Medeweiuhk nan Tehnpas Sarawi
I kapakapki me emen emen kitail pahn wauniki Soundoro oh wekidala dahme konehng rehtail pwe kitail en kak kilang pein kitail nan Sapwellime tehnpas sarawi.
Kohkohpesengen sapwellimen Koht pilahn en komour nan irair en kaimwiseklahn ahnsou pwukat me inenen lap.1 Met e sansal sang ni atail Preseden Thomas S. Monson ah wia sapwellime pakair duwen tehnpas sarawi kapw 4 nan kapokon wet. Nan pahr 1963, ni ansou me Preseden Thomas S Monson pilipildahr pwe en wiahla emen wahnparon, tehnpas sarawi te 12 nin sampah.2 Mwurin tehnpas sarawi en Provo City Center eh kasarawihila, met mie meh 150, oh pahn mie meh 177 ni ansou me tehnpas sarawi koaros me pakairdahr pahn kasarawihla. Met e kohneng kitail en perenkihda.
Ni Eiprel 3, 1836, sounpar epwiki welisek samwahlahro, kaudial ieu kohieng Joseph Smith oh Oliver Cawdery nan Tehnpas Sarawi en Kirkland. Met wihk ehu mwurihsahngete arail kasarawihiala tehnpas sarawio. Nan kaudiahl wet ira kilangada Kauno ah ketiket pohn tehpel kohl nan tehnpas sarawio. Soun Komouro mahsanih:
”Mweidohng mohngiong en sapwellimei aramas koaros en perenda, me sang ni arail kehl koaros, kauwada tehnpas wet ni edei.
”I kupwuredahr tehnpas wet, oh edei pahn ketiket loale; oh I pahn ketkihiong pein ngehi rehn aramas kan ni mahk nan tehnpas wet.”3
Nan irair sarawi wet soukohp en mahsoko pwarada iangahki Elijah,,me ketkihda kihn wia tiahk sarawi kan nan tehnpas sarawi.
Kitail ekis wehwehki duwen pereperen me wiewiawi nan Quito, Ecuador; Harare, Zimbabwe; Belém, Brazil; oh Lima, Peru, koaros towe kan oh misineri kan, pwehki e pahn duwehte dahme wiawi nan Bangkok, Thailand, sounpar ehu samwalahro, ni ansou me arail tehnpas sarawio pakairdahu. Sister Shelly Senior, me pwoudki mission presedent en Thailand en ahnsowo, David Senior, ni ansou me e e-mail peneinei oh koampoakepah kan mwurin Presedent Monson ah pakairkidahr kamanaman lahn arail tehnpas sarawi, mie me “sohte meirki awa 12 pwehki arail peren.” Re eker neira misineri riemeno me kin sewese presedento kulock 11:30 ni pwohng pwe ren indahng ira. Me riemeno uhd kalelehki misineri koaros. Re uhd repwohtkido me misineri pwohn wie pepehd ansouo oh lusuluski arail peren ki rohng wet!”4
Pali ngehn en souleng en Thailand pwukat uhdahn kehlail. I ahneki koapworopwor me kounopadahn pali ngehn nan mongiong oh ihmw kan en souleng pwukat kin kohdidohsang nan nanlehng pwehn kaunopadahng irail rohng en tehnpas sarawi pwukat.
Sister Senior, nan Thailand, ahneki kisin kilahsen irongin ohng mehn kaweid pein ih. Ni ansou me aramas pahn kilahng long nan kisin kilahs en irongin pwukat re kak kilahngada pein irail nan tehnpas sarawio oh nting me nda: “Medeweiuk nan Tehnpas Sarawi.” Seniors ko kin padahngki me sounroporop kan oh towe kan anahne en medemedewei irail nan tehnpas sarawio oh wiahda soahng koaros me pahn wekidala mwomwen arail pahn momour ni paliwar oh pali ngehn pwehn kounopda en lel mwo ehu rahn.
