Kaping ong Irail Me Kin Doarehla

I lamalam pil ehu kahrepe me ire lingan wet tengkihla rehi ansou reirei pwehki e weksang dahme wialahr ahnepatail rahnwet. Nan wasa tohto nan sampah, mwomwen me mehkoaros wialahr dipwisou mengei en lekidekla. Ni ansou me dipwisou o tepda ohla de meringla—de ma kitail kin pwangahkihda—kitail kin mwadangete kesehla oh weliankihda mehkoht me laudsang, mehkot me kapw, lingan sang de mwahusang.

Kitail kin wia met ong cell phone kan, likou kan, sidohsa kan, doadoahk kan—oh, me kapwuriamwei, atail ehu ong mehteikan.

Ele mwein mie kamwahupen atail kamwakelehda atail mour oh kesehla dipwisou kan me kitail solahr anahne, ahpw ong mehkan me poatopoat oh kesempwal—atail pwoudkan, atail peneineikan, oh atail wiewia kan—medewe welianda me mering ki me kapw kak kahrehiong atail koluhla pwandala.

I kalahnganki ahi ieiang mwomwohdiso ehu me kin kesempwaliki pwopwoud oh peneinei. Tohn Mwomwohdiso en Sises Krais en Souleng en Imwin Rahn-akan kin sansalki nan sampah arail kakairada pwopwoud oh peneinei me keieu kaselel nan sampah. I kamehlele me ire wet pweida pwehki sang ni en Joseph Smith ah kapwurehdo padahk mehlel kan me koasoanehdi pwopwoud oh peneinei en kin poatopoat. Re sohte wia kosondi en momour mwahu pohn sampah oh pahn kin lekidekla ni atail lella nanleng, Ahpw, re wia kosondi sang nanleng. Ire pwukat pahrekongete koasoandien nanleng, me duwehte sapwellimen Koht peneinei poatopoat, oh iei duwen koasoandi sarawi wet me kitail kak duwekihla Samatail Nanleng.

Ahpw ehupene kehlail en nan pwungen pwopwoud oh peneinei sohte kin pein pwarada pwehki dene kitail wia tohn Mwomwohdiso wet. Mepwukat anahne epwel mwahu ansou koaros. Padahk en peneinei poatopoat konehng kamwakid kitail en doadoahngki uwen atail kak koaros en kolokol oh kakehlaka atail pwopwoud oh peneinei kan. I linganiki oh kepinga irail kan me kolokolehr oh kakehlailiala arail ehupene kesempwal, poatopoat pwukat.

Rahn wet, I men wia ahi kaping ong irail kan me kin doarehla.

Nan irair en sounpar kei, I wiahier tiahk sarawi en katengteng pene en pwopwoud pwulopwul tohto. I saikinte tuwongedi mehmen me, ni ara kileng pene nan mesera kan ni pei sarawio, medewe me ira pahn ni imwio, mweipeseng oh mohngiong ira medekla.

Ahpw ekei wia.

Kedekedeo, ni rahn akan ah pahn wie tohtohla oh ahd en limpoko wekila, mie ekei me tepda sohla nohn medewe en mehteio ah iren kaperen oh tepier tetehkseli kisin sapwung kan. Nan soangen irair wet, mie me tepier medewe oh kamehlelehier me arail pwoudo sohte nohn loalokong, sohte masamwahu, sohte kaperen, de mahlahr. Oh irail eri tepier medewe me ele e konehngehr irail en tepda kileng seli.

Riei ohloko, ma ire pwukat mwur sair kumwailda, I men keperkin kumwail me kumwail weweidehr nan ahlen mweipeseng en nan pwungen pwopwoud, peneinei mwerpeseng, oh mohngiong ohla. I peki ni ngidingid kumwail en uhdi met, pirekekdo, oh pwurodo nan elen wahu oh kapwaiahda inou kan. Oh, ire pwukat pil doke te riatail lihakan.

