Vaai ia Oe Lava ia i totonu o le Malumalu
Saunia e Elder Quentin L. Cook
O Le Korama a Aposetolo e Toasefululua
Ou te tatalo o le a taitoatasi i tatou ma faamamaluina le Faaola ma faia soo se suiga talafeagai ia “vaaia ai i tatou lava i totonu o Ona malumalu paia.
O le taavale atu i luma o le ata o le faaolataga a le Alii i lenei tisipenisione o le atoaga o taimi ua toetoe lava sili atu nai lo le mea e malamalama i ai se tagata.1 Ua faaalia lenei mea i le faasilasilaga a Peresitene Thomas S. Monson o malumalu fou e 4 i lenei sauniga o le konafesi. Ina ua valaauina Peresitene Monson o se Aposetolo i le 1963, e 12 malumalu na faaaogaina i le lalolagi.2 Faatasi ai ma le faapaiaga o le Malumalu o Provo City Center, ua 150 ua i ai nei, ma o le a 177 pe a faapaiaina malumalu uma ia ua faasilasila atu. O se mafuaaga lenei mo i tatou ia olioli faamaualalo ai.
I le selau valusefulu tausaga ua tea, i lenei lava aso, 3 Aperila, 1836, na tatala ai se faaaliga ofoofogia i le Perofeta o Iosefa Samita ma Oliva Kaotui i le Malumalu o Katelani. Na tupu lenei mea i le faatoa mavae o le vaiaso e tasi o le faapaiaga o lena malumalu. I lenei faaaliga sa la vaai ai i le Alii o tu i luga o le siofatafata o le pulelaa i le malumalu. Faatasi ai ma isi mea, sa tautino mai e le Faaola:
“Ia olioli loto o o oulua uso, ma ia olioli loto o lo’u nuu uma, o e na latou fausia lenei fale i lo’u igoa, ma lo latou malosi.
“Aua faauta, ua Ou talia lenei fale, ma o le a i ai iinei lo’u igoa; ma o le a Ou faaali atu a’u lava i lo’u nuu i lenei fale i le alofa mutimutivale.”3
I lena mea paia na tupu, na faaali mai ai perofeta anamua, e aofia ai Elia, lea sa faaee maia ki e manaomia mo sauniga o le malumalu.
Ua tatou maua sina lagona o le olioli o loo tupu i le taimi nei i Quito, Ekuatoa; Harare, Zimbabwe; Belém, Pasila; ma Lima, Peru, i tagata ma faifeautalai, pe a fua atu i le mea na tupu i Bangkok, Tailani, i le tausaga ua te’a ina ua faasilasila atu lena malumalu. Sa imeli Sister Shelly Senior, le faletua o le peresitene o le Misiona o Tailani Bangkok i lena taimi, o David Senior, ma tau atu i aiga ma uo ina ua uma ona faalogo ia Peresitene Monson o faasilasila lena malumalu, e “12 itula sa le momoe ai ma le tele o loimata o le fiafia” sa tulai mai. Sa la valaau atu i a la fesoasoani o le misiona i le 11:30 p.m. ma tau atu ia i latou. Na valaau atu ia fesoasoani i faifeautalai uma. Na toe oo mai le lipoti faapea sa “feala le misiona atoa i le tuneva o le po ma tuupuna i luga o o latou moega.” Na lapatai atu ma le malie Sister Senior i aiga ma uo, “Faamolemole aua le tauina i le Matagaluega a Faifeautalai!”4
Sa faapena foi le malosi o le tali atu faaleagaga o tagata o le ekalesia i Tailani. Ou te mautinoa na i ai ni sauniuniga faaleagaga i loto ma aiga faapea ai ma ni faaaliga mai le lagi ia sauniaina le Au Paia i nofoaga o le a faatutu ai nei malumalu faatoa faasilasilaina.
