O Le A Ia Tuu Oe i luga o Ona Tauau ma Ave Oe i le Aiga
Saunia e Peresitene Dieter F. Uchtdorf
Fesoasoani Lua i le Au Peresitene Sili
E pei lava ona maua e le Leoleo Mamoe Lelei o Lana mamoe na leiloa, afai o le a e liliu atu lou loto i le Faaola o le lalolagi, o le a Ia maua foi oe.
O se tasi o manatuaga taufaamatau a o ou tamaitiiti e amata i le leoleoā o sailini mai se mea mamao o osofaiga mai le ea lea e fafagu ai a’u i luga mai le moe. E lei umi, ae sau se isi leo, o le vavaō ma le ūū o pe’ape’a, e faasolosolo lava ina leotetele ma luluina ai le ea. E pei ona aoaoina ai i matou e lo matou tina i le mea e fai, e tofu i matou o le fanau ma se ato ua saunia e u’u ma tamo’e i luga o le mauga i se malutaga mai pomu. A o matou tele’a’i i le pogisa o le po, e faapalalasi mai ni ailoiafi tetele meamata ma papa’e mai le lagi e faailoga ai mea e osofaia e le au faapapomu. O se mea uiga ese, e faaigoaina e tagata uma nei ailoiafi o laau Kerisimasi.
E fa ou tausaga, ma o au o se molimau i se taua a le lalolagi.
Dresden
E le mamao tele mai le mea na nonofo ai lo’u aiga o le aai o Dresden. O i latou na nonofo iina sa molimauina mea na ou vaaia e masalo o le faitau afe o taimi. O le sasao ma le sosolo o le afi, na mafua mai i le faitau afe o ane o pomu, le salalau atu i Dresden, ma faatamaia ai le silia ma le 90 pasene o le aai ma tuua ai le aai i le efuefu ma mea ua faaleagaina.
I se taimi puupuu lava, ole aai sa faaigoaina o le “Pusa o Maataua” ua le o toe i ai. Sa tusia e Erich Kästner, o se tusitala Siamani le faatafunaga e faapea, “E faitau afe tausaga na fausia ai lona matagofie, ae e tasi le po na faatafunaina ai atoa.”1 I le taimi a o ou laitiiti sa le mafai ona ou mafaufauina pe mafai faapefea e le faatafunaga a se taua na amataina e o matou lava tagata ona manumalo ai. Sa foliga mai o le lalolagi na siomia ai i matou ua leai atoa se faamoemoe, ua aunoa ma se lumanai.
E lei leva atu, sa ou maua ai le avanoa e toefoi atu ai i Dresden. I le fitusefulu tausaga talu mai le taua, ua toe i ai nei se aai o le “Pusa o Maataua.” O mea na faaleagaina ua toe faamamaina, ma ua toefuataiina le aai ma toe faaleleia.
I le taimi o la’u asiasiga sa ou vaaia ai le lotu matagofie a Luteru, o Frauenkirche, le Ekalesia a lo Tatou Masiofo. Sa uluai fausiaina i le vaitau o le 1700, sa avea ma se tasi o maataua iila i Dresden, ae sa nutililiiina i sina faaputuga otaota. Mo le tele o tausaga sa tumau ai pea faapena, seia oo ina faia i ai le faaiuga o le a toefausiaina le Frauenkirche.
O maa mai le falesa na faatafunaina na toe faaleleia ma toe faatulaga, ma afai e mafai, sa faaaogaina i galuega toefausiaina. O le asō e mafai ona e vaaia nei maa uli o loo togitogia ai fafo o le pa. O nei “togitogiga” e le na o se faamanatu o le talafaasolopito o le taua o lenei fale ae o se maa faamanatu foi i le faamoemoe—o se faatusa ofoofogia o le tomai o se tagata e fatufatua’i le ola fou mai le efuefu.
A o ou mafaufau loloto i le talafaasolopito o Dresden ma maofa i le atamai ma le naunautaiga o i latou o e na toefuataiina le nofoaga na faatamaia atoa, sa ou lagonaina le aafiaga suamalie o le Agaga Paia. E mautinoa lava, sa ou mafaufau ai, afai e mafai e le tagata ona ave mea ua faaleagaina, otaota, ma faatafunaga o se aai na masofa ma toefausia ai se fausaga ofoofogia lea e tulai ae e faasaga i le lagi, e le sili atu ea la le gafatia o lo tatou Tama Silisili ese e toefuatai Lana fanau o e e pa’u’u, tauivi, pe leiloloa foi?