Met, I men kosoiong irail riatail ohl kiripw kan me iang ahneki madmadau likamwo me dene re lao diar “lih unseko” rahpw pahn medewe ni mehlel kapwopwoud.

Kompokepahi ohloko, I men katamankin kumwail, ma mie lih unsek men, kumwail medemedewe me e pahn pwungkin kumwail?

Nan sapwellimen Kauno pilahn en popohl, kitail sohte raprapahki mehmen me unsek ahpw aramas emen me kitail kak patehng erein mour, kitail en kak sawaspene oh kawada ehupene ehu me audaudkihda limpoak mehlel.

Kompokepahi Ohloko,Irail kan me kin doarehla arail ehupenehn pwopwoud kan wehwehki me ehupene wet anahne pen, kanengamah ansou koaros, oh pohnangin mehkoaros, kapai kan en Tohmw en Sises Krais. E anahne kumwail en kanengamah, kadek, sohte kin peirin, sohte ropropehng pein kumwail, dehr mwadang lingeringer, sohte medewe me suwed, perenki me mehlel, kamehlele mehkoaros, kopworopworiki mehkoaros, oh powehdi mehkoaros. Ni mehlel, e anahne limpoak mehlel, limpoak mehlel en Krais.¹

Mepwukat koaros sohte kin wiahkintehieu pweida. Pwopwoud teng rasong wiepen kauwada ihmw teng, ehu takai pohn ehu, rahn koaros, erein mour.

Oh mwo wia rohng mwahu.

Pwe sohte katepe ia uwen eh patapat [de pwukiaki] en ata ehupene ansou wet, ma kita pahn wad ehu kapatahieng kisin takai en kadek, limpok, rongorong emenemen, tohnmetei, wehwe, oh kadek lamlam, mwurin ansou kis ehu lapalahn ihmw pahn kokouda.

E mwomwen pahn werei, ahpw tamataman: pwopwoud kin mie kin pwe en momour poatopoat! Eri “dehr uhdihsang wia me mwahu, pwe kumwail wiewia poahson en [pwopwoud] mwahu ehu. Oh me tikitik kan kin wiahda me laud.”²

Doadoak wet mwein pahn pwand, ahpw e sohte apwal. Ni mehlel, pwe ihme kin kalap wiawi, kak ien kosoia me mweipeseng sohte kin wiawi ma ohlo oh liho kin ahneki popohl?

Eri ahneki popohl!

Oh kapereni ahmw pwoud ki ahmw wiahda mehkan me e pahn perendakihda.

Irail me doarehla arail ehupenehn pwopwoud kan kin ahneki peren. Detehn mehlel me ekei irehn kapwunod kan kin anahne wiepen kamwahula tohror, I iang kamehlele wiepe ehu me Abraham Lincoln kosoia: “Pali tohtohn aramas kin ahneki peren me pein irail koasoanehdi ren ahneki.”³

Ma kitail rapahki ire soh itar kan en atail pwoud de ire kelingernger nan atail wie pwopwoud, kitail pahn uhdan diar, pwe aramas koaros ahneki ire pwukat. Oh ma kitail rapahki me mwahu, kitail pil pahn diar, pwe mie en aramas koaros arail wiewia mwahu tohto.

Irail me doarehla arail ehupenehn pwopwoud kan e duwehte arail mwatiasang dihpw suwed kan oh kalamwure wahn rohs. Irail kin kapinga wiewia tikitik kan me kin kakairada pepehm en limpoak mehlel. Irail me kin doarehla ehupenehn pwopwoud kin doarehla dih en mwuhr kan.

Riei ohloko, tamataman kahrepen amwail alehdi limpoak.

Koadoahki rahn koaros amwail ehupenehn pwopwoud en kehlailla oh kaperen.

Kompoakepahi kan, kitail wia uwen atail kak koaros pwehn iang irail me sarawi oh popohl kan me doarelahr arail ehupenehn pwopwoud kan.

