“Kom Kuv Yuav Rub Tau Tag Nrho tej Tib Neeg Los Cuag Kuv”

Kuv cov kwv tij thiab cov muam, thaum kuv ua neej nyob hauv Afikas teb chaws, kuv nrhiav tswv yim los ntawm Txwj Laug Wilford W. Andersen ntawm Pawg Xya Caum hais txog yuav ua li cas pab tau cov Ntseeg uas txom nyem thiab pluag heev. Txhua yam uas nws teb rau kuv zoo heev, tiam sis kuv kuj nyiam lub tswv yim no hais tias: “Thaum qhov deb nruab nrab ntawm tus neeg pub thiab tus neeg txais yim deb, tus neeg txais yim xav hais tias tsim nyog nws txais tau xwb tsis tas ua hauj lwm li kom tau.”

Txoj ntsiab cai no ua lub hauv paus ntawm lub Koom Txoos txoj kev pab tib neeg. Thaum cov ntseeg tsis muaj peev xwm saib xyuas lawv tus kheej, lawv xub mus thov kev pab ntawm lawv cov neeg txheeb ze. [fuzzy]Tom qab ntawd, yog tias tsim nyog, lawv kuj thov tau kev pab ntawm lub Koom Txoos cov thawj coj nyob ze kom tau kev pab ua noj ua haus.¹ Cov neeg txheeb ze thiab lub Koom Txoos cov thawj coj nyob ze yog cov ze tshaj plaws rau cov neeg xav tau kev pab, tej zaum tau raug kev cov nyom ib yam yav nram ntej, thiab to taub zoo saib yuav pab tau li cas. Vim cov neeg txais kev pab nyob ze cov neeg pub pab, cov neeg txais kev pab raws li tus qauv no zoo siab ris cov neeg pub pab txiaj thiab feem ntau tsis xav tias lawv yuav txais tau kev pab es tsis ua dab tsi pauj txiaj ntsim.

Lub tswv yim hais tias—“thaum qhov deb nruab nrab ntawm tus neeg pub thiab tus neeg txais yim deb, tus neeg txais yim xav hais tias tsim nyog nws txais tau xwb tsis tas ua hauj lwm li kom tau”—kuj nruab tau rau tej yam ntawm sab ntsuj plig thiab. Peb Leej Txiv Saum Ntuj Ceeb Tsheej thiab Nws Leej Tub, Yexus Khetos, yog ob tug uas Pub Pab ntau tshaj plaws. Peb yim nyob deb ntawm Nkawd, peb yim xav hais tias peb txais tau kev pab ntawm Nkawd es tsis tas ua dab tsi li. Peb pib xav hais tias tsim nyog peb txais kev tshav ntuj thiab tias Nkawd tshuav peb tej koob hmoov. Peb xam ncig lees thiab pom tej kev tsis sib txig sib luag thiab txawm nyuaj siab—twb yog tu siab—vim yog tej kev tsis vaj huam sib luag uas peb pom. Txawm hais tias tej kev tsis vaj huam sib luag no yuav yog me me xwb los mus rau qhov uas ntxim nyuaj siab txog, thaum peb nyob deb ntawm Vajtswv, los tej yam kev nyob tsis sib xws zoo li hawv qaws peb sawv daws. Peb xav hais tias Vajtswv yuav tsum kho txhua tsav txhia yam—thiab kho tam sim no!

Qhov sib txawv ntawm cov neeg uas nyob ze Vajtswv thiab cov uas tsis nyob ze muaj piv txwv hauv Phau Ntawv Maumoos thaum peb pom saib Nifais thiab nws ob tug Tij Laug Lamas thiab Lemuyees sib txawv deb npaum li cas:

• Nifais muaj “lub siab xav paub txog Vajtswv tej txuj ci uas neeg tsis paub txog thiab, yog li ntawd, [nws] thiaj tau tsa ncauj quaj thov rau tus Tswv,” thiab nws lub siab txawm mos muag tuaj.² Hos hais txog ob tug i, Lamas thiab Lemuyees nyob deb ntawm Vajtswv—nkawd tsis paub dab tsi txog Nws.

