“Tuh Nga in Kuh in Kohlma Mwet Nuhkwewa nuh Yuruk”

Ke Nga muhtana fin acn Africa, nga sohkwack kahs in kahsruh sel Elder Wilford W. Anderson luhn U luhn Mwet Itngucul in muh kahsruh mwet Luhlahlfongi Lal suc moul suhkahsruhp. Nuhke kahs in kahsruh el akacsruhi nuh sik angwe: “Loes inmahsrlon liki mwet sang ac mwet eis, na laheslah ahkkihye in puhla kuh in eis.”

Ip yohk se inge akwucki in pa ohiyac wo luhn Alu uh. Ke mempucr tiac kuh in karihngihnolos sifacna, elos forlah nuh sin mwet sucu lalos meet. Tukun, fin enenuh, elos kuh pac in ngwetngwet nuh ke mwet kol lalos fin acn lalos in kahsruh fal nuh ke mwe enenuh luhn facluh lalos.¹ Mempucr luhn sucu ac mwet kol in acn lowos an pa fototo emet nuh sin mwet in enenuh, pacl pohs puhlakihnyuck ma inge pac, ac kahlwem mwe kahsruh na wowo. Mweyen fototoiyacnuh sin mwet sang, mwet eis suc eis kahsruh ke atac se inge sang kuloh, ac tiac puhla in kuh in eis.

Ip yohk—“Loes inmahsrlon liki mwet sang ac mwet eis, na laheslah ahkkihye in puhla kuh in eis”—oasr mwe luti yohk nuh ke ma luhn nguhn pac. Pahpah tuhmasr Inkuhsrao ac Wen Nahtuhl, Jisus Kraist, Elos pa mwet sang emet. Ke kuht loes Luhkwelos, oasr puhla se kuh yohk kacsr. Kuht muhtwacack in nuhnkuh muh oasr lasr pahkotwen ac oasr lasr mwe insewowo la. Kuht puhla kuh in ngwetlah, akihlen ma tiac oacna sie, ac puhla ahsor ke—pac kasrkuhsrak—ke ma tiac oacna sie kuht muh liye. Ma tiac oacna sie inge kuh in ma srihk nuh ke ma yohk, ke kuht sifacna loes liki God, pwacye ma tiac oacna sie srihk kuh in sun ma yohk. Kuht puhla muh God El enenuh in ahkwoye ma—ac ahksuwohsye ingena!

Ma siena nuh ke inmahsrlosr pa Pahpah tuhmasr Inkuhsrao ac Jisus Kraist pa sramsramkihnyuck ke Puk Luhn Mormon ke ma siena liki yohk ke Nephi ac tamuhlwel mahtuh lal, Laman ac Lemuel:

• Nephi el “kena yohk in etuh ke ma lukmac luhn God, ohinge, [el] tuh pruhe nuh sin Leum,” ac insiyacl puhla mihs.² Tuhsruhk ke paho lacoh, Laman ac Lemuel lesaclik sin God—elos tiac etuh El.

• Nephi el pwacr in oruh mwaupac ac tiac tohrkahskahs, tuhsruhk Laman ac Lemuel “elos tuh tohrkahskahs ke ma pucspucs.” Tohrkahskahs pa ma suhmuhslah kahs oacna tong luhn tuhlihk srihsrihk. Ma suhmuhslah fahk muh “elos tuh tohrkahskahs ke srihpen elos tiac etuh ke orekma luhn God sac suc tuh oracloslac.”³

• Fototoiyacn luhn Nephi nuh sin God lwelah el in akihlen ac sang kuloh nuh ke “pahkotwen wo” luhn God.”⁴ Fin ma sahyac, ke elos Laman ac Lemuel liyacl Nephi eis mwe insewowo, elos “kasrkuhsrak sel ke srihpen elos tiac kahlwem ke oruh luhn Leum.”⁵ Laman ac Lemuel liye muh mwe insewowo elos eis in muh lalos sifacna, ac nuhnkuh muhlat muh elos in eis kuhtuh pac. Elos muh in liye mwe insewowo luhn Nephi pa “mwe stuhuh” in oruh lain elos. Pa inge ma suhmuhslah kahs oacna puhla muhlat in eis sifacna.