I pil men wia ahi kaping ong irail kan me doarelahr arail ehuehng arail peneinei kan. Oh ni mehlel, kitail anahne doarehla peneinei koaros.

Nin duwen en Mwomwohdiso wet eh dehdekier ah paosonkihda peneinei teng kei, kitail kin kalap pepehm me ire wet mehlel ong peneinei en LDS koaros ihte atailo me so. Ahpw ni mehlelo sohte peneinei ehu me unsek.

Mie en peneinei koaros arail irehn kapwunod.

Me rasehng, ahmw pahpa/nohno peki ken kilele ira, de ansou me rien omw nohno de pahpa ngidingidki me ke kiripwte pwehki ahmw nohn lipilipil, de ansou me ahmw mwah medemedewe me ah madmadau me pahrekehng rongamwahuo, de ansou me ahmw pahpao koasoanehdi kumwail en wia ehu kilel en peneinei ni amwail likouki likou me duwehte en irail tohn nan kasdo me e kin pwungki.

Oh kumwail eri ale en Chewbacca kapwato.

Peneinei kan duwehto mwo.

Kitail mwein ahnekipene nta ehute, ahpw kitail sohte duwepenehte. Atail pepehm kan wekpeseng. Lipwen irair en atail mour kan wekpeseng. Emen emen kitail kin imwkihla mehkot wekpeseng.

Pwe kitail en dehr idingehng aramas koaros en wiahla ehute, kitail kak pilada kitail en kamwauwihla wekpeseng pwukat oh kapingki pwehki sang ni ire kaperen oh kapwuriamwei kan me wekpeseng pwukat wiahieng atail mour kan.

Ahpw, ekei ansou, tohn atail peneinei kan kin pilada mwekid me sohte mwahu de sohte soaramwahu. Ekei ansou irail kin wia arail mwekid ni seu lamalam,kansensuwed, de sohte mwahu. Dahme kitail anahne wia nan irair pwukat?

Sohte irehn kamwahu ehu me kak kapwunagala mwekid koaros. Irail kan me doarehla arail peneinei kan kin pweida pwehki irail kin ale kaweid sang arail pwoud, rapahki kupwuren Kauno, oh kin pohnese mwenginingin en Ngehn Sarawio. Irail ese me dahme kin pwung ong ehu peneinei kakete sohte mwahu ong peneinei teio.

Mie mehkot me kitail kak wia me kin pwung ong mwekid koaros.

Nan Pwuken Mormon kitail sukuhlki duwen aramas kei me diar wiepen ahneki popohl. Nan irair en dihkei, “sohte uhpene wiawi. … Oh mehlel sohte aramas me kak diar peren laudsang irail nan pwungen aramas koaros me kepikpikda sang Koht.” Ia mwomwen arail kak wia met? “Pwehki sang ni limpoak en Koht me mih nan mohngiong en aramas akan.”⁴

Sohte lipilipil kahpwal kan me amwail peneinei sohsohpai, dahme kumwail kak wia pwehn kapwungala, sohte mehkoht likin limpoak, limpoak mehlel en Krais. Ma sohte limpoak wet, peneinei unsek kan kin pingida. Ma mie limpoak wet, peneinei kan kin powehdi kahpwal. Kitail doadoahngki en Pwihn en Sawas en Lih arail oarolapo, “Limpoak mehlel sohte kin sohrala.”5 Ihmet me kin doarehla ehupenehn pwopwoud kan, oh pil kin doarehla peneinei kan.

“Limpok Mehlel sohte kin salongala.”⁵

E mehlel ong ni doarepen pwopwoud!E mehlel ong sawasepen peneinei!

