Stanap Wetem Ol Lida blong Jos

Mifala i talem bigfala welkam long ol niu Jeneral Atoriti, Eria Seventi mo gudfala Praemeri jeneral presidensi we oli jes singaotem olgeta. Mo mifala i talem bigfala tangkyu long olgeta we oli rilis. Mifala i lavem yufala.

Ol dia brata mo sista. Yumi jes tekpat long wan eksperiens we i blesem yumi taem yumi leftemap han blong yumi blong sastenem ol profet, sia, mo reveleta mo ol nara lida mo jeneral ofisa we God i singaotem long taem blong yumi. Mi neva tingting laet long janis blong sastenem mo kasem daereksen long ol wokman blong Lod. Mo wetem sam manis nomo long niufala koling blong mi olsem wan memba blong Kworom blong Olgeta Twelef Aposol, tingting blong mi i stap daon taem mi luk sastening vot mo tras blong yufala. Mi holemtaet strong insaed long hat blong mi, tingting ia blong yufala blong glad blong stanap wetem mi mo wetem evri gudfala lida ia.

Stret afta we oli sastenem mi long las Oktoba, mi travel i go long Pakistan, blong mekem wan wok mo taem mi bin stap longwe, mi mitim ol gudfala mo strong Sent blong kantri ia. Oli smol long namba, be bigwan long spirit. Afta we mi gobak hom, mi kasem leta blong Brata Sakil Arsad, wan gudfala memba mi mitim long visit blong mi: “Tangkyu Elda Rasban, blong kam long Pakistan. Mi wantem talem long yu se, mifala, ol memba blong Jos, i sapotem yu mo lavem yu. Mifala i laki tumas blong yu stap ia mo harem yu. I wan gol dei long famli laef blong mifala se mifala i mitim wan Aposol.”¹

Blong mitim ol Sent olsem Brata Arsad i wan gud eksperiens mo bae mi yusum toktok blong hem, i wan “gol dei” long mi tu.

Long Jenuware, ol lida blong Jos oli tekpat long Fes tu Fes wetem ol Yut, ol lida blong olgeta mo papa mo mama raon long wol. Brodkas ia i kamaot laef ova long Intanet long plante ples long 146 kantri; sam ples i gat bigfala grup long ol japel, mo sam nao oli stap long wan hom nomo wetem wan yut i joen. Total evriwan, ol taosen yut oli joen.

Pikja

Fes tu Fes wetem Elda Rasban, Sista Oskason, mo Brata Owen

Olgeta we oli joen wetem evriwan we oli lisin, i gat Sista Boni Oskason, Yang Woman jeneral presiden,; brata Stivens W. Owen, Yang Man jeneral presiden; mo mi— mo mifala i gat sapot blong ol yut ripresentativ, olgeta we oli plei miusik mo ol narawan—olgeta evriwan oli bin ansarem ol kwestin blong ol yut.

Pikja

2016 Stamba Toktok blong Miutuol

Stamba tingting i blong presentem stamba toktok blong Miutuol blong 2016, “Yufala I Mas Wokbaot Fored Wetem Strong Bilif long Kraes” we i kamaot long Seken Nifae, we i rid i go olsem: “From samting ia, yufala i mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man. From samting ia, sapos yufala i gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis.”²

Taem mifala i ridim plante handred kwestin blong ol yut, ?wanem nao mifala i lanem? Mifala i lanem se ol yut blong yumi oli lavem Lod, oli sapotem lida blong olgeta, mo oli wantem blong gat ansa long kwestin blong olgeta. Ol kwestin i wan saen se wan i wantem lanem moa, oli stap ademap save long ol trutok we oli save finis long testemoni blong olgeta, mo oli rere gud moa blong “wokbaot fored wetem wan strong bilif long Kraes.”

Restoresen blong gospel i stat wetem wan yut, Josef Smit, we i askem wan kwestin. Plante long ol tijing blong Sevya long seves blong Hem oli bin stat wetem wan kwestin. Tingbaot kwestin blong Hem long Pita: “?Be yufala i stap tokbaot mi, se mi hu?”³ Mo ansa blong Pita: “Yu yu Mesaea ia. Yu yu Pikinini blong God ia we i laef, i stap we i stap.”⁴ Yumi nidim blong helpem wanwan long yumi blong faenem ol ansa blong Papa long Heven tru long Spirit we i lidim yumi.

Long brodkas ia, mi talem long ol yut:

“Ol lida blong Jos ia oli save gud ol problem, ol wari mo ol jalenj blong yufala.