• Nifais zoo siab ua tej yam kev cov nyom es tsis yws yws hlo li, tiam sis Lamas thiab Lemuyees nkawd “yws yws txog txhua yam.” Kev yws yws hauv vaj lug kub no yog piv rau me nyuam yaus quaj tuag zias. Cov vaj lug kub sau hais tias “nkawd tseem tau yws yws vim tias nkawd tsis paub txog tej kev ua dej ua num ntawm tus Vajtswv uas tau tsim nkawd los.”³

• Vim Nifais nyob ze Vajtswv, nws thiaj pom tau thiab ris Vajtswv txiaj tau rau Vajtswv “tej kev hlub tshua.”⁴ Hais txog qhov fab ntxeev, thaum Lamas thiab Lemuyees pom Nifais txais tej koob hmoov, nkawd “npau taws rau nws vim nkawd tsis to taub tus Tswv tej dej tej num.”⁵ Lamas thiab Lemuyees saib tej koob hmoov uas nkawd txais ua ib yam uas Vajtswv yuav tsum muab pub rau nkawd thiab ib yam li me nyuam yaus xav tias nkawd yuav tsum tau ntxiv thiab. Nkawd saib Nifais tej koob hmoov ua “tej kev txhaum” tawm tsam nkawd. Nov yog qhov uas kuv hais tias qee zaum tib neeg xav tias lawv yuav tsum txais kev pab tiam sis lawv tsis kam ua dab tsi pab lawv tus kheej thiab.

• Nifais muaj siab ntseeg rau ntawm Vajtswv kom thiaj ua tau tej yam uas Vajtswv hais kom nws ua.⁶ Hais txog qhov fab ntxeev, Lamas thiab Lemuyees, “vim nkawd lub siab tawv qhawv, … tsis nrhiav tus Tswv ib yam li nkawd yuav tsum nrhiav.”⁷ Nkawd xav hais tias tus Tswv muaj lub luag hauj lwm ko teb cov lus nug uas nkawd tsis tau nug. “Tus Tswv tsis ua tej yam zoo li no rau peb paub,” nkawd hais, tiam sis nkawd twb tsis qhib qhov ncauj nug.⁸ Nov yog cov vaj lug kub qhov piv txwv hais txog txoj kev me siab luag thuam txoj kev ntseeg.

Vim nkawd nyob deb ntawm tus Cawm Seej, Lamas thiab Lemuyees yws yws, nrog txhua tus sib cav sib ceg, thiab tsis muaj siab ntseeg. Nkawd xav hais tias lub neej no tsis ncaj thiab Vajtswv yuav tsum muab kev tshaj ntuj rau nkawd. Hais txog qhov fab ntxeev, vim nws tau txav ze dua Vajtswv, tej zaum Nifais pom tau tias lub neej no yuav tsis ncaj tshaj plaws rau Yexus Khetos. Txawm hais tias Nws tsis muaj txim dab tsi los, tus Cawm Seej yuav raug txom nyem ntau tshaj plaws.

Peb yim txav ze rau Yexus Khetos hauv peb tej siab tej ntsws, peb yim yuav ua Vajtswv tsaug vim yog Nws kev txom nyem, thiab rau Vajtswv txoj kev tshav ntuj thiab kev zam txim, thiab peb yim yuav xav hloov siab lees txim thiab rais los mus ua zoo li Nws. Peb nyob deb npaum li cas rau Leej Txiv Saum Ntuj Ceeb Tsheej thiab Yexus Khetos kuj tseem ceeb, tiam sis qhov uas peb tig mus rau Vajtswv haj yam tseem ceeb thiab. Vajtswv yeej zoo siab rau cov neeg txhaum uas xav hloov siab lees txim ntau dua cov uas saib lawv tus kheej ua neeg ncaj ncees, tiam sis ib yam li cov neeg Falixais yav thaum ub tsis paub hais tias lawv yog cov uas yuav tsum hloov siab lees txim.⁹

