N̄an Nōbar Ro Rekar Kōjparok
Ilo am̧ ļoor iakwe eo an Rilo̧mo̧o̧r eo, em̧ool Enaaj kōjeraam̧m̧an im kōjeraam̧m̧an kijejeto ko am̧i rewāppen n̄an am̧i lo̧mo̧o̧ren m̧are ko am̧i im kōkajoorļo̧k baam̧le ko am̧i.
Elōn̄ iiō remo̧o̧tļo̧k, ikar pād ilo Frankfurt Germany Temple ke ikar kile ruo ripālele ro rej kabwijer pein doon. Kōjparok im en̄jake in iakwe eo aerro n̄an doon ilo aer kwaļo̧k n̄an doon ekar kam̧ōņōņōik eō.
Ijjab maron̄ lukkuun jeļā etke menin eļap an lukkuun im̧we eō. Bōlen kōn kar iakwe eo eaiboojoj an armej rein ruo rekar kwaļo̧k n̄an doon—juon kōkkaļļe ekalimotak er ilo kijenmej im kōjparok kallim̧ur. Ekar alikkar bwe ripālele rein ruo etto aer mour ippān doon im aer en̄jake n̄an doon ekar m̧wilaļļo̧k ium̧win elōn̄ iiō ko.
Juon Jukjukin pād an Men ko Kōjerbal im Jo̧kpeji
Ij ļōm̧ņak un eo juon im en̄jake in etto an jako ippa ej kōn oktak eo ej letok n̄an jet armej kōn m̧wil ko rej waļo̧k rainin. Ilo elōn̄ jukjukin pād ko ipeļaakin laļ in, men otemjej rej āinwōt jo̧kpej ko. Iien eo wōt im juon men ej jino an jab jerbal ak m̧aat an raan—ak aaet n̄e ej to ad kōjerbale im mōk kake—jej jo̧kpej e im bar bōktok juon, eo ekāāl kobban, juon men eo ekāāl ļo̧k, errabōlbōlļo̧k.
Jej kōm̧m̧ane men in kōn cell phone ko, nuknuk ko, wa ko, jikin jerbal ko—im, kabūrom̧ōjtata, kōtaan ko ad.
Men̄e emaron̄ lōn̄ aorōk in m̧anļo̧k wāween ko rejjab jejjet ilo mour ko ad ikijjeen m̧weiūk ko ejako aikuj eo aer, n̄e ej itok n̄an men ko raorōk n̄an indeeo—m̧are ko ad, baam̧le ko ad, im aorōk ko ad—kōņaan eo ad n̄an ukōt men ko rem̧o̧r kōnke jekōņaan men ko rekāāl emaron̄ bōk juon en̄jake in ajļo̧k eo ekajoor.
Ij kam̧m̧oolol bwe ij uwaan juon kabun̄ eo mej ej kaorōk m̧are im baam̧le. Membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata rebun̄bun̄ ipeļaakin laļ in kōn aer kōm̧m̧ani jet iaan m̧are im baam̧le rem̧m̧antata ko komaron̄ in loi. Ij tōmak menin ewaļo̧k, ej m̧ōttan wōt, m̧ool eo eaiboojoj ekar jepļaaktok kōn Josep Smith bwe m̧are im baam̧le ko rej aikuj n̄an indeeo. Baam̧le ko rejjab baj karōk ko n̄an kōm̧anm̧an mour bwe men otemjej ren em̧m̧an ioon laļ in, im maron̄ jako n̄e jetōbar lan̄. Ijjelo̧kin, rej kōllaajrak jān lan̄. Rej juon kōkkaļļe in juon jon̄ak an celestial im juon eo kar ejaak jān baam̧le eo an Anij indeeo.
Ak m̧are im kōtaan ko rekajoor an baam̧le rekar jab jide im waļo̧k, kōnke jej membōr ro an Kabun̄ in. Rej aikuj jerbal ko remakijkij, im aikuj ekkarōk. Katak ko an baam̧le n̄an indeeo rej aikuj im̧we kōj n̄an wujlepļo̧k kijejeto ko ad rem̧m̧antata n̄an lo̧mo̧o̧r im kōkajoorļo̧k m̧are ko ad im baam̧le ko. Ij kautiej im nōbar ro rekar kōjparok im kar kōkajoorļo̧k kōtaan kein raorōk, im kōtaan ko rej n̄an indeeo.
