Jum̧ae ilo Men Otemjej

Un eo an mour in n̄an ajri ro nejin Anij ej n̄an letok en̄jake ko remenin aikuj “n̄an aer wāppen im kile jemļo̧k eo aer ekwojarjar āinwōt rijolete mour indeeo.”¹ Ilo an Būreejtōn Thomas S. Monson kar katakin kōj jibbon̄ in, Jej eddōk jān kālet ko jej kōm̧m̧ani, jān idajon̄jon̄ n̄an kwaļo̧k bwe jenaaj kālet n̄an kōjparok kein ko an Anij (LaleEbream 3:25). N̄an idajon̄jon̄, jej aikuj wōr ippād anemkwōj eo n̄an kālet ikōtaan oktak ko. N̄an letok juon men eo n̄an kōjerbal anemkwōj in kālet eo ad, ej aikuj wōr jum̧ae jej ioone.

Aolepān karōk eo ej barāinwōt menin aikuj. N̄e jej kōm̧m̧ani kālet ko rebōd—āinwōt ad naaj kōm̧m̧ani—jej libobo kōn jerawiwi im aikuj in karreo n̄an eddōk m̧aan ļo̧k n̄an mejān kajjik eo ad indeeo. Karōk eo an Jemād ej letok wāween eo n̄an kōm̧m̧ani menin, wāween eo n̄an kapolel kajjitōk ko ikijjien ekajet eo: Rilo̧mo̧o̧r eo eaar kōļļāik wōņāān eo n̄an lo̧mo̧o̧ren kōj jān jerawiwi ko. Rilo̧mo̧or eo ej Irooj Jisōs Kraist, Nejin Eo Emake Wōt Nejin Anij Jemād Indeeo, eo en̄taan eo An—eo eaar en̄taan—kōļļāik wōņāān jerawiwi ko ad eļan̄n̄e jenaaj ukweļo̧k jāni.

Juon iaan kōmeļeļe ko rem̧m̧an tata kōn jerbal eo an karōk eo an jum̧ae ej ilo Bok in Mormon, ilo katak ko an Liai n̄an ļeo nejin Jekab.

“Bwe emennin aikuj, n̄an an wōr jum̧āe ilo men otemjej. Eļan̄n̄e ejjab āindein, … wānōk ejjāmin kar maron̄ kūrm̧ool, ak jero̧wiwi, ak kwōjarjar ak en̄taan, ak em̧m̧an im nana” (2 Nipai 2:11; bar lale eoon 15).

Āinwōt juon toprak, Liai eaar wōnm̧aan ļo̧k wōt, “Irooj Anij eaar leļo̧k n̄an armej bwe en aikuj kōm̧m̧an n̄an e make. Kōn menin armej eaar jab maron̄ kōm̧m̧an n̄an e make n̄e ejjab po ippān juon ak eo juonr” (eoon 16). Āin ļo̧k wōt, ilo revelesōn eo raan kein Irooj eaar kean̄, “Im emennin aikuj bwe debil en kapo ro nejin armej, n̄e jaab reban maron̄ ro ripinej jenkwaer make” (K&B 29:39).

Jum̧ae eaar menin aikuj ilo Jikin Kallib Eden. Eļan̄n̄e Adam im Eve n̄e raar jab kōm̧m̧ane kālet eo me kar kwaļo̧k kadkad in mour in, Liai eaar katakin, “ren kar pād ilo nememe in erreo, … jab kōm̧m̧an em̧m̧an, bwe raar jeļā ejjeļo̧k jero̧wiwi” (2 Nipai 2:23).

Jān jinoin, anemkwōj im jum̧ae raar dilāpen karōk eo an Jemād im n̄an jum̧ae eo an Satan ņae. Āinwōt an Irooj kar kwaļo̧k n̄an Moses, ilo ko̧o̧njeļ eo ilo lan̄ Satan kar “kappukōt n̄an ko̧kkure anemkwoj in kāālet eo an armej” (Moses 4:3). Kakkure jab in eaar pād wōt ilo karōk eo an Satan. Eaar itok im̧aan Jemān im ba, “N̄a e, kwōn jilkinļo̧k eō, inaaj eo nejūm̧ m̧aan, im inaaj lo̧mo̧o̧ren aolep armej, bwe en ejjeļo̧k juon enaaj jako, im em̧ool inaaj kōm̧m̧ane, kōn menin letok n̄an eō utiej eo Am̧” (Moses 4:1)

Kōn menin, Satan eaar kajjitōk n̄an kōm̧m̧ane karōk eo an Jemen ilo juon wāween me enaaj kar bōbrae an dede ļo̧k jibadbad eo an Jemed im leļo̧k n̄an Satan aiboojoj eo An.

