Pitsang melimel

“Pwe ni ei men mwengadahro, kumwail kamwengeieier; ni ei men nimpiladahro, kumwail kanimpileieier; a ni ei mehn keiru men, kumwail ahpw kasamwoielong nan imwamwail kan:

“Ni eh sohte ei likou, kumwail ahpw kalikawihiehda. …

“… Mehlel I ndahiong kumwail, soahng koaros me kumwail wiahiong emen riei me tikitik pwukat, ngehi me kumwail wiahiong.”¹

Mie aramas wenedep nan sampah wet me sopohsangehr apwal rahnwet, wehwehki me “aramas emen sang aramas epwiki riehk riemen… me pekeusangehr nan imwarail kan”² oh apali irail me seri.³ E kapwuriamwei en medewe uwen aramas ngeder oh dahme soahngen irair wet wiahiong emenemen irail. Ahnsou wet I wia ahi pwukoa nan Europe, a wasao mie aramas rar-rielopw rienen-limekid me sopohsangehr nan apwal en mahwen nan wein Middle East oh Africa ko.⁴ Se kilang me kiden irail wahte arail likou me re likawih oh kisin koruk kis. Palilaud en irail loalokong, oh irail koaros ahpw sopohsangehr imwarail kan, ar sukuhl oh doadoahk.

Pahn kaweidpen Presedensi Keieu, Mwomwohdiso wet doadoahkpene iong pwihn 75 nan wehi 17 nan Europe. Pwihn pwukat kin wekpeseng. Ekei pwihn laud me wiawikihda minimin en wehi kei, a ekei tikitik me kamwekid en tohn kousapw, a mie wiliepen koperment a ekei me wiliepen lamalam oh pwihn en sawas kei. Se paiamwahukihla aht kin doadoahkpene oh esehlasang metei kan me wereilahr kin sewsewese aramas me sopohsangehr apwal sang wein sampah tohto.

Duwen atail tohn Mwomowhdiso wet, nan pein atail poadoapoad e mengei ong kitail en kilang mwuri oh ahpw tamanda ahnsou me kitail pil sopohsangehr apwal, ni atail pekeusala sang nan ihmwatail kan oh sapwatail kan pak tohto. Nan wihk samwalahro ni ahnsou me Sister Burton koasoia duwen aramas me sopolahr, e peki rehn lih en Mwomwohdiso wet en song medewehla, “ia duwen ma I lel dahme irail lellehng.”⁵ Dahme irail lellahng, kitail pil lellahngehr sounpahr kei te samwalahro.

Koperment kan oh nanpwungen tohn wehi kan, aramas kin akamaiki ia wehwe en aramas me sopohsangehr apwal oh ia mwomwen apwalih irail. Ni ei koasoia mepwukat, I sohte songen kapatahiong ngileiet ohng nan irair en akamaio ahpw I dokdoke te aramas akan me pekeusasang imwarail kan oh arail wehi kan pwehki mahwen kan me wiwiawi ni sohte arail pali.

Sounkomouro ketin mwahngiher mwomwen pepehm en sopohla—E iangehr. Ni ah seri, Sises oh Sapwellime peneinei sopohla Isip pwehn tangasang mwersuwed en pahn Erod. Oh nan pwungen Sapwellime doadoahk en padpadahk, E kin lellahng irair keper oh aramas men kemehla, E lao lohdi pahn aramas mwersuwed me koasoanehdi en kamakamala. Eri, ihme e kapwuriamwei ki ong kitail me E kin kapwkapwurehiong padahk duwen kitail en poakpene, limpoak duwehte Ih, poakohng mehn mpatail kan duwehte atail kin poakohng pein kitail. Mehlel, “lamalam mehlel oh mwakelekel mwohn Koht oh Sahmo, iei, pwarek me sepwoupwou oh liohdi kan nan ar apwal” ⁶ oh “kilangalahng me semwemwe oh anahn kan, oh apwaliala.”⁷

E inenen sair ie en dehdeki dahme towe en mwomwohdiso kan en sampah kisakis sapan pwehn sewese aramas oh peneinei pwukat me lohdiehr pahn apwal laud. Ahpw mehlel nan Europe, I kilangadahr tohn Mwomwohdiso wet tohto me kehn kansenamwahu oh kamarain nan palingenarail ni arail mwekid pahn arail ineng en sewese oh papah irail me ahneki anahn laud. Mwomwohdiso wet kaunopadahr arail wasahn keiru kan oh epwelparail ni palien roson. Steik kan oh misin kan wiadahr kidin ehdin dipwisou anahn kan. Steik teikan kaunopada kenerail mwenge oh nimarail pihl, ar likou, sekid, wararail pwaisikel, pwuhk, backpack, aiklahs, oh soangsoang kei.

