Qhuas Cov uas Cawm Lwm Tus

Kuv xav tias ib qho ntxiv uas ua rau kuv nco txog lub sij hawm no tau ntev yog qhov uas nws txawv ntawm tib neeg tej kev xav niaj hnub nim no. Nyob hauv ntau lub sawm fem nyob thoob plaws lub ntiaj teb, zoo nkaus txhua yam los peb yeej tso tseg tau. Thaum lub sij hawm uas ib yam dab tsi pib puas los yog tsis zoo lawm—los sis thaum peb nkees siv xwb—peb cia li muab pov tseg thiab yuav ib lub tshiab, los sis ib lub zoo dua los yog tshiab dua.

Peb ua li no rau peb cov xov tooj, khaub ncaws, tsheb—thiab tu siab uas peb ua li no rau cov hluas nkauj thiab poj niam.

Txawm tej lub sij hawm qhov uas peb tso tej khoom uas tsis muaj nqi tseg yog peb tsis xav tau ntxiv lawm zoo los, thaum peb hais txog tej yam uas muaj nqi mus ib txhis—peb txoj kev sib yuav, peb tsev neeg, thiab peb tej kev cai—qhov uas peb tso tej yam qub tseg kom yuav tej yam tshiab los yeej ua rau peb nyuaj siab kawg.

Kuv zoo siab uas kuv koom ib lub koom txoos uas saib kev sib yuav thiab tsev neeg rau nqi. Txhua tus nyob thoob plaws lub ntiaj teb paub tias cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej muaj tsev neeg thiab kev sib yuav uas muaj zog heev. Kuv ntseeg tias muaj li no vim peb muaj qhov tseeb uas Yauxej Xamiv txum tim rov qab los qhia tias peb txoj kev sib yuav thiab tsev neeg yeej nyob tau mus ib txhis. Tsev neeg tsis yog kom pab peb ua neej zoo nyob hauv lub ntiaj teb xwb ces peb yuav muab tso tseg thaum peb mus txog ntuj ceeb tsheej. Tiam sis, tej no yeej yog tus txheej txheem nyob saum ntuj ceeb tsheej. Tej no qhia txog ib tug yam ntxwv xilethi-aus thiab tus yam ntxwv ntawm Vajtswv tsev neeg nyob mus ib txhis.

Tiam sis tsis yog peb txoj kev sib yuav thiab tsev neeg lam muaj zog vim peb yog cov mej zeej ntawm lub Koom Txoos. Xwv kom muaj li no peb yuav tsum siv zog ua hauj lwm tsis tu tsis tseg. Cov lus qhuab qhia txog tsev neeg mus ib txhis yuav tsum pab peb rau siab cawm thiab txhawb nqa peb txoj kev sib yuav thiab tsev neeg. Kuv qhuas cov uas tau saib xyuas thiab tshwj tseg tej yam tseem ceeb uas nyob mus ib txhis no.

Hnub no kuv xav hais lus qhuas cov uas cawm lwm tus.

Tau ntau xyoo kuv tau ua kab ke sib khi rau tej nkawm niam txiv uas sib hlub thiab cia siab heev. Kuv yeej tsis tau ntsib leej twg uas xav tias nkawd yuav sib nrauj los sis nyuaj siab, thaum nkawd ib leeg ntsia ib leeg rau ntawm lub thaj.

Tiam sis, ib txhia yeej raug li ntawd.

Xyov ua li cas, thaum sij hawm dhau mus thiab kev sib hlub hloov, ib txhia xav zuj zus txog lawv tus khub tej kev txhaum me me thiab tsis xav txog nws txoj kev zoo siab. Thaum ua li ntawd, ib txhia raug ntxias hais tias lawv tus khub tsis ntse txaus, tsis lom zem txaus, los sis tsis hluas txaus. Thiab xyov ua li cas lawv muaj lub tswv yim hais tias lawv muaj cai mus nrhiav lwm tus.

Cov kwv tij, yog tias qhov kuv hais no piav txog nej me ntsis, kuv ceeb toom nej hais tias nej taug ib txoj kev uas yuav ua rau nej kev sib yuav thiab nej tsev neeg yuav piam thiab nej yuav nyuaj siab. Kuv thov kom nej tsum tam sim no, tig los, thiab rov qab los rau txoj kev nyab xeeb uas yog kev ncaj ncees thiab kev ua raws nraim li kev khi lus. Thiab, lub ntsiab cai no yeej zoo ib yam rau peb cov muam.