Na i ai ia Sister Senior, i Tailani, ni faaata feaveai faapitoa na faia e faaaoga mo ana aoaoga patino, aemaise ma tamaitai. Sa i ai se malumalu na mamanuina i le faaata o i ai upu, “Vaai ia Oe Lava ia i totonu o le Malumalu.” A o sioa atu tagata i le faaata, sa latou vaaia i latou lava i totonu o le malumalu. Sa aoao e le au Seniors tagata sailiili ma tagata o le ekalesia ia vaai faalemafaufau ia i latou lava i totonu o le malumalu ma faia ni suiga talafeagai o le olaga ma ni sauniuniga faaleagaga e ausia ai lenei sini.
O la’u lu’i i lenei taeao e mo i tatou taitoatasi, po o fea lava o tatou nonofo ai, ia vaai atu ia i tatou lava i totonu o le malumalu. Na saunoa Peresitene Monson: “Seiiloga lava e te ulu atu i le Maota o le Alii ma maua faamanuiaga uma o loo faatalitali mai mo oe iina, e te le mauaina lava mea uma o loo ofoina atu e le Ekalesia. O faamanuiaga taua uma ma sili ona maualuga o le avea ai ma tagata o le Ekalesia, o faamanuiaga na tatou te maua i malumalu o le Atua.”5
E ui i le le lava o le amiotonu i le lalolagi i le aso, ae o loo tatou ola i se taimi paia. Sa faamatalaina e perofeta, o e loto alolofa ma naunautai o tatou aso mo le tele o seneturi.6
Na sii uma mai e le Perofeta o Iosefa Samita le Opetaia7 i le Feagaiga Tuai ma le 1 Peteru8 i le Feagaiga Fou, ma faailoa mai le faamoemoega sili o le Atua i le sauniaina o le papatisoga mo e ua maliliu ma faatagaina i tatou e avea ma faaola i le Mauga o Siona.9
Na faauluolaina e le Alii o tatou nuu ma saunia punaoa ma le taitaiga faaperofeta ina ia mafai ai ona tatou lotototoa i le faia o o tatou tiutetauave o le malumalu mo e o soifua ma e ua maliliu.
Ona o le talalelei toefuataiina a Iesu Keriso, ua tatou malamalama ai i le faamoemoega o le olaga, le ata o le faaolataga a le Tama mo Ana fanau, le taulaga togiola a le Faaola, ma le matafaioi autu o aiga i le faatulagaga o le lagi.10
O le tuufaatasiga o le faateleina o fuainumera o malumalu ma tekinolosi fou e faataunuu ai o tatou tiutetauave paia o talafaasolopito o aiga mo o tatou tuaa, ua avea ai lenei mea ma taimi sili ona faamanuiaina i le talafaasolopito atoa. Ou te olioli i le tulagaese o le faamaoni o a tatou talavou i le faavasegaina o igoa ma le sailia o o latou tuaa ma faia galuega o le papatisoga ma le faamauga i le malumalu. O outou moni lava o faaola na valoia i le Mauga o Siona.
E Faapefea ona Tatou Saunia mo le Malumalu?
Ua tatou iloa o le amiotonu ma le faapaiaina o ni vaega taua lea i le sauniaina mo le malumalu.
I le Mataupu Faavae ma Feagaiga vaega 97, e faitauina, “Ma o le tulaga e oo i ai e lo’u nuu ona fausia se fale mo a’u i le suafa o le Alii, ma latou le tuua se mea eleelea e sau i ai i totonu, ina ia le faaeleeleaina, o le a to’a ai i ona luga lo’u mamalu.”11
Seia oo mai i le 1891 na sainiina ai e le Peresitene o le Ekalesia ia pepa faataga taitasi o le malumalu e puipuia ai le paia o le malumalu. Na faamatuu atu lena tiutetauave i epikopo ma peresitene o siteki.