Mie aramas sang Scotland kolahng Sisily me kihda soangsoangen sawas. Toahkte oh nurse kei kin kisakise arail ahnsou oh kin tuhwong aramas sopohla kan wasa me re kin peidi ie ni arail wusekisek, pou oh masapwekadahr mwurin arail kotehla madau. Ni ahnsou me aramas pwuko tepida mour kapw, tohn Mwomwohdiso wet en wasao sewesewesei irail en esehla lokaian sahpw kapwo, a ekei kin en kamarahrada nohno pahpa oh neirail serkan ni ar pahn kihong irail mehn mwadong, pwuhk en mahlen, koul oh soang kei. A mie ekei me wahlahng irail dereht, dikek oh koahr, oh re kaskuhlih irail amimono.

Towe mah kan en Mwomwohdiso wet me kakaun oh papahkiehr sounpahr tohto pahn kadehdehki me doadoahk en sewese aramas sopohla pwukat me inenen wad mehlel oh katapan nan arail ahnsou en papah leledo met.

Ke anahne kilangki pein mesomwen pwehn kamehlele irair pwukat. Nan ahnsoun kopou, I tuhwong lih liseian men me kohsang Syria nan ehu wasahn keiru ong aramas sopohla kan. Liho pwunodadahr pwehki e sohte men neitikdi pohn taht lemwulemwur nan ihmw me e kekeiru ie. Nan Syria Ih emen sounpadahk nan university. A nan wein Greece I lokaiong peneinei ieu me wusekisek te, pouhdahr oh masapwek sang arail seiloak nan kisin pwoat sang Turkey. Mwurin te ai kilang nan pwoarenmasarail ko oh ahpw rong arail soi duwen ar sopohsang mour keper oh arail seiloak kamasapwek, e kawekala ai mour.

Mie kiden soangsoangen aramas poadidi me kikihda sawas, a tohtohn irail kin kisekise arail ahnsou. I kilangadahr mwekid en emen tohn Mwomwohdiso wet, erein sounpwong kei, e kin doadoahk lel nihpwong, apwahpwalih anahn kan en irail me apwtehn peidi sang Turkey oh Greece. Nanpwungen pwukoa tohto me e kin wia, lih menet kin apwaliala me keieu soumwahu oh luwet, e kin apwalih lih akan oh neirail seri kan me seiloak kelehpw, oh e kin koaloalamwawhuih irail me tohn arail peneinei mehla nan arail seiloak, oh e wia uwen me e kak koaros pwehn sewesekin irail mehn sawas akan me sohte itar. Ih oh aramas ngeder me duwehte ih, wialahr tounleng kei me sohte pahn monokonokala rehrail me re apwalih, Kauno pil sohte pahn monokeirailla nan sapwellime doadoahk me re wiewia.

Koaros me toumeteikihla pein irail pwehn sewese me lokolok kan me kapilirailpene duwehte irail me iangala Alma: “Eri, nan arail paiamwahu, re sohte kin kapwure mehmen me kilisou, de me menmwengedahr, de me menimpihl, de me soumwahu, de me luwetalahr; … re kadek ong koaros, me mah oh me pwulopwul, me sensel oh me saladek, ohl oh lih, mendahte ar tohn mwomwohdiso wet de soh, nin duwen arail sohte kin lipilipilki aramas duwen arail anahn.”⁸

Kitail anahne kanahiong pwe rohngen aramas me sopohsangehr nan apwal de wiahla rohng me solahr kapwuriamwei, pwe kitail nohn ahnlahr, ahpw mahwen kan wiewiawi te oh peneinei kan wie kokohdo te. Aramas sopohlahr ngedehrie nin sampah, me kitail solahr rong duwe, kin anahnehte sawas.

