“Pwe Ien Kak Ale Irail Koaros en kohdo Rehi”

Ni ahi kin koukousoan nan wein Africa, I alehda kaweid iou sang Elder Wilford W. Andersen me wia emen tohn Isiakano me pid duwen sewese Souleng kan me kin mih nan kahpwal en men mwenge. Sang nan ehu kaweid mwahu kan me e kin ehukiheng ie iei met: “Dohpeseng en nan pwungen me kin kihwei men oh me kin alehdi, kin kakairda an me kin alehu madamadau en akpweipwei.”

Koasoandi wet kohsang pahn pali me kin kihda sawas sang Mwomwhdisoht. Ni ansou me tohn mwomwohdisoht pahn kin solah kak apwaliala pein arail anahn kan, irail kin tepte sohpeilahng arail peneinei kan. Mwuri, ma e konehng, ah irail pil sohpeilahng kaun en Mwomwodiso kan pwe ren kak sewese kin irail kisin anahn en ansou kan.¹ Peneinei oh Kaun kan nan mwomwohdisoht kin karanih ni mehlel irail me kin anahne sawas kan, pwehki sang arail ese oh iangeh kehn songen irair me duehte mwo, oh wehwehki ia sawas me pahn keieu mwahu .Pwehki kerenpenehn nan pwungarail ong me pahn kin kihla, soun ale sawas kan sang ni songen mwohmw wet kin kapingki oh ni ansouohte eleiong katikalahn pekipek sawas.

Ire wet—“wen dohpeseng en nan pwungen me kin kihwei oh me kin ale, kin kalaudehla an me kin alehu madamadau en alehdi soahngkan me konehng”—e pil wia mehkot mwahu me kitail kak alehda oh doadoahngkiong pali ngenitail. Samatail Nanleng oh Sapwelime Iehros, Sises Krais, iei me wia karasaras mwahu me nda kihwei. Ni atail kin kadohwan kitail dohsang Ira, kitail kin pehm me kitail konehng ale me mwahu. Kitail kin medewehda me kitail konehng ale mahk oh kapai kan en kodohng kitail. Kitail kin mengei en kileng seli, kilangada souitar kan, oh pehm insensued—pil medekla—sang sapahrek kan me kitail alehdi. Ansou me songen sapahrek wet ah kin lalaudla oh lel wasa iou me inenen kaweikek, e uhd kadohwan kitail sangehr Koht, soahng me tikitik kan pil kin wiahla mehkot laud rehtail. Kitail eri kapwukoahki me Koht pahn apwaliala mehkoaros—oh ansou mwadang!

Wekpeseng wiawidahr sang atail kin karaniala Samatail Nanleng oh Sises Krais me kasansaldahr nan Pwuken Mormon ni ah karasa nan pwungen Nephi oh rie pwutak laud ko Laman ih Lemuel:

• Nephi ahneki “ineng laud en esehla soang kan koaros me sohte kin sansalda sang Koht, eri, [e] peki rehn Kauno” oh mohngiongi eri marahrada.² ahpw, Laman ih Lemuel dohsang Koht—ira sehse ihs IH.

• Nephi alehda pwukoah apwal kan oh sohte kaulim kihla, ah Laman ih Lemeul, “kin mwengininginki soahng toht.” Mwenginingin nan iren pwuk sarawi duwehte seri me kin lokaia tohto. Nan ire me ntingdi me “ira mwenginingin pwehki ira sohte ese sapwellimen Koht doadoahk koaros me kepik irahda.”³

• Nephi ni eh kin karanihla Koht kahreiongehr ah kak kasawihda oh kin kapingki Sapwelimen Koht “limpoak oh mahk.”⁴ Ni karasepe, ni ansou me Laman ih Lemuel tehkada me Nephi wie ale ale kapai kan, ira “eri kailongkihda pwehki ira sohte wehwehki mehkan koaros me Kauno kasalehdahr.”⁵ Laman ih Lemuel kilkilangete me kapai kan koaros me kodohng ira wia akpweipwei ong ara doadoahk oh pil kasik me e pahn laudsang mwo.Ira eri kin kasawih kapai kan me Nephi ahneki me “mehkot sapwung iou” me wiawiong ira. Iei met iren pwuk sarawi duehte nsensued en sohte alehdi soahng kan me konehng.

