Taan Kairiiri Aika Kakannato Bon Taan Ririmwi aika Kakannato
Iai n taai tabetai ae te kawai e taraa n roo, ma reitinako n ririmwin te tia Kamaiu. E ataa te kawai, ni bon arona, Bon Ngaia te kawai.
Ngke ai 12 au ririki, e kairai tamau ni kaeman iaon maunga. Ti uti n te aoa 3:00 n te ingabong, ti katauraoi ara aoti, ao ni mwananga nako buakonikai irarikin te maunga n te rootongitong. E ngae n anne I rangi n tangiria ni kaeman ma tamau, n te tai anne ao e nako nanou. I tuai man roroko ni maunga aikai mai imwaaina, ao I aki kona n noora te kawai ae na touaki—ke bwaai riki tabeua, ibukin te iango anne! Tii te bwai ae I kona n noria bon ti te tooti ae uarereke ae aki bati n oota ni kaotai taian kai aika a mena i mwaaira. Ao ngkana arona bwa e marannako au aoti ao e bwaka—e kona n noora kawaina are nako iai? Ma e karaua nanou te iango aio: “E ataa te tabo ae nako iai Tamau. Ngkana I rimwina a na NAKORAOI bwaai.”
Ao a NAKORAOI bwaai ni kabane. N tokina e a otirake taai. Ao ti a bon uaia n rangi ni kukurei. Ngke ti a oki nakon mweengara, tamau e a kotea taubukin te maunga ae tamaroa are taraa raoi riki nakon maunga ake tabeua. “Arei Windy Ridge” e taku. “Arei are tamaroa te kaeman iai.” N te tai naba anne, I a ataia bwa I tangiria ni manga oki n tamwarakea Windy Ridge n te taina.
N ririki ake imwiina, I a bon ongoongora taekan Windy Ridge iroun tamau, ma ti tuai manga okiria—ni karokoa n te bongina, 20 te ririki imwiina, I wetea tamau ao n taku, “Ti a nako nakon Windy.” Teuana riki te tai ao ti katauraoi ara aoti ao ni waaki rake nako rarikin te maunga. I aki taneiai n riki bwa te tia toka iaon te aoti n au ka 30 n ririki, irarikina I miimi n namakina te nako n nano n aron are I namakinna ngke 12-au ririki ngke te ataeinimwaane ngai. Ma e ataa te kawai tamau, ao I iriiria.
N tokina ti roko i taubukin Windy. E rangi ni karika te kukurei, ao te namakin ae korakora ae reke irou, bwa I a kan oki—tiaki ibukiu n te tai aei ma ibukin kainnabau ma natiu. I tangiria bwa a na namakina te bwai are I a tia n namakinna.
N ririki aika mwaiti, e a mwaiti au tai ni kairia naati mwane ao tabeman ataeinimwaane nako taubukin maunga, n aron ae kairai tamau. Namakin aikai a kaira au iango ni iangoia raoi tera nanon te kairaki—ao tera nanon te iriiri.
Iesu Kristo, Te Tia Kairiiri ae Kakannato ao Te Tia Ririmwi ae Kakannato
Ngkana N na titirakiniko, “Antai te Tia Kairiiri ae maiu ae te kabanea ni kakannato?”—tera ae ko na taekinna? Te kaeka, ni koauana, bon Iesu Kristo. E katea te kakairi ni koaua n aron kanoan te kairiiri ni kabane.
Ma ngkana N na titirakiniko, “Antai te tia ririmwi ae te kabanea ni kakannato ae maiu?”—tiaki manga te kaeka naba Iesu Kristo? Bon te Tia kairiiri ae kakannato ibukina bwa Ngaia te tia ririmwi ae kakannato—E ririmwin raoi Tamana, ni bwaai ni kabane.
E reirei te aba bwa taan kairiiri a na riai ni korakora, E reirei te Uea bwa a na riai n nimamannei. Taan kairiiri n te aonaaba a karekea te mwaaka, ao ni kairiiri rinanon aia tarena, ao kaubwaia. Taan kairiiri n aekan Kristo a karekea te mwaaka ao te anainano “man te kaumakaki, te karawawataaki ae maan, n te karaurau ao te nimamannei ao man te tangira ni koaua.”1
N Ana taratara te Atua, a na riki taan kairiiri aika kakannato bwa taan ririmwi aika kakannato.