E le afaina pe ono oo i le faatamaiaina atoa o o tatou olaga. E le afaina pe ulaula a tatou agasala, pe matuitui foi le oona, pe tuuatoatasi, tuulafoaiina, po o le nutimomoia o o tatou loto e ono oo i ai. E oo lava ia i latou ua aunoa ma se faamoemoe, o e o loo nonofo i le faanoanoa, o e ua faalataina le faatuatuaga, lafoai lo latou amiosa’o, pe upuleagaina i le Atua e mafai lava ona toe faufau. Sei vagana ai lava na atalii o le malaia, e leai lava se ola e matua olopalaina e le mafai ona toefuataiina.
O le talafou fiafia o le talalelei lenei: ona o le fuafuaga e faavavau o le fiafia ua saunia e lo tatou Tama Faalelagi alofa ma auala mai i le taulaga le i’u a Iesu le Keriso, e le gata e mafai ona togiolaina i tatou mai lo tatou tulaga pa’u ma toefuatai i le mama, ae mafai foi ona tatou alualu i luma e sili atu ma le mea e mafai ona mafaufauina e le tagata ma avea ai ma suli o le ola e faavavau ma ē mauaina le mamalu le mafaamatalaina o le Atua.
O Le Faataoto o le Mamoe na Leiloa
I le taimi o le galuega a le Faaola, sa lei taliaina e taitai faalelotu o Ona aso le faaaluina e Iesu o le taimi faatasi ma tagata na latou faailogaina o “tagata agasala.”
Masalo ia i latou sa foliga mai sa faatagaina pe taliaina foi e [Iesu] amioga agasala. Masalo na latou talitonu o le auala sili lava e fesoasoani ai i tagata agasala ia salamo o le ta’usalaina, faamaasiasia, ma le faalumaina lea o i latou.
Ina ua silafia e le Faaola manatu o le au Faresaio ma le au tusiupu, sa Ia faamatalaina se tala faigofie:
“O ai ea so outou e ana mamoe e selau, afai e le iloa le tasi, e le tuua e ia le ivagafulu ma le iva i le vao, a e alu ma saili i le ua le iloa, seia maua?
“A maua, ua faafuata ma le olioli.”2
I le aluga o seneturi, o lenei faataoto ua masani lava ona faauigaina o se valaau ia faatino mo i tatou le toe faafoi mai o le mamoe ua leiloa ma aapa atu ia i latou o loo leiloloa. E ui e mautinoa lava e talafeagai lenei mea ma lelei, ae ou te tuufesili lava pe o i ai se isi mea i talaatu.
Pe talafeagai ea ona faapea o le faamoemoega o Iesu, muamua lava, o le aoao atu lea e uiga i le galuega a le Leoleo Mamoe Lelei?
Pe talafeagai ea le faapea sa Ia molimau mai e uiga i le alofa o le Atua mo Ana fanau le usiusitai?
Pe talafeagai ea le faapea o le savali a le Faaola e faapea ua matua silafia atoa e le Atua i latou o e ua leiloloa—ma o le a Ia sailia i latou, o le a Ia aapa atu ia i latou, ma o le a Ia laveai i latou?
Afai o lea, o le a le mea e tatau ona faia e le mamoe ia agavaa ai mo lenei fesoasoaniga faalelagi?
E manaomia ea ona iloa e le mamoe le auala e faaaoga ai se masini tapasa e fuafua ai lona faatulagaga o le mamao o matu ma saute; e manaomia ea ona faaaoga se GPS e iloa ai le mea o i ai; e tatau ea ona i ai se tomai faapitoa e fatua’i ai se polokalama faakomepiuta lea o le a valaau atu mo se fesoasoani? E manaomia ea e se mamoe ni faamaoniga mai se tagata lauiloa a o lei alu atu le Leoleo Mamoe Lelei e laveai mai?
Leai. E mautinoa lava e leai! E agavaa le mamoe i le laveaiga faalelagi ona e alofagiaina e le Leoleo Mamoe Lelei.
Ia te a’u, o le faataoto o le mamoe na leiloa o se tasi o fuaitau sili ona faamoemoeina i tusitusiga paia uma.
O lo tatou Faaola, le Leoleo Mamoe Lelei, e silafia ma alofa ia i tatou. Na te silafia ma alofa ia te oe.