Elmakot eo an Satan bwe en wōr weppān wōt: enaaj kar “lo̧mo̧o̧ren aolep armej,” jon̄an ejjeļo̧k juon jetōb enaaj kar jako. Enaaj kar ejjeļo̧k anemkwōj in kālet ak kālet jān jabdewōt im, kōn menin, ejjab aikuj bwe en wōt jum̧ae. Enaaj kar ejjeļo̧k idajon̄jon̄, likjab, im ejjeļo̧k wejepedik. Enaaj kar ejjeļo̧k eddōk ļo̧k n̄an bōk jibadbad eo an Jemed eaar kōņaan n̄an ro Nejin. Jeje ko rekwojarjar ej ļo̧oke bwe jum̧ae eo an Satan eaar tōprak in juon “tariņae ilo lan̄” (Revelesōn 12:7) ilo eo aolep bōtaab juon m̧ōttan jilu in ro nejin Anij raar bōk jim̧we eo n̄an en̄jake mour in kōn kālet karōk eo an Anij im joļo̧k jum̧ae eo an Satan.

Jibadbad eo an Satan eaar n̄an leļo̧k n̄an e make utiej im kajoor eo an Jemān (lale Aiseia 14:12–15; Moses 4:1, 3). “Kōn menin,” Jemān eaar ba, “kōnke men in Setan eaar jum̧ae Eō, … Iaar kōm̧m̧ane bwe ren jolaļļo̧k e” (Moses 4:3) ippān aolep jetōb ko me raar kōjerbal anemkwōj in kālet eo aer n̄an ļoor e (lale Jude 1:6; Revelesōn 12:8–9; K&B 29:36–37). Jolaļ tak āinwōt jetōb ko ejjeļo̧k ānbwin ilo mour in, Satan imro rikaļooran rej kapo im pukōt n̄an m̧oņ im auujid ro nejin Anij (lale Moses 4:4). Kōn menin en̄in ej bwe eo enana, eo eaar im pukōt n̄an kakkure karōk eo an Jemen, lukkuun kar jipan̄, kōnke ej jum̧we eo me ej kōmaron̄ kālet im ej iien eo em̧m̧an an kōm̧m̧ani kālet ko rejim̧we me rej tōl n̄an eddōk ļo̧k eo me ej jibadbad eo an karōk eo an Jemān.

Eaorōk, kapo eo n̄an jerawiwi ejjab wōt kain jum̧ae eo ilo mour in. Jemād Liai eaar katakin bwe eļan̄n̄e Wōtlo̧k eo eaar jab bōk jikin, Adam im Eve “ren kar pād ilo nememe in erreo, ejjeļo̧k lan̄lōn̄, bwe reban kar jeļā kōn en̄taan” (2 Nipai 2:23). Eļan̄n̄e ejjeļo̧k jum̧ae ilo mour in, “aolep men reaikuj koba ilo juon,” eļan̄n̄e ejjab eban wōr m̧ōņōņō ak en̄taan (eoon 11). Kōn menin, eo Jemān Liai ekar wōnm̧aanļo̧k wōt, ālkin Anij ekar kōm̧anm̧an men otemjej, “n̄an bōktok tokjān ko an indeeo ilo jem̧ļo̧kin armej, … emennin aikuj bwe en kar wōr jum̧ae; em̧ool leen eo kōmo̧iki n̄an wōjke in mour; eo etōn̄al im eo juon emeo̧” (eoon 15).² Katak ko An kōn m̧ōttan in an karōk in lo̧mo̧o̧r eo rej kōjem̧ļo̧ke ilo naan kein:

“Ak lo, aolep men kar kōm̧anm̧an ilo loļātāt an Eo ejeļā men otemjeļo̧k.

“Adam eaar wōtlo̧k bwe armej ren kar āinwōt, bwe ren maron̄ āinwōt, bwe ren maron̄ m̧ōņōņō” (eoon 24–25).

Jum̧ae ilo jekjek ko reppen jej jelm̧ai ilo mour in ej barāinwōt m̧ōttan karōk eo me ej kōļap ļo̧k eddōk ļo̧k eo ad ilo mour in.

Aolepād wōj jej ioon jum̧ae ko me rej idajon̄jon̄e kōj. Jet iaan idajon̄jon̄ kein rej kapo ko n̄an jerawiwi. Jet rej apan̄ ko an mour rejeno̧lo̧k jān jerawiwi eo an juon make. Jet rekanooj eļļap. Jet reddik. Jet rej wōnm̧aan ļo̧k wōt, im jet rej an jidik iien. Ejjeļo̧k iaad ej anemkwōj jān jum̧ae. Jum̧ae ej letok n̄an kōj n̄an eddōk m̧aan ļo̧k n̄an ta eo Jemādwōj Ilan̄ ekōņaan bwe jān erom.

