2010–2019
Faafeagai o Mea Uma
Aperila 2016


Faafeagai o Mea Uma

O le faafeagai e faatagaina i tatou ia tuputupu ae e agai atu i le tagata e finagalo lo tatou Tama Faalelagi e avea ia i tatou.

E tutotonu i le talalelei a Iesu Keriso le fuafuaga o le faaolataga a le Tama mo le alualu i luma e faavavau o Ana fanau. O lena fuafuaga, ua faamalamalama mai i faaaliga o ona po nei, ua fesoasoani ia i tatou ia malamalama i le tele o mea o loo tatou feagai ai i le olaga faaletino. O la’u savali e taulai atu i le matafaioi taua o le faafeagai i lena fuafuaga.

I.

O le faamoemoega o le olaga faaletino mo fanau a le Atua o le mauaina lea o aafiaga manaomia “e alualu ai i luma e agai atu i le atoatoaga ma iloa mulimuli ane ai lo latou taunuuga paia o ni suli o le ola e faavavau.”1 E pei ona matua aoaoina ai i tatou e Peresitene Thomas S. Monson ma le mamana tele i lenei taeao, tatou te alualu i luma e ala i le faia o filifiliga, ia e tofotofoina ai i tatou e faaali atu ai o le a tatou tausia poloaiga a le Atua (tagai Aperaamo 3:25). Ina ia tofotofoina e tatau ona i ai ia i tatou le faitalia e filifili ai i le va o filifiliga eseese. Ina ia maua ni filifiliga eseese īa e faatino ai lo tatou faitalia, e tatau ona tatou mauaina le faafeagai o mea.

O le vaega atoa o le fuafuaga e taua foi. A tatou faia ni filifiliga sese—ia o le a i’u lava ina tatou faia—e faapalapalaina i tatou e le agasala ma e tatau ai ona faamamaina ina ia agai ai i luma i lo tatou taunuuga e faavavau. O le fuafuaga a le Tama ua maua ai se ala e faia ai lenei mea, o le ala e faamalieina ai manaoga e faavavau o le faamasinotonu: e totogi e se Faaola le tau e togiola ai i tatou mai a tatou agasala. O lena Faaola o le Alii o Iesu Keriso, le Alo e Toatasi na Fanaua o le Atua le Tama e Faavavau, le ana le taulaga togiola—o ona puapuaga—e totogi ai le tau mo a tatou agasala pe afai o le a tatou salamo.

O se tasi o faamalamalamaga sili o le matafaioi fuafuaina o le faafeagai o loo i le Tusi a Mamona, i aoaoga a Liae i lona atalii o Iakopo.

“E ao lava ina i ai se faafeagai o mea uma. A na le faapea, … e le mafai ona i ai o le amiotonu, po o le amioleaga, po o le paia po o le pagatia, po o le lelei po o le leaga” (2 Nifae 2:11; tagai foi fuaiupu 15).

I se taunuuga, sa faaauau ai Liae, “na tuuina mai ai e le Alii le Atua i le tagata ia tatau ona ia fai mo ia lava. O le mea lea, e le mafai e le tagata ona ia fai mo ia lava vagana ai ua faatosina o ia e le tasi po o le isi” (fuaiupu 16). E faapea foi, i faaaliga o ona po nei na tautino mai ai e le Alii, “E ao ina faaosoosoina e le tiapolo le fanauga a tagata, [a leai] e le mafai ona avea i latou ma pule ia te i latou lava” (MF&F 29:39).

Sa tatau ai le faafeagai i le Faatoaga o Etena. A na faapea e le faia e Atamu ma Eva le filifiliga lea na oo mai ai le olaga faaletino, sa aoao mai ai Liae, “Semanu e tumau pea i laua i le tulaga o le le sala, … la te le faia se mea lelei, ona sa laua le iloa le agasala” (2 Nifae 2:23).