Ma kumwail pahn peidengki, “Dahme I kak wia?” kitail en tamataman me kitail sohte pahn papah ahpw sohte apwalih atail peneinei oh pwukoa teikan,⁹ oh kitail sohte pahn kasik atail sounkaweid kan pahn koasoanehdi atail doadoahk en sawas. Ahpw emenemen kitail de peneinei kan, kak iangala doadoahk en sawas wet.

Mwurin pekpek ngidingid sang Presedensi Keieu en patehng doadoahk en Kauno pwehn sewese aramas me sopohsanger nan apwal wasa koaros nin sampah,¹⁰ presedensi lap kan en Pwihn en Sawas en Lih, Peinakapw kan, oh Praimeri koasoanehdi mwekid en sawas kadaniki “Ngehi Mehn Keiru Men.” Sister Burton pakairki ong lih en Mwomwohdiso wet nan wihk samwalahro nan tiepenen lih. Mie soangsoangen iren madamadau oh kaweid duwen sawas me dierek nan IWasAStranger.lds.org.

Medewe duwen mehkot me kak wiawi kerenih kumwail, nan pein amwail kohsapw kan, wasa me kumwail kak diar ie aramas me anahne sawas en ahnla arail irair kapw. Me keieu kesempwal nan doadoahk en papah koaros, ong aramas me anahn me iei en sewesei irail en pwuralahng mour doadoahk oh uhtohr.

Uwen soangsoangen sawas me kitail kak sawaski me sohte irepe. Elemwein ke kak sewese me sopohla kan en esehla lokaian wasa re mih ie, ren koahiekla nan doadoahk, de kaiahnki ahnsoun kapeidek nan repen doadoahk. Ke kak kaiahne peneinei ehu de emen nohno ni pelien tiahk kapw. Nan ekei ward oh steingkan mieier pwihn kan me re kin patehng sawaspene. Oh, nin duwen amwail kak, lapalahn sawas me kumwail kak sawaskihda nan mwekid en sawas en Mwomwohdiso wet.

Emen emen kitail kak kalaudehla uwen me kitail wehwehki duwen irair en sampah kan me karehiong peneinei kat en sopohla. Kitail en dehr uhpalihki aramas oh kitail en utung wahu oh wehwe duwen wekpesengen tiahk en wehi kan. Ma ke tuhwong peneinei kan oh pein rong arail soai kan oh sohte wadek te duwe, e pahn seweseiuhk en ahneki pepehm en limpoak ohng irail oh ineng en sewese irail en soandi nan mour kapw.

Kauno pahngokihong kitail me steik en Saion kan pahn wia wasahn “poadoandoar” oh “wasahn rukala sang melimel.” ¹¹ Kitail diarehr wasahn rukala ie. Kitail en pedoilahsang atail wasahn silasil mwahu kan oh ahpw ehukihong aramas, koapworopwor, pwoson Koht oh riatail kan, oh limpoak pwehn kilang daulih wekpeseng en aramas kilangalahng mehlel lingano me kitail koaros Sapwellimen Koht serikan.

“Pwe Koht sohte ketkihong kitail ngehn en masak, ahpw en manaman, oh limpoak.”¹²

Wie emen aramas me sopohsangehr nan apwal pahn kawekala arail mour, ahpw arail sopohlahr sohte pahn kawehwe ihs irail. Duwehte kiden aramas mwohrail, mwekid wet—pahn wia kisehn arail mour erein ahnsou kis. Ekei irail pahn wiahla aramas wadawad mehlel, sounpapah nan koperment, toahkte, scientist, soun koul de keseng, soun mahlen, sounkaweid en pelien lamalam, oh wia arail koahiek nan doadoahk teikan. Mehlel, me tohtohn irail wiahier soang pwukat mwohn ar luhssang mehkoaros. Irair wet sohte pahn kawehwe ihs irail, ahpw dahme kitail wia pahn kawehwe ihs kitail.

“Mehlel I indahieng kumwail, mehkot kumwail wiahiong emen, riei me tikitik pwukat, ih me kumwail wiahiong ie.”¹³ Ni mwaren Sises Krais, amen.

Ong ire teikan, tehk IWasAStranger.lds.org oh mormonchannel.org/blog/post/40-ways-to-help-refugees-in-your-community.