2010–2019
Ingeiti Ekkewe Ir Ra Tumunu
Mwichenapen Mwichefen non April 2016


Ingeiti Ekkewe Ir Ra Tumunu

Me nupwen sia appiru an ewe Chon Amanau tong, Epwe ennetin efeiochu me anapano om angang wenechar ne tumunu om pupunu me apochokuna om famini.

Fitu ier a no, ua nom non ewe Frankfurt Germany Tempel nupwen ua kuna ruemon chinnap ra komochupou . Ar tong me tumun ra pwari nefiner a apwapwaei.

Use sinei pwata ei a kuu netipei. Meni pokiten ochun ewe tong nefinen ekkei ruemon pupunu—eu esisin nikitu me pwon. Mi fatoch pwe ekkei ruemon ra nomofengen ren fansoun nakatam me ar tong fengen nefiner a chiwen manau me pochokun.

Aramasen Nikitano Och Mettoch

Ua nuku pwe pwan eu popun ei mettoch a nonnom rei ren fansoun nakatam pokiten a sokofensen seni ekkoch ekiekin ekkei ran. Non chommong neni won fonufan, a nikinikin pwe sia tongeni nikitano chommong mettoch. Nupwen chok a wor nipwakingaw non och mettoch—are nupwen sise chuen mochen—sia nikitano me angei pwan och—mi och seni are minefo.

Ina met sia fori ren cell phone, uf, taraku—me, sonapan, Me pwan nefinach.

Ina mo mi tongeni auchea ach sipwe nimeti manauach seni mettoch ese chuen namwot rech, non pekin fansoun ese much mettoch mi auchea—ach pupunu, ach famini, me ach nongonong—ekiekin ekkesiwini mettochun akkomw ren mettoch minefo a tongeni efisata netipechou chapur.

Ua men kinisou pwe ua fiti eu mwichefen a aucheani pupunu me famini. Aramas ra sisinei chon Ewe Mwichefenin Jises Kraist ren Aramas mi Pin non Fansoun Soponon fan iten ar pupunu me famini mi fokkun och. Ua nuku pwe ei, non ew kinikin, a fis fan iten ewe ennet minne Joseph Smith a asofosefanni pwe pupunu me famini resap much. Famini rese chok fis pwe mettoch won fonufan repwe fisioch me sipwap nikitano nupwen sia no nang. Iwe nge, ir kokkoten nang. Ra esisinata fisifisin nang, nikinikin an Kot famini ese much.

Nge pupunu me famini mi pochokun rese chok fis pokiten chok kich chon ewe Mwichefen. Mi namwot angang weires, iteitan. Ewe nongonongen famini ese much epwe pesei ngenikich ach sipwe akkachocho ne amanaua me ochuono ach pupunu me famini. Ua ingeiti me episipis fan iten ekkewe ra tumunuochu ekkei nefin mi auchea napanap.

Ikenai, ua mochen porausen ingeiti ekkewe ir ra tumunu.

Tumunu Ach Pupunu

Non ekkewe ier, ua fori ewe feiochun ririno fan iten ekkewe ir mi epinukunuk me tong fengen. Use mo churi emon minne, nupwen ra nenengeni ewe pwan emon won epek ewe antare, ra nuku pwe repwe aimufesen ika netipechou.

Ewe netipengaw, pwe a fis ngeni ekkoch.

Iwe nge, mwirin och fansoun me napanapan chiechi fengen non tong a siwin, mi wor ekkoch rese chuen ekieki usun pwapwan ewe pwan emon nge ra nenengeni ar mwan mi kukkun. Non ena napanap, ekkoch ra poputa ne ekieki pwe ese naf an punuan tipachem, apwapwa, are a chinnapeno. Iwe ra poputa ne ekieki pwe ra tongeni kutta pwan emon.

Pwi kana, ika ei a ekis awewe ngonuk, ua pesei ngonuk pwe fiti ewe an a emwen ngeni pupunu mi tano, imw mi tano, me netip mi weires. Ua tingorei kemi oupwe kouno iei, kunusefan, me niwinto ngeni ewe anen ennet me pungoch ngeni pwon. Me, pwan usun chok, ekkei nongonong mi fich ngeni pwan ekkewe fefin.

Iei, ew chok kapas ngeni pwii kana mi nipich ra fiti ewe nonognong mi mwan pwe repwe akkomw kutta ewe “fefin mi unusoch” me mwen ra tongeni ennetin chiechi ngeni are pupunu.

Pwii kana mi achengicheng, upwe achema ngenikemi, ika mi wor emon fefin mi unusoch, oua ennetin nuku pwe epwe wesewesen sanuk?

Non an Kot kokkoten pwapwa, sise chok kutta emon mi unusoch nge emon minne, non unusen manauach, sipwe tongeni chufengen ne forata chiechi ren tong, chiechifoch, me ennetin chiechi. Ina ewe kokkot.

