“Meu Kauti Ira Mai Kina na Tamata Kecega Vei Au”

Kemuni na taciqu kei na ganequ, niu vakaitikotiko voli mai Aferika, au a taro ivakasala vei Elder Wilford W. Andersen ena Vitusagavulu me baleta na nodra vukei na Yalododonu era bula dravudravua tu. E dua vei ira na vakasama vakasakiti a wasea vei au e vaqo: “Na nodrau veiyawaki ga o koya e solia kei koya e ciqoma na levu ni nona vakila o koya e ciqoma ni ganiti koya.”

Sai koya oqo na ivakavuvuli taumada ni ivakarau ni welefea ni Lotu. Ni ra sa sega ni sotava rawa na lewenilotu na veika era gadreva, era na gole taumada vei ira na lewe ni nodra matavuvale. Ni sa oti oya, kevaka e gadrevi, sa rawa talega vei ira me ra gole vei ira na iliuliu ni Lotu me ra vukei ena veika vakayago era gadreva. ¹ O ira na lewe ni matavuvale kei na iliuliu ni Lotu era voleka duadua vei ira era vakaleqai tu, era sa dau sotava talega na veileqa vata oya, ka ra kila na sala vinaka duadua me ra veivuke kina. Baleta ni ra voleka vei ira era solia o ira era dau ciqoma na veivuke ena ivakarau oqo era vakavinavinaka ka lailai nodra dau vakila ni ganiti ira.

Na vakasama—“na kedrau veiyawaki ga o koya e solia kei koya e ciqoma, na levu cake ni nona rawa ni vakila o koya e ciqoma ni ganiti koya”—e tiko talega na kena yaga bibi vakayalo. Na Tamada Vakalomalagi kei Jisu Karisito, sai rau na Dausolisoli levu duadua. Na levu ga ni noda vakayawaki keda mai vei Rau na levu ni noda vakatautaukeni keda. Sa tekivu me da nanuma ni ganiti keda na loloma soliwale ka dodonu me da vakalougatataki. Eda na veiraiyaki, ka raica na veika eda nanuma ni sega ni dodonu, ka lomalomani keda—cudru sara mada ga—mai na veika sega ni dodonu eda nanuma. Na veika sega ni dodonu e rawa ni tekivu mai na veika lalai e yaco ki na veika lelevu ka vakamosiyalo, ni da sa yawa mai vua na Kalou, na veika lalai sa na yaco me rairai lelevu. Eda nanuma ni sa nona itavi na Kalou me vakavinakataka na ka ka vakavinakataka ena gauna sara ga oqo!

Na duidui e yaco mai na noda voleka vua na TamadaVakalomalagi kei Jisu Karisito e vakaraitaki ena iVola i Momani ena duidui kilailevu vei Nifai kei rau na tuakana, o Leimani kei Lemueli.

• Sa dau “gadreva ko Nifai me kila na veika vuni ni Kalou, sa daumasu kina vua na Turaga,” sa vakamalumalumutaki kina na yalona.² Ena yasana kadua, rau sa yawa mai vua na Kalou o Leimani kei Lemueli—rau sega ni kilai Koya.

• Sa dau ciqoma ena yalovinaka o Nifai na veilesilesi dredre, ia o Leimani kei Lemueli “erau sa dau vosakudrukudru ena vuqa na ka.” Na vosakudrukudru e ivakatautauvata vakaivolanikalou ni tagi vagonegonea. E tukuna na ivolanikalou ni “Rau sa vosakudrukudru ni rau sa sega ni kila na loma ni Kalou, o Koya sa buli rau.”³

• Na nona voleka o Nifai vua na Kalou sa rawa kina me kila ka vakavinavinakataka na “yalololoma” ni Kalou.⁴ Kena veibasai, ni rau raica o Leimani kei Lemueli na veivakalougatataki e ciqoma tiko o Nifai, erau “sa cudruvi koya ni rau sa sega ni kila na cakacaka ni Turaga.”⁵ O Leimani kei Lemueli erau raica na veivakalougatataki erau ciqoma ni dodonu me yaco mai ka rau nanuma ena yaloca ni dodonu me levu cake. E vaka me rau raica na veivakalougatataki nei Nifai ni “cala” vei rau. Oqo na ivakatautauvata vakaivolanikalou ni sega ni rauta na veika e ciqoma tiko.

