Likōpejn̄ak jān Ļan̄ ko.

“Bwe I ar kwōle, im kom̧ ar naajdik Eō: I ar maro, im kom̧ ar kaidaak Eō: I ar ruamāejet, im kom̧ kadeļo̧n̄ Eō:

“Ejjeļo̧k Aō nuknuk, im kom̧ ar kanuknuk Eō. …

“… Em̧ool Ij ba n̄an kom̧, Ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧an n̄an Eō.”¹

Ekar wōr tarin in 60 milien ro rejipo̧kwe itok jān jorreen ilo tariņae, kakkure, ak lan̄ ko ilo laļ in rainin, meļeļein bwe “1 ilo tarin 122 armej … rejipo̧kwe”² im jimatanier ej ajri.³ Ij bwilōn̄ ilo aō ļōmņak kōn oran bōnbōn in im n̄an ļōmņak kōn ta meļeļein menin ilo kajjojo mour an juon armej. Eddo in kūr in aō kiiō ej ilo Europe, ijo me juon im jimaten milien in ro rejipo̧kwe rekar kamakūt er jān jorren in tariņae ko ilo Middle East im Africa raar itaaktok ilo iiō ko rej jem̧ļo̧kļo̧k.⁴ Jej lo elōn̄ iaier rej itok kōn nuknuk ko wōt rej kōņaki im mweiuk ko jet remaron̄ ineeki ilo juon iiep jidikdik. Juon bōnbōn eo eļap kōn oraņ ro remelōtlōt, im kajjojo iaier raar aikuj emakūt jān mōko m̧weer, jikin jikuuļ ko, im jerbal ko aer.

Iumwin tōl eo an Būreejtōnji eo Moktata, Kabun̄ in ej jerbale 75 doulul ko ilo 17 laļ ko ilo Europe. Doulul kein ekoba kurup in doulul ko reļļap ipeļaakin laļ in n̄an kurup in doulul ko ilo jukjukin pād jidik ko, emaron̄ doulul an kien ak doulul an kabun̄ ko ak doulul in jipan̄ ko jet. Jem̧ōņōņō in mōttā ippān im katak jān ro jet me eto aer jerbal elōn̄ iiō ippān ro rejipo̧kwe ipeļaakin laļ in.

Āinwōt jet ro uwaan Kabun̄ in, āinwōt juon doulul in armej, jejjab reilikļo̧k n̄an bwebwenatoon kabun̄ in jem̧aan n̄an ļōmņak kōn tōre ko raar jipo̧kwe itok jān jorreen ko jabdewōt, rekar kajorreen er ilo aer kar kamakūt er jān m̧ōko m̧weer im jikin kallip ko elōn̄ alen. Wiiken eo ļo̧k ilo juon kōnono kōn ro rejipo̧kwe itok jān jorreen, Sister Linda Burton eaar kajjitōk ippān kōrā ro ilo Kabun̄ in n̄an lukkuun ļōmņak “eļan̄n̄e in kar en̄jake ta ko raar en̄jake.” ⁵ Bwebwenato ko aer ej bwebwenatoon ro uwaan kabun̄ in, jem̧aanļo̧k.

Ewōr aitwerōk ko reļļap ilo kien ko im ilo jukjukin pād ko ikkijeen ta meļeļein refugees ak ro rejipo̧kwe itok jān jorreen ko jabdewōt im ta eo ej aikuj bōk jikin n̄an jipan̄ er. Ļōmņak kein rejjab n̄an kōm̧m̧an akweel ilo jabdewōt wāween n̄an ejaake ekōnono eo, barāinwōt kōm̧man ennaan ikkijeen kakien ko rejelet an armej itok n̄an juon laļ, ijjelo̧kin n̄an mijōke armej ro me rejipo̧kwe itok jān tariņae ko me raar jab bōk koņaer ie.