Pwi kei, ekkewe ir ra tumunu ar pupunu ra weweiti pwe ei angang mi namwot mi fiti fansoun nakatam, engino, me akaewin, ekkewe feiochun ewe Achasefan an Jises Kraist. Mi namwot pwe kopwe kirekiroch, kosap nonowo, kosap kutta pwisin om, kosap songokai, kosap ekiek mi ngaw, kopwe pwapwa non ennet. Non pwan och kapas, mi namwot chen, ewe nimenimochun tong an Kraist.1

Ekkei mettoch esap fis fan eu chok. Pupunu mi napanap ra kouta ekkis me ekkis, ran me ran, non anein manau.

Me ena mi kapas allim.

Pokiten ese nifinifin anen ach chiechi iei chok, ika sia sopweno ne achocho ach sipwe ochuono ren kirekiroch, tong, ausening, asor, weweiti, me fangafangoch, ekkis me ekkis ewe nefin epwe pochokunono me pwapwano.

A nikinikin pwe akon mang, nge chechemeni: pupunu mi fis ar repwe pupunufoch! Iwe sisap pekus non fofforoch, pun kich sia isettiw ewe nongonongen pupunu mi napanap. Me seni kukkun mettoch a fisita mettoch mi napanap.”2

Meni epwe fis ekkis me ekkis, nge ese namwot esap pwapwa. Iwe, upwe apasa met sia fen sinei, pwe aimufesenin pupunu ese fifis nupwen ewe mwan me fefin ra pwapwa.

Iwe oupwe pwapwa!

Me pwi kewe, kopwe amairu punuwom me ren om fori mettoch epwe pwapwaiti.

Ekkewe ir ra tumunu ar pupunu ra finata pwapwa. Iwe mi pung pwe ekkoch sokkun semwenin tupw mi anamwota aninis, nge ua tongei ei nongonong mirit, anon Abraham Lincoln: “An aramas ukukun pwapwa mi anongonong won ar finata ifa ukukun repwe pwapwa.” A kan chiechioch ngeni ei wokisin: “Kutta, iwe oupwe kuna.”3

Ika sia kutta ngawan non punuwach are osukosuken ach pupunu, sipwe ennetin kuner, pun mi wor och ren aramas meinisin. Won ewe pwan epek, ika sia kutta ren met mi och, sipwe ennetin kuna, pun a wor och ren aramas meinisin.

Ekkewe ir ra tumunu ar pupunu ra utti ekkewe ira mi ngau me ra tumunu ekkewe pon ira. Ra apwapwaiti kukkun angangen chen mi efisata memmefin tong ennet. Ekkewe ir ra tumunu pupunu ra tumunu mwirimwirir.

Pwi kewe, chechemeni pwata ka tongei.

Angang iteitan ran ne apochokuna me awatteno pwapwa non om pupunu.

Chienei kana achengicheng, sipwe fori mettoch meinisin non ach tufich pwe sipwe anea nein ekkewe ngun mi pwapwa sia tumunu ach pupunu.

Tumunu Ach Famini

Ikkenai ua pwan mochen ingeiti ekkewe ir ra tumunu ar chiechi ren chon ar famini. Mi namwot iteitan famini epwe tumunu.

Ina mo mi fokkun och pwe aramas ra sisinei ei Mwichefen fan iten an famini pochokun, meni fan chommong sia mefi pwe a fich ngeni meinisin famini chinon chok ach. Nge ennetin ese wor famini mi unusoch.

A wor fansoun saw non iteitan famini.

Usun chok, nupwen semom me inom ra tingorek kopwe fich sassing ngenir, are nupwen tettenin inom a kakapasen en ka chuen anaemon pokiten kese pwapwaiti emon, are nupwen punuen pwium we a nuku pwe an ekiekin kafomen me pung napanap, are nupwen semom a kokkot ngeni fichin sasingin famini minne oua ufeni ufen chon echo kachito.

Me ka ufouf uf minne ese tongeni fat pwe ina en.

Ina usun famini.

Kich sia chon ekkewe chok sokkun genes, nge sise eu chok. Ngunuch mi sokkono. Sia sokkono non ach memef seni fisitan manauach. Me emon me emon kich sia sokkofesen.

Nap seni ach sipwe echimwa meinisin ar repwe winiti io sia mochen, sia tongeni finata ne pwapwaiti ekkei sokkofesen me kinisou pokiten ra aochu me awora kinikinin amairu non manauach.

Iwe nge, fan ekkoch, chon ach famini ra fori mettoch mi efeiengaw, mwan, are rese ekieki usun pwan ekkoch. Met sipwe fori non ekkena fansoun?

