Saib Nej tus Kheej Nyob Hauv lub Tuam Tsev
Kuv thov kom peb txhua tus yuav hwm tus Cawm Seej thiab hloov txhua yam peb yuav tsum hloov kom saib peb tus kheej nyob hauv Nws lub tuam tsev dawb huv.
Qhov uas tus Tswv txoj kev cawm seej mus tom ntej nyob hauv lub caij nyoog uas muaj txhij txhua ntshe peb tsis to taub qhov no loj npaum li cas.1 Piv txwv hais tias Thawj Tswj Hwm Thomas S. Monson tshaj tawm tias yuav muaj 4 lub tuam tsev tshiab nyob hauv tuas no. Thaum lawv hu Thawj Tswj Hwm Monson ua ib tug Thwj Tim thaum xyoo 1962, tsuas muaj 12 lub tuam tsev nyob thoob plaws lub ntiaj teb.2 Tom qab tau muab lub Tuam Tsev Provo City Center fij tseg, muaj 150 lub tuam tsev lawm, thiab yuav muaj 177 lub tom qab muab txhua lub tuam tsev fij tseg. Qhov no ua rau peb txo hwj chim zoo siab.
Ib puas yim caum xyoo tas los, thaum hnub no, lub Plaub Hlis Ntuj hnub tim 3, 1836, tus Yaj Saub Yauxej Xamiv thiab Oliver Cowdery ua yog toog pom ib qho zoo kawg nkaus nyob hauv lub Tuam Tsev Kirtland. Twb muaj li no ib lub lim tiam tom qab muab lub tuam tsev ntawd fij tseg. Nkawd ua yog toog pom tus Tswv sawv rau ntawm lub sam thiaj nyob hauv lub tuam tsev. Tus Cawm Seej tau hais tej no hais tias:
Kom neb tej kwv tij tej siab ntsws cia li xyiv fab, thiab kom tag nrho kuv cov neeg tej siab cia li xyiv fab, cov tau los txhim tsa lub tsev no nrog lawv lub zog rau tus Tswv lub npe.
Vim saib seb, tus Tswv tau txais yuav lub tsev no, thiab tus Tswv lub npe yuav nyob ntawm no; thiab Nws yuav ua Nws tus kheej tshwm sim los rau Nws cov neeg los ntawm txoj kev hlub tshua rau hauv lub tsev no.3
Thaum lub sij hawm dawb ceev no, cov yaj saub thaum ub tshwm sim, tsis hais Eliyas los yog, uas muab cov yuam sij uas yuav tsum muaj kom ua tau cov kab ke hauv lub tuam tsev.
Peb paub me ntsis txog qhov uas tib neeg zoo siab kawg vim muaj lub tuam tsev nyob hauv Quito, Ecuador; Harare, Zimbabwe; Belém, Brazil; thiab Lima, Peru, tsis hais cov mej zeej thiab cov tub txib los yog, raws li tej uas muaj los nyob hauv Bangkok, Thaib Teb, ib xyoo tas los thaum tshaj tawm tias yuav ua lub tuam tsev ntawd. Muam Shelly Senior, tus poj niam ntawm qhov chaw tshaj tawm txoj moo zoo Thailand Bangkok tus thawj tswj hwm thaum ntawd, David Senior, tau xa email rau tsev neeg thiab phooj ywg hais tias tom qab Thawj Tswj Hwm Monson tshaj tawm yuav ua lub tuam tsev ntawd, lawv “tsis tau tsaug zog tau 12 teev thiab quaj thiab muaj kev zoo siab ntawd.” Lawv hu lawv cov pab cuam hauv qhov chaw tshaj tawm txoj moo zoo thaum 11:30 tsaus ntuj thiab qhia lawv. Cov pab cuam tau hu tag nrho cov tub txib. Lawv rov qab ceeb toom hais tias “txhua tus hauv qhov chaw tshaj tawm txoj moo zoo twb sawv thiab dhia saum lawv tej txaj.” Muam Senior tso dag qhuab ntuas nws tsev neeg thiab phooj ywg hais tias, “Thov tsis qhov qhia Koom Haum Saib Xyuas cov Tub Txib!”4
Cov mej zeej nyob hauv Thaib Teb kuj zoo siab kawg. Kuv yeej paub hais tias tau muaj kev tshwm sim los saum ntuj los thiab tus Ntsuj Plig tau npaj neeg lub siab thiab tsev neeg ntawm Haiv Neeg Ntseeg nyob hauv tej qhov chaw uas yuav ua tej lub tuam tsev no.