• Nephi el orekmakihn luhlahlfongi ke God in oruh ma siyuckyuck sel.⁶ Tuhsruhk, Laman ac Lemuel, “upac insiaclos, … tiac ngwet nuh sin Leum ke ma elos enenuh in oruh.”⁷ Ma elos puhla lah Leum el enenuh in sang mwet top nuh ke kihsensiyuck lalos lah elos tiac siyuck. “Tuh Leum El tiac ahkkahlwemye kuhtwena ma inge nuh sesr,” elos fahk, tuhsruhktuh elos tiacna orekmakihn kuh in siyuck.⁸ Pa inge ma suhmuhslah kahs oacna kasrkuhsrak ac tiac luhlahlfongi ma pwacye.

Mweyen elos loes liki Mwet Lahngo sac, Laman ac Lemuel tohrkahskahs, ac ahkkasrkuhsrakyeyuck, ac wacngihn luhlahlfongi lalos. Elos puhla muh moul sac pa tiac oacna sie ac elos puhla pahkotwen luhn God pa ma lalos in eis. Siena, mweyen el ahkfototoye nuh sin God, Nephi el muh akihlen lah moul se inge pa tiac oacna sie emet nuh sel Jisus Kraist. Finne suwos emet, Mwet Lahngo El ac kweok emet.

Fototo lasr nuh sin Jisus Kraist ke mwe nuhnak ac oruh luhn insiyacsr, kuht ac sruikihn nuh ke kweok suwos Lal, ac sruikihn nuh ke pahkotwen ac nuhnak muhnahs, ac ke kuht kena in lihksreni in auliyak ac oruh oacna El. Inmahsrlosr suwos lasr liki Pahpah Inkuhsrao ac Jisus Kraist pa yohk srihpac, tuhsruhk oiyac in fahsr lasr pa yohk srihpac emet. God El engan emet nuh ke mwet koluk auliyak suc srihke in fototo nuh Yohrohl liki mwet suwos sifacna, ac suk ma koluk in mwet sahyac suc, oacna mwet luti ac mwet sihmihs mahtuh luhn mwet Jew, tiac akihlen elos enenuh yohk in auliyak.⁹

Ke nga tuhlihk srihsrihk, Nga onkihn soko on in Christmas luhn acn Sweden ma luti mwe luti fihsracsr ac kuh—fototo nuh sin Mwet Lahngo oruh kuht in eklac. Kahs luhn on soko oruh oacna inge:

Ke kuht sun kuhtyak nuh ke acn niyacn muhta Bethlehem, “oasr oyac God ke ao in fong in monglac ke acn straw,” kuht kuh in akihlen wowo Mwet Lahngo semwe sang sin Pahpah Inkuhsrao kuhlwacng ac luhngse. Sahyac na puhla mwe insewowo ac pahkotwen lal pa ma in eis, kuht ahkkweye kena yohk it tiac sang kweok nuh sin God.

Finne fuhkah fuhfahsryucsr lasrinmahsrlosr ac Pahpah Inkuhsrao ac Jisus Kraist, kuht kuh in sulwaclah in forlah nuh ke Elos ac in fototo nuh Yohrohlos. Elos fah kahsruh kuht. Ke Mwet Lahngo fahk nuh sin mwet Nephite tukun Moulyak Lal:

“Ac Pahpah tuhmuhk El suhpweyucme tuh Nga in kuh in srihpsrihpyak fin sahksin soko; ac tukun Nga srihpsrihpyak fin sahksin soko, tuh Nga in kuh in kohlma mwet nuhkwewa nuh Yuruk, …

Ac ke srihpac se inge Nga srihpsrihpyak; ke ma inge, in fal nuh ke kuh luhn Pahpah Nga fah kohlma mwet nuhkwewa nuh Yuruk.”¹¹

