I Le Viia ai o i Latou o Ē Laveai

Ou te manatu o le isi mafuaaga o lenei vaaiga agamalu ua tumau ia te a’u mo se taimi umi tele o le eseesega i nisi o uiga i nei ona aso. I le tele o malo i le lalolagi, ua foliga mai ai mea uma e faaaoga ma toe lafoa’i. O le taimi lava e amata ai ona leaga pe tuai—po o lo tatou amata foi ona le toe fia manao ai—tatou te tia’ia i fafo ma sui i se mea sili atu—se mea e fou atu ma iila atu.

Tatou te faia lenei mea i telefoni feaveai, o lavalava, matata—ma le mea sili ona leaga, ua oo lava i a tatou mafutaga.

E ui e i ai le taua i le aveesea mai i o tatou olaga o mea faalelalolagi tatou te le o toe manaomiaina, pe a oo mai i mea e i ai le taua e faavavau—ā tatou faaipoipoga, ō tatou aiga, ma lo tatou taua—ae o se manatu ia sui le mea tuai i se mea fou ua fiafia i ai e mafai ona aumaia ai le faanoanoa loloto.

Ou te faafetai ua ou auai i se ekalesia e faatauaina le faaipoipoga ma le aiga. Ua lauiloa tagata o Le Ekalesia a Iesu Keriso o le Au Paia o Aso e Gata Ai i le lalolagi atoa mo le i ai o nisi o ulugalii ma aiga sili ona lelei e mafai ona e mauaina. I se vaega, ou te talitonu ai ua mafua lenei mea ona o upumoni taua ua toefuataiina mai e Iosefa Samita e faapea o faaipoipoga ma aiga e tatau ona faavavau. E le o faamoemoeina aiga ina ia faia na o ni mea ia sologa lelei atili iinei i le lalolagi ona lafoai ese lea pe a tatou oo atu i le lagi. Ae, o na mea o le faatulagaga a le lagi. O le faatusa lena o se mamanu faaselesitila ma se faataitaiga o le aiga e faavavau o le Atua.

Ae o faaipoipoga ma sootaga malolosi faaleaiga e le tupu fua ona o i tatou o tagata o le Ekalesia. E manaomia ai se galuega faifai pea ma faamoemoeina. O le aoaoga faavae o aiga e faavavau e tatau ona musuia ai i tatou ia tuuto atu a tatou taumafaiga aupito sili ona lelei e laveai ma faamauoaina a tatou faaipoipoga ma aiga. Ou te faamemelo lava ma faamalo ia i latou o loo laveaiina ma faafaileleina nei sootaga taua ma faavavau.

O le asō, ou te fia talanoa ai i le viia o i latou o e laveai.

I le aluga o tausaga, ua ou faatinoina ai le sauniga o le faamauga mo le tele o ulugalii faamoemoeina ma agaalofa. Ou te te lei feiloai lava i se tagata o le, a o la pulatoa atu i le tasi ma le isi i luga o le fata faitaulaga, e manatu o le a iu i laua i le tete’a po o le lotonutimomoia.

Ae paga lea, ua faapena nisi.

E i ai lava se ala, a o mou atu le tele o aso ma suia le lanu o le alofa faamama’i, o loo i ai nisi e taofiofi malie lava le mafaufau i le fiafia o le tasi ma le isi ae amata ona matau ni nai masei laiti. I se siosiomaga faapea, ua faaosoosoina ai nisi i ni faaiuga matuia e faapea ua le lava le atamai o lana ava, ua le toe aulelei, ua le toe fiafia i ai, pe ua le toe talavou foi. Ma latou manatu ai ua latou maua i lea mea se faamaoniga e toe amata ai ona toe autilotilo solo.

