“Kuv Tuaj Ua Qhua”
Los ntawm Linda K. Burton
Koom Haum Niam Tsev tus Tuam Thawj Tswj Hwm
Thov Vajtswv thiab txiav txim siab tias nej yuav ua li cas—raws li nej muaj sij hawm thiab muaj cib fim pab tau—kom pab cov neeg tawg rog uas nyob hauv nej zej zog.
Thaum hnub uas tau txhim tsa lub Koom Haum Niam Tsev, Emma Smith hais tias, “Peb yuav ua ib yam dab tsi zoo kawg nkaus. … Peb paub tias yuav muaj sij hawm zoo pab tau neeg thiab muaj neeg uas thov kom pab sai.”1 Tej kev thov kom pab sai thiab tej lub sij hawm zoo kom pab los muaj ntau zaus thaum ntawd—ib yam li muaj tam sim no.
Muaj li no ib zaug thaum lub Kaum Hli Ntuj 1856 nyob hauv lub tuam rooj sab laj thaum Thawj Tswj Hwm Brigham Young qhia rau cov neeg uas tuaj hais tias cov pioneer uas cab laub tseem taug txoj kev thiab lawv lig heev. Nws hais tias, “Nej txoj kev ntseeg, txoj kev teev Vajtswv, los yog qhov uas nej hais tias nej pe hawm Vajtswv tiag, tag nrho tej no yeej yuav cawm tsis tau nej txoj sia hauv lub ntuj ceeb tsheej xelestias, tsuas yog nej ua raws li tej ntsiab cai uas kuv tab tom yuav qhia nej xwb, thiaj tau.” Cia li mus thiab coj cov neeg uas khuam ped, thiab pab lawv, muab zaub mov rau lawv noj, ris tsho rau lawv hnav, thiab kho lawv tej kev mob kev nkeeg, … tsis li, ces, nej tej kev ntseeg tsis muaj qab hau dab tsi li.”2
Peb zoo siab nco txog cov txiv neej uas cia li mus cawm cov Neeg Ntseeg uas raug txom nyem ntawd. Tiam sis cov viv ncaus ua dab tsis?
“Viv Ncaus [Lucy Meserve] Smith sau hais tias … tom qab Thawj Tswj Hwm Young hais lus ntuas peb, cov uas nyob ntawd sawv thiab rau siab ua tej yam. … Cov poj niam ‘tau hle lawv cov tiab hauv qab [yog cov tiab hauv qab uas txhua tus poj niam hnav thiab ua rau lawv sov], thom khwm, thiab txhua yam uas lawv hle tau, nyob hauv lub Tsev Kheej kiag ntawd, thiab tso [tej ntawd] rau hauv laub kom xa rau cov Neeg Ntseeg nyob pem roob.’”3
Ob peb lim tiam tom qab ntawd, Thawj Tswj Hwm Brigham Young muab cov Neeg Ntseeg sib sau ua ke nyob hauv lub Tsev Kheej qub thaum cov uas tau mus cawm thiab tej pawg cab laub los ze dua rau Salt Lake City. Nws thov cov Neeg Ntseeg kawg siab kawg ntsws—yeej thov cov viv ncaus—kom tu cov neeg raug txom nyem thiab pub mov rau lawv noj thiab txais lawv, es nws hais tias: “Ib txhia muaj txhais ko taw uas khov nab kuab lawm mus txog ntua lawv tej pob taw; ib txhia khov lawm mus txog hauv caug thiab ib txhia txhais tes twb khov lawm. … Peb xav kom nej txais lawv zoo ib yam li lawv yog nej cov me nyuam, thiab muaj siab hlub lawv zoo ib yam.”4
Lucy Meserve Smith kuj sau hais tias:
“Peb tau ua txhua yam peb ua tau, nrog cov nus thiab cov viv ncaus zoo tej kev pab, kom nplij lawv lub siab. … Lawv sab tes thiab sab ko taw khov lawm. … Peb tsis tau tsum peb tej kev siv zog pab mus txog thaum txhua tus tsis mob ntxiv lawm. …
“Kuv yeej tsis tau txaus siab rau tej hauj lwm kuv tau ua hauv kuv lub neej npaum li lub sij hawm ntawd uas kuv ua hauj lwm pab lawv, vim zoo li sawv daws koom siab heev. …
“Tshuav dab tsi uas ib tug neeg uas kam ua tau?”5
Kuv cov viv ncaus, zaj no yeej piv txog peb niaj hnub no thiab txog cov uas raug txom nyem nyob thoob plaws lub ntiaj teb. Ib “lub sij hawm zoo kom pab” tshoov peb lub siab.
