Lo Eok Make ilo Tampeļ eo
Ij jar bwe kōj kajjojo naaj kautiej Rilo̧mo̧o̧r eo im kōm̧m̧an jabdewōt oktak ko remenin aikuj n̄an “n̄an lo kōj make ilo tampeļ ko An rekwojarjar.”
Karōk in lo̧mo̧o̧r eo an Irooj ej dāpil m̧aanļo̧k ilo tarlep in tōre in bōk eddo in an iien ko enan̄in pen kōmeļeļeik.1 En̄in ennaan eo jān Būreejtōn Thomas S. Monson ilo an kwaļo̧k 4 tampeļ ko rekāāl ilo kweilo̧k in eļap. Ke Būreejtōn Monson eaar kūr āinwōt juon Rijilōk ilo 1963, eaaar wōr wōt 12 tampeļ ko raar jerbal ilo laļin.2 Ippān ļo̧k aje eo ilo Provo City Center Temple eo, enaaj wōr kiiō 150, im enaaj wōr 177 n̄e aolep tampeļ ko kar kwaļo̧ki naaj aji. Menin ekōm̧m̧an bwe jen lan̄lōn̄.
Jibukwi ralitōkn̄oul iiō ko rem̧oot ļo̧k, ilo rainin, Eprōļ 3, 1836, juon visōn ekabwilōn̄lōn̄ eaar waļo̧k n̄an Rikanaan Josep Smith im Oliver Cowdery ilo Kirtland Temple. Menin eaar waļo̧k juon wiik ālkin aje eo an tampeļ eo. Ilo visōn in raar lo Irooj ej jutak ioon tulōn̄ in jikin kwaļo̧k naan eo ilo tampeļ eo. IIubwilijin men ko jet, Rilo̧mo̧o̧r eaar kwaļo̧k:
“Būruōn aolep armej ro Aō ren m̧ōņōņō, ro rekar, kōn maron̄ eo aer, kalōke m̧wiin n̄an eta.
“Bwe lo, Iaar bōke m̧wiin, im Eta enaaj pād ijin; im Inaaj kwaļo̧k Eō make n̄an armej ro Aō tūriam̧o ilo m̧wiin.”3
Ilo iien in ekwojarjar, rikanaan ro etto raar waļo̧k, ekoba Ilija, eo eaar liļo̧k kii ko raorōk n̄an kain̄i ko an tampeļ.
Ewōr unin ad m̧ōņōņō bwe enaaj waļo̧k ilo Quito, Ecuador; Harare, Zimbabwe; Belém, Brazil im tampeļ eo kein karuo ilo Lima, Peru jim̧or ippān membōr ro im mijenede ro pedped wōt ioon ta eo eaar waļo̧k ilo Bangkok, Thailand, juon iiō emoot ļo̧k ke tampeļ jab in kar kōjjeļļā kake. Sister Shelly Senior, kōrā eo ippān mijen būreejtōn eo ilo Thailand Bangkok Mission, David Senior, eaar email ļo̧k baam̧le eo im ro m̧ōttāer im ba ke ālkin an Būreejtōn Monson kōjjeļā kōn tampeļ eo, eaar wōr “12 awa in jab kiki im dānin kōm̧jaļļaļ kōn m̧ōņōņō.” Raar kūr ļo̧k assistant mijinede ro ilo 11:30 bon̄ im kōnnanōk er. Assistant ro raar kūr ļo̧k aolep mijinede ro. Innām ripoot eo eaar bar ro̧o̧ltok im kwaļo̧k ke “aolepen mijen eo raar ruj ilo lukon bon̄en eo im keto-ketak ioon jikin kiki ko aer.” Sister Senior eaar kijerjer in karon̄ ļo̧k baam̧le im ro m̧ōttāer, “Jouj im jab ba n̄an Missionary Department eo!”4
Uwaak eo ippān membōr ro ilo Thailand eaar lukkuun kajoor. Ijeļā eaar wōr kōppopo ilo jetōb ilo bōro ko im im̧ōko im loļo̧k ko jān lan̄ kōpooj Rikwojarjar ro ijo tampeļ kein rekāāl kar kōjjeļļā kaki naaj jutak ie.