Muam Senior, nyob Thaib Teb, tau ua ib co iav me me kom nws qhia tau lwm tus, qhov tseem ceeb yog cov ntxhais txib. Muaj ib lub tuam tsev uas kos rau ntawm daim iav uas muaj cov lus no “Saib Nej tus Kheej Nyob Hauv lub Tuam Tsev.” Thaum tib neeg ntsia daim iav, lawv pom lawv tus kheej nyob hauv lub tuam tsev. Txwj Laug thiab Muam Senior qhia cov uas kawm txog txoj moo zoo thiab cov mej zeej kom lawv saib lawv tus kheej nyob hauv lub tuam tsev thiab hloov lawv lub neej thiab npaj ntawm sab ntsuj plig kom ua raws li lub hom phiaj no.
Tag kis no kuv xav kom peb txhua tus, txawm peb nyob qhov twg los, saib peb tus kheej nyob hauv lub tuam tsev. Thawj Tswj Hwm Monson hais tias: “Txog rau thaum koj tau mus hauv tus Tswv lub Tsev thiab txais yuav txhua yam koob hmoov uas nyob rau hauv ces, koj yeej tsis tau yuav txhua yam uas lub Koom Txoos muaj. Tej koob hmoov uas tseem ceeb thiab zoo tag nrho rau ib tug mej zeej hauv lub Koom Txoos yog tej koob hmoov uas peb txais hauv Vajtswv cov tuam tsev ntag.”5
Txawm tsis muaj kev ncaj ncees ntau nyob hauv lub ntiaj teb niaj hnub nim no los, peb nyob hauv ib lub caij nyog dawb huv. Cov yaj saub, uas muaj siab hlub, tau piav txog peb lub caij nyoog txij thaum ub los lawm.6
Tus Yaj Saub Yauxej Xamiv, uas hais txog ib nqe nyob hauv Aunpadiyas7 nyob hauv Phau Qub thiab 1 Petus8 nyob hauv Phau Tshiab, hais txog Vajtswv lub hom phiaj ntawm kev cai raus dej rau cov neeg tuag thiab kev cia peb ua neeg cawm seej nyob saum lub Roob Xi-oos.9
Tus Tswv yeej ua rau peb cov neeg vam meej thiab muab kev pab thiab cov yaj saub tej kev coj kom peb thiaj yuav muaj peev xwm ua peb tej lub luag hauj lwm hauv lub tuam tsev rau cov neeg ciaj thiab cov neeg tuag.
Vim muaj Yexus Khetos txoj moo zoo, peb thiaj to taub lub ntsiab ntawm lub neej no, Leej Txiv txoj kev cawm seej rau Nws cov me nyuam, tus Cawm Seej txoj kev txhiv dim, thiab lub luag hauj lwm ntawm tsev neeg nyob saum ntuj ceeb tsheej.10
Vim rau qhov peb muaj ntau lub tuam tsev thiab muaj txuj ci technology zoo heev uas pab peb ua raws li peb lub luag hauj lwm nrhiav peb tsev neeg zaj keeb kwm kom pab peb cov poj koob yawm txwv lub caij nyoog no yeej zoo tshaj txhua lub caij. Kuv zoo siab vim peb cov tub hluas ntxhais hluas rau siab txheeb xyuas lub npe thiab nrhiav lawv cov poj koob yawm txwv ces lawv cia li ua hauj lwm hauv lub tuam tsev muab lawv cov poj koob yawm txwv ua kev cai raus dej thiab ua kev pom zoo. Nej yeej yog ib feem ntawm cov neeg cawm seej nyob saum lub Roob Xi-oos.