Ahi pekpekohng emenemen kiatil menseng wet, sohte lipilipil ia wasa kitail mihmi ie, kitail en konopdahng kitail en kolahng nan tehnpas sarawi. Presedent Monson mahsanih, ”ke pahn lau pidelohng nan tehnpas sarawi oh alehdi soaghngen kapai koaros loale, ke ahpw pahn inda me ke alehdier soahng koaros me Mwomwohdiso wet pahn kiheng uhk. Me keieu kesempwal nan kapai koaros ohng tohn Mwomwohdiso wet iei ih me ke pahn alehdi nan tehnpas sarawi.”5
Mendahte atail sohte kin pwung ansou koaros nan sampah wet, kitail momour ansou kesempwal, oh ansou sarawi. Soukohp limpoak kan kohkohpki atail mwehiet sangete mahs.6
Soukohp Johseph Smith, wadek sang pwuhken Obadaiah7 nan Kadehde Mering oh Peter8 nan Kadehde Kahpw, koaros koasoia wen kesempwal en Koht ah kin ketkihda pepdais en me mehlahr kan, pwehn mweidohng kitail en wiahla soun komour kei.9
Kauno ketin kupwurelahr sapwellime aramas akan oh ketkihieng irail soahng koaros oh pil kaweid en soukohp pwe kitail en kak warohng wia doadoahk en nan tehnpas sarawi ohng koaros me momour oh me mehlar akan.
Pwehki koapwurupwurdohn rohngamwahu en Sises Krais, kitail kak wehwehkilahr karepen atail mour, sapwellime pilahn en komour ohng sapwellime seri kan, sapwellimen Sounkomouro meriong lap, oh kesempwalpen peneinei ohng sapwellime pilahn wet.10
Kekeirdahn nempehn tehnpas sarawi oh pil patehng dipwsoun doadoahk kapwkan karehda keirdahn eden peneinei karehda met ah wia ansou kapai keieu laud nan poadopoad en sampah. I perenki neitail me pwulopwul kan ahr kin kak kairakdi oh rapahki eden arail peneinei kan oh pil wia arail pepdais oh kasarawih irailla nan tehnpas sarawi. Kumwail wia ekei soukomour me kohkop da pohn Nahna Saion.
Ia mwomwen atail pahn kounopdahng nan Tehnpas Sarawio?
Kitail wehwehki me mehlel oh mwakehlekel me keieu kesempwal ohng kounopdahng nan tehnpas sarawi.
Nan Doctrine and Covenants irelaud 97, mahsanih,”Nin duwen nei aramas akan pahn kauwada tehnpas ong ie ni mwaren Kauno, oh sohte pahn mweidohng mehkot me samin en kohdohng loale, pwe e deh kasaminehla, ahi klori pahn ketiket loale erein.11
Lau lel nan 1891 Presedent en Mwomwodiso me kin sainih kisinlikoun mweimwei en pidelong nan tehnpas sarawi koaros pwehn kak kolokol wahu en tehnpas sarwih kan. Pwukoha wet ahpw uhd kohieng bishop oh stake presedent kan.
E wia atail ineng laud me tohn Mwomwohdiso wet en kak warohng ale kisinlikoun mweimwei en pidelong nan tehnpas sarawi. Menlau kede medewe me tehnpas sarawi kan me nohn doh oh ke pahn sohte kak kohlahng ehu rahn. Sang ni arail pahn doadoahkpene rehn ahr bishop, palilaud en towe kan kak wia soahng pwung koaros mwurin ahnsou mwotomwot ma re pahn ngoahngki pwe ren kak warohng oh kolukihla diparail kan. Met iangahki kitail en kak pein mahkehng pein kitail oh sohte medewe atail luwet akan de dipatail kan me pahn kak karehda atail sohte pahn kak pedelohng nan tehnpas sarawi.
Tomw en Soukomouro wiawi pwehki sapwellmen Koht seri kan. Sapwellime tounmetei kak pwainla dipen koaros me uhdahn pahn koluhla mehlel. Nan pwuhk sarawio kin kawehwehda ia mwomwe:
”Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh.”12
”Oh I solahr pahn tamanda arail sapwung kan.”13
Se men kamehleleieng kumwail me momour ni pwung pahn wadohng kuwmail oh amwail peneineni peren,oh popohl.14 Towehkan, me mah oh pwulopwul koaros,15 kin kasalehda arail warohng ni ansou me re sapeng peidek kan en alehdi kisinlkioun mweimwei en pedelong nan tehnpas sarawi. Me keieu kesempwal me kitail anahne wia iei en kalaudehla atail pwoson Koht Sahm; Sapwellime Iehros, Sises Krais oh kopwurupwudohn rongamwahu wet oh kehn doadoahk en Ngehn Sarawi.
Kapahi en Tehnpas Sarawi kan me Tohto
Kapahi kan me keieu kesempwal nan tehnpas sarawi iei pwilisang tiahk sarawi en komourala kan.. Pilahn en rongamwahu wet e pid komourala oh patehng wiahda oh kapwaiada inou sarawi kan ohng Koht. Likin pepdais oh kasarawihala, tiahk oh inou sarawi pwukat kin wiawihda oh alahldi ong me momour nan tehnpas sarawi. Ah ong me mehla tiahk sarawi koaros pahn wiawi nan tehnpas sarawi.
