“Bwe In Maron̄ Kan̄ōltok Aolep Armej n̄an Eō”

Ro jeiū im jatū jitenbōro, ke kōm̧ ar jokwe ilo Africa Southeast Area, Iaar pukot naan in kapilōk jān Elder Wilford W. Andersen jān Jiljilimjuonn̄oul eo n̄an Ro Rekwojarjar rej pād ilo jeram̧ōļ. Juon iaan kapilōk ko an rekabwlōn̄lōn̄ eaar kwaļo̧ki n̄an eō en̄in: “Oktak eo eļap kōtaan eo ej leļo̧k im eo ej bōk, bwe eo ej bōk eļap ļo̧k jen maron̄.”

Katak in ej iokļo̧k wōt menin jipan̄ eo an Kabun̄. N̄e membōr rejjab maron̄ kake aikuj ko aer make, innām rej etal m̧okta ippān baam̧le ko aer. Ijoke, n̄e emenin aikuj, remaron̄ barāinwōt etal ippān ritōl ro an Kabun̄ in ijo jokwe ie n̄an jipan̄ kōn aikuj ko aer.¹ Ro uwaan baam̧le eo im ritōl ro jokwe ie im ro repaak tata n̄an ro reaikuj, ekkā aer lo ejja jekjek kein, im meļeļe wāween eo em̧m̧an tata n̄an jipan̄. Kōn kea eo aer n̄an ro rej leļo̧k, ro rej bōk jipan̄ ekkar n̄an jon̄ok in rej m̧ōņōņō im lukkuun laudin̄din̄.

Unin kōnono eo—“Oktak eo eļap kōtaan eo ej leļo̧k im eo ej bōk, bwe eo ej bōk eļap ļo̧k jen maron̄” —barāinwōt lo menin jipan̄ ko an jetōb. Jemedwōj Ilan̄ im Nejin, Jisōs Kraist, rej lukkuun Riletok ro. Toon wōt ad kōttoļo̧k kōj jen Er, toon wōt ad ettoļo̧k. Jej jino in kōļmenļo̧kjeņ bwe jej bōk tiram̧o im jej dāpij kōjeram̧m̧an ko. Ej ļapļo̧k ad reito-reitak, jab kile men ko rekkar, im en̄jake burom̧ōj—em̧ool metak—jen men ko rejjab ekkar jej iiooni. N̄e men ko rejjab ekkar rej joon tok kōj, n̄e jej kōttoļo̧k kōj jen Anij, men̄e men ejjab ekkar edik ak eļap. Jej en̄jake bwe Anij ewōr juon an jerbal n̄an kōkm̧anm̧anļo̧k men ko—ilo iien eo em̧ōkaj!

Bwe oktak eo jaar kōm̧m̧ane n̄an Jemedwōj Ilan̄ im Jisōs Kraist ej waļo̧k ilo Bok in Mormon ilo keidi kōta eo an Nipai im lōm̧aro jein, Leman im Lemuel.

• Nipai ewōr “ikidelel eļap n̄an jeļā jerbal eo an Anij, ijoke, [e] eaar akweļap n̄an Irooj” im buruōn eaar bārōk.² Ilo turājet eo juon, Lamen im Lemuel raar ettoļo̧k jān Anij—raar jab jeļā kōn E.

• Nipai eaar bōk kūr ko reidajon̄jon̄ ilo ejjeļo̧k ellotan, ak Leman im Lemuel “raar ellotan ilo elōn̄ men ko.”Ellotan ej waanjon̄ok in an juon ajri m̧akoko.Jeje ko rekwojarjar rej kwaļo̧k bwe “raar ellotaan kōnke raar jab jeļā kōn kōm̧m̧an ko an Anij eo eaar kōm̧anm̧an er.”³

• Nipai eaar epaake Anij im kōm̧m̧an bwe en kile im bōk “tūriam̧o kake”⁴ eo an Anij. N̄an keidi, ke Leman im Lemuel raar lo Nipai bōk kōjeram̧m̧an ko, raar “lōkatip ippān kōnke raar jab meļeļe kōn m̧akūtkūt ko an Irooj.”⁵ Leman im Lemuel raar ļōmņak rekkar n̄an būki kōjeram̧m̧an ko rej loi im ļōmņak bwe renaaj bōk eļap ļo̧k.

