E tamari’i au na te Atua

Te vai ra i roto i tā tātou ha’api’ira’a tumu te ‘itera’a ē, e mau tamari’i tātou na te hō’ē Atua ora. Nō reira i pi’ihia ai te hō’ē o Tōna mau i’oa mo’a roa o te Metua—te Metua i te ao ra. ’Ua ha’api’ihia teie ha’api’ira’a tumu ma te māramarama e te mau peropheta i te roara’a o te mau tau :

• A fa’ahemahia ai ’oia e Sātane, pāto’i atu ra Mose, na ō atu ra : « O vai ’oe ? Inaha, e tamaiti ho’i au na te Atua ».¹

• A parau ai ’oia ia Iseraela, ’ua ha’api’i te pāpa’i Salamo e, « E tamari’i ana’e ‘outou na te Teitei ».²

• ’Ua ha’api’i Paulo i tō Ateno i rotopū i te Areopago ē, « e tamari’i [rātou] na te Atua ra ».³

• ’Ua fāri’i Iosepha Semita raua o Sidney Rigdon i te hō’ē ’ōrama i roto i te reira i ‘ite ai raua i te Metua ’e te Tamaiti, ’e ’ua parau mai ra te hō’ē reo nō te ra’i mai ē, te mau ta’ata ato’a nō te mau ao « e mau tamaiti ’e e mau tamahine fanau ho’i rātou nō te Atua ra ».⁴

• I te matahiti 1995, 15 ’āpōsetolo ’e te mau peropheta ora tei fa’a’ite pāpū ē : « Ua hāmanihia te mau ta’ata ato’a … ia au i te hōho’a o te Atua. E tamaiti ’e ’aore rā, e tamahine vārua here rātou tāta’itahi nā te mau metua i te ao ra ».⁵

• ’Ua fa’a’ite pāpū mai te peresideni Thomas S. Monson ē : « E mau tamaiti ’e e mau tamahine tātou na te hō’ē Atua ora … E’ita tā tātou e nehenehe e ti’aturi mau i teie parau ma te ore e fāri’i i te hō’ē huru pūai ’e te mana rahi ‘āpī ».⁶

Nō te faufa’a rahi o teie ha’api’ira’a tumu, tei fa’ahiti-pinepine-hia, ’e ’ia hi’ohia e mea ’ōhie ho’i, e au ra e riro ’ei ha’api’ira’a mātaro-noa-hia, te ti’ara’a mau rā, o te ‘ite fa’ahiahia roa a’e ïa i te mau ‘ite ato’a e roa’a ia tātou. E mea faufa’a te hō’ē ‘itera’a ti’a, nō ni’a i tō tātou fatura’a ’āi’a i te ra’i ra, nō te fa’ateiteira’a. E mea faufa’a rahi mau te haro’aro’ara’a i te fa’anahora’a hanahana nō te fa’aorara’a, e nō te fa’a’amu i te fa’aro’o nō te Fanau Tahi a te Metua, o Iesu te Mesia, ’e i Tōna Tara’ehara hāmani maita’i.⁷ E hōro’a ato’a mai te reira i te fa’aitoitora’a tāmau ia tātou ’ia rave ’e ’ia ha’apa’o i tā tātou mau fafaura’a mure ’ore i tītauhia.

Ta’a ’ē atu te tahi pae iti, e nehenehe te mau ta’ata ato’a i roto i teie purera’a e hīmene, « E tamari’i au na te Atua ».⁸ noa atu ’aita e pāpa’ira’a ’e ’aore rē, e nota. ’Ua riro teie hīmene nehenehe ’ei hīmene fa’a’oto pinepine-roa-hia a’e i roto i teie ’Ēkālesia. Terā rā, te uira’a rahi maori rā, « ’ua ‘ite mau ānei tātou i te reira ? » ’Ua ‘ite ānei tātou i te reira i roto i tō tātou ferurira’a ’e i roto i tō tātou ’ā’au ’e i roto i tō tātou vārua ? Tō tātou ānei ti’ara’a feti’i i te ao ra, tō tātou hiro’a mātāmua ’e te hōhonu ?

