “Eaar bok taujin iiō n̄an kalōk bukwōn in eaibojoj, ilowaan juon wōt bon̄ bukwōn eo eaar kajju jorrāān aolepen.”1 Ilo tōre eo iaar dik ijjab maron̄ kar ļōmņak kōn jon̄an kakkure eo kōn tariņae eo an armej ro am make me rekar ijjino eo remaron̄ kar eļļāļo̧k jān e”. Laļ in ipeļaakid ekar ejjeļo̧k an kōjatdikdik, ejjeļo̧k ilju im jekļaj.
Iiō eo ļo̧k, eaar wōr juon aō iien em̧m̧an n̄an bar roolļo̧k n̄an bukwōn in Dresden. Jiljilimjuonn̄oul iiō ālkin pata eo, bar juon alen, jikin kweilo̧k eo “Jewel Box.” Eaar jako an jorrāān, im bukwōn eo eaar bar rool n̄an m̧okta im eaar em̧m̧anļo̧k.
Ilo iien eo iaar loļo̧k ijen iaar lo juon m̧ōn jar aiboojoj an Lutheran, Frauenkirche, Church of Our Lady. Kar kalōke jinoin tata ilo 1700 ko, ekar juon iaan annan̄ ko raiboojoj an Dresden, bōtaab pata eo ekar kadikļo̧k n̄an juon ejouj in meno̧kno̧k. Ium̧win elōn̄ iiō ko eaar pād ilo jekjek in, mae iien āliktata ekar alikkar bwe Frauenkirche enaaj bar ekkal.
Dōkā ko jān im̧ōn jar eo ejorrāān emōj kakkoņi im kar kalikkari im, iien eo emaron̄, kar kōjerbal n̄an bar kalōke. Rainin komaron̄ loi dekā kein raar bwil im rekilmejej me rej waļo̧k āinwōt jet kōkaļļe ilo dipin kabun̄ eo. “Kuraar” kein raar jab n̄an kakememej kōn bwebwenatoon em̧ kileplep in ak eaar barāinwōt juon kein kakememej n̄an kōjatdikdik—juon kōkaļļe in maron̄ an armej n̄an ejaake juon mour ekāāl jān mwenkwarar ko.
Ke ij lukkun ļōmņak kōn bwebwenatoon bukwōn in Dresden im bulōn̄ kōn kapeel im kālet ko an ro raar bar kalōk e kōn men ko me renkar lukkuun jorreen, Iaar en̄jake im̧we eo ekamōņōņō jān Jetōb Kwojarjar. Iaar lukkuun ļōmņak, eļan̄n̄e armej remaron̄ bar ekkal jān men ko emōj aer jorrāān, tibdikdik in aolep men ko rejorrāān, im kakkure in an bukwōn eo im bar kalōke ilo juon jekjek eo ekabwilōn̄lōn me ej jitlōn̄ļo̧k n̄an lan̄, ewi wōt jon̄an maron̄ eo an Jemedwōj Ilan̄ ilo an kar bar kōm̧anmanļo̧k ro Nejin me raar bun̄, penawia, im kar jābwebwe?
Ejjab aorōk wāween an lukkuun kar jorrāān mour ko ad ilo kalimjōke. Ejjab aorōkļo̧k jon̄an nana in bōd ko ad, wāween ad lukkun būromōj, wāween ad ajimakeke, ak an rub būruōd. Barāinwōt ro jet me ejjeļo̧k aer kōjatdikdik, ro rej pere, eo emōj an jako lōke, eo eriab, ak kanijnij ņae Anij remaron̄ bar oktak. Lo̧mo̧o̧ren m̧aan ro nejin marok, ejjeļo̧k mour en ejerwawa me eban bar jepļaaktok.
Enaan eo ekam̧ōņōņō in ej: kōnke karōk in m̧ōņōņō indeeo kar kōpooje jān Jemedwōj Ilan̄ eo em̧m̧an im kōn Pinmuur eo an Jisōs Kraist me ejjeļo̧k jem̧ļo̧kin, jejjab maron̄ wōt bōk lo̧mo̧o̧r jān ad bun̄ im bar erreo, jemaron̄ barāinwōt wōnm̧aanļo̧k jān jon̄an eo armej remaron̄ ļōmņak kake im erom rijolet mour indeeo im ribōk koņaad ilo aiboojoj eo an Anij eo ejjeļo̧k emaron̄ kōmeļeļeiki.
