2010–2019
KuvYogVajtswv Ib tug Me Nyuam
2016 April General Conference


Kuv Yog Vajtswv Ib tug Me Nyuam

Qhov uas peb to taub zoo txog peb txoj kev los saum ntuj los yeej tseem ceeb heev rau peb txoj kev tsa nto.

Peb ib txoj lus qhuab qhia tseem ceeb qhia hais tias peb yog Vajtswv cov me nyuam. Yog vim li ntawd Vajtswv thiaj muaj lub npe dawb ceev hu ua Leej Txiv—Leej Txiv Saum Ntuj Ceeb Tsheej. Cov yaj saub yeej los tau qhia txoj lus qhuab qhia no ib tiam dhau ib tiam los:

  • Thaum Ntxwg Nyoog ntxias Mauxes, Mauxes xyeej nws, hais tias: “Koj yog leej twg? Vim saib seb, kuv yog Vajtswv ib tug tub.1

  • Hais rau tsev neeg Ixayees, tus Hu Nkauj tshaj tawm hais tias, “Nej tag nrho yog me nyuam ntawm tus Siab tshaj plaws.2

  • Pov Lauj qhia cov neeg Athees saum lub toj Mars hais tias lawv yog ”Vajtswv cov me nyuam.”3

  • Yauxej Xamiv thiab Sidney Rigdon tau ua yog toog pom Leej Txiv thiab Leej Tub, thiab ib lub suab saum ntuj ceeb tsheej tau tshaj tawm hais tias cov neeg ntiaj teb “yog Vajtswv cov tub cov ntxhais uas Nws tsim.4

  • Thaum xyoo 1995, 15 tug thwj tim thiab yaj saub tau hais khov kho hais tias: “Txhua txhia tus tib neeg … raug tsim muaj yam ntxwv zoo li Vajtswv. Txhua tus yog ib tug ntsuj plig tub los sis ntxhais ntawm ib khub niam txiv saum ntuj ceeb tsheej uas hlub peb.5

  • Thawj Tswj Hwm Thomas S. Monson ua tim khawv hais tias: “Peb txhua tus yog Vajtswv uas muaj txoj sia nyob cov tub thiab cov ntxhais. … Yog tias peb ntseeg qhov no tiag tiag ces peb yeej yuav txais dag zog thiab hwj chim tshiab los tshoov peb tej siab.”6

Txoj lus qhuab qhia no yeej yooj yim to taub thiab yog ib yam uas peb hais ntau zaus npaum li tias zoo li yog ib yam zoo hauj sim xwb, tiam sis txoj lus qhuab qhia no yog ib txoj kev txawj ntse uas zoo tshaj plaws uas peb kawm tau. Qhov uas peb to taub zoo txog peb txoj kev los saum ntuj los yeej tseem ceeb heev rau peb txoj kev tsa nto. Txoj kev txawj ntse no ua lub hauv paus pab peb to taub txoj kev cawm seej thiab muaj siab ntseeg Leej Txiv Tib Leej Tub, Yexus Khetos, thiab Nws txoj kev Theej Txhoj.7 Tsis tas li ntawd xwb, nws pab peb muaj siab xav nrog Vajtswv sib khi lus mus ib txhis li.

Raws li kuv xav, txhua tus neeg ntawm no paub hu zaj nkauj, “Kuv Yog Vajtswv Me Nyuam.”8 Zaj nkauj no yog ib zaj nkauj uas peb hu ntau zaus hauv lub Koom Txoos no. Tiam sis lo lus nug tseem ceeb heev yog, peb puas paub li ntawd tiag tiag? Peb puas paub li ntawd kawg siab kawg ntsws kawg plab kawg plawv? Qhov uas peb muaj niam muaj txiv saum ntuj puas yog lub hauv paus ntawm peb tus kheej?