Mai lava i le amataga, o le faitalia ma le faafeagai sa tutotonu lava i le fuafuaga a le Tama ma le fouvale o Satani e tetee i ai. E pei ona sa faaali atu e le Alii ia Mose, i le fonotaga i le lagi, sa “saili [Satani] e faaumatia le faitalia a le tagata” (Mose 4:3). O lena faaumatiaga sa i ai i tuutuuga o le ofo a Satani. Sa ia sau i luma o le Tama ma faapea atu, “Faauta, o au lenei, auina atu a’u, o le a avea a’u mo ou atalii, ma o le a ou laveaiina tagata uma, ina ia leai se agaga e toatasi e se ese, ma e moni lava o le a ou faia lena mea; o le mea lea, ia tuu mai ia te a’u lou mamalu” (Mose 4:1).

O lea, sa talosaga atu ai Satani na te faataunuuina le fuafuaga a le Tama i se ala o le a taofia ai le ausiaina o le faamoemoega o le Tama ma avatu ai Lona mamalu ia Satani.

O le talosaga a Satani semanu e faamautinoa ai le tutusa o avanoa i le atoatoaga: o le a “togiola uma tagata,” ma e leai se agaga e tasi e leiloa. O le a leai ai se faitalia po o se filifiliga e faia e soo se tasi ma, o lea la, e le manaomia ai se faafeagai. O le a leai se tofotofoga, se toilalo, ma leai se manuia. O le a leai se tuputupu ae ia maua le faamoemoega na finagalo i ai le Tama mo Ana fanau. Ua tusia i tusitusiga paia o le tetee o Satani na tupu ai se “taua i le lagi” (Faaaliga 12:7), lea na maua ai e le lua vaetolu o fanau a le Atua le aia e maua ai le olaga faaletino e ala i le filifilia o le fuafuaga a le Tama ae teena le fouvale o Satani.

O le faamoemoega o Satani o le avatu lea ia te ia lava o le mamalu ma le mana o le Tama (tagai Isaia 14:12–15; Mose 4:1, 3). “O le mea lea,” sa fetalai ai le Tama, “ona sa fouvale Satani ia te a’u, … na Ou faia ai ia lafoina o ia i lalo” (Mose 4:3) faatasi ma agaga uma na faaaogaina lo latou faitalia e mulimuli ai ia te ia (tagai Iuta 1:6; Faaaliga 12:8–9; MF&F 29:36–37). I le lafoina i lalo i le olaga faaletino o ni agaga e leai ni tino, ua faaosooso ai e Satani ma ana ‘au ma saili ai e faasese ma avefaatagataotaua fanau a le Atua (tagai Mose 4:4). O le leaga la lena e toatasi, lea na tetee ma sailia e faaumatia le fuafuaga a le Tama, o le mea moni na faafaigofieina ai, ona o le faafeagai e mafai ai ona faia filifiliga ma o le avanoa o le faia o filifiliga sa’o lea e taitai atu ai i le tuputupu ae ma o le faamoemoega lena o le fuafuaga a le Tama.

II.

E pei ona iloaina, o le faaosoosoga ia agasala e le na o le pau lea o le ituaiga o faafeagai i le olaga faaletino. Sa aoao mai le Tama o Liae a na faapea e le tupu le Pa’u, “semanu e tumau pea [Atamu ma Eva] i le tulaga o le le sala, e aunoa ma se olioli, ona sa laua le iloa se pagatia” (2 Nifae 2:23). A aunoa ma le aafiaga o le faafeagai i le olaga faaletino, “e tatau ai ona tuufaatasi o mea uma o se mea e tasi,” lea o le a leai ai se fiafia po o se faanoanoa (fuaiupu 11). O le mea lea, sa faaauau ai le tala a le Tama o Liae, ina ua uma ona foafoa e le Atua o mea uma “ina ia faataunuuina ona faamoemoega e faavavau i le iuga o le tagata, … e tatau ona i ai o se faafeagai o mea uma; e i ai le fua faasaina e faafeagai ma le laau o le ola; o le tasi e suamalie ma o le tasi e oona” (fuaiupu 15).2 O Lana aoaoga i lenei vaega o le fuafuaga o le faaolataga e faamaeaina i upu nei:

“Faauta, ua faia mea uma e tusa ma le poto o ia o le ua silafia mea uma.

