In Ahkfuhlwactye Elos Suc Molwelah

Nga muh srihpac se sahyac ma ohiyac se inge an sihk ke lusen yac pucspucs uh pa mweyen siena liki ohiyacn un mwet uh mihsenge. Ke un mwet puhspuhs fin facluh, ma nuh kwewa luhman sisiwel na. Ke ma se muhtwacwacack in muhsahllah kuh mahtuhlah—finne ke kuht ullac ke ma sac—kuht sislah ac sohkwack ma wo likina, ma se sasuc, kahto kuh ac wo.

Kuht oruh ma se inge ke cell phone, nuknuk, stosah,—ac, ke ahsor, finne ke akuhpahsri uh.

Sahp oasr ma yohk in ahknwacsnwacsye moul lasr ke ma kuht tiac sifil enenuh, tuhsruhktuh ke ma yohk srihpac luhn ma pahtpaht uh—pahyuck lasr, sucu lasr, ac ohiyac wo lasr—sie ohiyacn nuhnak in ahol ma se met ke ma mihsenge uh kuh in use auli yohk.

Nga srui lah nga muhta ke alu se ma sacohkkihn pahyuck ac sucu uh. Mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah uh etweyuck fin facluh ke oasr kuhtuh pahyuck ac sucu wowo kom kuh in sokwack uh. Nga luhlahlfongi ma inge, ke ip se, sikyak ke srihpen ma pwacye sacohk ma fohlohkihnyuckyak sel Joseph Smith lah pahyuck ac sucu oreklac in ma in ma netok se. Sucu uh tiac ohiyac in lwelah ma luhn facluh uh in fihsracsrlah ac in sisilac ke kuht som nuh inkuhsrao uh. Ma pwacye, elos pa ohiyacn inkuhsrao. Elos pa akucl ke atacn celestial ac ma oacna sucu ma pahtpaht luhn God.

Tuhsruhktuh kuhpahsr fokoko ke pahyuck ac sucu uh tiac sikyak ke srihpen kuht mempucr ie Alu uh. Elos enenuh pacl nuhkwewa, orekma kalweniyuck. Mwe luti ke sucu ma pahtpaht enenuh in moklwe kuht in sang kuhiyacsr srihke in karihngihn ac ahkwoye pahyuck ac sucu lasr. Nga yuckihn ac ahkfuhlwactye mwet suc ahkkweye ac karihngihn akuhpahsri yohk srihpac, pahtpaht inge.

Mihsenge nga ke sramsram ahkfuhlwactye elos suc molwelah.

Ke yac ekahsr, nga oruh akwuck in siliyac ke siyacnyacn pucspucs suc finsrak ac luhngse. Nga tiacna ohsun nuh sin sie suc, ke elos ngwetwacni nuh sin sie sin sie ke altuhr uh, nuhnkuh muh elos ac sie lwen fahsrelihk kuh ahsor.

Koluk ohiyac kuhtuh oruh.

Ke ohiyac se, ke lwen puhspuhs som ac ohiyacn luhngse eklac, oasr kuhtuh suc muhtwacwacack in tui nuhnkuh ke engan luhn sie sin sie ac muhtwacwacack in akihlen ma sesuwohs srihksrihk uh. Ke ohiyac sacn, oasr kuhtuh suc srihfeyuck in luhlahlfongi lah muhtwacn kiyacl kuh mukul tuhmwacl tiac suhmaht, suhfal kahto lal, suhpwacr, kuh suhfal matwacl. Ac ke ohiyac sahyac elos eis nuhnak lah srihpac inge lwelah elos in muhtwacwacack in suk sahyac.

Tamuhlwel, fin fahkwack inge fototo in ahkuhtweyac nuh suwos finne ke ip srihsrihk, nga kai kowos lah kowos oasr ke inkacnek ma som nuh ke pahyuck muhsahlah, lohm muhsahllah, ac insiyac muhsahllah. Nga siyuck suwos in tui ingena, forma, ac fohlohk nuh ke inkacnek sef ke orekma pwacye ac suwohswohs nuh ke wuhlweacng. Ac, wi pac, ip yohk oacna se inge ma pac nuh sin tahmtahel sacohk lasr.