Rilo̧mo̧o̧r eo ejelā kōn en̄jake ko an ro rejipo̧kwe itok jān jorreen ko jabdewōt—Eaar bar juon iaier. Ke ej juon nin̄nin̄, Jisōs im baam̧le eo An raar emakūt jān Egypt n̄an ko jān aer m̧ane ekkar n̄an kakien eo an Herod. Ilo jet tōre ke ej kwaļo̧k naan, Eaar lo aer kamijak E im mour eo an eaar pād ilo kauwōtata, āliktata eaar kōtļo̧k karōk ko an ro rinana ro me raar kōņaan wōt m̧an E. Bōlen, innem, eļaplo̧k an aorōk ke Ej āliji an katakin kōj n̄an iakwe doon, āinwōt an iakwe, im iakwe ri turūr im āinwōt kōj make. Em̧ool, “kabun̄ eo erreo im erreo im̧aan mejān Anij im Jemān en̄in, N̄an loļo̧k ro ejjeļo̧k jemāier im ro ejjeļo̧k pāleer ilo aer en̄taan”⁶im “renaaj kalimjekļo̧k wōt ro rijeram̧ōl im ro riaikuj, im jerbal n̄an aer jipan̄ bwe ren jab en̄taan.”⁷

Ekōketak kōj ilo ad kam̧ool kōn ta ko ro uwaan kabun̄ in ipeļaakin laļ in rej lukkuun jouj ilo aer leļo̧k jipan̄ n̄an kajjojo armej im baam̧le ko rejerata. Ilo aolepān Europe en, emōj aō lo elōn̄ ro uwaan Kabun̄ in ro emōj aer kōļapļo̧k en̄jake in lan̄lōn̄ im im̧we ilo aer eoron̄ kūr kōn ikdelel n̄an erļo̧k peier n̄an jipan̄ im jipan̄ ro relukkuun aikuj. Kabun̄ in eaar leļo̧k em̧ im kein taktō ko. Stake ko im mijen ko raar kakobaik elōn̄ kein karreeo ko. Stake ko jet raar leļo̧k m̧ōn̄ā im dān, nuknuk, rain coat, bajikōļ ko, bok ko, pakpak ko, māj in pilo, im elōn̄ļo̧k.

Kajjojo armej jān Scotland n̄an Sicily raar kōm̧m̧ani elōn̄ kain eddo ko. Taktō ro im nōōj ro raar bōk koņaer ilo jerbal in jipan̄ ilo jikin ko n̄an ro rejipo̧kwe ke rej itaak tok ilo aer tutu, pio, im mijak itok jān aer depļo̧ke lo̧jet bwe ren ko. Āinwōt an rein rejipo̧kwe bar jino kakoņkoņ n̄an jukjuk im amņak, ro uwaan kabun̄ in ilo jikin eo raar jipan̄ katakin er kajin eo ilo jikin eo ekāāl n̄an er, ak ro jet ilo aer kōketak jetōb ko an jimor ajri im ro jineed im jemeer ilo aer leļo̧k aer kein ikkure, kein jin̄n̄a, al, im ikkure. Jet raar ebbōk tōreej me menin leļo̧k, needle in keke, im needle in āj, im katakin er kapeel kein n̄an rein kar kamakūt er jimor rūtto im dik.

Ro uwaan Kabun̄ in me eļap imenene ko ippāer ro elōn̄ iiō in aer bar jipan̄ im tōl rej kwaļo̧k ke jerbal n̄an armej rein me relukuun aikuj ej letok imenene ko reļļap im em̧m̧anļo̧k ilo aer jipan̄.

Epen tōmake jekjek in m̧ae iien kom̧ loe. Ilo wintōr eo Iaar ioone, ilubwiljin elōn̄ ro jet, juon kōrā eo ebōroro̧ juon eo ejipo̧kwe jān Syria ej pukōt jipan̄ bwe en jab lotak e ajri eo ioon būloor ko remōlo ilo em̧ killep ko ijo kar likūt bwe en jokwe ie. Ekar juon rikaki ilo juon university ilo Syria. Im ilo Greece Iaar kōnono ippān juon baam̧le me relukkun tutu, wudidid, im mijak kōn aer kar depļo̧ke lo̧jet kōn juon ļoon jidikdik jān Turkey. Ālikin aō kar lo kōn meja im ron̄jake bwebwenato ko aer, jimor kōn rinana ro raar ko im ilo an kauwōtata iaļ in aer n̄an kapok jikin jokwe, mour eo aō eaar oktak.