Sister Senior, ilo Thailand, ewōr jet kūlaaj ippān kōm̧m̧an jen pā n̄an katak ko an make, eļaptata ippān sister ro. Ewōr juon kūlaaj āinļo̧k wōt juon tampeļ kōn naan kein, “Lo Eok Make ilo Tampeļ.” Ke armej ro rej kalimjōk kūlaaj eo, rej lo er make ilo tampeļ eo. Senior ro raar katakin rikatak ro im membōr ro n̄an pijaik er make ilo tampeļ eo im kōm̧m̧ani oktak in mour ko rekkar im jetōbin keppopo ko n̄an tōpar kōttōpar in.
Jibadbad eo aō jibbon̄in ej n̄an kōj kajjojo, jekdo̧o̧n ia eo jej pād ie, n̄an lo kōj make ilo tampeļ eo. Būreejtōn Monson eaar kwaļo̧k: “Mae iien eo em̧ōj am̧ deļo̧n̄ im̧weo im̧ōn Irooj im m̧ōj am̧ bōk aolep kōjeram̧m̧an ko me rej kōttar kwe, kojjan̄in bōk aolep men ko Kabun̄ in ej aikuj lewaj. Kōjeram̧m̧an ko aolep-raorōk im utiej tata n̄an membōr in Kabun̄ in rej aolep kōjeram̧m̧an ko jej būki ilo tampeļ ko an Anij.”5
N̄an kabwe mour jim̧we ilo laļ in rainin, jej mour ilo juon tōre, ekwojarjar. Rikanaan ro, kōn bōro ko rej iakwe im iuwade, kar kōmeļeļeik raan ko ad ium̧win epepen ko.6
Rikanaan Josep Smith, eaar jim̧or kōnono jān Obadaia7ilo Kallim̧ur Mokta im 1 Piter8 ilo Kallim̧ur Ekāāl, kile jibadbad eo eļap an Anij n̄an kōm̧m̧ani peptaij ko n̄an ro remej im kōm̧m̧an bwe jen rilo̧mo̧o̧reņ ro ilo Toļ Zaion.9
Anij eaar kōjeram̧m̧an armej ro ad im kar leļo̧k menin jipan̄ ko im Kanaan bwe jen maron̄ peran in etal n̄an tampeļ n̄an ad bōk iien em̧m̧an im jerbal n̄an ro nukur jim̧or remour im remej.
Kōn jepļaaktok in gospel eo an Jisōs Kraist, jej meļeļe jibadbad eo an mour in, karōk in lo̧mo̧o̧r eo an Jemed n̄an ro Nejin, kōn en̄taan eo an Rilo̧mo̧o̧r, im bwe baam̧le ko rej unjen doulul eo ilo lan̄.10
Koba in ļap ļo̧k eo an oran tampeļ ko im kein kapeel ko raan kein rem̧m̧an n̄an kakūrm̧ool eddo ko ad rekwojarjar an menmenbwij an baam̧le n̄an rūtto ro ad ekōm̧m̧an bwe menin en iien eo ejeram̧m̧an tata ilo aolep bwebwenato. Ij m̧ōņōņō kōn tiljek eo ekabwilōn̄lōn̄ an jodikdik ro nejid rej kōm̧m̧an jerbal in indexting im pukot ro nukuier innām kōm̧m̧ane jerbal in peptaij im kapene eo ilo tampeļ. Kom̧ij rilo̧mo̧o̧reņ ro ilubwiljin ro kar kanaan kaki ilo Toļ Zaion in.
Ewi Wāween Ad Kōppopo n̄an Tampeļ?
Jej jeļā bwe mour jim̧we im wānōk rej m̧ōttan wōt kōppopo eo n̄an tampeļ.
Ilo Katak in Bujen ko jekjōn 97, ej riit, “Im toun wōt an armej ro Aō kalōk juon em̧ n̄an Eō ilo etan Irooj, im jab kōtļo̧k jabdewōt men ettoon n̄an itok, bwe en jab ettoonon, Aō aiboojoj enaaj pād ioon.”11
M̧ae 1891 eo Būreejtōn eo an Kabun̄ in eaar jaini kajjojo peba in mālim an tampeļ n̄an kōjparok kwojarjar eo an tampeļ. Innām eddo in kar maron̄ leļo̧k n̄an bisop ro im stake būreejtōn ro.