Tam sim no, kuv xav hais rau cov kwv tij uas raug ntxias hais tias lawv yuav tsum nrhiav tus “poj niam zoo tag nrho” ua ntej lawv yuav tham nws tiag tiag los yog yuav poj niam.

Kuv cov kwv tij uas kuv hlub, xav kom nej nco ntsoov tias, yog muaj ib tug poj niam zoo tag nrho, nej xav tias nws yuav xav paub nej los?

Nyob hauv Vajtswv txoj hau kev kom peb zoo siab, peb tsis nrhiav ib tug uas zoo tag nrho, tiam sis peb nrhiav ib tug uas yuav koom nrog peb tsim ib txoj kev sib yuav uas muaj kev sib hlub, uas kav ntev thiab muaj kev sib raug zoo tag nrho, kom tas lub neej no. Qhov ntawd yog lub hom phiaj.

Cov kwv tij, cov uas cawm lawv txoj kev sib yuav to taub hais tias xwv kom muaj li ntawd lawv yuav tsum siv sij hawm, ua siab ntev, thiab qhov tseem ceeb tshaj yuav tsum muaj cov koob hmoov los ntawm Yexus Khetos txoj Kev Theej Txhoj. Nej yuav tsum ua siab zoo, tsis txhob khib, tsis txhob ua raws li nej lub siab nyiam xwb, tsis txhob chim sai, tsis xav phem, thiab xyiv fab txog qhov tseeb. Yuav tsum muaj kev sib hlub, uas yog Khetos txoj kev hlub dawb paug.¹

Tej no yuav tsis tshwm sim kiag thaum ib lub sij hawm xwb. Xwv kom muaj kev sib yuav zoo yuav tsum ua zoo ib hnub dhau ib hnub, mus tas ib sim neej.

Li ntawd mas yeej yog xov xwm zoo.

Vim hais tias txawm peb txoj kev sib yuav zoo li cas tam sim no los, yog nej ua tej yam me me kom ua siab zoo, muaj siab hlub, mloog lus, ua kev txi, to taub thiab tsis xav txog nej tus kheej ces thaum kawg yuav muaj ib txoj kev sib yuav zoo.

Yog tias ua rau yus xav tias yus siv sij hawm ntev dhau lawm, cia li nco ntsoov tias: kev sib yuav uas zoo siab yuav nyob mus ib txhis! Yog li ntawd, tsis qaug zog hlo li vim nej puas lub hauv paus ntawm ib txoj kev sib yuav zoo heev. Thiab los ntawm tej yam me me tawm tej yam zoo kawg.²

Tej zaum yog ib txoj hauj lwm uas yus ua zuj zus, tiam sis tsis tas nyuaj siab thaum yus ua. Muaj tseeb tiag, txawm kuv hais ib qho uas txhua tus paub los, tsis tshua muaj kev sib nrauj thaum tus txiv thiab tus poj niam zoo siab.

Yog li ntawd cia li zoo siab!

Thiab cov kwv tij, ua rau nej tus poj niam xav tsis thoob vim nej ua tej yam kom nws zoo siab.

Cov uas cawm lawv txoj kev sib yuav xaiv kev zoo siab. Txawm muaj ib txhia uas mob nyuaj siab uas yuav tsum muaj kev pab kho mob los, kuv nyiam lub tswv yim uas Abraham Lincoln tau hais tias: “Neeg feem coob yeej zoo siab npaum li lawv txiav txim siab xwb.” Cov lus ntawd sib haum nrog nqe vaj lug kub uas hais tias: “Nrhiav, thiab nej yuav ntsib.”³

Yog peb nrhiav tej yam tsis zoo ntawm peb tus khub los yog kev ntxhov siab hauv peb txoj kev sib yuav, peb yeej yuav nrhiav tau, vim txhua tus yeej muaj tej yam zoo li ntawd. Tiam sis, yog peb nrhiav tej yam zoo, peb yeej yuav nrhiav tau, vim txhua tus yeej muaj tej yam zoo thiab.

Cov uas cawm kev sib yuav rho cov nroj tsuag thiab ywg dej rau cov paj. Lawv zoo siab rau tej yam kev tshav ntuj uas ua rau lawv muaj siab hlub. Cov uas cawm kev sib yuav kuj cawm tiam neeg tom ntej.

Cov kwv tij, nco ntsoov vim li cas nej hlub nej tus poj niam.

Ua hauj lwm txhua hnub kom nej txoj kev sib yuav muaj zog thiab muaj kev zoo siab.

