2010–2019
NaNejinAnij
Eprōļ 2016


Na Nejin Anij

Juon meļeļe ejim̧we kōn jolet eo ad ilan̄ eaorōk kōn mour indeeo.

Pedped in katak eo ad eaorōk tata ekoba jeļāļo̧kjeņ eo bwe jej ajri ro nejin juon Anij eo emour. En̄in unin bwe etan en juon āt Jemed ekwojarjar—Jemedwōj Ilan̄ Katak in eaar alikar kwaļo̧ke jān rikanaan ro etto:

  • Ke kar kapo jān Setan, Moses eaar bōbrae e, ba: “Wōn kwe? Bwe lo, N̄aij juon m̧aan nejin Anij.1

  • Kōnono kōn Israel, Risam eo eaar kwaļo̧k, “Kom̧ otemjej ro nejin Eo Eutiejtata. 2

  • Paul eaar kwaļo̧k ilo Athenian ioon Toļ Mars bwe jej “ro nejin Anij. 3

  • Josep Smith im Sidney Rigdon raar bōk juon visōn ilo aer kar lo Jemed im Nejin, im juon ennaan jen lan̄ eaar kwaļo̧k bwe ro rej pād ilo laļ in “rejm̧aan im kōrā ro nejin keotak n̄an Anij. 4

  • Ilo 1995, 15 rijilōk ro remour im rikanaan ro raar kwaļo̧k: “Aolep armej … raar kōm̧anm̧an ilo nenemein wōt Anij. Kajjojo rej jetōb jitenbōro likao im jiron̄ nejin jined im jemād ilan̄.5

  • Būreejtōn Thomas S. Monson ekar kam̧ool: “Jej ļaddik im leddik ro nejin Anij eo emour. … Jejjab maron̄ lukkuun m̧ool n̄an dāpij tōmak in eļan̄n̄e jejjab mour kōn juon ļōmņak eo em̧wilaļ kōn peran im kajoor.”6

Katak in elukkuun pidodo, ekkā an waļo̧k, im epidodo bwe en maron̄ in alikar, im n̄e ej m̧ool innām jeļāļo̧kjeņ eo wōt jej maron̄ bōke. Juon meļeļe ejim̧we kōn jolet eo ad ilan̄ eaorōk kōn mour indeeo. Ej pedped in katak n̄an keidi aiboojoj eo ilo karōk in lo̧mo̧o̧r im n̄an naajdik tōmak eo ilo m̧aanje eo nejin Jemād, Jisōs Kraist, im ilo Pinmuur eo An etūriam̧o kake.7Kōn menin, ej letok n̄an kōj m̧ōņōņō n̄an kōm̧m̧ani im kōjparok bujen ko ad.

Kōn jejjo̧ kōļmenļo̧kjeņ ko, aolep ro rej pād ilo kweilo̧k in kiiō remaron̄, kajju al, “N̄a Nejin Anij.”8 Al in ej juon iaan al ko ekkā al kaki ilo Kabun̄ in. Ak juon kajjitōk epen jej ke lukkuun jeļā? Jej jeļā kake ke ilo kōļmenļo̧kjeņ eo ad im ilo buruōd im ilo ad? Ro jined im jemād m̧oktata rej ke lukkuun alikar kadkadier?

Ilo laļ in, jej kwaļo̧k kadkadid ilo elōn̄ wāween ko reoktak, ekoba ijo jaar ļotak ie, laļ eo ad, im kajin eo ad. Em̧ool jet rej kwaļo̧k kadkadier kōn jikin jerbal ak ikkure ko aer. Kadkad kein ad ioon laļ rejjab bōd ijello̧kin rej bar kōkāāl ak bōbrae ippān piktokid indeeo —bwe jen erom juon ļaddik ak leddk nejin Anij.

Ke diktata eo nejim̧ eaar jiljino an iiō im pād ilo kūlaj juon ilo jikuul, rūkaki eo an eaar leļo̧k n̄an ajri ro juon iien jeje an kūlaj eo. Ekar Oktoba, allōn̄ in Alowiin, juon kakije ilo jet iaan m̧ōttan ko ilo laļ in. Eaar jab juon iien kakije eo em̧m̧an ippa, Ibaab emaron̄ kar wōr jet kein ikkure ko kōm̧m̧ani ilo Alowiin eo.

Rūkaki eo eaar leto-letak jet peba n̄an rijikuul ro redik. Ilo tulōn̄ in eaar juon jin̄ain juon witch (Iaar ba ke ejjab juon iien kakije em̧m̧an ippa) jutak ilo juon jikin ebwil. Kar likūt kajjitōk eo ilo peij eo, n̄an rōjan̄ antoon eo an ajri ro im n̄an lale jon̄an jeļā jeje eo aer, kar “Ej kab m̧ōj am idaak jen kab eo an witch eo. Ta eo ewaļo̧k n̄an kwe?” Jouj jeļā bwe bwebwenato in kar jab mālim n̄an kwaļo̧k kake n̄an rūkaki ro.

