Kev Tiv Thaiv Kom Txhob Raug Cua Daj Cua Dub

“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev:

“Thaum kuv tsis muaj tsoos tsho hnav nej muab rau kuv hnav. …

“… Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”¹

Muaj kwv yees li 60 plhom tus neeg tawg rog nyob hauv lub ntiaj teb niaj hnub no, uas txhais hais tias, “1 tug los ntawm 122 tug neeg … raug yuam khiav ntawm lawv lus tsev mus,”² thiab ib nrab yog me nyuam xwb.³ Yeej ua rau peb xav tsis thoob thaum peb xav txog tag nrho cov neeg no thiab xav tias qhov no muaj lub ntsiab dab tsi hauv peb lub neej. Tam sim no kuv ua hauj lwm nyob hauv Europe, es xyoo tas los muaj ib plhom thiab nees nkaum tsib puas txhiab tus neeg tawg rog uas tau tuaj ntawm tej teb chaws uas tawg rog nyob hauv Middle East thiab Africa los rau Europe.⁴ Peb pom lawv feem coob tuaj es lawv tsuas muaj cov khaub ncaws uas lawv hnav thiab tej yam uas lawv nqa tau nyob hauv ib lub hnab me me xwb. Feem coob twb kawm ntawv lawm, thiab lawv txhua tus yuav tsum tso lawv tej tsev, kev kawm ntawv, thiab hauj lwm tseg.

Raws li Thawj Pawg Thawj Tswj Hwm qhia, lub Koom Txoos ua hauj lwm nrog 75 lub koom haum nyob hauv 17 lub teb chaws thoob plaws Europe. Cov koom haum no muaj xws li cov koom haum loj uas nyob thoob ntiaj teb, cov koom haum me me hauv zej zog xwb, cov koom haum ntawm tseem fwv, thiab cov koom haum pab dawb los ntawm kev teev ntuj thiab cov pej xeem huv tib si. Peb yeej tau koob hmoov vim peb koom tes thiab kawm los ntawm cov uas ua hauj lwm nrog cov neeg tawg rog nyob thoob plaws lub ntiaj teb tau ntau xyoo.

Vim peb yog mej zeej ntawm lub Koom Txoos, peb tsis tas xav ntev kom nco qab tias nyob hauv peb zaj keeb kwm tau muaj tej lub sij hawm thaum peb yog neeg tawg rog, uas pheej raug ntiab tawm ntawm peb tsev thiab thaj teb. Lub lim tiam tas los Muam Linda Burton hais txog cov neeg tawg rog thiab thov kom cov poj niam ntawm lub Koom Txoos xav tias “yuav ua li cas yog tias lawv lub neej yog kuv lub neej?”⁵ Lawv lub neej yeej yog peb lub neej, tsis ntev tas los.

Muaj neeg uas sib cav sib ceg nyob hauv tseem fwv thiab hauv tej lub sawm fem txog qhov uas ib tug neeg tawg rog yog leej twg thiab yuav tsum ua dab tsi kom pab cov neeg tawg rog. Tej lus uas kuv hais no yeej tsis yog ib feem ntawm kev sib cav ntawd, thiab tsis hais txog kev cai pub cov neeg los nyob hauv yus lub teb chaws, tiam sis kuv xav tsom ntsoov rau cov neeg uas raug ntiab tawm ntawm lawv tej tsev thiab lawv tej lub teb chaws vim muaj kev tsov rog uas lawv tsis tau pib.

Tus Cawm Seej paub tias kev ua ib tug neeg tawg rog zoo li cas—Nws yeej yog ib tug neeg tawg rog. Thaum nws yog ib tug me nyuam, Yexus thiab Nws tsev neeg khiav rau Iyiv kom dim Helauj txoj kev tua neeg. Thiab tej lub sij hawm thaum Nws ua hauj lwm qhuab qhia, Yexus raug hem thiab muaj neeg xav muab Nws tua, es thaum kawg cov neeg phem ua tom txwv muab Nws tua tuag. Tej zaum, ua rau peb haj yam xav tsis thoob vim Nws pheej qhia peb kom ib leeg hlub ib leeg, ib yam Nws hlub peb, hlub peb tus kwv tij ib yam li peb hlub peb tus kheej. Muaj tseeb tiag, “txoj kev cai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov poj ntsuam thiab cov me nyuam ntsuag uas raug kev txom nyem quaj ntsuag”⁶ thiab saib xyuas cov neeg pluag thiab cov neeg txom nyem, thiab pab lawv kom lawv tsis txhob raug txom nyem.⁷