Peb Yuav Ua Li Cas Npaj Mus rau lub Tuam Tsev?
Peb paub hais tias kev ncaj ncees thiab kev ua kom dawb huv yeej yog ib feem ntawm kev npaj ua rau lub tuam tsev.
Phau Lus Qhuab Qhia thiab Kev Khi Lus tshooj 97 hais tias npaum li tus Tswv cov neeg yuav ua ib lub tsev los rau Nws los ntawm Nws lub npe, thiab tsis txhob pub ib yam dab tsi tsis huv los mus rau hauv, kom lub tuam tsev tsis txhob qias, ces Nws lub yeeb koob yuav nyob rau hauv.11
Mus txog thaum xyoo 1891 tus Thawj Tswj Hwm ntawm lub Koom Txoos tau sau npe rau txhua daim ntawv tso cai nkag tuam tsev kom pov hwm lub tuam tsev txoj kev dawb huv. Ces tau muab txoj hauj lwm ntawd rau cov npisov thiab ceg txheem ntseeg cov thawj tswj hwm.
Peb yeej xav kom cov mej zeej ntawm lub Koom Txoos yuav ua neej tsim nyog muaj ib daim ntawv nkag lub tuam tsev. Thov tsis txhob xav tias lub tuam tsev yeej yog ib lub hom phiaj uas nej ua tsis tau. Yog cov mej zeej nrog lawv tus npisov tham, feem ntau yeej tsis tas siv sij hawm ntev kom ua tau txhua yam kev ncaj ncees lawv yuav tsum ua yog tias lawv mob siab xav ua neeg tsim nyog thiab hloov siab lees txim rau lawv tej kev txhaum tag nrho. Peb yeej yuav tsum zam txim rau peb tus kheej thiab tsis txhob xav tias tej yam uas peb ua yuam kev los yog peb tej kev txhaum ua rau peb tsis tsim nyog nkag mus hauv ib lub tuam tsev tas mus li.
Tus Cawm Seej txoj Kev Theej Txhoj yeej yog rau txhua tus ntawm Vajtswv cov me nyuam. Nws txoj kev txhiv dim yeej them tus nqi ntawm txoj kev txim lij rau txhua tus uas hloov siab lees txim tiag tiag. Cov vaj lug kub piav txog qhov no hais tias:
“Txawm yog nej tej kev txhaum yuav liab cuag ntshav los kuv yuav ua kom dawb paug li daus.”12
“Thiab kuv yuav tsis nco ntsoov txog tej ntawd ntxiv lawm.”13
Peb hais tseeb rau nej hais tias kev ua raws li cov ntsiab cai ncaj ncees yuav ua rau nej thiab nej tsev neeg muaj kev zoo siab, kev txaus siab thiab kev kaj siab lug.14 Cov mej zeej, tsis hais cov laus thiab cov hluas los yog,15 pom zoo tias lav tsim nyog thaum lawv teb cov lus nug kom tau ib daim ntawv tso cai nkag tuam tsev. Qhov tseem ceeb yog qhov uas peb zaj lus tim khawv muaj zog hais txog Vajtswv Leej Txiv; Nws Leej Tub, Yexus Khetos; thiab kev muab Nws txoj moo zoo txum tim rov qab los thiab txais tus Vaj Ntsuj Plig Dawb Huv tej kev tshoov siab.
Cov Koob Hmoov Los ntawm lub Tuam Tsev Yeej Muaj Ntau Heev
Cov koob hmoov ntawm lub tuam tsev uas tseem ceeb tshaj yog cov kab ke tsa nto. Txoj moo zoo yeej pab tau peb txais kev tsa nto thiab qhia kom peb ua raws li tej kev khi lus nrog Vajtswv. Tshuav kev cai raus dej thiab kev pom zoo xwv, cov neeg ciaj ua cov kab ke thiab kev khi lus no nyob hauv lub tuam tsev. Cov neeg tuag txais tau cov kab ke cawm seej thiab tej kev khi lus tag nrho nyob hauv lub tuam tsev.