Ingena, kahs se na nuh sin mukul lolacp lasr uh suc soenna pahyuck ac ukwe mwe kikiacp se ma muh elos enenuh in sokwack “muhtwacn suwohswohs” se met liki elos kuh in fototoi kuh pahyuck.

Tamuhlwel sacohk luhk, lwelah nga in ahkacsmakihnye kowos, fin oasr muhtwacn suwohswohs, yac kowos ac nuhnkuh el ac luhngse kowos?

Ke plwacn in engan luhn God, kuht tiac suk ke mwet suwohswohs se tuhsruhktuh mwet se sucma, nuh ke lusen moul uh, kuht kuh in tuhkweni orekma in oraclah sie akuhpahsri luhngse, netok, ac suwohswohs likina met. Pa inge finsrak se.

Tamuhlwel, mwet suc molwelah pahyuck lalos kahlwem lah finsrak inge enenuh pacl, mong fihsracsr, ac, yohk liki nuhkwewa, mwe insewowo ke Iwaclah luhn Jisus Kraist. El enenuh kowos in kuhlwacng, tiac lwemta, tiac srohwohsr, tiac fihsracsr in kasrkuhsrak, tiac nuhnkuh ke ma koluk, ac ahkfuhlwactye ma pwacye. Ke kahs sahyac, enenuh luhngse pwacye, luhngse pwacye luhn Kraist.¹

Ma nuh kwewa inge tiac sikyak na. Pahyuck wolacna muhsaheack ip nuh ke ip, lwen nuh ke lwen, ke lusen moul uh.

Ac ma inge pa pweng wo.

Ke srihpen finne akuhpahsri lom suhpwacr ke pacl se inge, kuht fin kalweni sang yot srihsrihk ke kuhlwacng, pahkomuhta, lohng, kihsac, kahlwem, ac wacngihn srohwohsr, sie lwen pyramid yohk ac muhtwacwacack in kapwack.

Fin el luhma in ma nuh ke pacl loes, esam: pahyuck engan ac kuh in som nuh ke ma pahtpaht! Na kuht ac tiac kuh in ullac ke oruh ma wo, mweyen kuht ac akiyac pwelucng se ke pahyuck wolacna an. Ac ke ma srihk ac sikyak ma yohk.²

Sahp pa orekma kais kuhtuh uh, tuhsruhktuh tiac enenuh in orekma suhpwacr. Ma na pwacye, sensen in fahk ma pwacye uh, sahf uh suhkwac sikyak pacl mukul ac muhtwacn kiyac engan uh.

Oruh kowos in engan!

Ac tamuhlwel, ahklutye muhtwacn kiyowos ke oruh ma in ahkenganyaclos.

Elos suc molwelah pahyuck lalos sulwaclah engan. Mweyen pwacye oasr kain in chronic depression ma enenuh specialized treatment, nga luhngse lahlmwetmwet inge, sel Abraham Lincoln: “Inkaiyacn mwet uh engan fal nuh ke ma elos sulwaclah in engan uh.” Ma inge falyang ke kahsruh luhn ma suhmuhslah: “Suk, na kowos fah konauk.”³

Kuht fin suk ke ma sesuwohs ke muhtwacn kiyacsr kuh pahyuck lasr, pwacye kuht ac konwacack, ke srihpen oasr sin mwet nuh kwewa. Ke ohiyac sahyac, kuht fin suk ke ma wo, kuht ac konwacack, ke srihpen oasr ma wo pucspucs sin mwet nuh kwewa pac.

Mwet suc molwelah pahyuck uh kuhtanglah ma sesuwohs ac sokwack ma wo. Elos ahkfuhlwactye mukwikwi srihk ke ma kuhlwacng tuh moklwe puhla luhn luhngse pwacye. Mwet suc molwelah pahyuck molwelah fihl tok uh.

Tamuhlwel, esam lah efuh kowos tuh luhngse muhtwacn kiyowos.

Orekma lwen nuh kwewa in ahkfokokoye ac ahkenganye pahyuck lowos.

Kawuck sacohk luhk, lwelah kuht in oruh kuhiyacsr in wi u se luhn mwet muhtahl ac engan suc molwelah pahyuck lalos.