Muaj ntau tshaj 60 phlom tus neeg tawg rog uas raug yuam mus lwm lub teb chaws nyob thoob plaws lub ntiaj teb. Ib nrab yog cov me nyuam.6 “Cov neeg no tau raug tej yam nyuaj heev thiab lawv pib ua neej tshiab nyob hauv … tej lub teb chaws thiab tej kab lig kev cai. Txawm muaj tej lub koom haum uas pab lawv nrhiav qhov chaw nyob thiab pub khoom me ntsis rau lawv los, lawv yeej xav tau ib tug phooj ywg thiab tus uas pab tau lawv swm lawv lub tsev tshiab, ib tug neeg uas pab tau lawv kawm lus, to taub tej txheej txheem, thiab sib raug zoo nrog lwm tus.”7
Lub caij sov tas los kuv ntsib Viv Ncaus Yvette Bugingo, es thaum nws muaj 11 xyoo nws khiav mus ib qho chaw rau ib qho chaw tom qab nws txiv raug tua tuag thiab tsis paub nws peb tug nus dua twg lawm nyob hauv ib qho chaw uas muaj kev tsov kev rog ntau. Yvette thiab nws tsev neeg uas tseem tshuav yog cov neeg tawg rog tau rau thiab ib nrab xyoo nyob hauv ib lub teb chaws nyob ze mus txog thaum lawv tsiv mus nyob hauv ib lub tsev tshiab, nyob ntawd muaj ib nkawm niam txiv uas pab thauj lawv mus, kawm ntawv thiab ua lwm yam. Nws hais tias nkawd “teb peb tej lub thov.”8 Nws niam thiab nws tus niam hluas uas ntxim hlub koom nrog peb hmo no, nyob hauv pawg hu nkauj. Txij thaum kuv ntsib cov poj niam zoo kawg no kuv pheej xav tias, “Yuav ua li cas yog tias lawv lub neej yog kuv lub neej?”
Vim peb yog cov viv ncaus peb muaj ntau tshaj ib nrab nyob hauv tus Tswv lub tsev rau khoom uas pab tau Leej Txiv Saum Ntuj Ceeb Tsheej cov me nyuam. Nws lub tsev rau khoom tsis yog muaj khoom nyob haud xwb tiam sis kuj muaj sij hawm, tej txuj ci, thiab peb tej cwj pwm saum ntuj nyob haud thiab. Viv Ncaus Rosemary M. Wixom qhia hais tias, “Tus cwj pwm los saum ntuj los nyob hauv peb ua rau peb xav ncav tes pab lwm tus thiab tshoov peb lub siab kom peb rau siab ua.”9
Vim peb paub peb tus cwj pwm uas los saum ntuj los, Thawj Tswj Hwm Russell M. Nelson hais tias:
“Peb xav tau cov poj niam uas paub siv lawv txoj kev ntseeg kom ua tej yam tseem ceeb thiab cov poj niam uas ua siab loj tiv thaiv kev coj ncaj ncees thiab tsev neeg nyob hauv ib lub ntiaj teb uas nyiam ua txhaum … ; cov poj niam uas thov kom muaj ntuj ceeb tsheej lub hwj chim kom pov hwm thiab txhawb cov me nyuam thiab tsev lub zog; cov poj niam uas tsis ntshai qhia lwm tus. …
“… Nej cov muam muaj tej txuj ci thiab tej kev tshoov siab tshwj xeeb uas yog tej txiaj ntsim nej tau txais los ntawm Vajtswv los, tsis hais nej yuav txiv los tsis tau yuav txiv los yog. Peb cov kwv tij yeej ua tsis taus li nej, thaum nej muaj hwj huam ua.”10
Ib tsab ntawv uas Thawj Pawg Thawj Tswj Hwm xa rau lub Koom Txoos thaum lub Kaum Hli Ntuj hnub tim 27, xyoo 2015, qhia tias lawv txhawj heev thiab muaj siab hlub ntau plhom tus neeg uas khiav ntawm lawv lub tsev mus nrhiav kev pab thaum muaj kev tsov rog thiab raug lwm yam xwm txheej. Thawj Pawg Thawj Tswj Hwm caw cov neeg, tsev neeg, thiab pawg ntseeg hauv lub Koom Txoos kom koom tes ua zoo li Yexus Khetos thiab pab cov neeg tawg rog, thiab pub nyiaj rau lub Koom Txoos pob nyiaj pab tib neeg, thaum lawv ua tau.