Na te silafia le taimi e te leiloa ai, ma Na te silafia le mea e te i ai. Na te silafia ou faanoanoaga. Au aioiga leleoa. Ou popolega. Ou loimata.
E le afaina pe na faapefea ona e leiloa—pe na e leiloa ona o au lava filifiliga le lelei pe ona o ni tulaga na le mafai ona e puleaina.
O le mea e taua o oe o Lona atalii [po o le afafine]. Ma e alofa o Ia ia te oe. E alofa o Ia i Lana fanau.
Ona e alofa o Ia ia te oe, o le a Ia saili ai ia te oe. O le a Ia faafuata ia te oe ma le olioli. Ma a Ia aumaia oe i le aiga, o le a Ia faapea atu i tagata uma, “Ia tatou olioli ia ma a’u; aua ua ou maua la’u mamoe na le iloa.”3
O Le A se Mea e Tatau Ona Tatou Faia?
Ae, atonu e te mafaufau, o le a so’u tiute? E mautinoa lava e tele atu mea e ao ona ou faia nai lo le tau na ona faatalitali ina ia laveaiina.
E ui e finagalo lo tatou Tama alofa ia toefoi atu uma Lana fanau ia te Ia, ae o le a Ia le faamalosia lava se tasi e alu atu i le lagi.4 O le a le laveaiina e le Atua i tatou pe a le tusa ai ma o tatou loto.
O le a la se mea e tatau ona tatou faia?
E faigofie lava Lana valaaulia:
“Toe foi mai ia te a’u.”5
“O mai ia te a’u.”6
“Faalatalata mai ia te a’u ma o le a Ou faalatalata atu ai ia te outou.”7
O le auala lenei tatou te faaali atu ai ia te Ia o loo tatou mananao ina ia laveaiina.
E manaomia ai sina faatuatua teisi. Ae aua le faanoanoa. Afai e le o mafai ona e fatuina le faatuatua i le taimi nei, amata i le faamoemoe.
Afai e le o mafai ona e fai atu e te iloaina o loo i ai le Atua iina, e mafai ona e faamoemoe o loo i ai o Ia. E mafai ona e manao ia talitonu.8 Ua lava lena e amata ai.
Ona faatino lea e tusa ma lena faamoemoe, fesootai atu i lou Tama Faalelagi. O le a faasafua mai e le Atua Lona alofa ia te oe, ma o Lana galuega o le laveai ma le liuaina o le a amataina.
I le aluga o taimi, o le a e iloa ai Lona aao i lou olaga. O le a e lagonaina Lona alofa. Ma o le a faateleina lou manao e savali i Lona malamalama ma mulimuli i Ona ala i laa uma o le faatuatua e te faia.
Tatou te ta’ua nei laasaga o le faatuatua o le “usiusitai.”
E le o se upu taatele lena i nei aso. Ae o le usiusitai o se manatu faavae taua i le talalelei a Iesu Keriso, ona tatou te iloa e “ala i le Togiola a Keriso, e mafai ai ona faaolaina o tagata uma, e ala i le usiusitai i tulafono ma sauniga o le Talalelei.”9
A o faateleina lo tatou faatuatua, e tatau foi ona faateleina lo tatou faamaoni. Sa ou ta’ua muamua se tusitala Siamani o le sa faavauvau i le faatafunaga o Dresden. Sa ia tusiaina foi lenei fasifuaitau: “Es gibt nichts Gutes, ausser: Man tut es.” Mo i latou e le tautatala i le gagana faaselesitila, e faaliliuina faapenei “E leai ma se mea lelei vagana ua e faia.”10
Atonu e matua manino lo tatou tautatala i mea faaleagaga. Atonu tatou te faagaeetiaina tagata i la tatou faaliliuga atamai ma le poto o autu faalelotu. Atonu tatou te tautatala ma le naunautai e uiga i tapuaiga ma “moemiti i o [tatou] maota i lugā.”11 Ae afai e le suia e lo tatou faatuatua le ala tatou te ola ai—afai e le faatosinaina e o tatou talitonuga a tatou faaiuga i aso taitasi—ua le aoga la tatou tapuaiga, ma lo tatou faatuatua, afai e le o mate, e mautinoa lava la e le o maloloina ma ua lamatiaina i le mate ai i se taimi mulimuli ane.12
O le usiusitai o le toto ola lea o le faatuatua. E ala i le usiusitai tatou te mauaina ai le malamalama i o tatou loto.