“Mifala i gat ol pikinini. Mifala i gat ol apupikinini. Plante taem mifala i stap mit wetem ol yut raon long wol. Mo mifala i stap prea from yufala, mifala i stap storian abaot yufala long ol ples we oli tabu evriwan, mo mifala i lavem yufala.”⁵

Mi wantem serem wan long ol plante ansa we mifala i kasem long tetaem ia.

Lisa blong Gran Preri, Albeta, Kanada i raetem: “Fes tu Fes taem ia i bin gud tumas. I wan paoa long testemoni mo strong bilif blong mi long gospel ia. Mifala i gat blesing ia blong gat ol lida wetem insperesen we God i singaotem olgeta blong wok long plante defren wei.”⁶

Lis blong Plesen Grov, Yuta, i raetem: “Mi talem tangkyu from fet blong miwan, mo janis blong sastenem wan profet blong God mo ol man mo ol woman we oli givim seves wetem hem.”⁷

Yumi bin sastenem ol lida tedei we, tru long tabu insperesen, oli singaotem olgeta blong tijim mo lidim yumi, mo oli stap singaot long yumi blong mas lukaot long ol denja we yumi fesem tedei—fasin blong kipim Sabat wanwan taem, ol samting agensem famli, ol atak long fridom blong relijin, mo iven blong gat kwestin long revelesen blong las dei. Ol brata mo sista. ?Yumi stap lisin long kaonsel blong olgeta o nogat?

Plante taem, long konfrens, sakramen miting, mo Praemeri, yumi singsing ol naes toktok ia: “Lidim mi, tekem mi, plis givhan long mi.”⁸ ?Ol toktok ia oli minim wanem? ?Huia i kam long tingting blong yu taem yu tingbaot ol toktok ia? ?Yu yu bin filim ol stret mo gud lida oli lidim yu, olgeta ia we oli disaepol blong Jisas Kraes we, long taem bifo mo tedei, oli gohed blong tajem laef blong yu, we oli wokbaot long rod blong Lod wetem yu? Maet oli kolosap long yu long hom. Maet oli stap long ol lokol kongregesen blong yu, o stap toktok long pulpit long jeneral konfrens. Ol disaepol ia oli serem wetem yumi, blesing ia blong gat wan testemoni abaot Lod, Jisas Kraes, lida ia blong Jos ia, lida ia blong sol blong yumi, we i bin promesem: “yufala i stap glad, mo yufala i no fraet, from we mi Lod, mi stap wetem yufala, mo bae mi stanap wetem yufala.”⁹

Mi tingbaot Presiden Tomas S. Monson we i serem stori we oli invaetem hem long hom blong stek presiden blong hem, Pol J. Jael blong rere blong kasem Melkesedek Prishud. I wan spesel blesing long Presiden Jael, we i no bin save long tetaem ia se hem i stap tijim wan yang Aronik Prishud, we wan dei, bae i kam profet blong God.¹⁰

Mi bin gat taem blong lanem samting wetem dia profet, Presiden Monson. I no gat kwestin long maen o hat blong mi, se hem i profet blong Lod we i stap long wol; mi tu, mi bin kasem givhan long hem taem hem i bin kasem revelesen mo tekem aksen folem. Hem i bin stap tijim yumi blong go aot, blong protektem wanwan long yumi, mo blong sevem wanwan long yumi. Oli tijim hemia tu long ol Wota blong Momon. Olgeta we oli “wantem se bae oli singaotem olgeta ol pipol blong hem,” oli bin glad blong serem ol hevi trabol,” “blong krae wetem olgeta we oli stap krae” mo “stanap olsem ol witnes blong God.”¹¹

Mi stanap tedei, olsem wan witnes blong God we i Papa we I No Save Finis mo witnes blong Pikinini blong Hem, Jisas Kraes. Mi save se Sevya blong yumi i stap laef mo i lavem yumi mo i stap lidim ol wokman blong Hem, yu mo mi, blong oli mekem ol hae stamba tingting blong Hem oli kamtru long wol ia.¹²

Taem yumi stap go fored, mo jusum blong folem ol kaonsel mo ol woning blong ol lida blong yumi, yumi jusum blong folem Lod taem wol i stap folem wan narafala rod. Yumi jusum blong hang strong long rel blong aean, blong stap ol Lata-dei Sent, blong mekem wok blong Lod, blong fulap long “wetem bigfala glad we i bigwan tumas.”¹³

Kwestin blong tedei i klia: ?Yu yu stap stanap wetem ol lida blong Jos long wan wol we i tudak blong mekem se yu stap mekem Laet blong Kraes i go kasem evri ples?