Uso e, afai ua amata ona e oo i le tulaga lenei, ou te lapatai atu ua e i ai i luga o se auala e tau atu i faaipoipoga malepelepe, aiga malepelepe, ma lotonutimomoia. Ou te augani atu ia te oe ia tuu nei loa, liliu ese mai ai, ma toe foi atu i le ala saogalemu o le amiosa’o ma le faamaoni a’ia’i i feagaiga. Ioe, o mataupu faavae lava nei e faatatau foi i o tatou tuafafine pele.

Ia, na o se upu lava se tasi ia i latou o o tatou uso nofotoatasi o loo mulimuli i le manatu taufaasese e muamua lava ona latou sailia le “tamaitai atoatoa” ae latou te lei ulu atu i ni feoaiga faamo’imo’i po o se faaipoipoga.

Ou uso pele, ou te faamanatu atu ia te outou, ana faapea e i ai se tamaitai atoatoa, e te manatu ea o le a fia alu ia te oe?

I le fuafuaga o le fiafia a le Atua, tatou te le o sailiili mo se tasi e atoatoa ae mo se tagata e mafai i le olaga atoa, ona tatou taumafai faatasi e fatua’i se sootaga alofa, tumau, ma sili ona atoatoa. O le sini lena.

Uso e, o i latou o e laveaiina a latou faaipoipoga e malamalama o lenei sailiga e alu ai le taimi, onosai, ma e sili i mea uma, o faamanuiaga o le Togiola a Iesu Keriso. E manaomia ai oe ia e agalelei atu, leai se matau’a, e te le sailia au lava mea, e le faaitagofie, e le mafaufau i se leaga, e olioli i le upumoni, e lavatia mea uma, e talitonu i mea uma, e faamoemoe i mea uma, e onosai i mea uma. I se isi faaupuga, e manaomia ai le alofa mama, le alofa le pona o Keriso.¹

O nei mea uma e le tupu faafuasei. O faaipoipoga maoae e fausia i nai mea iti ma nai mea iti, i lea aso ma lea aso, i le olaga atoa.

Ma o se tala fiafia lena.

Ona e tusa lava po o le a le ‘iva o lau mafutaga o i ai i lenei taimi, ae a e faaauau pea ona taumafai e faaleleia i le agalelei, agaalofa, faalogo, ositaulaga, malamalama, ma le le manatu faapito e mulimuli ane o le a amata ona tupu ae se faavae malosi.

Afai e foliga mai o le a umi lava o fai: manatua, o faaipoipoga fiafia ua faamoemoe e tumau e faavavau! O lea “aua le faavaivai i le faia o mea lelei, ona o loo oulua faataatiaina le faavae o se [faaipoipoga] tele. Ma o mea iti e tutupu mai ai mea tetele.”²

Atonu o se galuega e faasolosolo ona lelei, ae e le tatau ona avea ma se galuega faanoanoa. O le mea moni, i le tulaga lamatia o le ta’uaina o mea manino, e seasea tupu le tete’a pe a fiafia le tane ma le ava.

O lea la ia fiafia!

Ma uso e, ia faaofo lau ava i le faia o mea e fiafia ai o ia.

O i latou o e laveaiina a latou faaipoipoga ua filifilia le fiafia. E ui e moni o nisi o ituaiga o faanoanoaga faifai umi e manaomia ai se togafitiga faapitoa, ae ou te faamemelo lava i lenei fasi vaega o le atamai o Abraham Lincoln: “O le toatele o tagata e fiafia pe a latou faia o latou mafaufau ia fiafia.” E talafeagai lelei ma lana soa faatusitusiga paia: “Saili ona outou maua ai lea.”³

Afai tatou te tagai mo uiga le atoatoa i o tatou taitoalua po o ni mea e ita ai i a tatou faaipoipoga, o le a mautinoa lava tatou te mauaina na mea, ona e tofu tagata uma ma nisi o na mea. I le isi itu, afai tatou te tagai mo le lelei, o le a mautinoa lava tatou te mauaina, ona e i ai foi i tagata uma le tele o uiga lelei.