Ua ib tug me nyuam, kuv tau hu ib zaj nkauj Christmas uas qhia ib co lus yooj yim to taub thiab muaj hwj chim—thaum peb txav los us ze tus Tswv ua li ntawd kom peb hloov tau. Cov lus rau zaj nkauj ntawd mus zoo li no hais tias:

Thaum peb xav hais tias peb nyob hauv lub nkuaj tsiaj tom Npelehees, “qhov chaw uas hmo ua ntej Vajtswv tau pw rau saum cov quav nplej,” peb saib tau tus Cawm Seej ua ib qho txiaj ntsim los ntawm Leej Txiv Saum Ntuj Ceeb Tsheej uas hlub peb. Tsis txhob xav hais tias Vajtswv yuav tsum foom koob hmoov rau peb, peb yuav tsum muaj lub siab xav ua kom tsis txhob ua tej yam uas ua rau Vajtswv tu siab.

Txawm tias peb tig mus rau qhov twg los yog nyob deb ntawm Leej Txiv Saum Ntuj Ceeb Tsheej thiab Yexus Khetos, peb xav tau kom tig los mus rau Nkawd thiab txav los mus ze Nkawd. Nkawd yuav pab wb. Ib yam li tus Cawm Seej qhia cov neeg Nifais tom qab Nws txoj kev Sawv Rov Los:

“Thiab kuv Txiv xa kuv los xwv kom kuv yuav raug dai rau saum tus ntoo khaub lig; thiab tom qab uas kuv tau raug dai rau saum tus ntoo khaub lig lawm, kom kuv yuav rub tau tag nrho tej tib neeg los cuag kuv, …

“Thiab vim qhov no kuv thiaj raug muab dai; yog li ntawd, raws li lub hwj chim ntawm Leej Txiv kuv yuav coj tau tag nrho tej tib neeg los cuag kuv.”¹¹

Kom txav ze dua rau peb tus Cawm Seej, peb yuav tsum muaj siab ntseeg rau ntawm Nws, nrog Nws sib khi lus thiab ceev tej kev sib khi lus ntawd, thiab muaj tus Vaj Ntsuj Plig Dawb Huv nrog peb nyob. Peb kuj yuav tsum muaj kev ntseeg, raws li tej kev coj ntawm sab ntsuj plig uas peb txais. Tag nrho tej yam no los sib dhos ua ke thaum peb noj lub cim nco txog. Tiag tiag, txoj kev zoo tshaj plaws uas kuv pab kom txav ze dua Vajtswv yog kom npaj noj lub cim nco txog txhua hnub vas thiv.

Peb ib tug phooj ywg hauv Afikas Qab Teb tau qhia peb saib nws tau ua li cas kawm txog qhov no. Thaum Diane yog ib tug ntseeg tshiab, nws tau koom ib ceg ntseeg nyob ze Johannesburg. Muaj ib hnub Vas Thiv, thaum nws nrog sawv daws zaum ua ke, tus dis kas uas tab tom yais lub cim nco txog tsis pom nws thiab tsis muab lub cim nco txog rau nws. Diane yeej tu siab tiam sis nws tsis hais dab tsi. Muaj lwm tus neeg ntseeg uas pom tau muaj li cas thiab nws tau qhia ceg ntseeg tus thawj tswj hwm tom qab txoj kev sib ntsib. Thaum Hnub Caiv Kev Kawm Vaj Lug Kub twb yuav pib, lawv coj Diane mus rau lwm hoob uas tsis muaj neeg.