O lo tatou naunautaiga sili o le ola lea o tagata o le Ekalesia ia agavaa mo se pepa faataga o le malumalu. Faamolemole aua nei vaai atu i le malumalu o se sini mamao ma masalo o se sini e le mafai ona ausiaina. O le galulue ai ma o latou epikopo, e mafai ai e le toatele o tagata ona ausia tulaga manaomia uma amiotonu i se taimi puupuu lava pe a i ai so latou naunautaiga ia agavaa ma salamo atoatoa i solitulafono. E aofia ai ii ma le naunautaiga ina ia faamagalo i tatou lava ma aua nei taulai atu i o tatou faaletonu po o agasala tatou te le agavaa ai e ulu atu i se malumalu paia.
Na faataunuuina le Togiola a le Faaola mo fanau uma a le Atua. Na faamalieina e Lana taulaga togiola ia manaoga o le faamasinotonu mo i latou uma o e ua salamo moni. Ua faamatala mai e tusitusiga paia lenei mea i se auala sili ona matagofie:
“E ui lava ina mumu ia e pei o le ie ulaula, e avea e pei o fulufulu mamoe.”12
“Ma ou le toe manatua [i latou].”13
Matou te faamautinoa atu ia te outou o le ola amiotonu i mataupu faavae o le a aumaia ia te oe ma lou aiga le fiafia, faamalieina, ma le filemu.14 O tagata o le Ekalesia, tagata matutua uma ma talavou,15 latou te faamaonia lo latou lava agavaa pe a latou tali i fesili o le pepa faataga o le malumalu. O le tulaga manaomia taua lava o le faateleina lea o la tatou molimau i le Atua le Tama; Lona Alo, o Iesu Keriso; ma le toefuataiga o Lana talalelei ma lagonaina le auaunaga a le Agaga Paia.
O Faamanuiaga o le Malumalu E Anoanoai
O faamanuiaga autu o le malumalu o sauniga ia o le faaeaga. O le fuafuaga a le talalelei e faatatau i le faaeaga ma e aofia ai le osia ma le tausia o feagaiga paia ma le Atua. Sei vagana ai papatisoga ma le faamauga o papatisoga, o nei sauniga ma feagaiga e faataunuuina ma mauaina i totonu o le malumalu mo e o soifua. Mo e ua maliliu, o sauniga ma feagaiga uma e mauaina i totonu o le malumalu.
Na aoao mai Polika Iaga, “E leai se mea e tasi e mafai e le Alii ona ia fai mo le faaolataga o le aiga o tagata ua ia teena e fai; … o mea uma e mafai ona faataunuuina mo lo latou faaolataga, e tutoatasi mai ia i latou, ua faataunuuina e le Faaola.”16
E faatulaga e taitai o le Ekalesia ia siteki, uarota, korama, ausilali o le Ekalesia, misiona, ma isi mea faapena i o tatou falesa ma isi fale. Ua na o totonu o malumalu e faatulaga ai e le Alii ia aiga e faavavau.
Ua manino lava o i latou ua i ai le loto momomo ma le agaga salamo o e ua salamo moni ia latou agasala ua taliaina atoatoa e le Alii i Lona maota paia.17 Ua tatou iloa “e le faailogaina tagata e le Atua.”18 O se tasi o mea taua ou te fiafia i ai e uiga i le malumalu o le le faailogaina lea e tagata o auai [i le malumalu] o oa, tulaga, po o tofiga o soo se ituaiga. Ua tutusa i tatou uma i luma o le Atua. E laei papae tagata uma e faailoa ai o i tatou o ni tagata mama ma amiotonu.19 E nonofo faatasi ma se naunautaiga i o latou loto ina ia avea ma atalii ma afafine agavaa o se Tama Faalelagi alofa.