• E cakacakataka o Nifai nona vakabauta na Kalou me rawata kina na veika e kerei vua me cakava.⁶ Kena veibasai, o Leimani kei Lemueli, “ni sa rui kaukauwa na yalo[drau], … e[rau] a sega kina ni kerea vua na Turaga.”⁷ Erau nanuma beka ni nona itavi na Turaga me vakarautaka na isaunitaro erau a sega ni taroga. “E sega ni dau vakatakila vei keitou na Turaga na veika vakaoqo,” erau kaya, ia erau sega mada ga ni bau taroga.⁸ Oqo na ivakatautauvata vakaivolanikalou ni veivakacacani kei na lomalomaruataka na dina.

Baleta ni rau yawa mai vua na iVakabula, erau sa vosakudrukudru o Leimani kei Lemueli, rau veiqati ca, ka sega ni vakabauta. Erau nanuma ni sega ni dodonu na bula ka ganiti rau na loloma soliwale ni Kalou. Kena veibasai, me vaka ni sa toro voleka yani vua na Kalou, sa raica o Nifai sa rui sega ni dodonu duadua na bula vei Jisu Karisito. E dina ni sega sara ga ni dua nona cala, a sotava na iVakabula na veivakararawataki levu duadua.

Ni da voleka vei Jisu Karisito ena noda vakanananu kei na inaki ni yaloda, ena levu noda vakavinavinakataka na Nona vakararawataki vakatawadodonu, ena levu noda vakavinavinaka na loloma soliwale kei na veivosoti, kei na levu ni noda vinakata me da veivutuni ka yaco me vakataki Koya vakalevu cake. Sa ka bibi na keda yawa mai vei Tamada Vakalomalagi kei Jisu Karisito, ia sa bibi vakalevu cake sara na mua eda toso tiko kina. E marautaka vakalevu cake na Kalou na tamata ivalavala ca sa veivutuni ka tovolea tiko me voleka yani Vua mai vei koya na tamata vakadonui koya, dau vakaraica na cakacala, me vakataki ira na Farisi kei na vunivola ni gauna makawa, ka sega ni kila nodra gadreva vakalevu me ra veivutuni. ⁹

Niu se gonelailai, au dau lagata e dua na sere ni Siganisucu vaka-Suwiteni ka vakavulica e dua na lesoni rawarawa ka mana—ni da toro voleka vua na iVakabula sa vakavuna noda veisau. E vaqo na qaqana:

Ni da kauti keda ki na valenimanumanu mai Peceliema “na vanua sa davo kina na Kalou ni se bogi na vanua e veico,” eda na raica na iVakabula ni dua na isolisoli mai vua e dua na Tamada Vakalomalagi yalovinaka, ka dauloloma. Eda na sega ni nanuma ni ganiti keda na Nona veivakalougatataki kei na loloma soliwale, ka da tara cake e dua na gagadre levu me da muduka na noda vakararawataka tiko na Kalou.

Se cava ga na vanua eda tu kina se na keda yawa mai vei Tamada Vakalomalagi kei Jisu Karisito, eda rawa ni digitaka me gole vei Rau ka toro voleka yani vei Rau. Erau na vukei keda. Me vaka a tukuna na iVakabula vei ira na Nifai ni oti Nona Tucake tale mai na mate:

“A sa talai au mai ko Tamaqu meu mai laveti cake ena kauveilatai; ia au sa laveti cake ena kauveilatai meu kauti ira mai kina na tamata kecega kivei au. …

“Raica a ka oqo au sa laveti cake kina; ia me sa lewa ko Tamaqu, au na kauti ira mai na tamata kecega ki vei au.”¹¹