Būrabōļ eo kōn Sip Eo Ejōbwābwe
Ilo iien kwaļo̧k naan eo an Rilo̧mo̧o̧r eo, ritōl ro ilo kabun̄ ilo raan ko An raar ņa ruōn Jisōs ilo an joļo̧k iien ippān ro “rijerawiwi.”
Bōlen ilo aer kalimjōke E, ej kōtlo̧k ak kōmālim m̧wil jerawiwi ko aer. Bōlen rej tōmak bwe wāween eo em̧m̧antata n̄an jipan̄ rijerawiwi ukweļo̧k ej ilo aer liaakeļo̧k er, kōm̧m̧an kōjak kōn er, im kajook er.
Ke Rilo̧mo̧o̧r eo eaar jeļā ta eo ilo lōmņak ko an ri Pharisees im ri Scribes ro, Eaar ba n̄an er juon bwebwenato:
“Armej ōt iaami jibukwi sip ippān, eļan̄n̄e juon iaer e jako, e jab likūt ruwatimjuonn̄oul im ruwatimjuon ilo āne jem̧aden, im ilo̧k ilokōnļo̧k eo e jako, n̄an tōr eo enaaj lo e?
“Im n̄e ej lo e, ej likūt e ion aeran, im lan̄lōn̄.”2
Ium̧win epepen ko, būrabōļ in emōj ukōte āinwōt juon kakien n̄an kōj n̄an bōktok sip eo ejōbwābwe im jipan̄ pukōtļo̧k ro rejōbwābwe. Ilo jimwe im jejjet in menin, ij ļōmņak eļan̄n̄e elōn̄ļo̧k men ko jej aikuj kōm̧m̧ane rem̧m̧anļo̧k.
Emaron̄ ke un eo an Jisōs in, eaorōktata, ej n̄an katakin kōn jerbal eo an Rilale Sip Em̧m̧an?
Emaron̄ ke kar kam̧ool kōn iakwe eo an Anij n̄an ajri ro nejin rejōbwābwe?
Emaron̄ ke kar ennaan eo an Rilo̧mo̧o̧r bwe Anij ejeļā kōn ro rejōbwābwe—bwe Enaaj pukōt er, jipan̄ļo̧k er, im bwe Enaaj lo̧mo̧o̧ren er?
Im ta eo sip eo en kōm̧m̧ane n̄an maron̄ bōk jipan̄ in ekwojarjar?
Sip eo ej aikuj ke jeļā wāween an kōjerbal kein kapen ko n̄an kōjebwebweik iaļ eo an? Ej ke aikuj n̄an kōjerbal GPS n̄an kwaļo̧k ia eo epād ie? Ej ke aikuj bwe en wōr ippān kapeel n̄an ejaak app bwe en maron̄ call n̄an jipan̄? Sip in ej ke aikuj kein kam̧ool jān juon eo ebun̄bun̄ mokta jān an Rilale Sip eo Em̧m̧an naaj itok im lo̧mo̧o̧ren e?
Ejjab. Eban! Sip in eaorōk n̄an lo̧mo̧o̧ren kōnke eaorōk im ejitenbōro ippān Rilale Sip eo.
Ippa make, būrabōļ eo kōn sip eo ejōbwābwe ej juon iaan eoon ko eļap an letok kōjatdikdik ilo jeje ko rekwojarjar.
Ad Rilo̧mo̧o̧r ejitenbōro, Rilale Sip eo Em̧m̧an, ejeļā wōn kōj im ej iakwe kōj. Ejeļā wōn kōj im ej iakwe kōj.
Ejeļā n̄e kwoj jako, im Ejeļā ia eo kopād ie. Ejeļā kōn am būromōj. Ejeļā kōn am ikōn̄ kōn jipan̄. Am mijak. Am dānin kōmjalaal.
Ejjab aorōk wāween am kar jako—men̄e kōn kālet ko am rebōd ak kōn men ko kwar jab maron̄ ellā ioier.
Men eo eaorōk ej bwe kwoj Nejin. Im Ej iakwe eok Anij ej iakwe aolep ajri ro Nejin.
Kōnke Ej iakwe eok, Enaaj pukōt eok. Enaaj likūt eok ioon Aeran, im lan̄lōn̄. Im n̄e ej karool eok n̄an kapijuknen, Enaaj ba n̄an juon im n̄an aolep, “Kom̧in lan̄lōn̄ ippa; bwe Iar lo sip eo aō e kar jako.”3
Ta eo jej aikuj kōm̧m̧ane?