Kuv cov phooj ywg zoo, thov kom peb yuav ua txhua yam uas peb ua tau kom koom nrog cov neeg zoo siab uas cawm lawv txoj kev sib yuav.

Hnub no Kuv kuj xav hais lus qhuas cov uas cawm lawv txoj kev sib raug zoo nrog lawv tsev neeg. Txhua tsev neeg xav tau kev cawm seej.

Txawm yog tib neeg xav tias lub Koom Txoos no muaj tsev neeg uas muaj zog heev, ntshe peb xav tias qhov no muaj tseeb rau txhua tsev neeg uas yog Haiv Neeg Ntseeg hauv Hnub Nyoog Kawg tshuav peb tsev neeg uas tsis zoo li ntawd xwb. Tiam sis qhov tseeb yog tsis muaj tsev neeg zoo tag nrho.

Txhua tsev neeg nyias muaj nyias kev txawv heev.

Xws li, thaum nej niam nej txiv hais kom koj thaij nkawd daim duab, los yog nej tus phauj hais tias nej tsis tau yuav poj niam vim nej xaiv neeg heev, los sis nej tus yawm yij xav tias nws txoj kev xav txog kev kav teb chaws yeej yog raws li txoj moo zoo, los sis thaum nej txiv xav thaij duab txog nej tsev neeg es nws kom txhua tus ua zam zoo li cov uas nyob hauv movie uas nws nyiam tshaj plaws.

Thiab nej yuav tsum ua zam zoo li Chewbacca.

Txhua tsev neeg yeej zoo li ntawd.

Tej zaum peb muaj tib co poj koob yawm txwv, tiam sis peb nyias txawv nyias. Peb cov ntsuj plig nyias txawv nyias. Peb nyias muaj lub neej txawv nyias thiab. Thiab yog li ntawd peb txhua tus nyias txawv nyias.

Peb tsis tas yuam txhua tus ua raws nraim peb lub siab xav, tiam sis peb yeej saib tej yam txawv ntawd rau nqi thiab zoo siab vim tej ntawd ua rau peb muaj kev zoo siab thiab kev lom zem nyob hauv peb lub neej.

Tiam sis, tej lub sij hawm peb tsev neeg ua tej yam uas tsis txawj xav, ua rau lwm tus mob, los yog tsis coj dawb huv. Peb yuav tsum ua li cas thaum ntawd?

Tsis muaj ib qho xwb uas kho tau txhua qhov teeb meem li ntawd. Cov uas cawm lawv tsev neeg yeej ua tau vim lawv sib tham nrog lawv tus khub thiab tsev neeg, nrhiav tus Tswv lub siab nyiam, thiab mloog tus Vaj Ntsuj Plig Dawb Huv tej kev tshoov siab. Lawv paub tias qhov uas yog rau ib tsev neeg tej zaum tsis yog rau ib tsev neeg ntxiv.

Tiam sis muaj ib qhov uas yog txhua lub sij hawm.

Nyob hauv Phau Ntawv Maumoos peb kawm txog ib co neeg uas paub tias yuav tsum ua li cas kom zoo siab. Muaj ntau tiam neeg uas “tsis muaj kev sib cav sib ceg. … Thiab tseeb tiag tsis tau muaj ib co neeg ua zoo siab tshaj nyob hauv tag nrho cov neeg uas tau … tsim los ntawm Vajtswv txhais tes..” Lawv ua li cas kom zoo li no? “Vim yog Vajtswv txoj kev hlub uas tau nyob hauv cov neeg tej siab.”⁴

Txawm nej tsev neeg muaj teeb meem dab tsi, txawm nej yuav tsum ua li cas kom kho tau, qhov tseem ceeb tshaj plaws yog kev siab hlub, Khetos txoj kev hlub dawb paug. Yog tsis muaj kev hlub zoo li no, yeej yuav nyuaj tsis hais yus muaj ib tsev neeg zoo tshaj plaws los. Yog muaj kev siab hlub, yeej yuav zoo tsis hais yus muaj ib tsev neeg uas muaj teeb meem ntau.

“Kev siab hlub yeej tsis plam ib zaug li.”⁵

Qhov no muaj tseeb thaum cawm kev sib yuav! Qhov no muaj tseeb thaum cawm tsev neeg!