Me da toro voleka yani vua na noda iVakabula, sa dodonu me da vakalevutaka na noda vakabauti Koya, cakava ka maroroya na veiyalayalati, ka me tiko vata kei keda na Yalo Tabu. Sa dodonu talega me da cakacaka ena vakabauta, ena noda rogoca na veidusimaki vakayalo e yacovi keda mai. Na veika kece oqo e dau yaco vata mai ena sakaramede. Sa dina sara, na sala vinaka duadua au kila me da toro voleka kina vua na Kalou sai koya me da vakavakarau vakavinaka ka vakayagataka na sakaramede e veimacawa ena bula kilikili.

A wasea e dua na neitou itokani mai Sauca Aferika na nona yaco me kila na ka oqo. Ni se qai saumaki vou mai o Diane, a dau lotu ena dua na tabana ena taudaku kei Johannesburg. Dua na Sigatabu, ni dabe tiko ena ivavakoso, baleta na ituvaki ni loma ni valenilotu a yaco kina me sega ni raici koya na dikoni e solia tiko na sakaramede. A yalorarawa o Diane ia e sega ni tukuna e dua na ka. A raica mai e dua tale na lewenilotu na ka a yaco ka mani tukuna vua na peresitedi ni tabana ni oti na soqoni. Ni tekivu na Wilivola ni Sigatabu, a kau yani o Diane ki na dua na valenivuli lala.

A curu mai e dua na matabete. Tekiduru, vakalougatataka eso na madrai, ka solia vua e dua na tikina. A kania o koya. A tekiduru tale ka vakalougatataka eso na wai ka solia vua e dua na bilo lailai. A gunuva o koya. Ni oti oya, a yaco veitaravi mai vakatotolo vei Diane e rua na vakasama: iMatai, “Isa, o koya [na matabete] a vakayacora ga me baleti au.” Oti oya qai, “Isa, o Koya [na iVakabula] a vakayacora ga me baleti au.” A vakila o Diane na loloma ni Tamada Vakalomalagi.

Na nona kila ni baleti koya saraga na nona isoro na iVakabula e vukea nona vakila ni voleka cake Vua ka vakavurea e dua na gagadre kaukauwa me tiko ga e yalona na gagadre oya, sega walega ena Sigatabu, ia ena veisiga kece. E qai vakila o koya ni dina ga ni dau dabe ena dua na ivavakoso me vakayagataka na sakaramede, na veiyalayalati e dau vakavouya ena vei-Sigatabu e nona sara ga. A veivuke na sakaramede—ka sa veivuke tikoga—sa dau vakila o Diane na mana ni loloma vakalou, vakadinadinataka na liga ni Turaga ena nona bula, ka voleka cake vua na iVakabula.

Sa vakatakila na iVakabula ni sa yaga sara vakalevu na sakaramede ena dua na yavu vakayalo. E kaya kina:

“Ia au sa vakaroti kemudou mo dou dau kitaka na ka oqo [vakayagataka na sakaramede]. Dou sa kalougata kevaka dou sa dau kitaka tiko na ka oqo, ni dou sa tara cake ena dela ni noqu uluvatu.

“Ia ko koya yadua sa sega ni kitaka vakakina, sa sega ni tara cake ena dela ni noqu uluvatu, sa tara ga ena dela ni nuku; ia ni sa tau mai na uca, ka coka na dobui, ka liwa na cagi ka tabaki ira, era na bale kina.”¹²

E sega ni kaya o Jisu kevaka e tau mai na uca, kevaka ecoka na dobui, ka kevaka e liwa na cagi, ia “ni sa.” E sega ni dua e vakuwai mai na bolebole ni bula; eda gadreva kece na veitaqomaki e rawa mai na vakayagataki ni sakaramede.

Ena siga sa Tucake tale kina na iVakabula, e rua na tisaipeli erau a lako tiko ki na dua na koro ko Emeo. E sega ni kilai, na nona duavata kei rau na Turaga ena ilakolako. Ni ratou lako tiko, a vakavulici rau ko Koya mai na ivolanikalou. Ni ratou yacova na vanua eratou lakova, rau sureti Koya me kana vata kei rau.