Mihsenge nga ke sramsram ke ahkfuhlwact nuh selos suc molwelah kuhpahsr lalos nuh sin sucu lalos. Sucu nuh kwewa enenuh molwelah.

Finne ma wolacna lah alu uh etweyuck ke sucu fokoko, sahp kuhtuh pacl kuht puhla ma inge wi sucu nuh kwewa luhn Mwet Luhlahlfongi ke Lwen-sahflah sahyacn sucu lasr. Tuhsruhktuh ma pwacye uh pa wacngihn sucu suwohswohs.

Oasr na pacl in elyah luhn sucu nuh kwewa.

Oacna, ke pahpah ac ninac kiyowos siyuck suwos in oraclah sie ”selfie” kaclos, kuh ke great-aunt lowos luhlahlfongi lah kowos srackna lolacp mweyen kowos sol, kuh ke brother-in-law lowos suc yohklac fahk lal nuhnkuh ma el luhlahlfongi ke ma luhn politics pa arulacna pwacye, kuh ke pahpah tomowos oraclah petsac luhn sucu ac mwet nuh kwewa nuknuk oacna mwet ke petsac luhngkihnyuck lal.

Ac kowos eis costume in luhmahl Chewbacca.

Sucu uh oacna kain sacn.

Kuht oacna sie ke genetics, tuhsruhktuh kuht tiac oacna sie. Nuhgn lasr siena. Kuht kapwack ke ohiyac tiac oacna sie ke ma kuht puhlakihn uh. Ac kais sie sesr kapwack sienalac ke srihpen ma inge.

Likina in oruh mwet nuh kwewa in oacna kuht, kuht kuh in sulwaclah in ahkfuhlwactye ma sienna inge ac sruikihn ma sienna mweyen elos sang ma wolacna ac mwe lut nuh ke moul lasr uh.

Kuhtuh pacl uh, tuhsruhktuh, mempucr ke sucu lasr uh sulaclah kuh oruh ma wacngihn nuhnak kac, mwe ngal, kuh ma fohkfohk. Meac kuht ac oruh ke ma inge?

Wacngihn top sefanna ke kain ma inge nuh kwewa. Mwet suc molwelah sucu lalos oraclah wo ke srihpen elos sramsram nuh sin muhtwacn kiyaclos ac sucu lalos, suk ma luhngse luhn Leum, ac lohng pihrihkyuck luhn Nguhn Muhtahl. Elos etuh lah ma wo nuh sin sucu se sahp tiac wo nuh sin sie sucu sahyac.

Tuhsruhktuh, oasr ma se ma wo ke kain ma nuh kwewa.

Ke Puk luhn Mormon kuht lotwelah ke un mwet se suc konwacack ma lukmac nuh ke engan uh. Ke fihl pucspucs, “wacngihn fohs fin acn uh. … Ac pwacyena lah tiac kuh in oasr sie un mwet engan yohk liki inge inmahsrlon mwet nuhkwewa suc tuh oreklac ke poun God.” Elos oruh fuhkah? “Ke srihpen luhngse luhn God ma oasr ke insiacn mwet ah.”⁴

Ke kuhtwena elyah oasr yurin sucu lowos, ke kuhtwena ma kowos enenuh in oruh in ahksuwohsye, muhtwacwacack ac sahflahiyacn top pa luhngse muhtahl, luhngse pwacye luhn Kraist. Fin wacngihn luhngse inge, finne sucu oacna in suwohs uh puhla pac elyah. Ke luhngse inge, finne sucu ma puhla elyah uh oraclah wo.

“Lungse el tiana wanginla.”⁵

Ma na pwacye se ke pahyuck moliyucklac uh! Ma pwacye na pwacye se ke sucu moliyucklac uh.