Rainin ikōņaan kōnono n̄an nōbar ro rekar kōjparok.
Kōjparok Mare ko Ad
Ium̧win elōn̄ iiō ko ikar kōm̧m̧an jerbal in kain̄i in liāpe ko n̄an elōn̄ ripālele ro eļap kōjatdikdik im iakwe ippāer. Ij jan̄in kar ioon jabdewōt ro, āinwōt rekar kalimjōk mejān doon ilo lokato eo, ļōmņak bwe renaaj jepel im rub būruweer.
Ilo m̧ool, jet rej jepel im rub būruweer.
Ilo juon wāween, ium̧win elōn̄ iien, āinwōt an m̧ootļo̧k elōn̄ raan ko im biktokin kōtaan eo am̧ eoktak, elōn̄ jet ro edikļo̧k aer ļōm̧ņak kōn doon im jino jidik bōd. Ilo kain mejatoto rot in, jet rej reel kōn jem̧ļo̧k in ekaburom̧ōjmōj bwe kōrā eo pāleer ejabwe jeļāļo̧kjeņ ippān, edik an likatu, ejjab lukkuun katōn̄tōn̄, ak elukkuun rūtto. Im ilo juon wāween rej bōk ļōmņak in bwe men kein rekōm̧m̧an aer kōņaan in jino reilo̧k n̄an jikin ko jet.
Ro jeiū im jatū, eļan̄n̄e menin epaake an kwaļo̧k kadkadim, ij kakkōļ kom̧ bwe kom̧wij pād ilo juon iaļ eo ej tōl eok n̄an juon m̧are eo erub, m̧weo erub, im bōro ko rerub. Ij akweļap ippāmi bwe kom̧win bōjrak, oktak, im ro̧o̧ltok n̄an iaļ in lo̧mo̧o̧r in em̧ool im ekautiej bujen ko. Im, aaet, ejjab pedped kein wōt rej jerbal n̄an sister ro ad rejitōn bōro.
Kiiō, baj juon wōt naan n̄an kōnono n̄an ro jeid im jatid ejjeļo̧k pāleer ro rej ļoor m̧akūtkūt ko rettiņo̧ me rej aikuj m̧okta in pukōt “kōrā eo ejejjet” m̧okta jān aer maron̄ deļo̧n̄e bujen eo eļap ak m̧are.
Ro jeiū im jatū jitōn bōro, imaron̄ ke kakeememej kom̧, eļan̄n̄e ekar wōr juon kōrā ewāppen, kom̧wij ļōmņak enaaj ke kōņaan kom̧?
Ilo karōk eo ekam̧ōņōņō an Anij, jejjab lukkuun kalimjōk juon armej eo ewāppen ak juon armej eo im, ilo aolepān mour in, jemaron̄ kobaiki kijejeto ko ad n̄an doon n̄an ejaake kōtaan juon iakwe, ewāppen, ej n̄an indeeo. En̄in ej kōttōbar eo.
Ro jeiū im jatū, ro rej lo̧mo̧o̧ren m̧are ko aer remeļeļe bwe jibadbad in ebōk iien, kijenmen, im ilōn̄ in men otemjej, kōjeraam̧m̧an ko an Pinmuur eo an Jisōs Kraist. Menin ej aikuji am̧ meanwōd, jouj, jab juunm̧aade, jab kappukot men ko an, jab illulu, jab ļōmņak nana, ak lan̄lōn̄ ilo m̧ool. Ilo naan ko jet, ej aikuj iakwe-em̧ool, iakwe eo erreo an Kraist.1
Aolepān men kein reban baj waļo̧k ilo juon iien ekadu. Mare ko rekajoor rej ekkal kōn birōk im bar birōk, raan im bar raan, ium̧win juon tōre in mour.
Im menin ej nuuj ko rem̧m̧an.
Kōnke jekdo̧o̧n ewi jon̄an an jelmo (ak bōlen jab kam̧ōņōņō) kōtaan ko ad bōlen ilo tōre in, eļan̄n̄e jej kōkm̧anm̧anļo̧k kōn jouj, tūriam̧o̧, ron̄jake, kaarmejete, meļeļe, im jab arōk, em̧ool bwe juon pyramid enaaj jino jutak.