Kuv tau txais kev tshoov siab thaum kuv pom lub Koom Txoos cov mej zeej nyob thoob plaws lub ntiaj teb ua siab dawb pub kev pab rau cov neeg thiab tsev neeg uas tau poob ntau yam. Nyob hauv Europe, kuv tau pom lub Koom Txoos cov mej zeej coob txais kev xyiv fab thiab kev txhawb nqa thaum lawv ua raws li lawv txoj kev xav saib xyuas thiab pab cov uas xav tau heev nyob ib puag ncig lawv. Lub Koom Txoos tau muab chaw tiv thaiv thiab kev kho mob rau lawv. Ceg txheem ntseeg thiab qhov chaw tshaj tawm txoj moo zoo tau ua ntau txhiab pob khoom tu cev. Lwm ceg txheem ntseeg tau muab zaub mov thiab dej, khaub ncaws, cov tsho tiv nag, cov luv thij, cov ntawv, cov hnab ev khoom, cov iav nyeem ntawv, thiab ntxiv.

Cov neeg nyob txij ntawm Scotland mus rau Sicily yeej tau ua txhua lub luag hauj lwm kom pab tau. Cov kws kho mob thiab cov kws tu neeg mob tau ua siab dawb pab nyob hauv tej qhov chaw uas thaum cov neeg tawg rog tuaj txog, lawv khaub ncaws ntub heev, lawv no no, thiab feem ntau lawv ntshai heev thaum lawv hla tus dej. Thaum cov neeg tawg rog pib tus txheej txheem nrhiav qhov chaw nyob, cov mej zeej hauv zej zog pab lawv kawm yam lus ntawm lawv lub teb chaws, thiab lwm tus txhawb cov me nyuam thiab cov niam tsev txiv tsev lub siab thaum muab khoom ua si, cov khoom kos duab, ntaus nkauj, thiab khoom ua si rau lawv. Ib txhia muab paws xov, cov koob xaws, thiab cov nqe lauj uas siv kom xaws pub dawb rau lawv, thiab qhia cov neeg tawg rog paub ua tej no, tsis hais cov laus thiab cov hluas los yog.

Cov mej zeej ntawm lub Koom Txoos uas tau ua hauj lwm pab thiab ua thawj coj tau ntau xyoo yeej ua tim khawv txog qhov uas kev pab cov neeg uas xav tau kev pab heev no yeej yog qhov uas ua rau lawv zoo siab tshaj plaws txij thaum lawv pib muab kev pab los.

Qhov uas muaj li cas tiag tiag los yus yuav tsum pom thiaj ntseeg tau. Thaum lub caij no no, kuv ntsib ib tug poj niam uas muaj ib plab me nyuam los ntawm Syria nyob hauv ib qhov chaw pab cov neeg tawg rog uas xav xav paub hais tias nws tsis tas yug me nyuam nyob ntawm plag tse txias hauv lub tsev loj uas lawv cia nws nyob. Nyob hauv Syria nws yog ib tug kws qhia ntawv hauv lub tsev qib siab university. Thiab nyob hauv Greece kuv tau nrog ib tsev neeg sib tham uas lawv tseem ntub, tshee tshee, thiab ntshai vim lawv hla hiav txwv nyob hauv ib lub nkoj me me tuaj ntawm Turkey los. Tom qab kuv ntsia lawv qhov muag thiab mloog lawv zaj lus, hais txog qhov txaus ntshai lawv xav dim thiab lawv txoj kev mus nrhiav ib qhov chaw tiv thaiv, kuv yeej yuav tsis zoo ib yam li qub.