Ālkin an Joseph Smith kar kadede ļo̧k ukōt Bok in Mormon, eaar kappok wōt wōn enaaj kar būriini. Menin eaar jab pidodo. Kapokpok eo an peba kein raittok im wōņāān būriini im kobaik taujin kape ko raar kamijaak. M̧oktata Josep eaar jibadōk ļo̧k m̧oktata E. B. Grandin, juon ribūriin in Palmyra, eo eaar m̧akoko. Innām eaar pukōt bar juon ribūriin ilo Palmyra, eo eaar barāinwōt jenlik jān e. Ekar etal n̄an Rochester, 25 m̧aiļ (40 km) ettoļo̧k, im kepaake rijeje eo ebun̄bun̄ ilo New York, eo ekar jab eo̧ron̄ kajjitōk eo an. Bar juon ribūriin in Rochester eaar m̧ōņōņō, bōtaab jekjek in eaar kōm̧m̧an bwe en jab em̧m̧an.

Wiik ko raar eļļā ļo̧k, im Josep eaar bōlen pok kōn jum̧ae eo n̄an kadede ļo̧k jerbal in jitōn̄ e n̄an e. Irooj eaar jab kapidodoik, bōtaab Eaar kōm̧m̧an bwe en pidodo. Kajieon̄ eo kein kōļalem an Josep,kepaake eo kein karuo n̄an ribūriin eo ilo Palmyra Grandin eaar jab tōprak.³

Iiō ko tok ālik, Josep kar kalbuuji kōn jekjek ko rekōmettak ilo Liberty Jail ium̧win elōn̄ allōn̄ ko. Ke eaar jar kōn kaenōm̧m̧an, Irooj eaar jiron̄ e bwe “aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am” (K&B 122:7).

Jej aolep meļeļe kōn kain bar jum̧ae ko jet an mour in rej kōm̧m̧an jān jerawiwi ko ad make, ekoba nan̄inmej, jipikpik, im mej. Būreejtōn Thomas S. Monson eaar kōmeleļeik:

“Jet iaami remaron̄ ilo iien ko kūr n̄an e ilo ami en̄taan, kōļmenļo̧kjeņ etke Jemedwōj Ilan̄ ekōt ļo̧k bwe jān dibuk jabdewōt mālijjon̄ ko jej jelm̧ai. …

“Mour in ad, mekarta, eaar jab tōn bwe en pidodo ak meoeo wōt. Jemādwōj Ilan̄ … jeļā bwe jej katak im eddōk ļo̧k im erom bar kāāl kōn apan̄ ko reppen, būrom̧ōj an bōro erup, im kālet ko reppen. Kajjojo iaad ej ioon raan ko reppen n̄e ro rejitōnbōro rej mej, iien ko reppen n̄e ājmour eo ad ej jako, en̄jake ko n̄e kowaan n̄r ro jej iakwe er rej āinwōt kōjerwawaik kōj. Men kein im mālijjon̄ ko jet rej itok n̄an kōj kōn m̧ool in idajon̄jon̄ an maron̄ eo ad n̄an niknik n̄an jem̧ļo̧kin.”⁴

Kijejeto ko ad n̄an kōkm̧anm̧an ļo̧k ad kōjparok raan in Jabōt rej letok waanjon̄ak an dik ļo̧k inepata an jum̧ae. Ewōr ippād kien eo an Irooj n̄an kautiej Jabōt. Jet iaan kālet ko ad remaron̄ kakkure kien jab in, bōtaab kālet ko jet kōn ekōjkan ad kōjerbal iien ilo Jabōt rej kajjitōk eo elem waan an eļan̄n̄e jenaaj kōm̧m̧ane ta eo ebwe an em̧m̧an ak ta eo em̧m̧an ļo̧k ak em̧m̧an tata.⁵

N̄an kwaļo̧k jum̧ae an kapo, Bok in Mormon ej kōmeļeļeik jilu m̧ōņakjān ko devil eo enaaj kōjerbalei ilo raan ko āliktata. M̧oktata, enaaj “kajoor ibūruōn ro nejin armej, im kōketak er n̄an illu ņae men eo em̧m̧an” (2 Nipai 28:20). Ruo, enaaj “kajokane, im kaaļļo̧k [ro uwaan] n̄an kōjatdikdik ioon men ko an kanniōk,” ba “Zaion ej jeraam̧m̧anļo̧k” (eoon 21). Jilu, enaaj jiron̄ kōj “ejjeļo̧k hell; im … Ej jab n̄a devil, bwe ejjeļo̧k juon” (eoon 22), im kōn menin ejjeļo̧k jim̧we ak bōd. Kōnke kōn jum̧ae in, kar kakkōl kōj n̄an jab “kakkije ilo Zaion!” (eoon 24).