Ej ad ikdelel eļap bwe membōr ro an Kabun̄ naaj mour erreeo kōn juon peba in mālim an tampeļ. Jouj jab lo tampeļ eo āinwōt etto ļo̧k im bōlen eban menin kōttōbar. Jerbal ippān bisop eo aer, elōn̄ wōt membōr remaron̄ tōpar aolep jim̧we remenin aikuji ilo juon tōre eo ekadu eļan̄n̄e ewōr kije ippāer n̄an kakōrbōb im lukkuun ukweļo̧k jān bōd ko aer. Menin ekoba kōnaan joļo̧k ad make bōd im jab ioon jab wānōk im jerawiwi ko ad āinwōt an jab kakōrbab kōj jān deļo̧n̄e tampeļ eo ekwojarjar.
Pinmuur eo an Rilo̧mo̧o̧r eaar kōm̧m̧an n̄an aolep ro nejin Anij. En̄taan in pinmuur eo an ej kapolel kajjitōk ko ikijeen ekajet eo n̄an aolep ro rej m̧ool in ukweļo̧k. Jeje ko rej kwaļo̧k wāween in eaiboojoj:
“Men̄e bōd ko ami rej āinwōt būrōrō, renaaj mouj āinwōt sno.”12
“Im I ban bar keememej jero̧wiwi ko [aer].”13
Kōm̧ij jiron̄ kom̧ bwe mour jim̧we kōn pedped kein naaj bōktok kom̧ im baam̧ļe eo ami m̧ōņōņō, lan̄lōn̄, im aenōm̧m̧an.14 Membōr ro, jim̧or rūtto im dik,15 rej kōweppān er make ilo aer uwaaki kajjitōk ko ilo peba in mālim an tampeļ eo. Mennin aorōk eo ej n̄an kōļapļo̧k naan in kam̧ool eo an kōn Anij Jemed; Nejin, Jisōs Kraist; im Jepļaaktok eo an gospel eo An im en̄jake jerbal eo an Jetōb Kwojarjar eo.
Kōjeram̧m̧an ko ilo Tampeļ
Lukkuun kōjeram̧m̧an ko an tampeļ rej kain̄i ko an jikin eo eutiejtata. Karōk in gospel eo ej kōn mour indeeo im kitbuuj kōm̧m̧ani im kōjparok bujen ko rekwojarjar ippān Anij. Ijeļo̧kin peptaij im kapene, kain̄i im bujen kein rej kōm̧m̧an im waļo̧k ilo tampeļ eo n̄an remour. N̄an ro remej, aolep kain̄i ko an lo̧mo̧o̧r im bujen ko rej waļo̧k ilo tampeļ eo.
Brigham Young eaar kwaļo̧k, “Ejjeļo̧k juon men me Irooj emaron̄ kar kōm̧m̧ane n̄an lo̧mo̧o̧ren aolep armej me en kar m̧akoko in kōm̧m̧ane; … bwe aolep men raar dedeļo̧k kōn lo̧mo̧o̧r eo aer make, eaar dedeļo̧k jān Rilo̧mo̧o̧r eo.”16
Ritōl ro an Kabun̄ in rej ejaaki stake ko, ward ko, doulul ko, radik ko an Kabun̄, mijen ko, im ko jet ilo im̧ōnjar ko ad im m̧ōnjar ko jet. Irooj ej ejaaki baam̧le ko indeeo ilo tampeļ ko wōt.
Elukkuun alikar ro ewōr bōro erub im jetōb ettā ippāer ro rej lukkuun ukweļo̧k jen jero̧wiwi ko aer rej ro rej lukkuun deļo̧n̄e ļo̧k m̧weo imōn Irooj Ekwojarjar.17 Jej jeļā “Anij ejjab kalijekļo̧k.”18 Juon iaan men ko rem̧m̧an ippa kōn tam̧peļ eo ej bwe ilubwiljin ro rej pād jekdo̧o̧n m̧weiie, bun̄bun̄, ak jabdewōt kain jerbal rot. Jej aolep juon wōt im̧aan Anij. Aolep rej nuknuk mouj n̄an kalikkar bwe jej erreeo im armej ro rewānōk.19 Aolep rej jijet iturin doon kōn juon ikdelel ilo būruweer n̄an ļaddik im jiron̄ ro rerreeo nejin Jemedwōj Ilan̄ eo ej iakwe.
