Bon Ngai natin te Atua

Aan ara tua ae moan baan te kakawaki iroura n ikotaki ma te atatai are ngaira natin te Atua ae maiu. Anne bon ibukin teuana Arana ae moan te tabu ae te Tama—te Tama are i Karawa. Te tua aio e a kaman mataata n reiakinaki irouia burabeti rinanon rongorongoia ngkoa:

• Ngke e kariiriaki iroun Tatan, Moote e rawa ni kan nakoina, ao e titiraki bwa Antai Ngaia? Moote e kaotia nakon Tatan bwa, Ngaia bon natin te Atua.”¹

• E taetae nakoia tibun Iteraera, e katanoata te Tia Korei Taian Areru, “Ngkami ni kabane natin Teuare Moan te Rietata.”²

• Bauro e reireiia kain Atenai iaon te Tabuki ae Mwaati bwa ngaiia bon “natin te Atua.”³

• Iotebwa Timiti ao Sidney Rigdon a karekea te mii ni burabeti n aron ae a noora te Tama ao te Nati, ao te bwanaa mai karawa e taetae bwa kaain aonaaba “bon bon naati mwaane ao aine aika karikaki iroun te Atua.”⁴

• N te 1995, 15 abotoro aika a maiu ao taian burabeti a tia ni kamatoaaki: “Aomata ni kabane … a karikaki n katotongan te Atua. Ngaiia n tatabemaniia nako bon naati mwaane ao naati aine n tamnei irouia ara karo ake i karawa.”⁵

• E kakoaua Beretitenti Thomas S. Monson: “Ngaira bon naati mwaane ao naati aine iroun te Atua ae maiu. … Ti kakoaua aei bwa aomata a karikaki ni katotongan te Atua n aki rinanon te namakin ae boou n te korakora ao te mwaaka.”⁶

Te tua aio e bon rang bebete, e taekinaki ni katoa tai, ao e ngae n anne e karaoaki bwa e na bebete bwa e na kona n taraa n riki ni bwai, ngke ni koauana e mena ibuakon kamimiin te atatai are ti kona ni karekea. Etin te atatai n te bwaibwai i karawa e bon kakawaki ibukin te karietataaki. Bon aan te atatai n ataakina bwa te babaire ae mimitong ni kamaiu ao n tararuan te onimaki iroun A na Moan nati te Tama, Iesu Kristo, ao Ana nanoanga n Ana Mwakuri ni Kamaiu.⁷ N raonaki ma anne, e karekea kaungakira ae e reitinako ao ni kawakin berita aika tabu aika akea tokiia.

Ma tabeua bwaai aika aki kairaki, aomata ni kabane ake a ira te boowi aei ngkai a kona, n akea kamatenano aika koreaki ke katangitang, n anenea “Ngai Natin te Atua.”⁸ Te anene n taromauri aei bon teuana ae e aki toki n aneneaki n te taromauri. Ma te titiraki ae kaangaanga bon, ti ataa raoi aei? Ti ataia n ara iango ao inanora ao n tamneira? Ara karo ake i karawa a moan kinaa kakawakira?

Ikai iaon te aba, ti kinaira ni kawai aika mwaiti aika kakaokoro, n ikotaki ma ara tabo ake ti bungiaki iai, abara, ao oin ara taetae. Tabeman a kinaiia riki man aia mwakuri ke bwaai ake a tangiria ni kan karaoi. Kinaakira aikai iaon te aba a aki kairua ma ti ngkana a oneakimwiia ke ni kamangaoaki ma kinaakira ae akea tokina—are ngaira naati mwaane ao naati aine iroun te Atua.

Ngke ai onoua ana ririki natira ae uarereke ao n ana moan koraki n te reirei, ana tia reirei ae te aine e anganiia ataein te kiraati baike e mwiokoia iai bwa a na koroi. Bon inanon Okitobwa, namwakainan te Aerowiin ae aia bong anti, e karaoaki bwa te tai ni motirawa n te tai aei n aaba tabeua n te aonaaba. Ngkai bon tiaki au bong ni motirawa ae I tatangiria, I kantaningaia bwa a na iai tabeman aika akea aia bure ao a rau aia kantaninga n tain te Aerowiin ae aia bong anti.