I ni’a i te fenua nei, ’ua rau te huru tā tātou fa’a’itera’a ia tātou, mai te vāhi fanaura’a, tō tātou ti’ara’a ’āi’a, ’e tō tātou reo. Te fa’a’ite nei te tahi pae ia rātou na roto i tō rātou tōro’a ’e ’aore rā, tā rātou ‘ohipa au roa a’e ’ia rave. ’Aita teie mau hiro’a nō te fenua nei i hape, maoti rā, ’aita te reira e mono ’e ’aore rā, e fa’aapiapi i tō tātou hiro’a mure ’ore—’oia ho’i, te rirora’a ’ei tamaiti ’e ’aore rā, ei tamahine na te Atua.

I te onora’a o te matahiti o tā maua tamari’i ‘āpī roa a’e, e tei roto ’oia i te piha mātāmua i te fare ha’api’ira’a, ’ua hōro’a te orometua i te mau tamari’i i te hō’ē ‘ohipa pāpa’i i roto i te piha ha’api’ira’a. Tei te ava’e atopa teie, te ava’e nō te Halloween, e tau fa’afa’aeara’a teie e ha’apa’ohia nei e te tahi mau fenua i te ao nei. Noa atu ē, e ’ere au i te mea au roa i teie pu’e tau fa’afa’aeara’a, te mana’o nei ra vau ē, te vai ra te tahi pae ‘ino ’ore ’e te fa’aorara’a o te Halloween.

’Ua ’ōpere a’e ra te ’ōrometua i te hō’ē ’api parau i te mau tamari’i ri’i. I ni’a roa, te vai ra te hōho’a pāpa’i o te hō’ē vahine tahutahu matarohia (’ua fa’a’ite atu vau ia ‘outou e ’ere au i te mea au roa i teie pu’e tau fa’afa’aeara’a) te ti’a ra i ni’a a’e i te hō’ē pani ve’ave’a. Teie te uira’a i pāpa’ihia i ni’a i te ’api parau, nō te fa’aitoito i te ferurira’a o te mau tamari’i ’e nō te tāmata i tō rātou mau ‘ite pāpa’i mātāmua roa, ’oia ho’i, « i inu iho nei ‘outou hō’ē ’āu’a o te inu a te vahine tahutahu. E aha tei tupu i ni’a iho ia ‘outou ? » E homa, ia ‘ite mai ‘outou, ’eiaha e fa’a’ite i teie ‘ā’amu ’ei fa’aitoitora’a i te mau ’ōrometua.

« I inu iho nei ‘outou hō’ē au’a o te inu a te vahine tahutahu. E aha tei tupu i ni’a iho ia ‘outou ? » Na roto i tāna pāpa’ira’a mātāmua nehenehe a’e, ’ua pāpa’i tā maua tamahine iti, « e pohe au, ’e e tae au i te ra’i ra. E au roa vau i reira. E here roa vau i reira nō te mea, o te vāhi maita’i roa a’e ïa ’ia pārahi, nō te mea tei piha’i iho ’oe i te Metua i te ao ra ». ’Ua hitimahuta paha tōna ’ōrometua i teie pāhonora’a ; terā rā, i te fa’aho’ira’a mai tā maua tamahine i te tā’āto’ara’a o te ‘ohipa i te fare, ’ua ‘ite a’e ra maua ē, ’ua hōro’ahia hō’ē fetia nāna, te tāpa’o teitei roa a’e.

I roto i te orara’a nei, te farerei nei tātou i te mau fifi mau, e ’ere i te mau fifi ha’avarevare. Te vai ra te māuiui—nō te pae tino, te ferurira’a, ’e te pae vārua. Te vai ra te mau māfatu ’oto ia ta’a ’ē ana’e te mau huru orara’a i te mau huru tā tātou i fa’ata’a. Te vai ra te ti’a ’ore ’ia feruri ana’e tātou ē, ’aita i tano te huru tā tātou e farerei nei. Te vai ra te ‘ino’ino ’ia ha’avare ana’e te hō’ē ta’ata ia tātou, o tā tātou ho’i i ti’aturi. Te vai ra te ea ’e te mau fifi i te pae moni o te riro ’ei mau mea fifi mau. Te vai ato’a ra te mau taime uiuira’a ’ia ’ore ana’e te tahi mau ha’api’ira’a tumu ’e ’aore rā, te tahi ‘ā’amu e tae’ahia i tō tātou haro’aro’ara’a i teie taime.

