Acn Wihklac liki Pahkah

“Mweyen nga tuh masrinsral ac kowos kiteyu mongo; nga malu ac kowos se ma nimuk; nga sie mwet sac ac kowos suliyuyak nu in lohm suwos;

“Wangin nuknuk luk ac kowos ase nuknuk luk. …

“Pwayena nga fahk nu suwos, ke kowos oru ma inge nu sin sie su srik liki nukewa sin mwet lik, kowos oru nu sik.”¹

Apkuhran in oasr miliacn 60 mwet lihllihllac fin facluh mihsenge uh, suc kalmac pa “ke mwet 122 nuh kwewa selos … tuh sapkihnyuck in kahinglac liki lohm selos,”² ac tahfuh mwet inge pa tuhlihk srihsrihk.³ Arulacna ma lut se in nuhnkuh ke mwet pucs inge ac kalmacn ma inge ke kais sie moul luhn mwet ingacn. Pahng luhk ingena uh oasr fin acn Europe, ke sie quarter million sin mwet lihllihllac inge elos tuh tuhkuh yac se somlah ah nuh inge liki acn mweuniyuck Middle East ac Africa.⁴ Kuht liye puhs selos tuhkuh us nuknuk ma elos nukum muhkwena ac ma elos kuh in sang ke packpack na srihsrihk se. Inkaiyaclos mwet suhmaht, ac enenweyuck elos nuh kwewa in som liki lohm, lohm lutlut, ac orekma lalos uh.

Ye kolyuck luhn Prestuhnsi Se Met, Alu uh tuhkweni orekma yurin u 75 fin muhtuhnfacl 17 Europe. Ke u inge oasr ma luhlahp pwengpweng ne ke ma srihsrihk ke mura uh, oasr ma ke government ne ke ma luhn alu uh. Kuht tarilacna kuht in kuh in wi ac lutiyuck sin u sahyac suc tuh orekma yurin mwet lihlllihllac fin facluh nohfohn ke yac pucspucs.

In mempucr ke Alu uh, ke tuhkweni, kuht tiac enenuh in ngwetlah loes ke ma sikyak lasr somlah ah in akihlen ke pacl ma kuht tuh mwet lihllihllac ah, lihllihlyak pacl puhs ke ohiyac na koluk liki lohm ac imac sesr. Wik tari ah sramsram ke mwet lihllihllac, Tahmtahel Burton el siyuck muhtwacn ke Alu uh in nuhnkuh “Meac fin sramsram lalos uh pa sramsram luhk uh?”⁵ Sramsram lalos pa sramsram lasr uh, yac na ekahrs somlah ah.

Oasr akuhkuhin arulacna fokoko sin government ac fin facluh ke kalmacn mwet lihllihllac se pa ac meac ac fah sikyak in kahsruh mwet lihllihllac uh. Sramsram luhk uh ac tiacna ma ke kuhtwena ohiyac in wi ke akuhkuhin sacn, kuh in sramsram ke ip luhn mwet forfor uh, tuhsruhk in kahlwem suwohs ke mwet suc tuh sapkihnyuck in kahinglac liki lohm selos ac acn selos ke srihpen mweun ma elos tiacna wi kac.

Mwet Lahngo El etuh puhla luhn mwet lihllihllac se—El tuh sie pac. Ke El tuhlihk srihsrihk ah, Jisus ac sucu Lal elos som liki acn Egypt in kahinglac liki ahkmas lal Herod. Ac ke pacl ekahsr ke pacl in kuhlwacnsap Lal, akihlenyuck moul luhn Jisus kena ahkkolukyeyuck sin mwet, ac sahflah El tuh fihliyac moul Lal in acnwucki sin mwet koluk suc kena unilyac. Sahp, ke srihpen, ma inge arulacna akihlenyuck wo sesr lah El kalweni in luti kuht in luhngse sie sin sie, oacna ke El luhngse kuht, in luhngse mwet tuhlan lasr oacna ke kuht luhngse kuht sifacna. Pwacyena, “alu pwaye ac nasnas ye mutun God Papa pa inge: in karinganang tulik mukaimtal ac katinmas su muta in ongoiya”⁶ ac in ngwet nuh sin mwet suhkahsruhp ac mwet enenuh, ac kuhlwacnsapuh nuh selos elos in tiac kweok.⁷

Ma na mokleyuck se in mwe loh ke ma mempucr ke Alu fin facluh uh nohfohn tuh sang yohk in kahsruh mwet ac sucu inge suc tulac ma pucspucs lalos. Yohkna fin acn Europe, nga tuh liye mempucr puhkantwen ke Alu uh tuh puhlakihn sie engan ke lut ac ma ahkkweyeyuck luhn nguhna ke elos ukwe kena loal in kahsruh ac kuhlwacnsapuh elos suc enenuh kahsruh raunweloslac. Alu uh tuh sang lohm ac karihngihnyuck ke ono. Stek ac misin uh tuh orwacni kuhfa puhkantwen in ahknwacsnwacsye mahno. Stek sahyac uh tuh sang mongo ac kof, nuknuk, kot, pwacskuhl, puk, packpack, kuhlahs in rit, ac kuhtuh pac ma puhs.