“Ia ni ratou sa tiko sobu me ratou kana, sa taura na madrai ko Koya ka lotutaka, ka dovia, ka solia vei rau.

“A sa qai lau na matadrau, a rau sa kilai koya; a sa takali ko koya mai na matadrau.

“A rau sa veikayaka vakai rau, sa sega li ni katakata sara na yalodaru, ni datou sa veivosaki kaya ena gaunisala, ni sa vakamacalataka talega vei kedaru na iVolatabu ko koya?

“A rau sa cavu tu ena tiki ni yakavi ga ko ya, ka lesu tale ki Jerusalemi, a rau sa kunei ira na lewe tinikadua [na iApositolo] ni ra sa soqoni vata mai.”

Erau sa qai vakadinadinataka vei ira na iApositolo ni “Sa dina sa tucake tale na Turaga. …

“A rau sa tukuna talega na veika sa ia ena gaunisala, ka ni rau sa kilai koya talega ni sa dovia tiko na madrai.”¹³

Na sakaramede e vukei keda vakaidina me da kila na noda iVakabula. E vakananuma talega vei keda na Nona vakararawataki vakatawadodonu. Kevaka me a dodonu tu na bula, ke daru na sega ni vakaturi cake tale mai na mate; ke daru na sega sara ni rawa ni savasava tu ena mata ni Kalou. Ena vuku ni ka oqo, au sa vakavinavinaka kina ni sega ni dau dodonu tu ga na bula.

Ena gauna vata oqori, au rawa ni kaya vakadodonu sara, ena vuku ni Veisorovaki i Jisu Karisito, ena yaco, ena rai tawamudu ni veika kece sara, ena sega ni dua na ka e sega ni dodonu. “Na veika kece e sega tu ni dodonu me baleta na bula ena rawa ni vakadodonutaki.”¹⁴ Ena sega beka ni veisau na ituvaki eda sotava tiko oqo, ia ena yalololoma, yalovinaka, kei na loloma ni Kalou, eda na ciqoma kina o keda kece e levu cake mai na veika eda cakacakataka, e levu cake mai na veika eda rawa ni rawata, ka levu cake mai na veika eda sa bau namaka me da rawata. Sa yalataki vei keda ni “Kalou ena tavoya tani kecega na wainimata mai na mata[da]; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.”¹⁵

Veitalia na vanua o tu kina ena nomudrau veiwekani kei na Kalou, au sureti kemuni mo ni toro voleka yani vua na Tamada Vakalomalagi kei Jisu Karisito, koi rau erau na Ciqoma ka Solia na veika kecega e vinaka. Au sureti kemuni mo ni lakova na soqoni ni sakaramede e veimacawa ka vakayagataka na ivakatakarakara savasava ni yagona kei na nona dra na iVakabula. Au sureti kemuni mo ni vakila na nona voleka na Kalou ni sa vakatakilai vei iko o Koya, me vaka na Nona vakatakilai vei ira na tisaipeli ni gauna makawa, ena “dovi ni madrai.”

Ni o ni vakayacora vakakina, au yalataka ni o ni na voleka cake vua na Kalou. Na ivakarau ni bula ni tagi vagonegonea, sega ni mamau ena veika e ciqoma, kei na lomalomaruataka na dina ena takali yani. Ena vakaisosomitaki na yalo vaqori ena yalo ni loloma cecere kei na vakavinavinaka ena nona isolisoli ni Luvena na Tamada Vakalomalagi. Ni da voleka cake yani vua na Kalou, ena yaco mai ki na noda bula na mana veivakaukauwataki ni Veisorovaki nei Jisu Karisito. Ka, me vaka a yaco vei rau na tisaipeli ena sala ki Emeo, eda na raica ni a dau tu voleka ga e veigauna kece na iVakabula. Au vakadinadinataka ena yaca i Jisu Karisito, emeni.