In kohlma nuh sin Mwet Lahngo lasr, kuht enenuh in yohkwelihk luhlahlfongi lasr ke El, oraclah ac karihngihn olwelah, ac us Nguhn Muhtahl yohrohsr. Kuht enenuh in mukwikwi ke luhlahlfongi, ukwe kolyuck sin Nguhn Muhtahl. Ip nuh kwewa orwacni ke kuhfa luhn leum. Pwacye, atac wo emet Nga etuh in fototo nuh yurin God pa in ahkolah ke nuhnak ac ipeis nwacsnwacs ke kuhfa luhn Leum wik nuh kwewa.

Kawuck se lasr fin acn South Africa akacsruhi fuhkah el sun akihlen se inge. Ke Diane el mempucr sasuc, el wi branch se ma fototo nuh ke acn Johannesburg. Sacnri sac, ke el muhta in alu, ohiyac lom ke alu ah oruh deacon el in tiac kuh in liyacl ke elos sang kuhfa luhn Leum. Diane el ahsor tuhsruhk el tiacna fahk kac. Mempucr sahyac akihlen ma sikyak ac fahkwack kac nuh sin prestuhn luhn branch tukun toeni se. Ke lutlut luhn sacnri muhtwacack, Diane el kolyak nuh ke infuckihl mwesahs in lutlut.

Mukul luhn priesthood utyak. El sikuck muhtuhnte, ahkinsewowoye kuhtin flao, ac sang nuh sel ip sac. El kang. El sulpac sikuck muhtuhnte ac ahkinsewowoye kihtin kof, ac sang nuh sel cup se. El nihm kac. Tukun, oasr nuhnak luo lal Diane. Ma se met, “Oh, el [mukul priesthood se] oruh ma se inge sik sifacna.” Ac na, “Oh, El [Mwet Lahngo] oruh ma se inge sik sifacna.” Diana puhla luhngse luhn Pahpah Inkuhsrao.

Akihlen lal ke kihsackuhnlah luhn Mwet Lahngo kahsruh el in puhla fototo nuh yohrohl ac oraclah kena yohk lal in lihksreni puhla se insiyacl, tiac sacnri muhkwena, tuh lwen nuh kwewa. El akihlen muh finne el muhtana in alu in ipeis ke kuhfa luhn Leum, olwelah el oraclah ahksasucye Sacnri nuh kwewa pa ma lal sifacna. Kuhfa luhn Leum kahsruh—ac kampare in kahsruh el—Diane puhla kuh luhn luhngse luhn God, akihlen paho luhn Leum in moul lal, ac fototo nuh yurin Mwet Lahngo.

Mwet Lahngo El ahkkahlwemye muh kuhfa luhn Leum pa yohk srihpac nuh ke pwelucng in nguhn. El fahk:

“Ac Nga usot nuh suwos sie masap tuh kowos in oruh ma inge [ipeis ke kuhfa luhn Leum]. Ac kowos fin oruh ma inge pacl nuhkwewa kowos insewowo, tuh kowos muhsahiyuckyak fin yot Luhk.

“Tuhsruhk kuhtwena mwet inmahsrlowos suc fah oruh yohk liki kuh srihk liki ma inge tiacna muhsahiyuckyak fin yot Luhk, tuhsruhk muhsahiyuckyak fin sie pwelucng puhkpuhk; ac ke af kahklac, ac sronot tuhkuh, ac eng uh uk, ac srihngihl faclos, elos fah puhtatlac.”¹²

Jisus El tiacna fahk “fin af kahklac,fin sronot tuhkuh, ac fin eng uh uk” tuhsruhk “ke.” Wacngihn mwet kuh in kahing liki ma upac luhn moul uh; kuht nuh kwewa enenuh luhng ma tuhkuh ke ipeis kuhfa luhn Leum.