Muaj ib pawg uas ua hauj lwm coob heev uas muab kev pab thiab kev kho mob, feem ntau muab kev pab dawb. Kuv tau pom ib tug mej zeej ntawm lub Koom Txoos uas tau ua hauj lwm txhua hmo tau ntau lub hli, muab kev pab rau cov uas tuaj ntawm Turkey tuaj rau Greece. Nws yeej ua ntau yam suav tsis txheeb, xws li nws muab kev pab kho mob rau cov uas raug mob sab heev: nws ua tib zoo hais kom saib xyuas, cov poj niam thiab me nyuam uas nyob ib leeg, nws khawm cov uas nyuaj siab kawg vim muaj ib tug lawv hlub uas tas sim neej, thiab nws ua tib zoo siv tej yam khoom uas muaj tsis ntau kom pab cov neeg coob kawg nkaus. Nws, thiab ntau tus neeg zoo ib yam li nws, yeej yog ib tug tim tswv uas muab kev txhawb pab, es cov uas nws pab, thiab tus Tswv, uas yog tus txib Nws mus, yeej yuav nco ntsoov.

Thiab tag nrho cov uas tau siv lawv lub dag zog kom pab cov neeg txom nyem nyob ib puag ncig lawv yeej zoo li Amas cov neeg: “Thiab li no, nyob rau hauv lawv txoj kev huaj vam, lawv tsis tau ntiab ib tug twg uas liab qab, los sis tus uas tshaib plab, los sis tus uas nqhis dej, los sis tus uas muaj mob, los sis tus uas tsis tau kev pab; … lawv ua siab dawb rau txhua tus, tsis hais tus laus thiab tus hluas, tsis hais tus ua qhev thiab tus tsis ua, tsis hais tus txiv neej thiab tus poj niam, tsis hais tus nyob sab nraum lub koom txoos los sis nyob hauv lub koom txoos, pab txhua tus neeg ib yam li cov neeg txom nyem.”⁸

Peb yuav tsum ceev faj kom xov xwm txog cov neeg tawg rog txoj kev txom nyem tsis yog ib qho uas lam hais txog niaj hnub tom qab thawj zaug yus hnov, tiam sis tseem muaj kev tsov kev rog ntxiv thiab tseem muaj tsev neeg uas tuaj. Muaj ntau plhom tus neeg tawg rog nyob thoob plaws lub ntiaj teb, uas xov xwm tsis tshaj tawm txog lawv tej zaj lus, tiam sis lawv tseem xav tau kev pab heev.

Yog nej nug hais tias, “Kuv yuav ua li cas?” thov kom peb nco ntsoov tias peb yuav tsum tsis txhob pab lwm tus yog peb pab tsis taus peb tsev neeg thiab ua tsis taus peb tej luag hauj lwm,⁹ thiab peb yuav tsum tsis txhob xav tias peb cov thawj coj yuav npaj tej yam rau peb ua. Tiam sis cov tub hluas ntxhais hluas, cov txiv neej, cov poj niam, thiab tsev neeg, peb yeej muaj peev xwm koom tes pab cov neeg txom nyem.

Xwv kom ua raws li Thawj Pawg Thawj Tswj Hwm tej lus kom koom tes pub kev pab zoo li Yexus Khetos rau cov neeg tawg rog nyob thoob plaws lub ntiaj teb,¹⁰ tej pawg tuam thawj tswj hwm ntawm lub Koom Haum Niam Tsev, Koom Haum Ntxhais Hluas, thiab lub Koom Haum Me Nyuam Yaus tau txhim tsa ib txoj kev pub kev pab hu ua “Kuv Tuaj Ua Qhua.” Muam Burton tau qhia qhov no rau cov poj niam ntawm lub Koom Txoos lub lim tiam tas los nyob hauv tuas poj niam. Muaj tej lub tswv yim, tej kev pab, thiab tej lus qhia txog kev pab nyob ntawm IWasAStranger.lds.org.

Cia li txhos caug thov Vajtswv kom paub yuav pib pab li cas. Cia li xav tias yuav pab li cas nyob ze nej lub tsev, nyob hauv nej zej zog, es nej yeej yuav nrhiav tau ib co neeg uas xav tau kev pab thaum lawv tseem hloov kom haum lawv qhov chaw nyob tshiab. Lub hom phiaj yog kev pab lawv rov qab ua tau hauj lwm kom pab tau lawv tus kheej.