Kabun̄ in ilo mijen eo an ekwojarjar im kōj ilo mour ko ad m̧ae rej āinwōt jelm̧ae eļap ļo̧k jum̧ae rainin. Bōlen ilo an Kabun̄ in eddōk ļo̧k ilo kajoor im kōj membōr ro eddōk ļo̧k ilo tōmak im pokake, Satan ej kōļap ļo̧k kajoor eo an jum̧ae eo an bwe jenaaj wōnm̧aan ļo̧k wōt n̄an bōk “jum̧ae ilo aolep men.”

Jet iaan jum̧ae in em̧ool ej itok jān ro uwaan Kabun̄ in. Jet rej kōjerbal un eo an juon make ak mālelet eo n̄an jum̧ae tōl in kanaan eo leļo̧k n̄an er jon̄an eo kōjerbale ilo kālet rikien ro—“rijum̧ae ro.” Mekarta jejjet eo n̄an kien anemkwoj, ejjeļo̧k po lel eo n̄an ļōmņak eo ilo kein eo an aelōn̄ in kiin̄ eo an Anij, ijo kajjitōk ko rej kautiej bōtaab jum̧ae ejjab (lale Matu 26:24).

Bar juon waanjon̄o̗k, elōn̄ men ko ilo bwebwenato eo an Kabun̄ in ad kar jino in, āinwōt ta eo Joseph Smith eaar kōm̧m̧ane ak jab kōm̧m̧ane ilo aolep jekjek, jon̄an jet rej kōjerbale āinwōt pedped in n̄an jum̧ae. N̄an aolep ij ba, kōjerbal tōmak im pedped ioon katak eo an Rilo̧mo̧o̧r bwe jej aikuj “jeļā kajjieir kōn leir” (Matu 7:16). Kabun̄ in ej kōm̧m̧ane kijejeto ko reļļap n̄an kōpeļļo̧k ļo̧o̧k ko ewōr ippād, bōtaab ālkin aolep men ko jemaron̄ kwaļo̧ki, membōr ro ad rej jet iien ilo̧k kōn kajjitōk ko reļem waan me rejjab maron̄ ņa mejļan kōn ekkatak. En̄iin ej bwebwenato eo an Kabun̄ in kōn “jum̧ae ilo men otemjej.” Jet men remaron̄ wōt katak jān tōmak (see K&B 88:118). Kōjatdikdik eo eļap tata ad ej aikuj tōmak ilo kam̧ool eo jaar bōk jān Jetōb Kwojarjar.

Ejjab aolep iien Anij ej kapen anemkwoj in kālet eo an jabdewōt ro Nejin kōn bōbrae jet kōn deeor an ro jet. Bōtaab Ej kōmeraik eddo ko an kaen̄taanan ko ad im kōkajoor ļo̧k kōj n̄an ineeki, āinwōt an kar kōm̧m̧ane n̄an armej ro doon Alma ilo āne in Hilamōn (lale Mosaia 24:13–15). Ejjab bōbrae aolep jorrāān ko, ak Ej uwaake jar ko ad, āinwōt An kar kōm̧m̧ane lan̄ eo ekajoor ekar kajjieon̄ bōbrae aje eo an tampeļ eo ilo Fiji;⁶ ak Ej tōl kōmōjņo̧ikļo̧k jekjek ko aer āinwōt Ekar kōm̧m̧ane n̄an baam̧ an rinana ro ekar bōk mour an elōn̄ armej ro rej jokwe ilo Brussels airport, ak jorrāān wōt mijenede ro ad.

Ilo aolepān jum̧ae ko an mour, epād ippād uwaak eo an Anij bwe Enaaj “ukōti en̄taan ko [ad] n̄an [ad] ļapļo̧k” (2 Nipai 2:2). Jekar barāinwōt katak n̄an meļeļe en̄jake ko ad ilo mour in im kien ko An ilo m̧akūtkūt ko rejelet karōk in lo̧mo̧o̧r eo An eļap, eo ej jiron̄ kōj unleplep in mour in im letok kallim̧ur eo an juon Rilo̧mo̧o̧r, ilo Etan ij kam̧ool kōn m̧ool ko an men kein. Ilo etan Jisōs Kraist, amen.