Nyob saum lub ntiaj teb no, peb hais txog peb tus kheej siv ntau yam sib txawv, xws li hais tias peb yug los qhov twg, tuaj qhov twg tuaj, thiab hais yam lus twg. Ib txhia neeg txheeb xyuas lawv tus kheej thaum lawv qhia tias lawv ua hauj lwm dab tsi los yog ua si dab tsi. Tej yam uas peb hais txog peb tus kheej tsis txhaum kev cai dab tsi tsuas yog ua li ntawd pauv los sis tab kaum peb tus kheej uas nyob mus ib txhis li—qhov uas peb yog Vajtswv ib leej tub los sis leej ntxhais.

Thaum kuv tus ntxhais yau muaj rau xyoo thiab kawm qib ib, nws tus nais khu tau hais kom cov me nyuam sau ib daim ntawv hauv hoob kawm ntawv. Thaum ntawd yog lub Kaum Hli Ntuj, lub sij hawm Halloween, ib hnub phav uas ib txhia neeg nco txog. Txawm tias hnub Halloween tsis yog hnub phav uas kuv nyiam ntau tshaj plaws, tej zaum muaj tej yam zoo hais txog nws thiab.

Tus nais khu tau muab ib daim ntawv rau txhua tus tub kawm ntawv. Nyob saum toj yog ib daim duab hais txog ib tug witch uas npau nphwv (kuv twb hais tias yog hnub phav uas kuv nyiam ntau tshaj plaws) uas tab tom do nws cov kua tshuaj. Xwv kom cov me nyuam xav thiab ua npau suav thiab sim seb lawv sau ntawv zoo li cas, lo lus nug uas daim ntawv nug yog “Koj nyuam qhuav haus tus witch no ib khob kua tshuaj. Es txawm muaj dab tsi los?” Thov to taub hais tias zaj lus no tsis yog qhia ib tsoom nais khu saib lawv yuav tsum ua li cas.

“Koj nyuam qhuav haus tus witch no ib khob kua tshuaj. Es txawm muaj dab tsi los?” Kuv tus ntxhais yau txawm sau hais tias, “Kuv yuav tuag thiab kuv yuav nyob saum ntuj ceeb tsheej. Kuv yuav nyiam qhov chaw ntawd. Kuv yeej yuav nyiam heev vim qhov chaw ntawd yog qhov chaw zoo tshaj plaws vim yus yuav nrog Leej Txiv Saum Ntuj Ceeb Tsheej nyob ua ke.” Tej zaum cov lus no ua rau nws tus nais khu xav tsis thoob; txawm yog li ntawd, thaum wb tus ntxhais nqa nws daim ntawv los tsev, peb pom tau tias nws tau ib lub hnub qub, tus nqi zog siab tshaj plaws.

Hauv lub neej no, peb yeej muaj tej kev cov nyom uas muaj tiag tsis yog npau suav xwb. Muaj kev mob kev nkeeg—txawm yog ntawm lub cev nqaij daim tawv, lub paj hlwb, los yog sab ntsuj plig. Lub siab yeej ntais rhe thaum tej yam uas muaj los txawv tej yam uas peb xav kom muaj los. Yeej tsis tsim nyog thaum peb tsis tau ua dab tsi kom thiaj muaj tej teeb meem li no los rau peb. Peb yeej tu siab thaum ib tug neeg uas peb tso siab rau ua rau peb tsis ntseeg nws lawm. Yeej muaj tej kev mob kev nkeeg thiab tej kev poob nyiaj txiag uas yuav ua rau peb ntxhov siab heev. Tej zaum muaj tej lus nug uas peb teb tsis tau zoo tam sim no hais txog tej lus qhuab qhia los yog tej keeb kwm.