Ae o nisi taimi ou te manatu tatou te malamalama sese ai i le usiusitai. Atonu tatou te vaai i ai o le sini lava lea, nai lo se auala e ausia ai le sini. Ia po o lo tatou sasa pea lava pea o le usiusitai i poloaiga i se taumafaiga fai faamalosi e mamanu i latou tatou te alolofa i ai, ina ia avea ma se tagata paia atu ma faalelagi.
E le masalomia lava, e i ai taimi tatou te manaomia ai se valaau malosi ia salamo. E mautinoa lava, o loo i ai isi e na o le pau lea o le faiga e pa’i atu i ai.
Ae masalo o loo i ai se faatusa e ese ai lea e mafai ona faamatalaina ai pe aisea tatou te usiusitai ai i poloaiga a le Atua. Atonu o le usiusitai e le o le faagasologa tele lea o le tau gagauina, mimiloina ma le sasaina faamalosi o o tatou loto i se mea e le talafeagai ma i tatou. Masalo, nai lo lena, o le faagasologa lea tatou te iloaina ai mea o loo fauina moni ai lava i tatou.
Ua foafoaina i tatou e le Atua Silisili ese. O Ia o lo tatou Tama Faalelagi. O i tatou moni o Ana fanau agaga. Ua foafoaina i tatou i anomea faalelagi sili ona taua ma silisili ona lelei, ma o lea o loo tatou tauaveina ai i totonu o i tatou lava se totino o le paia.
Peitai, iinei i le lalolagi, o o tatou mafaufauga ma amioga e faatosinaina e mea le lelei ia e piopio, e le paia, ma lē mama. O le pefu ma le eleelea o le lalolagi e pisipisia ai o tatou agaga, ma faigata ai ona iloaina ma manatuaina lo tatou tofi ma le faamoemoega.
Ae e le mafai ona suia ai o tatou tagata moni. O le paia autu o lo tatou natura e tumau pea. Ma o le taimi tatou te filifili ai e liliu atu o tatou loto i lo tatou Faaola pele ma savavali i le ala o le avea ma soo, e tupu lava se mea faavavega. E faatumulia e le alofa o le Atua o tatou loto; o le malamalama o le upumoni e faatumulia ai o tatou mafaufau; e amata ona leai so tatou manao i le agasala; ma tatou le toe mananao ai e savavali i le pouliuli.13
E oo ina tatou le vaai atu i le usiusitai o se faasalaga ae o se ala laveai e tau atu i lo tatou taunuuga faalelagi. Ma e amata faasolosolo lava ina aveesea mea piopio, mea eleelea, ma tapulaa o lenei lalolagi. E le pine, ae faaalia mai le agaga e faavavau e silisili ona taua o le tagata faalelagi o loo i totonu o i tatou, atoa ai ma se susulu o le lelei e avea ma o tatou natura.
E Taua le Laveaiina o Oe
Ou uso e ma tuafafine pele, o au uo pele, ou te molimau atu e silafia e le Atua i tatou i o tatou tagata moni lava—ma Na te silafia le taua o le laveaiina o i tatou.
Atonu e te lagonaina ua faaleagaina lou olaga. Atonu ua e agasala. Atonu e te fefe, ita, faanoanoa, pe o faapologaina e masalosaloga. Ae e pei lava ona maua e le Leoleo Mamoe Lelei o Lana mamoe na leiloa, afai o le a e liliu atu lou loto i le Faaola o le lalolagi, o le a Ia maua foi oe.
O le a Ia laveai ia te oe.
O le a Ia sii oe i luga ma tuu oe i luga o Ona tauau.
O le a Ia ave oe i le aiga.
Afai e mafai e lima o tagata ona suia otaota ma mea ua faaleagaina i se fale matagofie o tapuaiga, e mafai foi la ona tatou maua le mautinoa ma le faatuatuaina e mafai ma o le a toefausia i tatou e lo tatou Tama Faalelagi alofa. O Lana fuafuaga o le fausia o i tatou i se mea e matua sili atu nai lo tagata na tatou i ai—matua sili atu nai lo tagata e mafai ona tatou mafaufauina. Faatasi ai ma laa taitasi o le faatuatua i luga o le ala o le avea ma soo, tatou te tuputupu ae ai i tagata o le mamalu e faavavau ma le olioli le i’u na mamanuina i tatou e avea ai.
O la’u molimau lea, o la’u faamanuiaga, ma la’u tatalo faamaulalo lea i le suafa paia o lo tatou Matai, i le suafa o Iesu Keriso, amene.