En limpoak mehlel imwintihti laud iei aktuwahu, oh ihme wia kahrepe keieu laud me pwopwoud oh peneinei kan kin pingida. Aktuwahu kin keh lingeringer, sempoak, oh luwakahk. Aktuwahu kin liosohski pein ah kehl oh kasohwe en mehteikan arail wiewia mwahu kan. Aktuwahu kin noahrok oh mengei en mwakarada. Aktuwahu kin lemlemehk suwedki mehkot me sohte oh kin ekihla ah suwed kan ni eh kin liksansalmwahu. Aktuwahu kin keseulikilik, katiamau, lingeringer, oh sohte kanengamah. Mehlel me limpoak mehlel iei limpoak en Krais, ah aktuwahu iei wiewia en Sehdan.

Aktuwahu ele wia mehkot me rek rehn aramas. Ahpw e sohte wia kisehn ngenitail, oh sohte dewe rehn ohl en inou, me kolokol prihstuhd sarawi en Koht.

Riei ohloko, mour me mwotomwot. Koluhla kak mihmi ki ansou reirei—ekei pahn kak elehda pali suwed kohkohlahte.

Mwomwen amwail apwali amwail pwoud de serihkan de pahpa/nohno kan kak wia mehn kahlemengi ki dih kei. Soangen sohso da me kumwail men pwilikidieng kedeudokamwail kan? Dupuk wiewia suwed, lipwusinger, pelian, lingeringer, masak de katohrohr? De limpoak, karakarahk, mahkpene, poakehla oh keirdahn palingehn?

Kitail koaros anahne tamataman me “kadeik sohte wia kupwurkalahngan ong aramas me sohte ahneki kalahngan.”⁶

Ong pein amwail ehupene kan, pwehn kamwahuwih amwail mour, menlau ahneki kalahngan, pwe “me kin ahneki kalahngan kin pitsang kadeik.”⁷

Pwilikihdi amwail aktuwahu.

Pekimahk ong noumwail serihkan, amwail pwoud, amwail peneinei, de kempoakepamwail kan sohte wia kilel en luwet ahpw kehlail. Mehnia me mwahu pwung de kakairada wasa me kakehlail, kamwahu, oh limpoak mie?

Kadoke pene piris wet, dehr kamwerepeseng.

Detehn kumwail sohte sapwung—ahpw mehlel ansou me kumwail sohte sapwung—doadoahngki limpoak en kalewehdi aktuwahu.

Ma kumwail wia met, sohte lipilipil en kahpwal me kumwail sohsohpai pahn mwahula, oh pwehki limpoak en Koht nan amwail mohngiong kan, uhpene pahn sohrala. Peneu en doarehla peneinei pwukat doke kitail koaros, mendahte ma kitail pwopwoud, mweipeseng, atail pwoud melahr de kiripw. Kitail koaros kak wia sounkomour en peneinei kehlail kan.

Riei ohloko, kitail anahne idawehn karasaras en Sounkomouro me doareikitailla. Ih me kitail kin kamwarehki Sounkomour ketin “doareikinkitailla sapwellime limpoak.”⁸ “Sises Krais iei atail Kaun. Sapwellime doadoahk iei atail doadoahk. Doadoahk en doarehla ehu met, oh e tepda nan imwatail kan.

Limpoak mehlel sohte pid dahme mehteikan kak wiahieng kitail. Limpoak keieu mehlel iei me kolpene pilahn en komour me sohte kin medewe pein ih ahpw kin medemedewehte kamwahu ong mehteikan. Iei limpoak wet me Samatail Nanleng ketin sapwellimaniki ong kitail.

Oh ni amwail alasang limpoak en Sounkomouro, E pahn uhdahn kapaikumwailda oh kalaudehla amwail wiewia pwung kan pwehn doarehla amwail ehupenehn pwopwoud kan oh kakehlaka amwail peneinei kan.

Kauno en kapaikumwailda ni amwail wiewia doadoahk pwung kan pwe kumwail en iang irail kan me kin doarehla. Met iei ahi kapakap ni mwaren Sises Krais, amen.