“Na pa’u Atamu ina ia i ai tagata; ma ua i ai tagata, ina ia latou maua le olioli” (fuaiupu 24–25).

O le faafeagai i tulaga faigata tatou te feagai ai i le olaga faaletino o se vaega foi o le fuafuaga lea e faalauteleina ai lo tatou tuputupu ae i le olaga faaletino.

III.

Ua tatou oo uma i aafiaga o ituaiga eseese o mea faafeagai ia e tofotofoina ai i tatou. O nisi o nei tofotofoga o faaosoosoga ia agasala. O nisi o luitau faaletino e ese mai agasala faaletagata lava ia. O nisi e matua tetelē lava. O nisi e laiti. O nisi e faifai pea, ma o nisi ua na o ni mea lē tumau. E leai ma se tasi o i tatou e tuusaunoaina. O le faafeagai e faatagaina i tatou ia tuputupu ae e agai atu i le tagata e finagalo lo tatou Tama Faalelagi e avea ia i tatou.

Ina ua maea ona faaliliuina e Iosefa Samita le Tusi a Mamona, sa ao pea ona ia sailia se tagata e lolomiina. Sa lei faigofie lenei mea. O le lavelave o nei pepa uumi o tusiga ma le tau o le lolomiina ma le tuufaatasiga o le faitau afe o kopi sa taufaamatau. Sa muamua talanoa atu Iosefa ia E. B. Grandin, o se tagata lomitusi i Palamaira, o le na musu. Ona ia saili atu lea i se isi tagata lomitusi i Palamaira, lea foi na ia teena o ia. Sa ia malaga atu i Rochester, 25 maila (40 km) le mamao, ma talanoa atu i le tagata lomitusi sili ona lauiloa i Niu Ioka i sisifo, lea foi na ia teena o ia. Sa naunau le isi tagata lomitusi i Rochester, ae sa i ai ni tulaga sa mafua ai ona le taliaina lenei avanoa.

Sa alu pea vaiaso, ma masalo sa matua le mautonu Iosefa i mea faafeagai i le faataunuuina o lana poloaiga faalelagi. Sa lei faafaigofieina e le Alii, ae sa ia faia ia mafai. O le taumafaiga lona lima a Iosefa, o lana talosaga lona lua lea i le lomitusi Palamaira o Grandin sa faamanuiaina.3

I tausaga mulimuli ane, sa faafalepuipuiina ma le tiga Iosefa i le Falepuipui i Lipereti mo le tele o masina. Ina ua ia tatalo mo se mapusaga, sa ta’u atu e le Alii ia te ia e faapea “o nei mea uma e te maua ai le poto masani, ma o le a avea mo ou lelei” (MF&F 122:7).

Ua tatou taufai masani uma i isi ituaiga o faafeagai faaletino e le mafua mai i a tatou lava agasala patino, e aofia ai faama’i, lē atoatoa o le malosi o le tino ma le mafaufau, ma le oti. Sa faamalamalama mai e Peresitene Thomas S. Monson:

“O nisi o outou atonu e i ai taimi tou te alaga atu ai [i le Atua] i tou mafatiaga, ma tuufesili pe aisea ua faataga ai e lo tatou Tama Faalelagi oe e oo i soo se tofotofoga o loo e feagai ai. …