• Nephi kin rapahki kalaudlahn ah pwoson rehn Koht, pwehn kapwaiada soang koaros ni kupwure.⁶ Me weksang, Laman ih Lemuel, “ ni ara kohwahkihla keptakai nan ara mongiong ko, … sohte kin idawehnla Kauno ni duwen me e konehng .”⁷ E mwomwen me ira kin koskose me Kauno udahn pahn kihdo pasapeng pen ara peidek kan koaros ma ira pahn kin anahne. “Kauno sohte kin kasalehdohng kiht soang kan koaros me se anahne ese,” Ira kosoia, ahpw ira sohte nantieng oh idek.⁸ met wia iren kepit de peikasal.

Pwehki ara lamalam ah dohsang Sounkomouro, Laman ih Lemuel ahpw mwengininginehr, ira suhsuwedla oh pil sohla ahneki pwoson. Ira pehm me mour wet me kapweipwei oh kasik ira pahn ale Sapwelimen Kauno kalahngan kan. Ah Nephi ni ah weksang ira, me kin karanihte Koht, kilangadahr me mour wet wia mour apwal ong Sises Krais. Mendahte sohte dipe, Sounkomouro pahn lokolok laud.

Ni atail karanihla Sises Krais nan atail madamadau kan oh wiewia en atail mohngiong kan, oh wen atail kin kapingki Sapwellime lokolokol ni ah mwakelel, kitail kin kapingki sapwellime kalahngan oh mahk, oh kitail kin men koluhla oh duehla Ih. Uwen doh me ire nan pwungetail oh Samatail Nanleng iangahki Sises Krais me inenen kesemwpwal, ahpw wasahkan me kitail kohkolahng ihme keieu kesempwal. Koht kin perenkihda irail me dipan ahpw kin koluhla kan,ni arail kin nantieng karanihala IH sang me pwoson men, me kin kak kasawihda sapwungkan,me duwe Parisi kan oh soun nting mah kan, ni arail sohte kin kak kasawihda me irail anahne koluhla laud.⁹

Ni ahi wia kisin seri men, I kin koulki koul en krismas en Sweden iou ni ah wia kaweid mwahu oh kesemwpwal iou—karanihala atail Sounkomouro kin karehiong atail wekila.Kosoi pen koulo kin nda me:

Ni atail pahn kin kapwureikitaillahng nan Bethlehem “wasa Koht komkomoal ie nan dowen mahn ko,” kitail pahn kak kilangada me Sounkomouro wia kisakis kesemwpwal ehu sang, Samatail Nanleng limpoak. Kaidehn kitail en ahneki pepehm me e kosondier kitail en ale Sapwelime kapai oh limpoak, eri kitail kakairda ineng laud en irehdi me kahpwal kan me Kauno kowahkier.

Sohte katepe iawasa kitail wie sohsohpai ansou kiset de uwen dohlasang Samatail Nanleng oh Sises Krais, kitail kakete pilada kitail en sohpeilahng Ira oh karanihrahla. Ira pahn sewese kitail. Ni soahng me Sounkomouro mahsen kihong Nephites ko mwurin Eh iasadahro.