E kabutii taian beebwa te tia reirei nakoia ataein te reirei. Ietan te beebwa ao iai tamnein te antimaomata man te boki ni karaki (I tuangko tiaki aio au bong ni motirawa ae I tatangira) ae tei iaon te kamwaa ae bane buron ranna. E toka te titiraki iaon baana are te iterana, ni kaungai aia iango ataei ao n tuoi moan aia konabwai ni koroboki, bon “Ko a tiba tia ni moi n ana mwangko n tabunea te antimaomata. Tera ae e riki iroum?” Taiaoka ataia bwa te karaki aei e aki tibwauaaki n aron tuangakiia taan reirei bwa tera ae a na karaoia.

“Ko a tibwa tia ni moi n ana mwangko n tabunea te antimaomata. Tera ae e riki iroum?” Ma ana moan koroboki ae tamaroa, natira ae uarereke aio are e koroia, “N na mate ao N na mena i karawa. I tangira ni mena ikekei. I tangiria ibukina bon te tabo ae te kabanea n tamaroa ibukina ko a mena ma Tamam are i Karawa.” Te kaeka aei e rang kubanako iai ana tia reirei; e ngae n anne, ngke e a uota n oki ana beeba n reirei natira te aine are e mwiokoaki iai, ti nooria bwa e anganaki te titaa, te bwii ae moan te rietaata.

N te maiu aei, ti kaitara ma kaangaanga aika koaua, aika aki karioaki. Iai te maraki—n te rabwata, n te namakin, ao n te tamnei. Iai uruaki n nano ngkana a kakaokoro kaangaanga man bwaai ake ti a tia ni kantaningai. Iai te aki motiraoi ngkana ti aki taraa ni kororaoi n arora. Iai te aki rau n nano ngkana e uotiira rikaaki temanna ae ti rangin onimakinna. Iai te marurung ao kaangaanga n te mwane ibukin te maiu. Iai taai n titiraki n akea te mataata ngkana reiakinan te tua ke rongorongon ngkoa e riaon ara atatai ae ngkai.

Ngkana iai bwaai aika a riki inanon maiura, tera ara kaeka ae waekoa? E kona n ae te nanououa ke te aki koaua ke kararoaan te tamnei? Kubanakora ae aki kantaningaki nakon ara onimaki? Ti na bukina te Atua ke tabeman n aroarora ake ti mena inanona? Ke bon ara moan kaeka n uringakira bwa antai ngaira—bwa ngaira natin te Atua ae tangira? Anne e ikotaki ma te onimaki raoi bwa E kariaia bwa a na iai tabeua karawawataaki iaon te aba ibukina E ataia bwa te bwai anne e na kakabwaiaira, n aron itiakin uran te ai, n riki n ai Arona ao ni karekea te bwaibwai ae akea tokina?⁹

N te tai ae e a tibwa nako, I boowi ma Unimwaane Jeffrey R. Holland. N reiakinan te reirei bwa te maiu ae mamate e kona ni kamaraki ma ni karawawata ma ara kaangaanga bon iai bukiia n aki totoki—e ngae ngkana ti aki oota ao n taneiai ma te kaangaanga—E taku Unimwaane Holland, “Ko kona ni karekea te bwai ae ko tangiria ke ko kona ni karekea te bwai ae tamaroa.”

Nimaua te namwakaina n nako, Ngai ma kainnabau, ae Dianne, ti nako Aberika ma Unimwaane ao Titita David A. Bednar. Te kaonoua ao ni kabanea n aba are ti kawaria bon Liberia. Liberia bon te aba ae bubura ma aomatana aika iai aroia ao a kaubwai n rongorongoia, ma aron te mwakuri ikekei e aki rang bebete. Inanon bwi n ririki iai te aki nakoraoi n tuan te tautaeka ao te ibubuaka irouia kaain te aba e a kakorakora aron te maiu ni kainnano. Ma iaon anne, e a butinako te aoraki ae te Ebola n tiringa te mwaiti n aomata ae e kaniia 5,000 ikekei ni butinakon te aoraki ae nako. Bon ngaira moan kurubu mairouia taan kairiiri n te Ekaretia ni kawara Monrovia, atuun te kaawa ae bubura, ngke ana Bootaki ni Kuakua te Aonaaba e katanoata bwa e a mano riki te mwakuri imwiin tokin butin te aoraki ae te Ebola.