Leļo̧k tūriam̧o im jipan̄ rej jerbal eļap ilo an rijerbal ro wujlepļo̧k aer n̄an jipan̄, elōn̄ iaier rej rijipan̄. Iaar lo ilo makūtkūt an juon membōr in Kabun̄ in eo, ilo elōn̄ allōn̄ ko, eaar jerbal n̄an bon̄, kabwe aikuj ko an ro relukkuun aikuj me rej kab itaak tok jān Turkey n̄an Greece. Ilubwiljin elōn̄ makūkūt ko jet, eaar taktōiki armej ro m̧oktata me renan̄inmej, liin eaar lo bwe eaar ļap an armej tūriamo kake kōrā ro im ajri ro me raar emakūt tok make iaier, im eaar kōmaat an n̄an kōjeņoļo̧k kein jipan̄ ko me remaron̄ kabwe aikuj ko an aolep. Liin, im elōn̄ ro jet āinwōt e, raar jet enjel ro kōn jerbal ko aer me ro raar bōk jipan̄ rejamin meļo̧kļo̧k, im barāinwōt Irooj, raar pād ilo jerbal eo an Irooj.

Aolep ro raar leļo̧k jipan̄ n̄an rien̄taan ro ipeļaakier rej āinwōt armej an Alma: “Im āindein, ilo wāween kein aer m̧weie, raar jab jilkinļo̧k jabdewōt eo eaar keelwaan, ak ro raar kwōle, ak ro raar maro, ak ro raar nan̄inmej, ak ro jan̄in naajdik er; …raar meanwōd n̄an aolep, rūtto im dik jim̧or, riatajinemjen in rianemkwōj jim̧or, m̧aan im kōrā jim̧or, men̄e ilikin kabun̄ eo ak ilowaan kabun̄ eo, ilo ejjeļo̧k kalijekļo̧k kōn wōn armej ro raar pād ilo aer aikuj.”⁸

Jej aikuj lale bwe ņuuj ko kōn jekjek eo an ro rejipo̧kwe en jab erom juon men eo ejjeļo̧k tokjen, n̄e rej meļo̧kļo̧k en̄taan ko aer, ilo an tariņae ko wōnm̧aanļo̧k wōt im baam̧le ko rej wōnm̧aanļo̧k wōt im emakūt jān ijoko jikier. Milien armej ro kar kamakūt er ipeļaakin laļ in, ro me bwebwenatoier raar jab waļo̧k ilo nuuj, ak rej pād wōt ilo aer lukkuun aikuj.

Eļan̄n̄e kwon kar kajjitōk, “Ta eo imaron̄ kōm̧m̧ane?” jen moktata keememej bwe jen jab kōm̧m̧ane jerbal in jipan̄ ko im meļo̧kļo̧k baam̧le ko ad im eddo ko ad jet,⁹jen jab kōjatdikdik bwe ritōl ro ad ren ejaake juon jerbal in jipan̄ n̄an kōj. Ak āinwōt jodikdik ro, em̧m̧aan ak kōrā ro, baam̧le ko, jemaron̄ koba ippān doon ilo jerbal in jipan̄ in eļap.

N̄an uwaake kūr in jān Būreejtōnji eo Kein Kajuon n̄an bōk koņaer n̄an jipan̄ āinwōt Kraist n̄an rijipo̧kwe rein ipeļaakin laļ in, ¹⁰būreejtōnji eo eļap an Doulul eo an Kōrā, Jiron̄ ro, im Būraimāri raar ejaake juon doulul in jipan̄ ņae etan “Iaar juon ruamājet.” Sister Burton eaar kwaļo̧k kadkadin doulul in n̄an kōrā ro ilo Kabun̄ in wiikeen eo ļo̧k ilo mwen̄an eo eļap an kōrā ro. Ekanooj in lōn̄ ļōmņak ko n̄an jipan̄, kein jipan̄ ko, im kakobaba ikkijeen jipan̄ ilo IWasAStranger.lds.org.