N na tibwai uoua namakin man au mwakuri n ibuobuoki ma ataeinimwaane n te Ekaretia are a tia n reiakinai aron te kairiiri n aron aikai.
Ngaira ni Kabane Bon Taan Kairiiri
N te tai ae aki maan n nako, kainnabau ao ngai ti ira te toa n te tabo ae raroa ma ara uoote ni mweengara. Imwaain te taromauri, e roko te ataeinimwaane nakoiu ao e butiai ngkana N na buoka kabutan te toa. I kaeka, “I rang kukurei ni karaoia.”
I tekateka ma riikan ake tabeman ao n titirakina are temanna are tekateka irarikiu. “Tera au mwakuri?” E tuangai bwa N na kabuta te toa mai buki inanon te umwantabu n te mwakoro are i nuuka ao ngaia e na mena n iterana n te mwakoro naba anne, ao ni uaia n airi nako mooa.
I kaeka, “I tuai man kakaraoa aio n te tai ae maan.”
E kaeka, “E RAOIROI. Ko na aki raraoma. I a tia n namakina aekakin anne ngke I waaki.”
Imwiina te kabanea n ataei n riikan n te kooram, e katabuaki uoua te wiiki imwaaina, e anga ana taeka n tain te toa. Imwiin te taromauri, riikan ake tabeman a bootaki ni katobibia man boutokaia n tuangnga bwa a kukurei ngkai ngaia kaain aia kooram.
Ngke I kawariia n te bong anne, I kunea bwa ni katoa wiiki kaain te kooram n te Nakoanibonga ae te Aaron n te uoote anne a nako ni kawariia ataeinimwaane ake tabeman ao ni kaoia bwa a na riki bwa kaain aia kooram.
Ataeinimwaane aikai bon taan kairiiri aika korakora. Ao ae e mataata raoi bwa a boutokaaki irouia kaain te Nakoanibonga ae te Merekitereka, aia karo, ao tabeman ake a reiakiniia n aia mwakuri. Ikawai aika a tararua n aekan aikai a noriia ataeinimwaane tiaki n aroia aei, ma aroia are a na riki iai. Ngkana a taekinna nakon ke aroia ataeinimwaane, a aki tiku iaon mamaaraia, Bwa, a kamatoatoa kanoan te kairiiri ae moan te korakora are a karaoia.
Ataeinimwaane, aio aron te Uea ngkana e noori ngkami. I kaoi ngkami bwa kam na tarai ngkami n te kawai aei. A na iai taai inanon maiumi ngkana kam a weteaki bwa kam na kairiiri. N taai ake tabeua, kam kantaningaaki bwa kam na riki bwa taan ririmwi. Ma au rongorongo nakoimi n te tai aio n aki ongeia bwa tera nakoam, bon taan kairiiri ngkami ao taan ririmwi n taainako. Te aroni kairiiri bon kamatataan arora n riki bwa ana reirei—bon tii man buokakiia tabeman bwa a na nakon Kristo, are a bon karaoia naake a kan riki bwa ana reirei. Ngkana ko iangoa te kan riki bwa te tia ririmwin Kristo, ao ngkanne ko kona ni buokiia tabeman bwa a na Ririmwina ao ko kona n riki bwa te tia kairiiri.
Anuam ni kairiiri e aki nako man anuam n aomata, rabakaum ni kamarurung, ke anuam n taetae n ana tabo te botanaomata. E nako man motin nanom n ririmwin Kristo. E roko man nanom n tangiria, n ana taeka Aberaam, te tia ririmwin te raoiroi.”2 Ngkana ko kona ni karaoa anne—ngkana ko aki kororaoi iai ma ko kataia—ngkanne ko a riki bwa te tia kairiiri.
Mwakurin te Nakoanibonga Bon te Kairiiri
N te tai teuana, I mena i New Zealand bwa I kawara mweengan te tina ae tii ngaia ma natina aika teniman aika a raka iaon tebwi ma teniua aia ririki. Te nati te mwaane ae 18 ana ririki ao e a tia ni karekea te Nakoanibonga ae te Merekitereka n te Tabati are imwaaina. I titiraki ngkana e a tia ni kona ni kamwakura te nakoanibonga. E kaeka, “I aki koaua bwa tera nanon anne.”