Baj ļōmņak m̧ōk, ilo aolepen laļin kōrā ro im em̧m̧aan ro remaron̄ būki “kain̄i ko im bujen ko rekwojarjar wōt ilo tampeļ ko rekwojarjar … im jepļaakļo̧k n̄an ippān Anij … ippān doon indeeo.”20Rej kōm̧m̧ane menin ilo juon ruum̧ in liāp eo ekwojarjar n̄an aolep membōr ro rej erreeo. Ālkin aer deļo̧n̄e bujen kein, remaron̄ “lo er make ilo tampeļ” ilo kūlaaj ko rej jit n̄an doon. “Ippān ļo̧k kūlaaj ko ilo tampeļe rej kwaļo̧k indeeo eo ejjeļo̧k jem̧ļo̧kin.”21 Pija kein rejipan̄ kōj ro jinen im jemen, ro jibun im jim̧aan, im aolep epepen ko m̧okta ļo̧k. Rej jipan̄ kile bujen ko rekwojarjar me ekakobaikļo̧k kōj n̄an aolep epepen ko rej itok. Menin ej juon kabwilōn̄lōn̄ eļap, ej ijjinoe n̄e “kwoj lo eok make ilo tampeļ eo.”
Būreejtōn Howard W. Hunter eaar kapilōk kōj n̄an “kōļmenļo̧kjeņ kōn katak ko raorōk ilo jar in aje eo eļap ilo Kirtland Temple, juon jar me Rikanaan Josep Smith eaar ba kar letok n̄an e kōn revelesōn. Ej juon jar me ej wōnm̧aanļo̧k wōt n̄an uwaaki iood wōj kajjojo, bwe ilo kōj āinwōt baam̧le ko, im bwe ilo kōj armej kōn priesthood kajoor eo an Irooj kar letok n̄an kōj ilo tampeļ ko An rekwojarjar.”22 Emaron̄ em̧m̧an ļo̧k ad kōm̧m̧ane im ekkatak kake ilo jekjōn 109 in Katak im Bujen ko kon̄an ļoor kapilōk eo an Būreejtōn Hunter “n̄an kajutak tampeļ n̄an Irooj āinwōt juon menin kōkaļļe in [ad] member.”23
Tampeļ ej barāinwōt juon jikin kone, kam̧m̧oolol, katakin, meļeļe, im “ilo aolep men ko rej ekkejelļo̧k n̄an aelōn̄ in Anij.”24Ilo aolepen mour e aō tampeļ eaar juon jikin eaenōm̧m̧an im inem̧m̧an ilo juon laļ eo me elukkuun in eanjiwiwi.25Elukkuun em̧m̧an n̄e jej likūt aolep men ko an laļin ilik n̄an men eo ekwojarjar.
Ilo tampeļ ekkā ilo ad bōk kūņaad ilo family history research, jej en̄jake im̧we ko im bōk tōl ko jān Jetōb Kwojarjar.26Ilo tampeļ, ron̄ōl nuknuk eo kōtaad im ro ilo turājet eo juon ej dikļo̧k. Jej bōk jipan̄ ļo̧k ilo kijejeto ko ad āinwōt rilo̧mo̧o̧ren ro ilo Toļ Zaion.
Jejjo iiō ko rem̧ootļo̧k ilo juon tampeļ ilo Central America, kōrā eo pāleen juon Ritōl Eutiej ekar jipan̄ juon baba, m̧am̧a, im ajri ro nejier bōk bujen ko n̄an indeeo ilo ruum̧ in liāp eo, ijo kūlaaj in tampeļ ko rekar pād ie. Ke rej dedeļo̧k im jitļo̧k n̄an kūlaaj ko, eaar kile bwe ewōr juon māj ilo kūlaaj eo me ejjab pād ilo ruum̧. Eaar kajjitōk kōn jinen im jeļā bwe ļaddik eo nejin eaar mej im kōnke eaar jab pād. Leddik eo emej eaar maron̄ in pād ilo liāp in kain̄i eo ekwojarjar.27 Jab keidi jipan̄ eo kar kōm̧m̧ane ilo tampeļ ko kōn ro rej pād ilo turājet eo juon.