Ijjino ilo am bukwelōlō im jar. Ļōmņake juon men kwoj kōm̧m̧ane epaake mweo imōm, ilo jukjukin pād ko ami make, ijo kwonaaj lo armej ro rej aikuj jipan̄ bwe ren imenene ilo jikin ko rekāāl n̄an er. Kōttōpar eo ilo jipan̄ ro riaikuj ej n̄an rojan̄ er bwe ren jerbal im ūn̄n̄are peier make.

Elōn̄ kain wāween ko jemaron̄ jipan̄ ie. Kwomaron̄ jipan̄ ro rejipo̧kwe bwe ren katak kajin eo an laļ eo rej pād ie, katakin kōn kapeel in jerbal ko aer, ak katakin er kilen intōrpiu n̄an kappok jerbal. Kwomaron̄ katakin juon baam̧le ak juon m̧am̧a emej ļeo pāleen ilo aer em̧m̧akūt ļo̧k n̄an juon imminene eo ejjab jeļā kake, aaet kōn juon men eo eļam̧ waan āinwōt mije er n̄an imōnwia ko ak jikuuļ ko. Jet ward im stake raar mōttaiki jet doulul ko me rej lōki. Im, ekkar n̄an jekjek ko, kwomaron̄ leļo̧k n̄an Kabun̄ in kijejeto eļap n̄an jipan̄.

Kajjojo iaad jemaron̄ kōļapļo̧k ad ekkatak kōn makūtkūt ko ilo laļ in kōn emakūt kein an baam̧le ko jān moko imweer. Jej aikuj jum̧ae kalijekļo̧k ko im kōļapļo̧k ad kautiej im meļeļe kōn manit ko an ro jet. Ilo ad ioone rijipo̧kwe rein im ron̄jake bwebwenato ko aer kōn lōjiln̄ūd make, im jab jān pija ak ņuuj peba, emaron̄ kōm̧m̧an eļapļo̧k jerbal in tūriam̧o, mōttaik doon, im juon wōt ilo ad jipan̄ doon. Jem̧jerā ko rem̧ool renaaj eddōkļo̧k im naaj kōļapļok tūriam̧o im tōprak ko rem̧m̧an.

Irooj eaar katakin kōj bwe stake ko ilo Zaion rej n̄an erom “juon jojomar” im “likōpejn̄ak jān lan̄ ko.”¹¹ Emōj am lo jikin likōpejn̄ak. Jen riwōjtok jān jikin koņe ko ad im jipan̄, jān ad jeram̧m̧an, kōjatdikdik kōn jekļaj eo em̧m̧an, tōmak ilo Anij im armej ro ad, im iakwe doon ijjeļo̧kin ad mijōk manit im ļōmņak ko reoktak n̄an m̧ool eo eaibojoj me kōj aolep jej nejin Jemedwōj Ilan̄.

“Bwe Anij ear jab letok n̄an kōj jetōb in lōln̄o̧n̄; a jetōb in kajoor im yokwe im kajim̧we.” ¹²

Āinwōt juon eo ejipo̧kwe emaron̄ juon tōre eaorōk n̄an mour an ro jet ro rejipo̧kwe, ak āinwōt juon eo ejipo̧kwe ejjab kwaļo̧k kadkadier.Āinwōt bukwi taujin ro moktaļo̧k, enaaj juon tōre—jej kōjatdikdik bwe juon tōre ekadu—ilo mour ko aer. Jet iaier renaaj erom jet ro rej bōk nōbar ikkijeen jeļā ko aer, jerbal ilo looblej, taktō, jāentiij, rial, rijinna, im ritōl ilo kabun̄, im rijerbal ilo jikin ko jet. Ilo m̧ool, elōn̄ iaier raar rijerbal mokta ak raar luuji aolep jeram̧m̧an ko aer. Tōre in ejjab kwaļo̧k kadkadier, ak ilo ad jipan̄ jenaaj kwaļo̧k kadkadier.

“Em̧ool Ij ba n̄an kom̧, ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧ane n̄an Eō.” ¹³ Ilo etan Jisōs Kraist, amen.

N̄an meļeļe ko reļļapļo̧k, lale IWasAStranger.lds.org im mormonchannel.org/blog/post/40-ways-to-help-refugees-in-your-community.