“Oh Semeio kadariehdo pwe I en kak langadahng ni lopwuo; oh mwurin Ei pahn kalohpwualahu, I ahpw pahn kak ale irail en kodo Rehi, …

“Eri sang ni kahrepe wet me kahreiong ahi pahn langadahr; sang ni manaman me mih rehn Semeio I pahn ale irail en kodo rehi.”¹¹

Ni atail pahn kak keila oh karanihla Sounkomouro, kitail anahne kalaudehla atail pwoson Ih, wiada oh kolokol inou sarawi kan, oh ale Ngehn Sarawi en mihmi rehtail. Atail wiewia kan anahne sang ni pwoson, kapwaiada kaweid sang pali ngeni oh doadoangki.Wiepe kan koaros kin patpene ni ansoun kamadipw sarawi. Iei, ih me keiou mwahu me I ese me ke pahn kak karanihkihla Koht iei kaunopada mwahu omw madamadau oh ale sang ni omw warohng en ale kamadipw sarawi nan wihk koaros.

Kompokepaht men nan palikapi en wein Africa ehukieng kit dahme eleiong en kak diarada oh wehwekihla mwahu kahrepe wet. Ni ansou me Diane apwtehn iangala mwomwodisoht,e kin ieiang branch nan Johannesburg. Ehu rahnsarawio, ni eh wie mwomwohd nan ihmw sarawio, e sohte sansal wasa e mwohd ie nan ihmw sarawio eri kareiong deacon o ah daulih ansoun kamadipw sarawio. Diana mwomwen nsensuwedkihla mwekid o ahpw sohte lokaia. Emen tohn ihmw sarawio kilangada dahme wiawio oh kehse ki branch president o mwurin sarawio. Ni ansou me Sunday school tepda, Diana ahpw pakahr la nan ehu pere me sohte towe.

Emen me kin kolokol Prihstuhd o pwedlongodo, kelepwidi, kapaiada pilahu, oh kapalahng ekis. E kangala. Ih eri pil kelepwidi oh kapaiada pihlo oh pil kapalahng ih sin kepo. E pil nimala. Madamadau riahu kodohng Diane ansouohte: Keiu, “Oh, pwutak menet [me kol prihstuhd] wia met ni ahi kelehpw.” Oh pil, “Ih [Sounkomouro] wia met pwehki ngehi.” Diane pehm limpoak en Samatail Nanleng.

Ni ah diaradahr me Sounkomouro wiahier soangen meirong et pwehki Ih, eleiong en kak karanihla Kauno oh apwde kehlail da ahnekihla laudlahn ineng en koledi dahme e pehmadahro nan ah mongiongo, kaidehn rahn sarawi te, ahpw rahnkoaros. E diarada me e kin mwohd nan ihmw sarawio oh ale kamadipw sarawi, inou sarawi kan koaros me wiada rahnsarawi kapw kan koaros ongete ih. Kamadipw sarawi sewese—oh doudoulahte sewese—Diane pehm manaman en limpoak en Kauno, kilang limen Kauno nan ah mour, oh karaniala Sounkomouro.

Sounkomouro kasalehdahr me kamadipw sarawi wia mehkot kesemwpwal ong poahsoan en pali ngeni. E masanih:

“Eri I pwilikihdieng uhk kosoned kan pwe ken kak wia me pwukat [ale kamadipw sarawi]. Oh ma ke pahn kin kapwaiada soang ka koaros mehd pai kowe, pwe wiawi ki dahr Ei kehl.

“Apw ma emen nan pwungemwail pahn wia me laudsang de tikitiksang me e sohte wiawikihda ahi kehl, ahpw wiawi kihda poason me luet; oh ni ansou me kotou o kin mweredi,oh lapakehda,kisinieng poukedi wasa, kawehla wasa koaros rehrail,irail pahn pwopwidi.”¹²

Sises sohte mahsanih “ma kotou pahn mworedi, ma lapake pahn wiawi, oh ma kisinien, ahpw e ketin mahsanih ansou.” Sohte me pahn kak pitsang kahpwal; kitail koaros anahne perehre me kin kohsang kamadipw sarawio.

Rahn me Sounkomouro iasadao, Sounpadahk riemen seiloklahng nan ehu kanihmw me adaniki Emmaus. Ni ara sohte kasawihda, Kauno me iasadahro iang irahda nan ara seilok o. Ni arail kokohwei, E padahngki padahk kei sang nan pwuk sarawi. Ansou me re lela wasa re kokolahng iehu, ira eri luke en iang ira sak en soutik.