Brigham Young padahngki me,”Sohte mehkot me sohte pweida pahn kupwuren Koht me pid komourlahn aramas, pwe soahng koaros me kak pweida ong ni komouralahn aramas, me tohrohr sang irail, e pweidahr sang rehn Sounkomouro.”16
Kaun en Mwomwohdiso kan kin wiahda steik oh ward kan, pwihn en priesthood oh, pwihn en utuht kan, misin kan de soahng teikan, nan atail ihmw sarawi kan de ihmw teikan. Kauno kin kauwada peneinei poatoapoat nan tehnpas sarawi kan.
E kin sansal me koaros me mohngiongirail kan ohlar de pali ngehn luwet me kolukilahr diparail kan uhdahn Koht pahn aleirailda nan tehnpese.17 Kitail ese me “Koht sohte ketin lipilipilki aramas.”18 Ih ehu me I pereniki nan tehnpas sarawi pwe koaros me kin doulohng loale duwepenehte. Koaros pahrek mwohn Koht. Koaros likou pwetepwet pwehn kasalehda me kitail koaros mwakelekel oh pwung.19 Koaros pil kin mwomwohdpenete wasa kis ni arail ahneki ineng en wia seri mwakelekel kei pahn kupwuren Koht.
Na song medewe ohl oh lih akan kak “momour pene kohkohlahte sang ni tiahk sarawi kan me kin wiawi nan tehnpas sarawi oh pwuralahng rehn Koht.”20 Re kin wia tiahk sarawi wet nan pere en katengetengpene kaselel kan me kin kohiehng koaros me kin warohng. Mwuri ah re ahpw pahn “kilanglohng ehng nan kilahs irongin me kin soupeipeneoh kilahngada pein irail nan tehnpas sarawio. “Kilahs pwukat pahn kasalehwei ngehnemw me ke sohte pahn kak kilahngada idi.”21 Met kin kak sewese kitail en tamanda atail peneinei, pahpa kalap oko oh nohno kalap oko oh irail mehn mahs oko. oh e pil sewese kitail en wehwehki inou kan me kitail wiahda ohng mehn mwuhr kan. Me wet inenen kesempwal, oh e kin tepkihda ahnsou me ke pahn medeweiuk nan tehnpas sarawi.
Preseden Howard W. Hunter mahsanihong kitail en “tamanda kapakap me soukohp Joseph Smith wia ni ah kasarawihiala tehnpas sarawi Kirkland, kapakap wet e alehdi sang ni kaudiahl. E wia kapakap ieu me kin sapengala emenenen kitail,atail peneinei, oh aramas kan pwe manaman oh mweimwei me Koht ketkidohng kitail en doadoahngki nan tehnpas sarawi.”22 E pahn mwahu ma kitail onopki Doctrine and Covenants irelaud 109 oh idawehn President Hunter ni ah masanih ”Kitail en wiaki tehnpas en Kauno kilelpen atail wia tohn Mwomwohdiso wet.”23
Tehnpas sarawi pil wia wasahn koamoahl, kaping, kaweid, oh “soahng koaros me pid wehin Koht nin sampah.”24 Nan ahi mour e wia wasahn kansenawmahu oh meleilei sang nan sampah pingiping wet.25 Uhdahn e wia mehkot mwahu atail kin kak pwilkihdi atail katoutou kan liki.
Pak tohto nan atail kin wia doadoahk en kadaurodo peneinei kitail kin kak kehn Ngehn Sarawi oh alehdi kaweid sang Ih.26 Ekei pak e duwehte me kitail kak kehn dahme wiewiawi palio nan sapwen me melahr akan. Kitail pil kin alehdi sawas ni atail doadoahk en wiahla soukoumour kei pohn Nahna Saion.
Pahr kei samwalahro nan tehnpas sarawi ieu en Central America, emen lih me pwoudiki emen Kaun Lapalap en Mwomwohdiso sewese ohl emen, ah pwoud oh neira seri ko ni ansou me re aliale inou sarawi kan nan perehn katengtengpene me kilahs en irongino mi loahle. Ansou me re nek oh kileng lahng nan kilahs ko e diarada me mie mesen emen nan kilahso me sohte patehng irail. E idek rehn lihio oh diarada me neira serepein men me mehla sohte iang patehng irail. Irail ale eden serepein mehlau oh pil katengteng ohng.27 Kumwail en dehr pwuriamweiki uwen sawas me kak kohsang palio nan tehnpas sarawi.