Muaj ntau yam uas peb ua tau kom muab txoj kev pab thiab ua phooj ywg. Tej zaum nej yuav pab cov neeg tawg rog kawm yam lus ntawm nej lub teb chaws, pab qhia lawv txog tej txuj ci tshiab, los sis xyaum ua xam phaj kom tau ib txoj hauj lwm tshiab. Tej zaum nej yuav qhia tau ib tsev neeg los sis ib leej niam uas tsis muaj tus txiv thaum lawv hloov ua neej raws li ib kab lig kev cai tshiab, tej zaum ua ib qho me me xws li coj lawv mus rau lub khw muag zaub mov los sis lub tsev kawm ntawv. Muaj tej pawg ntseeg thiab ceg txheem ntseeg uas koom tes ua hauj lwm nrog lwm lub koom haum. Thiab, raws li nej ua tau, nej pub tau nyiaj pab rau lub Koom Txoos pob nyiaj pab cov neeg txom nyem.

Tsis tas li ntawd xwb, peb txhua tus yeej kawm tau ntxiv txog tej xwm txheej nyob thoob plaws lub ntiaj teb uas ua rau cov tsev neeg no khiav tawm ntawm lawv tej tsev. Peb yuav tsum qhia kom saib taus lwm tus thiab to taub txhua kab lig kev cai thiab cia li txhawb nqa kom tib neeg tsis txhob ntxub lwm tus. Qhov uas nej ntsib tsev neeg uas yog neeg tawg rog thiab qhov uas nej hnov lawv hais tej zaj lus lawv tus kheej, nyob tab meeg lawv thiab tsis yog los ntawm TV los sis xov xwm, yuav pab nej hloov Kev ua phooj ywg tiag tiag yuav pab kom muaj kev siab hlub thiab kev koom ua ke.

Tus Tswv tau qhia peb hais tias Xi-oos tej ceg txheem ntseeg yog tej qhov chaw tiv thaiv thiab ib qho chaw tiv thaiv kom txhob raug cua daj cua dub.¹¹ Peb twb nrhiav tau qhov chaw tiv thaiv lawm. Xav kom peb cia li tawm ntawm peb qhov chaw nyab xeeb los thiab vim peb muaj ntau nplua mias, muab faib rau lwm tus, kev cia siab tias yav tom ntej yuav zoo, kev ntseeg Vajtswv thiab kev ntseeg tib neeg, thiab kev hlub uas tsis tsom ntsoov rau tej yam sib txawv ntawm kab lig kev cai thiab tsuas pom qhov tseeb uas peb txhua tus yog peb Leej Txiv Saum Ntuj Ceeb Tsheej cov me nyuam.

“Vim Vajtswv tsis pub lub siab ntshai rau peb tiam sis pub lub siab muaj hwj chim thiab kev hlub.”¹²

Qhov uas lawv yog neeg tawg rog tam sim no yeej yog ib qhov uas hloov lawv lub neej heev, tiam sis qhov ua lawv yog neeg tawg rog yeej tsis yog lub ntsiab ntawm lawv lub neej. Ib yam ntau txhiab tus neeg uas raug li no ua ntej, nov yog ib lub caij—peb cia siab tias yog ib lub caij tsis ntev—nyob hauv lawv lub neej. Thaum yav tom ntej lawv ib txhia yuav los ua cov uas yeej tus nqi zog Nobel, cov kws pab cov pej xeem, cov kws kho mob, cov kws ua txuj ci science, cov kws ntaus nkauj, cov uas kos duab, cov thawj coj teev ntuj, thiab cov uas ua lwm yam hauj lwm. Muaj tseeb tiag, lawv feem coob yeej yog cov zoo li no ua ntej lawv poob txhua yam. Lub sij hawm no tsis yog lub ntsiab ntawm lawv lub neej, tiam sis qhov uas peb ua li cas los yuav pab lub ntsiab ntawm peb lub neej.

“Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”¹³ Los ntawm Yexus Khetos lub npe, amees.

Xwv kom paub ntxiv, saib IWasAStranger.lds.org thiab mormonchannel.org/blog/post/40-ways-to-help-refugees-in-your-community.