Ese wor eu chok ponuwan a och ngeni fansoun meinisin. Ekkewe ir ra tumunu ar famini mi fefeita pokiten ra poraus fengen me punuwer me ar, kutta netipen ewe Samon, me ausening ngeni ekkewe Ngun mi Fel. Ra sinei pwe met mi pung fan iten eu famini ese wewen mi pung fan iten pwan eu.

Iwe nge, mi wor eu mettoch mi pung iteitan fansoun.

Non ewe Puken Mormon sia kaeo usun ekkoch aramas ra kuna ewe monomonun pwapwa. Fan fitu tappin aramas, “ese wor anini fengen. … Iwe ennetin ese tongeni wor emon aramas mi kon pwapwa seni ir me nein ekkewe aramas meinisin ekkewe ra fen for me ren poun Kot.” Ifa usun ra fori? “Pokiten ewe tongen Kot minne a nonnom non netipen ekkewe aramas.”4

Met chok osukosuk om famini oua weri, met chok oupwe fori ne awesi ir, nepoputan me nesoponon ponuan tong ennet, ewe nimenimochun tong an Kraist. Ika esap ren ei tong, famini mi nikinikin unusoch ra osukosuk. Ren ena tong, famini mi watte ar weires ra fefeita.

“Tong ennet ese ngaweno.”5

Mi ennet ne tumunu pupunu! me mi ennet ne tumunu famini!

Nikitano Namanam Tekia

Namanam tekia mi u ngeni tong. Namanam tekia eu popun napanap minne pupunu me famini ra osukosuk. Namanam tekia mi songokai, kirikiringaw, me mochenia. Namanam tekia a mwanino pochokun me ese afanni ochun ekkoch. Namanam tekia a tipemmong. Namanam tekia a nuku mi wor ngawan nupwen ese wesewesen wor ngawan me a opano an apwangapwang non mwaken. Namanam tekia mi apinukunukungaw me songokai. Ennet, ika tong ennet mi ewe ennetin tong an Kraist, iwe namanam tekia a aweweochu Setan.

Namanam tekia a fis fan chommong. Nge esap kinikinin ngunuch, me ita esap nom nein chon angei ewe pristut mi pin an Kot.

Manau a mochomoch, pwiich kana. Niamam a tongeni nomotam—ekkoch repwe weri niwinin ren fansoun ese much.

Ifa usun om foffor ngeni punuwom are noum kewe are semom me inom are pwimi a tongeni anapa mwirimwirum. Ifa sokkun emwirimwir kopwe anomu fan iten mwirimwirum? Ew minen rochongau, kirikiringaw, song, niuokus, ika keimuno? Are emwirimwirin tong, tipetekison, omusomus, marita non pekin ngun, me tipew?

Mi namwot pwe sipwe chechemeni, “Kopung esepwarano umoumoch nupwen epwe apungu ewe aramas ese wor an umoumoch.”6

Fan iten nefinemi non famini, fan iten ngunmi, ouse mouchen oupwe umoumoch, pun “umoumoch epwe okufatiw pungun kopung.”7

Nikitano namanam tekia.

Wesewesen omusomus ngeni noum kewe, punuwom, om famini, are chienom kewe esap eu esisinen apwangapwang nge esisinen pochokun. Mi auchea om kopwe pung nap seni om kopwe efisata nenien tumunu, echikarata, me tong?

Oupwe kouta piris; ousap atareno.

Ina me esap tipisum—eni wesewesen nupwen esap tipisum—kopwe mut ngeni tong epwe pworacho ngeni namanam tekia.

Ika oupwe fori ei, met chok osukosuk ka weri epwe nu senuk, me pokiten ewe tongen Kot non netipemi, anini epwe kisino. Ekkei nongonongen tumunu nefinach mi fich ngenikich meinisin, ina mo ika sia pupunu, aimufesen seni punuwach, niipich, are anaemon chok. Kich meinisin sia tongeni chon amanauen famini pochokun.

Ewe Tong Napanap

Pwiich kana, non ach angang ne tumunu ach pupunu me ach famini, usun non mettoch meinisin, sipwe tapweno nenien appirun ewe Emon a tumunukich. Ewe Chon Amanau a winini “ngunuch ren tong.”8 Jises Kraist I ach Masta. An angang ina ach angang. Ina eu angangen tumunu, me a poputa non imwach.

Tong non ewe kokkoten manau ese much ese maicha me a kukutta ochun ekkoch aramas. Ina ewe tongen Semach won Nang fan itach.

Nupwen sia appiru an ewe Chon Amanau tong, Epwe ennetin efeiochu me anapano ami angang wenechar ne tumunu ami pupunu me apochokuna ami famini.

Amo ewe Samon epwe efeiochuk non om angang weires pwe kopwe anea nein ekkewe ir ra manaw. Ina ai iotek non iten Jises Kraist, amen.