N ingabongin te Tabati ae kabuebue ma n aoi, ti mwananga nakon te boowi n te auti ae tatangoaki inukan te kaawa ae bubura. A bane ni baireaki kaintekateka, bootan mwaitina bon 3, 500. Kabanean te mwaiti are e warekaki ibukiia ake a roko bon 4, 100. Bon angiina ake a roko a bon rianna ke tabeman ibukin aki angaraoin bao ni mwamwananga ibukiia te botanaomata; e bon aki bebete aei ibukiia Aomata aika Itiaki n roko n ira te bwabwaro. Ma a roko. Angiina a roko tabeua te aoa imwaain boon te tai. Ngke tia roko n te bootaki, angin te tamnei kanga ai aron te iti! Aomata aika Itiaki a tauraoi n reireinaki.

Ngke e atong kibun booki aika tabu te tia taetae, kaain te aro a taekinna n takarua. Akea angan aei—kiibu aika uarereke ke a abwabwaki; kaain te taromauri ae bwanin a kaeka n ae ti te arona. Ngkai, ti aki riai ni karaoa aei, ma e bon rang kakukurei bwa a kona ni karaoia. Ao te kuaea—a matoa angiia. Ma te tia kairiiri n te kuaea ae angang ao te ataeinimwaane ae 14 ana ririki e katanga te aokan, kaain te aro ma angin nanoia ae korakora.

Ngkanne e taetae Unimwaane Bednar. Aei, e koaua, bon boton raoi te bwabwaro ae kantaningaaki—n ongoraean aia reirei Abotoro ao aia kakoaua. N ae mataata raoi ma ana kairiiri te tamnei, ni mwakoron nuukan ana taeka, e toki Unimwaane Bednar ao e taku, “Kam ataa te anene ae ‘Ai Matoara Nanoia aika Raraoi’?”

E taraa n ae 4,100 bwanaa ake a kaeka n takarua, “ENG!”

Ngkanne E a manga titiraki, “Kam ataa kibuna ae 7?”

A manga kaeka naba te kurubu ae bwanin aei, “ENG!”

Te katauraoi n anenen te taromauri ae korakora “Ai Matoara Nanoia aika Raraoi” ae aneneaki man te Moomon Tabaenako Kuaea ibukin 10 te ririki e kairaki naba ma kibuna ae 7, are e aki bati n aneneaki mai imwaaina. E tua Unimwaane Bednar, “Ti na anenei kiibu 1, 2, 3, ao 7.”

N akean taina, te tia kairiiri n te kuaea e waekoa n teirake ao kaain te Nakoanibonga n te Aaron–e raonna ao ni waekoa n nakon te biaano ni katangitanga ana moan koote. Ma mwakoron te namakin n onimaki are I tuai n namakinna mai mwaaina n te bootaki n anene n taromauri, ti anenei kiibu 1, 2, ao 3. Ngkanne te bwanaa ao korakoran te tamnei e keerake ngke 4,100 bwanaa a anenea te kaitiua ni kibu ao n katanoata:

Ai tibwa te tabo aio ae moan te tamaroa n namakinan te tamnei inanon maiu, I reiakinaki te reirei ae tamaroa n te bong anne. Ti maeka n te aonaaba are e kona ni kamwaningaira bwa antai ngaira ni koaua. Bwaai ni katabetabe ake a katobibiira, bebetena ti na aki tabeakina temanna, ngkanne ti na mwanuokinna, ao ngkanne ti a mwaninga ara reitaki ma te Atua. Aomata aika Itiaki i Liberia akea aia bwai ni mwakuri ae kakawaki, ma e taraa n iai bwaai ni kabane irouia n te tamnei. Te bwai are ti kakoaua n te bong anne i Monrovia bon kurubu aika naati mwaane ao naati aine iroun te Atua—ake a ataia!

N te aonaaba ni boong aikai, e aki kangai bwa ti mena ia ao e aki kangai bwa tera arora, ae moan baan te kakawaki bon kinaakira bwa natin te Atua ngaira. N ataakina bwa e na kariaia ara onimaki bwa a na maiureirei, e na kaungaira bwa ti na reitanako ara rairannano, ao e na karekea korakorara n “nene ao n aki kamwaieieaki” rinanon mwanangara n rabwata.¹¹ N aran Iesu Kristo, amen.