Jouj im jeļā ewi jon̄an ad ikdelel bwe kajjojo ren kōm̧m̧an jabdewōt oktak ko rekkar n̄an karbab n̄an tampeļ. Lukkuun etale ia eo kopād ie ilo mour eo am, pukot tōl eo an Jetōb, im kōnono ippān bisop eo am̧ n̄an kepooj eok make n̄an tampeļ. Būreejtōn Thomas S. Monson eaar ba, “Ejjeļo̧k juon kōttōbar eļap ļo̧k n̄an am jerbale erreeo eo am n̄an etal n̄an tamepl.”28
Rilo̧mo̧o̧r eo ej “Dekā In Jabōn Em̧ eo Eļap an Tōmak eo ad im Kabun̄ eo An”
Eaar aō iien em̧m̧an n̄an bōk kūņaō ippān Būreejtōn Henry B. Eyring ilo aje eo an Suva Fiji Temple ruo allōn̄ rem̧ootļo̧k. Eaar lukkuun em̧m̧an, im ekwojarjar. Peran eo an Būreejtōn Eyring im kajoor in jetōb eo an ekar kōm̧m̧an aje eo en wōnm̧aanļo̧k wōt men̄e ļan̄ eo ekajoor tata im kein kajuon ilo Southern Hemisphere. Kōjparok ko ilo ānbwiin im jetōb raar leļo̧k n̄an jodikdik ro, mijinede ro, im membōr ro.29 Pein Irooj eaar lukkuun menin kam̧ool. Aje eo an Suva Fiji Temple eaar juon jikin kone jān ļan̄ eo. Ekkā ad ioon ļan̄ ko an mour, jej kam̧ool pein Irooj ilo an letok kōjparok ko indeeo.
Lukkuun aje eo an Fiji Suva Temple ilo Juun 18, 2000, eaar barāinwōt kabwilōn̄lōn̄. Ke ej epaak an dedeļo̧k tampeļ eo, ro uwaan kien eo raar bōk er jān jet doulul ko renana. Downtown Suva, Fiji, ekar til. Ritariaņe ro raar kalikkar kien eo.
Āinwōt juon Eria Būreejtōn, Iaar loļo̧k emen stake būreejtōn ro ilo Fiji im kar ioon ritōl in ritariņae eo ilo Queen Elizabeth barracks. Ālkin am̧ bwebwenato kōn wāween aje eo, raar errā ak raar lukkuun n̄ūrbōktak kōn kōjparok eo an Būreejtōn Gordon B. Hinckley. Raar kōņaan kōm̧m̧ane juon aj eo edik im ejjeļo̧k ikkure inam̧ōjin tampeļ eo, āinwōt kōjeram̧m̧an eo an jeban dem̧an eo. Raar kwaļo̧k n̄an ro aolep inam̧ōjin tampeļ eo ke enaaj menin kauwōtata.
Būreejtōn Hinckley eaar kōmālim m̧wen̄an aje eo ippān wōt tampeļ būreejtōnji eo ekāāl im jet ritōl ro; ejjeļo̧k en kar kūr tok er kōnke ekauwōtata. Ijoke, eaar kwaļo̧k naan in, “Eļan̄n̄e jej aje tampeļ in, jenaaj aikuj kōjeram̧m̧an dekā in jabōn em̧ in kōnke Jisōs Kraist ej dekā in jabōn em̧ eo eļap, im en̄in ej Kabun̄ eo An.”
Ke kōm̧ij dewōj nam̧ōjļo̧k n̄an kōjeram̧m̧an dekā in jeban em̧ eo, eaar ejjeļo̧k ro uwaan kabun̄ in, ajri, media, ak ro jet kar pād. Bōtaab juon rikanaan etiljek eaar kwaļo̧k peran eo an im kallim̧ur eo an edim n̄an Rilo̧mo̧o̧r.
Tokālik Būreejtōn Hinckley, kōnono kōn Rilo̧mo̧o̧r eo, ekar ba: “Ejjeļo̧k juon maron̄ keidi n̄an E. Em̧ool ejamin wōr. Em̧ool eban wōr. Kam̧m̧oolol Anij kōn menin letok eo kōn Nejin Jitenbōro Emake Wōt, eo Eaar letok mour eo an bwe jen maron̄ mour im e eo ej jeban, dekā in jeban em̧ in ad tōmak im Kabun̄ in An.”30
Ro jeiū im jatū, ij jar bwe kōj kajjojo naaj kautiej Rilo̧mo̧o̧r eo im kōm̧m̧an jabdewōt oktak ko remenin aikuj n̄an “n̄an lo kōj make ilo tampeļ ko An rekwojarjar.” N̄an kōm̧m̧ane āindein, jej maron̄ kadedeļo̧k jibadbad ko An rekwōjarjar im kepooj kōj make im baam̧le ko ad n̄an aolep kōjeram̧m̧an ko an Irooj im Kabun̄ in An maron̄ litok ilo mour in im indeeo. Ij kwaļo̧k aō kam̧ool ejenolo̧k bwe Rilo̧mo̧o̧r ej mour. Ilo etan Jisōs Kraist, amen.