“Peitai, o lo tatou olaga faaletino, sa lei faamoemoeina lava ia faigofie pe fiafia i taimi uma. Ua silafia e lo tatou Tama Faalelagi … tatou te aoao ma tuputupu ae ma faaleleia e ala i luitau faigata, faanoanoaga lotonutimomoia, ma filifiliga faigata. Ua oo uma i tatou taitoatasi i ni aso faanoanoa pe a maliliu ē pele ia i tatou, o taimi o tiga pe a oo ia i tatou le ma’i, o lagona o le tuulafoaiina pe a foliga mai ua tuulafoaiina i tatou e i latou tatou te alolofa i ai. O nei mea ma isi tofotofoga e oo mai ia i tatou faatasi ma le tofotofoga moni o lo tatou gafatia e onosaia ai.”4

O a tatou taumafaiga ia faaleleia lo tatou tausiga o le aso Sapati o se faataitaiga atuatuvale itiiti o le faafeagai. Ua ia i tatou le poloaiga a le Alii e faamamalu le Sapati. O nisi o a tatou filifiliga atonu e solia ai lena poloaiga, ae o isi filifiliga i le auala e faaalu ai le taimi i le Sapati ua na o se fesili faigofie lava pe o le a tatou faia na o se mea lelei po o mea e lelei atu po o mea e silisili atu ona lelei.5

Ina ia faamanino le faafeagai o faaosoosoga, ua faamatala mai e le Tusi a Mamona ni metotia se tolu o le a faaaogaina e le tiapolo i aso e gata ai. Muamua, o le a “sasao ai o ia i loto o le fanauga a tagata, ma faaoso i latou ia feita e faasaga i mea lelei” (2 Nifae 28:20). Lua, o le a “faaoleole e ia, ma faamoemoe malie ese atu [tagata o le ekalesia] i le saogalemu faaletino,” ma fai mai “ua manuia Siona, ua lelei mea uma” (fuaiupu 21). Tolu, o le a ia ta’u mai ia i tatou “e leai se seoli; ma … e le o a’u o se tiapolo, ona e leai se tiapolo” (fuaiupu 22), ma o lea e leai ai se sa’o ma se sese. Ona o lenei faafeagai, ua lapataia ai i tatou ia aua ne’i “nofonofo filemu i Siona!” (fuaiupu 24).

O le Ekalesia i lana misiona paia ma i tatou i o tatou lava olaga patino e foliga mai e fetaiai ma mea faafeagai ua faateleina i nei aso. Masalo a o tuputupu ae le Ekalesia i le malosi ma tuputupu ae foi i tatou o le au paia i le faatuatua ma le usiusitai, ua faateleina foi le malosi o Satani i ana faafeagai ina ia faaauau pea ona tatou fetaiai ma “faafeagai i mea uma.”

O nisi o nei faafeagai e oo mai lava mai tagata o le Ekalesia. O nisi e faaaogaina mafuaaga faaletagata lava ia po o le atamai e teena ai le taitaiga faaperofeta ma latou faailogaina i latou lava e pei o ni sui faaupufai o faigamalo—“o le vaega a le itu agai.” Peitai e ui e talafeagai lea vaega mo se malo temokarasi, ae e leai se faamaoniga mo lenei manatu i le faigamalo o le malo o le Atua, lea e faamamalu ai fesili ae le o le itu agai (tagai Mataio 26:24).

I se isi faataitaiga, o loo tele ni mea i le popofou o le talafaasolopito o le Ekalesia, e pei o mea sa faia ma mea sa lei faia e Iosefa Samita i tulaga uma, ia e faaaoga e nisi e fai ma faamaoniga o lo latou tetee. Ou te faapea atu i tagata uma, faaaoga le faatuatua ma tuu atu le faalagolago i le aoaoga a le Faaola e faapea tatou te “iloa foi i latou i o latou fua” (Mataio 7:16). O loo faia e le Ekalesia ni taumafaiga tele ina ia faamaoni ia faamaumauga uma o i ai ia i tatou, ae i le uma ai ona tatou faia o mea uma e mafai ona tatou lolomiina, e tuua ai lava o tatou tagata o le ekalesia i nisi taimi ma ni fesili autu e le mafai ona taliina e suesuega. O le ituaiga lena o le talafaasolopito a le Ekalesia o le “faafeagai o mea uma.” O nisi mea e na o le faatuatua e mafai ona aoaoina ai (tagai MF&F 88:118). O lo tatou faalagolagoga silisli lava o le faatuatua i le molimau ua tatou maua mai le Agaga Paia.