Tus yeeb ncuab ntawm kev siab hlub yog kev muab hlob. Kev muab hlob yeej ua rau kev sib yuav thiab tsev neeg muaj teeb meem. Kev muab hlob chim sai, tsis ua siab zoo, thiab khib siab. Kev muab hlob hais tias yus muaj zog thiab saib tsis taus lwm tus tej kev tsim txiaj. Kev muab hlob yeej qia dub thiab yooj yim chim. Kev muab hlob ua rau yus xav tias lwm tus xav ua phem thaum lawv tsis xav li ntawd thiab ntxias kom tsis pom yus tej kev qaug zog. Kev muab hlob yeej xav tias ua tsis tau, xav phem, npau taws, thiab siab luv. Yog tias kev siab hlub yog Khetos txoj kev hlub dawb paug, ces kev muab hlob yog Dab Ntxwg Nyoog tus cwj pwm.

Tej zaum tib neeg ntau muab hlob. Tiam sis qhov no tsis yog peb caj ceg ntawm sab ntsuj plig, thiab yeej tsis tsim nyog uas cov uas tuav Vajtswv lub pov thawj hwj dawb huv muab hlob.

Cov kwv tij, lub neej no yeej kav tsis ntev. Tej kev khuv xim ntshe yuav kav ntev—ib txhia yuav mus ib txhis li.

Qhov uas nej ua li cas rau nej tus poj niam los sis me nyuam los sis nej niam nej txiv tej zaum yuav mus kom dhau ntau tiam neeg. Nej xav kom nej cov xeeb leej xeeb ntxwv nco ntsoov dab tsi? Puas yog kev tsiv heev, kev pauj kua zaub ntsuab, kev npau taws, kev ntshai, los yog kev kho siab? Los sis puas yog kev hlub, kev txo hwj chim, kev zam txim, kev siab hlub, kev loj hlob ntawm sab ntsuj plig, thiab kev koom siab?

Peb txhua tus yuav tsum nco ntsoov tias, “Vajtswv yuav txiav txim rau tus uas tsis hlub lwm tus.”⁶

Thov kom pab nej tsev neeg, kom pab nej sab ntsuj plig, cia li muaj siab hlub tshua, vim “Vajtswv yuav tsis rau txim rau tus uas hlub lwm tus.”⁷

Cia li tso kev muab hlob tseg.

Qhov uas nej thov txim rau nej cov me nyuam, nej tus poj niam, nej tsev neeg, los yog nej cov phooj ywg tsis yog ib qho qaug zog tiam sis qhia tias nej muaj zog. Qhov uas yus hais yog puas tseem ceeb dua li yus tsim ib qho chaw rau kev saib xyuas, kev kho mob, thiab kev hlub?

Pab kom sib raug zoo; tsis txhob muab kev sib raug zoo rhuav.

Txawm yog nej tsis tau ua txhaum—tej zaum yog qhov tseem ceeb tshaj plaws thaum nej tsis tau ua txhaum—cia kev hlub kov yeej kev muab hlob.

Yog nej ua li no, txawm nej muaj teeb meem dab tsi los teeb meem ntawd yuav ploj mus, thiab vim Vajtswv txoj kev hlub nyob hauv nej lub siab, kev sib cav yuav ploj mus thiab. Tej ntsiab cai txog kev cawm tsev neeg yeej zoo ib yam rau peb txhua tus, txawm peb tau sib yuav lawm, sib nrauj, yog yawg ntsuag, los sis tsis tau yuav poj niam. Peb txhua tus muaj peev xwm cawm tsev neeg uas muaj zog.

Cov kwv tij, thaum peb siv zog cawm peb txoj kev sib yuav thiab peb tsev neeg, thov kom peb coj raws li tus yam ntxwv ntawm tus uas cawm peb. Tus Cawm Seej tau hlub peb tag nrho.⁸ Yexus Khetos yog peb tus Xib Hwb. Nws txoj hauj lwm yog peb txoj hauj lwm. Yog ib txoj hauj lwm cawm lwm tus dim, thiab txoj hauj lwm no pib nyob hauv peb lub tsev.

Kev hlub nyob hauv txoj kev cawm seej yeej tsis xav txog yus tus kheej thiab xav kom lwm tus zoo siab. Peb Leej Txiv Saum Ntuj Ceeb Tsheej hlub peb li no.

Thaum peb hlub zoo li tus Cawm Seej, Nws yeej yuav foom koob hmoov thiab txhawb nqa tej yam ncaj ncees uas peb ua kom cawm peb txoj kev sib yuav thiab muab dag zog rau peb tsev neeg.

Thov kom tus Tswv foom koob hmoov rau nej thaum nej ua ncaj ncees tsis tu ncua kom koom nrog cov neeg uas cawm lwm tus. Kuv thov Vajtswv li no los ntawm Yexus Khetos lub npe, amees.