Tej pawg tuam thawj tswj hwm ntawm lub Koom Haum Niam Tsev, Koom Haum Ntxhais Hluas, thiab lub Koom Haum Me Nyuam Yaus tau xav seb peb yuav ua li cas kom ua raws li Thawj Pawg Thawj Tswj Hwm hais. Peb paub tias nej, uas yog peb cov viv ncaus uas peb hlub, nyias muaj nyias lub neej thiab ib leeg txawv ib leeg. Tiam sis txhua tus mej zeej ntawm cov viv ncaus yeej tau khi lus thaum lawv ua kev cai raus dej kom “nplij cov uas xav tau txoj kev nplij siab.”11 Peb txhua tus yuav tsum tsis txhob khiav ceev tshaj peb muaj zog khiav.12
Yog li ntawd, peb tau txhim tsa ib txoj kev pab hu ua “Kuv Tuaj Ua Qhua.” Peb cia siab hais tias nej yuav thov Vajtswv thiab txiav txim siab tias nej yuav ua li cas—raws li nej muaj sij hawm thiab muaj cib fim pab tau—kom pab cov neeg tawg rog uas nyob hauv nej zej zog. Nov yog ib lub cib fim kom ib leeg pab ib leeg, nyob hauv nej tsev neeg, thiab nej pawg ntseeg kom ua phooj ywg, qhia, thiab ua lwm yam kev pab zoo li Yexus Khetos thiab yog ib txoj kev xwb uas cov viv ncaus ua tau kom pab lwm tus.
Thaum peb thov Vajtswv, peb yuav tsum ua raws li tus Vaj Ntxwv Npeyamis tej lus ntuas, uas nws hais rau nws cov neeg tom qab nws hais kom lawv saib xyuas cov uas xav tau kev pab hais tias: “Saib xyuas kom tag nrho txhua txhia yam no tiav los ntawm txoj kev txawj ntse thiab kev muaj txheej txheem.”13
Cov viv ncaus, peb paub tias tus Tswv yeej xav kom peb hlub lwm tus. Cia li xav txog tej nqe vaj lug kub no:
“Nej yuav suav tias lwm haiv neeg uas nrog nej nyob kuj zoo ib yam li yog nej haiv neeg, thiab nej yuav hlub lawv ib yam li nej hlub nej tus kheej.”14
“Nej yuav tsum nco ntsoov hu tej qhua los so hauv nej tej tsev. Muaj qee leej hu tau cov tim tswv ceeb tsheej los lawv twb tsis paub hais tias yog cov tim tswv.”15
Thiab tus Cawm Seej hais tias:
“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev:
“Thaum kuv tsis muaj ris tsho hnav; nej muab rau kuv hnav. Thaum kuv muaj mob, nej tuaj tu kuv.”16
Tus Cawm Seej muaj siab hlub qhia txog tus poj ntsuam uas pub tau ob lub txiaj toog xwb vim nws uas npaum li nws ua tau.17 Yexus kuj hais zaj lus piv txwv txog tus Neeg Xamalis Zoo, uas Nws xaus lus hais tias, “Cia li mus ua ib yam li ntawd.”18 Tej lub sij hawm muab kev pab rau lwm tus tsis yooj yim. Tiam sis thaum peb koom siab ua hauj lwm ua ke, peb yuav muaj Vajtswv txoj kev pab.