“Ej kab m̧ōj am idaak jen kab eo an witch eo. Ta eo ewaļo̧k n̄an kwe?” Kōn ijjino eo an em̧m̧antata ilo jeje, eo nejim̧ edik eaar je, “Inaaj mej im inaaj pād ilan̄. Enaaj em̧m̧an ippa ijeņ. Enaaj em̧m̧an ippa kōnke ej jikin eo em̧m̧antata kōnke kwonaaj pād ippān Jemādwōj Ilan̄.” Uwaak in eaar kailbōk rūkaki eo an; ijoke, ke leddik eo nejim̧ eaar bōktok dedeļo̧k in jerbal eo an, kōm̧ ar lo ke eaar bōk juon iju, grade eo em̧m̧antata.

Ilo mour in, jej lukkuun jelm̧ae, ejjab ilo antoon, apan̄ ko. Ewōr metak—ilo ānbwin, en̄jake, im jetōb. Ewōr bōro ko rerub n̄e jekjek ko rej lukkuun oktak jān ta eo jej bōke. Ewōr kabbwerer eļan̄n̄e jejjab bōk kōņaad. Ewōr likjab ko n̄e juon eo jej leke ej kowaan kōj. Ewōr jāān ko reppen n̄an ājmour me emaron̄ pen. Emaron̄ wōr iien ko n̄e kajjitōk kōn katak ak bwebwenato ej ilōn̄ in jeļā eo ad kiiō.

N̄e men ko reppen rej waļo̧k ilo mour ko ad, ta uwaak eo ad? Ej ke pok ak pere ak jetōb ejako? Ej ke juon men jab kōtmene an tōmak eo ad? Jej ke jekpen ņae Anij ak ro jet kōn jekjek ko ad? Ak ej ke uwaak eo ad n̄an keememej wōn kōj—bwe jej ajri ro nejin juon Anij eo ej iakwe? Ak ej ke kobaik ippān juon lōke eo etinkwadik me Ej kōtļo̧k bwe jet idajon̄jon̄ ko an laļ in kōnke Ejeļā enaaj kōjeram̧m̧an kōj, āinwōt kijeek ebwil, n̄an erom̧ āinwōt E im n̄an bōk jolōt eo ad indeeo?9

Jem̧aan ļo̧k, iaar pād ilo juon kweilo̧k ippān Elder Jeffrey R. Holland. Ke ej kwaļo̧k katak eo bwe mour wanbanban keen̄taanan ak apan̄ ko ad ewōr aer jibadbad indeeo—men̄e jejjab meļeļe kaki ilo tōrein—Elder Holland eaar ba, “Komaron̄ bōk ta eo kwoj kōņaan, ak komaron̄ bōk men eo em̧m̧an ļo̧k.”

Ļalem allōn̄ rem̧ootļo̧k, kōrā eo ippa, Diane, im n̄a kōm̧ kar etal n̄an Africa ippān Elder im Sister David A. Bednar. Liberia eaar jikin im bukwon eo āliktata kōm̧ eaar loļo̧k. Liberia ej juon laļ eo em̧m̧an kōn armej ro reaboojoj im juon laļ eo ebun̄bun̄, ak men ko ijo raar jab pidodo. Elōn̄ iiō ko ilo an jab poļōmen kien eo im tariņae ko ijo raar jarjar bwe en wōr n̄ūta im jeram̧ōl. Ilo kakobaba, nan̄inmej in Ebola eaar m̧an enan̄in 5,000 armej ijeņ ālkin an nan̄inmej eo ajjedeed. Jaar kurup eo jinointata jen Kabun̄ in jen tulikin laļen kar loļo̧k Monrovia, captial city eo, jān ke World Health Organization kar kwaļo̧k em̧m̧an n̄an ito itak āļkin jorrāān eo an Ebola.

Ilo juon jibbon̄in Jabōt eo elukkun bwil, kōm̧ eaar etal n̄an juon im̧ōn kweilo̧k kar reene ilo io̧lepen jikin eo. Kajjojo jiea ko kar karōki, oraņ ej 3,500. Oraņ ro āliktata raar pād ej 4,100. Enan̄in aolep ro raar itok raar bōlen itok laļ tok ak jet ilo wa tok; eaar jab pidodo n̄an ro Rekwojarjar ro n̄an kuk ippān doon. Ak raar itok. Enan̄in aolep raar itok m̧okta jen awa in jinoe eo. Ke kōm̧ij deļo̧n̄e ļo̧k hall eo, jetōb eaar em̧m̧an! Ro Rekwojarjar raar pojak n̄an katak.