E seasea faalavelave le Atua i le faitalia o soo se tasi o Ana fanau e ala i le faalavelave e tetee atu i nisi mo le toomaga o isi. Ae Na te faamamaina ni avega o o tatou mafatiaga ma faamalosia i tatou ia lavatia, e pei ona ia faia mo le nuu o Alema i le eleele o Helama (tagai Mosaea 24:13–15). Na te le taofia uma foi faalavelave faalenatura, ae Na te tali mai i a tatou tatalo ia faatapulaa o latou aafiaga pe faasee ese i tua, e pei ona sa Ia faia i le āfa malosi tele lea na faamatauina le taofiga o le faapaiaga o le malumalu i Fiti;6 pe Na te faavaivaia foi o latou aafiaga, e pei ona sa Ia faia i le aufaatupu faalavelave faapapomu lea na maliliu ai le toatele o tagata i le malaevaalele o Brussels ae na ona manunua ai o a tatou faifeautalai e toafa.

I faafeagai uma faaletino, ua tatou maua ai le faamautinoaga a le Atua o le a Ia “faapaiaina [o tatou] puapuaga mo [lo tatou] manuia” (2 Nifae 2:2). Ua aoaoina foi i tatou ia malamalama i o tatou aafiaga faaletino ma Ana poloaiga i le aano atoa o Lana fuafuaga sili o le faaolataga, lea ua ta’u mai ai ia i tatou le faamoemoega o le ola ma tatou maua ai le faamautinoaga o se Faaola, i Lona suafa lea ou te molimau atu ai i le moni o nei mea. I le suafa o Iesu Keriso, amene.

Faamatalaga

  1. “O Le Aiga: O Se Folafolaga i le Lalolagi,” Liahona, Nov. 2010, 129.

  2. E talitutusa foi, ua aoao mai faaaliga o onapo nei e faapea afai tatou te le tofo i le oona, e le mafai lava ona tatou iloaina le suamalie (tagai Mataupu Faavae ma Feagaiga 29:39).

  3. Tagai i le Michael Hubbard MacKay and Gerrit J. Dirkmaat, From Darkness unto Light: Joseph Smith’s Translation and Publication of the Book of Mormon (2015), 163–79.

  4. Thomas S. Monson, “Joy in the Journey” (address given at the BYU Women’s Conference, May 2, 2008), womensconference.ce.byu.edu. O se talafatu puupuu e uiga i le taalo faatamalii ma le faatemokarasi a John S. Tanner, lea ua peresitene nei i le BYU–Hawaii, ua aofia ai lenei malamalamaaga i se mataupu lea tatou te masani ai: “O le aoao i le auala e malolo ai faatamalii e le gata o se tiute faalemalo; ae o se tiute foi faalelotu. Na mamanuina e le Atua le olaga faaletino e faamautinoa ai e i ai le ‘faafeagai o mea uma’ (2 Nifae 2:11). O faafitauli ma toilalo o ni vaega o lena fuafuaga mo lo tatou atoatoa. … E faia e le toilalo se matafaioi taua tele i la tatou ‘sailiga mo le atoatoa’” (Notes from an Amateur: A Disciple’s Life in the Academy [2011], 57).

  5. Tagai Dallin H. Oaks, “Lelei, Lelei Atu, Lelei Silisili,” Liahona, Nov. 2007, 104–8.

  6. Tagai Sarah Jane Weaver, “Rededication Goes Forward,” Church News, Feb. 28, 2016, 3–4.