Ol rilesensip wetem ol lida, oli impoten tumas mo oli gat bigfala mining. Nomata wanem yia ol lida ia oli gat, se oli stap kolosap o longwe, o wetaem oli tajem laef blong yumi, paoa blong lidim tingting blong yumi i kamaot long toktok blong Poet blong Amerika, Edwin Markam, we i talem:

Sakil Arsad, fren blong mi long Pakistan, i sendem sapot blong hem long mi, mi we mi brata mo fren blong hem. Semmak long plante long yufala. Taem yu go aot blong leftemap wan narawan, yu stap pruvum ol toktok we oli gat paoa: “I no gat man i save folem rod hemwan.”

Antap long evri samting, yumi nidim Sevya blong yumi, Lod blong yumi, Jisas Kraes. Wan long ol stori blong skripja we oltaem i muvum mi long saed blong spirit, i taem we Jisas Kraes i bin wokbaot antap long wota blong mitim disaepol blong Hem we oli stap long wan sip long Solwota blong Galili. Oli bin ol lida, we oli jes singaotem olgeta olsem plante long mifala long stan tedei. Stori we i stap long Matiu i se:

“Be long taem ia, bot ia i stap longwe finis, long medel blong lagun ia. Mo oli stap go agens long win mo wef i stap sakem bot i go olbaot.

“Nao klosap i brok delaet, Jisas i kam long olgeta, i stap wokbaot antap long wota.

“Be taem ol man blong hem oli luk hem, we i stap wokbaot i kam, oli fraet tumas, mo oli singaot from we oli fraet tumas.

“Be wantaem nomo, Jisas i talem long olgeta se ‘Yufala i no harem nogud. Mi nomo ya. Yufala i no fraet.”¹⁵

Pita i harem toktok we i leftemap tingting i kam long Lod.

“Mo Pita i talem se: ‘?Masta i tru, yu ya? Sapos i olsem, yu talem long mi blong mi wokbaot antap long wota mi kam long yu.’

“Nao Jisas i talem: ‘Yu kam.’”¹⁶

I klia gud. Pita i wan man blong pulum fis, mo hem i save se i gat denja long solwota. Be, hem i gat strong tingting blong folem Jisas—naet mo dei, long wan sip o long drae graon.

Mi ting se Pita i kamaot long saed blong sip, i no wet blong oli tok tu taem, mo i stat wokbaot long wota. Yes, skripja i talem se: “Hem i stat wokbaot antap long wota, i go klosap long Jisas.”¹⁷ Taem win i stap kam strong, mo ol wef oli muvmuv andanit leg blong hem, Pita i fraet mo “stat draon mo i singaot se: ‘Masta, plis yu sevem mi.’

“Nao wantaem nomo, Jisas i stretem han blong hem, i holem hem.”¹⁸

Hemia wan strong lesen. Lod i bin stap long ples ia from hem, semmak olsem we Hem i stap ia from yu mo mi. Hem i stretem han blong Hem mo pulum Pita i go long Hem, i sef.

Mi bin nidim Sevya mo help blong han blong Hem plante taem tumas. Mi nidim Hem naoia i bitim bifo, i semmak long yumi. Mi bin gat tras long sam taem, we mi kamaot long sip, i go long sam ples we mi no save, be mi luksave se mi no save mekem miwan.

Olsem we yumi tokbaot long taem blong Fes tu Fes, plante taem Lod i go aot long yumi tru long ol famli mo lida, i invaetem yumi blong kam long Hem—semmak olsem Hem i stretem han blong sevem Pita.

Bae yu tu, bae i gat ol taem blong ansa long invitesen toktok ia: “kam long Kraes.”¹⁹ ?Yu no ting se hemia nao laef long wol ia? Singaot ia blong kam sevem wan memba blong famli; kam blong go long misin; kambak long jos; kam long tabu tempol; mo, olsem we yumi bin harem long ol gudfala yut long Fes tu Fes miting, plis, helpem mi ansarem kwestin blong mi. Long stret taem, wanwan i harem singaot ia “Kambak hom.”

Mi prea se bae yumi go aot, bae yumi go aot mo holem han blong Sevya we Hem i stretem i kam long yumi, plante taem, tru long ol lida we Hem i singaotem, mo tru long ol memba blong famli, mo lisin long singaot blong Hem blong kam.

Mi save se Jisas Kraes i stap laef; mi lavem Hem mo mi save wetem ful hat blong mi se Hem i lavem wanwan long yumi. Hem i bigfala Eksampol mo tabu lida blong evriwan long ol pikinini blong Papa. Long hemia, mi wan tabu witnes, long nem blong Jisas Kraes, amen.