’Ia tupu ana’e te mau fifi i roto i tō tātou orara’a, e aha tā tātou pāhonora’a oioi ? E ahuehue ānei ’e ’aore rē, e fē’a’a, ’e ’aore rā, e fa’aru’era’a anei a te vārua ? ’Ua ’āueue anei tō tātou fa’aro’o ? E fa’ahapa ānei tātou i te Atua ’e ’aore rā, ia vetahi ‘ē nō tō tātou huru orara’a ? ’E ’aore rā, tā tātou pāhonora’a mātāmua, o te ha’amana’ora’a ānei e, o vai tātou—’oia ho’i, e mau tamari’i tātou na te Atua here ? ’Ua tū’ati ānei te reira i te ti’aturia’a hope ē, te vaiiho nei ’Oia i te tahi mau māuiui o te tino nei, nō te mea ’ua ‘ite ’Oia ē, e ha’amaita’i te reira ia tātou, mai te auahi tāmā ra, ’ia riro mai tātou mai Iāna te huru ’e ’ia fāri’i i te ’āi’ara’a mure ’ore ?⁹

’Aita i maoro a’e nei tei roto vau i te hō’ē putuputura’a e o Elder Jeffrey R. Holland. A ha’api’i ai ’oia i te parau tumu, e nehenehe te orara’a tāhuti nei e riro ’ei orara’a hepohepo, terā rā, e ‘ōpuara’a mure ’ore tō tō tātou mau fifi—noa atu e, ’aita tātou e māramarama i te reira i taua taime ra—’ua parau o Elder Hollahd ē, « e nehenehe ‘outou e fāri’i i te mea tā ‘outou e hina’aro, ’e ’aore rā, e nehenehe e roa’a ia ‘outou hō’ē mea maita’i a’e ».

E pae ava’e i ma’iri a’e nei, ’ua haere atu maua o tō’u hoa fa’aipoipo o Diane i Afirita na muri iho ia Elder ’e te tuahine David A. Bednar. O Liberia te ono ’e te fenua hōpe’a tā mātou i rātere atu. E fenua rahi o Liberia ’e te hō’ē huira’atira hanahana ’e te hō’ē ‘ā’amu faufa’a rahi, terā rā, ’aita te mau ‘ohipa i tere ‘ōhie roa i reira. Na roto i te rahira’a matahiti o te fa’aterera’a poritita pāpū ’ore, ’e te mau ’ārepurepura’a i rotopū i te huira’atira, ’ua rahi roa atu te vevera’a. Hau atu i te reira, ’ua tāparahi pohe te ma’i ri’ari’a Ebola fātata e 5.000 ta’ata i reira i roto i te ’ati hope’a i tupu a’e nei. O mātou te pupu mātāmua o te feiā fa’atere o te ’Ēkālesia nō rāpae mai i te fenua tei haere atu i Monrovia, te ’oire pū, mai te taime a fa’aara ai te tā’atira’a nō te Fa’anahora’a o te Ea na te Ao nei ē, e nehenehe e haere, i te hopera’a te ma’i Ebola.

I te hō’ē po’ipo’i Sābati ve’ave’a ’e te haumi, ’ua tere atu mātou i te hō’ē fare putuputura’a tārahuhia i rōpū i te ’oire. ’Ua fa’anahohia te mau pārahira’a ato’a e vai ra, ’e ’ua tae’ahia e 3.500 parahira’a. E 4.100 te tai’o hope’a o te rahira’a ta’ata i tae mai. Fātata te tā’āto’ara’a o te ta’ata tei tae mai, ’ua rātere mai ïa na raro noa, ’e ’aore rā, na ni’a mai i te tahi mau faura’o e ’ere i te mea maita’i roa ; ’aita i riro ’ei ‘ohipa ‘ōhie nō te Feiā Mo’a ’ia ha’aputuputu mai. Terā rā, ’ua haere mai rātou. Te rahira’a ’ua tae mai e rave rahi hora na muri a’e i te hora i fa’ata’ahia nō te purera’a. A tomo atu ai mātou i roto i te fare, e mea fa’ahiahia te vārua e vai ra ! ’Ua ineine te Feiā Mo’a ’ia ha’api’ihia.

A fa’ahiti ai te hō’ē ta’ata a’o i te hō’ē pāpa’ira’a mo’a, e fa’ahiti pūai mai te mau melo i te ‘īrava. ’Aita e paraura’a—e pāpa’ira’a poto ānei ’e ’aore rā, e mea roa ānei, e pāhono ‘āmui mai te tā’āto’ara’a o te ‘āmuira’a. I teie nei, ’aita mātou e fa’aitoito atu nei i te reira, terā rā, e mea pāpū maita’i, e ‘ohipa maere mau ’ia ‘ite ia rātou ia na reira. E te pupu hīmene—e mea pūai mau. Hō’ē ta’ata arata’i pupu hīmene pe’epe’e, e hō’ē taure’‘āre’a 14 matahiti i ni’a i te piana, ’ua hīmene te mau melo ma te pautu’utu ’e te pūai.