Menlau I men kumwail en ese wen aht inangih kumwail en nantihieng wekidekla oh warohng en pidolong nan tehnpas sarawi. Kumwail en kapakapki oh rapahkihda ia wasa kumwail mih ie nan amwail mour, idawehn Ngehno, oh tuhwong ohmw pisop pwe ken esehda ia mwomwen ahmw pahn kak kounopada kohla nan tehnpas sarawi. Thomas S Monson mahsanih ”sohte ehu doadoahk kesempwal duwehte ken kounopda en warohng en pidolong nan tehnpas sarawi.” 28
Sounkomouro me wia takain pwukakeimw en atail pwoson oh Sapwellime Mwomwohdiso.
I pil ahneki ansou mwahu en patehng President Henry B. Eyring ohng nan kasarawi sapahl en tehnpas sarawi en Suva Fiji sounpwohng riau samwahlahro. E uhdahn irair sarawi ieu. Pwehki President Eyring ah ahneki koapworopwor oh kamwekid kehlail en pali ngehn karehda tehnpas sarawio ah kasarawi sapahl pahn uselahte mendahte melimel kehlail wiewiawi wasao. Me pwulopwul kan, misineri oh towe kan silasildi mwahu ni paliwar oh palingehn.29 Nin limen Kauno inenen sansal. Kasarawi sapahl en Tehnpas Sarawi en Fiji wie perehre sang melimel. Pak tohto nan atail mour me kitail kin lelohng kahpwal Koht kin sewese kitail.
Tepin kasarawien tehnpas sarawi Suva, Fiji wiwia nan Suhn 18, 2000 pil kapwuriamwei. Ni ansou me tehnpas sarawio kereniong nek ekei arail tohn koperment kolkoldi pahn pwihn mwersuwed ieu. Aramas mwoarongda nan Pwosonkaun Suva, Fiji..Sounpei kan uhd kaunda wasa.
Ni ansouo me I wia ehria presendent, I iahngih stake presedent pahmen en Fiji oh kiht kohla tuweng kaun en sounpei ko.Ni ansou me se padahkiheng irail me se pahn kasarawiala tehpas sarawio, re uhdahn pwungki ahpw ihte re salohki ma Presedent Gordon B. Hinckley pahn lellahng kahpwal. Re peki sen dehr wia kemwekid en kasarawi likin tehnpas sarawio, duwehte kasarawi en takain pwukakeimw. Pwe re koasoia me mehmen me mih likin tehnpaso kak lohdiehng kahpwal.
Presedent Hinckley kamanahla ehu kisin kasarawih tikitik ohngte presedensi kapw en tehnpas sarawio oh ekei kaun kan en wasao, re sohte luke meteikan pwehki e keper. Ahpw e mahsanih,” Ma kitail pahn wia kasarawihn tehnpas sarawi wet, kitail pahn wia kasarawi en takain pwukakeimw pwe Sihses Krais me wia atail takain pwukakeimw, oh sapwellime Mwomwohdiso met.”
Ni ansou me se pidoieila likio oh wia kasarawihien takain pwukakeimw, en tehnpas sarawio, sohte me likin tohn Mwomwohdiso,sohte seri, wiliepen palien news de mehtei kan. Ahpw soukohp poadidi menet kasalehda ah kommwad oh loalopwoat mehlel ong atail Soukomouro.
Presedent Hinckley, ahpw koasoaia duwen Soukomouro,mahsanih, “sohte me pahrek ieng Ih. Sohte douluhl. Kalahngan ong Koht pwehki kisakis en sapwellime Iehros, me pwoukihla emenemen kitail pwe kitail en kak ale mour oh Ih me wia takain pwukakeimw en atail pwoson oh Sapwellime Mwomwohdiso.”30
Riei ohl oh lih oko,I kapakapki me emenemen kitail pahn wauneki sapwellimen Sounkomouro pwoulahu oh wekila sang soang kan koaros me sohte mwahu pwe kitail en kak kolahng nan tehnpas sarawi. Ma kitail pahn wia met, kitail pahn kapwaiada sapwellime tiahk sarawio oh kak kaunop pein kitail oh atail peneinei kan ong kapai kan me Koht oh sapwellime Mwomwohdiso pahn ketkihieng kitail nan mour wet oh pil kohkohlahte. I kadehde me Sises Krais ieias. Ni mwaren Sises Krais amen.