Ne juon rikwaļo̧k ej kwaļo̧k jān juon eoon, membōr ro rej ba eoon ilo juon ainikien eļap. Jekdo̧o̧n n̄e—eoon eo ekadu ak eaetok, aolepen jarlepju eo rej uwaak ilo juon wōt. Kiiō, jejjab lukkuun kōmālim menin, ak eaar menin aikuj bwe ren kōm̧m̧ane. Im kumi in al eo—raar lukkuun kajoor. Kōn juon ritōl al eo ekabwilōn̄lōn̄ im juon ļaddik 14 an iiō ilo jikin kōjan̄jan̄ eo, membōr ro raar al kōn peran im kajoor.

Innām Elder Bednar eaar kōnono. Aaet, menin, eaar lukkuun kuk ippān doon eo eļap—n̄an ron̄jake juon Rijilōk ej kwaļo̧k im kam̧ool. Alikar ilo jetōb in tōl, jem̧ļo̧kin ļo̧k kōnono eo an, Elder Bednar eaar bōjrak im ba, “Kom̧ jeļā ke ‘BedBed Eo Ebin’?”

Aolep ainikien ko 4,100 raar lam̧ōj, “AAET!”

Innām eaar kajjitōk, “Kom̧ jeļā ke eoon 7?”

Innām jarlepju eo eaar bar uwaak, “AAET!”

Karōk eo n̄an al kake “Bedbed Eo Ebin” kar al kake jān Mormon Tabernalce Choir eo elōn̄ ļo̧k jen 10 iiō ko kar kobaik eoon 7, eo raar al kake m̧okta ļo̧k. Elder Bednar eaar ba, “Jen al eoon 1, 2, 3, im 7.”

Ilo ejjeļo̧k āliklik, ritōl al eo eaar ketok im Aaronic Priesthood eo—eaar jino kōjan̄ jinoin. Kōn jon̄an tōmak iaar jan̄in kar en̄jake m̧okta ļo̧k ilo an juon jarlepju al, kōm̧ ar al eoon 1, 2, im 3. Innām ainikien im jetōb in kajoor eaar kajoor ke ainikien 4,100 ro raar al eoon jimjuon im kwaļo̧k:

Jetōb ilo Jisōs eaar letok kajoor.

Ij jāmin, iban, likūti n̄an rikōjdat eo an;

Jetōb in, hell enaaj aikuj utiddid,

Ij jāmin, jaab, Ij jāmin, jaab,

Ij jāmin, jaab, Ij jāmin jaab utiddid!10

Ej juon iaan iien ko eļap an jetōb em̧m̧akūt ilo mour e aō, Iaar katak juon katak raan eo. Jej mour ilo juon laļ me emaron̄ kōm̧m̧an bwe jen meļo̧kļo̧k wōn kōj. Toon wōt an kapo ko jepooļ kōj, toon wōt an pidodo kōm̧m̧ani, innām etal jeni, innām meļo̧kļo̧k jem̧doon eo ad ippān Anij. Rikwojarjar ro ilo Liberia ejabwe men ippāer, im aaet elōn̄ men ko ippāer ilo mour in jetōb. Ta eo kōm̧ eaar loe raan eo ilo Monrovia eaar juon kurup in ļaddik ro im leddik ro nejin Anij eo ejeļā!

Ilo laļ in rainin, jekdo̧o̧n ia eo jej jokwe ie im jekdoon ta jekjek ko ad, eaorōk bwe jen jeļā kadkad eo ad bwe jej nejin Anij. Jeļā bwe tōmak eo ad enaaj kōm̧m̧an bwe jetōb eo ad en emouruur, naaj lōn̄aj ukweļo̧k ko ad, im naaj letok kajoor bwe jen “jutak pen im jab m̧akūtkūt” ilo iaļen mour wabanban in ad.11 Ilo etan Jisōs Kraist, amen.

Kakememej ko

  1. Moses 1:13; eoon eo eaorōk kar kobaiktok.

  2. Sam Ko 82:6; eoon eo eaorōk kar kobaiktok.

  3. Jerbal 17:29; eoon eo eaorōk kar kobaiktok.

  4. Katak im Bujen ko 76:24; eoon eo eaorōk kar kobaiktok.

  5. “Baam̧le Eo: Juon Kean̄ n̄an Laļ in,” Liahona, Nov. 2010, 129; eoon ko raorōk kar kobaiktok.

  6. Thomas S. Monson, ““Bao ko Ekūre Pā ko Peir,” Liahona, Juun 2010, 4; eoon eo eaorōk kar kobaiktok.

  7. Lale Kolosse 1:13–15.

  8. “N̄a Nejin Anij,” Al, nōm̧. 44.

  9. Lala Malakai 3:2.

  10. “Bedbed Eo E Bin,” Al, no. 5.

  11. Mosaia 5:15.