“Oh e pil wiawier, ni Eh ketdi oh iang ira sak, ahpw ale pilawahu. oh kapaiada, oh dolung peseng, eri kieng ira.

“Eri ira eri kilangada wasa, oh ira ese his Ih; oh Ih ahpw sohla mie mwohn mesera ko.

“Oh ira apw nda pene nan pwungara, E sohte sairada ata mongiong ka, ni ansou me ieiang kita kodo oh kosokosoi ong kita, sang ni ah pahk ong kita iren pwuhk sarawio?

“Oh ira eri kesihnen da nan awahw te, oh pwurala Serusalem, oh diarada [wahnpoaron ko] ni arail ehupene wie pokpokon.”

Oh ira eri kadehde ong Wahnpoaron ko me “Kauno ieias. …

“Oh ira pil kosoiahda dahme wiawi kokohdo, oh lel ni ansou me ira kasawihkihda me ihmwo sang ni ah polung peseng pilahu.”¹³

Kamadipw Sarawi kin sewese kitail ni mehlel en kak esehla duwen atail Sounkomouro. E pil wia mehn kataman ong kitail sang ni Eh sohte dipe apw ale lokolok. Ma mour wia mour pahrek iou, kowe oh ngehi sohte pahn iang iasada;kowe oh ngehi sohte pahn kak kesihnen da mwohn Koht wia aramas mwakelekel men. Ni songen wahu me duwe met, I inenen kaping ki mour ah sohte wia mour pahrek iou.

Ni ansouohte, I kak nda sang ni ahi pahtoukihla, pwehki Tomw en Sises Krais, ni kaimwseklahn mehkoaros, nan irair apwal wet, udahn e sohte pahn mie songen kapweipwei wet. “Mehkoaros me kin sapahrek nan mour wet kin kak wiawi pwe en kak mwahula.”¹⁴ dahme mieier met mwein sohte pahn wekila, ahpw sang ni mahk me Kauno ahneki, eimah, oh limpoak, kitail pahn ale laudsang dahme konehng kitail en ale, laudsang dahme kitail kin koledi,oh pil inenen laudsang uwen me kitail kak koapworopworki. Kitail aleier inou me “ Koht pahn irisasang pilen mesetail ka; oh sohte pahn mie mehla rehtail, de pil insensuwed, mwahiei, oh pil medek: pwehki dahme wiawier nekier.”¹⁵

Mendahte wasa ke kesihnen ie rehn Koht, I luke iuk ken keido oh karanihla Samatail Nanleng oh Sises Krais, me wia udahn mehlel en Soun kihwei me mwahu kan. I luke iuk en iang towehda kaudek en kamadipw sarawi nan week koaros oh ale mehn iren ketemen sarawi me weliandi paliweren Sounkomouro oh sapwelime nta. I luke iuk ken pehm keren en Koht rehmwail ni Ah wiawi kihda pwehki kowe, duehte Ih ong sapwellime tohnpadahko keilahn aio, me “dolung peseng pilawahu.”

Ni omw pahn wia, I inoukihwei me ke pahn pehm uwen keren me Koht wia. Sin me ke pahn mwengmwengin ki koaros, akpweipwei, kasawih seli mehteikan pahn kokohsang uhk. Soahng pwuko pahn welialihkihda pepehm en limpoak laud oh kaping ong en Samatail Nanleng kisakis me iei Sapwelime Ieroso. Ni atail pahn karanihla Koht, manaman en Sapwelime Sises Krais Tomwo pahn kakala kohdo nan atail mour. Eri, duwehte sounpadahko ni ara wie kokohwei Emmaus, kitail pahn diarada me Sounkomouro kin mihmite limwahtail kohwei. I udahn wia soun kadehde men oh pil kadedehki ni mwaren Sises Krais, amen.