N̄e bōlen ebōk juon iien eaitok: ak keememej m̧are ko rej n̄an indeeo! Kōn menin “jab mōk ilo kōm̧m̧an em̧m̧an, bwe kom̧ij likūt pedped in juon [m̧are] eļap. Im jān men ko reddik ej waļo̧k eo me eļap.”2
Emaron̄ juon jerbal eo erum̧wij, ak ejjab aikuj in juon eo ekabūrom̧ōjm̧ōj. Ilo m̧ool, kauwōtata eo im ekkā an waļo̧k, jepel ko ekkā aer waļo̧k ej n̄e ļeo im lio rej lukkuun m̧ōņōņō?
Lukkuun m̧ōņōņō!
Innām ro jeiū im jatū, kabwilōn̄ kōrā eo pāleem jān kōm̧m̧ani men ko rej kōm̧m̧an an m̧ōņōņō.
Ro rekar kōjparok m̧are ko aer rej kālet m̧ōņōņō. Men̄e em̧ool bwe jet kain nan̄inmej in aer in kōmālij rej aikuj kōm̧adm̧ōd ko raorōk, ij reel kōn naan in māletlet jidik in, kwaļo̧k kadkad in jān Abraham Lincoln: “Enan̄in aolep armej ro m̧ōņōņō n̄e rej karōke bwe ren m̧ōņōņō.” Kōkapilōklōk in an jeje ko rekwojarjar ej alikkar: “Pukōt, im kom̧ naaj lo.”3
N̄e jenej pukōt jab wānōk ko ilo kōrā eo pāleed ak inepata ko ilo m̧are ko ad, jenaaj loi, kōnke kajjojo armej ewōr ippāer. Ilo wāween eo juon, n̄e jej pukōt em̧m̧an eo, em̧ool jenaaj loe, kōnke aolep ewōr wāween ko rem̧m̧an ippāer barāinwōt.
Ro rej kōjparok m̧are ko rej kōkm̧anm̧anļo̧k wāween ko rejekkar im pukōt im mijōk wōt men ko rem̧m̧an. Rej lan̄lōn̄ kōn jerbal in tūriam̧o̧ ko reddik rej kauruur en̄jake ko rejouj an iakwe-em̧ool. Ro rekar kōjparok m̧are ko rej lo̧mo̧o̧ren ilju im jekļaj eo.
Ro jeiū im jatū, keememej etke kwaar iakwe e.
Jerbale kajjojo raan n̄an kōkajoorļo̧k m̧are im kam̧ōņōņōiki ļo̧k.
Ro m̧ōtta, jen kōm̧m̧ani men ko repād ilo kajoor eo ad bwe jen bōnbōn ippān jetōb ko rejeraam̧m̧an im m̧ōņōņō ro rekar lo̧mo̧o̧ren m̧are ko aer.
Lo̧mo̧o̧ren Baam̧le ko Ad
Rainin ij barāinwōt kōnono n̄an nōbar ro rej kōjparok kōtaan ko aer ippān baam̧le ko aer. Aolep baam̧le aikuj in kōjparok er.
An em̧m̧an āinwōt bwe Kabun̄ in ebun̄bun̄ kōn an kajoor baam̧le ko an, ekkā ad maron̄ en̄jake menin bwe ej aikuj jerbal n̄an aolep baam̧le ko Rekwojarjar ilo Kabun̄ ijjelo̧kin ko ad. Ak m̧ool eo ej bwe baam̧le ko rejjab wāppen.
Aolep baam̧le ewōr iien aer pen auwia.
Āinwōt, n̄e ro jinōm̧ im jemōm̧ rej kajjitōk ippām̧ bwe kwon “Pijaik” er, ak n̄e kōrā eo nej jinōm̧ ej kōmejajaiki bwe ejjan̄in lōn̄ pāleem̧ kōnke eļap am̧ ekkāleel, ak n̄e ļeo nej jeim̧ ej ļōmņak bwe meļeļe ikijeen politic relukkuun m̧ool im jim̧we, ak n̄e jemōm̧ ej karōk juon pija an baam̧le eo im aolep rej nuknuk āinwōt armej ro ilo juon pija em̧m̧antata ippān.