Ak, komaron̄ ļōmņak, ta eddo eo aō? Aaet ij aikuj kōm̧m̧an eļapļo̧k jān aō kōttar wōt aō bōk lo̧mo̧o̧r.
Ilo an Jemed eo em̧m̧an ikdelel bwe aolep ajri ro Nejin ren bar ro̧o̧l n̄an E, 4 Anij eban lo̧mo̧ren kōj ņae ankilad.
Innem ta eo jej aikuj?
Kūr in an epidodo kōm̧m̧an:
“Ro̧o̧ltok … n̄an eō.”5
“Itok n̄an Ippa.”6
“Kom̧in kepaatok Eō im Inaaj kepaakwaj kom̧.”7
En̄in ej wāween ad kwaļo̧k n̄an E bwe jekōņaan bōk lo̧mo̧o̧r.
Ej aikuj wōr jidik ad tōmak. Ak jen jab pere. Eļan̄n̄e komaron̄ katōk iņe eo kiiō, jino kōn kōjatdikdik.
Eļan̄n̄e komaron̄ ba kwojeļā bwe Anij emour, kwomaron̄ bōk kōjatdikdik bwe Emour. Kwomaron̄ ikdelel n̄an tōmak.8 Ebwe n̄an jinoe.
Innām, kōjerbal kōjatdikdik ņe, pukōt jipan̄ jān Jemedwōj Ilan̄. Anij enaaj erļo̧ke Iakwe eo An n̄an eok, im An jerbal in lo̧mo̧o̧r im ejaake enaaj jinoe.
Jet iien, kwonaaj kūle Pein ilo mour eo am. Kwonaaj en̄jake iakwe eo An. Im ikdelel eo n̄an etetal ilo meram eo An im lo̧o̧r iaļ eo An enaaj eddōkļo̧k ilo aolep bun̄tōn̄ ņe ko an tōmak ko kwoj kōm̧m̧ani.
Jej ņa etan bun̄tōn̄ kein an tōmak ej “pokake.”
Ejjab juon naan eo ekkā ad kōjerbale raan kein. Ak pokake ej juon katak eo jej lin̄ūri ilo gospel eo an Jisōs Kraist, kōnke jejeļā bwe “kōn Pinmuur eo an Kraist, aolep armej remaron̄ bōk lo̧mo̧o̧r, itok jān pokake kien ko im kain̄i ko an Gospel eo.”9
Ilo ad kōļapļo̧k ad tōmak, jej aikuj kōļapļo̧k ad tiljek. Moktaļo̧k Iaar kouti tok juon rijeje bok jān Germany eo me eaar būromōj kōn kakkure eo an Dresden. Eaar barāinwōt je naan in “Es gibt nichts Gutes, ausser: Man tut es.” N̄an ro me rejaje kajin celestial, ukook eo an in “Ejjeļo̧k men em̧m̧an m̧ae iien kwoj kōm̧m̧ane.”10
Kwe im N̄a jej kōnono ilo kajoor kōn men ko an jetōb. Jemaron̄ kabwilōn̄ armej kōn jeļā ko ad n̄an kōmeļeļeik katak ko an kabun̄ in. Emaron̄ itok limoid ilo ad kōm̧eļeļe kōn kabun̄ in im “antooņe tok jikin ko ad rem̧m̧an ilan̄.”11 Ak eļan̄n̄e tōmak ko ad rejjab ukōt wāween ad mour—eļan̄n̄e tōmak ko ad rejjab im̧we kōj kōn kālet ko ad aolep raan—kabun̄ ko ad rej waan, im ad tōmak, eļan̄n̄e rejjab mej, em̧ool eban em̧m̧an im epād ilo kauwatata im naaj jakoļo̧k.12
Pokake ej juon kajoor n̄an tōmak. Ej kōn pokake en̄in jej aiintok meram n̄an jetōb ko ad.
Ak jet iien jej pok kōn menin pokake. Jemaron̄ lo āinwōt juon kōttōpar, ijjeļo̧kin an juon iaļ n̄an tōpar kōttōpar ko ad. Ak jemaron̄ lukkun kōņaan bwe juon eo ejitōnbōro ippād en pokake kien ko āinwōt ad kōm̧m̧an jekjek ko reoktak ilo ad kōjerbal amma im aeen im kōn kajoor in kijeek n̄an dāpij jekjek eo em̧m̧an.