• Nipai eaar kōļapļo̧k tōmak eo an ilo Anij n̄an kadedeļo̧k ta eo kar kajjitōk bwe en kōm̧m̧ane.⁶ N̄an keidi, Leman im Lemuel, “raar kijn̄en̄e buruweer, … raar jab reilo̧k n̄an Irooj āinwōt rej aikuj.”⁷ Raar en̄jake bwe Irooj em̧ōņōņō in uwaaki kajjitōk ko raar jab kajjitōk kaki. “Bwe Irooj ejjab kwaļo̧ki men kein n̄an kōm̧,” raar ba, bōtaab raar jab kajjitōk.⁸ Menin ej waajon̄ok in matōrtōr.

Kōnke raar ettoļo̧k jān Rilo̧mo̧o̧r, Leman im Lemuel raar ellotaan, jino jum̧ae, im raar jab tiljek. Raar en̄jake bwe mour in ejjab jejjet im bwe raar jab ekkar n̄an jouj eo an Anij. N̄an keidi, kōnke eaar epaakeļo̧k Anij, Nipai eaar aikuj in kile bwe mour in eaar jab lukkuun jejjet n̄an Jisōs Kraist. Men̄e eaar ejjeļo̧k an bōd, Rilo̧mo̧o̧r eaar lukkuun en̄taan.

Ilo ad epaakeļo̧k Jisōs Kraist ilo aolep ļōmņak im kōttōpar ko an būruwōd, toon wōt ad kam̧m̧oolol kōn en̄taan eo An, naaj toon wōt ad kam̧m̧oolol kōn jouj im jeorļo̧k in bōd, im toon wōt ad kōņaan ukweļo̧k im erom āinwōt E. Jon̄on ettoļo̧k eo ad jān Jemedwōj Ilan̄ im Jisōs Kraist eaorōk, ak iaļ eo jej jibadōk ļo̧k eļap ļo̧k an kauwōtata. Anij eļap ļo̧k an m̧ōņōņō ippān rijero̧wiwi ro rej ukweļo̧k ro rej kajieon̄ in epaakeļo̧k E ijeļo̧kin ro rej kakwojarjar er make, pukot ruwōn doon ro, āinwōt Parisi im scribe ro etto, raar jab kile jon̄an aer aikuj in ukweļo̧k.⁹

Ke iaar juon ajri, Iaar al in Kūrijm̧ōj ilo kajin Swedish me eaar katakin eō juon katak ekajoor—eppaakeļo̧k Rilo̧mo̧o̧r ekōm̧m̧an bwe jen oktak. Al eo eaar al āinwōt in:

Eļan̄n̄e jej pukot kilen iaļļad make n̄an ijubon̄ ijuraan ilo Bethlem “ijo Anij ilo bon̄ eaar babu ie,” emaron̄ em̧m̧anļo̧k ad kile Rilo̧mo̧o̧r āinwōt juon menin letok jān juon Jemedwōj Ilan̄ eo ej, iakwe. Ijeļo̧kin en̄jake jekkar n̄an kōjeram̧m̧an ko im jouj eo An, jej ejaake juon ikidelel eļap n̄an kabōjrak an Anij būrom̧ōj.

Jekdo̧o̧n iaļ rot ak ettoļo̧k eo ad n̄an Jemedwōj Ilan̄ im Jisōs Kraist, jej maron̄ kālet n̄an oktakļo̧k n̄an Er im epaakeļo̧k Er. Renaaj jipan̄ kōj. Ke Rilo̧mo̧o̧r eaar jiron̄ ļo̧k Rinipai ro ālkin Jerkakpeje eo An:

“Im Jema eaar jilkintok Eō bwe In maron̄ toto ioon debāāl; im ālkin kar kotak Eō ioon debāāl, bwe In maron̄ kan̄ōltok armej otemjej n̄an eō. …

“Im kōn uun in kar kotak Eō; kōn menin, ekkar n̄an kajoor eo an Jema Inaaj kan̄ōltok aolep armej otemjej n̄an Eō.”¹¹

N̄an epaakeļo̧k ad Rilo̧mo̧o̧r, jej aikuj kōļapļo̧k ad tōmak ilo E, kōm̧m̧an im kōjparok bujen ko, im bōk ippād Jetōb Kwojarjar. Jej aikuj barāinwōt em̧akūt ilo tōmak, bōk jetōbin tōl eo jej būki. Aolepen men kein rej itok ilo kwojkwoj eo. Ilo m̧ool, wāween eo em̧m̧antata ijeļā kake n̄an epaakeļo̧k Anij ej lukkuun pojak im bōk m̧ōttan kwojkwoj eo ilo erreeo kajjojo wiik.