Thaum tej yam nyuaj no muaj los rau peb lub neej, peb ua dab tsi tam sim ntawd? Peb puas ntxhov siab, tso peb txoj kev ntseeg tseg, los yog tsis ntxiv dag zog rau peb sab ntsuj plig? Puas yog ib yam uas ua rau peb txoj kev ntseeg puas tsuaj mus? Peb puas liam Vajtswv los yog lwm tus neeg vim yog peb tej teeb meem? Los yog peb puas nco qab ntsoov hais tias peb yog leej twg tiag—hais tias peb yog Vajtswv cov me nyuam? Peb puas tso siab rau Vajtswv hais tias Nws cia peb txom nyem me ntsis hauv lub neej no vim Nws paub hais tias qhov ntawd yuav foom koob hmoov rau peb, kom peb thiaj rais los mus ua neeg zoo li Nws thiab txais yuav peb qub txeeg qub teg nyob mus ib txhis li?9

Tsis ntev tas los no, kuv koom ib txoj kev sib ntsib ua ke nrog Txwj Laug Elder Jeffrey R. Thaum nws qhia txoj ntsiab cai hais tias lub neej no yeej nyuaj heev tiam sis peb tej kev cov nyom yeej muaj lub ntsiab nyob mus ib txhis—txawm tias peb tsis to taub zoo thaum lub sij hawm uas peb raug—Txwj Laug Holland hais tias, “Nej txais tau tej yam uas nej xav tau, los yog nej txais tau ib yam zoo dua ntais.”

Tsib hlis dhau los, kuv poj niam, Diane, thiab kuv tau mus xyuas Afika teb chaws ua ke nrog Txwj Laug thiab tus Muam David A. Bednar. Lub teb chaws thib rau thiab lub kawg uas peb mus xyuas yog teb chaws Liberia. Liberia yog ib lub teb chaws zoo kawg uas muaj ib haiv neeg uas coj tus thiab ib zaj liv xwm zoo kawg, tiam sis nws yeej tsis yooj yim ua neej nyob nyob ntawd. Lub teb chaws yeej ntxhov ntev lawm thiab cov neeg pluag thiab txom nyem heev. Tsis tas li ntawd xwb, tus kab mob Ebola tau raug rau kam 5,000 tus neeg zaum tas los uas tus kab mob ntawd kis rau sawv daws. Peb yog thawj pawg thawj coj ntawm ib lub Koom Txoos twg uas tau mus xyuas lub tuam ceeb Monrovia, txij thaum lub Koom Haum Saib Xyuas Ntiaj Teb Kev Noj Qab Nyob Zoo tau tshaj tawm hais tias lub teb chaws ntawd rov qab puaj phais mus xyuas tom qab muaj phaum mob Ebola ntawd.

Thaum ib hnub Sunday yav sawv ntxov, peb taug kev mus rau ib qho chaw uas peb tau xaub uas nyob hauv plawv nroog. Txhua txhia lub rooj zaum uas muaj yog teeb tseg, kam 3,500 lub. Thaum kawg yog 4,100 tus neeg uas tuaj koom txoj kev sib ntsib ntawd. Yuav luag tag nrho cov neeg uas tuaj yuav tsum nplawm ko taw los yog caij npav tuaj; yeej tsis yooj yim rau Tsoom Haiv Neeg Ntseeg sib ntsib ua ke. Tiam sis lawv txawm tuaj. Lawv feem coob tuaj txog ob peb teev ua ntej lub sij hawm teem sib ntsib. Thaum peb nkag lub tsev ntawd, qhov chaw puag ncig raug rau peb sab ntsuj plig ib yam li fais fab tom! Cov Ntseeg no twb npaj txais lus qhuab qhia lawm.

Thaum peb ib tug neeg nyeem ib nqes vaj lug kub, ces cov ntseeg yuav rov qab hais nqes vaj lug kub ntawd nrov. Txawm tias nqes vaj lug kub uas hais ntawd yog ntev los luv, tag nrho pawg ntseeg ntawd hais tau ua ke. Nim no, peb tsis tshua xav kom nej ua li ntawd, tiam sis yeej ua rau yus xav tsis thoob uas lawv ua tau li no. Thiab pawg hu nkauj—mas lawv muaj hwj chim ntau kawg. Pawg hu nkauj muaj ib tug coj nkauj uas zoo siab heev thiab ib tug me nyuam tub 14 xyoos uas ntaus nkauj, thiab lawv sib zog hu nkauj.