Ejjeļo̧k pere kōn menin, ewōr jet iien ko jej aikuj kajju n̄an armej bwe ren ukweļo̧k. Ilo m̧ool, jet armej rejjab maron̄ tōpar jekjekin.
Ak bōlen ewōr juon waanjon̄ak eo eoktak me emaron̄ kōmeļeļe etke jej pokake kien ko an Anij. Bōlen pokake ejjab kanooj juon jekjek an kakkob, in̄in̄tōk, im nono an jetōb ko ad n̄an juon me jejjab. Ijjeļo̧kin, ej juon jerbal ilo ad pukōt ta eo me em̧ool eaikuj kōm̧m̧an.
Kar kōm̧anm̧an kōj kōn Kajoor eo an Anij. E ej Jemedwōj Ilan̄. Jej lukkuun ajri in jetōb ro Nejin. Kar kōm̧anm̧an kōj kōn kein jerbal ko rekwojarjar im reaorōk tata im rekāāl tata, im bwe jej bōk ippād men ko rekwojarjar.
Ilo laļ in, ijoke, ļōmņak ko ad im makūtkūt ko ad retarpok kōn men ko renana, rejjab ekwojarjar, im rettoon. Ettoon im nana ko an laļ in rej katoone mour kein ad, kōm̧m̧an bwe en pen n̄an kile im kememej lukkun kadkadid im un ko ad.
Ak ejjab maron̄ ukōt lukkun kadkadid. Pedped eo ekwojarjar kōn kadkadid eban jako. Im iien eo jej kālet n̄an kōpelļo̧k būruōd n̄an ad Rilo̧mo̧o̧r ejitenbōro im kajjejet iaļ ko ad n̄an iaļan rikaļoor, juon men ekabwilōn̄lōn̄ enaaj waļo̧k. Iakwe eo an Anij ej kobrak buruōd; meram in m̧ool ej kobrak ļōmņak ko ad; ejino jako ad ikdelel n̄an kōm̧m̧an jerawiwi; im jejjab bar kōņaan etetal ilo marok.13
Jej itok n̄an lale bwe pokake ejjab āinwōt juon kaje ak ej juon iaļ em̧m̧an n̄an mejānkajjik eo ekwojarjar. Im jidik kōn jidik, nana, etoon, im likjab ko an laļ in rej jino jakoļo̧k. Āliktata, men eo ejjeļo̧k wōneen, jetōb eo ekwojarjar ewaļo̧k ippād, im jej erom kein jipan̄ ko rem̧m̧an.
Eļap Am Aorōk n̄an bōk Lo̧mo̧o̧r
Ro jeiū im jatu, im ro mōtta rejitenbōro, Ij kam̧ool bwe Anij ej kalimjōk kōj ilo lukkuun kōj—im E ej lo an wōr tokjed bwe jān bōk lo̧mo̧r.
Kwomaron̄ en̄jake bwe mour eo am epād ilo kauwōtata. Kwomaron̄ kar kōm̧m̧an bōd. Kwomaron̄ kar mijak, illu, būromōj, ak obrak kōn pere. Ak āinwōt juon Rilale Sip eo Em̧m̧an ej pukōt sip eo ejōbwābwe, eļan̄n̄e kwonaaj kōpelļo̧k buruōm n̄an Rilo̧mo̧o̧r eo an Laļ.
Enaaj lo̧mo̧o̧ren eok.
Enaaj kotak eok lōn̄ļo̧k im likūt eok ioon Aeran.
Enaaj bōk eok n̄an kapjuknen.
Eļan̄n̄e pā ko remaron̄ ukōt tipdikdik in dekā im ejaak juon im̧ōn jar eo eaibojoj, innām emaron̄ wōr lōke ippād bwe Anij eo ad ejitenbōro emaron̄ im enaaj bar ejaake kōj. Karōk eo An ej n̄an ejaake kōj n̄an juon men eo em̧m̧anļo̧k jān kar kōj mokta—em̧m̧anļo̧k jān ad pijaikļo̧k. Kōn kajjojo bun̄tōn nee an tōmak ilo iaļ eo an rikaļoor, jej eddōkļo̧k n̄an aiboojoj indeeo im lan̄lōn̄ eo ejjeļo̧k jem̧ļo̧k in me kar ejaake kōj n̄an erom.
En̄in ej naan in kam̧ool eo aō, aō kōjeram̧m̧an, im aō jar ettā ilo āt eo ekwojarjar etan ad M̧aajta, ilo etan Jisōs Krraist, amen