Ia mafaufau, e mafai e tamaitai ma alii i le lalolagi atoa e ala i “sauniga paia ma feagaiga ua maua i malumalu paia … ona toe foi atu i le afioaga o le Atua ma … toe faatasia e faavavau.”20 Latou te faia lenei mea i se potu o faamauga matagofie ma paia o loo avanoa mo tagata agavaa uma o le malumalu. A uma ona latou ulu atu i nei feagaiga, o le a latou “vaai ia i latou lava i [faaata o] le malumalu” ia e faafesagai ma le tasi ma le isi. “O nei faaata o le malumalu e toe felafoai mai ai ni ata e foliga mai e alualu lava e oo i le faavavau.”21 O nei ata felafoai e fesoasoani ia i tatou e mafaufau ai i matua, matua matutua, ma tupulaga uma ua mavae. Latou te fesoasoani ia i tatou ia iloa ai feagaiga paia lea e faafesootaia i tatou i autupulaga e mulimuli mai. E matua taua lava, ma e amata, pe a e “vaai ia te oe lava i le malumalu.
Na fautuaina i tatou e Peresitene Howard W. Hunter ina ia “mafaufau i aoaoga maoae i le tatalo o le faapaiaga o le Malumalu o Katelani, o se tatalo na ta’ua e Iosefa Samita na tuuina atu ia te ia i se faaaliga. O se tatalo o loo faaauau ona tali mai i o tatou luga o ni tagata taitoatasi, i luga o i tatou o ni aiga, ma luga o i tatou o se nuu ona o le mana o le perisitua sa tuuina mai e le Alii ia i tatou e faaaoga i Ona malumalu paia.”22 O le a lelei ona tatou faia pe a suesueina le vaega e 109 o le Mataupu Faavae ma Feagaiga ma mulimuli i le apoapoaiga a Peresitene Hunter “e faatuina le malumalu o le Alii e fai ma faailoga sili o lo [tatou] auai i le ekalesia.”23
O le malumalu o se nofoaga foi o le sulufaiga, lotofaafetai, faatonuga, malamalama, “ina ia mafai ona faaatoatoaina [i tatou] … i mea uma e faatatau i le malo o le Atua i le lalolagi.”24 I lo’u olaga atoa ua avea [le malumalu] ma se nofoaga o le mamalu ma le filemu i se lalolagi o loo vavaō.25 O se mea matagofie le tuua o popolega o le lalolagi i tua o lena tulaga paia.
E masani ona tatou lagonaina i totonu o le malumalu ma ao tatou galulue punouai i le sailiga o talafaasolopito o aiga, ni uunaiga ma musumusuga mai le Agaga Paia.26 I lea taimi ma lea taimi i le malumalu, o le a amata ona matua manifinifi le veli i le va o i tatou ma i latou i le isi itu. Tatou te maua se fesoasoani faaopoopo i a tatou taumafaiga ina ia avea ma faaola i le Mauga o Siona.
I le tele o tausaga ua mavae i se malumalu i Amerika Tutotonu, sa fesoasoani ai se faletua o se tasi o a tatou Pulega Aoao ua faamaloloina ma le mamalu i se tama, se tina, ma le la fanau i le mauaina o feagaiga e faavavau i le potu o faamauga lea na i ai faaata o le malumalu. Ina ua faaiuina ma latou faasaga atu i na faaata, sa ia matauina se foliga i le faaata sa lei i ai i le potu. Sa ia fesili i le tina ma iloa ai o se tama teine na maliu ma sa lei i ai faaletino. Sa faaaofia le tama teine ua maliu e ala i le fai ma sui i le sauniga paia.27 Aua nei manatu faatauvaa i le fesoasoani e tuuina mai i totonu o malumalu mai le isi itu o le veli.