Mwet lokoalok luhlahp luhn luhngse pwacye pa inse fuhlwact. Inse fuhlwact sie srihpac yohk pahyuck ac sucu upackihn uh. Inse fuhlwact el mongsa, tiac kuhlwacng, ac lwemta. Inse fuhlwact ahkyohkye kuh lal sifacna ac tiac liye ma wo luhn mwet sahyac. Inse fuhlwact uh srohwohsr ac fihsracsr in fohlohyak. Inse fuhlwact uh pwacpa koluk ke pacl wacngihnuh ac okanlah mwe muhnahs lal ke kikiacp suhmaht hn. Inse fuhlwact pa nuhnkuh lah mwet sahyac sesuwohs, srihklac luhlahlfongi, ahkkasrkuhsrak, ac kuhsrahsrahlah. Pwacye, fin luhngse muhtahl pa luhngse pwacye luhn Kraist, na inse fuhlwact pa ip yohk luhn Setuhn.

Inse fuhlwact pa puhtatlac luhn mwet pucspucs. Tuhsruhktuh tiac ma luhn nguhn, ac tiac kuh in oasr yurin mwet suc sruok pristut luhn God.

Moul uh fototo, tamuhlwel. Auli uh kuh in oasr ke lusen pacl loes—ac kuhtuh oasr kihsrucngyac ma tiac wacngihnlac nuh tok ma pahtpaht.

Ohiyacnoruh lowos nuh sin muhtwacn kiowos kuh tuhlihk kuh pahpah kuh ninac kiyowos kuh ma wiyowos kuh in pihrihk fihl fahsruh uh. Meac kowos ke fihliyac nuh sin fihl lowos uh? Sie ma koluk nuh se, fohlohk sahk, sahngweng, kuh muhkwena? Kuh sie ma luhngse, inse puhsisacl, nuhnak muhnahs, pahkomuhta, mahtuhlah luhn nguhn, ac tuhkweni?

Kuht nohfohn enenuh in esam, “Nuhnuhnkuh uh wangin pakomuta lal nu sin mwet su tia pakoten.”⁶

Ke srihpen akuhpahsri in sucu lowos, ke srihpen nguhnuwos, nuhnak muhnahs oruh in pahkomuhta, mweyen “pakoten el ac fah kutangla nununku.”⁷

Eslah inse fuhlwact.

Sang nuhnak muhnahs pwacye nuh sin tuhlihk nuhtuwos, muhtwacn kiyowos, sucu lowos, kuh kawuck lowos tiac ahkkahlwemye mwe muhnahs tuhsruhktuh ke fokoko. In luhlahlfongi pwacye yohk srihpac likina oraclah ohiyac luhn karihngihn, ahkkweye, ac luhngse?

Orackag ma; tiac muhsahlwelah ma.

Finne kowos tiac oruh kuhtwena tahfonglac—sahp ke wacngihn ma koluk lowos—lwelah luhngse in kuhtanglah inse fuhlwact.

Kowos fin oruh ma inge, kuhtwena mwe sruhf ma kowos sun ac fah som, ac ke srihpen oasr luhngse luhn God ke insiyowos, fohs ac som. Ip yohk ke akuhpahsr in karihngihn inge kuh in kahsre kuht nuh kwewa, finne kuht pahyuck, katinmas, saf, kuh lolacp. Kuht nuh kwewa kuh in mwet lahngo luhn sucu fokoko.

Tamuhlwel, ke srihke lasr in molwelah pahyuck ac sucu lasr, oacna ke ma nuhkwewa, lwelah kuht in ukwe srihkasrak luhn Sie suc molikuhtlac. Mwet Lahngo se lasr suc molwelah “nguhnasr ke luhngse.”⁸ Jisus Kraist pa Mwet Kol lasr. Orekma Lal pa orekma lasr. Pa orekma in molwelah se, ac muhtwacwacack ke lohm sesr.

Luhngse ke ip luhn plwacn in molwelah tiac srohwohsr ac suk ma wo nuh sin mwet sahyac. Pa inge luhngse oasr yurin Pahpah tuhmasr Inkuhsrao kacsr.

Ke kuht fahsr tukun luhngse luhn Mwet Lahngo, El ac ahkinsewowoye ac ahkwoye kowos na pwacye ke mukwikwi suwohs lowos in mowelah pahyuck lowos ac ahkfokokoye sucu lowos.

Lwelah Leum lan ahkinsewowoye kowos ke mukwikwi oaru ac suwos in wi pac un mwet suc molwelah. Pa inge pruhe luhk ke inen Jisus Kraist, amen.