Im rej kipel eok bwe kwon kōņak costume ko repenjake eok im jab kwaļo̧k wōn kwe.
Baam̧le ko rej āinwōt menin.
Jemaron̄ juon wōt kōn bōtōktōk, ak wāweer rej oktak jān doon. Jetōb ko ad raorōk. Jej im̧we ilo wāween ko roktak jān en̄jake ko ad. Im kōj kajjojo āliktata rej tōpar jem̧ļo̧k ko roktak jān doon.
Ijjelo̧kin ad kajjieon̄ kipel aolep bwe ren erom wāween eo kōn kōņaan eo ad make, jemaron̄ jujen kālet n̄an m̧ōņōņō kōn oktak kein im kautieji ilo ad katōr jān jon̄an im kōmmākijkij wāween ko ejjeļo̧k ad kōtmāni kaki n̄an mour ko ad.
Jet iien, ijoke, ro uwaan baam̧le ko ad rej kōm̧m̧an jokālet ko reļe ilōn̄ in maron̄ ko aer, metak, ak jab kōm̧m̧ane men ko rem̧m̧an. Ta eo jej aikuj kōm̧m̧ane ilo jekjek kein?
Ejjeļo̧k juon uwaak eo me emaron̄ kalipopoik aolep jekjek kein. Ro rej lo̧mo̧o̧ren baam̧le ko aer rej jeraam̧m̧an kōnke rej kapilōk ro pāleer, pukōt ankilaan Irooj, im ron̄jake im̧we ko an Jetōb Kwojarjar eo. Rejeļā ta eo ejim̧we n̄an juon baam̧le me emaron̄ jab jejjet n̄an bar juon baam̧le.
Ijoke, ewōr wōt juon men eo ejim̧we ilo jekjek ko otemjej.
Ilo Bok in Mormon jej ekkatak kōn juon armej eo ekar lo menin ettiņo̧ n̄an lem̧ōņōņō. Elōn̄ in epepen, “eaar ejjeļo̧k juunm̧ad ko. … Im em̧ool eaar ejjeļo̧k bar armej rem̧ōņōņōļo̧k ilubwilijin armej ro otemjej kar ejaak jān pein Anij.” Elmen aer kar kōm̧m̧ane menin? “Kōnke iakwe eo an Anij eo eaar pād ilo būruōn armej ro.”4
Jekdo̧o̧n kain jorrāān rot eo baam̧le eo am̧ ej jelm̧ae, jekdo̧o̧n ta eo kwoj aikuj kōm̧m̧ane n̄an ņamejļan, jinoin im jem̧ļo̧kin uwaak eo ej iakwe-em̧ool, iakwe eo erreo an Kraist. N̄e ejjeļo̧k iakwe in, aaet baam̧le ko rewāppen rej en̄taan. Kōn menin, men̄e baam̧le ko ebooļ apan̄ ko ie ak rej jeraam̧m̧an.
“Iakwe-Em̧ool ej jamin jako.”5
Menin em̧ool n̄an lo̧mo̧o̧ren m̧are ko! Em̧ool n̄an lo̧mo̧o̧ren baam̧le ko!
Utōkļo̧k jān Kōj Utiej Bōro
Rikōjdat eo eļap an iakwe-em̧ool ej utiej bōro. Utiej bōro ej juon iaan un ko reļļap an m̧are im baam̧le ko rej en̄taan. Utiej bōro ej ilulu, lāj, im ebanban. Utiej bōro ej kakilepļo̧k kajoor eo an make im kōjekdo̧o̧n wānōk an ro jet. Utiej bōro ej ļōmņak kōn e make im epidodo an illu. Utiej bōro ej kile men eo enana ejjeļļo̧k jibadbad ie im ņo̧o̧j m̧ōjņo̧ ko an make ippān unin riab ko. Utiej bōro ejjab lōke ro jet, ejjeļo̧k kōjatdikdik, illu, im ejjab kijenmej. Ilo m̧ool, eļan̄n̄e iakwe-em̧ool ej iakwe eo erreo an Kraist, innām utiej bōro ej kōmeļeļeik kadkad in Setan.