I muri iho ’ua paraparau mai ra o Elder Bednar. Teie mau te ‘ohipa rahi i tia’ihia nō te reira putuputura’a—fa’aro’o i te hō’ē ’Āpōsetolo ’ia ha’api’i ’e ’ia fa’a’ite pāpū. E mea pāpū maita’i e na roto i te arata’ira’a a te vārua, i te ’āfara’a o tāna mau parau, ’ua fa’aea o Elder Bednar, e na ō mai ra, « ’ua ‘ite ānei ‘outou ‘Auē te pa’ari’ ? »

Mai te mea ra ē, e 4.100 reo tei ’ū’uru mai nō te pāhono mai, « ’Ē ! »

I muri iho, ’ui mai’ra ’oia ē, « ’ua ‘ite ānei ‘outou i te ‘īrava 7 ? »

’Ua pāhono fa’ahou mai ra te pupu tā’āto’a, « ’Ē ! »

I roto i te fa’anahora’a o te hīmene « ’Aue te pa’ari » tei hīmenehia e te Pupu Hīmene a te Fare Menemene i roto i na 10 matahiti i ma’iri, ’ua tu’uhia te ‘īrava 7, tei ’ore i hīmene-rahi-hia na mua a’e nei. ’Ua parau mai ra o Elder Bednar ē, « E hīmene tātou i te ‘īrava 1,2,3, ’e te 7 ».

Ma te oti’ati’a ’ore, ’ua ti’a ’oi’oi a’e’ra te ta’ata arata’i pupu hīmene i ni’a, ’e ’ua ha’amata a’e ra te ta’ata fa’ata’i piana, e autahu’ara’a a Aarona, i te ha’uti ma te pe’epe’e, i te mau nota ’ōmuara’a. E ’ua hīmene a’e ra mātou i te ‘īrava 1,2, e te 3 ma te ’ā’au ti’aturi o tā’u i ’ore ā i ‘ite a’e nei i roto i te hō’ē hīmenera’a na te ‘āmuira’a. I muri iho, ’ua mara’a fa’ahou te fāito o te pūai ’e te mana o te vārua a hīmene ai na 4.100 reo i te hitu o te ‘īrava ma te parau e :

I roto i te hō’ē o te mau ‘ohipa pae vārua fa’ahiahia roa o tō’u orara’a, ’ua ha’api’ihia vau i te hō’ē ha’api’ira’a faufa’a rahi i taua mahana ra. Te ora nei tātou i roto i te hō’ē ao o te nehenehe e tura’i ia tātou ’ia ha’amo’e e, o vai mau tātou. Rahi noa atu te mau fa’a’āreareara’a ’ati a’e ia tātou, ‘ōhie noa ato’a tātou ’ia ha’afaufa’a ’ore, ’ia tau’a ’ore, ’e ’ia ha’amo’e roa atu i tō tātou natira’a i te Atua. E mea iti roa te faufa’a pae tino a te Feiā Mo’a nō Liberia, terā rā, mai te huru rā e, ’ua hope te mau mea ato’a i te roa’a ia rātou i te pae vārua. Te ‘ohipa tā maua i ‘ite i taua mahana ra i Monrovia, e pupu tamaiti ’e te tamahine ïa na te Atua tei ‘ite i te reira !

I roto i te ao i teie mahana, noa atu te vāhi tā tātou e ora nei, e noa atu e aha te huru o tō tātou orara’a, e mea faufa’a ’ia riro tō tātou hiro’a ’ei tamari’i na te Atua, ’ei hiro’a faufa’a roa a’e. ’Ia ‘ite ana’e tātou i te reira, na te reira e fa’aruperupe i tō tātou fa’aro’o, e fa’aitoito ia tātou ’ia tātarahapa tāmau noa, ’e e hōro’a mai i te pūai nō te « tāmau mā’ite ma te aueue ’ore » i roto i te roara’a o tō tātou tere i te tāhuti nei.¹¹ Na roto i te i’oa o Iesu Mesia ra, ‘āmene.