Ib tug neeg tuav lub pov thawj hwj txawm los. Nws txhos caug, foom koob hmoov rau ib co mov mog, thiab muab ib qho mov mog rau Diane noj. Nws noj. Tus tuav pov thawj hwj rov qab txhos caug thiab foom koob hmoov rau ib co dej thiab muab ib lub me nyuam khob rau Diane haus. Diane txawm haus. Tom qab ntawd, Diane txawm xav zoj ob qho thooj txhij. Qhov thib ib, “Auj, tus tuav pov thawj hwj no ua li no rau kuv xwb.” Thiab “Auj, tus Cawm Seej tau ua li no rau kuv.” Diane hnov tau Leej Txiv Saum Ntuj Ceeb Tsheej txoj kev hlub rau nws.

Qhov uas Diane pom tau tias tus Cawm Seej txoj kev txi yog rau nws tau pab nws txav ze rau ntawm Nws thiab ua rau Diane xav tuav raws qhov kev zoo siab ntawd hauv nws lub siab lub ntsws, tsis yog thaum hnub Caiv xwb, tiam sis txhua txhia hnub thiab. Nws pom tias txawm nws nrog lwm tus neeg zaum noj lub cim nco txog los, tej kev khi lus uas nws rov qab khi txhua Hnub Caiv yog nws li nkaus xwb. Lub cim nco txog tau pab Diane—thiab tseem pab nws niaj hnub no thiab—hnov Vajtswv txoj kev hlub, pom tus Tswv txhais tes saib xyuas nws lub neej, thiab txav ze dua tus Cawm Seej.

Tus Cawm Seej tau npaj tseg lub cim nco txog ua ib yam tseem ceeb khov kho rau sab ntsuj plig. Nws hais tias:

“Thiab kuv muab ib los lus txib rau nej hais tias nej yuav tsum ua tej yam no [noj lub cim nco txog]. Thiab yog tias nej yuav ua tej yam no nej yuav tau koob hmoov, vim nej raug tsa nyob rau saum kuv lub pob zeb.

“Tiam sis leej twg nyob hauv nej uas ua ntau dua los sis ho tsawg dua li tej yam no tsis tau raug tsa rau saum kuv lub pob zeb, tiam sis raug tsa rau saum tej xuab zeb; thiab thaum nag los, thiab dej nyab los, thiab tej cua tshuab, thiab nplawm rau saum lawv, lawv yuav vau, thiab tej rooj vag ntawm ntuj txiag teb tsaus yeej qhib lug tos txais lawv.”¹²

Yexus tsis tau hais tias “yog tias tej nag los, yog tias tej dej nyab los, los yog tias tej cua tshuab” tiam sis “nws hais tias thaum muaj tej no.” Tsis muaj leej twg uas yuav tsis muaj kev cov nyom hauv lub neej no: peb txhua tus xav tau kev nyab xeeb uas los ntawm txoj kev noj lub cim nco txog.

Hnub uas tus Cawm Seej Sawv Rov Los, muaj Nws ob tug thwj tim uas taug kev mus rau ib lub zos hu ua Emmaus. Nkawd tsis paub tus Tswv thaum tus Tswv nrog nkawd taug kev mus. Thaum lawv taug kev ua ke, tus Tswv tau qhia nkawd los ntawm cov vaj lug kub. Thaum lawv mus txog qhov chaw lawv yuav mus ntawd, nkawd caw tus Tswv nrog nkawd noj hmo ua ke.

“Thaum Yexus nrog nkawd zaum noj mov ntawm rooj, Yexus muab ib lub ncuav los nws ua Vajtswv tsaug thiab muab faib rau nkawd noj.

“Yam uas plooj ntawm nkawd lub qhov muag txawm tshem hlo lawm, nkawd thiaj paub hais tias, yog Yexus, tam sim ntawd Yexus cia li ploj ntais ntawm nkawd mus lawm.

“Nkawd sib tham hais tias, Thaum peb taug kev tuaj, nws nrog wb tham thiab piav Vajtswv Txoj Lus rau wb mloog, mas wb lub siab kub lug cuag li hluav taws hlawv puas yog?