Utiej bōro bōlen likjab eo ekkā an waļo̧k ippān armej. Ak ejjab m̧ōttan jolet eo ad ilo jetōb, im ejjeļo̧k jikin ilubwilijin armej in bujen ro, rikabwijer priesthood eo ekwojarjar an Anij.
Mour ekadu, ro jeiū im jatū. Ajļo̧k ko remaron̄ pād ium̧win juon tōre eaitok—jet renaaj wōr kaje ko aer ko renaaj wōnm̧aanļo̧k im jelet kōj n̄an indeeo.
Wāween am̧ kōm̧m̧an n̄an kōrā eo pāleem̧ ak ajri ro nejūm̧ ak ro jinōm̧ ak jemōm̧ emaron̄ wōnm̧aanļo̧k wōt ilo epepen ko am̧. Kain bwebwenato rot eo kwokōņaan in likūti ippān ro ineem̧? Juon eo ej kōmetak ro nejin, lāj, kōjdat, illu, im mijak? Ak juon eo ej iakwe, ettā bōro, jeorļo̧k bōd, jouj, im eddōkļo̧k ilo jetōb, juon wōt bōro?
Jej aikuj in keememej bwe “ekajet ejjeļo̧k tūriam̧okake ej ippān eo eaar jab tūriam̧o̧kake.”6
Jouj, n̄an em̧m̧an eo an kōtaan ko am̧, n̄an em̧m̧an eo an jetōb eo am̧, kwon jouj, bwe “tūriam̧o̧kake ej anjo̧ ioon ekajet.”7
Utōkļo̧k jān Kōj Utiej Bōro
Joļo̧k am̧ bōd ippān ajri ro nejūm̧, kōrā eo pāleem̧, baam̧le eo am̧, ak ro m̧ōttam̧ ej jab juon kōkkaļļe in m̧ōjņo̧ ak kajoor. Ejim̧we im eaorōkļo̧k n̄an kwe jān am̧ kōjparoke juon mejatoto in kōkkaajriri, kōmour, im iakwe?
Kōkm̧anm̧ani kōtaan ko am̧ ippān baam̧le eo am̧; jab kakkuri.
Men̄e ejjab am̧ bōd eo—bōlen eļaptata n̄e ejjab am̧ bōd eo—kōm̧m̧an bwe iakwe en oran̄ļo̧k utiej bōro.
Eļan̄n̄e kwonaaj kōm̧m̧ane menin, mekarta apan̄ ko kwoj jelm̧ai naaj eļļā, im kōnke iakwe eo an Anij ilo būruwōm̧, aetwerōk enaaj makunļo̧k. Pedped in katak kein kōn lo̧mo̧o̧r baam̧le ko rej jerbal n̄an kōj aolep, mekarta kōj rim̧are, jejepel, emej pāleer, ak ej jan̄in lōn̄ pāleer. Kōj aolep jemaron̄ in rilo̧mo̧o̧r ro an baam̧le ko rekajoor.
Iakwe eo Eļaptata
Ro jeiū im jatū, kijejeto ko ad n̄an lo̧mo̧o̧ren m̧are ko ad im baam̧le ko ad, jān ļoor waanjon̄ak eo an Juon eo ej lo̧mo̧o̧ren kōj. Rilo̧mo̧o̧r eo ekar wiini “jetōb ko ad kōn iakwe.”8 Jisōs ej ad Maajta. Jerbal eo An ej jerbal eo ad. Ej juon jerbal in lo̧mo̧o̧r, im ej ijjino ilo m̧ōko imōd.
Iakwe eo eļap ilo karōk in lo̧mo̧o̧r in ejjab ļōmņak kōn e make im ej pukot em̧m̧an eo an ro jet. En̄in ej iakwe eo an Jemedwōj Ilan̄ n̄an kōj.
Ilo ad ļoor iakwe eo an Rilo̧mo̧o̧r eo, em̧ool Enaaj kōjeraam̧m̧an im kōjeraam̧m̧an kijejeto ko ad rewāppen n̄an ad lo̧mo̧o̧ren m̧are ko ad im kōkajoorļo̧k baam̧le ko ad.
Irooj en kōjeraam̧m̧an kom̧ ilo kijejeto ko ami rekije im em̧m̧an n̄an ami bonbon ilubwilijin ro rej lo̧mo̧o̧r. En̄in ej jar eo aō ilo etan Jisōs Kraist, amen.