Kais sie mwet Scotland nuh Sicily elos tuh ahkfalye kunohkohn nuh kwewa. Taktuh ac nurse uh sang pacl ac orekma lalos sifacna ke acn ma mwet lihllihllac uh tuh ai ke sroksrok, mihsrihsr, ac inkaiyacn pacl uh kweokkihn fuhfahsryucsr lalos meoa uh. Ke mwet lihllihllac uh muhtwacwacack in sifilpac oakiyac muhta lalos, mwet fin acn sacn elos kahsrwelos in kahlwem ke kahs sifacna lalos ke acn lalos, ke mwet sahyac uh ahkkweye nguhnin kwewana tuhlihk ac ninac pahpah an ke elos sang mwe sritacl, mwe sroal, ac on. Kuhtuh selos eis kuhfa in tuhta, ac luti ma inge nuh sin mwet lihllihllac mahtuh ac fuhsr uh.

Mempucr pah ke ma luhn Alu uh tuh sang yac puhs ke kuhlwacnsap ac kolyuck uh fahkwack ke ma pwacye lah kuhlwacnsapuh mwet suc enenuh kahsruh inge uh sang nuh selos mwe puhla kahsruhp yohk emet ke kuhlwacnsap lalos emet uh.

Ma pwacye luhn ohiyac inge enenuh in liyeyuck in luhlahlfongiyuck. Winter ah nga ohsun, inmahsrlon mwet puhs sahyac, nuh sin muhtwacn pihtuctucyak se Syria ke camp luhn mwet lihllihllac ke el suk elan tiac enenuh in oswelah tuhlihk se nahtuhl an ke acn ohyucu ke lohm luhlahp ma el muhta we an. E fin acn Syria el sie mwet luti ke college. Ac fin acn Greece nga sramsram nuh sin sucu se suc srwackna sroksrok, rarrar, ac sahngweng ke fuhfahsryucsr lalos lun oak rapa srihsrihk soko liki acn Turkey. Tukun nga ngwetwacng nuh lun ahtron muhtahlos ac lohng sramsram lalos, kwewa ke ma sahngweng elos tuh kahinglac liki ac ke fuhfahsryucsr sensen lalos in konwacack acn in wihklac, nga mwet na sienalac se.

Inkaiyacn mwet suc sang kahsruh uh elos pa mwet orekma oaru srihsrngiyucki, puhs selos mwet volunteer. Nga liye na pwacye mukwikwi luhn sie mempucr ke Alu uh suc, ke mahlwem puhs, orekma fong na fohn, sang kahsruh nuh ke mwe enenuh yohk srihpac luhn mwet tuhkuh acn Turkey ac Greece. Ke kahsruh puhs sahyac lal, el sang ono nuh selos suc arulacna kihnetuh, el fosrngahkihn muhtwacn sac ac tuhlihk suc muhkwena fahsr; el srukyac elos suc oasr mwet wiyaclos tuhfahna misac; ac el oruh kuhiyacl ke kuhfa suhpuhs lal in kahsruh ke mwe enenuh pucspucs. El, oacna mwet puhs oacna el, elos pwacyena lihpufacn kuhlwacnsap, suc orekma lalos ac fah tiac muhlkihnyucklac sin mwet elos tuh kahsruh, oacyacpac sin Leum, suc orekma Lal pa ingacn.

Elos nuh kwewa suc sifacna sang kahsruh lalos nuh sin mwet kweok raunweloslac elos oacna mwet lal Alma ah: “Ac ohinge, ke ohiyac kahsruhp lalos, elos tiac na suhpwaclah kuhtwena mwet suc kohflohfohl, kuh masrinsrwacl, kuh maluh, kuh mas, kuh suc soenna mongoi; … elos kuhlwacng nuh sin mwet nuhkwewa, kwewa na mwet mahtuh ac mwet fuhsr, kwewa na mwet srohoh ac mwet sukohsohk, kwewa na mukul ac muhtwacn, finne tiac wi alu uh kuh wi alu uh, wacngihn suhnakihnyuck nuh sin mwet oacna elos suc oasr enenuh la.”⁸

Kuht enenuh in taran tuh pweng ke elyah luhn mwet lihllihllac uh in tiac ma na sikyak na ke ma lut kac uh wacngihnlac ac mweun uh kalweniuck ac sucu uh srwackna kahing liki acn selos uh. Miliacn mwet lihllihllac fin facluh nohfohn, suc sramsram lalos tiacna oasr ke news uh, srwackna enenuh kahsruh.