Faamolemole ia silafia lo tatou mananao ma le naunautai ina ia faia e tagata uma soo se suiga talafeagai ia agavaa ai mo le malumalu. Ia iloilo ma le agaga tatalo po o fea o e i ai i lou olaga, saili le taitaiga a le Agaga, ma talanoa i lou epikopo e uiga i le sauniaina o oe lava mo le malumalu. Sa saunoa mai Peresitene Thomas S. Monson e faapea, “E leai se isi sini e sili atu ona taua mo oe e te galue agai i ai nai lo le agavaa e alu i le malumalu.”28
O Le Faaola “O Le Maa Tulimanu Lē Mafaagaeetia o lo Tatou Faatuatuaga ma Lana Ekalesia”
Sa faamanuiaina a’u e auai faatasi ma Peresitene Henry B. Eyring i le toe faapaiaga o le Malumalu o Suva Fiti i le lua masina ua tea. O se sauniga faapitoa ma paia. O le lototele o Peresitene Eyring ma le uunaiga malosi faaleagaga na mafai ai ona faaauau le toe faapaiaga a o feagai ai ma le afa sili ona matautia ua faamaumauina i le Itulagi i Saute. Na tuuina atu ni puipuiga faaletino ma faaleagaga i le autalavou, faifeautalai, ma le au paia.29 Sa manino lelei le i ai o le aao o le Alii. O le toe faapaiaga o le Malumalu o Suva Fiti sa avea ma se malutaga mai le afa. E masani lava pe a afatia i tatou i afa o le olaga, tatou te molimauina le aao o le Alii o tuuina mai ni puipuiga e faavavau.
O le faapaiaga muamua o le Malumalu o Suva Fiti i le aso 18 Iuni, 2000, na ofoofogia foi. A o lata ina faamaeaina le malumalu, na ave faapagota ia sui o le palemene e se vaega o tagata fouvale. Sa faoa le taulaga o Suva, i Fiti, ma susunuina. Sa tautino atu e le militeli le puleaina faafitafita o le aai.
I le avea ai ma Peresitene o le Eria, sa matou o ai ma peresitene o siteki e toafa i Fiti ma feiloai ma taitai o le militeli i le nofoaga o Queen Elizabeth. Ina ua uma ona matou faamatala atu i ai le faapaiaga ua faamoemoeina, sa latou lagolagoina ae na popole i le saogalemu o Peresitene Gordon B. Hinckley. Sa latou fautuaina mai se faapaiaga laitiiti ma ia leai ni polokalama e faia i fafo o le malumalu, e pei o le sauniga o le maatulimanu. Sa latou faamamafa mai o soo se tasi lava e i fafo o le malumalu e ono avea ma se taulaiga faamoemoeina mo le faatupu vevesi.
Sa faatagaina e Peresitene Hinckley se sauniga laitiiti se tasi o le faapaiaga ma na o le au peresitene fou o le malumalu ma ni nai taitai i le lotoifale sa i ai; e leai nisi na valaaulia ona o le lamatia. Peitai, sa ia matua faamamafa mai, “Afai tatou te faapaiaina le malumalu, o le a tatou faia le sauniga o le maatulimanu aua o Iesu Keriso o le maatulimanu lea, ma o Lana Ekalesia lenei.”
Ina ua matou o i fafo mo le sauniga o le maatulimanu, sa leai ni tagata le lolotu, tamaiti, tagata faasalalau, po o nisi na auai. Ae sa faaalia e se perofeta faatuatua lona tuuto ma le lototele ma le mausali i le Faaola.
Mulimuli ane sa saunoa Peresitene Hinckley e uiga i le Faaola, “E leai se tasi e tutusa ma Ia. E lei i ai lava. O le a leai lava. Faafetai i le Atua mo le meaalofa o Lona Alo Pele, o lē na foaiina mai Lona soifua ina ia tatou ola, ma o Ia foi o le maatulimanu autu le mafaagaeetia o lo tatou faatuatuaga ma Lana Ekalesia.30
Uso e ma tuafafine, ou te tatalo o le a taitoatasi i tatou ma faamamaluina le Faaola ma faia soo se suiga talafeagai ia vaaia ai i tatou lava i totonu o Ona malumalu paia. O le faia o lea mea, tatou te mafai ai ona ausia Ona faamoemoega paia ma saunia i tatou lava ma o tatou aiga mo faamanuiaga uma a le Alii ma Lana Ekalesia ia e mafai ona tuuina mai i lenei olaga ma le faavavau. Ou te tuuina atu ai la’u molimau mautinoa o loo soifua le Faaola. I le suafa o Iesu Keriso, amene.