Brigham Young qhia hais tias, “Tsis muaj ib yam dab tsi uas tus Tswv ua tau kom cawm tib neeg uas nws tsis tau ua; … txhua yam uas yuav ua tau kom pab cawm lawv, tshuav tej uas lawv yuav tsum ua xwb, mas tus Cawm Seej twb ua txhua yam lawm.”16
Lub Koom Txoos cov thawj coj txhim tsa ceg txheem ntseeg, pawg ntseeg, tej pawg, lub Koom Txoos koom haum pab, tej qhov chaw tshaj tawm txoj moo zoo, li ntawd nyob hauv peb tsev teev ntuj. Tus Tswv tsa cov tsev neeg mus ib txhis nyob hauv cov tuam tsev xwb.
Peb paub tseeb tias cov uas muaj lub siab mob thiab lub siab xav ua zoo uas tau hloov siab lees txim tiag tiag los tus Tswv pom zoo rau lawv nyob hauv Nws lub tsev dawb huv.17 Peb paub tias “Vajtswv tsis xaiv leej twg ntsej muag.”18 Ib qho uas muaj nqi heev uas kuv nyiam txog lub tuam tsev yog qhov uas tsis muaj ib yam dab tsi qhia tias cov uas mus haud muaj nyiaj npaum li cas, muaj npe los yog txoj hauj lwm dab tsi. Vajtswv pom tias peb txhua tus sib npaug zos. Txhua tus hnav khaub ncaws dawb ua lub cim qhia tias peb yog ib co neeg dawb huv thiab ncaj ncees.19 Txhua leej txhua tus zaum ua ke xav ua Leej Txiv Saum Ntuj Ceeb Tsheej cov tub thiab cov ntxhais tsim nyog.
Cia li xav txog qhov no hais tias, nyob thoob plaws lub ntiaj teb cov poj niam thiab cov txiv neej muaj peev xwm “rov qab mus nyob tau ntawm Vajtswv lub xub ntiag thiab … nyob tau ua ke mus ib txhis li [dhau los ntawm] tej kab ke dawb ceev thiab tej kev khi lus uas muaj hauv tej tuam tsev dawb huv.”20 Ua tau li no nyob hauv chav ua kev sib khi uas zoo nkauj thiab dawb ceev rau txhua tus mej zeej uas tsim nyog nkag hauv lub tuam tsev. Tom qab lawv ua tej kev khi lus no, lawv yuav “saib lawv tus kheej nyob hauv lub tuam tsev” ob daim iav uas sib pom tau. “Nyob ua ke ob daim iav hauv lub tuam tsev ib daim ci rov tuaj rau ib daim zoo li mus ib txhis li.”21 Cov duab hauv daim iav pab peb xav txog peb niam peb txiv, peb pog thiab yawg, thiab txhua tus uas poj koob yawm txwv. Cov duab no pab peb paub txog tej kev khi lus dawb ceev uas muab peb txuas rau txhua tiam neeg tom qab. Nov yog ib qho tseem ceeb heev, thiab qhov no yuav pib thaum nej saib nej tus kheej nyob hauv lub tuam tsev.