Juon m̧ōttam̧ ilo South Africa eaar kwaļo̧k wāween an kar kile menin. Ke Diane eaar juon rioktak eo ekāāl, eaar pād ilo juon branch itulikin Johannesburg. Juon Jabōt, ke ej jijet ippān jarlepju eo, elaajrak eo kar kōm̧m̧ane ilo im̧ōnjar eo ekōm̧m̧an bwe tikōn ro ren jab loe ilo iien leto-letak kwojkwoj eo. Diane eaar inepata ak eaar jab ba jabdewōt. Bar juon membōr eaar loe im kar ba ļo̧k n̄an branch būreejtōn eo ālkin kweilo̧k eo. Ke Jabōt Jikuul eo ej ijjino, Diane eaar kūr ļo̧k e n̄an kūlaaj ruum̧ eo.

Juon rikabwijer priesthood eaar deļo̧n̄tok. Eaar bukwelōlō, kōjeram̧m̧an pilawā eo, im leļo̧k n̄an e jidik. Eaar m̧ōn̄ā. Eaar bar bukwelōlō im kōjeram̧m̧an dān eo im leļo̧k n̄an e kap eo. Eaar idaak. Ālkin, Diane eaar wōr ruo an ļōmņak ilo wāween in: Juon “e [rikabwijer priesthood eo] kar kōm̧m̧ane menin n̄an eō.”innām “E [Rilo̧mo̧o̧r eo] kar kōm̧m̧ane menin n̄an eō.” Diane eaar en̄jake iakwe eo an Jemedwōj Ilan̄.

Liin eaar kile jon̄an en̄taan eo an Rilo̧mo̧o̧r ilo an jipan̄ bwe en epaake ļo̧k E im ejaake juon mejatoto in ikidelel n̄an kōjparok en̄jake eo ilo būruwōn, ejjab wōt ilo Jabōt ak kajjojo raan. Liin eaar kile bwe men̄e ej jijet ippān juon jarlepju n̄an bōk kwojkwoj eo, bujen ko ej kōm̧m̧ani kajjojo Jabōt rej an make. Kwojkwoj eo eaar jipan̄—im enaaj jipan̄ wōt—Diane ej en̄jake kajoor in iakwe eo an anij, kile pein Irooj ilo mour eo an, im an epaakļo̧k n̄an Rilo̧mo̧o̧r.

Rilo̧mo̧o̧r eaar kwaļo̧k kadkadin kwojkwoj eo eaorōk n̄an juon pedped in jetōb. Ekar ba:

Im Ij lewōj n̄an kom̧ juon kien bwe kom̧in kōm̧m̧ani men kein [bōk m̧ōttan kwojkwoj eo]. Im eļan̄n̄e kom̧ij kōm̧m̧ani men kein iien otemjej jeram̧m̧an n̄an kom̧, bwe kom̧ij ekkal ioon Aō ejm̧aan.

“A jabdewōt eo ilubwiljimi enaaj kōm̧m̧an eļapļo̧k ak dikļo̧k jān men kein rejjab ekkal ion Aō ejm̧aan; a rej ekkal ion juon pedped eo ebokbok; im n̄e wōt ej wōtļo̧k, im ibwijleplep ko rej itok, im kōto ko rej m̧akroro, im wōtļo̧k ioer, renaaj bun̄.”¹²

Jisōs eaar jab ba “eļan̄n̄e ewōt, eļan̄n̄e ebwijleplep, im eļan̄n̄e lan̄ ejadametmet” ak“n̄e..” Ejjeļo̧k juon ej pojak n̄an idajon̄jon̄ ko an mour; jej aolep aikuji kōjparok eo me ej itok ilo ad bōk m̧ōttan kwojkwoj eo.

Ilo raan in Jerkakpeje eo an Rilo̧mo̧o̧r, rijilōk ro ruo raar etal n̄an juon bukwon etan Emmaus. Raar jab kile, Irooj eo ear jerkakpeje ilo iaļ eo aer ļo̧k. Ke rej ilo̧k, Eaar katakin er jān jeje ko rekwojarjar. Ke rej tōpar ļo̧k jikin eo, raar kūr tok E bwe en m̧ōn̄ā ippāer.