O i latou o e laveaiina faaipoipoga e le amanaiaina mea faaletonu ae taulai atu i mea lelei. Latou te patipatia ni nai faatinoga laiti o le alofa tunoa lea e faaosofia ai lagona agamalu o le alofa mama. O i latou o e laveaiina faaipoipoga e laveaiina ia tupulaga i le lumanai.

Uso e, manatua pe aisea na e gaualofa ai.

Galue i aso taitasi ia faia lau faaipoipoga ia malosi atu ma fiafia atu.

A’u uo pele, ia tatou faia mea uma i lo tatou malosi ia faitaulia faatasi ai ma agaga o e paia ma fiafia o e laveaiina a latou faaipoipoga.

Ou te moomoo foi i le asō e talanoa atu e viia i latou o e laveaiina o latou aiga. E manaomia e aiga uma le laveaiga.

E pei lava ona matagofie le lauiloa o lenei Ekalesia mo ona aiga malolosi, atonu foi e tele ina tatou lagonaina e tatau ona faatatau i aiga uma o le Au Paia o Aso e Gata Ai vagana ai i tatou. Ae o le mea moni e leai ma se aiga atoatoa o i ai.

E tofu aiga uma ma ni taimi faigata.

E pei o le fai atu o ou matua ia te oe e pue se latou “selfie” po o le manatu pea o le olomatua o lou aiga o loo e nofotoatasi pea ona o oe e te ai filifili, po o le manatu o lou uso faaletulafono faimanatu o ona manatu faaupufai o manatu faaletalalelei ia, pe faatulaga foi e lou tama se ata faaleaiga ma tagata uma ia laei i ofu o tagata faitifaga i lana ata e sili ona fiafia i ai.

Ma faamalosia ai oe e ofu se ofu e matua leiloa ai po o ai oe.

E faapena foi aiga.

Atonu e tutusa o tatou kenera, ae e le tutusa i tatou.

Nai lo le taumafai e faamalosi tagata uma i se mamanu o mea e faia e i tatou lava ia, e mafai ona tatou filifili e patipatia nei eseesega ma talisapaia i latou mo le oa faaopoopo ma mea faifai pea e ofo ai i o tatou olaga.

Peitai, o nisi taimi e faia ai e tagata o o tatou aiga ni filifiliga pe faia ni mea e le mafaufauina, faatiga, pe le mama. O le a se mea e tatau ona tatou faia i nei tulaga?

E le o i ai ma se vaifofo se tasi e ufitai ai tulaga uma. O i latou o e laveaiina o latou aiga e faamanuiaina ona latou te fefautuaai faatasi ma o latou taitoalua ma aiga, saili i le finagalo o le Alii, ma faalogo mo uunaiga a le Agaga Paia. Latou te iloaina o le mea e sa’o mo le tasi aiga atonu e le sa’o mo le isi aiga.

Peitai, o loo i ai se mea se tasi e sa’o i tulaga uma.

I le Tusi a Mamona ua tatou aoao ai i se nuu na mauaina le mealilo i le fiafia. Mo augatupulaga, sa “leai se finauga. … Ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.” Na faapefea ona latou faia? “Ona o le alofa o le Atua sa mau i loto o tagata.”⁴

Po o a lava ni faafitauli o loo feagai ma lou aiga, po o le a lava le mea e tatau ona e faia e foia ai, o le amataga ma le faaiuga o le vaifofo o le alofa mama, le alofa le pona o Keriso. A aunoa ma lenei alofa, e oo lava i aiga e foliga mai e atoatoa, e tauivi. Ae a i ai le alofa mama, e oo lava i aiga e i ai luitau sili, e manuia.

“E le uma le alofa mama.”⁵

E moni mo le laveaiina o faaipoipoga! E moni mo le laveaiina o aiga!