Thawj Tswj Hwm Howard W. Hunter ntuas kom peb “xav txog tej lus qhia zoo kawg nyob hauv zaj thov Vajtswv muab lub Tuam Tsev Kirtland fij tseg, ib zaj lus thov uas tus Yaj Saub Yauxej Xamiv hais tias nws tau txais los ntawm kev tshwm sim. Yog ib zaj lus thov uas Vajtswv tseem teb rau peb txhua tus, rau peb tsev neeg, thiab rau peb cov neeg vim tus Tswv tau muab Nws lub hwj chim pov thawj hwj rau peb siv nyob hauv Nws cov tuam tsev dawb huv.”22 Tsim nyog uas peb kawm tshooj 109 ntawm phau Lus Qhuab Qhia thiab Kev Khi Lus thiab ua raws li Thawj Tswj Hwm Hunter tej lus ntuas kom “tsa tus Tswv lub tuam tsev ua lub cim tseem ceeb ntawm [peb] txoj kev ua mej zeej.”23
Lub tuam tsev yog ib qho chaw rau peb txais kev pov hwm, ua Vajtswv tsaug, txais tej lus qhia, thiab kev to taub, kom peb yuav ua neeg zoo tag nrho ua txhua yam uas siv rau Vajtswv lub nceeg vaj nyob hauv ub ntiaj teb.24 Nyob tas kuv lub neej lub tuam tsev yeej yog ib qho chaw uas nyob kaj siab lug hauv ib lub ntiaj teb uas ntxhov hnyo.25 Yeej yog ib qho zoo uas peb tso tej kev txhawj ntawm lub ntiaj teb tseg nyob hauv lub tsev dawb huv ntawd.
Ntau lub sij hawm nyob hauv lub tuam tsev thiab thaum peb ua tsev neeg zaj keeb kwm, peb txais kev tshoov siab los ntawm tus Vaj Ntsuj Plig Dawb Huv.26 Tej lub sij hawm nyob hauv lub tuam tsev daim ntaub thaiv uas nyob nruab nrab peb thiab cov uas tau tas sim neej no nyias nyias heev. Peb txais tau kev pab ntxiv kom ua neeg cawm seej saum lub Roob Xi-oos.
Ob peb xyoo tas los nyob hauv ib lub tuam tsev nyob Central America, tus poj niam ntawm ib tug Tuam Thawj Coj uas tam sim no tau tso nrog kev hawm, nws pab ib tug txiv tsev, niam tsev, thiab nkawd cov me nyuam txais tej kev khi lus mus ib txhis nyob hauv ib chav ua kev cai sib khi uas muaj ob daim iav. Thaum lawv xaus kab ke thiab saib ob daim iav ntawd, nws pom ib lub ntsej muag nyob hauv daim iav uas tsis nyob hauv chav ntawd. Nws cia li nug tus niam tsev thiab kawm tias ib tug ntxhais tau tso lub ntiaj teb no tseg es nws thiaj tsis nyob. Ces tau muab ib tug neeg sawv cev rau tus ntxhais uas xiam lawm ua txoj kab ke dawb huv ntawd.27 Tsis txhob xav tias nej yuav tsis txais kev pab nyob hauv lub tuam tsev los ntawm cov uas tau tas sim neej no lawm.
Thov cia li paub tias peb yeej xav kom txhua tus hloov tej yam lawv yuav tsum hloov kom tsim nyog mus rau hauv lub tuam tsev. Thov Vajtswv seb nej lub neej zoo li cas, nrhiav tus Ntsuj Plig txoj kev coj, thiab nrog nej tus npisov tham txog kev npaj nej tus kheej mus rau hauv lub tuam tsev. Thawj Tswj Hwm Thomas S. Monson hais tias, “Tsis muaj ib lub hom phiaj tseem ceeb dua txoj kev rau siab ntso ua kom koj yuav ua neeg tsim nyog mus rau hauv lub tuam tsev.”28
Tus Cawm Seej “Yog tus Ncej Tag Khov Kho ntawm Peb txoj Kev Ntseeg thiab Nws lub Koom Txoos”
Ob lub hlis tas los kuv tau muaj cib fim koom nrog Thawj Tswj Hwm Henry B. Eyring muab lub Tuam Tsev Suva Fiji rov qab fij tseg. Yog ib lub sij hawm tshwj xeeb thiab dawb ceev. Thawj Tswj Hwm Eyring txoj kev ua siab loj thiab tej kev tshoov siab tau pab peb rov qab muab lub tuam tsev no fij tseg txawm muaj cua daj cua dub loj tshaj plaws nyob hauv lub ntiaj teb sab qab teb. Cov tub hluas ntxhais hluas, cov tub txib, thiab cov meej zeej tau txais kev pov hwm ntawm sab cev nqaij daim tawv thiab sab ntsuj plig.29 Yeej paub tias tus Tswv tau coj lawv kev. Txoj kev muab lub Tuam Tsev Suva Fiji rov qab fij tseg yeej yog ib qho chaw tiv thaiv kom tsis raug cua daj cua dub. Ntau lub sij hawm thaum peb raug tej cua daj cua dub ntawm lub neej no, peb pom tus Tswv txhais tes pov hwm peb.