“Im ke ej itok, ej jibadek in m̧ōn̄ā ippāer, Ej bōk pilawā, im jar, im ruje, im leļo̧k n̄an er.

“Im e peļļo̧k mejeier, im rej kile e; im E m̧o̧o̧ņ ļo̧k jān er.

“Im rejro ba n̄an doon, Būruwed e jab bwil ilowad ke Ear kōnono n̄an kōj ilo iaļ eo, im ke Ear kameļeļeik Jeje ko n̄an kōjro ke?”

“Im rej jutak ilo awa eo, im jepḷaak ñan Jerusalem, im lo joñoul im juon raar kweilọklọk, im ro rej pād ippaer.”

Innām raar kam̧ool n̄an Rijilōk ro bwe “E m̧ool Irooj ear jerkakpeje. …

“Im rejro kōnnaanōk men ko rej waḷọk ñan er ilo iaḷ, im kōjkan aer kile E kōn ruje pilawā.”¹³

Kwojkwoj eo ej lukkuun jipan̄ kōj jeļā ad Rilo̧mo̧o̧r. Ej barāinwōt kakeememej kōj kōn en̄taan eo An. Eļan̄n̄e mour in en kar lukkuun jejjet, kwe im n̄a jeban kar jerkakpeje; kwe im n̄a jeban kar maron̄ jutak erreeo im̧aan Anij. Ilo kautiej menin, Ij kam̧m̧oolol bwe mour in ejjab jejjet.

Ejja tōrein wōt, imaron̄ kwaļo̧k bwe, kōn Pinmuur eo an Jisōs Kraist, em̧ool, kōn juon meļeļe an men otemjeļo̧k indeeo, enaaj ejjeļo̧k kalijōkļo̧k. “Aolep kalijōkļo̧k ko kōn mour remaron̄ in jim̧we.”¹⁴ Jekjek ko ad kiiō remaron̄ jab oktak, ak kōn an Anij, tiriam̧o kake, jouj, im iakwe, jenaaj bōk eļapļo̧k jen jon̄an, eļapļo̧k jen ad maron̄ bōke, im eļap ļo̧k jen ad maron̄ kōjatdikdik kake. Kar kallim̧uri kōj bwe “Anij enaaj kōm̧ōraik jān [mejer] dānnin kōmjaaḷaḷ otemjej, im enaaj ejjeḷọk bar mej, im re jāmin bar liaajlọḷ, ak jañ, ak eñtaan; bwe men ko ṃokta re jako.”¹⁵

Jekdo̧o̧n ia eo kwoj jutak ie kōn jemdo̧o̧n eo am̧ ippān Anij, Ij kūr eo n̄an kepaakļo̧k eok n̄an Jemedwōj Ilan̄ im Jisōs Kraist, Rikake eo Ejjeļo̧k Jem̧ļo̧kin im Riletok eo an aolep men rem̧m̧an. Ij kūr eok n̄an pād ilo kweilo̧k eo an kwojkwoj kajjojo wiik im bōk m̧ōttan ānbwiin im bōtōktōkin eo ekwojarjar ad Rilo̧mo̧o̧r. Ij kūr eok n̄an en̄jake an Anij uraak waj ilo An kar kwaļo̧k kajien n̄an eok, āinwōt An kōm̧m̧ane n̄an ro rikaļooraņ ro etto ilo “ruje pilawe eo.”

Ilo ami kōm̧m̧ane, Ij kallim̧ur bwe kom̧ naaj epaake ļo̧k Anij. Piktok in ajri, jekkar, im matōrtōr renaaj jako. Kain ļōmņak im en̄jake rot in renaaj bōk jikier kōn en̄jake ko reļļap an iakwe im kam̧m̧oolol kōn menin letok eo an Jemed Ilan̄ kōn Nejin. Ilo ad epaake ļo̧k Anij, kajoor in Pinmuur eo an Jisōs Kraist enaaj itok n̄an mour ko ad. Im, āinwōt ro rikaļoor ro ļo̧k n̄an Emmaus, jenaaj lo bwe Rilo̧mo̧o̧r eo eaar aolep iien epaaktok. Ij kamool ilo etan Jisōs Kraist, amen.