O le fili tele lava o le alofa mama o le faamaualuga, ma o se tasi lea o mafuaaga aupito tele ua tauivi ai faaipoipoga ma aiga. O le faamaualuga o le maitaitagofie, le alofa, ma le lotoleaga. E faateleina e le faamaualuga lona lava ia malosi ma le amanaia ai le amio mama o isi. O le faamaualuga o le manatu faapito ma le faaitagofie. E mafaufau le faamaualuga i manatu leaga ae leai lava se mea o iai ma faalafi ona lava ia vaivaiga i tua atu o ‘alofaga atamamai. O le faamaualuga e faalumaluma, femouomouai, ita, ma le le onosai. O le mea moni, afai o le alofa mama o le alofa le pona o Keriso, o le faamaualuga la o le uiga lea e faamatala ai Satani.

O le faamaualuga atonu e taatele i vaivaiga faaletagata. Ae e le o se vaega o lo tatou tofi faaleagaga, ma e leai sona nofoaga i e umiaina le perisitua a le Atua.

E puupuu lava le olaga, uso e. O le salamo e mafai ona tumau mo se taimi umi lava—o nisi o le a i ai ni taunuuga e tau lava i le faavavau.

O le auala e te taulimaina ai lou toalua po o lau fanau po o matua atonu e toe faia foi i augatupulaga e sosoo ai. O le a se talatuu e te fia manao e tuua i lau fanau? O se tasi ea o le uiga pa’a’a, tauimasui, ita, fefe, po o le tuuatoatasi? Po o le tasi o le alofa, lotomaualalo, lotofaamagalo, agaalofa, ma le tuputupu ae faaleagaga, ma le lotogatasi?

E manaomia ona tatou manatua uma “o le le alofa, e le alofagia o ia i le faamasinoga.”⁶

Mo le lelei o a outou sootaga faaleaiga, mo le lelei o lou agaga, faamolemole ia alofa mutimutivale, aua “o le alofa, e olioli ia pe a faamasinoina.”⁷

Tuu ese le faamaualuga.

O le faatoese atu ma le faamaoni i lau fanau, lou toalua, lou aiga, po o au uo e le o se faailoga o le vaivai ae o le malosi. Pe o le sa’o ea e sili atu ona taua nai lo le atiaeina o se siosiomaga o le faafaileleina, faamaloloina, ma le alofa?

Fausia sootaga; ae aua le talepeina.

E tusa lava pe e te le o sese—aemaise i taimi e masalo e te le o sese ai—ia faatoilaloina e le alofa le faamaualuga.

A e faia lenei mea, po o le a lava le faigata o loo e feagai ai o le a pasi ese, ma ona o le alofa o le Atua i tou loto, o le a mou atu finauga. O nei mataupu faavae o le laveaiga o mafutaga e faatatau foi ia i tatou uma, e le afaina pe ua e faaipoipo, tete’a, oti lau ava, pe nofotoatasi foi. E mafai ona avea uma i tatou ma faaola o aiga malolosi.

Uso e, sei o tatou mulimuli i le faataitaiga a Le ua faaolaina i tatou. Na manumalo le Faaola i o “tatou agaga i le alofa.”⁸ O Iesu Keriso o lo tatou Matai. O Lana galuega o le tatou galuega foi. O se galuega faaola, ma e amata i o tatou aiga.

O le alofa i totonu o le ta’ui o le ata o le faaolataga o le le manatu faapito ma e saili mo le manuia o isi. O le alofa lena o loo i ai i lo tatou Tama Faalelagi mo i tatou.

A tatou faataitai i le alofa o le Faaola, o le a mautinoa lava Na te faamanuia ma faauluola a tatou taumafaiga amiotonu e laveai a tatou faaipoipoga ma faamalosia o tatou aiga.

Ia faamanuia outou e le Alii i a outou taumafaiga le faavaivai ma le amiotonu ia faitaulia faatasi ma i latou o e laveai. O la’u tatalo lea i le suafa o Iesu Keriso, amene.