“Tam sim ntawd nkawd txawm sawv tsees rov qab mus rau nram lub nroog Yeluxalees, thiab nkawd mus rau ntawm [kaum ib tug Thwj Tim] thiab lwm tus uas tuaj nyob ua ke ntawd.”

Thiab nkawd txawm ua tim khawv rau cov Thwj Tim tias “tus Tswv sawv rov los tiag. …

“Nkawd txawm piav tej uas nkawd pom thaum nkawd taug kev mus, thiab thaum tus Tswv muab ncuav ntais faib rau nkawd noj, nkawd thiaj paub hais tias yog Yexus tiag rau lawv mloog.”¹³

Lub cim nco txog kuj pab peb paub peb tus Cawm Seej. Nws kuj pab peb nco qab txog qhov uas tus Cawm Seej tsis muaj txim thiab raug txom nyem ntau heev. Yog tias lub neej no ncaj tiag tiag, ces nej thiab kuv yeej yuav tsis muaj peev xwm sawv rov los; nej thiab kuv yuav tsis muaj cib fim sawv rau ntawm Vajtswv dua ib zaug ntxiv ua neeg dawb huv. Li no ces, kuv ris Vajtswv txiaj hais tias lub neej no tsis ncaj.

Tiam sis thaum tib lub sij hawm, kuv sib zog hais tau hais tias vim yog Yexus Khetos txoj Kev Theej Txhoj, thaum kawg, hais txog qhov kev xam nyob mus ib txhis li, yeej yuav tsis muaj kev tsis ncaj. “Tag nrho tej yam txog lub neej no uas tsis ncaj tus Tswv yuav kho tau.”¹⁴ Tej zaum peb txoj kev ua neej nyob yuav tsis hloov, tiam sis vim yog Vajtswv txoj kev siab zoo, kev khuv leej, thiab kev hlub, peb puav leej yuav txais ntau tshaj qhov uas tsim nyog peb txais, thiab ntau tshaj qhov uas peb cia siab rau tau. Peb muaj lus cog tseg hais tias “Vajtswv yuav so [peb] tej kua muag huv tib si mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawv daws ib txwm muaj los twb ploj tas lawm.”¹⁵

Txawm tias nej nyob deb npaum li cas ntawm Vajtswv, kuv caw nej los txav mus ze rau ntawm Leej Txiv Saum Ntuj Ceeb Tsheej thiab Yexus Khetos, ob tug Pub Pab zoo tshaj plaws ntawm txhua yam uas zoo. Kuv caw nej mus koom txoj kev sib ntsib noj lub cim nco txog txhua lub lis piam thiab noj lub cim nco txog tus Cawm Seej lub cev thiab cov ntshav. Kuv caw nej los hnov tias Vajtswv nyob ze thaum Nws tshwm sim rau nej, ib yam li rau Nws cov thwj tim yav thaud, thaum “muab mov mog ntais faib.”

Thaum nej ua li no, kuv cog lus tias nej yuav nyob ze dua rau Vajtswv. Tej kev ntswv siab uas tib neeg ntiaj teb muaj xws li kev yws yws, kev xav tau ntau yam tsis xav ua hauj lwm kom tau, thiab kev ua me siab tsis ntseeg yuav ploj mus. Txoj kev hlub thiab kev ris Vajtswv txiaj rau Nws Leej Tub lub txiaj ntsim yuav pauv tej kev ntswv siab phem ntawd. Thaum peb txav los mus ze dua Vajtwv, lub hwj chim ntawm Yexus Khetos txoj Kev Theej Txhoj yuav los rau hauv peb lub neej. Thiab, ib yam li ob tug thwj tim uas taug kev mus rau Ema-us, peb yuav nrhiav tau pom tias tus Cawm Seej tau nyob ze peb txhua lub sij hawm. Kuv ua tim khawv li no tuav Yexus Khetos lub npe, amees.