Kowos fin siyuck, “Meac nga kuh in oruh?” lwelah kuht in esam ma se met lah kuht in tiac kuhlwacnsap fin kuht ac muhlkuhnlah sucu lasr ac ma kunacsr sahyac uh,⁹ kuh kuht in tiac pac nuhnkuh muh mwet kol lasr ac fah oraclah orekma lasr. Tuhsruhk ke mwet fuhsr, mukul, muhtwacn, ac sucu uh, kuht kuh in tuhkweni ke mwe kahsruh yohk srihpac se inge.

In topuk solsol luhn Prestuhnsi Se Met in wi ke kuhlwacnsapuh oacna Kraist nuh sin mwet lihllihllac fin facluh nohfohn,¹⁰ prestuhnsi luhlahp luhn Rilif Sosaiti, Muhtwacn Fuhsr, ac U luhn Tuhlihk Srihsrihk uh oraclah orekma in sang kahsruh pahngpahng “Nga sie Mwet Sac.” Tahmtahel Burton el tuh ahkkahlwemye ma inge nuh sin muhtwacn ke Alu uh ke wik tari ah ke toeni luhlahp luhn muhtwacn.’ Oasr nuhnak wo pucspucs, mwe kahsruh, ac kahs in kahsruh in kuhlwacnsap ke IWasAStranger.lds.org.

Muhtwacwacack ke sikuck muhtuhnte lowos in pruhe. Na nuhnkuh in oruh ma fototo nuh lohm suwos an, mura lowos sifacna, ma kowos ac fah konwacack mwet suc enenuh kahsruh ke elos moulkihn ohiyac sasuc uh. Srihpac sahflah pa fohlohkyak oaru lalos nuh ke moul in sifacnalac.

Pacl wowo in sang paho in kahsruh ac kawuckyak oasr acn nuh kwewa uh. Sahp kowos ac fah kahsruh mwet lihllihllac uh lotwelah kahs ke acn lalos, ahkkweye kuhiyaclos ke orekma, kuh pracktis sramsram in konwacack orekma. Kowos kuh in fosrngahkihn sie sucu kuh ninac lolacp se ke elos oasr ke acn tiacna etweyuck nuh selos, finne ma fihsracsr se in weluhlos nuh ke stoh kuh lutlut ah. Kuhtuh ward ac stek uh wi u ma oraclah tari in orekma yohroh. Ac, fal nuh ke ohiyowos, kowos kuh in sang ke kahsruh luhlahp wolacna luhn Alu uh.

Oacyacpac, kais sie sesr kuh in ahkyohkye akihlen lasr ke ma sikyak facluh ma oruh sucu inge in kahinglac liki lohm selos uh. Kuht enenuh in tu fokoko lain ma koluk ac sramtweack suhnak ac kahlwem ke facsin ac atac nuh kwewa. Ohsun nuh sin sucu lihllihllac ac lohng sramsram lalos ke insrewos sifacna, ac tiac ke tifi liyeyuck kuh newspaper, fah ihkihl kowoslac. Kawuck pwacye uh fah oreklac ac in sramtweack puhla kuhlwacng ac fahsrweni na pwacye.

Leum El tuh luti kuht lah stek luhn Saion pa “sie acn in karihngihn” ac “sie acn wihklac liki pahkah.”¹¹ Kuht konwacack acn in wihklac. Lwelah kuht in yorlah liki acn karihngihnyuck lasr uh ac akacsruhi yohrohlos, ke ma puhs lasr, finsrak ke pacl wowo fahsruh, luhlahlfongi ke God ac mwet wiyacsr, ac luhngse ma ahluhkwelah facsin ac ma siena nuh ke ma pwacye wolacna lah kuht nuh kwewa tuhlihk nuhtin Pahpah tuhmasr Inkuhsrao.

“Tuh Ngun su God El ase nu sesr uh tia mwe aktonongye kut; a ma in nwekkutla ke ngunin ku, ac lungse.”¹²

In sie mwet lihllihllac sahp ac pacl yohk srihpac ke moul lalos suc pa mwet lihllihllac uh, tuhsruhk in mwet lihllihllac se tiac ahkkahlwemye lah suc elos uh. Oacna mwet puhkantwen met luhkwelos, pa inge puhlan pacl se—finsrak puhlan pacl na srihsrihk se—in moul lalos uh. Kuhtuh selos ac fah fahsr eis opi Nobel uh, ekihn mwet kuhlwacnsap, mwet taktuh, mwet scientist, mwet on, mwet sroal, mwet kol alu, ac mwet kahsruh ke ohiyac puhs sahyac. Pwacyena, puhs selos pa kain mwet inge met liki tuhlac ma lalos nuh kwewa. Puhlan pacl se inge tiacna ahkuhtwelosi, tuhsruhk kahsruh lasr uh fah kahsruh ahkuhtwekuhti.

“Pwayena nga fahk nu suwos, ke kowos oru ma inge nu sin sie su srik liki nukewa sin mwet lik, kowos oru nu sik.”¹³ Ke inen Jisus Kraist, amen.

In etuh ke kuhtuh pac, liye IWasAStranger.lds.org ac mormonchannel.org/blog/post/40-ways-to-help-refugees-in-your-community.