Ke lwen in moulyak luhnMwet Lahngo, mwet tuhma lutlut luo lal fahsr nuh ke acn se pahngpahng Emmaus. Tiac etwack, Leum moul weluhlos ke fuhfahsryucsr lalos. Ke elos fuhfahsryucsr, El lotwelos ke ma suhmuhslah. Ke elos sun acn sac, elos suli El in wi mongo yohrohlos.

“El muta in welultal mongo, na el eis bread ac pruhlac kac, na el kuhnsaclihk, ac sang nuh seltal.

“Na ikacklah muhtahltahl ac eltal akihlenuhlack; ac in pacl sacna el wacngihnlac liki ye muutahltahl.

“Na eltahl fahk nuh sin sie sin sie, Yac insiacsr tiac fucsrfucsryak ke engan, oana sie e tayak in kuht, ke el sramsram nu sesr inkacnek uh ac akuhteyac nuh sesr ke Ma Suhmuhslah?

“Eltahl suhlahklahk na tuyak ke ao sac pacna, ac foloklac nuh Jerusalem, ac konack mwet tuhma lutlut singoul sie, wi kuhtuh pac mwet sahyac uh.”

Ac na elos fahkwelihk nuh sin Mwet Sap sahyac lah “Leum el moulyak. …

Na mwet luo ah ahkkahlwemye nuh selos ma sikyak inkacnek ah, ac ke eltahl akihlenack Leum ke el kuhnsaclihk bread uh.”¹³

Kuhfa luhn Leum kahsruh pwacye kuht in etuh Mwet Lahngo lasr. Oacyacpac ahkacsmakihnye kuht ke kweok suwos lal. Fin moul uh oacna sie pwacye, kom ac Nga fah tiac moulyak; kom ac Nga fah tiac kuh in tu nwacsnwacs ye muhtuhn God. Ke nuhnak se inge, Nga tarilacna moul se inge tiacna oacna sie.

Ke pacl sefanna, nga kuh in fahk suwos muh mweyen iwaclah luhn Jisus Kraist, sahflah, ke atac ne tok ma pahtpaht, wacngihnlac ma tiac suwos. Ma nuh kwewa tiac suwos fin moul uh fah oruh suwos.”¹⁴ Moul lasr ingacna fah tiac eklac ingacna, tuhsruhk ke luhngse, kuhlwacng, ac pahkotwen luhn God, kuh nuh kwewa fah eis yohk liki kuht kuh in eis, yohk liki kuht kuh in eis ne tok, ac yohk liki kuht kuh in finsrak ke. Ma olwelah nuh sesr lah “God ac fah eela sroninmutalos nukewa. Ac fah wangin misa, wangin asor ku tung ku keok, mweyen ma nukewa meet ah wanginla.”¹⁵

Finne kom tu suwohs kuh tiac wo yurin God, Nga suli kom in fototo nuh yurin Pahpah Inkuhsrao ac Jisus Kraist, Mwet Sang ac Mwet Eis emet ke ma nuh kwewa wo. Nga suli kom in wi toeni in kuhfa luhn Leum wik nuh kwewa ac ipeis ke kuhfa muhtahl luhn monin Mwet Lahngo ac srah. Nga suli kom in puhla fototoiyacn God ke El ahkuhtweyac nuh suwos, ke El pa nuh sin mwet tuhma lutlut mahtuh ke “kunsalik bread [uh].”

Ke kom oruh, Nga olwelah nuh sum kom ac fah puhla fototo nuh sin God. Puhla in tohrkahskahs, puhla kom eis, ac nuhnkuh koluk fah wacngihnlac. Puhla inge ac fah wacngihnlac liki puhla in luhngse yohk, ac kuloh nuh ke mwe sang Wen Nahtuhl Pahpah Lucng. Ke kuht fototo nuh yurin God, kuh yohk luhn iwaclah luhn Jisus Kraist fah tuhkuh nuh ke moul lasr an. Ac, oacna ke mwet tuhma lutlut fahsr nuh ke acn Emmaus, kuht ac fah konwacack muh Mwet Lahngo fahsr siskacsr. Nga pa fahkwack ac loh ke inen Jisus Kraist, amen.