Thaum muaj lub ntees tuag rau Vajtswv ib tug ntxhais zoo heev, muaj ib tug neeg uas qhia tias tus viv ncaus no, thaum nws yog ceg txheem ntseeg lub Koom Haum Niam Tsev tus thawj tswj hwm, nws ua hauj lwm nrog lwm tus hauv nws ceg txheem ntseeg kom pub cov pam rau cov neeg uas raug txom nyem nyob hauv Kosovo thaum xyoo 1990 tawm. Thiab zoo ib yam li tus Neeg Xamalis zoo, nws ua ntau yam ntxiv vim nws thiab nws tus ntxhais tsav ib lub tsheb thauj cov pam los ntawm London mus rau Kosovo. Thaum nws rov qab mus tsev, nws tau txais kev tshoov siab uas chob nws lub siab tob heev. Kev tshoov siab yog li no: “Qhov koj nyuam qhuav tau ua yog ib qho zoo. Tam sim no cia li mus tsev, hla kev, thiab pab koj tus neeg zej zog!”19
Muaj neeg hais lus nyob hauv nws lub ntees tuag uas qhia tias tus poj niam rau siab ntseeg no yeej paub txog thiab pab cov neeg uas thov kev pab kom sai heev—tsis hais tej yam me me thiab—txhua tus uas nws pab tau nyob ze nws. Xws li, nws qhib nws lub tsev thiab nws lub siab kom pab cov tub hluas ntxhais hluas txhua lub sij hawm—thaum twg los xij.
Kuv cov viv ncaus, peb yeej yuav muaj Leej Txiv Saum Ntuj Ceeb Tsheej txoj kev pab thaum peb txhos caug thiab thov kom Nws coj peb mus foom koob hmoov rau Nws cov me nyuam. Leej Txiv Saum Ntuj Ceeb Tsheej; peb tus Cawm Seej, Yexus Khetos; thiab tus Vaj Ntsuj Plig Dawb Huv yeej xav pab peb.
Thawj Tswj Hwm Henry B. Eyring tau ua tim khawv li no rau cov poj niam ntawm lub Koom Txoos:
“Leej Txiv Saum Ntuj Ceeb Tsheej hnov thiab teb nej cov lus thov kom coj nej txoj hau kev thiab kom pab nej nyiaj tau thaum nej ua hauj lwm rau Nws.
Tus Vaj Ntsuj Plig Dawb Huv yog xa los roos nej thiab cov neeg uas nej saib xyuas. Nej yuav tau dag zog thiab raug tshoov siab kom paub saib nej yuav pab tau lwm tus neeg ntau npaum li cas. Tus Ntsuj Plig yuav nplij nej lub siab thaum nej xav paub, ‘Kuv puas tau pab txaus?’”20
Thaum peb xav txog “tej kev thov pab sai” ntawm cov uas xav tau kev pab, kuv xav kom peb nug peb tus kheej, “Yuav ua li cas yog tias lawv lub neej yog kuv lub neej?” Thov kom peb yuav nrhiav kev tshoov siab, ua raws li tej lus uas peb txais, thiab koom siab ncav tes pab cov uas xav tau kev pab raws li peb pab tau. Ces tej zaum yuav muaj neeg hais txog peb, ib yam li tus Cawm Seej hais txog ib tug poj niam uas ua zoo rau Nws hais tias, “Qhov uas nws ua rau kuv ntawd yog qhov zoo. … Nws yeej ua raws li nws ua tau.”21 Kuv xav tias qhov ntawd yeej zoo heev! Los ntawm Yexus Khetos lub npe, amees.