Ces Txwj Laug Bednar hais lus rau sawv daws. Qhov uas nws hais lus no yog qhov uas txhua tus neeg cia siab rau—kom mloog ib tug Thwj Tim qhia thiab ua tim khawv. Zoo li yog tus Ntsuj Plig tshoov nws siab, thaum nws hais lus txog nrab, Txwj Laug Bednar nres thiab hais tias, “Nej puas paub zaj nkauj ‘Lub Hauv Paus Ruaj Nrees’?”

Zoo li 4,100 lub suab hais lus nrov nrov ntsuag qees hais tias, “PAUB LOS MAS!”

Ces nws nug hais tias, “Nej puas paub nqes 7?”

Ib zaug ntxiv pawg neeg teb hais tias, “PAUB MAS!”

Cov Neeg Maumoos Tsev Kheej Pawg Hu Nkauj tau hu zaj nkauj no tag nrho 7 nqes tau 10 xyoo los lawm no, tiam sis ua ntej ntawd lawv tsis tshua hu nqes 7. Txwj Laug Bednar txawm hais tias, “Cia peb hu nqes 1, 2, 3, thiab 7.”

Lawv twb tsis ua xyem xyav, tus coj pawg hu nkauj thiab tus tub hluas ntaus nkauj puav leej dhia mus coj thiab ntaus rau sawv daws hu. Peb sawv daws rau rau siab hu zaj nkauj no nqes 1, 2, thiab 3, sib zog heev. Ces tag nrho cov suab hu ua ke txawm nrov tshaj plaws thiab muaj hwj chim ntawm sab ntsuj plig ntau tshaj plaws thaum 4,100 lub suab hu nqes xya hais tias:

Tus neeg rau siab ntseeg Yexus, tus uas tso siab plhuav

Kuv yeej tsis muaj cuab kav tso nws tseg rau yeeb ncuab;

Txawm tag nrho ntuj txiag teb tsaus tshee hnyo kawg li.

Kuv yeej tsis, yeej yuav tsis, kuv yeej tsis, yeej yuav tsis,

Kuv yeej tsis, yeej yuav tsis, tso nws tseg mus ib txhis!10

Qhov uas muaj los no yog ib yam tseem ceeb ntawm sab ntsuj plig hauv kuv lub neej, kuv tau kawm ib yam dab tsi tseem ceeb heev hnub ntawd. Peb ua neej nyob hauv ib lub ntiaj teb uas ua tau rau peb tsis nco qab hais tias peb yog leej twg tiag tiag. Peb yim muaj tej yam ib ncig ntawm peb uas muab peb tig mus rau lwm qhov, peb yim yuav tsis saib rau nqi, tsis fim, thiab tsis nco qab peb tus Vajtswv. Cov Ntseeg hauv Liberia tsis muaj nyiaj ntau, tiam sis zoo li lawv muaj txhua tsav txhia yam ntawm sab ntsuj plig. Hnub ntawd hauv Monrovia peb ua tim khawv pom Vajtswv ib tsoom tub thiab ntxhais uas paub tseeb li ntawd!

Niaj hnub nim no, txawm hais tias peb nyob qhov twg los yog ua neej nyob li cas, tseem ceeb heev uas peb saib peb tus kheej ua Vajtswv ib tug me nyuam ua ntej tshaj plaws. Paub li ntawd yuav cia peb txoj kev ntseeg tawg paj txi txiv, yuav coj peb los mus hloov siab lees txim, thiab yuav ntxiv dag zog rau peb kom peb nyob “khov kho thiab ruaj nrees” mus kom tas sim neej no.11 Los ntawm Yexus Khetos lub npe, amees.