Lub sij hawm uas tau muab lub Tuam Tsev Suva Fiji fij tseg thaum lub Rau Hli Ntuj hnub tim 18, xyoo 2000 los yeej zoo heev. Thaum yuav luag ua lub tuam tsev tiav lawm, muaj ib co uas txeeb teb chaws txhom cov mej zeej ntawm tsev tsoom kwv. Lub nroog Suva, Fiji raug kub hnyiab thiab raug tub sab nyiag khoom. Pawg tub rog tshaj tias lawv kav teb chaws.
Vim kuv yog Cheeb Tsam tus Thawj Tswj Hwm, kuv nrog plaub ceg txheem ntseeg tus thawj tswj hwm nyob hauv Fiji thiab nrog cov thawj tub rog tham nyob hauv tsev tub rog Queen Elizabeth. Tom qab peb piav tias peb xav muab lub tuam tsev fij tseg, lawv txhawb nqa peb thiab tiam sis txhawj txog Thawj Tswj Hwm Gordon B. Hinckley. Lawv xav kom peb ua ib txoj kev fij tseg me me xwb es tsis ua dab tsi nyob lub tuam tsev sab nraud, xws li kab ke tso tus ncej tas. Lawv hais tias leej twg uas nyob lub tuam tsev sab nraud ntshe yuav raug xwm txheej.
Thawj Tswj Hwm Hinckley pom zoo kom ua ib tuas muab fij tseg me me nrog lub tuam tsev pawg thawj tswj hwm thiab ob peb tus thawj coj hauv zej zog xwb; tsis tau caw lwm tus tuaj vim ntshai tias yuav muaj xwm txheej. Tiam sis, nws cia li hais tias, “Yog peb muab lub tuam tsev fij tseg, peb yeej yuav tsum ua kab ke tso tus ncej tas vim Yexus Khetos yog tus ncej tas, thiab nov yog Nws lub Koom Txoos.”
Thaum peb mus sab nraud kom ua kab ke tso tus ncej tas, yeej tsis muaj leej twg xws li cov uas tsis yog mej zeej, cov me nyuam, cov qhia xov xwm, los sis lwm tus nyob. Tiam sis ib tug yaj saub uas rau siab ntseeg qhia tias nws ua siab loj thiab yeej tso siab rau tus Cawm Seej.
Ib yam li Thawj Tswj Hwm Hinckley hais txog tus Cawm Seej hais tias, “Tsis muaj leej twg zoo npaum li Nws. Yeej tsis tau muaj. Yeej yuav tsis muaj. Ua Vajtswv tsaug vim Nws muab Nws Tib Leeg Tub rau peb, tus uas tau txo Nws txoj sia kom peb yuav muaj txoj sia thiab tus uas yog tus ncej tag khov kho ntawm peb txoj kev ntseeg thiab Nws lub Koom Txoos.”30
Cov kwv tij thiab cov muam, kuv thov kom peb txhua tus yuav hwm tus Cawm Seej thiab hloov txhua yam peb yuav tsum hloov kom saib peb tus kheej nyob hauv Nws lub tuam tsev dawb huv. Yog peb ua li ntawd, peb yuav ua kom muaj raws li Nws lub hom phiaj thiab npaj peb tus kheej thiab peb tsev neeg kom txais tag nrho cov koob hmoov uas tus Tswv thiab Nws lub Koom Txoos foom pub rau peb hauv lub neej no thiab mus ib txhis. Kuv ua tim khawv hais tias tus Cawm Seej muaj txoj sia nyob. Los ntawm Yexus Khetos lub npe, amees.