I tuanga bwa iai ngkai irouna te kariaiakaki bwa e kona n anga te kakabwaia n te nakoanibonga ibukin te karaunano ao te kamarurung. I taraa tinana, are akea irarikina temanna ae iai irouna te Nakoanibonga ae te Merekitereka inanon ririki aika mwaiti. “N au iango e na bon raoiroi, I taku, “ngkana ko na angan tinam te kakabwaia.”
E kaeka, “I aki ataia bwa e kanga arona.”
I kabwarabwara bwa e kona ni katoka baina iaon atuun tinana n atonga arana, n atonga bwa e anganna te kakabwaia man ana kariaia te Nakoanibonga ae te Merekitereka, n atonga are taku te Tamnei n ana iango ao inanona, ao ni kainna n aran Iesu Kristo.
N te bong are imwiina, I karekea te i-meeri mai irouna. E kangai warekan mwakorona: “N te tairiki aio I kakabwaia tinau. … I namakinna ae e rangin, nako nanou ao n aki tau, ma ngaia are I a bon reitinako n tataro ni kakoaua bwa iai irou te Tamnei ibukina bwa I aki kona n anga te kakabwaia n akea ngaia. Ngke I a anga te kakabwaia, I a mwaninga arou ao kabwakau. … I [aki kantaninga] korakoran mwaakan te Tamnei are I namakinna. … Imwiin korakoran rokon tamnein te tangira iaou I aki kona n taua aron au namakin, ma ngaia are I a rabwata tinau ao n tang n aekan te ataei. … E ngae ngkai I korea aio, [I namakina] te Tamnei [ae moan te korakora are] I aki tangiria ni manga karaoa riki te bure. … I tangira te euangkerio aio.”3
E aki kamiimi noorakin te ataeinimwaane ae kona ni karaoi bwaai aika kakannato rinanon mwakurin te nakoanibonga, e ngae ngke e namakinna bwa e aki tau? N aki maan n nako, I ataa te ataeinimwaane bwa e a tia ni karekea weteakina ni mitinare ao e na rin te tienta ni kataneiai ibukiia mitinare n te namwakaina ae e na roko. I kakoaua bwa e na kairiia aomata aika mwaiti nakon Kristo bukina bwa e a tia n reiakina aron rimwiakin Kristo n ana mwakuri n te nakoanibonga—ni moanna man mweengana, ike ana katooto iai uaana ae matoatoa iaon tarina ae 14 ana ririki.
Tariu, bwa ti ataia ke tao ti aki, a karineira aomata—kaain ara utu, raao ao iruwa naba. E aki tau iroura ngkai ngaira kaain te nakoanibonga bwa ti na tii nakon Kristo, tabera ngkai ti na “kaoia ni kabane nakon Kristo.”4 Ti aki kona n rauaki ni karekei kakabwaia n te tamnei ibukira; ti riai ni kairiia aomata aika ti tangiria nakon kakabwaia aika ti te aekakina aikai—ao n riki bwa ana reirei Iesu Kristo, ti riai n tangiriia aomata ni kabane. Ana kauring te Tia Kamaiu nakon Betero bon te kauring naba nakoira: “Ngkana ko a manga rairaki, ao ko na kateimatoaia tarim.”5
Iriira te Mwaane mai Kariraia
A na iai taai ngkana e kaangaanga te kawai are i mwaaira, ma teimatoa n ira te Tia Kamaiu. E ataa te kawai; ni koauana, Boni Ngaia te kawai.6 Moantaaim n nakon Kristo, e na reke riki inanom ae korakora ni kan buokiia tabeman n namakina are ko a tia n namakinna. Te taeka riki teuana ibukin te namakin aei bon te tangira, “are E a tia [te Tama] ni katoka iaoia ake taan ririmwin Natina, ni koaua ae Iesu Kristo.”7 Ngkanne ko na kunea n te tai are ko moan karaoia n ririmwin Kristo, ko kairiia naba tabeman Nakoina, bwa n ana taeka Beretitenti Thomas S. Monson, “Ngkai ti ririmwin te Mwaane mai Kariraia—anne are bon Iesu Kristo—anaakin nanora e na namakinaki ibukin te tamaroa ike ti mena iai, ao are ti weteaki nako iai.”8
I kaota au koaua bwa ana Ekaretia Kristo e koaua. Ti kairaki iroun ana burabeti te Atua Beretitenti Monson—te tia kairiiri ae kakannato are bon te tia ririmwin te Tia Kamaiu ni koaua. N aran Iesu Kristo amen.